CNI Sport News
၂၀၂၄ ခုနှစ်၊ အောက်တိုဘာ ၃
အင်တာမိုင်ယာမီအသင်းဟာ ကိုလံဘတ်စ်ခရူအသင်းကို အနိုင်ရပြီး Supporters' Shield ကို ရယူနိုင်ခဲ့ပြီးနောက် အသင်းခေါင်းဆောင် မက်ဆီက ၂၀၂၄ မေဂျာလိဂ် ရာသီအတွက် အသင်းရဲ့ ပထမဆုံးရည်မှန်းချက် ပြီးမြောက်ခဲ့ ပြီလို့ ပြောခဲ့ပါတယ်။
မက်ဆီက “ကျနော်တို့ ဒီဆုဖလားရရှိအောင် လုပ်နိုင်ခဲ့လို့ ပျော်ရွှင်ပါတယ်။ ဒီနှစ်အစကတည်းက ဒီအစုအဖွဲ့ဟာ ဒီဆုဖလားအတွက် တိုက်ပွဲဝင်မယ်ဆိုတာကို ကျနော်တို့ သိပါတယ်။ အခုတော့ ပထမဆုံး ရည်မှန်းချက်ကို ပြီးမြောက်အောင်လုပ်နိုင်ခဲ့လို့ ပျော်ရွှင်ပါတယ်။ ကျနော်တို့ နောက်ထပ်ဖလားအတွက် စဉ်းစားရမှာပါ”လို့ Apple TV နဲ့ ပြုလုပ်ခဲ့တဲ့ အင်တာဗျူးမှာ ပြောခဲ့တာပါ။
အင်တာမိုင်ယာမီအသင်းက ကိုလံဘတ်စ်ခရူအသင်းကို ၃ ဂိုး-၂ ဂိုးနဲ့ အနိုင်ရခဲ့တဲ့ပွဲမှာ မက်ဆီက ၂ ဂိုးသွင်းပြီး ဆွာရက်ဇ်က ၁ ဂိုး သွင်းယူခဲ့တာဖြစ်ပါတယ်။
အင်တာမိုင်ယာမီအသင်းဟာ ဒီနိုင်ပွဲကြောင့် မေဂျာလိဂ်ပွဲပေါင်း ၃၂ ပွဲ ကစားအပြီးမှာ ရမှတ် ၆၈ မှတ်နဲ့ Supporters' Shield ကို အသင်းသမိုင်းတစ်လျှောက် ပထမဆုံးအကြိမ် ရယူနိုင်ခဲ့တာပါ။
အင်တာမိုင်ယာမီအသင်း ဆုဖလားနဲ့အတူ တွေ့ရစဉ်
အင်တာမိုင်ယာမီအသင်းဟာ ပြီးခဲ့တဲ့ရာသီက လိဂ်ဖလားကို ရယူနိုင်ခဲ့တာကြောင့် ဒီဆုဖလားဟာ အသင်းအတွက် ဒုတိယမြောက်ရယူနိုင်တဲ့ ဆုဖလားဖြစ်ခဲ့ပါတယ်။
မက်ဆီအတွက်တော့ ဒီဆုဖလားဟာ သူ့ရဲ့ကစားသမားဘဝမှာ ၄၆ ခုမြောက် ရယူနိုင်ခဲ့တဲ့ ဆုဖလားဖြစ်ခဲ့တာပါ။
မက်ဆီဟာ ဒီရာသီမှာ ဒဏ်ရာကြောင့် အင်တာမိုင်ယာမီအသင်းရဲ့ ပွဲစဉ်အများအပြားကို လွဲချော်ခဲ့ပေမယ့် နည်းပြ မာတီနိုရဲ့ ဦးဆောင်မှု ဘာစီလိုနာ အသင်းဖော်ဟောင်းတွေဖြစ်တဲ့ ဆွာရက်ဇ်၊ ဘက်စ်ကွက်နဲ့ အယ်လ်ဘာတို့ရဲ့ ကြိုးစားအားထုတ်မှုတွေကြောင့် အသင်းဟာ ဆုဖလားရယူနိုင်ခဲ့တာဖြစ်ပါတယ်။
အင်တာမိုင်ယာမီအသင်းဟာ မေဂျာလိဂ်ဖလား ပလေးအော့ဖ် ပြိုင်ပွဲကိုလည်း ယှဉ်ပြိုင်ခွင့် ရရှိထားပြီး ဒီဆုဖလား ကို ရယူနိုင်ဖို့လည်း မျှော်လင့်နေတာပါ။
အင်တာမိုင်ယာမီအသင်းဟာ မေဂျာလိဂ် ရာသီလက်ကျန် ၂ ပွဲအဖြစ် တိုရွန်တို၊ နယူးအင်္ဂလန်ရီဗော်လူးရှင်း အသင်းတို့နဲ့ ယှဉ်ပြိုင်ရဖို့ရှိနေပြီး လိဂ်ပြိုင်ပွဲမှာ စံချိန်တင်ရမှတ်ရယူနိုင်ဖို့ ပစ်မှတ်ထားနေတာဖြစ်ပါတယ်။
Source: ESPN
