CNI Sport News
၂၀၂၅ ခုနှစ်၊ ဒီဇင်ဘာ ၁၀
ဒူးဒဏ်ရာကြောင့် အနားယူနေရတဲ့ တိုက်စစ်မှူး ဆက်စ်ကိုဟာ ယူနိုက်တက်အသင်းအတွက် ပြန်လာဖို့ နီးစပ် နေပြီဖြစ်ပြီး အသင်းမှာ သူ့ကိုယ်သူ သက်သေပြဖို့ စိတ်မရှည် ဖြစ်နေကြောင်း အေးဂျင့်ဖြစ်သူ ဘာဆာနိုဗစ်က ပြောခဲ့ပါတယ်။
ဘာဆာနိုဗစ်က “ဆက်စ်ကိုဟာ အလွန်ကောင်းမွန်တယ်လို့ ခံစားနေရပြီး သူ့ရဲ့ ပြန်လည်ထူထောင်ရေး လုပ်ငန်း စဉ်ဟာ စီစဉ်ထားတဲ့အတိုင်း သွားနေပါတယ်။ ကွင်းထဲကို ပြန်လာဖို့ သူစိတ်အားထက်သန်နေပြီး ကစားရတာကို သူလွမ်းနေပါတယ်။ မကြာခင်မှာ သူပြန်လာနိုင်ဖို့ မျှော်လင့်ပြီး ဘယ်အချိန် ပြန်လာမလဲဆိုတာက ဆေးအဖွဲ့နဲ့ နည်းပြအပေါ်မှာ မူတည်ပါတယ်။ ဒါပေမယ့် မကြာမီမှာ သူ့ကို ကွင်းထဲမြင်တွေ့ရတော့မယ်လို့ ထင်ပြီး ထင်ထား တာထက်တောင် ပိုစောနိုင်တယ်”လို့ ဆလိုဗေးနီးယားရုပ်သံ Arena Sport ကို ပြောခဲ့တာပါ။
အသက် ၂၂ နှစ်အရွယ်ရှိ ဆက်စ်ကိုဟာ စပါးနဲ့ ယူနိုက်တက်အသင်းတို့ ၂ ဂိုးစီသရေကျခဲ့တဲ့ နိုဝင်ဘာ ၈ ရက်က ပွဲစဉ်မှာ ဒူးဒဏ်ရာ ရပြီးကတည်းက အနားယူနေရတာ ဖြစ်ပါတယ်။
ဆက်စ်ကိုဟာ ဒီကာလအတွင်းမှာ ယူနိုက်တက်အသင်းရဲ့ ပရီးမီးယားလိဂ် ၄ ပွဲကို လွဲချော်ခဲ့ပါတယ်။
ဆက်စ်ကိုကို တွေ့ရစဉ်
နွေရာသီက ပေါင် ၇၄ သန်းနဲ့ လိုက်ပ်ဇစ်အသင်းကနေ ရောက်လာခဲ့တဲ့ ဆက်စ်ကိုဟာ ယူနိုက်တက်အသင်း အတွက် ကစားထားတဲ့ ပရီးမီးယားလိဂ် ၁၁ ပွဲမှာ ၂ ဂိုးသွင်းယူထားတာပါ။
ယူနိုက်တက်အသင်းနည်းပြ အာမိုရင်ဟာ တိုက်စစ်မှူး ဆက်စ်ကို အသင်းအတွက် ပြန်ပါဝင်နိုင်မယ့် အချိန်ကို ရှင်းရှင်းလင်းလင်း ပြောထားခြင်း မရှိသေးပေမယ့် သူ့ရဲ့ အေးဂျင့်ကတော့ ဆလိုဗေးနီးယား လက်ရွေးစင်ဟာ ကြံ့ခိုင်မှုပြည့်ဝဖို့ နီးစပ်နေပြီလို့ ပြောခဲ့ပါတယ်။
ဆက်စ်ကိုဟာ ယူနိုက်တက် ကစားသမားဘဝကို နှေးကွေးစွာ စတင်နေပေမယ့် အေးဂျင့်ဘာဆာနိုဗစ်က သူ့ရဲ့ ကစားသမားကို နည်းပြအာမိုရင်က အပြည့်အဝ ထောက်ခံမှု ပေးထားတယ်လို့ ပြောခဲ့တာပါ။
ယူနိုက်တက်အသင်းဟာ လာမယ့် ရက်ပိုင်းအတွင်းမှာ အမ်ဘူမိုနဲ့ အာမတ်တို့ကို အာဖရိကဖလား ပြိုင်ပွဲအတွက် သူတို့ရဲ့ နိုင်ငံအသင်းတွေထံ စေလွှတ်ရမှာဖြစ်လို့ ဆက်စ်ကို အသင်းအတွက် အမြန်ဆုံးပါဝင်နိုင်ဖို့ မျှော်လင့် နေပါတယ်။
Source: ESPN
