CNI Sport News
၂၀၂၄ ခုနှစ်၊ မေလ ၂၇
မြန်မာအသင်းနည်းပြ မိုက်ကယ်ဖိုင်တန်ဘိုင်နာဟာ ဇွန်လထဲ ယှဉ်ပြိုင်ဖို့ရှိနေတဲ့ ၂၀၂၆ ကမ္ဘာ့ဖလားခြေစစ်ပွဲ (အာရှဇုန်)ဒုတိယအဆင့် ပွဲစဉ်တွေအတွက် ပဏာမလက်ရွေးစင် လူစာရင်းကို ထုတ်ပြန်ခဲ့ပါတယ်။
မြန်မာ့လက်ရွေးစင် ပဏာမလူစာရင်း ၃၃ ဦးမှာ ပြည်ပထွက်နေတဲ့ ကစားသမားတွေ အများအပြား ပါဝင်ခဲ့ပြီး ရခိုင်ယူနိုက်တက်အသင်းအတွက် ခြေစွမ်းပြသနေတဲ့ ဝါရင့်တိုက်စစ်မှူး ကျော်ကိုကိုတော့ ပါဝင်ခဲ့ခြင်း မရှိပါဘူး။
မြန်မာအသင်းရဲ့ ပဏာမလူစာရင်းအပေါ် ပရိသတ်တွေအချို့က ဝေဖန်မှုတွေ ပြုလုပ်ခဲ့ကြပါတယ်။
ပဏာမမြန်မာ့လက်ရွေးစင်အသင်းဟာ မေလ ၂၈ ရက်က စတင်ကာ နိုဗိုတယ်ဟိုတယ်မှာ စခန်းသွင်း လေ့ကျင့်မှုတွေ ပြုလုပ်သွားမယ်လို့ ဘောလုံးအဖွဲ့ချုပ်က ထုတ်ပြန်ထားပါတယ်။
မြန်မာအသင်းဟာ ခြေစစ်ပွဲတွေအဖြစ် ဇွန်လ ၆ ရက် သုဝဏ္ဏ အားကစားကွင်းမှာ ဂျပန်အသင်း၊ ဇွန်လ ၁၁ ရက် လာအိုနိုင်ငံမှာ မြောက်ကိုရီးယားအသင်းတို့နဲ့ ယှဉ်ပြိုင်သွားမှာပါ။
မြန်မာအသင်းလူစာရင်းကို တွေ့ရစဉ်
မြန်မာအသင်းဟာ အုပ်စုတွင်းပွဲစဉ် ၄ ပွဲ ကစားအပြီးမှာ ရမှတ် ၁ မှတ်နဲ့ နောက်ဆုံးနေရာမှာ ရပ်တည်နေတာ ဖြစ်ပါတယ်။
မြန်မာအသင်းဟာ ရမှတ် ၁ မှတ်ကို ဆီးရီးယားအသင်းနဲ့ပွဲစဉ်မှာ ၁ ဂိုးစီ သရေကျပြီး ရယူနိုင်ခဲ့တာပါ။
အုပ်စုတွင်းမှာ ဂျပန်အသင်းဟာ ၄ ပွဲကစား ၄ ပွဲစလုံးအနိုင်နဲ့ တတိယအဆင့်ကို တက်ရောက်သွားပြီဖြစ်တာပါ။
ဆီးရီးယားအသင်းက ရမှတ် ၇ မှတ်နဲ့ ဒုတိယ၊ မြောက်ကိုရီးယားအသင်းက ရမှတ် ၃ မှတ်နဲ့ တတိယနေရာမှာ ရပ်တည်နေတာ ဖြစ်ပါတယ်။
မြောက်ကိုရီးယားအသင်းဟာ ပြီးခဲ့တဲ့ ဂျပန်အသင်းနဲ့ပွဲစဉ်ကို အိမ်ကွင်းမှာ လက်ခံကျင်းပဖို့ ငြင်းဆန်ခဲ့လို့ ဂျပန် အသင်းကို ၃ ဂိုး၊ ၃ မှတ်နဲ့ အရှုံးပေးခဲ့ရတာပါ။
မြောက်ကိုရီးယားအသင်းဟာ လက်ကျန်အိမ်ကွင်း ၂ ပွဲစလုံးကို နိုင်ငံအတွင်း ကျင်းပသွားမှာမဟုတ်ဘဲ ကြားကွင်း အဖြစ် လာအိုနိုင်ငံမှာ ကျင်းပသွားမှာ ဖြစ်ပါတယ်။
