CNI Sport News

၂၀၂၃ ခုနှစ်၊ စက်တင်ဘာ ၁၆

တရုတ်နိုင်ငံက အိမ်ရှင်အဖြစ် ကျင်းပမယ့် ၁၉ ကြိမ်မြောက် အာရှအားကစားပွဲတော် Asian Games Hangzhou 2022 ပြိုင်ပွဲကို ဝင်ရောက်ယှဉ်ပြိုင်မယ့် မြန်မာ ယူ-၂၄ အသင်းရဲ့ အပြီးသတ်လူစာရင်းကို နည်းပြချုပ် မိုက်ကယ်က ထုတ်ပြန်လိုက်ပါတယ်။

မြန်မာ ယူ-၂၄ အသင်းရဲ့ အပြီးသတ်ကစားသမား ၂၂ ဦးစာရင်းမှာ အဓိက ကစားသမားဖြစ်တဲ့ ဟိန်းထက်အောင် မပါဝင်ခဲ့ပေမယ့် အသက် ၂၄ နှစ်အထက် ကစားသမားတွေအဖြစ် ရန်ကျော်ထွေး၊ နေမိုးနိုင်နဲ့ ရန်နိုင်ဦးတို့ကို ရွေးချယ်ခဲ့ပါတယ်။ 

ဒါ့အပြင် နည်းပြ မိုက်ကယ်ဟာ မြန်မာ ယူ-၂၃ အသင်းက ကစားသမားအချို့ကို ပြန်လည်ခေါ်ယူခဲ့ပြီး အသက်မီတဲ့ ထက်ဖြိုးဝေ၊ ဝေလင်းအောင်၊ ဟိန်းဇေယျာလင်းတို့ အပါအဝင် ပြည်တွင်း ကလပ်တွေက ယူ-၂၄ ကစားသမားတွေ နဲ့ အသင်းကို ပေါင်းစပ်ဖွဲ့စည်းခဲ့တာပါ။

မြန်မာအသင်းဟာ အာရှအားကစားပွဲတော် အမျိုးသားဘောလုံးပြိုင်ပွဲရဲ့ အုပ်စု A မှာ တရုတ်၊ဘင်္ဂလားဒေ့ရှ်၊ အိန္ဒိယတို့နဲ့ တစ်အုပ်စုထဲ ကျရောက်နေတာ ဖြစ်ပါတယ်။

မြန်မာအသင်းဟာ အုပ်စုပွဲစဉ်တွေအဖြစ် စက်တင်ဘာ ၁၉ ရက်မှာ ဘင်္ဂလားဒေ့ရှ်၊ ၂၁ ရက်မှာ တရုတ်နဲ့ ၂၄ ရက် မှာ အိန္ဒိယအသင်းတို့နဲ့ ယှဉ်ပြိုင်ရမှာဖြစ်ပြီး အုပ်စုထိပ်ဆုံး ၂ သင်းစီနဲ့ အကောင်းဆုံးအုပ်စု တတိယ ၄ သင်းတို့ဟာ ၁၆ သင်းအဆင့် ယှဉ်ပြိုင်ခွင့်ရရှိမှာပါ။

မြန်မာအသင်းဟာ အာရှအားကစားပွဲတော်မှာ ၁၉၆၆ နဲ့ ၁၉၇၀ ခုနှစ်က ချန်ပီယံဆု ၂ ကြိမ် ရရှိထားပြီး နောက်ပိုင်း ပါဝင်ယှဉ်ပြိုင်တဲ့ နှစ်တွေမှာတော့ အုပ်စုအဆင့်နဲ့သာ ကျေနပ်ခဲ့ရတာ ဖြစ်ပါတယ်။ 

မြန်မာအသင်းဟာ ပြိုင်ပွဲကျင်းပမယ့် Hangzhou မြို့ကို စက်တင်ဘာ ၁၆ ရက်က ထွက်ခွာသွားပြီလို့ ဘောလုံး အဖွဲ့ချုပ်က ထုတ်ပြန်ထားပါတယ်။ 

CNI Sport News

၂၀၂၃ ခုနှစ်၊ စက်တင်ဘာ ၁၆

အင်္ဂလန်အသင်းခေါင်းဆောင် ဟာရီကိန်းဟာ လေဗာကူဆင်အသင်းနဲ့ ကစားခဲ့တဲ့ ဘွန်ဒစ်လီဂါပွဲစဉ်မှာ ဘိုင်ယန်မြူးနစ် အသင်းအတွက် ဂိုးသွင်းယူပြီးနောက် ကလပ်ကစားသမားဘဝ သွင်းဂိုး ၃၀၀ ပြည့်တဲ့ မှတ်တမ်းကောင်းတစ်ခုကို ရရှိသွားခဲ့ပါတယ်။

ဘိုင်ယန်မြူးနစ်နဲ့ လေဗာကူဆင် အသင်းတို့ တစ်ဖက် ၂ ဂိုးစီ သရေကျခဲ့တဲ့ ဘွန်ဒစ်လီဂါပွဲစဉ်မှာ တိုက်စစ်မှူး ဟာရီကိန်းဟာ ပွဲချိန် ၇ မိနစ်မှာ ဂျာမန် လက်ရှိ ချန်ပီယံအသင်းအတွက် ဦးဆောင်ဂိုး သွင်းယူပေးနိုင်ခဲ့တာပါ။

ဘိုင်ယန်မြူးနစ်အသင်းဟာ ဒီပွဲစဉ်မှာ ပွဲချိန် ၈၆ မိနစ်အထိ ၂ ဂိုး- ၁ ဂိုးနဲ့ ဦးဆောင်နိုင်ခဲ့ပေမယ့် မိနစ် ၉၀ ပြည့်ပြီး နာကျင်အချိန်ပိုမှာ ပေးခဲ့ရတဲ့ ပင်နယ်တီကြောင့် လေဗာကူဆင်အသင်းနဲ့ ၂ ဂိုးစီ သရေကျပြီး ရမှတ်ခွဲဝေ ယူခဲ့ရ တာ ဖြစ်ပါတယ်။

ဟာရီကိန်းဟာ ၂၀၀၇ ခုနှစ်က ကလိုဆေးနောက်ပိုင်း ဘွန်ဒစ်လီဂါရာသီ အဖွင့်ပွဲစဉ် ၄ ပွဲမှာ ၄ ဂိုး သွင်းယူနိုင်တဲ့ ပထမဆုံး ဘိုင်ယန်မြူးနစ်အသင်း ကစားသမား ဖြစ်လာခဲ့တယ်လို့ အချက်အလက်တွေအရ သိရပါတယ်။

ဟာရီကိန်းဟာ ကလပ် ကစားသမားဘဝသွင်းဂိုး ၃၀၀ မှာ စပါးအသင်းအတွက် ၂၈၀ ဂိုး၊ မီလ်ဝေါအသင်းအတွက် ၉ ဂိုး၊ လေတန်အော်ရီးယန့် အသင်းအတွက် ၅ ဂိုး၊ ဘိုင်ယန်မြူးနစ်အသင်းအတွက် ၄ ဂိုးနဲ့ လက်စတာအသင်း အတွက် ၂ ဂိုး သွင်းယူခဲ့တာပါ။

ဟာရီကိန်းက “ ကျနော်တို့လိုချင်တဲ့ နိုင်ပွဲမရရှိခဲ့ပေမယ့် ဆက်ပြီး အလုပ်လုပ်သွားရမှာပါ။ တိုးတက်ဖို့အရာတွေ အများကြီးရှိသေးပြီး လာမယ့် ရက်ပိုင်းမှာကစားမယ့် ချန်ပီယံလိဂ်ပွဲမှာ ရလဒ်ကောင်းတွေ ရယူသွားမယ်”လို့ ပြောခဲ့ပါတယ်။

ဘိုင်ယန်မြူးနစ်နဲ့ လေဗာကူဆင် အသင်းတို့ဟာ ဒီပွဲမှာ သရေကျခဲ့တာကြောင့် ရာသီအစ ၃ ပွဲစလုံး ရာနှုန်းပြည့် နိုင်ပွဲ ရယူနိုင်ခဲ့တဲ့ မှတ်တမ်း ရပ်တန့်သွားခဲ့ပေမယ့် ရှုံးပွဲမရှိနဲ့ အမှတ်ပေးဇယားအဆင့် ၁ နဲ့ ၂ နေရာမှာ ဆက်လက် ရပ်တည်နေကြတာပါ။

လာမယ့် ကြားရက်မှာတော့ ဘိုင်ယန်မြူးနစ်အသင်းဟာ ချန်ပီယံလိဂ် အုပ်စုပွဲစဉ်အဖြစ် ယူနိုက်တက်အသင်း၊ လေဗာကူဆင်အသင်းက ယူရိုပါလိဂ်အုပ်စုပွဲစဉ်အဖြစ် ဟာကန်အသင်းနဲ့ ယှဉ်ပြိုင်ရမှာ ဖြစ်ပါတယ်။

Source: BBC

CNI Sport News

၂၀၂၃ ခုနှစ်၊ ဩဂုတ် ၈

မြန်မာ့လက်ရွေးစင်အသင်းဟာ ဖီဖာအသိအမှတ်ပြု နိုင်ငံတကာခြေစမ်းပွဲအဖြစ် စက်တင်ဘာလထဲမှာ နီပေါ လက်ရွေးစင်အသင်းနဲ့ ယှဉ်ပြိုင်မှာဖြစ်ပါတယ်။

မြန်မာအသင်းနဲ့ နီပေါအသင်းတို့ဟာ စက်တင်ဘာ ၈ ရက်နဲ့ ၁၁ ရက်နေ့တွေမှာ ခြေစမ်းပွဲ ၂ ပွဲယှဉ်ပြိုင်မှာဖြစ်ပြီး ဒီပွဲတွေကို သုဝဏ္ဏဘောလုံးကွင်းမှာ ကျင်းပသွားမှာပါ။ ဖီဖာရဲ့ ကမ္ဘာ့အဆင့်သတ်မှတ်ချက်မှာ မြန်မာအသင်းက အဆင့် ၁၅၈၊ နီပေါအသင်းက အဆင့် ၁၇၆ မှာ ရပ်တည်နေတာဖြစ်ပါတယ်။ မြန်မာနဲ့ နီပေါအသင်းတို့ဟာ ၂၀၁၉ ခုနှစ်က နောက်ဆုံးတွေ့ဆုံခဲ့ပြီး ဒီပွဲမှာ မြန်မာအသင်းက ၃ ဂိုး- ဂိုးမရှိနဲ့ အနိုင်ရရှိခဲ့တာပါ။

မြန်မာအသင်းဟာ အောက်တိုဘာလထဲမှာ ၂၀၂၆ ကမ္ဘာ့ဖလားပြိုင်ပွဲအတွက် အာရှဇုန်ပထမအဆင့်ခြေစစ်ပွဲနဲ့ ၂၀၂၇ အာရှဖလားပြိုင်ပွဲအတွက် ခြေစစ်ပွဲအဖြစ် မကာအိုအသင်းနဲ့ ယှဉ်ပြိုင်ရမှာဖြစ်ပါတယ်။ ဒီခြေစစ်ပွဲကို အိမ်ကွင်း၊အဝေးကွင်းယှဉ်ပြိုင်ရမှာဖြစ်ပြီး အနိုင်ရတဲ့အသင်းဟာ ဒုတိယအဆင့်ခြေစစ်ပွဲအဖြစ် ဂျပန်၊ဆီရီးယား၊ မြောက်ကိုရီယားအသင်းတို့နဲ့ တစ်အုပ်စုတည်း ယှဉ်ပြိုင်ရမှာပါ။

မြန်မာအသင်းဟာ ပြီးခဲ့တဲ့ ဇွန်လက တရုတ်နိုင်ငံမှာ ဖီဖာနိုင်ငံတကာခြေစမ်းပွဲတွေ သွားရောက်ကစားခဲ့ပြီး ပထမ ပွဲမှာ တရုတ်အသင်းကို ၄ ဂိုး- ဂိုးမရှိနဲ့ ဂိုးပြတ်အရေးနိမ့်ခဲ့ပေမယ့် ဒုတိယပွဲမှာတော့ မကာအိုအသင်းကို ၂ ဂိုး-ဂိုး မရှိနဲ့ အနိုင်ရခဲ့တာပါ။ မြန်မာအသင်းဟာ နီပေါအသင်းနဲ့ ခြေစမ်းပွဲအတွက် သြဂုတ်အကုန်ပိုင်းမှာ လေ့ကျင့် မှုတွေ ပြုလုပ်သွားဖို့ ရှိနေပြီး နည်းပြဖြစ်သူ မိုက်ကယ်ကလည်း မကြာခင်မှာ အသင်းလူစာရင်းကို ထုတ်ပြန် ပေးသွားဖို့ ရှိနေတာဖြစ်ပါတယ်။

မြန်မာ ယူ-၂၃ အသင်းကလည်း ဩဂုတ်နဲ့ စက်တင်ဘာလထဲမှာ ယှဉ်ပြိုင်မယ့် အာဆီယံ ယူ-၂၃ ချန်ပီယံရှစ်ပြိုင်ပွဲ၊ အာရှဖလား ယူ-၂၃ ခြေစစ်ပွဲနဲ့ အာရှအားကစားပွဲတော်ဘောလုံးပြိုင်ပွဲအတွက် လေ့ကျင့်မှုတွေ ပြုလုပ်နေပါတယ်။

CNI Sport News

၂၀၂၃ ခုနှစ်၊ ဇူလိုင် ၂၅

မြန်မာနေရှင်နယ်လိဂ်ကလပ် ရန်ကုန်ယူနိုက်တက်အသင်းဟာ မြဝတီအသင်းနဲ့ ကစားခဲ့တဲ့ပွဲစဉ်မှာ အရေးနိမ့် ပြီးနောက် နည်းပြဖြစ်သူ ဦးကျော်ဒွန်းနဲ့ ချုပ်ဆိုထားတဲ့ စာချုပ်ကို ဇူလိုင် ၂၅ ရက်က စတင်ပြီးတော့ နှစ်ဦး သဘောတူ ဖျက်သိမ်းလိုက်ပြီလို့ ကြေညာခဲ့ပါတယ်။

ဇူလိုင် ၂၄ ရက်က ကစားခဲ့တဲ့ပွဲမှာ မြဝတီအသင်းဟာ ရန်ကုန်ယူနိုက်တက် အသင်းကို ၃ ဂိုး- ၂ ဂိုးနဲ့ အနိုင်ရခဲ့ တာပါ။ 

အခုနှစ်ရာသီ အမှတ်ပေး ချန်ပီယံဆုရယူနိုင်ဖို့ ပစ်မှတ်ထားနေတဲ့ ရန်ကုန်ယူနိုက်တက်အသင်းဟာ ဒီရှုံးပွဲကြောင့် ထိပ်ဆုံးက ရှမ်းယူနိုက်တက်အသင်းနဲ့ ရမှတ် ၄ မှတ် ကွာဟသွားခဲ့တာ ဖြစ်ပါတယ်။

အဲ့ဒါကြောင့် နည်းပြချုပ် ဦးကျော်ဒွန်းနဲ့ ချုပ်ဆိုထားတဲ့ စာချုပ်ကို ဖျက်သိမ်းခဲ့တာပါ။

 ရန်ကုန်ယူနိုက်တက်အသင်းကိုတွေ့ရစဉ် 

ဦးကျော်ဒွန်းက သူဟာ အသင်းကို အမြဲတမ်း သတိရ လွမ်းဆွတ်နေမှာ ဖြစ်သလို အမြဲအားပေးနေမယ်လို့ ပြောခဲ့ပါတယ်။ 

မြန်မာ့လက်ရွေးစင် ကစားသမားဟောင်း ဦးကျော်ဒွန်းဟာ ရန်ကုန်ယူနိုက်တက်အသင်းမှာ ကစားသမားဘဝ၊ လူငယ်နည်းပြအဖြစ်ကနေ ၂၀၂၂ ခုနှစ်၊ သြဂုတ်လမှာ ယာယီနည်းပြအဖြစ် စတင်ကိုင်တွယ်ခဲ့တာပါ။ 

သူ့ရဲ့လက်ထက်မှာ ရန်ကုန်ယူနိုက်တက်အသင်းဟာ ပြီးခဲ့တဲ့ရာသီက အမှတ်ပေးဇယားအဆင့် ၂ နေရာမှာ ရပ်တည်နိုင်ခဲ့ပါတယ်။

အခုနှစ် ဘောလုံးရာသီမှာတော့ နည်းပြချုပ်အဖြစ် တာဝန်ယူခဲ့ပြီး အသင်းဟာ ၁၃ ပွဲ ကစားထားခဲ့တာမှာ ရမှတ် ၃၁ မှတ်နဲ့ အဆင့် ၂ နေရာမှာ ရပ်တည်နိုင်ခဲ့တာပါ။ ရန်ကုန်ယူနိုက်တက်အသင်းဟာ အသင်းနဲ့အတူ လက်တွဲပြီး ကြိုးစားပေးခဲ့တာတွေအတွက် ကျေးဇူးတင်ရှိကြောင်းနဲ့ အနာဂတ်မှာ အောင်မြင်မှုတွေရဖို့ ဆုတောင်းကြောင်း ရေးသားခဲ့ပါတယ်။

မြန်မာနေရှင်နယ်လိဂ် ချန်ပီယံဟောင်း ရန်ကုန်ယူနိုက်တက် အသင်းဟာ ဇူလိုင် ၃၁ ရက်မှာ လိဂ်ပွဲစဉ်အဖြစ် ရခိုင်ယူနိုက်တက်အသင်းနဲ့ ယှဉ်ပြိုင်ရမှာ ဖြစ်ပါတယ်။

CNI Sport News

၂၀၂၃ ခုနှစ်၊ ဇူလိုင် ၁၁

မြန်မာအသင်းဟာ ကျင်းပနေတဲ့ အာဆီယံယူ-၁၉ အမျိုးသမီးပြိုင်ပွဲအုပ်စုနောက်ဆုံးပွဲမှာ ထိုင်းအသင်းကို အရေး နိမ့်ခဲ့ပေမယ့် အကောင်းဆုံးအုပ်စုဒုတိယနဲ့ နောက်တစ်ဆင့်တက်ပြီး ဆီမီးဖိုင်နယ်မှာ ဗီယက်နမ်အသင်းနဲ့ ယှဉ်ပြိုင် ရမှာဖြစ်ပါတယ်။

မြန်မာအသင်းဟာ ထိုင်းအသင်းနဲ့ ကစားခဲ့တဲ့ပွဲမှာ ၁ ဂိုး- ဂိုးမရှိနဲ့ အရေးနိမ့်ခဲ့တာပါ။ မြန်မာအသင်းဟာ ဒီပွဲမှာ ဂိုးရနိုင်မယ့် အခွင့်အရေးတွေရခဲ့သလို ထိုင်းအသင်းရဲ့ တိုက်စစ်ဆင်မှုတွေကို မြန်မာအသင်းခံစစ်နဲ့ ဂိုးသမားတို့က ကာကွယ်နိုင်ခဲ့တာဖြစ်ပါတယ်။ ဒါပေမယ့် မိနစ် ၉၀ ပြည့်ပြီး နာကျင်အချိန်ပိုမှာ ပေးခဲ့ရတဲ့ဂိုးကြောင့် မြန်မာ အသင်းဟာ ထိုင်းအသင်းကို အရေးနိမ့်သွားခဲ့တာဖြစ်ပါတယ်။ အဲဒါကြောင့် ထိုင်းအသင်းဟာ ၂ ပွဲကစား ၂ ပွဲနိုင် ရမှတ် ၆ မှတ်နဲ့ အုပ်စုထိပ်ဆုံးနေရာရရှိကာ ဆီမီးဖိုင်နယ်တက်နိုင်ခဲ့တာပါ။

မြန်မာအသင်းကတော့ ၂ ပွဲကစား ၁ ပွဲနိုင် ၁ ပွဲရှုံး ရမှတ် ၃ မှတ်နဲ့ အုပ်စုဒုတိယနေရာရရှိခဲ့ပေမယ့် ဒီပြိုင်ပွဲရဲ့ အုပ်စုတွင်း မှာ ဒုတိယတွေရခဲ့ကြတဲ့ ကမ္ဘောဒီးယားနဲ့ မလေးရှားတို့ထက် ဂိုးကွာခြားချက် အသာရခဲ့တာကြောင့် အကောင်းဆုံးအုပ်စုဒုတိယနဲ့ ဆီမီးဖိုင်နယ်တက်နိုင်ခဲ့တာဖြစ်ပါတယ်။ မြန်မာအသင်းဟာ ဆီမီးဖိုင်နယ်မှာ အိမ်ရှင် အင်ဒိုနီးရှားအသင်းနဲ့ တွေ့ဆုံခဲ့ပေမယ့် ပြိုင်ပွဲရဲ့စည်းမျဉ်းတွေပြောင်းလဲခဲ့တဲ့အတွက် ဗီယက်နမ်အသင်းနဲ့ ယှဉ်ပြိုင် ရတော့မှာပါ။

မြန်မာယူ-၁၉ အသင်းနည်းပြချုပ် ဒေါ်သက်သက်ဝင်းက “ခက်ခဲတဲ့ ပွဲတစ်ပွဲဖြစ်ပေမယ့် ကလေးတွေ အကောင်း ဆုံးကြိုးစားခဲ့ကြပါတယ်။ ကျနော်တို့ရဲ့အိပ်မက်တွေအကောင်အထည်ပေါ်လာဖို့အတွက် လာမယ့်ပွဲတွေမှာ အမှား တွေကို ပြင်ဆင်ပြီး အကောင်းဆုံးကြိုးစားသွားမှာပါ” လို့ ပြောခဲ့ပါတယ်။

အခြား ဆီမီးဖိုင်နယ်ပွဲစဉ်ကတော့ အင်ဒိုနီးရှားနဲ့ ထိုင်းအသင်းယှဉ်ပြိုင်ရမှာဖြစ်ပြီး ဆီမီးဖိုင်နယ်ပွဲစဉ် ၂ ပွဲစလုံးကို ဇူလိုင်လ ၁၃ ရက်မှာ ကျင်းပသွားမှာဖြစ်ပါတယ်။ မြန်မာအသင်းဟာ အာဆီယံ ယူ-၁၉ အမျိုးသမီးပြိုင်ပွဲမှာ အမြင့်ဆုံးအောင်မြင်မှုအဖြစ် ၂၀၁၄ ခုနှစ်ကပြိုင်ပွဲမှာ တတိယနေရာရရှိခဲ့တာလို့ အချက်အလက်တွေအရ သိရပါ တယ်။

CNI Sport News

၂၀၂၃ ခုနှစ်၊ ဇူလိုင် ၆

မြန်မာအမျိုးသမီး ယူ-၁၉ အသင်း နည်းပြချုပ် ဒေါ်သက်သက်ဝင်းက ၂၀၂၃ အာဆီယံအမျိုးသမီး ယူ-၁၉ ပြိုင်ပွဲမှာ ခက်ခဲတဲ့ အုပ်စုကို ကျရောက်နေပေမယ့် ဒီအဆင့်ကို ကျော်ဖြတ်နိုင်ဖို့ ပြိုင်ဘက်တိုင်းကို အလေးထား ယှဉ်ပြိုင် သွားမယ်လို့ ပွဲကြိုသတင်းစာရှင်းလင်းပွဲမှာ ပြောခဲ့ပါတယ်။

ဒေါ်သက်သက်ဝင်းက “ ခက်ခဲ့တဲ့ အုပ်စုတစ်ခု ဖြစ်ပါတယ်။ ဒါပေမဲ့ မြန်မာအသင်းအတွက် ကံကောင်းတာက ထိုင်းနဲ့ ဖိလစ်ပိုင်တို့ ကစားကြမယ့်ပွဲကို အရင်ကြည့်ခွင့်ရပြီး ပြင်ဆင်ခွင့်ရတာပါ။ အုပ်စုအဆင့်ကို ကျော်ဖြတ်နိုင် ဖို့အတွက် ပြိုင်ဘက်တိုင်းကို အလေးထား ယှဉ်ပြိုင်သွားမှာပါ”လို့ မီဒီယာတွေရဲ့ မေးမြန်းမှုကို ဖြေကြားခဲ့ပါတယ်။

မြန်မာအသင်းဟာ ဒီပြိုင်ပွဲရဲ့ အုပ်စု C မှာ ထိုင်း၊ ဖိလစ်ပိုင်တို့နဲ့ တစ်အုပ်စုထဲ ကျရောက်နေတာဖြစ်ပြီး ထိုင်းနဲ့ ဖိလစ်ပိုင် အသင်းတို့က ဇူလိုင် ၆ ရက်မှာ အုပ်စုအဖွင့်ပွဲအဖြစ် စတင်ယှဉ်ပြိုင်ကြမှာပါ။

မြန်မာအမျိုးသမီး ယူ-၁၉ အသင်းနည်းပြ ဒေါသက်သက်ဝင်းကို တွေ့ရစဉ်

မြန်မာအသင်းကတော့ ဇူလိုင် ၈ ရက်မှာ ဖိလစ်ပိုင်၊ ၁၀ ရက်မှာ ထိုင်းအသင်းနဲ့ ယှဉ်ပြိုင်ရမှာ ဖြစ်ပါတယ်။

ဒီပြိုင်ပွဲကို အုပ်စု ၃ ခုခွဲပြီး ကျင်းပမှာဖြစ်လို့ အုပ်စုတွင်း ပထမရတဲ့ ၃ သင်းနဲ့ အကောင်းဆုံးအုပ်စု ဒုတိယရရှိတဲ့ ၁ သင်းတို့ဟာ ဆီမီးဖိုင်နယ်အဖြစ် ယှဉ်ပြိုင်ကြရမှာပါ။

ဒီပြိုင်ပွဲရဲ့ အုပ်စု A မှာ အိမ်ရှင် အင်ဒိုနီးရှား၊ ကမ္ဘောဒီးယား၊ လာအိုနဲ့ တီမော၊ အုပ်စု B မှာတော့ ဗီယက်နမ်၊ မလေးရှားနဲ့ စင်ကာပူတို့ ကျရောက်နေပြီး ပြိုင်ပွဲကို ဇူလိုင် ၅ ရက်ကနေ ၁၅ ရက်အထိ ကျင်းပသွားမှာပါ။ 

မြန်မာအသင်းဟာ အာဆီယံအမျိုးသမီးယူ-၁၉ ပြိုင်ပွဲမှာ အမြင့်ဆုံး အောင်မြင်မှုအဖြစ် ၂၀၁၄ ခုနှစ်က ကျင်းပခဲ့တဲ့ ပြိုင်ပွဲမှာ တတိယနေရာ ရရှိခဲ့တာ ဖြစ်ပါတယ်။

CNI Sport News

၂၀၂၃ ခုနှစ်၊ ဇွန်လ ၂၃

မြန်မာ့လက်ရွေးစင် ဖူဆယ်အသင်းနည်းပြက AFC Futsal Asian Cup 2024 ခြေစစ်ပွဲအတွက် ကျရောက်ခဲ့တဲ့ အုပ်စုအခြေအနေကို ကျေနပ်ပေမယ့် ပေါ့ပေ့ါဆဆတော့ လုပ်လို့မရဘူးလို့ ပြောခဲ့ပါတယ်။

Bunlert Charoenwong က “အုပ်စုခွဲဝေမှု ရလဒ်အတွက်တော့ ကျေနပ်ရပါတယ်။ ဒါပေမဲ့ နိုင်ငံတိုင်းက ဖူဆယ် ကို ကောင်းကောင်း ကစားနေကြပြီး တောင့်တင်းတဲ့ အသင်းတွေ ဖြစ်တာကြောင့် ကျနော်တို့အနေနဲ့ ပေါ့ပေါ့ဆဆ လုပ်လို့ မရပါဘူး။ အသင်းကို အကောင်းဆုံး ပြင်ဆင်သွားမှာပါ"လို့ အုပ်စုမဲခွဲမှုအပြီးမှာ ပြောခဲ့ပါတယ်။

မြန်မာအသင်းဟာ ခြေစစ်ပွဲရဲ့ အုပ်စု E မှာ အိမ်ရှင် တာဂျစ်ကစ္စတန်၊ ပါလက်စတိုင်း၊ အိန္ဒိယအသင်းတို့နဲ့ ကျရောက်နေတာ ဖြစ်ပါတယ်။ 

ခြေစစ်ပွဲဝင်မယ့် ၃၁ သင်းကို ၄ သင်း အုပ်စု ၇ ခု၊ ၃ သင်း အုပ်စု ၁ ခု မဲခွဲခဲ့တာဖြစ်ပြီး အုပ်စုပထမရတဲ့ အသင်း ၈ သင်းနဲ့ အကောင်းဆုံး ဒုတိယရတဲ့ အသင်း ၇ သင်းတို့က ခြေစစ်ပွဲ အောင်မြင်မှာပါ။ 

AFC Futsal Asian Cup 2024 အုပ်စုဇယားကိုတွေ့ရစဉ်

ခြေစစ်ပွဲတွေကို အောက်တိုဘာလ ၂ ရက်ကနေ ၁၃ ရက်အထိ ကျင်းပသွားမှာဖြစ်ပြီး မြန်မာအသင်းဟာ ဒီပြိုင်ပွဲ အတွက် ဇွန်လ ၁၉ ရက်က စတင်ပြီး စခန်းသွင်း လေ့ကျင့်မှုတွေ ပြုလုပ်နေတာ ဖြစ်ပါတယ်။

မြန်မာအသင်းဟာ ပဏာမကစားသမား ၂၃ ဦးနဲ့ စခန်းဝင် လေ့ကျင့်နေတာဖြစ်ပြီး ပြိုင်ပွဲယှဉ်ပြိုင်ဖို့ နီးကပ်တဲ့ အချိန်မှာ အပြီးသတ် ကစားသမားစာရင်းကို ထုတ်ပြန်သွားမှာပါ။

မြန်မာအသင်းဟာ ဒီပြိုင်ပွဲကို ၂၀၁၈ က တစ်ကြိမ်ထဲသာ ယှဉ်ပြိုင်ခွင့်ရထားခဲ့ပြီး အဲဒီတုန်းက အုပ်စုတွင်း ၃ ပွဲ ကစားခဲ့တာမှာ ၃ ပွဲစလုံး အရေးနိမ့်ပြီး အုပ်စုတွင်း နောက်ဆုံးနေရာနဲ့ ကျေနပ်ခဲ့ရတာ ဖြစ်ပါတယ်။

CNI Sport News

၂၀၂၃ ခုနှစ်၊ ဇွန်လ ၁၇

မြန်မာအသင်းနည်းပြ မိုက်ကယ်က တရုတ်အသင်းနဲ့ ကစားခဲ့တဲ့ နိုင်ငံတကာခြေစမ်းပွဲမှာ ၄ ဂိုး- ဂိုးမရှိနဲ့ ဂိုးပြတ် အရေးနိမ့်ခဲ့ပေမယ့် အသင်းရဲ့ စွမ်းဆောင်ရည်ကို ကျေနပ်တယ်လို့ ပွဲအပြီးသတင်းစာရှင်းလင်းပွဲမှာ ပြောခဲ့ပါ တယ်။

မိုက်ကယ်က “ကျနော်တို့အနေနဲ့ ကမ္ဘာ့အဆင့်ထက်ဝက်လောက်ကွာတဲ့အသင်းကို သူ့ပရိသတ်ရှေ့မှာ၊ သူ့ အိမ် ကွင်းမှာ ခက်ခက်ခဲခဲကစားရမယ်ဆိုတာသိပါတယ်။ ဒါကြောင့် ဂိုးမပေးရရေး အဓိကထားပြီး  ခံစစ်ကနေ တိုက်စစ် အကူးအပြောင်းကို  မြန်မြန်နဲ့ ထိထိမိမိ ကစားတဲ့ဟန်အတိုင်း ကစားခဲ့ပါတယ်။ သေချာပေါက် ဂိုးရမယ့် အခွင့်အရေးတွေလည်း ဖန်တီးနိုင်ခဲ့ပါတယ်။ ပထမပိုင်းမှာ သန်းပိုင်ရဲ့ အဆုံးသတ်သာ သေချာသွားခဲ့ရင် ပွဲအဖြေ က ပြောင်းလဲသွားနိုင်ပါတယ်။ ရလဒ်မကောင်းဘူးဆိုပေမယ့်လည်း ကစားသွားတဲ့အသင်းရဲ့ စွမ်းဆောင်မှုကို တော့ ကျေနပ်ပါတယ်။ လိဂ်ပြိုင်ပွဲက အစအရာရာ ကွာခြားလွန်းတဲ့ အနေအထားမှာတောင် ကျနော်တို့ အကောင်းဆုံးယှဉ်ပြိုင်ကစားနိုင်ခဲ့တာပါ"လို့ ပြောခဲ့တာပါ။

တရုတ်အသင်းဟာ ဒီပွဲမှာ ဘောလုံးပိုင်ဆိုင်မှု ၅၁ ရာခိုင်နှုန်း၊ ဂိုးပေါက်ကန်သွင်းမှု ၂၂ ကြိမ်နဲ့ ဂိုးပေါက်တည့်မှု ၆ ကြိမ်အထိ ရှိခဲ့ပါတယ်။ မြန်မာအသင်းကတော့ ဘောလုံးပိုင်ဆိုင်မှု ၄၉ ရာခိုင်နှုန်း၊ ဂိုးပေါက်ကန်သွင်းမှု ၁၁ ကြိမ်နဲ့ ဂိုးပေါက်တည့်မှု ၁ ကြိမ်သာရှိခဲ့တာဖြစ်ပါတယ်။ 

မြန်မာအသင်းဟာ ပထမပိုင်းမှာ တိုက်စစ်မှူး သန်းပိုင်ရဲ့ ဂိုးရနိုင် မယ့်ကန်သွင်းချက်ဟာ ဂိုးဘေးက ထွက်သွားခဲ့လို့ နစ်နာခဲ့ရတာပါ။

မြန်မာအသင်းဟာ ၂၀၂၁ ခုနှစ်၊ ဒီဇင်ဘာလက ၈ ရက်က တီမောအသင်းကို ၂ ဂိုး- ဂိုးမရှိနဲ့ အနိုင်ရပြီးကတည်းက နောက်ဆုံးကစားခဲ့တဲ့ ၁၆ ပွဲဆက်တိုက် နိုင်ပွဲပျောက်ဆုံးခဲ့တဲ့ ဆိုးရွားတဲ့ မှတ်တမ်းကို ဆက်ပြီးထိန်းသိမ်းနိုင်ခဲ့တာ ဖြစ်ပါတယ်။ နည်းပြ မိုက်ကယ်ဟာ မြန်မာအသင်းကို အိန္ဒိယအသင်းနဲ့ ပွဲစဉ်ကမှ စတင်ကိုင်တွယ်ခဲ့တာဖြစ်ပြီး သူ့ရဲ့လက်ထက် ၃ ပွဲမှာ ၂ ပွဲရှုံး ၁ ပွဲသရေကျခဲ့တာပါ။

မြန်မာအသင်းဟာ တရုတ်နိုင်ငံမှာပဲ နောက်ထပ်ခြေစမ်းပွဲအဖြစ် ဇွန်လ ၁၉ ရက်မှာ မကာအိုအသင်းနဲ့ ယှဉ်ပြိုင်မှာ ဖြစ်ပါတယ်။

CNI Sport News

၂၀၂၃ ခုနှစ်၊ ဇွန်လ ၁၆

တရုတ်နဲ့ မြန်မာအသင်းတို့ဟာ နိုင်ငံတကာ ခြေစမ်းပွဲအဖြစ် ဒီနေ့ ကစားခဲ့တာမှာ တရုတ်အသင်းက ၄ ဂိုး- ဂိုးမရှိနဲ့ ဂိုးပြတ် အနိုင်ရခဲ့ပါတယ်။

မြန်မာအသင်းဟာ ပွဲအစပိုင်းမှာ ဂိုးရနိုင်မယ့် အခွင့်အရေး ရခဲ့တာကလွဲပြီး တစ်ပွဲလုံး တရုတ်အသင်းရဲ့ အသာစီးနဲ့ ဖိကစားခြင်းကို ခံခဲ့ရပါတယ်။

တရုတ်အသင်းဟာ အိမ်ကွင်းပရိသတ် ရှေ့မှောက်မှာ ကစားခဲ့တဲ့ ဒီပွဲမှာ ဂိုးရနိုင်မယ့် အခွင့်အရေး အများအပြား ရခဲ့ပါတယ်။

ဒါပေမယ့် မြန်မာအသင်းဘက်က အကောင်းဆုံး ကာကွယ်နိုင်ခဲ့တာနဲ့ တရုတ်အသင်းဘက်က အဆုံးသတ် မသေချာခဲ့တာကြောင့် တရုတ်အသင်း ဒီထက်ပိုပြီး ဂိုးမရခဲ့တာပါ။

တရုတ်အသင်းဟာ မြန်မာအသင်းကို ပထမပိုင်းမှာ ၂ ဂိုးနဲ့ ဒုတိယပိုင်းမှာ ၂ ဂိုး သွင်းယူခဲ့တာ ဖြစ်ပါတယ်။

မြန်မာအသင်းဟာ ဇွန်လ ၁၉ ရက်မှာ နောက်ထပ် ခြေစမ်းပွဲအဖြစ် မကာအိုအသင်းနဲ့ တရုတ်နိုင်ငံမှာပဲ ယှဉ်ပြိုင်မှာ ဖြစ်ပါတယ်။

#တရုတ်အသင်း #မြန်မာအသင်း #အားကစား #CNImyanmar #cninews

CNI News
၂၀၂၃ ခုနှစ်၊ ဇွန်လ ၁

ကမ္ဘောဒီးယားနိုင်ငံမှာ မေလက ကျင်းပခဲ့သည့် (၃၂)ကြိမ်မြောက် အရှေ့တောင်အာရှအားကစားပြိုင်ပွဲ (ဆီးဂိမ်း)တွင် ဆုတံဆိပ်များ ရရှိခဲ့သည့် ကစားသမားများကို နစကဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်က ငွေကျပ် စုစုပေါင်း ၃၃၃၃ သန်းနှင့် အမေရိကန် ဒေါ်လာ ၇ သောင်း ဆုချီးမြှင့်ခဲ့သည်။

အဆိုပါ ဂုဏ်ပြုချီးမြှင့်ငွေ ပေးအပ်ပွဲ အခမ်းအနားကို ၂၀၂၃ ခုနှစ်၊ ဇွန်လ ၁ ရက်က နေပြည်တော်ရှိ ဝဏ္ဏသိဒ္ဓိ အားကစားရုံ(B)တွင် ကျင်းပခဲ့သည်။

ကမ္ဘောဒီးယား ဆီးဂိမ်းသို့ မြန်မာနိုင်ငံသည် အားကစားနည်း ၁၉ နည်း၊ အားကစားသမား ၃၄၁ ဦး၊ အုပ်ချုပ်သူ/ နည်းပြ ၁၀၄ ဦး၊ စုစုပေါင်း ၄၄၅ ဦးဖြင့် ဝင်ရောက် ယှဉ်ပြိုင်ခဲ့ရာ ရွှေတံဆိပ် ၂၁ ခု၊ ငွေတံဆိပ် ၂၅ ခု၊ ကြေးတံ ဆိပ် ၆၈ ခု စုစုပေါင်း ဆုတံဆိပ် ၁၁၄ ခု ရရှိခဲ့သည်။

ထို့နောက် ရွှေတံဆိပ်ရရှိခဲ့သူများကို ကျပ်သိန်း ၃၀၀၊ ငွေတံဆိပ်ရရှိခဲ့သူများကို ကျပ်သိန်း ၂၀၀၊ ကြေးတံဆိပ် ရရှိခဲ့သူများကို ကျပ်သိန်း ၁၀၀ စသဖြင့် ချီးမြှင့်ခဲ့သည်။

အလားတူ အသင်းလိုက်ပြိုင်ပွဲများ၌ ရွှေတံဆိပ်ရရှိခဲ့ကြသည့် အသင်းသား တစ်ဦးလျှင် ကျပ်သိန်း ၁၀၀၊ ငွေတံဆိပ်ရရှိခဲ့ကြသည့် အသင်းသားတစ်ဦးလျှင် ကျပ်သိန်း ၇၀၊ ကြေးတံဆိပ်ရရှိခဲ့ကြသည့် အသင်းသား တစ်ဦးလျှင် ကျပ် ၃၅ သိန်းနှင့် အားကစားနည်းအလိုက် တာဝန်ယူ ဆောင်ရွက်ခဲ့ကြသည့် နည်းပြများနှင့် အုပ်ချုပ်သူများအား မိမိတို့ အားကစားနည်းမှ ရွှေတံဆိပ် ရရှိခဲ့ပါက တစ်ဦးလျှင် ကျပ်သိန်း ၁၀၀၊ ငွေတံဆိပ် ရရှိခဲ့ပါက ကျပ်သိန်း ၅၀၊ ကြေးတံဆိပ်ရရှိခဲ့ပါက ကျပ်သိန်း ၃၀ စီပေးအပ် ချီးမြှင့်ခဲ့သည်။

နစကဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်သည် ဗိုလ်လုပွဲသို့ တက်ရောက်ခဲ့သည့် အမျိုးသမီး ဘောလုံးအသင်းကို အမေရိကန် ဒေါ်လာ ၅၀၀၀၀ နှင့် အကြိုဗိုလ်လုပွဲသို့ တက်ရောက်ခဲ့သော အမျိုးသား ဘောလုံးအသင်းအား အမေရိကန် ဒေါ်လာ ၂၀၀၀၀ ချီးမြှင့်ခဲ့သည်။

ထို့ကြောင့် ငွေကျပ် စုစုပေါင်း ၃၃၃၃ သန်းနှင့် အမေရိကန် ဒေါ်လာ ၇၀၀၀၀ ချီးမြှင့်ခဲ့သည်။

လာမည့် ၂၀၂၅ ခုနှစ်၊ ထိုင်းနိုင်ငံတွင် ကျင်းပမည့် (၃၃)ကြိမ်မြောက် ဆီးဂိမ်းပြိုင်ပွဲတွင် မြန်မာနိုင်ငံ အနေဖြင့် အဆင့်မီမီ ယှဉ်ပြိုင်နိုင်မည့် အားကစားနည်း အရေအတွက်ရော၊ အားကစားသမား အရေအတွက်ပါ တိုးမြှင့် ယှဉ်ပြိုင်နိုင်ရေးနှင့် ယခုထက် ပိုမို အောင်မြင်မှု ရရှိစေရေး ကြိုတင်ပြင်ဆင်စီမံဆောင်ရွက်သွားကြရန် ဝန်ကြီးဌာနနှင့် အားကစားအဖွဲ့ချုပ်များကို ကြိုတင် အသိပေးမှာကြားလိုသည်ဟု နစကဥက္ကဋ္ဌ ဗိုလ်ချုပ်မှူးကြီး မင်းအောင်လှိုင်က ပြောသွားခဲ့သည်။

CNI Sport News

၂၀၂၃ ခုနှစ်၊ မေလ ၁၆

ဆီးဂိမ်းစ် အမျိုးသား ဘောလုံးပြိုင်ပွဲ တတိယနေရာလုပွဲအဖြစ် ယှဉ်ပြိုင်ခဲ့တဲ့ ဗီယက်နမ်နဲ့ မြန်မာအသင်းတို့ပွဲမှာ ဗီယက်နမ်အသင်းက ၃ ဂိုး- ၁ ဂိုးနဲ့ အနိုင်ရရှိသွားခဲ့ပါတယ်။

ပထမပိုင်းမှာ ဗီယက်နမ်အသင်းဟာ မြန်မာအသင်းကို အသာစီးနဲ့ ကစားနိုင်ခဲ့ပြီး ပွဲချိန် ၉ မိနစ်နဲ့ ၃၅ မိနစ်မှာ ဦးဆောင်ဂိုးတွေ သွင်းယူနိုင်ခဲ့ပါတယ်။

မြန်မာအသင်းဟာ ဂိုးကန်သွင်းခွင့်တွေ ရခဲ့ပေမယ့် ကန်သွင်းချက်တွေဟာ ထိရောက်မှုမရှိလို့ ပထမပိုင်းမှာ ဗီယက်နမ်အသင်းက မြန်မာအသင်းကို ၂ ဂိုး- ဂိုးမရှိနဲ့ ဦးဆောင်နိုင်ခဲ့တာ ဖြစ်ပါတယ်။

ဒုတိယပိုင်းမှာလည်း ဗီယက်နမ်အသင်းက ကစားကွက် အသာစီးနဲ့ မြန်မာအသင်းကို ကစားနိုင်ခဲ့ပြီး ပွဲချိန် ၅၇ မိနစ်မှာ တတိယဂိုးကို လူကျွံထောင်ချောက်ကို ကျော်ဖြတ်ကာ သွင်းယူသွားပါတယ်။

ဗီယက်နမ်အသင်းဟာ တတိယဂိုး ရပြီးနောက်ပိုင်းမှာ ဘောလုံးပိုင်ဆိုင်မှုအသာနဲ့ ကစားခဲ့လို့ မြန်မာအသင်းက ချေပဂိုးသွင်းနိုင်ဖို့ တိုက်စစ်ဆင်မှုတွေ ပြုလုပ်လာခဲ့ပါတယ်။

အဲဒါကြောင့် ပွဲချိန် ၈၈ မိနစ်မှာ မြန်မာအသင်း ထောင့်ကန်ဘောကနေ ခေါင်းတိုက်ပြီး ချေပဂိုးသွင်းယူခဲ့ပါတယ်။

ဗီယက်နမ်အသင်းဟာ နောက်ထပ် သွင်းဂိုးရနိုင်မယ့် အခွင့်အရေးကို အသုံးမချနိုင်ခဲ့တာကြောင့် ပွဲအပြီးမှာ ၃ ဂိုး- ၁ ဂိုးနဲ့ အနိုင်ရပြီး ကြေးတံဆိပ် ရရှိသွားခဲ့ပါတယ်။

#မြန်မာအသင်း #အမျိုးသား #ဗီယက်နမ်အသင်း #အားကစား #CNImyanmar #cninews

CNI Sport News

၂၀၂၃ ခုနှစ်၊ မေလ ၁၅

ဆီးဂိမ်းစ် အမျိုးသမီး ဘောလုံးပြိုင်ပွဲ ဗိုလ်လုပွဲအဖြစ် ဗီယက်နမ်နဲ့ မြန်မာအသင်းတို့ ကစားခဲ့တာမှာ ဗီယက်နမ် အသင်းက ၂ ဂိုး- ဂိုးမရှိနဲ့ အနိုင်ရရှိသွားခဲ့ပါတယ်။

ပွဲစတင်ကတည်းက နှစ်သင်းစလုံးဟာ ဂိုးရဖို့ အပြိုင်အဆိုင် ကြိုးစားခဲ့ကြပြီး ပွဲချိန် ၁၂ မိနစ်မှာ ဗီယက်နမ် အသင်း က စတင် ရရှိသွားခဲ့ပါတယ်။

မြန်မာအသင်းဟာ ဦးဆောင်ဂိုး ပေးရပြီးနောက် ချေပဂိုးရဖို့ ကြိုးစားခဲ့ပေမယ့် အဆုံးသတ်ပိုင်း အားနည်းပုံတွေ ကြောင့် ပထမပိုင်းအပြီးမှာ ဗီယက်နမ်အသင်းက ၁ ဂိုး- ဂိုးမရှိနဲ့ ဦးဆောင်နိုင်ခဲ့ပါတယ်။

ဒုတိယပိုင်းမှာတော့ မြန်မာအသင်းက ချေပဂိုးရဖို့ ဆက်တိုက်ဆိုသလို တိုက်စစ်ဆင်မှုတွေ ပြုလုပ်ခဲ့ပြီး ဗီယက်နမ် အသင်းက ရံဖန်ရံခါသာ တိုက်စစ်ဆင်ကာ ခံစစ်ကို အားပြု ကစားလာခဲ့ပါတယ်။

မြန်မာအသင်းဟာ ဂိုးရလိုချင်စိတ် များနေတဲ့အတွက် ဂိုးရဖို့ ခက်ခဲနေတာကိုလည်း မြင်တွေ့ခဲ့ရတာပါ။

ပွဲချိန် ၇၅ မိနစ်မှာတော့ ဗီယက်နမ်အသင်းက ဂိုးဧရိယာ အတွင်းကနေ လှပတဲ့ ကန်သွင်းချက်နဲ့ ဒုတိယဂိုးကို သွင်းယူ သွားခဲ့ပါတယ်။

မြန်မာအသင်းဟာ ဦးဆောင်ဂိုး ၂ ဂိုး ခွင့်ပြုခဲ့ရတာကြောင့် အနည်းငယ် ကစားအားကျသွားခဲ့ပြီး ဗီယက်နမ် အသင်းက ပြန်ပြီး ထိုးဖောက် တိုက်စစ်ဆင်လာခဲ့ပါတယ်။

အဲဒီနောက်ပိုင်းမှာ နှစ်သင်းစလုံး ဂိုးမသွင်းနိုင်တော့လို့ ဗီယက်နမ်အသင်းက ၂ ဂိုး- ဂိုးမရှိနဲ့ အနိုင်ရကာ ရွှေတံဆိပ် ရယူနိုင်ခဲ့ပြီး မြန်မာအသင်းကတော့ ငွေတံဆိပ်နဲ့သာ ကျေနပ်ခဲ့ရပါတယ်။

မြန်မာအသင်းဟာ ဗီယက်နမ်အသင်းကို အုပ်စုတွင်းမှာလည်း အရေးနိမ့်ခဲ့သလို အခု ဗိုလ်လုပွဲမှာလည်း ထပ်ပြီး အရေးနိမ့်ခဲ့တာ ဖြစ်ပါတယ်။