CNI Sport News
၂၀၂၅ ခုနှစ်၊ နိုဝင်ဘာ ၈
ယူနိုက်တက်အသင်းနည်းပြ အာမိုရင်က နောက်ခံလူဟောင်း ဂယ်ရီနဗီးလ်ရဲ့ ဝေဖန်မှုကို ခံခဲ့ရတဲ့ တိုက်စစ်မှူး ဆက်စ်ကိုဟာ အသင်းကို ရောက်ရှိလာပြီးကတည်းက ရုန်းကန်နေရတယ်လို့ ဝန်ခံခဲ့ပါတယ်။
အာမိုရင်က “ဆက်စ်ကို အနည်းငယ် ရုန်းကန်နေရတယ်ဆိုတာ အမှန်တရားပါပဲ။ ဒါကြောင့် ဒါကိုလက်ခံရမှာပါ။ ဒါကို ကြားရတာက ခက်ခဲပေမယ့် ကျနော်တို့ သူ့ကို ကူညီပေးသွားမှာဖြစ်သလို ကာကွယ်မှုတွေလည်း ပြုလုပ် သွားမှာပါ။ သူဟာ အလုပ်ကို အလွန်ကြိုးစားတာကြောင့် ကျနော်တို့ သူ့ကိုအောင်မြင်စေချင်ပါတယ်။ ဒါကြောင့် သူဟာ အောင်မြင်မယ့်သူပါ”လို့ ပြောခဲ့တာပါ။
နွေရာသီ အပြောင်းအရွှေ့မှာ လိုက်ပ်ဇစ်အသင်းကနေ ပေါင် ၇၃.၇ သန်းနဲ့ ရောက်ရှိလာခဲ့တဲ့ ဆက်စ်ကိုဟာ ယူနိုက်တက်အသင်းအတွက် ၁၁ ပွဲ ပါဝင်ကစားအပြီးမှာ ၂ ဂိုးသာသွင်းယူထားနိုင်ပါတယ်။
ဆက်စ်ကိုဟာ ယူနိုက်တက်အသင်းနဲ့ နော်တင်ဟမ်ဖောရက်စ်အသင်းတို့ ၂ ဂိုးစီသရေကျခဲ့တဲ့ ပရီးမီးယားလိဂ် ပွဲစဉ်မှာ မိနစ် ၉၀ အတွင်း ဘောလုံး ၂၁ ကြိမ်သာထိခဲ့တာပါ။
ဆက်စ်ကိုကို တွေ့ရစဉ်
ဂယ်ရီနဗီးလ်က ဆက်စ်ကိုဟာ နွေရာသီက ယူနိုက်တက်အသင်းထံ ရောက်လာခဲ့တဲ့ အမ်ဘူမို၊ ကွန်ညာတို့နဲ့ အလွန် ဝေးကွာနေတယ်လို့ ပွဲအပြီး Sky Sports မှာ ပြောခဲ့ပါတယ်။
ဒါ့အပြင် ဂယ်ရီနဗီးလ်က ဆက်စ်ကို ဆီကနေ အခုလုပ်ဆောင်နေတဲ့ အရာတွေထက် ပိုပြီးမြင်တွေ့ချင်တယ်လို့ ပြောခဲ့တာပါ။
ယူနိုက်တက်အသင်းနည်းပြ အာမိုရင်ကလည်း ဆက်စ်ကိုအသင်းမှာ ရုန်းကန်နေရတယ်ဆိုတာ ဝန်ခံခဲ့ပေမယ့် သူဟာ ပရီးမီးယားလိဂ်ပြိုင်ပွဲမှာ အောင်မြင်မှု ရရှိလိမ့်မယ်ဆိုတာ ယုံကြည်မှုရှိတယ်လို့ ပြောခဲ့ပါတယ်။
ဆက်စ်ကိုဟာ လိုက်ပ်ဇစ်အသင်းမှာ ကစားခဲ့ချိန်က ဥရောပရဲ့အဆင့် သတ်မှတ်ချက် အမြင့်ဆုံး လူငယ် ကစားသမားတွေထဲက တစ်ဦးအဖြစ် ရှိခဲ့ပါတယ်။
ဆက်စ်ကိုဟာ ယူနိုက်တက်အသင်းထံ မပြောင်းမီ အာဆင်နယ်၊ နယူးကာဆယ်အသင်းတို့ရဲ့ စိတ်ဝင်စားမှုကို ရရှိခဲ့တာပါ။
ယူနိုက်တက်အသင်းဟာ ပြီးခဲ့တဲ့ အောက်တိုဘာမှာ ကစားခဲ့တဲ့ ပရီးမီးယားလိဂ် ၃ ပွဲစလုံး အနိုင်ရခဲ့တာကြောင့် နည်းပြ အာမိုရင်ဟာ အကောင်းဆုံးနည်းပြဆုကို ရရှိခဲ့ပြီး အမ်ဘူမိုက အကောင်းဆုံး ကစားသမားဆုကို ရရှိခဲ့ ပါတယ်။
Source: ESPN
