CNI Sport News
၂၀၂၅ ခုနှစ်၊ အောက်တိုဘာ ၂၅
အင်တာမိုင်ယာမီအသင်းက နက်ရှ်ဗေးလ်အသင်းကို ၃ ဂိုး-၁ ဂိုးနဲ့ အနိုင်ရခဲ့တဲ့ ပွဲမတိုင်မီမှာ အသင်းခေါင်းဆောင် မက်ဆီဟာ မေဂျာလိဂ် အကြီးအကဲ ဒွန်ဂါဘာက ချီးမြှင့်တဲ့ ၂၀၂၅ လိဂ်ပြိုင်ပွဲရဲ့ ရွှေဖိနပ်ဆုကို လက်ခံရရှိခဲ့ပါ တယ်။
၂၀၂၅ မေဂျာလိဂ်ပြိုင်ပွဲမှာ ၂၈ ပွဲ ကစားပြီး၂၉ ဂိုး သွင်းယူနိုင်ခဲ့တဲ့ မက်ဆီဟာ ပထမဆုံးအကြိမ် မေဂျာလိဂ် ရွှေဖိနပ်ဆုကို ရရှိခဲ့တာပါ။
မက်ဆီဟာ မကြာသေးမီက အင်တာမိုင်ယာမီအသင်းမှာ ၂၀၂၈ မေဂျာလိဂ် ရာသီကုန်အထိ ရှိမယ့် ၃ နှစ် သက်တမ်းတိုး စာချုပ်ချုပ်ဆိုထားတာ ဖြစ်ပါတယ်။
မက်ဆီဟာ သွင်းဂိုးတွေအပြင် ဂိုးဖန်တီးမှု ၁၉ ကြိမ်လည်း ပြုလုပ်ထားတာကြောင့် မေဂျာလိဂ် အကောင်းဆုံး ကစားသမားဆုကို ၂ နှစ်ဆက်တိုက် ရရှိဖို့လည်း ရေပန်းစားနေပါတယ်။
မက်ဆီကို တွေ့ရစဉ်
၂၀၂၃ ခုနှစ်၊ ဇူလိုင်က အင်တာမိုင်ယာမီအသင်းကို ပြောင်းရွှေ့လာခဲ့တဲ့ မက်ဆီဟာ အသင်းကို ၂၀၂၃ လိဂ်ဖလား၊ ၂၀၂၄ Supporters' Shield တို့ရရှိအောင် ကူညီပေးနိုင်ခဲ့တာပါ။
အဲ့ဒါကြောင့်လည်း မက်ဆီဟာ ၂၀၂၄ မေဂျာလိဂ်ပြိုင်ပွဲရဲ့ အကောင်းဆုံး ကစားသမားဆုကို ရရှိခဲ့ပြီး ၂၀၂၅ ခုနှစ် အတွက်ပါ ထပ်ပြီး ရယူနိုင်မယ်ဆိုရင် ဒီဆုကို ၂ နှစ် ဆက်တိုက် ရရှိတဲ့ ပထမဆုံး မေဂျာလိဂ် ကစားသမားအဖြစ် မှတ်တမ်းတင်နိုင်မှာ ဖြစ်ပါတယ်။
မက်ဆီဟာ အင်တာမိုင်ယာမီအသင်းက နက်ရှ်ဗေးလ်အသင်းကို ၃ ဂိုး-၁ ဂိုးနဲ့ အနိုင်ရခဲ့တဲ့ မေဂျာလိဂ်ဖလား Round 1 ပွဲစဉ်ရဲ့ ပထမပွဲစဉ်မှာ အသင်းအတွက် ၂ ဂိုးသွင်းပြီး ခြေစွမ်းပြသနိုင်ခဲ့ပါတယ်။
အင်တာမိုင်ယာမီအသင်းဟာ နက်ရှ်ဗေးလ်အသင်းနဲ့ နောက်ထပ် ကစားရမယ့်ပွဲစဉ်မှာ အနိုင်ရခဲ့ရင် အရှေ့ပိုင်းဇုန် ဆီမီးဖိုင်နယ်အဆင့်ကို တက်နိုင်မှာ ဖြစ်ပါတယ်။
Source: ESPN
