CNI Sport News
၂၀၂၅ ခုနှစ်၊ အောက်တိုဘာ ၂၄
ခရစ္စတယ်ပဲလေ့စ်အသင်း နောက်ခံလူ မာ့ခ်ဂူဟီရဲ့ ကိုယ်စားလှယ်တွေဟာ ဖြစ်နိုင်ဖွယ်ရှိတဲ့ အပြောင်းအရွှေ့ အတွက် ဘိုင်ယန်မြူးနစ်အသင်းနဲ့ တွေ့ဆုံမှု ပြုလုပ်ခဲ့ပါတယ်။
မာ့ခ်ဂူဟီဟာ ပြီးခဲ့တဲ့နွေရာသီက လီဗာပူးလ်အသင်းထံ ပြောင်းရွှေ့ဖို့ နီးစပ်ခဲ့ပေမယ့် ပဲလေ့စ်အသင်းဘက်က သူ့ရဲ့နေရာမှာ အစားထိုးဖို့ ကစားသမားရှာဖွေတာ အဆင်မပြေခဲ့တာကြောင့် အပြောင်းအရွှေ့ ပိတ်ပင်ခဲ့တာပါ။
လီဗာပူးလ်အသင်းနဲ့ အပြောင်းအရွှေ့ ပျက်ပြယ်ခဲ့ပေမယ့် ဒီရာသီကုန်ရင် ခရစ္စတယ်ပဲလေ့စ်အသင်းနဲ့ စာချုပ် ကုန်ဆုံးမယ့် မာ့ခ်ဂူဟီရဲ့ အပြောင်းအရွှေ့ ထင်ကြေးတွေဟာ အခုအချိန်ထိ ထွက်ပေါ်နေခဲ့တာ ဖြစ်ပါတယ်။
ခရစ္စတယ်ပဲလေ့စ်အသင်း နည်းပြ ဂလက်စ်နာက အင်္ဂလန်နောက်ခံလူဟာ ခရစ္စတယ်ပဲလေ့စ်အသင်းနဲ့ စာချုပ် သစ် ချုပ်ဆိုဖို့ ရည်ရွယ်ထားခြင်း မရှိဘူးလို့ ပြောခဲ့တာကြောင့် မာ့ခ်ဂူဟီဟာ ဒီရာသီကုန်ရင် အသင်းကနေ ထွက်ခွာမယ်ဆိုတာ သေချာနေပါတယ်။
မာခ့်ဂူဟီဟာ လာမယ့် ဇန်နဝါရီမှာ အင်္ဂလန်ပြင်ပ ကလပ်အသင်းတွေနဲ့ လွတ်လပ်စွာ ဆွေးနွေးမှုတွေ ပြုလုပ်လို့ ရမှာဖြစ်ပြီး သူ့ကို ခေါ်ယူဖို့ ဘိုင်ယန်မြူးနစ်အသင်း အပါအဝင် ဥရောပထိပ်သီး ကလပ်အချို့က စောင့်ကြည့်နေ တာပါ။
မာ့ခ်ဂူဟီကို တွေ့ရစဉ်
ဂျာမန်သတင်းထောက် တစ်ဦးဖြစ်တဲ့ ဖလော်ရီယန်က မာ့ခ်ဂူဟီရဲ့ ကိုယ်စားလှယ်တွေဟာ အခုအပတ်ထဲမှာ ဘိုင်ယန်မြူးနစ်အသင်းနဲ့ ဖြစ်နိုင်ဖွယ်ရှိတဲ့ အပြောင်းအရွှေ့အတွက် တွေ့ဆုံမှု ပြုလုပ်ခဲ့တယ်လို့ ပြောခဲ့ပါတယ်။
ဘိုင်ယန်မြူးနစ်အသင်းဟာ အူပါမီကာနိုနဲ့ ကင်မင်ဂျေးတို့ထဲက တစ်ဦးကို ဆုံးရှုံးရဖွယ်ရှိနေတဲ့အတွက် ဗဟို နောက်ခံလူ တစ်ဦးခေါ်ယူဖို့ စီစဉ်နေပြီး ဒေါ့မွန်အသင်း နောက်ခံလူ ရှလိုတာဘက်လည်း သူတို့ရဲ့ပစ်မှတ်ထဲမှာ ပါဝင်နေပါတယ်။
ဘိုင်ယန်မြူးနစ်အသင်း အနေနဲ့ မာ့ခ်ဂူဟီကို ခေါ်ယူနိုင်ဖို့အတွက် ရီးရယ်လ်၊ လီဗာပူးလ်အသင်းတို့နဲ့ ပြိုင်ဆိုင်ရဖို့ ရှိနေပြီး လီဗာပူးလ်အသင်းဟာ သူ့ကို ဇန်နဝါရီအပြောင်းအရွှေ့မှာ ခေါ်ယူဖို့တောင် ကြိုးစားလာနိုင်တာပါ။
ခရစ္စတယ်ပဲလေ့စ်အသင်းဟာ မာ့ခ်ဂူဟီကို ရာသီကုန်မှာ အလွတ်နဲ့ဆုံးရှုံးရမှာဖြစ်လို့ ပြောင်းရွှေ့ကြေးရမယ့် ဇန်နဝါရီမှာ ရောင်းချသွားဖွယ်ရှိနေတာ ဖြစ်ပါတယ်။
Source: Dailymail
