CNI Sport News
၂၀၂၅ ခုနှစ်၊ ဒီဇင်ဘာ ၁၁
ရီးရယ်လ်အသင်းဟာ ချန်ပီယံလိဂ် အိမ်ကွင်းပွဲစဉ်မှာ မန်စီးတီးအသင်းကို အရေးနိမ့်ခဲ့ပေမယ့် ရလဒ်တွေ ကောင်းအောင် ပြန်ပြီးလုပ်နိုင်ဖို့အတွက် နည်းပြအလွန်ဆိုကို အချိန်ထပ်ပြီးပေးဖို့ ဆုံးဖြတ်ခဲ့ပါတယ်။
ရီးရယ်လ်အသင်းဟာ မန်စီးတီးအသင်းကို ၂ ဂိုး-၁ ဂိုးနဲ့ အရေးနိမ့်ခဲ့ပြီးနောက် ပြိုင်ပွဲစုံ နောက်ဆုံး ၈ ပွဲမှာ ၂ ပွဲသာ အနိုင်ရရှိထားတာပါ။
မန်စီးတီးအသင်းကို အရေးနိမ့်ခဲ့ရင် နည်းပြအလွန်ဆို ရာထူးကနေ ထုတ်ပယ်ခံရမယ်ဆိုပြီး ဒီပွဲမတိုင်မီကတည်းက သတင်းတွေ ထွက်ပေါ်နေခဲ့တာ ဖြစ်ပါတယ်။
အဲ့ဒါကြောင့် အလွန်ဆိုဟာ ရီးရယ်လ်အသင်း နည်းပြရာထူးကနေ ထုတ်ပယ်ခံရမယ့် ဖိအားတွေ ခံစားနေရတာပါ။
ဒီပွဲမှာ ရီးရယ်လ်အသင်း ပရိသတ်တွေဟာ အသင်းရဲ့ ရလဒ်တွေအပေါ် သူတို့ရဲ့ စိတ်ပျက်မှုကို ပြသခဲ့ပြီး လှောင်ပြောင်မှုတွေ ပြုလုပ်ခဲ့ကြတာပါ။
ရီးရယ်လ်နည်းပြ အလွန်ဆိုကို တွေ့ရစဉ်
ရီးရယ်လ်အသင်းဟာ ပြီးခဲ့တဲ့ လာလီဂါပွဲစဉ်ကလည်း အိမ်ကွင်းမှာ ဆယ်လ်တာဗီဂိုအသင်းကို ၂ ဂိုး-ဂိုးမရှိနဲ့ အရေး နိမ့် ခဲ့တာကြောင့် အိမ်ကွင်းမှာ ၂ ပွဲဆက် ရှုံးပွဲကြုံတွေ့ခဲ့တာ ဖြစ်ပါတယ်။
စပိန်သတင်းစာ မာကာက မန်စီးတီးအသင်းကို အရေးနိမ့်ခဲ့ပေမယ့် ရီးရယ်လ်အသင်းဟာ နည်းပြအလွန်ဆိုကို အချိန်ထပ်ပြီး ပေးသွားမယ်လို့ ဖော်ပြထားတာပါ။
ရီးရယ်လ်အသင်းဟာ ချန်ပီယံလိဂ်ပွဲစဉ် ၆ ပွဲ ကစားအပြီးမှာ ရမှတ် ၁၂ မှတ်နဲ့ အဆင့် ၇ နေရာ ရပ်တည်နေတာ ကြောင့် နောက်တစ်ဆင့်ကို အလိုအလျောက် တက်နိုင်ဖို့ အခွင့်အရေး ရှိနေသေးပါတယ်။
ရီးရယ်လ်အသင်း ကွင်းလယ်လူ ဘယ်လင်ဂမ်က သူတို့ဟာ နည်းပြကို ၁၀၀ ရာခိုင်နှုန်း ထောက်ခံပြီး ရလဒ် ကောင်းတွေရရှိအောင် ဆက်တိုက်ပွဲ ဝင်သွားမယ်လို့ ပြောခဲ့ပါတယ်။
ရီးရယ်လ်အသင်းနည်းပြ အလွန်ဆိုက ပရိသတ်တွေရဲ့ လှောင်ပြောင်မှုကို သူနားလည် လက်ခံပြီး ယုံကြည်မှုနဲ့ ဆက်သွားမယ်ဆိုရင် ခက်ခဲတဲ့အချိန်တွေကို ကျော်ဖြတ်နိုင်မယ်ဆိုတာ ယုံကြည်မှုရှိတယ်လို့ ပြောခဲ့ပါတယ်။
ရီးရယ်လ်အသင်းဟာ ရလဒ်တွေ မကောင်းဖြစ်နေတဲ့အတွက် လာလီဂါပြိုင်ပွဲမှာလည်း ဘာစီလိုနာအသင်းရဲ့ ၄ မှတ်ဖြတ် ဦးဆောင်ခြင်းကို ခံထားရတာပါ။
ရီးရယ်လ်အသင်းဟာ လာမယ့် လိဂ်ပွဲစဉ်အဖြစ် အလာဗက်စ်အသင်းနဲ့ ယှဉ်ပြိုင်ရမှာ ဖြစ်ပါတယ်။
Source: Metro
