CNI Sport News
၂၀၂၅ ခုနှစ်၊ ဩဂုတ် ၂၃
ယူနိုက်တက်အသင်းနည်းပြ အာမိုရင်က ဂိုးသမား အိုနာနာဟာ ဖူလ်ဟမ်အသင်းနဲ့ ပွဲစဉ်မှာ ပါဝင်ကစားဖို့ ကြံ့ခိုင်မှု ပြည့်ဝနေပြီ ဖြစ်ပေမယ့် သူ့ကိုပွဲထွက်လူစာရင်းမှာ အသုံးပြုမလားဆိုတာ အတည်ပြုခဲ့ခြင်းမရှိတာ ဖြစ်ပါတယ်။
အာမိုရင်က “အိုနာနာဟာ ပြီးခဲ့တဲ့ အပတ်ကလိုပဲ ပွဲပါဝင်ကစားဖို့ အဆင်သင့်ဖြစ်နေပါပြီ။ အဲဒါကြောင့် ဘယ်သူက ဂိုးသမားအဖြစ် ပွဲထွက်လာမလဲဆိုတာ ပွဲထဲမှာ ကျနော်တို့ မြင်တွေ့ရမှာပါ။ ဖူလ်ဟမ်အသင်းနဲ့ ကစားရတာဟာ အမြဲတမ်းခက်ခဲပြီး သူတို့ဟာ အတွေ့အကြုံရှိသလို လိဂ်အကြောင်းကိုလည်း နားလည်ပါတယ်။ ဒီပွဲဟာ ခက်ခဲတဲ့ ပွဲ တစ်ပွဲဖြစ်လာမယ်ဆိုတာ သေချာတယ်”လို့ ပြောခဲ့တာပါ။
အိုနာနာဟာ ဒဏ်ရာကြောင့် ယူနိုက်တက်အသင်းရဲ့ ရာသီကြို ခြေစမ်းပွဲတွေမှာ မပါဝင်နိုင်ခဲ့သလို အသင်းနဲ့ လေ့ကျင့်ချိန်လည်း နည်းပါးခဲ့တဲ့အတွက် အာဆင်နယ်အသင်းနဲ့ ပရီးမီးယားလိဂ် အဖွင့်ပွဲစဉ်မှာ နည်းပြအာမိုရင်က သူ့ကို အသင်းလူစာရင်းထဲ ချန်လှပ်ခဲ့တာ ဖြစ်ပါတယ်။
အာဆင်နယ်အသင်းကို ၁ ဂိုး-ဂိုးမရှိနဲ့ အရေးနိမ့်ခဲ့တဲ့ပွဲစဉ်မှာ ယူနိုက်တက်အသင်းရဲ့ ဂိုးပေါက်ကို တာဝန်ယူခဲ့တဲ့ ဘယင်ဒါဟာ အမှားအယွင်း ပြုလုပ်ခဲ့တာကြောင့် ဖူလ်ဟမ်အသင်းနဲ့ပွဲစဉ်မှာ အိုနာနာက ပွဲထွက်ဂိုးသမား နေရာ ကို ပြန်လည် ရရှိလိမ့်မယ်လို့ ဖော်ပြနေကြတာပါ။
အိုနာနာကို တွေ့ရစဉ်
ယူနိုက်တက်အသင်း နည်းပြ အာမိုရင်ကတော့ အိုနာနာကို ပွဲထွက်လူစာရင်းထဲ အသုံးပြုမလားဆိုတာ အတည်ပြုဖို့ ငြင်းဆန်ခဲ့တာ ဖြစ်ပါတယ်။
ယူနိုက်တက်အသင်းဟာ အန့်ဝါတ်အသင်းဂိုးသမား လမ်မန်းစ်ကို ခေါ်ယူဖို့ နီးစပ်နေတာကြောင့် ဂိုးသမား အိုနာနာရဲ့ အနာဂတ်ဟာ မရေမရာဖြစ်လာခဲ့တာပါ။
ယူနိုက်တက်အသင်းဟာ ကစားသမားသစ်တွေ ခေါ်ယူနိုင်ဖို့ ကြိုးပမ်းနေပေမယ့် အသင်းမှာရှိတဲ့ ကစားသမား အချို့ကို ရောင်းချနိုင်ဖို့ ခက်ခဲနေတာဖြစ်ပါတယ်။
စီးရီးအေ ချန်ပီယံ နာပိုလီအသင်းက ခေါ်ယူဖို့ ချိတ်ဆက်မှုတွေရှိနေတဲ့ တိုက်စစ်မှူး ဟော့ဂျ်လန်းနဲ့ပတ်သက်ပြီး နည်းပြ အာမိုရင်က ဈေးကွက်ပိတ်ပြီးတဲ့ အချိန်ထိ စောင့်လိုက်ရင် အရာအားလုံး ရှင်းသွားလိမ့်မယ်လို့ ပြောခဲ့ ပါတယ်။
Source: ESPN
