CNI Sport News
၂၀၂၅ ခုနှစ်၊ ဒီဇင်ဘာ ၁၀
တောင်ကိုရီးယားအသင်း ခေါင်းဆောင် ဆွန်ဟောင်မင်က စပါးအသင်းက အမြဲတမ်းသူ့ရဲ့ အိမ်ဖြစ်တယ်လို့ စပါးအသင်း အိမ်ကွင်းကို ပြန်လာပြီး အသင်းဟောင်း ပရိသတ်တွေကို နှုတ်ဆက်မှု ပြုလုပ်ချိန်မှာ ပြောခဲ့ပါတယ်။
ဆွန်ဟောင်မင်က “ပရိသတ်တွေ ကျနော့်ကို မမေ့ကြဖို့ မျှော်လင့်ပါတယ်။ အံ့အားသင့်စရာကောင်းပြီး မယုံနိုင်စရာ ၁၀ နှစ်တာ ကာလပါပဲ။ ကျေးဇူးတင်ပါတယ်လို့ ကျနော်ပြောချင်ပြီး ကျနော်က အမြဲတမ်း စပါးအသင်းဖြစ်သလို ခင်ဗျားတို့နဲ့အတူ အမြဲရှိနေမှာပါ။ ဒီနေရာက အမြဲတမ်း ကျနော့်ရဲ့ အိမ်ဖြစ်ဖြစ်ပြီး ခင်ဗျားတို့ကို ဘယ်တော့မှ မေ့မှာ မဟုတ်ပါဘူး။ ခင်ဗျားတို့ အားလုံးကို ချစ်တယ်”လို့ ပြောခဲ့တာပါ။
၂၀၁၅ ခုနှစ်မှာ လေဗာကူဆင်အသင်းကနေ ရောက်ရှိလာခဲ့တဲ့ ဆွန်ဟောင်မင်ဟာ စပါးအသင်းအတွက် ၄၅၄ ပွဲ ကစားခဲ့ပြီး ၁၇၃ ဂိုး သွင်းယူကာ မနှစ်ကရာသီမှာ ယူရိုပါလိဂ်ဖလား ရရှိခဲ့ပါတယ်။
ဆွန်ဟောင်မင်ဟာ အခုနှစ် ဘောလုံးရာသီ မစတင်မီမှာ စပါးအသင်းကနေ ထွက်ခွာတော့မယ်လို့ ကြေညာခဲ့ပြီး တောင်ကိုရီးယား ရာသီကြို ခြေစမ်းခရီးစဉ်မှာ အသင်းအတွက် နောက်ဆုံးပွဲ ပါဝင်ကစားခဲ့တာ ဖြစ်ပါတယ်။
ဆွန်ဟောင်မင်ကို တွေ့ရစဉ်
မေဂျာလိဂ်ကလပ် LAFC အသင်းထံ ပြောင်းခဲ့တဲ့ ဆွန်ဟောင်မင်ဟာ စပါးအသင်း ပရိသတ်တွေကို အိမ်ကွင်းမှာ မနှုတ်ဆက်ခဲ့ရတာကြောင့် တစ်နေ့ စပါးအသင်း အိမ်ကွင်းကို လာရောက်ပြီး ပရိသတ်တွေကို နှုတ်ဆက်ချင်တယ် လို့ ပြောခဲ့တာပါ။
ဆွန်ဟောင်မင်ဟာ စပါးအသင်းက ဆလားဗီးယားအသင်းကို ၃ ဂိုး-ဂိုးမရှိနဲ့ အနိုင်ရခဲ့တဲ့ ချန်ပီယံလိဂ် ပွဲစဉ်မှာ တော့ အသင်းရဲ့ ပွဲကို တက်ရောက်ကြည့်ရှုပြီး ပရိသတ်တွေကို နှုတ်ဆက်ခွင့်ရခဲ့တာ ဖြစ်ပါတယ်။
ဆွန်ဟောင်မင်ကို စပါးအသင်း ဂန္ထဝင် လက်ဒလေကင်းက အမှတ်တရ ဂုဏ်ပြု လက်ဆောင် ပေးခဲ့ပါတယ်။
ဆွန်ဟောင်မင်ဟာ လက်ရှိအချိန်မှာ LAFC အသင်းနဲ့အတူ ၂၀၂၅ မေဂျာလိဂ်ရာသီ ပြီးဆုံးသွားပြီ ဖြစ်တာကြောင့် အနားယူပြီးရင် ရာသီသစ်အတွက်နဲ့ ၂၀၂၆ ကမ္ဘာ့ဖလားပြိုင်ပွဲအတွက် သူ့ရဲ့ ကြံ့ခိုင်မှုပိုင်းကို အကောင်းဆုံး ဖြစ်အောင် လုပ်ဆောင်သွားမှာ ဖြစ်ပါတယ်။
Source: Goal
