CNI Sport News
၂၀၂၅ ခုနှစ်၊ အောက်တိုဘာ ၁၇
ဘာစီလိုနာနဲ့ စပိန်ကြယ်ပွင့် ယာမဲလ်ဟာ ကမ္ဘာ့ဝင်ငွေ အကောင်းဆုံး ထိပ်တန်းကစားသမား ၁၀ ဦးစာရင်းထဲမှာ ပါဝင်လာခဲ့ပါတယ်။
Forbes က ဆယ်ကျော်သက် ယာမဲလ်ဟာ သူ့ရဲ့ကစားသမားဘဝမှာ ပထမဆုံးအကြိမ်အဖြစ် ဝင်ငွေ အကောင်း ဆုံး ထိပ်တန်း စာရင်းကို ဝင်နိုင်ဖို့အတွက် လုံလောက်တဲ့ ဝင်ငွေရရှိခဲ့တယ်လို့ ခန့်မှန်းခဲ့ပါတယ်။
ယာမဲလ်ဟာ နာမည်ကြီး Adidas ၊ Visa ၊ Konami တို့နဲ့ စပွန်ဆာ စာချုပ်ချုပ်ခဲ့တာကြောင့် သူ့ရဲ့ဝင်ငွေတွေဟာ ပိုမိုတိုးလာခဲ့တာ ဖြစ်ပါတယ်။
ယာမဲလ်ဟာ စီးပွားဖြစ် ဝင်ငွေကနေ ဒေါ်လာ ၁၀ သန်းနဲ့အတူ ဒီရာသီမှာ ဒေါ်လာ ၄၃ သန်း ရရှိမယ်လို့ Forbes က ဖော်ပြခဲ့ပါတယ်။
ယာမဲလ်ကို တွေ့ရစဉ်
၂၀၂၃-၂၄ ရာသီမှာ ဘာစီလိုနာအသင်းအတွက် စတင် ပွဲထွက်ခဲ့တဲ့ ယာမဲလ်ဟာ လက်ရှိအချိန်မှာ ကမ္ဘာ့အကောင်း ဆုံး ကစားသမားတွေထဲက တစ်ဦးအဖြစ် သတ်မှတ်ခြင်း ခံထားရတာပါ။
ယာမဲလ်ဟာ ဘာစီလိုနာအသင်းနဲ့ ၆ နှစ် စာချုပ်ချုပ်ထားပြီး မက်ဆီ ဝတ်ဆင်ခဲ့တဲ့ ကျောနံပါတ် ၁၀ ကို ဝတ်ဆင်ပြီး ခြေစွမ်းပြသနေတာ ဖြစ်ပါတယ်။
Forbes ရဲ့ ကမ္ဘာ့ဝင်ငွေ အကောင်းဆုံး ကစားသမားစာရင်းမှာ ပေါ်တူဂီအသင်း ခေါင်းဆောင် ရော်နယ်ဒိုက ဒေါ်လာသန်း ၂၈၀ နဲ့ ထိပ်ဆုံးနေရာမှာ ရပ်တည်နေတာပါ။
အာဂျင်တီးနားအသင်း ခေါင်းဆောင် မက်ဆီက ဒေါ်လာသန်း ၁၃၀ နဲ့ ဒုတိယနေရာမှာ ရပ်တည်နေပြီး အယ်လ်အစ်တီဟတ်အသင်း တိုက်စစ်မှူး ဘန်ဇီမာက ဒေါ်လာ ၁၀၄ သန်းနဲ့ တတိယနေရာမှာ ရပ်တည်နေ ပါတယ်။
ဘတ်ပီ၊ ဟာလန်း၊ ဗီနီစီးယက်စ်၊ ဆာလက်၊ မာနေး၊ ဘယ်လင်ဂမ်နဲ့ ယာမဲလ်တို့က သူတို့တွေရဲ့အနောက်မှာ အစဉ်အလိုက် ရပ်တည်နေကြပါတယ်။
ငယ်ဘဝကလပ် ဆန်းတို့စ်အသင်းထံ ပြန်ပြောင်းရွှေ့ခဲ့တဲ့ နေမာနဲ့ မန်စီးတီးအသင်းကနေ ထွက်ခွာပြီး နာပိုလီ အသင်းထံ ပြောင်းရွှေ့ခဲ့တဲ့ ဒီဘရိုင်းတို့ကတော့ ဝင်ငွေတွေ လျော့သွားတဲ့အတွက် ထိပ်ဆုံး ၁၀ ဦးစာရင်းထဲမှာ ပါဝင်ခြင်း မရှိတော့တာ ဖြစ်ပါတယ်။
Source: Goal
