CNI Sport News
၂၀၂၅ ခုနှစ်၊ နိုဝင်ဘာ ၈
အာဆင်နယ်အသင်းနည်းပြ အာတီတာက ရှာခါဟာ သူ့ကို ပိုပြီးကောင်းတဲ့ နည်းပြတစ်ဦး ဖြစ်စေခဲ့တယ်လို့ ရှာခါနဲ့ ပြန်လည်ရင်ဆိုင်ရမယ့် ပွဲမတိုင်မီ ပြောခဲ့ပါတယ်။
အာတီတာက “ကျနော်တို့ အတူတူ ကုန်ဆုံးခဲ့တဲ့ မိနစ်တိုင်းကို ကျနော် နှစ်သက်ပါတယ်။ သူဟာ ကျနော့်ကို ပိုပြီးကောင်းတဲ့ နည်းပြတစ်ဦးဖြစ်အောင် လုပ်ပေးခဲ့ပြီး ဘောလုံးအသင်း တစ်သင်းအနေနဲ့ရော ကလပ်အသင်း အနေနဲ့ပါ အများကြီး တိုးတက်မှုရှိအောင် ကူညီပေးခဲ့ပါတယ်။ သူနဲ့အတူ အမှတ်တရကောင်းတွေ ရှိခဲ့တာကြောင့် ကျနော် အမြဲတမ်း ကျေးဇူးတင်နေမှာပါ”လို့ ပြောခဲ့ပါတယ်။
ပြီးခဲ့တဲ့နွေရာသီမှာ လေဗာကူဆင်အသင်းကနေ ထွက်ခွာပြီး တန်းတက် ဆန်းဒါးလန်းအသင်းထံ ပြောင်းရွှေ့ လာခဲ့တဲ့ ရှာခါဟာ အသင်းကို ရလဒ်ကောင်းတွေ ရရှိအောင် ကူညီပေးနိုင်ခဲ့တာဖြစ်ပါတယ်။
လေဗာကူဆင်အသင်းထံ မပြောင်းရွှေ့မီ အာဆင်နယ်အသင်းမှာ ၇ နှစ်ကြာ ကစားခဲ့တဲ့ ရှာခါဟာ အခက်အခဲ အချို့နဲ့ ရင်ဆိုင်ခဲ့ရတာပါ။

ရှာခါကို တွေ့ရစဉ်
ရှာခါဟာ ၂၀၁၉ ခုနှစ်၊ အောက်တိုဘာက ပွဲစဉ်တစ်ပွဲမှာ အာဆင်နယ်အသင်း ပရိသတ်တွေနဲ့ ဒေါသတကြီး ထိပ်တိုက်တွေ့ခဲ့တာကြောင့် အသင်းခေါင်းဆောင် ရာထူးကနေ ဖယ်ရှားခြင်း ခံခဲ့ရတာဖြစ်ပါတယ်။
ဒါပေမယ့် အာဆင်နယ်အသင်းကို အာတီတာ ကိုင်တွယ်ချိန်မှာ ရှာခါဟာ အသင်းပရိသတ်တွေနဲ့ ဆက်ဆံရေး ပြန်လည် ကောင်းမွန်ခဲ့ပြီး ခြေစွမ်းပြသနိုင်ခဲ့တာပါ။
ဆန်းဒါးလန်းအသင်း ခေါင်းဆောင် ရှာခါဟာ ပရီးမီးယားလိဂ်ပွဲစဉ် ၁၁ အဖြစ် ယှဉ်ပြိုင်မယ့်ပွဲစဉ်မှာ အာဆင်နယ် အသင်းနဲ့ ပြိုင်ဘက်အဖြစ် ပြန်လည်ရင်ဆိုင်ရမှာဖြစ်ပါတယ်။
အာဆင်နယ်အသင်းဟာ ဒီရာသီ ပရီးမီးယားလိဂ်ပြိုင်ပွဲမှာ အဆင့် ၂ နေရာက မန်စီးတီးအသင်းကို ၆ မှတ်ဖြတ်ကာ ထိပ်ဆုံးနေရာကနေ ဦးဆောင်နေသလို နောက်ဆုံးကစားခဲ့တဲ့ ပြိုင်ပွဲစုံ ၁၀ ပွဲစလုံးအနိုင်ရရှိကာ ဒီပွဲတွေမှာ ၈ ပွဲက ပေးဂိုးမပေးခဲ့ရတာပါ။
အာဆင်နယ်အသင်းနည်းပြ အာတီတာက သူတို့ဟာ အသင်းကို တိုးတက်မှုတွေ ရရှိအောင် လုပ်ဖို့သာ အာရုံစိုက် နေတယ်လို့ ပြောခဲ့ပါတယ်။
Source:besoccer
