CNI Sport News
၂၀၂၅ ခုနှစ်၊ အောက်တိုဘာ ၂၀
ယူနိုက်တက်အသင်းနည်းပြ အာမိုရင်က လီဗာပူးလ်အသင်းကို ၂ ဂိုး-၁ ဂိုးနဲ့ အနိုင်ရခဲ့တဲ့ ပရီးမီးယားလိဂ်ပွဲစဉ်ဟာ သူအသင်းကို တာဝန်ယူ ကိုင်တွယ်ပြီးနောက်ပိုင်း အကြီးမားဆုံး နိုင်ပွဲလို့ ပြောခဲ့ပါတယ်။
အာမိုရင် “ကျနော်ဟာ ယူနိုက်တက်အသင်းမှာ နိုင်ပွဲတွေ အများကြီး မရရှိထားတာကြောင့် ဒါက အလွန်အရေး ပါ ပါတယ်။ ဒီနိုင်ပွဲဟာ ကျနော့်ရဲ့ ယူနိုက်တက်အသင်း နည်းပြဘဝမှာ အကြီးမားဆုံး နိုင်ပွဲလို့ ထင်ပါတယ်။ ကျနော် တို့ဟာ ဒီပွဲမှာ ပြသခဲ့တဲ့ စိတ်ဓါတ်ကို လာမယ့်ပွဲအတွက် ယူဆောင်သွားရမှာဖြစ်ပြီး ၃ ပွဲဆက်တိုက်နိုင်ပွဲရဖို့ လုပ်ဆောင်ရမယ်”လို့ ပြောခဲ့ပါတယ်။
ယူနိုက်တက်အသင်းဟာ ဒီပွဲမှာ အမ်ဘူမိုရဲ့ ပွဲအစ ၆၂ စက္ကန့်မှာ သွင်းယူခဲ့တဲ့သွင်းဂိုးနဲ့ လီဗာပူးလ်အသင်းကို ဦးဆောင်နိုင်ခဲ့ပြီး ဒုတိယပိုင်းမှာ ဂတ်ပိုက လီဗာပူးလ်အသင်းအတွက် ချေပဂိုး ပြန်သွင်းယူနိုင်ခဲ့တာပါ။
ဒါပေမယ့် မက်ဂွဲယားဟာ ခေါင်းတိုက်ဂိုးနဲ့ အဖိုးတန်အနိုင်ဂိုး သွင်းယူပေးနိုင်ခဲ့တာကြောင့် ယူနိုက်တက်အသင်း ဟာ လီဗာပူးလ်အသင်းကို ၂ ဂိုး-၁ ဂိုးနဲ့ အနိုင်ရရှိခဲ့တာ ဖြစ်ပါတယ်။
ယူနိုက်တက်အသင်းဟာ လီဗာပူးလ်အသင်းကို ၂၀၁၆ ခုနှစ်၊ ဇန်နဝါရီနောက်ပိုင်း ပထမဆုံးအကြိမ် အန်ဖီးလ်ကွင်း မှာ နိုင်ပွဲပြန်လည် ရယူနိုင်ခဲ့တာကြောင့် အသင်းသားတွေဟာ ပွဲအပြီး အဝတ်လဲခန်းထဲမှာ အောင်ပွဲခံခဲ့ကြပါတယ်။
ယူနိုက်တက်အသင်းဟာ နည်းပြ အာမိုရင် လက်ထက် ပထမဆုံးအကြိမ်အဖြစ် ပရီးမီးယားလိဂ် ပြိုင်ပွဲမှာ ၂ ပွဲ ဆက် နိုင်ပွဲ ရယူနိုင်ခဲ့တဲ့အတွက် နည်းပြအာမိုရင်ဟာ ဖိအားတွေ လျော့သွားခဲ့ပါတယ်။
လီဗာပူးလ်အသင်းကတော့ ဒီရှုံးပွဲကြောင့် ပရီးမီးယားလိဂ် ပြိုင်ပွဲမှာ ၃ ပွဲဆက်တိုက် ရှုံးပွဲကြုံတွေ့ပြီး အမှတ်ပေး ဇယား အဆင့် ၁ နေရာက အာဆင်နယ်အသင်းနဲ့ ၄ မှတ်အကွာ အဆင့် ၄ နေရာကို ရောက်ရှိသွားခဲ့တာပါ။
ယူနိုက်တက်အသင်းဟာ အမှတ်ပေးဇယားအဆင့် ၉ နေရာအထိ ရောက်ရှိလာပြီး လီဗာပူးလ်အသင်းနဲ့ ၂ မှတ်သာ ကွာဟတော့တာ ဖြစ်ပါတယ်။
