CNI New

၂၀၂၅ ခုနှစ်၊ စက်တင်ဘာ ၄

ထိုင်းနိုင်ငံတွင် နိုင်ငံရေး အကျပ်အတည်းဖြစ်ကာ ရှုပ်ထွေးနေခြင်းကြောင့် ထိုင်းနိုင်ငံသို့ ရောက်ရှိနေကြသော ရွှေ့ပြောင်းလုပ်သား မြန်မာနိုင်ငံသားများ ဘယ်လိုပုံစံဖြင့် နေနေကြရသလဲဆိုသည့်အပေါ် အားလုံးက စောင့်ကြည့်နေကြသည်။ 

ထိုင်းနိုင်ငံ၏ အာဏာရပါတီဖြစ်သည့် ဖြူးထိုင်းပါတီမှ ယာယီဝန်ကြီးချုပ် ဖွမ်သမ်ဝီချာယာချိုင်းက ရွေးကောက်ပွဲ ကျင်းပရန်အတွက် လွှတ်တော်ကို ဖျက်သိမ်းရန် ဘုရင့်ထံမှ ခွင့်ပြုချက်ရရှိဖို့ အဆိုပြုထားကြောင်း Nikkei Asia မှ ဖော်ပြခဲ့သည်။

အောက်လွှတ်တော်ရှိ အတိုက်အခံ အင်အားစုမှ အစိုးရသစ် ဖွဲ့စည်းရန် အခြားပါတီတစ်ခုကို ထောက်ခံသွားမည်ဟု ပြောကြားခဲ့ပြီးနောက် စက်တင်ဘာ ၂ ရက်တွင် ဖွမ်သမ်က လွှတ်တော်ဖျက်သိမ်းရေးအတွက် ဘုရင့်ထံ အဆိုပြု တင်သွင်းခဲ့ခြင်း ဖြစ်သည်။

ထိုင်းနိုင်ငံတွင် ရွေ့ပြောင်း အလုပ်သမားများ သက်တမ်းတိုးမည့် ကိစ္စများ ဆောင်ရွက်နေချိန်တွင် ဝန်ကြီးချုပ် လည်းပြုတ်၊ ထိုင်းလွှတ်တော်ပါ ဖျက်သိမ်းလိုက်မည်ဆိုပါက လုပ်ငန်းစဥ်များ နှောင့်နှေးမလားဆိုကာ အလုပ် သမားများ သောကဖြစ်နေကြသည်ဟု ရွှေ့ပြောင်းအလုပ်သမားရေး ဆောင်ရွက်ပေးနေသည့် ဦးအောင်ကျော်က CNI သတင်းဌာနသို့ ပြောသည်။

ထိုင်းယာယီဝန်ကြီးချုပ် ဖွမ်သမ်ဝီချာယာချိုင်းကို တွေ့ရစဉ်

၎င်းက “နဂိုက ဝန်ကြီးချုပ်လည်း မပြုတ်သေးတဲ့ အချိန်ကတော့ လုပ်ငန်းစဥ်တွေက ကျနော်တို့ ထိုင်းနိုင်ငံမှာ ၁ ဒသမ ၈ သန်းဆိုတဲ့ ရွှေ့ပြောင်းအလုပ်သမားတွေ အားလုံးက သက်တမ်းတိုးမဲ့ကိစ္စတွေ လုပ်နေကြတယ်။ သွေးစစ် တာတွေ ဘာတွေ ဆောင်ရွက်နေတဲ့ အချိန်မှာ အခုလို ဝန်ကြီးချုပ်ကလည်း ပြုတ်သွားပြီးမှ ထိုင်းနိုင်ငံရဲ့ လွှတ်တော်ပါ အခု ဖျက်သိမ်းဖို့ လုပ်နေတဲ့အခါမှာ ဒီလုပ်ငန်းစဥ်တွေ နှောင့်နှေးသွားမလားဆိုပြီးတော့မှ လုပ်သား တော်တော်များများ သောကဖြစ်နေတယ် ဒီတစ်ကြိမ်မှာတော့ မြန်မာဘက်နဲ့ ထိုင်းဘက်နဲ့ ညှိတာနှိုင်းတာတွေ အဆင်မပြေတဲ့ အတွက်ကြောင့် သက်တမ်းကုန်နေတာက ၁ ဒသမ ၈ သန်းဆိုတဲ့ အလုပ်သမားတွေက ဖေဖော်ဝါရီလ ၁၂ ရက် လောက်ကတည်းက သက်တမ်းကုန်နေကြတာ ဖြစ်ပါတယ်။ ဒါနဲ့ပတ်သက်ပြီး ဒီလုပ်သား တွေပေါ်မှာ ရိုက်ခတ်လာတဲ့ ပြဿနာဖြစ်ပါတယ်၊ ပုံမှန် စက်ရုံအလုပ်ရုံမှာ အလုပ်လုပ်ပြီး နေတဲ့လူတွေပါ မှား ယွင်းပြီး ပိတ်ချခံရတဲ့ အတွက်ကြောင့်မို့ အလုပ်သမားတွေကလည်း ထိပ်ထိပ်ပြာပြာ ဖြစ်နေပါတယ်။ ဒီဇာတ် လမ်းက ကျနော်တို့ ကျားဖြန့်လုပ်ငန်းတွေက စဖြစ်တာပါ။ ဒါကြောင့် မြန်မာလုပ်သားတွေရဲ့ ဘဏ်အကောင့်တွေ ကို ယူပြီးမှ အငှားအသုံးချလိုက်တဲ့ အခါမှာ အဲမှာ ငွေတွေ အဝင်အထွက်တွေများလို့ လိုက်လံ စစ်ဆေးပြီးမှ အခု ပိတ်တာလည်း များပါတယ်”ဟု ပြောသည်။

ထိုင်းနိုင်ငံက ရွှေ့ပြောင်း အလုပ်သမားများ အနေဖြင့် အလုပ်သမား မှတ်ပုံတင် ပြုလုပ်ရာတွင် သက်ဆိုင်ရာ ဆေးရုံမှ ဆေးစစ်ချက် လက်မှတ် လိုအပ်ပြီး တချို့သော ဆေးရုံတွင် အမှန်တကယ် ဆေးစစ်ခြင်းမရှိဘဲ ထုတ်ပေး လိုက်သည့် လက်မှတ်များကို တွေ့ရသည်ဟု ထိုင်းကျန်းမာရေးဒုဝန်ကြီးက ပြောသည်။

သက်ဆိုင်ရာ ဆေးရုံမဟုတ်ဘဲ ထောက်ခံစာများကို လုပ်ရာတွင် မန်နေဂျာများ၊ ပွဲစားများက အများဆုံး လုပ်ဆောင်နေကြောင်း၊ ထို့နောက် ရွှေ့ပြောင်း အလုပ်သမားများလည်း ပါလာကြကြောင်း ပညာရေးနှင့် ဖွံ့ဖြိုးတိုးတက်‌ရေး ဖောင်ဒေးရှင်းမှ အလုပ်သမားရေးတာဝန်ခံ ဦးမင်းဦးက CNI သတင်းဌာနသို့ ပြောသည်။

ထိုင်းဝန်ကြီးချုပ် ရာထူးက ဖယ်ရှားခံရတဲ့ ပေတုန်တန်ကို တွေ့ရစဉ်

၎င်းက “သူတို့က အခုဟာကတော့ အရေးယူတယ်ဆိုတဲ့ ကိစ္စမှာ အဓိက,က အေးဂျင့်တွေ အလုပ်ရှင်တွေ ကနေ ပြီးတော့ အပ်တဲ့ ပွဲစား သို့နည်းမဟုတ် မန်နေဂျာတွေကနေ တဆင့် သက်မှတ်ထားတဲ့ အစိုးရဆေးရုံ မဟုတ်ဘူး လက်မှတ်ရထားတဲ့ ဆေးရုံဆေးခန်းမှာ မဟုတ်ဘဲနဲ့ လုပ်ထားတဲ့ လူတွေပေါ့။ အဲလူတွေကို သူက အရေးယူမှာဆို တော့ ကျနော်တို့ အလုပ်သမားကတော့ ကိုယ့်ဟာကိုယ် သွားပြီးတော့ ဆေးစစ်ပြီးတော့ ကိုယ် အဆင် ပြေတဲ့ ဆေးခန်းမှာ သွားစစ်ပြီးတော့ အဲလို တင်လို့ရတာ မဟုတ်ဘူး။ ဒီကိစ္စကို အများဆုံး လုပ်တဲ့ဟာကတော့ ပြောရမယ်ဆိုရင် ဒီမန်နေဂျာ၊ အလုပ်ရှင် ဒါမှမဟုတ် အေးဂျင့် ပွဲစားလိုဟာမျိုးတွေက လုပ်တာ ဒါပေမယ့် အလုပ် သမားတွေကတော့ ဒီထဲမှာ ပါသွားတာပေါ့”ဟု ပြောသည်။

ထိုင်းတွင် မြန်မာများ အဖမ်းခံရခြင်းမှာ သိသိသာသာ များလာကြောင်း၊ အထောက်အထား မပြည့်စုံခြင်းနှင့်  သက်မှတ်ထားသည့် တားမြစ် အလုပ်များကို လုပ်ကိုင်မိသူများဖြစ်ကြကြောင်း ဦးမင်းဦးက ဆက်ပြောသည်။

၎င်းက “အရင်နှစ်တွေက ထက်စာရင် ရွှေ့ပြောင်း အလုပ်သမား ဦးရေထဲမှာ မြန်မာက အများဆုံး ဖြစ်နေတဲ့ အတွက်ကြောင့် ဖမ်းဆီးစစ်းဆေးတဲ့ အခါမှာ စစ်ဆေးတဲ့အခါမှာပေါ့။ အဲလို အများစု အစစ်ဆေးခံရတဲ့ဟာက မြန်မာတွေ ဖြစ်လာတယ်ဆိုတော့ အထောက်အထား မပြည့်စုံတာတို့ သက်မှတ်ထားတဲ့ တားမြစ်တဲ့ အလုပ်ကို လုပ်တဲ့လူတွေ၊ အလုပ်ရှင်နာမည် မတူတာ၊ အလုပ် အမျိုးအစား မတူတာ ဖမ်းဆီး အရေးယူခံရတာပေါ့ မြန်မာရွှေ့ပြောင်း အလုပ်သမားဦးရေ များလာတာကတစ်ကြောင်း၊ မြန်မာတွေရဲ့ နေထိုင်သွားလာမှုပေါ့ အဲပေါ် မူတည်ပြီးတော့ စောင့်ကြည့်တဲ့ လူတွေ ဒီဘက်ကပြောရရင် မျိုးချစ်အဖွဲ့တွေ၊ အမျိုးသားရေး နည်းနည်း အစွန်း ရောက်တဲ့ သူ‌တွေက လိုက်ပြီးတော့ ဖော်ထုတ်ပေးတာ အဲတာတွေကလည်း ပိုပြီးတော့ အစစ်ဆေး အဖမ်းအဆီး ခံရတဲ့ အကြောင်းအရင်း တစ်ရပ်ဖြစ်တယ်။ အဲဒါကြောင့် အစစ်ဆေးခံရပြီး‌တော့ အခုလိုမျိုး အရေးယူ ခံနေရတာတွေ ပိုများနေတာ”ဟု ပြောသည်။

အထောက်အထားမရှိသော အလုပ်သမားကို ခိုင်းစေသည့် အလုပ်ရှင် အနေဖြင့် အလုပ်သမား တစ်ဦးအတွက် ဘတ် ၁၀,၀၀၀ မှ ၁၀၀,၀၀၀ အထိ ဒဏ်ငွေ ပေးဆောင်ရမည်ဖြစ်ကြောင်း ထိုင်းအစိုးရက ကြေညာထားသည်။ 

ထပ်မံ၍ ပြစ်မှုကျူးလွန်ပါက ထောင်ဒဏ် ၁ နှစ် သိုမဟုတ် ဘတ် ၅၀,၀၀၀ မှ ၂၀၀,၀၀၀ အထိ ဒဏ်နှစ်မျိုးစလုံး ချမှတ်ရမည့်အပြင် ၃ နှစ်ကြာ နိုင်ငံခြားသား အလုပ်သမား ခန့်ထားခွင့်ပါ ပိတ်ပင်သွားမည်ဟု ထိုင်းအစိုးရက ထုတ်ပြန်ကြေညာခဲ့သည်။