CNI International News

အစ္စလာမ်မာဘက်၊ မေလ ၂၁ 

ပါကစ္စတန်တွင် ဘွဲ့ရလူငယ်များအကြား အလုပ်လက်မဲ့နှုန်း မြင့်တက်နေမှုသည် ကြီးမားသည့် စိန်ခေါ်မှုတစ်ခု ဖြစ်နေသည်ဟု Daily Asian Age သတင်းဝက်ဘ်ဆိုက်မှ ဖော်ပြခဲ့သည်။

လက်ရှိတွင် ပါကစ္စတန်နိုင်ငံအတွင်း ပျမ်းမျှအလုပ်လက်မဲ့နှုန်း၏ ၃ ဆ နီးပါးရှိလာသည်။

ပါကစ္စတန်တွင် ဘွဲ့ရလူငယ် စုစုပေါင်း၏ ၃၁ ရာခိုင်နှုန်းမှာ အလုပ်လက်မဲ့များဖြစ်ပြီး ပါကစ္စတန်၏ အလုပ်လက်မဲ့ လူဦးရေ စုစုပေါင်း၏ ၅၁ ရာခိုင်နှုန်းမှာ အမျိုးသမီးများ ဖြစ်နေသည်။

ပြီးခဲ့သည့် ၂ နှစ်အတွင်း အင်ဂျင်နီယာများအကြား အလုပ်လက်မဲ့နှုန်းသည် ၂ ဆခန့် မြင့်တက်ခဲ့ပြီး ၁၁ ရာခိုင်နှုန်းမှ ၂၃ ဒသမ ၅ ရာခိုင်နှုန်းရှိခဲ့သည်။ 

အလားတူပင် ကွန်ပြူတာသိပ္ပံ ဘာသာရပ်ဖြင့် ဘွဲ့ရခဲ့သူများအကြား အလုပ်လက်မဲ့နှုန်းမှာလည်း ၂ နှစ်အတွင်း ၁၄ ဒသမ ၂ ရာခိုင်နှုန်းမှ ၂၂ ဒသမ ၆ ရာခိုင်နှုန်း မြင့်တက်ခဲ့သည်။

 ပါကစ္စတန် လူငယ်များကိုတွေ့ရစဉ်

စိုက်ပျိုးရေး သိပ္ပံဘာသာရပ်ဖြင့် ဘွဲရခဲ့သည့် လူငယ်များအကြား အလုပ်လက်မဲ့နှုန်းမှာလည်း ၁၁ ဒသမ ၄ ရာခိုင်နှုန်းမှ ၂၉ ဒသမ ၄ ရာခိုင်နှုန်းအထိ မြင့်တက်ခဲ့ပြီး ဆေးဝါးသိပ္ပံဘာသာရပ်ဖြင့် ဘွဲရဲ့ခဲ့သူများပင် လျှင် နှစ်နှစ်အတွင်း အလုပ်လက်မဲ့နှုန်း ၆ ဒသမ ၄ ရာခိုင်နှုန်းမှ ၁၀ ဒသမ ၈ ရာခိုင်နှုန်းအထိ မြင့်တက်ခဲ့သည်။

လုပ်သားအင်အား စျေးကွက် ဖွံ့ဖြိုးတိုးတက်မှု အားနည်းနေခြင်းကြောင့် ဘွဲ့ရလူငယ်များအကြား အလုပ်လက်မဲ့ နှုန်းများ လျင်မြန်စွာ မြင့်တက်လာခဲ့ခြင်းဖြစ်သည်။

ပါကစ္စတန် စီးပွားရေး ဖွံ့ဖြိုးတိုးတက်မှု အင်စတီကျု (PIDE)က ပြုလုပ်ခဲ့သည့် သုတေသနတစ်ခုတွင် အလုံး စုံ အလုပ်လက်မဲ့နှုန်းသည် ၆ ဒသမ ၃ ရာခိုင်နှုန်းဖြစ်ပြီး ဘွဲ့ရလူငယ်များအကြား အလုပ်လက်မဲ့နှုန်းသည် ၁၆ ဒသမ ၁ ရာခိုင်နှုန်း ဖြစ်သဖြင့် ကွာဟချက်မှာ ၁၀ ရာခိုင်နှုန်းခန့် ရှိနေသည်ကို ဖော်ပြထားသည်။

ထို့ကြောင့် ပညာရေးအဆင့်နှင့် အချိုးချကြည့်ပါက ပါကစ္စတန်တွင် အလုပ်လက်မဲ့ အရေအတွက် ဆက်လက် မြင့်တက်လာမည့် အရိပ်လက္ခဏာကို ထိုသုတေသနက ညွှန်ပြနေသည်။

ပါကစ္စတန် လူငယ်များကိုတွေ့ရစဉ်

ပါကစ္စတန် လူဦးရေ စုစုပေါင်း၏ ၆၄ ရာခိုင်နှုန်းသည် အသက် ၃၀ အောက် အရွယ်များဖြစ်သည်။ 

ထိုအသက်အရွယ်အရ လူငယ်များဟု သတ်မှတ်နိုင်သဖြင့် အလုပ်လက်မဲ့နှုန်း ပြဿနာကို မဖြေရှင်းနိုင်ပါက နိုင်ငံစီးပွားရေးနှင့် လူမှုရေးအတွက် ဆိုးရွားသည့် သက်ရောက်မှုများ ဖြစ်ပွားလာနိုင်သည်ဟု ကျွမ်းကျင်သူများက ပြောကြားခဲ့သည်။

ပါကစ္စတန်၏ အလုပ်သမား စျေးကွက်သည် COVID-19 ကပ်ရောဂါနှင့် စီးပွားရေး အကျပ်အတည်းမှ နာလန် မထူနိုင်သေးသဖြင့် ယခုနှစ်အတွင်း အလုပ်လက်မဲ့ လူဦးရေသည် ၅ ဒသမ ၆ သန်းခန့် ရှိလာနိုင်သည်ဟု ၂၀၂၃ ခုနှစ်၊ စက်တင်ဘာလက နိုင်ငံတကာ အလုပ်သမား အဖွဲ့အစည်း (ILO) က ကြေညာခဲ့သည်။

Source: Daily Asian Age

CNI International News

ဘေကျင်း၊ မေလ ၂၀ 

တရုတ်သည် ကုန်ထုတ်လုပ်မှုကဏ္ဍအား ပိုမိုမြှင့်တင်နေသဖြင့် အမေရိကန်နှင့် ကုန်သွယ်ရေး ထိပ်တိုက်တွေ့မှု တွင် နစ်နာထိခိုက်စေမည့် အခြေအနေသို့ ရောက်ရှိစေခဲ့ပြီး ပြည်တွင်း ဝယ်လိုအားကို တိုးမြှင့်ရန် အရဲစွန့် လုပ်ဆောင်နေသည်ဟု Bloomberg မှ ဖော်ပြခဲ့သည်။

ဧပြီလအတွင်း တရုတ်၏ စားသုံးသူကဏ္ဍ သုံးစွဲမှုသည် ၂ ဒသမ ၃ ရာခိုင်နှုန်းဖြင့် အပြောင်းအလဲ မရှိခဲ့ပေ။

ထိုနှုန်းထားသည် ၂၀၂၂ ခုနှစ်နောက်ပိုင်း အရှိန်အဟုန် အနှေးကွေးဆုံးဖြစ်ခဲ့ပြီး စက်မှုထုတ်ကုန်ကဏ္ဍသည် ပြီးခဲ့သည့် လက်ထက် ၆ ဒသမ ၇ ရာခိုင်နှုန်း မြင့်တက်ခဲ့သည်ဟု အမျိုးသား စာရင်းဇယားဗျူရိုမှ မေလ ၁၇ ရက် တွင် ထုတ်ပြန်ခဲ့သည်။

တရုတ် ထုတ်ကုန်လုပ်ငန်းကို တွေ့ရစဉ်

တရုတ်သည် ပို့ကုန်ကဏ္ဍနှင့် ကုန်ထုတ်လုပ်မှုကဏ္ဍကို တိုးမြှင့်ခြင်းဖြင့် ဟန်ချက်ညီမှု မရှိသည့် စီးပွားရေး နာလန် ထူမှုကို ပြုလုပ်နေသဖြင့် အမေရိကန်၊ ဥရောပနှင့် ကုန်သွယ်ရေးတွင် တင်းမာမှုများကို မြင့်တက်လာစေနိုင် ကြောင်း ကျွမ်းကျင်သူများက ပြောကြားခဲ့သည်။

တစ်ချိန်တည်းမှာပင် တရုတ်၏ အိမ်ခြံမြေကဏ္ဍသည် ယိုယွင်းနေသဖြင့် အစိုးရက ချေးငွေရယူသူများအတွက် စည်းမျဉ်းများ ဖြေလျှော့ခြင်း၊ အိမ်များဝယ်ယူရန် ပြည်သူ့ရန်ပုံငွေများ ထုတ်ပေးမည့် ကတိကဝတ်များ အပါအဝင် အိမ်ခြံမြေကဏ္ဍကို ပြန်လည် ထောင်မတ်စေရန် အစီအစဉ်သစ်များကို မေလ ၁၇ ရက်က ကြေညာခဲ့သည်။

“ကုန်သွယ်ရေး ပွတ်တိုက်မှုတွေလို့ ခေါ်တဲ့ ဟန်ချက်မညီတဲ့ အခြေအနေတွေဟာ ပို့ကုန်ကဏ္ဍကို တိုးမြှင့်ပြီး စီးပွားရေးနာလန်ထူတဲ့ အစီအစဉ်အတွက် ပြဿနာတွေ ရှိလာနိုင်ပါတယ်”ဟု  Standard Chartered Plc ကုမ္ပဏီမှ တရုတ်နှင့် မြောက်အာရှရေးရာ စီးပွားရေးပညာရှင် တင်းရှူအန် (Ding Shuang) က ပြောကြားခဲ့သည်။

ကွန်မြူနစ်ပါတီသည် တရုတ်၏ စွမ်းအင်ကဏ္ဍကို အာရုံစိုက်ထားပြီး ကုန်ထုတ်လုပ်မှုကို အရှိန်မြှင့်တင်နေသဖြင့် အမေရိကန်နှင့် ဥရောပသမဂ္ဂတို့က တရုတ်၏ စျေးပေါသည့် ထုတ်ကုန်များသည် ၎င်းတို့၏ ပြည်တွင်း စျေးကွက် များအတွင်း အလုပ်အကိုင်များကို ခြိမ်းခြောက်ရာ ရောက်ကြောင်း ဝေဖန်ခဲ့ကြသည်။

တရုတ် ထုတ်ကုန်လုပ်ငန်းကို တွေ့ရစဉ်

အမေရိကန်သမ္မတ ဂျိုးဘိုင်ဒန် (Joe Biden) ၏ အစိုးရအဖွဲ့က တရုတ်၏ လျှပ်စစ်ကားများနှင့် တရုတ်၏ စီးပွားရေးလှုံ့ဆော်မှုတွင် ပါဝင်နေသည်ဟု ယူဆရသည့် အခြားပို့ကုန်များအပေါ် ၁၀၀ ရာခိုင်နှုန်း စည်းကြပ်ခွန် ကောက်ခံသည့် အစီအစဉ်ကို ကြေညာခဲ့သည်။

ထိုကဲ့သို့ ဝေဖန်ကန့်ကွက်မှုများ ရှိနေသည့်တိုင် တရုတ်အစိုးရသည် ဝယ်လိုအားကို မြှင့်တင်ရန် ထောက်ပံ့မှုများ ပိုမိုလုပ်ဆောင်ပေးမည့် လက္ခဏာများကို ပြသခဲ့သည်။

ထို့ပြင် တရုတ်အစိုးရသည် မေလ ၁၇ ရက်က ယွမ် ၁ ထရီလျံ (ဒေါ်လာ ၁၃၈ ဘီလျံ) တန်ကြေးရှိသည့် နှစ်ရှည် ငွေတိုက်စာချုပ်များကို စတင်ရောင်းချခဲ့ပြီး ဗဟိုဘဏ်ကလည်း အရစ်ကျ အိမ်ဝယ်ယူမည့် သူများအတွက် လစဉ် ပြန်လည်ပေးသွင်းရမည့် နှုန်းထားကို လျှော့ချခဲ့သည်။

Source: Bloomberg

CNI International News

ဘေကျင်း၊ မေလ ၁၈

ရုရှားသမ္မတ ပူတင် (Vladimir Putin) သည် မေလ ၁၇ ရက်က တရုတ်သမ္မတ ရှီကျင့်ဖျင် (Xi Jinping) နှင့် မဟာဗျူဟာမြောက် ခေတ်သစ်ထူထောင်ရန် ကတိပြုခဲ့ပြီးနောက် တရုတ်၏ အရှေ့မြောက်ဒေသရှိ ရုရှားနယ်စပ် အနီးတွင် ကုန်သွယ်ရေး မြှင့်တင်မှု၏ အရေးကြီးပုံကို အလေးထား ပြောဆိုခဲ့သည်ဟု ရိုက်တာမှ ဖော်ပြခဲ့သည်။

ပူတင်သည် ဟေလုံကျန်း (Heilongjiang) ပြည်နယ်၊ ဟာပင် (Harbin) မြို့သို့ နှစ်ရက်ကြာ ခရီးစဉ်အဖြစ် ရောက်ရှိ ခဲ့ပြီး နှစ်နိုင်ငံအကြား ကုန်သွယ်ရေးနှင့် ယဉ်ကျေးမှု ဖလှယ်မှုများကို လုပ်ဆောင်ခဲ့သည်။

ထို့နောက် ပူတင်သည် ရုရှား-တရုတ် ကုန်စည်ပြပွဲသို့ သွားရောက်ခဲ့ပြီး ဒေသတွင်း ပူးပေါင်းဆောင်ရွက်ရေး ဖိုရမ်ကို တက်ရောက်ခဲ့သည်။

ယူကရိန်းစစ်ပွဲကြောင့် ရုရှားကို အနောက်နိုင်ငံများက ပိတ်ဆို့မှုများပြုလုပ်ခဲ့ပြီး အဆက်အသွယ် ဖြတ်တောက် ထားချိန်တွင် ပူတင်သည် စစ်ပွဲအတွက် လိုအပ်သည့် ဘဏ္ဍာရေး အခြေအနေအတွက် တရုတ်နှင့် ဆက်ဆံမှုများ တိုးမြှင့်ခဲ့သည်။

၎င်း၏ နိုင်ငံတော်ခရီးစဉ်အတွင်း ပူတင်နှင့် ရှီတို့သည် မေလ ၁၇ ရက်က ကမ္ဘာလုံးဆိုင်ရာ စီးပွားရေးနှင့် လုံခြုံရေး ကဏ္ဍတွင် အမေရိကန်၏ လွှမ်းမိုးထားမှုကို တန်ပြန်ရန် နှစ်နိုင်ငံအကြား ခေတ်သစ်တစ်ခု ဖွင့်လှစ်သည့် ပူးတွဲ ထုတ်ပြန်ချက်မှာ လက်မှတ်ရေးထိုးခဲ့ကြသည်။

ပူတင်နဲ့ရှီကျင့်ဖျင်ကို တွေ့ရစဉ်

“လက်ရှိ တရုတ်-ရုရှား ဆက်ဆံရေးဟာ ခိုင်မာမှုရှိနေပြီး အဲဒီဆက်ဆံရေးကို အမြတ်တနိုး ထိန်းသိမ်းဖို့ လိုပါ တယ်”ဟု ရှီက ပူတင်ကို ပြောကြားခဲ့သည်။

“တရုတ်ဟာ သက်ဆိုင်ရာ နိုင်ငံတွေနဲ့ ဖွံ့ဖြိုးတိုးတက်မှုတွေရရှိဖို့ ပူးပေါင်းဆောင်ရွက်ချင်တဲ့ ဆန္ဒရှိပြီး ကမ္ဘာပေါ် မှာ တရားမျှတမှုကို ထိန်းသိမ်းဖို့ အတူတကွ လုပ်ဆောင်ချင်ပါတယ်” ဟု ရှီက ထပ်လောင်း ပြောကြားခဲ့သည်။

ရုရှားက ယူကရိန်းကို မကျူးကျော်မီ ရက်ပိုင်အလိုဖြစ်သည့် ၂၀၂၂ ခုနှစ်၊ ဖေဖော်ဝါရီလကလည်း ပူတင်သည် တရုတ်နိုင်ငံသို့ ရောက်ရှိခဲ့ပြီး နှစ်နိုင်ငံအကြား အကန့်အသတ်မရှိသည့် မိတ်ဖက်ဆက်ဆံရေးကို ကြေညာခဲ့သည်။

တရုတ်သည် ယူကရိန်းစစ်ပွဲတွင် ရုရှားကို ဒရုန်းများနှင့် ဒုံးကျည်နည်းပညာများ၊ ဂြိုဟ်တုဓာတ်ပုံများနှင့် စက်ယန္တရားများ ထောက်ပံ့ပေးနေသည်ဟု အမေရိကန်အရာရှိများက ပြီးခဲ့သည့်လအတွင်း ပြောကြားခဲ့ သော်လည်း တရုတ်ကမူ ရုရှားကို မည်သည့်လက်နက်မှ ထောက်ပံ့ပေးခြင်းမရှိကြောင်း ပြောကြားထားသည်။

အနောက်နိုင်ငံများ၏ ဖယ်ကြဉ်ထားမှုကြောင့် ရုရှားသည် တရုတ်နှင့်ကုန်သွယ်ရေးကို တိုးမြှင့်ခဲ့ပြီး ပြီးခဲ့သည့် နှစ်က နှစ်နိုင်ငံကုန်သွယ်မှု တန်ဖိုးသည် ၂၆ ဒသမ ၃ ရာခိုင်နှုန်းမြင့်တက်ခဲ့သည်။

Source: ရိုက်တာ

CNI International News

နယူးဒေလီ၊ မေ ၁၈

လွန်ခဲ့သည့် ၉ နှစ်က အိန္ဒိယနှင့် အာဖရိကသမဂ္ဂအကြား ထိတွေ့ဆက်ဆံမှု သိပ်မရှိခဲ့သော်လည်း လက်ရှိတွင် စက်မှုထိပ်သီးနိုင်ငံ (၂၀)မှာ အိန္ဒိယနှင့် အာဖရိကသမဂ္ဂ (AU) တို့ ပါဝင်လာမှုနှင့်အတူ ယခုနှစ်ကုန်ပိုင်း၌ စတုတ္ထ အကြိမ်မြောက်ဖိုရမ်(IAFS)ကို ကျင်းပရန် စီစဉ်ထားသည်ဟု The Print သတင်းဝက်ဘ်ဆိုက်မှ ဖော်ပြခဲ့သည်။

အာဖရိကသမဂ္ဂမှ ကိုယ်စားလှယ်အဖွဲ့သည် အိန္ဒိယနိုင်ငံခြားရေးဝန်ကြီးဌာနမှ တာဝန်ရှိသူများနှင့် ပြီးခဲ့သည့်လ အတွင်း တွေ့ဆုံခဲ့ပြီး အဆိုပါ ဖိုရမ်အတွက် ပြင်ဆင်မှုများ ဆွေးနွေးခဲ့သည်ဟု သံတမန် သတင်းအရင်းအမြစ် တစ်ခုက The Print ကို ပြောကြားခဲ့သည်။

IAFS သည် အာဖရိကသမဂ္ဂ လက်အောက်တွင် အာဖရိကတိုက်မှ နိုင်ငံပေါင်း ၅၄ နိုင်ငံနှင့် အိန္ဒိယအကြား နိုင်ငံရေး အင်စတီကျု ယန္တရားသဖွယ် ဖြစ်သည်။ 

နောက်ဆုံအကြိမ် IAFS ညီလာခံကို ၂၀၁၅ ခုနှစ်က နယူးဒေလီ (New Delhi) မြို့တော်တွင် ပြုလုပ်ခဲ့ပြီး နိုင်ငံ့ခေါင်းဆောင် ၄၀ ခန့် အပါအဝင် AU အဖွဲ့ဝင် ၅၄ နိုင်ငံစလုံးမှ ကိုယ်စားလှယ်များ တက်ရောက်ခဲ့သည်။

ယခုနှစ်အတွင်း ကျင်းပမည့် ဖိုရမ်ကိုလည်း အာဖရိကနိုင်ငံ အများအပြားမှ ခေါင်းဆောင်များ တက်ရောက်ဖွယ် ရှိသည်။

 အိန္ဒိယနဲ့အာဖရိက ဖိုရမ်ကို တွေ့ရစဉ်

ထိုဖိုရမ်နှင့်ပတ်သက်သည့် အသေးစိတ် အချက်အလက်များ ထွက်ပေါ်လာခြင်း မရှိသေးသော်လည်း ထိုဖိုရမ်ကို အီသီယိုပီးယားနိုင်ငံ၊ အဒစ် အဘာဘာ (Addis Ababa) မြို့တော်တွင် ပြုလုပ်ဖွယ်ရှိသည်။

အိန္ဒိယသည် အာဖရိကနှင့် ထိတွေ့ဆက်ဆံမှုကို နယ်ပယ် ၃ ခုတွင် အရှိန်မြှင့် လုပ်ဆောင်နေပြီး ထိုနယ်ပယ် သုံးခုမှာ သံတမန်ရေး၊ ရင်းနှီးမြှုပ်နှံမှုနှင့် ကုန်သွယ်ရေးတို့ဖြစ်သည်။

၂၀၀၈ ခုနှစ်က အိန္ဒိယဝန်ကြီးချုပ် မန်မိုဟန်ဆင်း (Manmohan Singh) ဦးဆောင်သည့် အစိုးရအဖွဲ့သည် ထိုဖိုရမ်များကို ၃ နှစ်လျှင် တစ်ကြိမ် ကျင်းပရန် စီစဉ်ခဲ့သော်လည်း စတုတ္ထမြောက်ဖိုရမ်ကို ၂၀၂၀ ပြည့်နှစ်၌ ပြုလုပ်ရန် ရွှေ့ဆိုင်းခဲ့သည်။

သို့သော်လည်း ထိုအချိန်က COVID-19 ကပ်ရောဂါ ဖြစ်ပွားခဲ့သဖြင့် ညီလာခံကို ထပ်မံရွှေ့ဆိုင်းခဲ့ရသည်။

အိန္ဒိယနဲ့ အာဖရိက သံတမန်ဆက်ဆံရေးညွန်းပြနေစဉ်

“နောက်ဆုံးအကြိမ် အိန္ဒိယ-အာဖရိက ဖိုရမ်ညီလာခံကို နယူးဒေလီမှာ ၂၀၁၅ ခုနှစ်က ပြုလုပ်ခဲ့ပါတယ်။ အဲဒီ အချိန်ကစပြီး ပထဝီနိုင်ငံရေး၊ စီးပွားရေးနဲ့ ကမ္ဘာလုံးဆိုင်ရာ ဦးစားပေးကိစ္စတွေဟာ တော်တော်ပြောင်းလဲသွား ခဲ့ပါတယ်။ အရင်ပြုလုပ်ခဲ့ဖူးတဲ့ ညီလာခံတွေရဲ့ အောင်မြင်မှုတွေအပေါ် အခြေခံပြီး တိုးတက်ပြောင်းလဲနေတဲ့ ကမ္ဘာ့အခင်းအကျင်းမှာ လိုအပ်ချက်တွေနဲ့ ကိုက်ညီအောင် စတုတ္တမြောက် ညီလာခံကို ပြုလုပ်သွားမှာ ဖြစ်ပါ တယ်”ဟု လေ့လာရေးသုတေသန ဖောင်ဒေးရှင်း (ORF) မှ ကျွမ်းကျင်သူ ဆာမီယာ ဘက်တာချာယာ (Samir Bhattacharya) က ပြောကြားခဲ့သည်။

အာဖရိကတိုက်သည် သယံဇာတများ ပေါကြွယ်ဝပြီး အထူးသဖြင့် အိန္ဒိယနိုင်ငံတွင် မရှိသည့် စွမ်းအင်ကဏ္ဍတွင် အရင်းအမြစ်များစွာရှိသည်ဟု ဘက်တာချာယာက ပြောသည်။

၂၀၅၀ ပြည့်နှစ်တွင် အာဖရိကတိုက်၌ လူဦးရေ ၂ ဒသမ ၅ ဘီလျံ ရှိလာလိမ့်မည်ဟု ခန့်မှန်းထားပြီး လက်ရှိမှာ တော့ လူဦးရေ ၁ ဒသမ ၄ ဘီလျံရှိနေကာ အာဖရိကတိုက်၏ စီးပွားရေးသည် ဒေါ်လာ ၃ ထရီလျံနီးပါး ရှိသည်ဟု ခန့်မှန်းချက်များ ထွက်ပေါ်ခဲ့သည်။

Source: The Print

CNI International News

၂၀၂၄ ခုနှစ်၊ မေလ ၁၈

မြန်မာနိုင်ငံ၏ အရှေ့ဘက်ကမ်းရိုးတန်းတွင် ထားဝယ်ရေနက်ဆိပ်ကမ်းတစ်ခု တည်ဆောက်ရေးအတွက်  မြန်မာ့တပ်မတော်က ရုရှားကို ရွေးချယ်ခဲ့သည်။

ထို့ကြောင့် တရုတ်ကို ဒေါသထွက်စေခဲ့ပြီး ထိုင်းနယ်စပ် အနီးတွင်လည်း ဆိပ်ကမ်းတစ်ခုတည်ဆောက်ရန် စီစဉ်နေသည်ဟု Construction World သတင်းဝက်ဘ်ဆိုက်မှ ဖော်ပြခဲ့သည်။

မြန်မာ့တပ်မတော်သည် ရေနံချက်စက်ရုံတစ်ခု အပါအဝင် အထူးစီးပွားရေးဇုန်တစ်ခု ထူထောင်ရေးနှင့်အတူ ဆိပ်ကမ်း ပရောဂျက်တွင် ရုရှား၏ ရင်းနှီးမြှုပ်နှံမှုများ ရရှိစေရန် စိတ်ဝင်စားလျက်ရှိသည်ဟု ထိုဝက်ဘ်ဆိုက်၌ ဖော်ပြထားသည်။

တရုတ်သည် ယခင်က ထားဝယ်ဆိပ်ကမ်း တည်ဆောက်ရေးအတွက် လေ့လာမှုများ ပြုလုပ်ခဲ့သော်လည်း အိန္ဒိယက တည်ဆောက်ခဲ့သည့် စစ်တွေ ဆိပ်ကမ်းအနီးတွင် ကျောက်ဖြူရေနက်ဆိပ်ကမ်း တည်ဆောက်မှုကိုသာ အာရုံစိုက်လုပ်ဆောင်ရန် ဆုံးဖြတ်ခဲ့သည်။

ဗိုလ်ချုပ်မှူးကြီးမင်းအောင်လှိုင်နဲ့ ပူတင်ကို တွေ့ရစဉ်

မည်သို့ပင်ဆိုစေ မြန်မာ့တပ်မတော်က ရုရှားကို ရွေးချယ်ခဲ့သည့်အတွက် တရုတ်က ကျေနပ်မှုမရှိခဲ့ကြောင်း ထိုအကြောင်းအရာနှင့်နီးစပ်သည့် ကျွမ်းကျင်သူများက ပြောကြားခဲ့သည်။

ထားဝယ်ဆိပ်ကမ်း တည်ဆောက်ရေး အစီအစဉ်သည် အန်ဒမန်ပင်လယ် (Andaman Sea) တစ်လျှောက် မြန်မာ့အရှေ့ပိုင်း ကမ်းရိုးတန်းပေါ်ရှိ တနင်္သာရီတိုင်းဒေသကြီးတွင် တည်ရှိပြီး ကမ္ဘောဒီးယား၊ လာအို၊ ထိုင်း၊ ဗီယက်နမ်နှင့် တရုတ်နိုင်ငံတို့ ပါဝင်သည့် မဟာမဲခေါင်ဒေသခွဲ (GMS) အတွက် ဝင်ပေါက်တစ်ခုသဖွယ် ဖြစ်စေမည် ဖြစ်သည်။

ဘန်ကောက်(ထိုင်း)သည် ထားဝယ်မှ ကီလိုမီတာ ၃၀၀ အကွာအဝေးတွင်သာ တည်ရှိသဖြင့် ထိုဆိပ်ကမ်းသည် ထိုင်း၏ ကုန်သွယ်ရေးအတွက်လည်း အဓိကကျသည့် ဝင်ပေါက်တစ်ခု ဖြစ်လာနိုင်သည်။

မြန်မာ့တပ်မတော်သည် သယံဇာတကြွယ်ဝသည့် မြန်မာနိုင်ငံတွင် တရုတ်၏ ဩဇာလွှမ်းမိုးမှုကို ချိန်ခွင်လျှာညှိရန် အတွက် ရုရှားနှင့်ဆက်ဆံမှုကို ပိုမိုနီးစပ်စေရန် ရည်မှန်းထားချိန်၌ မြန်မာနှင့် ရုရှားအကြား ရေနက်ဆိပ်ကမ်း တည်ဆောက်ရေး ဆွေးနွေးမှုများ ရှိနေသည်ဆိုသည့်သတင်း ထွက်ပေါ်လာခြင်းဖြစ်သည်။

ထားဝယ်အထူးစီးပွားရေးဇုန်လမ်းကို တွေ့ရစဉ်

ထိုဆွေးနွေးမှုများတွင် ဆိပ်ကမ်းတည်ဆောက်ရေး အစီအစဉ်များနှင့်အတူ တစ်ရက်လျင် ရေနံ ၁၀၀,၀၀၀ ထုတ် လုပ်နိုင်မည့် ရေနံချက်စက်ရုံ တည်ဆောက်ရေး အစီအစဉ်လည်း ပါဝင်သည်။

မည်သို့ပင်ဆိုစေ မြန်မာ၏ ဆိပ်ကမ်းကဏ္ဍတွင် ရုရှား ပါဝင်လာမှုသည် ကျောက်ဖြူရေနက်ဆိပ်ကမ်းရှိ တရုတ်၏ စီမံကိန်းများကို ထိခိုက်စေမည့်အရေးကို တရုတ်က စိုးရိမ်နေသည်။

မြန်မာသည် ရုရှားနှင့် ဆက်ဆံမှု ပိုမိုတိုးတက်လာခြင်းသည် တရုတ်နှင့်ဆက်ဆံရေး မြင့်တက်မှုထက် ပိုမို ကောင်းမွန်သင့်တော်သည်ဟု အိန္ဒိယက ယူဆဖွယ်ရှိသည်။

အဘယ်ကြောင့်ဆိုသော် တရုတ်သည် မြန်မာနိုင်ငံတွင် သယံဇာတများကို ရယူရန်အတွက် ဘင်္ဂလား ပင်လယ်အော်ဒေသတွင် တရုတ်၏ တည်ရှိမှုကို ချဲ့ထွင်နေသည်ဟု အိန္ဒိယက ယူဆထားခြင်းကြောင့် ဖြစ်သည်။

ယခင်က အိန္ဒိယမှ မြန်မာကို ရောင်းချခဲ့သည့် ရေငုပ်သင်္ဘောများသည်လည်း ရုရှားလုပ် ရေငုပ်သင်္ဘောများ ဖြစ်သည်။

ထားဝယ်ရေနက်ဆိပ်ကမ်း စီမံကိန်းကိုတွေ့ရစဉ်

ထို့ပြင် သီရိလင်္ကာတွင်လည်း အိန္ဒိယနှင့် ရုရှားကုမ္ပဏီများည် တရုတ်က ဦးဆောင်သည့် ဟမ်ဘန်တိုတာ (Hambantota) ဆိပ်ကမ်းအနီးတွင် လေဆိပ်တစ်ခုကို အကျိုးတူပူးပေါင်းပြီး စီမံခန့်ခွဲလျက်ရှိသည်။

မတ်လ အစောပိုင်းကလည်း မြန်မာ့တပ်မတော်သည် တရုတ်အပေါ် မှီခိုမှုကို လျှော့ချရန် ကြိုးပမ်းနေပြီး စစ်ရေး အထောက်အပံ့များ၊ အခြေခံ အဆောက်အအုံများနှင့် စွမ်းအင် စီမံကိန်းများကို ချဲ့ထွင်ရန် ရုရှားနှင့် ဆက်ဆံရေးကို ချဲ့ထွင်ရန် စီစဉ်နေသည်ဟု သတင်းထွက်ပေါ်ခဲ့သည်။

မကြာသေးမီကလည်း မြန်မာနိုင်ငံ၏ ရင်းနှီးမြှုပ်နှံရေးနှင့် နိုင်ငံခြားစီးပွားဆက်သွယ်ရေးဝန်ကြီး ဒေါက်တာ ကံဇော်သည် ဆိပ်ကမ်းများ တည်ဆောက်ရန် အခွင့်အလမ်းများ၊ အထူးစီးပွားရေးဇုန် ထူထောင်မှု၊ ရေနံချက်စက်ရုံ တည်ဆောက်ရေး၊ ၆၆၀ မဂ္ဂါဝပ် အပူစွမ်းအင်သုံး ဓာတ်အားပေးစက်ရုံနှင့် ၃၃၀ မဂ္ဂါဝပ် နျူကလီးယား ဓာတ်အား ပေးစက်ရုံများ တည်ဆောက်ရေးတို့အတွက် အခွင့်အလမ်းများကို ရှာဖွေဖော်ထုတ်ရန် ရုရှားသို့ သွားရောက်ခဲ့ သည်။

Source: Construction World

CNI International News

ဘန်ကောက်၊ မေလ ၁၃

ထိုင်းပြည်သူအများစုက နိုင်ငံတစ်ဝန်း နေ့စား အနိမ်ဆုံး လုပ်ခလစာ မြှင့်တင်ပေးမည့် အစိုးရ၏ အစီအစဉ်ကို ထောက်ခံခဲ့ကြသည်ဟု ဘန်ကောက်ပို့စ်မှ ဖော်ပြခဲ့သည်။

သို့သော်လည်း ထိုအစီအစဉ်သည် မျှော်မှန်းထားသကဲ့သို့ ဖြစ်လာနိုင်ခြေ ရှိ/မရှိကိုတော့ ထိုင်းပြည်သူများက သံသယရှိနေကြသည်။

အမျိုးသားဖွံ့ဖြိုးတိုးတက်ရေး အုပ်ချုပ်မှု အင်စတီကျု (Nida) သည် မေလ ၃ ရက်မှ ၇ ရက်အတွင်း အသက် ၁၈ နှစ်အရွယ် လူပေါင်း ၁၃၁၀ ဦးကို စစ်တမ်းကောက်ယူခဲ့ရာတွင် ပါဝင်ဖြေဆိုသူ ၈၂ ဒသမ ၈၉ ရာခိုင်နှုန်းက နေ့အလိုက် အနိမ့်ဆုံး လုပ်ခလစာကို မြှင့်တင်ပေးစေလိုကြောင်း ဖြေကြားခဲ့သည်။

ထိုစစ်တမ်းအရ ၄၄ ဒသမ ၅၀ ရာခိုင်နှုန်းက အောက်တိုဘာ ၁ ရက်မှစပြီး နိုင်ငံတစ်ဝန်း တစ်ဆင့်ချင်းစီ ပြုလုပ် သွားမည့် အစီအစဉ်တွင် တစ်ရက်လုပ်ခ အနိမ်ဆုံးလစာကို ဘတ် ၄၀၀ အထိ တိုးမြှင့်စေရန် ဆန္ဒရှိနေသည်။

ထိုင်းအစိုးရအဖွဲ့ကို တွေ့ရစဉ်

ထို့နောက် ၂၅ ဒသမ ၃၄ ရာခိုင်နှုန်းကမူ ထိုအစီအစဉ်ကို အောက်တိုဘာ ၁ ရက်အထိ မစောင့်ဘဲ ချက်ချင်း အကောင်အထည်ဖော်ရန် ဆန္ဒရှိနေသည်။

ထို့အပြင် ၁၃ ဒသမ ၀၅ ရာခိုင်နှုန်းကမူ ထိုအစီအစဉ်ကို ထိုင်းနိုင်ငံတစ်ဝန်းတွင် အောက်တိုဘာ ၁ ရက်မှစတင်ပြီး အကောင်အထည်ဖော်ပေးရန် အလိုရှိနေသည်။ 

အလားတူ ၁၆ ဒသမ ၄၁ ရာခိုင်နှုန်းကမူ တစ်ရက်လုပ်ခကို ဘတ် ၄၀၀ အထိ တိုးမြှင့်မည့် အအစီအစဉ်ကို သဘော မတူကြောင်း ဖြေကြားခဲ့ပြီး ကျန် ၀ ဒသမ ၇၀ ရာခိုင်နှုန်းကမူ ထိုအစီအစဉ်ကို မသိကြောင်း သို့မဟုတ် စိတ်မဝင် စားကြောင်း ဖြေကြားခဲ့သည်။

ထို့ပြင် စစ်တမ်းတွင် ပါဝင်သည့် ၆၄ ဒသမ ၃၅ ရာခိုင်နှုန်းက အောက်တိုဘာ ၁ ရက်မှစပြီး တစ်ရက်လုပ်ခ ဘတ် ၄၀၀ တိုးမြှင့်မည့် အစိုးရ၏ အစီအစဉ်ကို အမျိုးသား လုပ်ခလစာကော်မတီက ထောက်ခံရန် ရှိ/မရှိကို သံသယ ရှိနေကာ ၃၁ ဒသမ ၀၇ ရာခိုင်နှုန်းကမူ ကော်မတီအနေဖြင့် ထိုအစီအစဉ်ကို ထောက်ခံပေးလိမ့်မည်ဟု ယုံကြည် ကြောင်း ဖြေကြားခဲ့သည်။

ထိုင်းရှိ ဆောက်လုပ်ရေးလုပ်သားများကို တွေ့ရစဉ်

ထိုသို့ အနိမ့်ဆုံး လုပ်ခလစာငွေ မြှင့်တင်မှုသည် စားဝတ်နေရေးအတွက် လုံလောက်မှု ရှိ/မရှိ မေးမြန်းခံရချိန်တွင် ၆၀ ဒသမ ၈၄ ရာခိုင်နှုန်းက လုံလောက်မှုမရှိကြောင်း ဖြေကြားခဲ့ပြီး ၂၃ ဒသမ ၉၇ ရာခိုင်နှုန်းက လုံလောက်မှု ရှိကြောင်း ဖြေကြားခဲ့သည်။

တစ်ရက်လုပ်ခ အနိမ့်ဆုံးလစာငွေ ဘတ် ၄၀၀ တိုးမြှင့်မှုကို ပြီးခဲ့သည့် လလယ်ပိုင်းက ပြည်နယ် ၁၀ ခု၏ အချို့ နေရာဒေသများတွင် စတင် အကောင်အထည်ဖော်ခဲ့သည်။

ထိုအစီအစဉ်ကို အောက်တိုဘာ ၁ ရက်မှ စပြီး တစ်နိုင်ငံလုံး အတိုင်းအတာဖြင့် ချဲ့ထွင်သွားမည်ဟု ထိုင်းအစိုးရက ယခုလ အစောပိုင်းတွင် ပြောကြားခဲ့သော်လည်း ထိုင်းကုန်သည်ကြီးများအသင်းကမူ ထိုအစီအစဉ်ကို ကန့်ကွက်ခဲ့ သည်။

Source: ဘန်ကောက်ပို့စ်

CNI International News

ဟောင်ကောင်၊ မေလ ၁၀

တရုတ်၏ စီးပွားရေး နာလန်ထူမှုသည် တည်ငြိမ်မှုမရှိသည့်တိုင် ဝယ်လိုအားများ မြင့်တက်လာခဲ့သဖြင့် ယခုနှစ် ဧပြီလအတွင်း တရုတ်၏ ပို့ကုန်နှင့် သွင်းကုန်ကဏ္ဍသည် ဖွံ့ဖြိုးတိုးတက်မှု ပြန်လည်ရရှိခဲ့ကြောင်း မေလ ၉ ရက်က တရုတ်အကောက်ခွန် အချက်အလက်များ ထုတ်ပြန်ခဲ့သည်ဟု အေပီမှ ဖော်ပြခဲ့သည်။

မတ်လအတွင်းက တရုတ်၏ ပို့ကုန်ကဏ္ဍသည် ပြီးခဲ့သည့်နှစ် နိုဝင်ဘာလနောက်ပိုင်း ပထမဆုံးအကြိမ် ကျဆင်းမှု အဖြစ် ၇ ဒသမ ၅ ရာခိုင်နှုန်း ကျဆင်းခဲ့ပြီးနောက် ယခုနှစ် ဧပြီလ၏ ပို့ကုန်ကဏ္ဍသည် ယခင်နှစ် ဧပြီလနှင့် နှိုင်းယှဉ်ပါက ၁ ဒသမ ၅ ရာခိုင်နှုန်း မြင့်တက်ခဲ့သည်။

သွင်းကုန်ကဏ္ဍတွင် မတ်လက ၁ ဒသမ ၉ ရာခိုင်နှုန်း ကျဆင်းခဲ့သော်လည်း ဧပြီလတွင် ၈ ဒသမ ၄ ရာခိုင်နှုန်း အထိ မြင့်တက်ခဲ့သည်ဟု အချက်အလက်များတွင် ဖော်ပြခဲ့သည်။

တရုတ်ပို့ကုန်ကိုတွေ့ရစဉ်

တရုတ်သည် ကမ္ဘာ့ဒုတိယအကြီးဆုံးဖြစ်သည့် ၎င်း၏ စီးပွားရေးကို ဖွံ့ဖြိုးတိုးတက်စေရန်နှင့် ယုံကြည်မှုကို မြှင့်တင်ရန် ပြီးခဲ့သည့်လများအတွင်း စီးပွားရေး အထောက်အကူပြု အစီအစဉ်များပါရှိသည့် မူဝါဒများကို အကောင်အထည်ဖော်ခဲ့သည်။

မတ်လအတွင်းက တရုတ်၏ ကုန်သွယ်ရေး ပိုလျံမှုသည် ဒေါ်လာ ၅၈ ဒသမ ၅၅ ဘီလျံရှိခဲ့ရာမှ ဧပြီလတွင် ဒေါ်လာ ၇၂ ဒသမ ၃၅ ဘီလျံအထိ မြင့်တက်လာခဲ့သော်လည်း ထိုအလားအလာသည် ကျယ်ပြန့်သည့် ကမ္ဘာလုံးဆိုင်ရာ အနေအထားတွင် အလုံးစုံ အပြုသဘောဆောင်သည့် အခြေအနေ မဟုတ်ကြောင်း ကျွမ်းကျင်သူများက ပြောကြား ခဲ့သည်။

"ခေတ်ရှေ့ပြေးတဲ့ စီးပွားရေး အင်အားကြီးနိုင်ငံတွေမှာ စားသုံးသူ အသုံးစရိတ်တွေ လျော့နည်းလာပြီး ပို့ကုန် ဈေးနှုန်းတွေ လျော့နည်မှုကတဆင့် အရှိန်အဟုန်တွေ လျော့နည်းလာနိုင်တာကြောင့် လာမယ့်လတွေမှာတော့ ပို့ကုန်ပမာဏတွေဟာ ပြန်လည်လျော့နည်းသွားပါလိမ့်မယ်" ဟု Capita Economics ကုမ္ပဏီမှ ကျီချွန် ဟောင် (Zichun Huang) က ပြောကြားခဲ့သည်။

တရုတ်ပို့ကုန်ကိုတွေ့ရစဉ်

အရှေ့တောင်အာရှနိုင်ငံများအသင်း (အာဆီယံ) ၁၀ နိုင်ငံသည် တရုတ်၏ ပို့ကုန်များစီးဆင်းသည့် အကြီးမားဆုံး နေရာအဖြစ် ဆက်လက် တည်ရှိနေပြီး ယခုနှစ် ပထမလေးလတာ ကာလအတွင်း ပို့ကုန် စုစုပေါင်း၏ ၁၆ ဒသမ ၉ ရာခိုင်နှုန်းရှိခဲ့သည်။

ဧပြီလအတွင်း အမေရိကန်သို့ တင်ပို့သည့် တရုတ်၏ ပို့ကုန်ပမာဏသည် ပြီးခဲ့သည့်နှစ် ဧပြီလနှင့်နှိုင်းယှဉ်ပါက ၁ ဒသမ ၆ ရာခိုင်နှုန်း လျော့ကျခဲ့ပြီ ဥရောပသမဂ္ဂသို့ တင်ပို့သည့် တရုတ်၏ ပို့ကုန်ပမာဏသည်လည်း ပြီးခဲ့သည့် နှစ်ကထက် ၃ ဒသမ ၃ ရာခိုင်နှုန်း လျော့ကျခဲ့သည်။

တရုတ်သည် ယခုနှစ်အတွက် စီးပွားရေးဖွံ့ဖြိုးမှုနှုန်းကို ၅ ရာခိုင်နှုန်းခန့် ရှိလာစေရန် ရည်မှန်းထားကြောင်း စီးပွားရေးပညာရှင်များက ပြောကြားခဲ့သည်။

Source: အေပီ

CNI International News

တိုကျို၊ မေလ ၁၀

ဂျပန်သည် ဆူးတောင့်ပါ ဝေလငါးများကို စီးပွားဖြစ် ဖမ်းဆီးခွင့်ပြုသည့် ဝေလငါးမျိုးစိတ်များ စာရင်းတွင် ထည့်သွင်းမည်ဖြစ်ကြောင်း အစိုးရအဖွဲ့ ပြောရေးဆိုခွင့်ရှိသူ ယိုရှီမာဆာ ဟာယာရှီ (Yoshimasa Hayashi)က ပြောကြားခဲ့သည်ဟု ဘန်ကောက်ပို့စ်မှ ဖော်ပြခဲ့သည်။

ဂျပန်သည် ရေနေ နို့တိုက်သတ္တဝါများကို စီးပွားဖြစ် ဖမ်းဆီးမှုနှင့်ပတ်သက်ပြီး စည်းမျဉ်းစည်းကမ်းများ ထုတ်ပြန် ထားသည့် နိုင်ငံတကာဝေလငါးကော်မရှင် (IWC) မှ နုတ်ထွက်ခဲ့ပြီးနောက် ငါးနှစ်အကြာတွင် ဆူးတောင့်ပါ ဝေလငါးများကို ဖမ်းဆီးခွင့်ပြုရန် စီစဉ်ခဲ့ခြင်းဖြစ်သည်။

ဂျပန်သည် ၂၀၁၉ ခုနှစ်က ၎င်း၏ ရေပိုင်နက်များနှင့် အထူးစီးပွားရေးဇုန်များအတွင်း စီးပွားဖြစ် ဝေလငါး ဖမ်းဆီးမှုကို ပြန်လည်စတင်ခဲ့သည်။

ယခုသီတင်းပတ်တွင်လည်း ဂျပန်ငါးလုပ်ငန်းအေဂျင်စီက အဏ္ဏဝါ အရင်းအမြစ်များ ထိန်းချုပ်ရေး မူဝါဒများကို ပြင်ဆင်စိစစ်သည့် အဆိုပြုလွှာ မူကြမ်းအတွက် ပြည်သူလူထု၏ မှတ်ချက်များကို တောင်းခံခဲ့ပြီး ထိုမူကြမ်းတွင် ဆူးတောင့်ပါ ဝေလငါးများကို ဖမ်းဆီးခွင့်ပြုမည်ဟု ဖော်ပြထားသည်။

ဂျပန်အစိုးရသည် ဝေလငါးဖမ်းဆီးမှုကို ဆက်လက် မြှင့်တင်သွားမည်ဖြစ်ပြီး လိုအပ်သည့် သံတမန်ရေး အစီအစဉ်များကို လုပ်ဆောင်သွားမည်ဟု ဟာယာရှီက ပုံမှန်ပြုလုပ်နေကျ သတင်းစာရှင်းလင်းပွဲတွင် ပြောကြားခဲ့သည်။

ဂျပန်အစိုးရအဖွဲ့ ပြောရေးဆိုခွင့်ရှိသူ ယိုရှီမာဆာ ဟာယာရှီကို တွေ့ရစဉ်

"ဝေလငါးတွေဟာ အရေးကြီးတဲ့ အစားအစာ အရင်းအမြစ်တွေဖြစ်ပြီး သိပ္ပံနည်းကျ အထောက်အထားတွေအပေါ် အခြေခံပြီး အကျိုးရှိရှိ အသုံးချသင့်ပါတယ်။ ဂျပန်ရဲ့ အစားအစာ ယဉ်ကျေးမှုကို အစဉ်အလာအရ ဆက်ခံဖို့ အရေးကြီးပါတယ်" ဟု အစိုးရအဖွဲ့ အတွင်းဝန်ချုပ် ဟာယာရှီက ပြောကြားခဲ့သည်။

ဂျပန်တွင် ဝေလငါးစားသုံးမှုသည် ၁၉၆၀ ပြည့်နှစ် အစောပိုင်းကာလများက အမြင့်ဆုံး ဖြစ်ခဲ့သော်လည်း အခြား အသားငါးများကဲ့သို့ လွယ်လွယ် မရနိုင်သဖြင့် ကျယ်ကျယ်ပြန့်ပြန့် စားသုံးခဲ့ခြင်းမရှိပေ။

IWC သည် ဆူးတောင့်ပါ ဝေလငါးများ ဖမ်းဆီးမှုကို တားမြစ်ပိတ်ပင်ခဲ့ပြီးနောက် ၁၉၈၇ ခုနှစ်တွင် ဂျပန်သည် ဝေလငါး ဖမ်းဆီးမှုဆိုင်ရာ သိပ္ပံနည်းကျ သုတေသနကို ပြုလုပ်ခဲ့သည့်အတွက် သဘာဝတ်ပတ်ဝန်းကျင်အဖွဲ့များ ၏ ဝေဖန်မှုကို ခံခဲ့ရသည်။

ဂျပန်သည် ၂၀၁၈ ခုနှစ်က IWC မှ နုတ်ထွက်ကြောင်း ကြေညာခဲ့ချိန်တွင် ဂျပန်နိုင်ငံအား စိတ်ပျက်ကြောင်း ဖော်ပြခဲ့သည့် နိုင်ငံများထဲ၌ သြစတြေးလျနှင့် နယူးဇီလန်နိုင်ငံတို့ ပါဝင်ခဲ့သည်။

Source: ဘန်ကောက်ပို့စ်

CNI International News

ကိယက်ဗ်၊ မေလ ၁၀ 

ရုရှား-ယူကရိန်းစစ်ပွဲသည် ယူကရိန်း၏ စီးပွားရေးကို အကြီးအကျယ် ထိခိုက်စေခဲ့ပြီး ရုရှား၏ ကျူးကျော်မှု စတင်သည့် အချိန်မှစပြီး ၂၀၂၃ ခုနှစ်ကုန်ပိုင်းအတွင်း ယူကရိန်းအရှေ့ပိုင်းတွင် ကုန်ပစ္စည်းရောင်းအားသည် ၇၀ ရာခိုင်နှုန်းအထိ ကျဆင်းခဲ့သည်ဟု ရိုက်တာမှ ဖော်ပြခဲ့သည်။

ထို့ပြင် ထိုကာလအတွင်း ယူကရိန်းနိုင်ငံတောင်ပိုင်းတွင် ရောင်းအားများ ၆၃ ရာခိုင်နှုန်း ကျဆင်းခဲ့သလို နိုင်ငံ အနောက်ပိုင်းတွင်မူ ကုမ္ပဏီများ၏ ရောင်းအားများသည် ၃၉ ရာခိုင်နှုန်း ကျဆင်းခဲ့သည်ဟု ကမ္ဘာ့ဘဏ်က ထုတ်ပြန်သည့် အချက်အလက်များ၌ ဖော်ပြထားသည်။

မတူကွဲပြားသည့် ကဏ္ဍများအပေါ် စစ်ပွဲ၏ အကျိုးသက်ရောက်မှုနှင့် ပတ်သက်ပြီး တရားဝင် အချက်အလက် များတွင် ဟာကွက်များရှိနေသလို စစ်မြေပြင်၌ သိသာထင်ရှားသည့် အပြောင်းအလဲများ ရှိလာခဲ့မည်ဆိုပါက လက်ရှိ အခြေအနေသည်လည်း ပြောင်းလဲလာလိမ့်မည်ဟု ဖော်ပြထားသည်။

ယူကရိန်း၏ စွမ်းအင် အခြေခံ အဆောက်အအုံများအပေါ် ရုရှား၏ တိုက်ခိုက်မှုများသည် စီးပွားရေး လုပ်ငန်းများနှင့် ကုမ္ပဏီအများစုအတွက် အဓိက စိန်ခေါ်မှုတစ်ခု ဖြစ်နေသည်။

ယူကရိန်းနိုင်ငံအတွင်းကို တွေ့ရစဉ်

၂၀၂၂ ခုနှစ်အတွင်း ယူကရိန်း၏ စီးပွားရေးသည် ၃ ပုံ ၁ ပုံ ပြိုလဲခဲ့ပြီး ၂၀၂၃ ခုနှစ်တွင် ယူကရိန်း၏ စီးပွားရေးသည် ၅ ဒသမ ၃ ရာခိုင်နှုန်း ပြန်လည်မြင့်တက်လာကာ ယခုနှစ်အတွင်း စီးပွားရေး ဖွံ့ဖြိုးတိုးတက်မှုသည် ၄ ဒသမ ၆ ရာခိုင်နှုန်း ရှိလိမ့်မည်ဟု အစိုးရက ခန့်မှန်းထားသည်။

တစ်ချိန်က ယူကရိန်း၏ အဓိက ပို့ကုန်ဖြစ်ခဲ့သည့် သံမဏိလုပ်ငန်းကဏ္ဍသည် ၂၀၂၂ ခုနှစ်အတွင်း ၈၀ ရာခိုင်နှုန်း ကျုံ့ဝင်ခဲ့ပြီး ၂၀၂၃ ခုနှစ်တွင် ၈ ရာခိုင်နှုန်းသာ ပြန်လည်မြင့်တက်ခဲ့သည်။

၂၀၂၄ ခုနှစ်အတွင်းမှာတော့ ဆောက်လုပ်ရေး၊ သယ်ယူပို့ဆောင်ရေးနှင့် လက်လီရောင်းချမှု ကဏ္ဍများတွင် ဖွံ့ဖြိုးတိုးတက်မှုအရှိန် မြန်ဆန်ခဲ့ကြောင်း ယူကရိန်းစီးပွားရေးဝန်ကြီးဌာနက ပြောကြားခဲ့သည်။

ထို့ပြင် ကာကွယ်ရေးကဏ္ဍ အပါအဝင် အချို့ကဏ္ဍများတွင် တိုးတက်မှု အနည်းငယ်ရှိနေချိန်၌ နိုင်ငံအနောက်ပိုင်း မှာ အလုပ်နေရာ လစ်လပ်သည့်နှုန်းသည် အလျင်မြန်ဆုံး မြင့်တက်လာခဲ့သည်။

ထို့နောက် ဧပြီလတွင် စီးပွားရေး လုပ်ငန်းများ၌ ဝန်ထမ်းများရှားပါးပြီး အလုပ်နေရာ လစ်လပ်မှုများ စံချိန်တင် ခဲ့သည်ဟု ယူကရိန်းအစိုးရ၏ အလုပ်အကိုင် ဝက်ဘ်ဆိုက်ဖြစ်သည့် Work.ua ဝက်ဘ်ဆိုက်မှ ဖော်ပြခဲ့သည်။

စီးပွားရေးအညွန်းကိန်းတွက်သူကိုတွေ့ရစဉ်

မကြာသေးမီက ယူကရိန်း၏ ထိပ်သီးစီးပွားရေး အုပ်စုများထဲတွင် တစ်ခု အပါအဝင် ဖြစ်သည့် ဥရောပစီးပွားရေး အသင်း၏ စစ်တမ်းကောက်ယူမှု၌ ကုမ္ပဏီစုစုပေါင်း၏ ၇၄ ရာခိုင်နှုန်းသည် ဝန်ထမ်းများ ပြတ်လပ်မှုနှင့် ရင်ဆိုင် နေရကြောင်း ဖော်ပြထားသည်။

အဘယ်ကြောင့်ဆိုသော် ယူကရိန်းနိုင်ငံအတွင်းမှ ထွက်ပြေးတိမ်းရှောင်သူ သန်းနှင့်ချီ ရှိခဲ့ခြင်းနှင့် သောင်းနှင့်ချီ သည့် အမျိုးသားသည် စစ်မှုထမ်းဆောင် နေရခြင်းတို့ကြောင့် စီးပွားရေးကဏ္ဍတွင် ဝန်ထမ်းများ လျော့နည်းလာ ခြင်းဖြစ်သည်။

ဖေဖော်ဝါရီလက ထုတ်ပြန်ခဲ့သည့် ကမ္ဘာ့ဘဏ်၊ ကုလသမဂ္ဂ၊ ဥရောပကော်မရှင်နှင့် ယူကရိန်းအစိုးရတို့၏ ထုတ်ပြန်ချက်တွင် ယူကရိန်း၏ စီးပွားရေးကို ပြန်လည်ထူထောင်ရေးအတွက် ကုန်ကျစရိတ်သည် ဒေါ်လာ ၄၈၆ ဘီလျံအထိ ရှိနိုင်ကြောင်း ဖော်ပြခဲ့သည်။

Source: ရိုက်တာ