CNI International News

နယူးဒေလီ၊ မတ်လ ၁

အိန္ဒိယ၏ Reliance Industries ကုမ္ပဏီနှင့် အမေရိကန်၏ Walt Disney ကုမ္ပဏီတို့ပူးပေါင်းပြီး ဒေါ်လာ ၈ ဒသမ ၅ ဘီလျံ တန်ဖိုးရှိသည့် မီဒီယာနှင့် ဖျော်ဖြေရေးကုမ္ပဏီတစ်ခုကို ထူထောင်မည်ဖြစ်ကြောင်း ကြေညာခဲ့သည်ဟု အယ်လ်ဂျာဇီးယားမှ ဖော်ပြခဲ့သည်။

Reliance နှင့် Disney တို့သည် ကမ္ဘာ့လူဦးရေ အများဆုံးဖြစ်သည့် အိန္ဒိယတွင် ပြိုင်ဘက် ဖျော်ဖြေရေးကုမ္ပဏီများ ထက် ကြိုတင်လက်ဦးမှုရယူပြီး အိန္ဒိယ၏ ဖျော်ဖြေရေးစျေးကွက်၌ ကြီးမားသည့် လုပ်ငန်းတစ်ခုကို ထူထောင်ခဲ့ ခြင်းဖြစ်သည်။

ထိုပူးတွဲကုမ္ပဏီကို အာရှ၏ အချမ်းသာဆုံး အမျိုးသားဖြစ်သည့် မူကက်ရှ် အမ်ဘာနီ (Mukesh Ambani) က ဦးဆောင်သည့် Reliance ကုမ္ပဏီမှ ဒေါ်လာ ၁ ဒသမ ၄ ဘီလျံ ထည့်ဝင်မည်ဖြစ်ပြီး Reliance နှင့် ဆက်စပ် လုပ်ငန်းစုများက ထိုပူးတွဲကုမ္ပဏီ၏ ရှယ်ယာ ၆၃ ရာခိုင်နှုန်းကို ပိုင်ဆိုင်မည်ဖြစ်သည်။

ခရစ်ကတ်ပွဲကို ရုပ်သံလိုင်းက လွှင့်နေစဉ်

Disney ကုမ္ပဏီကမူ ရှယ်ယာ ၃၇ ရာခိုင်နှုန်းကို ပိုင်ဆိုင်လိမ့်မည်ဟု ဖေဖော်ဝါရီ ၂၈ ရက်က ပူးတွဲထုတ်ပြန်သည့် ကြေညာချက်တွင် ဖော်ပြထားသည်။

Disney ကုမ္ပဏီအတွက် ၎င်း၏ အိန္ဒိယရုပ်ရှင်များ ထုတ်လွှင့်သည့် streaming ပလက်ဖောင်းမှ ကြည့်ရှုသူ အများအပြား လျော့နည်းသွားမှုကို ပြန်လည်မြှင့်တင်ရန်နှင့် အိန္ဒိယခရစ်ကတ် မူပိုင်ခွင့် ပေးချေမှုများအတွက် ဒေါ်လာ ဘီလျံချီ ကုန်ကျမှုကြောင့် ဘဏ္ဍာရေးအခက်အခဲကို ဖြေရှင်းရန် ကာလကြာရှည်ရုန်းကန်ခဲ့ရပြီးနောက် Reliance ကုမ္ပဏီနှင့် လက်တွဲခဲ့ခြင်းဖြစ်သည်။

ထိုပူးတွဲကုမ္ပဏီ၏ ရင်းနှီးငွေ ထည့်ဝင်အပြီး စျေးကွက်တန်ဖိုးသည် ဒေါ်လာ ၈ ဒသမ ၅ ဘီလျံရှိသည်ဟု Reliance နှင့် Disney တို့က ကြေညာခဲ့သော်လည်း စျေးကွက်တန်ဖိုးကို မည်ကဲ့သို့ တွက်ချက် ထုတ်ပြန်ခဲ့သည်ဆိုခြင်းကိုမူ ထုတ်ဖော်ပြောဆိုခဲ့ခြင်းမရှိပေ။

 သူဌေးကြီး အမ်ဘာနီကို တွေ့ရစဉ်

Reliance နှင့် Disney ပူးပေါင်း လုပ်ငန်းစုအနေဖြင့် ရုပ်သံလိုင်းပေါင်း ၁၂၀ နှင့် streaming ပလက်ဖောင်း ၂ ခု ရှိလာမည်ဖြစ်ပြီး အမ်ဘာနီ အနေနှင့်လည်း ဒေါ်လာ ၂၈ ဘီလျံ တန်ဖိုးရှိသည့် အိန္ဒိယ၏ မီဒီယာနှင့် ဖျော်ဖြေရေး နယ်ပယ်တွင် ပြိုင်ဘက်ကင်း လုပ်ငန်းရှင်တစ်ဦး ဖြစ်လာစေမည်ဖြစ်သည်။

မကြာသေးမီက ဂျပန်၏ Sony ကုမ္ပဏီနှင့် အိန္ဒိယ၏ Zee ကုမ္ပဏီတို့က ဒေါ်လာ ၁၀ ဘီလျံတန်ဖိုးရှိ ပူးတွဲ ဖျော်ဖြေရေးကုမ္ပဏီ ထူထောင်မည့် အစီအစဉ်ကို ဖျက်သိမ်းကြောင်း ကြေညာချက် ထွက်ပေါ်ခဲ့ပြီးနောက် Reliance နှင့် Disney တို့က ပူးတွဲကုမ္ပဏီထူထောင်သည့် ကြေညာချက် ထွက်ပေါ်လာခြင်း ဖြစ်သည်။

ထို့ကြောင့် Reliance နှင့် Disney တို့၏ ပူးတွဲကုမ္ပဏီသည် သီးခြားစီ ရပ်တည်နေသည့် Sony ၊ Zee တို့ကဲ့သို့ ပြိုင်ဘက်ကုမ္ပဏီများ Amazon နှင့် Netflix တို့ကဲ့သို့ streaming ပလက်ဖောင်း စျေးကွက်ယှဉ်ပြိုင်မှုများကို နှာတစ်ဖျားအသာနှင့် ဦးဆောင်နိုင်တော့မည်ဖြစ်သည်။

Source: အယ်လ်ဂျာဇီးယား

CNI International News

ဝါရှင်တန်၊ ဖေဖော်ဝါရီ ၂၄

မျိုးဆက်သစ် လူငယ်များအကြား ရေပန်းစားသည့် Vice Media ကုမ္ပဏီက ၎င်း၏ ဝက်ဘ်ဆိုက်တွင် သတင်း အကြောင်းအရာသစ်များကို တင်ဆက်နေမှုကို ရပ်နားတော့မည်ဖြစ်ကြောင်း ကြေညာခဲ့သဖြင့် မီဒီယာလောက အတွက် နောက်ထပ် ထိုးနှက်ချက် တစ်ခုဖြစ်ခဲ့သည်ဟု အယ်လ်ဂျာဇီးယားမှ ဖော်ပြခဲ့သည်။

Vice Media ကုမ္ပဏီသည် မေလအတွင်းက ဒေဝါလီခံကြောင်း တင်သွင်းခဲ့ပြီး နယူးယောက်အခြေစိုက် Fortress Investment Group ကို ဒေါ်လာ သန်း ၃၅၀ နှင့် ရောင်းချခဲ့သည်။

Vice Media သည် ဝန်ထမ်းအင်အားများကို လျှော့ချခြင်း၊ ၎င်း၏ လူကြိုက်များသည့် Vice News Tonight ပရိုဂရမ်ကို ရပ်နားခြင်းဖြင့် အသုံးစရိတ်များလျှော့ချကာ လည်ပတ်ခဲ့သော်လည်း ဝင်ငွေနှင့် ထွက်ငွေ မကာမိခဲ့ သဖြင့် ဒစ်ဂျစ်တယ်ခေတ်တွင် သတင်းမီဒီယာများ ရုန်းကန်နေရသည့် အခြေအနေကို မီးမောင်းထိုးပြသရာ ရောက်ခဲ့သည်။

Vice သည် Vice.com ဝက်ဆိုက်တွင် အကြောင်းအရာများ တင်ဆက်မှုကို ရပ်နားမည်ဖြစ်ပြီး အခြား မီဒီယာ ကုမ္ပဏီများနှင့် တွဲဖက်ပြီး ဆက်လက် လုပ်ဆောင်သွားမည်ဟု Vice Media Group ၏ စီအီးအို ဘရုစ် ဒစ်ဆင် (Bruce Dixon) က ပြောကြားခဲ့သည်။

“အခုလို မဟာဗျူဟာမြောက် အပြောင်းအလဲ ပြုလုပ်ရတာဟာ ကျနော်တို့ရဲ့ လုပ်ငန်းစဉ် အားလုံးနဲ့ အရင်းအမြစ် တွေကို ပြန်လည်ချိန်ညှိဖို့ လိုအပ်လို့ဖြစ်ပါတယ်။ ကုမ္ပဏီကို စတူဒီယို မော်ဒယ်တစ်ခုလို အသွင်ပြောင်းလဲသွားမှာ ပါ”ဟု ဒစ်ဆင်က ပြောကြားခဲ့သည်။

ထိုအပြောင်းအလဲကြောင့် မိမိတို့၏ ဝန်ထမ်းအင်အားကို လျှော့ချရမည်ဖြစ်ပြီး ရာနှင့်ချီသည့် ဝန်ထမ်းများ အလုပ်ပြုတ်လိမ့်မည်ဟုလည်း ၎င်းက ဆိုသည်။

အသုံးစရိတ်များ လျှော့ချဖြတ်တောက်မှု၏ နောက်ထပ် အသေးစိတ် အချက်အလက်များကို လာမည့် သီတင်းပတ် အတွင်း ထုတ်ပြန်ကြေညာသွားမည်ဟု သိရသည်။

ဇန်နဝါရီလကလည်း လူငယ်ရေးရာများကို အလေးထားဖော်ပြသည့် Pitchfork Media က ၎င်း၏ ဝက်ဘ်ဆိုက်ကို GQ Magazine လက်အောက်သို့ ပူးပေါင်းဝင်ရောက် မည်ဖြစ်ကြောင်း ကြေညာခဲ့သည်။

Source: အယ်လ်ဂျာဇီးယား

CNI International News

ကာရာကက်စ်၊ ဖေဖော်ဝါရီ ၂၃ 

ဗင်နီဇွဲလားနှင့် ရုရှားနိုင်ငံအအကြား ပူးပေါင်းဆောင်ရွက်မှုတွင် အထင်ကြီးစရာကောင်းသည့် ရလဒ်များ ထွက်ပေါ် ခဲ့ကြောင်း ဗင်နီဇွဲလားသမ္မတ နီကိုလပ်စ် မာဒူရို (Nicolas Maduro) က ပြောကြားခဲ့ကြောင်း တာ့စ်သတင်းဌာနမှ ဖော်ပြခဲ့သည်။

“မနေ့က ကျနော် ရုရှားနိုင်ငံခြားရေးဝန်ကြီးနဲ့ တွေ့ဆုံခဲ့ပြီး နှစ်နိုင်ငံအကြား အထင်ကြီးစရာကောင်းတဲ့ ရလဒ်တွေ ရရှိခဲ့ပါတယ်။ ရုရှားစီးပွားရေး လုပ်ငန်းရှင်အဖွဲ့ဟာ ဗင်နီဇွဲလားကို လာရောက်ပြီး လယ်ယာစိုက်ပျိုးရေးပစ္စည်း ကိရိယာတွေနဲ့ လယ်ယာထွက်ကုန်ကဏ္ဍမှာ ရင်းနှီးမြှုပ်နှံဖို့ စီစဉ်နေပါတယ်”ဟု မာဒူရိုက Venezolana de Television ရုပ်သံနှင့် ပြုလုပ်ခဲ့သည့် အင်တာဗျူးတွင် ပြောကြားခဲ့သည်။

ရုရှားနိုင်ငံခြားရေးဝန်ကြီး ဆာဂျေ လာဗရော့ဗ် (Sergey Lavrov) ကလည်း ရုရှားသည် အနောက်နိုင်ငံများ၏ ပိတ်ဆို့မှုများကြောင့် ထိခိုက်ခဲ့ရသည့် ဗင်နီဇွဲလား၏ လယ်ယာထွက်ကုန်များကို ဝယ်ယူရန် အသင့်ရှိကြောင်း ကြေညာခဲ့သည်။

“ဒါဟာ ဗင်နီဇွဲလားရဲ့ လယ်ယာထွက်ကုန်တွေ တင်ပို့ရောင်းချမှုအတွက် နောက်ထပ် အားပေးကူညီမှုတစ်ခု ဖြစ်ပါတယ်”ဟု လာဗရော့ဗ်က ပြောသည်။

ဗင်နီဇွဲလား နိုင်ငံခြားရေး ဝန်ကြီး ယီဗန်ဂျီလ်ပင်တိုကို တွေ့ရစဉ်

လာဗရော့ဗ်သည် နှစ်နိုင်ငံအကြား မဟာဗျူဟာမြောက် ပူးပေါင်းဆောင်ရွက်မှုနှင့် ခင်မင်ရင်းနှီးမှုရှိသည့် ဆက်ဆံရေးများကို ပိုမိုခိုင်မာစေရန် ဗင်နီဇွဲလားသို့ သွားရောက်ခဲ့ခြင်းဖြစ်သည်ဟု ဗင်နီဇွဲလား နိုင်ငံခြားရေး ဝန်ကြီး ယီဗန်ဂျီလ်ပင်တို (Yvan Gil Pinto)က ၎င်း၏ X လူမှုမီဒီယာတွင် ရေးသားဖော်ပြခဲ့သည်။

“လာဗရော့ရဲ့ ခရီးစဉ်ဟာ ရုရှားနဲ့ ဗင်နီဇွဲလားနိုင်ငံကြားက ခိုင်မာပြီး ရင်းနှီးမှုရှိတဲ့ ဆက်ဆံရေးကို ပြသခြင်းဖြစ်ပါ တယ်”ဟု ၎င်းက ပြောကြားခဲ့သည်။

ကိုလိုနီဝါဒကို ဆန့်ကျင်ရေး၊ အချုပ်အခြာအာဏာပိုင် နိုင်ငံများအပေါ် တစ်ဖက်သတ် ပိတ်ဆို့မှုများ ချမှတ်သည့် နိုင်ငံများကို ဆန့်ကျင်ရေးတို့အတွက် မဟာဗျူဟာမြောက် ပူးပေါင်းဆောင်ရွက်မှုကို ပိုမိုခိုင်မာအောင် လုပ်ဆောင် ရန် ဆုံးဖြတ်ခဲ့သည်ဟု ပင်တိုက ပြောသည်။

“ရုရှားနဲ့ ဗင်နီဇွဲလားဟာ နိုင်ငံတကာဥပဒေကို ကာကွယ်ဖို့အတွက် ဆက်လက်ပြီး တက်ကြွစွာ တိုက်ပွဲဝင်သွား မှာပါ”ဟု ဗင်နီဇွဲလားနိုင်ငံခြားရေးဝန်ကြီးက ပြောသည်။

ရုရှားနိုင်ငံခြားရေးဝန်ကြီး လာဗရော့ဗ်သည် ဖေဖော်ဝါရီ ၂၁ ရက်က ဗင်နီဇွဲလားသို့ ၁ ရက်ကြာ ခရီးစဉ်အဖြစ် လာရောက်ခဲ့ပြီး ဗင်နီဇွဲလားသမ္မတ မာဒူရိုနှင့် အစည်းအဝေး ပြုလုပ်ခဲ့သည်။

Source: တာ့စ်

CNI International News

မော်စကို၊ ဖေဖော်ဝါရီ ၂၁

မြန်မာနိုင်ငံသည် BRICS အဖွဲ့၏ ဘုံငွေကြေး မိတ်ဆက်မှု အစီအစဉ် အပါအဝင် BRICS အဖွဲ့အပေါ် စိတ်ဝင် စားနေပြီး ထိုအဖွဲ့အကြောင်းကို လေ့လာနေသည်ဟု မြန်မာနိုင်ငံ၏ ရင်းနှီးမြှုပ်နှံမှုနှင့် ပြည်ပစီးပွားရေး ဆက်ဆံရေးဝန်ကြီး ဦးကံဇော်က ဖေဖော်ဝါရီ ၂၀ ရက်က ပြောကြားခဲ့သည်ဟု Sputnik မှ ဖော်ပြခဲ့သည်။

“၂၀၂၃ ခုနှစ်၊ မေလကတည်းက ကျနော်တို့ဟာ ရှန်ဟိုင်း ပူးပေါင်းဆောင်ရွက်ရေးအဖွဲ့ (Shanghai Cooperation Organisation- SCO) ရဲ့ ဆွေးနွေးပွဲ မိတ်ဖက်နိုင်ငံအဖြစ် အသိအမှတ်ပြု ခံခဲ့ရပါတယ်။ ကျနော်တို့ဟာ BRICS အဖွဲ့နဲ့ အဲဒီအဖွဲ့ရဲ့ အခြေအနေကို လေ့လာနေပါတယ်။ ဒါ့အပြင် ကျနော်တို့ဟာ BRICS ရဲ့ ဘုံငွေကြေး အစီအစဉ်နဲ့ BRICS အဖွဲ့ကို စိတ်ဝင်စားပါတယ်” ဟု ဦးကံဇော်က အင်တာဗျူးတွင် ပြောကြားခဲ့သည်။

၂၀၂၂ ခုနှစ်၊ ဇွန်လတွင် ရုရှားသမ္မတ ပူတင် (Vladimir Putin)က BRICS စီးပွားရေးဖိုရမ်တွင် မိန့်ခွန်းပြောကြား ခဲ့ချိန်က အဓိက ပေါ်ထွန်းစ စီးပွားရေးအင်အားကြီး နိုင်ငံများအနေဖြင့် BRICS ငွေကြေးအပေါ် အခြေခံပြီး နိုင်ငံ တကာငွေကြေး အရံစနစ်တစ်ခု ထူထောင်သင့်ကြောင်း ပြောကြားခဲ့သည်။

BRICS အဖွဲ့ကို တွေ့ရစဉ်

ထိုကဲ့သို့ ငွေကြေးစနစ်တစ်ခု ထူထောင်ရန် နှစ်နှင့်ချီ ကြာမြင့်မည်ဖြစ်သော်လည်း နောက်ဆုံးတွင် အကောင် အထည် ဖော်နိုင်ခဲ့မည်ဆိုပါက အနောက်နိုင်ငံများ၏ ဒေါ်လာငွေကြေးစနစ်နှင့် BRICS ငွေကြေးစနစ်အကြား ပြိုင်ဆိုင်မှု ရှိလာမည်ဖြစ်သည်။

၂၀၂၃ ခုနှစ်၊ ဩဂုတ်လကလည်း ရုရှား၏ ကုန်သည်ကြီးများအသင်းနှင့် စက်မှုလုပ်ငန်းအကြီးအကဲ ဆာဂျေ ကတ်တာယင် (Sergey Katyrin)က နိုင်ငံပေါင်း ၅၀ နီးပါးသည် BRICS အဖွဲ့ထဲသို့ ဝင်ရန် စိတ်ဝင်စားနေပြီး ၁၇ နိုင်ငံသည် တရားဝင် လျှောက်လွှာများ တင်သွင်းထားပြီးဖြစ်ကြောင်း ပြောကြားခဲ့သည်။

ဘရာဇီးလ်၊ ရုရှား၊ အိန္ဒိယ၊ တရုတ်နှင့် တောင်အာဖရိကနိုင်ငံတို့က စတင်ဖွဲ့စည်းခဲ့သည့် (BRICS) အဖွဲ့အနေဖြင့် အဖွဲ့ဝင်နိုင်ငံများအကြား ကုန်သွယ်မှုများတွင် ဘုံငွေကြေးကို အသုံးပြုသော စနစ်တစ်ခုကို ထူထောင်သင့်ကြောင်း ၂၀၂၃ ခုနှစ်၊ စက်တင်ဘာလက ပထဝီနိုင်ငံရေးကျွမ်းကျင်သူ ပီပီအက်စကိုဘား (Pepe Escobar)က Sputnik သို့ ပြောကြားခဲ့သည်။

ယခုနှစ် ဇန်နဝါရီ ၁ ရက်မှစပြီး အီဂျစ်၊ အီသီယိုပီးယား၊ အီရန်၊ ယူအေအီးနှင့် ဆော်ဒီအာရေဗျနိုင်ငံတို့သည် BRICS အဖွဲ့၏ အဖွဲ့ဝင်သစ်များ ဖြစ်လာခဲ့သည်။

Source: Sputnik

CNI International News

ပြုံယမ်း၊ ဖေဖော်ဝါရီ ၉

ကိုရီးယားနှစ်နိုင်ငံအကြား ဆက်ဆံရေးများ ယိုယွင်းနေချိန်တွင် မြောက်ကိုရီးယား လွှတ်တော်က တောင်ကိုရီးယားနှင့် စီးပွားရေး ပူးပေါင်းဆောင်ရွက်မှု သဘောတူညီချက် အားလုံးကို စွန့်လွှတ်ရန် မဲပေး အတည်ပြုခဲ့သည်ဟု အယ်လ်ဂျာဇီးယားမှ ဖော်ပြခဲ့သည်။ 

ပြီးခဲ့သည့််လက မြောက်ကိုရီးယားသည် တောင်ကိုရီးယားကို ၎င်း၏ အဓိကရန်သူအဖြစ် ကြေညာခြင်း၊ ပြန်လည် ပေါင်းစည်းရေး အေဂျင်စီများနှင့် အဆက်အသွယ်ဖြတ်ခြင်း၊ စစ်ပွဲအတွင်း တောင်ကိုရီးယားကို သိမ်းပိုက်မည်ဟု ခြိမ်းခြောက်ခဲ့ပြီးနောက် ယခုဆုံးဖြတ်ချက် ထွက်ပေါ်လာခြင်းဖြစ်သည်။ 

မြောက်ကိုရီးယား အာဏာရ အလုပ်သမားပါတီ၏ မူဝါဒများအတွက် တရားဝင် အစီအစဉ်များ ချမှတ်လုပ်ဆောင် ရသည့် အမြင့်ဆုံး ပြည်သူ့လွှတ်တော်သည် ဖေဖော်ဝါရီ ၇ ရက်က ကိုရီးယားနှစ်နိုင်ငံအကြား စီးပွားရေး ပူးပေါင်း ဆောင်ရွက်မှုနှင့်ပတ်သက်သည့် ဥပဒေကို ပယ်ဖျက်ရန် မဲပေးခဲ့သည်ဟု မြောက်ကိုရီးယားနိုင်ငံပိုင် KCNA သတင်းအေဂျင်စီက ဖေဖော်ဝါရီ ၈ ရက်တွင် ဖော်ပြခဲ့သည်။

မြောက်ကိုရီးယားက ၎င်း၏ လက်နက်ထုတ်လုပ်ရေး စီမံကိန်းများကို အရှိန်မြှင့်တင်ခြင်း၊ တောင်ကိုရီးယားက အမေရိကန်၊ ဂျပန်တို့နှင့် စစ်ရေးပူးပေါင်း ဆောင်ရွက်မှုများကို မြှင့်တင်ခြင်းတို့ကြောင့် ကိုရီးယားနှစ်နိုင်ငံအကြား ဆက်ဆံရေးများသည် မတိုးသာ၊ မဆုတ်သာ အခြေအနေသို့  ရောက်ရှိနေသည်။ 

မြောက်ကိုရီးယား လွှတ်တော်သည် ၂၀၀၀ ပြည့်နှစ် အစောပိုင်းက စတင်ခဲ့သည့်် ကိုရီးယားနှစ်နိုင်ငံအကြား စီးပွားရေး ပူးပေါင်းဆောင်ရွက်မှု၏ သင်္ကေတတစ်ခုဖြစ်ပြီး ခရီးသွားများကို ဖိတ်ခေါ်သော Mount Kumgang ခရီးသွားလာရေး စီမံကိန်းနှင့် ပတ်သက်သည့် ဥပဒေများကိုလည်း ဖျက်သိမ်းခဲ့သည်။ 

 မြောက်ကိုရီးယား စီးပွားရေးကော်မတီကို တွေ့ရစဉ်

၂၀၀၈ ခုနှစ်က ထိုခရီးသွားလာရေး နေရာတွင် ကန့်သတ်တားမြစ်ထားသည့် နေရာအတွင်းသို့ ဝင်ရောက်ခဲ့သော တောင်ကိုရီးယား ခရီးသွားတစ်ဦးကို မြောက်ကိုရီးယားအစောင့်များက ပစ်ခတ်သတ်ဖြတ်ခဲ့ပြီးကတည်းက ထိုစီမံကိန်းသည် ရပ်ဆိုင်းခဲ့သည်။

Mount Kumgang အပန်းဖြေစခန်းသည် တစ်ချိန်က ကိုရီးယားနှစ်နိုင်ငံအကြား အကြီးဆုံး စီးပွားရေး ပူးပေါင်း ဆောင်ရွက်မှု စီမံကိန်းများဖြစ်ပြီး ထိုစီမံကိန်းအောင်မြင်မှု အရှိဆုံးအချိန်ကာလက ထိုအပန်းဖြေစခန်းအနီးရှိ ကေဆောင် (Kaesong) စက်မှုဇုန်တွင် တောင်ကိုရီးယားကုမ္ပဏီပေါင်း ၁၂၅ ခုရှိကာ မြောက်ကိုရီးယားဝန်ထမ်း ၅၅၀၀၀ ခန့် ခန့်အပ်ထားသည်။

သို့သော် ၂၀၁၆ ခုနှစ်က မြောက်ကိုရီးယား၏ နျူကလီးယားစမ်းသပ်မှုနှင့် ဒုံးပျံပစ်လွှတ်မှုကို တုန့်ပြန်သည့်အနေ ဖြင့် တောင်ကိုရီးယားသည် ထိုကုမ္ပဏီများကို ပြန်လည်ရုပ်သိမ်းခဲ့ပြီး ကေဆောင် စက်မှုဇုန်သည် မြောက်ကိုရီးယား၏ လက်နက်စီမံကိန်းများအတွက် ရန်ပုံငွေထောက်ပံ့ပေးရာ ရောက်နေသည်ဟု ပြောကြားခဲ့ သည်။

တောင်ကိုရီးယားသမ္မတ ယွန်းဆော့ရွဲ (Yoon Suk Yeol) ကမူ မြောက်ကိုရီးယားလွှတ်တော်၏ ဆုံးဖြတ်ချက်သည် သာမန်ထက်လွန်ကဲသည့် ပြောင်းလဲမှုတစ်ခုဖြစ်ကြောင်း၊ သို့သော် မြောက်ကိုရီးယား၏ သဘောထားကို နားလည် ရခက်ခဲကြောင်း ဖေဖော်ဝါရီ ၇ ရက်က ပြောကြားခဲ့သည်။

Source: အယ်လ်ဂျာဇီးယား

CNI International News

ဘန်ကောက်၊ ဖေဖော်ဝါရီ ၈

စွမ်းအင်အရင်းအမြစ် ကြွယ်ဝသည့် ထိုင်းပင်လယ်ကွေ့ (Gulf of Thailand) အတွင်း ပင်လယ်ရေကြောင်းဆိုင်ရာ နယ်နိမိတ်များ သတ်မှတ်မှုနှင့််ပတ်သက်ပြီး ထိုင်းနှင့် ကမ္ဘောဒီးယားအကြား အငြင်းပွားမှုများကို ဆွေးနွေးသွားရန် နှစ်နိုင်ငံခေါင်းဆောင်များက ဖေဖော်ဝါရီ ၇ ရက်တွင် သဘောတူခဲ့ကြသည်ဟု Nikkei Asia မှ ဖော်ပြခဲ့သည်။

ထိုင်းဝန်ကြီးချုပ် ဆရီသာ သာဗီဆင် (Srettha Thavisin) နှင့် ကမ္ဘောဒီးယားဝန်ကြီးချုပ် ဟွန်မာနက် (Hun Manet) တို့သည် ဘန်ကောက်မြို့တော်တွင် တွေ့ဆုံခဲ့ကြပြီး နှစ်နိုင်ငံအကြား ဟိုက်ဒရိုကာဘွန် အရင်းအမြစ် များကို ပူးပေါင်းတူးဖော်ရေးအတွက်လည်း ဆွေးနွေးကြမည်ဟု ကြေညာခဲ့သည်။

စွမ်းအင်တင်ပို့မှုများကို မှီခိုနေသည့် ထိုင်းနိုင်ငံသည် ထိုင်းပင်လယ်ကွေ့အတွင်း ခန့်မှန်းခြေ ၁၁ ထရီလျံ ကုဗပေ ရှိသည့်် သဘာဝဓာတ်ငွေ့များနှင့် ကြီးမားသည့် ရေနံသိုက် တည်ရှိသည့် ၂၇၀၀၀ စတုရန်းကီလိုမီတာ အကျယ်ရှိ သည့် ရေပြင်နယ်နိမိတ်အတွင်း ကမ္ဘောဒီးယားနှင့် စွမ်းအင်များ ပူးပေါင်းတူးဖော်ရန် စိတ်အား ထက်သန်လျက်ရှိ သည်။

"ထိုင်းနဲ့ ကမ္ဘောဒီယားဟာ နှစ်စဉ်နှစ်တိုင်း စွမ်းအင်ပမာဏ အများကြီးကို တင်သွင်းခဲ့ပါတယ်။ ကျနော်တို့ဟာ စွမ်းအင်လုံခြုံရေးနယ်ပယ်မှာ ကျနော်တို့ရဲ့ ပူးပေါင်းဆောင်ရွက်မှုတွေကို မြှင့််တင်ဖို့ ဆွေးနွေးပြီး သဘောတူညီခဲ့ ကြပါတယ်"ဟု ဆရီသာက သတင်းထောက်များကို ပြောကြားခဲ့သည်။

ထိုင်းနဲ့ ကမ္ဘောဒီးယား ရေပိုင်နက်ကို တွေ့ရစဉ်

ထို့ပြင် နှစ်နိုင်ငံအကြား ဟိုက်ဒရိုကာဘွန် အရင်းအမြစ်များကို ပူးတွဲတူးဖော်ရေးကို ထပ်မံပြုလုပ်ရန်၊ ပင်လယ် ရေကြောင်းဆိုင်ရာ အသေးစိတ် အချက်အလက်များနှင့်ပတ်သက်ပြီး တိုးတက်မှုများရရှိရန် ကြိုးပမ်းနေသည်။

ထို့နောက် မိမိတို့၏ သယံဇာတများကို တူးဖော်ရေးနှင့် ပတ်သက်သည့် အရေးကိစ္စများကို ဆွေးနွေးရန် သဘောတူ ခဲ့ကြသည်ဟု ဆရီသာက ပြောသည်။

ထိုင်းနှင့်် ကမ္ဘောဒီးယားအကြား နယ်မြေပိုင်ဆိုင်မှု အငြင်းပွားသည့် ပြဿနာကို မည်ကဲ့သို့ ဖြေရှင်းမည်ဆိုခြင်းကို အာဆီယံ အိမ်နီးချင်းနိုင်ငံများနှင့် တရုတ်က အနီးကပ်စောင့်ကြည့်လိမ့်မည်ဖြစ်သည်။

ထိုင်းအရာရှိများကမူ နယ်နိမိတ် အချုပ်အခြာ ပိုင်ဆိုင်မှုနှင့်ပတ်သက်ပြီး နောက်ဆုံး ကြေညာချက်နှင့် သက်ဆိုင် ခြင်းမရှိသည့် ကမ္ဘောဒီးယားနှင့် စွမ်းအင် သဘောတူညီချက် တစ်ခုကို အဆိုပြုခဲ့သည်ဟု အစောပိုင်းက ပြောကြား ခဲ့သည်။ 

ဖေဖော်ဝါရီ ၇ ရက်တွင် ကမ္ဘောဒီးယားနှင့် ထိုင်းဝန်ကြီးများသည် ကုန်သွယ်ရေးနှင့် ရင်းနှီးမြှုပ်နှံရေးကိစ္စများတွင် ထိုင်းဗဟိုဘဏ်၏ ပို့ကုန်-သွင်းကုန်ဌာနနှင့် ကမ္ဘောဒီးယား ကုန်သည်ကြီးများအသင်းအကြား နားလည်မှု စာချွန်လွှာတစ်ခု အပါအဝင် နားလည်မှုစာချွန်လွှာ ၅ ခုကို လက်မှတ်ရေးထိုးခဲ့ကြသည်။

 ပင်လယ်ရေပိုင်နက်အတွင်း ရေနံတူးဖော်နေစဉ်

၂၀၂၃ ခုနှစ်က ထိုင်းနှင့် ကမ္ဘောဒီးယားအကြား ကုန်သွယ်မှု တန်ဖိုးသည် ဒေါ်လာ ၈ ဘီလျံရှိခဲ့ပြီး ၂၀၂၅ ခုနှစ်တွင် နှစ်နိုင်ငံအကြား ကုန်သွယ်မှုတန်ဖိုး ဒေါ်လာ ၁၅ ဘီလျံအထိ ရောက်ရှိစေရန် မျှော်မှန်းထားသည်။ 

ထိုင်းသည် ကမ္ဘောဒီးယား၏ ရင်းနှီးမြှုပ်နှံမှု အများဆုံးနိုင်ငံများ စာရင်းတွင် အဆင့် ၉ နေရာ၌ ရှိနေသော်လည်း ထိုင်းသို့ လာရောက်သည့် ခရီးသွားများထဲတွင် ကမ္ဘောဒီးယားခရီးသွားများက ထိပ်ဆုံးနေရာမှာ ရှိနေသည်။

ထို့ပြင် နှစ်နိုင်ငံအကြား မော်တော်ယာဉ်၊ လျှပ်စစ်ပစ္စည်း၊ ဆေးဝါး အသုံးအဆောင်များ အပါအဝင် အရေးကြီးသည့် နယ်ပယ်များတွင် ထောက်ပံ့ရေး ကွင်းဆက်ကို မြှင့်တင်ရန် ဆွေးနွေးခဲ့သည်ဟုလည်း ဟွန်မာနက်က ပြောကြားခဲ့ သည်။

Source: Nikkei Asia

CNI International News

ဝါရှင်တန်၊ ဖေဖော်ဝါရီ ၇

McDonald's ကုမ္ပဏီက ၄ နှစ်နီးပါး ကာလအတွင်း ၎င်း၏ နောက်ဆုံး ၃ လပတ်ကာလတွင် သတ်မှတ်ထားသည့် ရောင်းအား ပြည့်မီခဲ့ခြင်းမရှိသဖြင့် ဂါဇာ၌ဆင်နွှဲနေသည့် အစ္စရေးစစ်ပွဲကို အပြစ်တင်ခဲ့ကြောင်း အယ်လ်ဂျာဇီးယားမှ ဖော်ပြခဲ့သည်။

ထိုစစ်ပွဲသည် အရှေ့အလယ်ပိုင်းဒေသ နိုင်ငံများနှင့် မလေးရှား၊ အင်ဒိုနီးရှားကဲ့သို့ မူဆလင် အများစုနေထိုင်သည့် နိုင်ငံများတွင် ကုမ္ပဏီ၏ ရောင်းအားအပေါ် ဆိုးရွားစွာ သက်ရောက်ခဲ့ကြောင်း McDonald's စီအီးအို ခရစ် ကမ့်ပ်ဇင်စကီး (Chris Kempczinski) က ဖေဖော်ဝါရီ ၅ ရက်တွင် ပြောကြားခဲ့သည်။

"စစ်ပွဲက ဖြစ်ပွားနေတဲ့ ကာလပတ်လုံး ကျနော်တို့ရဲ့ ရောင်းအား တိုးတက်လာမှာ မဟုတ်ပါဘူး။ ဒါဟာ လူသားတွေအတွက် ဝမ်းနည်းစရာပါပဲ။ ဒီစစ်ပွဲဟာ ကျနော်တို့လိုမျိုး အခြားနာမည်ကြီး ကုမ္ပဏီတွေအပေါ် သက်ရောက်မှု ရှိလိမ့်မယ်လို့ ကျနော်ထင်ပါတယ်" ဟု ကမ့်ပ်ဇင်စကီးက ပြောသည်။ 

၂၀၂၃ ခုနှစ်၊ အောက်တိုဘာလမှ ဒီဇင်ဘာလအတွင်း အရှေ့အလယ်ပိုင်းဒေသ၊ တရုတ်နှင့် အိန္ဒိယနိုင်ငံများတွင် McDonald's ကုမ္ပဏီ၏ ရောင်းအားသည် ၀ ဒသမ ၇ ရာခိုင်နှုန်းသာရှိခဲ့ပြီး မျှော်မှန်းထားသည့် ပမာဏထက် ၅ ဒသမ ၅ ရာခိုင်နှုန်း လျော့ကျခဲ့သည်။

 McDonald's စီအီးအို ခရစ် ကမ့်ပ်ဇင်စကီးကို တွေ့ရစဉ်

McDonald's ကုမ္ပဏီ၏ အစ္စရေးနိုင်ငံရှိ လုပ်ငန်းခွဲသည် အစ္စရေးစစ်တပ်ကို စားစရာများ လှူဒါန်းခဲ့သဖြင့် ထိုလုပ်ဆောင်မှုကို ကန့်ကွက်သည့်အနေဖြင့် မွတ်ဆလင်နိုင်ငံများက McDonald's ကုမ္ပဏီကို သပိတ်မှောက်ရန် တိုက်တွန်းခဲ့ပြီးနောက် ရောင်းအားများ ကျဆင်းခဲ့ခြင်းဖြစ်သည်။

McDonald's Israel လုပ်ငန်းစု၏ ကြေညာချက် ထွက်ပေါ်လာခဲ့ပြီးနောက် ဆော်ဒီအာရေဗျ၊ အိုမန်၊ ကူဝိတ်၊ ယူအေအီး၊ ဂျော်ဒန်၊ အီဂျစ်၊ ဘာရိန်းနှင့် တူရကီနိုင်ငံတို့မှ McDonald's လုပ်ငန်းစုများသည် အစ္စရေးစစ်သားများ အား လှူဒန်းခဲ့ခြင်းမရှိဘဲ ဂါဇာဒေသရှိ ပါလက်စတိုင်းများအား ဒေါ်လာ သန်းနှင့်ချီသည့် အကူအညီများပေးမည်ဟု ကတိပြုခဲ့ကြသည်။

အမေရိကန်နိုင်ငံ၊ ချီကာဂို (Chicago) မြို့ အခြေစိုက် McDonald's လုပ်ငန်းစုသည် အမေရိကန်၏ နာမည်အကြီး ဆုံး ကုန်ပစ္စည်း အမှတ်တံဆိပ်များထဲတွင် တစ်ခု အပါအဝင်ဖြစ်ပြီး ကမ္ဘာတစ်ဝန်းတွင် စားသောက်ဆိုင်များ ဖွင့်လှစ်ပြီး လုပ်ငန်းလည်ပတ်လျက်ရှိသည်။
McDonald's ကုမ္ပဏီအပြင် အစ္စရေးအား ထောက်ခံသည်ဟု စွပ်စွဲခံရပြီး သပိတ်မှောက်ခံခဲ့ရသည့် အနောက်နိုင်ငံ များ၏ ကုမ္ပဏီများလည်း ရှိခဲ့သည်။

Source: အယ်လ်ဂျာဇီးယား

CNI International News

ရီးယာ့ဒ်၊ ဖေဖော်ဝါရီ ၂

ဆော်ဒီအာရေဗျနှင့် အခြားနိုင်ငံ လေးနိုင်ငံသည် BRICS အဖွဲ့ထဲသို့ ဝင်ရောက်ရန် ဖိတ်ကြားချက်ကို လက်ခံခဲ့ ကြောင်း တောင်အာဖရိက နိုင်ငံခြားရေးဝန်ကြီး နာလီဒီ ပန်ဒေါ်(Naledi Pandor) က ပြောကြားခဲ့သည်ဟု Japan Times မှ ဖော်ပြခဲ့သည်။

ယခုနှစ်အတွင်း BRICS အဖွဲ့၏ အလှည့်ကျဥက္ကဋ္ဌ ရာထူးကို တောင်အာဖရိကထံမှ လွှဲပြောင်းရယူမည့် ရုရှားသည် BRICS အဖွဲ့ထဲသို့ ဝင်ရောက်ရန် ဆန္ဒရှိသည့် နိုင်ငံပေါင်း ၃၄ နိုင်ငံထံမှ အကြောင်းကြာစာများကို လက်ခံရရှိခဲ့ သည်ဟု ပန်ဒေါ်က ပြောသည်။ 

လက်ရှိတွင် ဆော်ဒီအာရေဗျ၊ အီရန်၊ အီဂျစ်၊ အီသီယိုပီးယားနှင့် ယူအေအီးနိုင်ငံတို့သည့် BRICS အဖွဲ့၏ တန်းပြည့် အဖွဲ့ဝင်သစ်များ ဖြစ်လာခဲ့သည်။

အာဂျင်တီးနားနိုင်ငံ၏ ယခင်အစိုးရသည် BRICS အဖွဲ့ဝင်ဖြစ်ရန် လျှောက်ထားခဲ့သော်လည်း နောက်တက်လာ သည့် ယခုအစိုးရအဖွဲ့က BRICS အဖွဲ့ထဲသို့ မဝင်ရန် ဆုံးဖြတ်ခဲ့သဖြင့် ၎င်းတို့၏ ဆုံးဖြတ်ချက်ကို မိမိတို့ လက်ခံ ကြောင်း ပန်ဒေါ်က ပရီတိုးရီးယား (Pretoria) မြို့တော်တွင် ဇန်နဝါရီ ၃၁ ရက်က ပြုလုပ်ခဲ့သည့် သတင်းစာ ရှင်းလင်းပွဲတွင် ပြောကြားခဲ့သည်။

ပြီးခဲ့သည့်နှစ် သြဂုတ်လက တောင်အာဖရိကနိုင်ငံ ဂျိုဟန်နက်စဘတ်ချ် (Johannesburg) မြို့တွင် ပြုလုပ်ခဲ့သည့် BRICS အစည်းအဝေး၌ အဖွဲ့ဝင်နိုင်ငံများဖြစ်သည့် ဘရာဇီးလ်၊ ရုရှား၊ အိန္ဒိယ၊ တရုတ်နှင့် တောင်အာဖရိကနိုင်ငံ များမှ ခေါင်းဆောင်များသည် အဖွဲ့ဝင်နိုင်ငံ အရေအတွက်ကို တိုးချဲ့ရန် သဘောတူခဲ့ကြသည်။

BRICS ကို ထူထောင်ခဲ့သည့် နိုင်ငံ ၅ နိုင်ငံမှ ခေါင်းဆောင်များကို တွေ့ရစဉ်

ထို့ပြင် BRICS နိုင်ငံခြားရေးဝန်ကြီးများသည် တန်းပြည့် အဖွဲ့ဝင်နိုင်ငံများအဖြစ် လက်မခံခဲ့သည့် နိုင်ငံပေါင်း ၁၇ နိုင်ငံနှင့် ဆက်ဆံမှုများ ပြုလုပ်ရန် BRICS မိတ်ဖက်နိုင်ငံများဆိုသည့် အစီအစဉ်ကိုလည်း ဖော်ဆောင်လျက်ရှိ သည်။

BRICS အဖွဲ့ဝင်နိုင်ငံများ အနေနှင့်် အဖွဲ့ဝင် နိုင်ငံအချင်းချင်း ကုန်သွယ်မှုများအတွက် မိမိတို့၏ သက်ဆိုင်ရာ နိုင်ငံသုံး ငွေကြေးများကို အသုံးပြုခွင့် ပေးရန်အတွက်လည်း မူဘောင်တစ်ခုကို ဖော်ဆောင်လျက်ရှိသည်။ 

လက်ရှိ ကုန်သွယ်မှုများသည် အမေရိကန် ဒေါ်လာကို အခြေပြုပြီး ငွေပေးချေသည့်စနစ်ကို အသုံးပြုနေသဖြင့် ထိုစနစ်သည် မျှတမှုမရှိဘဲ ငွေကုန်ကြေးကျ ပိုမိုများပြားသည်ဟု တောင်အာဖရိက နိုင်ငံခြားရေးဝန်ကြီးက ပြောကြားခဲ့သည်။

Source: Japan Times

CNI International News

တိုကျို၊ ဖေဖော်ဝါရီ ၂

ပြီးခဲ့သည့်နှစ်က တရုတ်သည် ဂျပန်ကို ကျော်တက်ပြီး ကမ္ဘာ့နံပါတ် ၁ ကားတင်ပို့ရောင်းချမှု အများဆုံးနိုင်ငံ ဖြစ်လာခဲ့သည်ဟု ဂျပန်မော်တော်ယာဉ် လုပ်ငန်းအဖွဲ့၏ အချက်အလက်များကို ကိုးကားပြီး အေပီမှ ဖော်ပြခဲ့ သည်။

၂၀၂၃ ခုနှစ်အတွင်း ဂျပန်သည် မော်တော်ယာဉ်အစီးရေ ၄ ဒသမ ၄၂ သန်း တင်ပို့ရောင်းချခဲ့ပြီး ၂၀၂၂ ခုနှစ်ကထက် ၁၆ ရာခိုင်နှုန်း မြင့်တက်ခဲ့ကြောင်း၊ ပြည်တွင်းဈေးကွက်တွင် မော်တော်ယာဉ် အစီးရေပေါင်း ၄ ဒသမ ၇၈ သန်း နီးပါး ရောင်းချခဲ့သည်ဟု ဂျပန်မော်တော်ယာဉ် ထုတ်လုပ်သူများအသင်းက ထုတ်ပြန်ခဲ့သည်။ 

တရုတ်မော်တော်ယာဉ် ထုတ်လုပ်သူများအသင်း၏ ထုတ်ပြန်ချက်တွင် ၂၀၂၃ ခုနှစ်အတွင်း တရုတ်သည် မော်တော်ယာဉ် အစီးရေ ၄ ဒသမ ၉၁ သန်း တင်ပို့ရောင်းချခဲ့ပြီး ၂၀၂၂ ခုနှစ်ကထက် ၅၈ ရာခိုင်နှုန်းနီးပါး မြင့်တက်ခဲ့သည်ဟု ဖော်ပြထားသည်။ 

Toyota ကုမ္ပဏီထုတ်ကားတွေကို တွေ့ရစဉ်

တရုတ်သည် လျှပ်စစ်ကားများနှင့် နှစ်မျိုးစပ်ကားများ ရောင်းချနိုင်ခဲ့မှုကြောင့် ထိုကဲ့သို့ ကားအစီးရေ အများအပြား တင်ပို့ရောင်းချနိုင်ခဲ့ခြင်း ဖြစ်သည်။

၂၀၂၂ ခုနှစ်က ဂျပန်သည် ကားအစီးရေ ၄ ဒသမ ၂ သန်း တင်ပို့ရောင်းချနိုင်ခဲ့ပြီး ၂၀၁၇ ခုနှစ်နောက်ပိုင်း ကမ္ဘာပေါ် တွင် မော်တော်ယာဉ် တင်ပို့ရောင်းချမှု အများဆုံးနိုင်ငံအဖြစ် ရပ်တည်နိုင်ခဲ့ခြင်းဖြစ်သည်။ 

ဂျပန်၏ ပြည်တွင်းဈေးကွက်တွင်  မော်တော်ယာဉ် ရောင်းချနိုင်မှုသည် ၂၀၀၀ ပြည့်နှစ်နောက်ပိုင်း ကျဆင်းခဲ့ သည်။

Toyota ကုမ္ပဏီနှင့် အခြား ဂျပန် ကားထုတ်လုပ်သည့် ကုမ္ပဏီများသည် လျှပ်စစ်ကားများကိုလည်း ထုတ်လုပ် နေပြီး နှစ်မျိုးစပ်ကားများ၊ ဘက်ထရီများနှင့် အခြား မော်တော်ယာဉ် စနစ်များ ထုတ်လုပ်ရန်လည်း ရင်းနှီးမြှုပ်နှံ ခဲ့ကြသည်။ 

Source: အေပီ