CNI Sport News
၂၀၂၅ ခုနှစ်၊ အောက်တိုဘာ ၂၅
ယူနိုက်တက်အသင်းနည်းပြ အာမိုရင်က အသင်းနဲ့ပတ်သက်ပြီး လီဗာပူးလ်အသင်းနည်းပြ အာနီဆလော့ ပြောခဲ့ တဲ့ မှတ်ချက်တွေကို သူဂရုစိုက်မှာ မဟုတ်ဘူးလို့ ပြောခဲ့ပါတယ်။
ယူနိုက်တက်အသင်းက လီဗာပူးလ်အသင်းကို ၂ ဂိုး-၁ ဂိုးနဲ့ အနိုင်ရခဲ့တဲ့ ပြီးခဲ့တဲ့အပတ်က ပွဲစဉ်အပြီးမှာ လီဗာပူးလ် အသင်းနည်းပြ အာနီဆလော့က ခံစစ်ပိတ်ပြီး အဝေးဘောတွေနဲ့ ကစားတဲ့ အသင်းတွေနဲ့ ရင်ဆိုင်ရတာဟာ အမြဲတမ်း ခက်ခဲတယ်လို့ ပြောခဲ့တာပါ။
ယူနိုက်တက်အသင်းဟာ လီဗာပူးလ်အသင်းကို ၂၀၁၆ ခုနှစ်နောက်ပိုင်း ပထမဆုံးအကြိမ် အန်ဖီးလ်ကွင်းမှာ နိုင်ပွဲရယူနိုင်ခဲ့တာ ဖြစ်ပါတယ်။
အာနီဆလော့ရဲ့ မှတ်ချက်နဲ့ ပတ်သက်ပြီး အာမိုရင်က “လီဗာပူးလ်အသင်းနဲ့ပွဲက ပြီးသွားပါပြီ၊ ဒါကို ကျနော် မှတ်ချက် မပေးချင်ပါဘူး။ ဒါက အရေးမကြီးတော့ပါဘူး။ ဘရိုက်တန်နဲ့ပွဲမှာ ဘာတွေ ဖြစ်လာမလဲဆိုတာသာ အရေးကြီးပါတယ်။ ဆလော့ ပြောတဲ့ အရာတွေကိုရော လူတွေက ကျနော်တို့ အသင်းအကြောင်း ပြောနေတာတွေ ကို ကျနော် ဂရုမစိုက်ပါဘူး။ ကျနော့်အသင်းကို ကျနော် အကဲဖြတ်မှုတွေ ပြုလုပ်နိုင်ပြီး ဘောလုံးနဲ့ ပိုပြီးကောင်း အောင် ကစားဖို့လိုတယ်ဆိုတာ ကျနော်သိပါတယ်”လို့ ပြောခဲ့တာပါ။
အာနီဆလော့ကို တွေ့ရစဉ်
ယူနိုက်တက်အသင်းဟာ နည်းပြအာမိုရင် လက်ထက်မှာ ပထမဆုံးအကြိမ်အဖြစ် ပရီးမီးယားလိဂ် ပြိုင်ပွဲမှာ ၂ ပွဲ ဆက် အနိုင်ရခဲ့ပြီးနောက် ၃ ပွဲဆက် နိုင်ပွဲအဖြစ် ဘရိုက်တန်အသင်းနဲ့ ပွဲစဉ်မှာပါ အနိုင်ယူနိုင်ဖို့ မျှော်လင့်နေပါ တယ်။
ယူနိုက်တက်အသင်းဟာ ဘရိုက်တန်အသင်းနဲ့ နောက်ဆုံးကစားခဲ့တဲ့ ပရီးမီးယားလိဂ် ၇ ပွဲမှာ ၆ ပွဲအထိ အရေး နိမ့်ခဲ့ပြီး ၁ ပွဲသာ အနိုင်ရခဲ့ကာ ရလဒ်ဆိုးတွေ ကြုံတွေ့ထားရတာပါ။
ဘရိုက်တန်အသင်းဟာ ဒီရာသီ ပရီးမီးယားလိဂ်ပွဲစဉ် ၈ ပွဲ ကစားအပြီးမှာ ယူနိုက်တက်အသင်းထက် ၁ မှတ် လျော့နည်းပြီး အဆင့် ၁၀ နေရာမှာ ရပ်တည်နေကာ ယူနိုက်တက်အသင်းက အဆင့် ၉ နေရာမှာ ရပ်တည်နေတာ ဖြစ်ပါတယ်။
Source:ESPN
