CNI Sport News

၂၀၂၂ ခုနှစ်၊ မေ ၉

မြန်မာယူ(၂၃) အသင်းနည်းပြချုပ် ပိုပေါ့ဗ် က တီမောနဲ့ကစားခဲ့တဲ့ ပွဲက အမှားတွေကို သင်ခန်းစာယူပြီး ဖိလစ်ပိုင်နဲ့ ပွဲကို ပြင်ဆင်မယ်လို့ ပြောလိုက်ပါတယ်။

မြန်မာအသင်းဟာ မေလ (၈) ရက်က ဆီးဂိမ်းစ်ပြိုင်ပွဲအုပ်စုအဖွင့်ပွဲစဉ်အဖြစ် တီမောအသင်းနဲ့ ကစားခဲ့တာမှာ ၃ ဂိုး-၂ ဂိုးနဲ့ အနိုင်ရခဲ့တာပါ။ပထမပိုင်းမှာ ဝင်းနိုင်ထွန်း၊ထက်ဖြိုးဝေတို့ရဲ့ သွင်းဂိုးတွေနဲ့ မြန်မာအသင်း ဦးဆောင် နိုင်ခဲ့တာဖြစ်ပါတယ်။ဒါပေမယ့် ဒုတိယပိုင်းမှာ ကစားသမားအပြောင်းအလဲပြုလုပ်ခဲ့တာကြောင့် ရုန်းကန်ခဲ့ရပြီး တီမောအသင်းကို ချေပဂိုး (၂) ဂိုးပြန်ပေးခဲ့ရတာပါ။အဲဒါကြောင့် မြန်မာအသင်းဟာ အနိုင်ဂိုးရဖို့ နောက်ဆုံးမိနစ် အထိ အသည်းအသန်ကြိုးစားခဲ့ရတာဖြစ်ပါတယ်။အနိုင်ဂိုးကို နာကျင်အချိန်ပို နောက်ဆုံးမိနစ်မှာ အောင်ဝဏ္ဏစိုးက သွင်းယူသွားခဲ့တာပါ။

မြန်မာအသင်းနည်းပြ ပိုပေါ့ဗ်က “ပြိုင်ပွဲတစ်ပွဲရဲ့ အဖွင့်ပွဲစဉ်တိုင်းဟာ ခက်ခဲတတ်ပါတယ်။ပထမပိုင်းမှာ အသာစီး ရခဲ့ပေမယ့် ဒုတိယပိုင်းမှာ ရုန်းကန်ခဲ့ရပါတယ်။တီမောအသင်းရဲ့ ကြိုးစားအားထုတ်မှုကို ချီးကျူးချင်ပါတယ်။ သူတို့အကောင်းဆုံးတုန့်ပြန်ကစားနိုင်ခဲ့တာပါ။ဘယ်လိုပဲဖြစ်ဖြစ် အနိုင် ၃ မှတ်ရရှိခဲ့လို့ ကျေနပ်ပါတယ်။ဒီပွဲက အမှားတွေကို သင်ခန်းစာယူပြီး ဖိလစ်ပိုင်နဲ့ ပွဲကို ဆက်လက်ပြင်ဆင်သွားပါမယ်”လို့ ပွဲအပြီးမှာ ပြောခဲ့တာ ဖြစ်ပါတယ်။

မြန်မာအသင်းဟာ အုပ်စု ဒုတိယပွဲစဉ်အဖြစ် ဖိလစ်ပိုင်အသင်းနဲ့ မေလ (၁၀) ရက်မှာ ယှဉ်ပြိုင်ကစားရမှာ ဖြစ်ပါတယ်။ဖိလစ်ပိုင် အသင်းဟာ အုပ်စုတွင်း ပွဲစဉ် (၂) ပွဲကစားပြီးချိန်မှာ တီမောကို ၄ ဂိုး-ဂိုးမရှိနဲ့ အနိုင်ရထားပြီး အိမ်ရှင် ဗီယက်နမ်အသင်းနဲ့ ဂိုးမရှိ သရေကျထားတာပါ။

ဖိလစ်ပိုင်နဲ့ ဗီယက်နမ် အသင်းတို့ဟာ အုပ်စုတွင်း နှစ်ပွဲကစားပြီးချိန်မှာ ရမှတ်(၄)မှတ်နဲ့ အဆင့်(၁)နဲ့အဆင့် (၂)၊ မြန်မာအသင်းက (၃) မှတ်နဲ့ အဆင့်(၃) ၊အင်ဒိုနီးရှားနဲ့ တီမောအသင်းတို့ကတော့ ရမှတ်မရရှိသေးဘဲ အဆင့် (၄) နဲ့ (၅) နေရာမှာ ရပ်တည်နေတာဖြစ်ပါတယ်။အုပ်စုတွင်း ထိပ်ဆုံး နှစ်သင်းဟာ အကြိုဗိုလ်လုပွဲအဆင့်ကို တက်ရောက်နိုင်မှာလည်းဖြစ်ပါတယ်။

CNI Sport News

၂၀၂၂ ခုနှစ်၊ မေလ ၈

ဆီးဂိမ်းစ် ပြိုင်ပွဲ အုပ်စု(A) ပွဲစဉ်တစ်ပွဲအဖြစ် မေလ ၈ ရက်က မြန်မာအသင်းနဲ့ တီမောအသင်းတို့ ကစားခဲ့ကြပါတယ်။ ဒီပွဲမှာ မြန်မာ အသင်းက ၃ ဂိုး- ၂ ဂိုးနဲ့ အနိုင်ရရှိ သွားခဲ့ပါတယ်။

ပထမပိုင်းမှာ မြန်မာ အသင်းက ဝင်းနိုင်ထွန်း၊ ထက်ဖြိုးဝေ တို့ရဲ့ သွင်းဂိုးတွေကြောင့် ၂ ဂိုး- ဂိုး မရှိနဲ့ ဦးဆောင်နေခဲ့တာ ဖြစ်ပါ တယ်။ ဒါပေမယ့် ဒုတိယပိုင်းမှာ တီမောအသင်းက ချေပဂိုးရဖို့ ဖိအားပေး ကြိုးစားလာခဲ့တာကြောင့် ချေပဂိုး ၂ ဂိုး ပြန်လည် ရရှိသွားခဲ့ ပါတယ်။

အရှေ့တီမောကို အနိုင်ကစားခဲ့တဲ့ မြန်မာ(AFF)

မြန်မာ ကစားသမားတွေဟာ အနိုင်ဂိုးရဖို့အတွက် တီမော အသင်းဘက်ကို ဆက်တိုက် ဖိကစားခဲ့တာ ဖြစ်ပါတယ်။ မိနစ်(၉၀) ပြည့်ပြီး နာကျင်အချိန်ပို နောက်ဆုံးမိနစ်မှာ မြန်မာအသင်း အဖိုးတန် အနိုင်ဂိုး ရရှိသွားခဲ့ပါတယ်။ ဒီဂိုးကို အောင်ဝဏ္ဏစိုး က သွင်းယူသွားခဲ့တာ ဖြစ်ပါတယ်။

ဒါကြောင့် ပွဲအပြီးမှာ တီမောအသင်းကို ၃ ဂိုး- ၂ ဂိုးနဲ့ အနိုင်ရပြီး အုပ်စုအဖွင့်ပွဲစဉ်မှာ (၃) မှတ်စတင် ရရှိသွားခဲ့ပြီ ဖြစ်ပါတယ်။

CNI Sport News

၂၀၂၂ ခုနှစ်၊ မေလ ၅

ဗီယက်နမ် နိုင်ငံမှာ ကျင်းပမယ့် (၃၁) ကြိမ်မြောက် ဆီးဂိမ်းစ်ပြိုင်ပွဲ ဝင်ရောက်ယှဉ်ပြိုင်မယ့် မြန်မာယူ-၂၃ အသင်းရဲ့ အပြီး သတ် လူစာရင်းကို နည်းပြချုပ် ပိုပေါ့ဗ်က မေလ ၅ ရက်က ထုတ်ပြန်လိုက်ပါတယ်။

မြန်မာယူ-၂၃ အသင်းရဲ့ အပြီးသတ် လူစာရင်းမှာ သက်ကျော် ကစားသမား ၃ ဦး အပါအဝင် စုစုပေါင်း ၂၀ ဦးကို ရွေးချယ် ထားတာပါ။ သက်ကျော် ကစားသမားတွေအဖြစ် နောက်ခံလူ ဝင်းမိုးကျော်၊ တိုက်စစ်မှူး မောင်မောင်လွင်နဲ့ အောင်ကောင်း မာန်တို့ကို ရွေးချယ်ခဲ့တာ ဖြစ်ပါတယ်။

ဒါ့အပြင် ဂိုးသမား ၂ ဦးဖြစ်တဲ့ အောင်ကိုလတ်နဲ့ သူရကျော်၊ တိုက်စစ်မှူးတွေဖြစ်တဲ့ ရဲရင့်အောင်နဲ့ ရာဇာအောင် တို့ကိုလည်း အရန်သင့် အစားထိုးမယ့် ကစားသမားတွေအဖြစ် ထပ်ပေါင်း ရွေးချယ်ထားတာပါ။ သူတို့ဟာ အသင်းနဲ့ ဆက်လက် ပူးပေါင်း ပြီး လေ့ကျင့်ရမှာ ဖြစ်ပါတယ်။

မြန်မာယူ-၂၃ အသင်းရဲ့ အပြီးသတ် လူစာရင်းကတော့ ဂိုးသမားနေရာမှာ ပြည့်ဖြိုးသူနဲ့ ပြည့်ဖြိုးအောင် နောက်တန်းမှာ သက်ဟိန်းစိုး၊ စိုးမိုးကျော်၊ ဟိန်းဇေယျာလင်း၊ ဝင်းမိုးကျော်၊ သက်ပိုင်ထွေးနဲ့ အောင်ဝဏ္ဏစိုး တို့ ပါဝင်နေတာပါ။

မြန်မာအသင်း နည်းပြ ပိုပေါ့ဗ် (MFF)

ကွင်းလယ်မှာ ဇော်ဝင်းသိန်း၊ လွင်မိုးအောင် ၊ လင်းထက်စိုး၊ ဝေလင်းအောင်၊ ရန်ကျော်စိုး၊ ရဲလင်းထက်နဲ့ မြတ်ကောင်းခန့် ရှေ့တန်းမှာတော့ ထက်ဖြိုးဝေ၊ ဝင်းနိုင်ထွန်း၊ မောင်မောင်လွင်၊ အောင်ကောင်းမာန်နဲ့ ဟိန်းထက်အောင် တို့ဖြစ်တယ်လို့ သိရပါတယ်။

မြန်မာယူ-၂၃ အသင်းဟာ ဆီးဂိမ်းစ် ပြိုင်ပွဲရဲ့ အုပ်စု(A)မှာ ဗီယက်နမ်၊ အင်ဒိုနီးရှား၊ ဖိလစ်ပိုင်၊ အရှေ့တီမော တို့နဲ့ တစ်အုပ်စု တည်း ကျရောက်နေတာပါ။ မြန်မာယူ-၂၃ အသင်းဟာ ဆီးဂိမ်းစ် အုပ်စုအဖွင့် ပွဲစဉ်အဖြစ် မေလ ၈ ရက် မြန်မာစံတော်ချိန် ညနေ ၄ နာရီမှာ အရှေ့တီမော အသင်းနဲ့ ယှဉ်ပြိုင်ရမှာ ဖြစ်ပါတယ်။

CNI News

၂၀၂၂ ခုနှစ်၊ ဧပြီ ၂၉

(၃၁) ကြိမ်မြောက် အရှေ့တောင်အာရှအားကစားပြိုင်ပွဲ(ဆီးဂိမ်း)ကို ဝင်ရောက်ယှဉ်ပြိုင်ကြမည့် မြန်မာ ကိုယ်စားပြု အားကစားသမားများ အနေဖြင့် ရွှေတံဆိပ်ဆုရယူနိုင်ပါက သိန်း ၃၀၀ ဆုချီးမြှင့်မည်ဖြစ်ကြောင်း နစကဥက္ကဋ္ဌ ဗိုလ်ချုပ်မှူးကြီး မင်းအောင်လှိုင်က ပြောသည်။

ယနေ့ (ဧပြီ ၂၉ ရက်) ကျင်းပသည့် (၃၁) ကြိမ်မြောက် အရှေ့တောင်အာရှအားကစားပြိုင်ပွဲသို့ ဝင်ရောက်ယှဉ်ပြိုင်းမည့် မြန်မာ အားကစားအဖွဲ့များအား အောင်နိုင်ရေး အလံအပ်နှင်းခြင်း အခမ်းအနားမှာ အထက်ပါအတိုင်း ၎င်းက ပြောကြားခဲ့ခြင်း ဖြစ်သည်။

နစကဥက္ကဋ္ဌက “နိုင်ငံတော်အနေဖြင့် ဆုရအားကစားသမားများအတွက် ရွှေတစ်ဦးချင်း ငွေကျပ်သိန်း ၃၀၀၊ ငွေတစ်ဦးချင်း ငွေ ကျပ်သိန်း ၂၀၀၊ ကြေးတစ်ဦးချင်း ငွေကျပ်သိန်း ၁၀၀၊ ရွှေအသင်းလိုက် တစ်ဦးချင်း ငွေကျပ်သိန်း ၁၀၀၊ ငွေအသင်းလိုက် တစ်ဦးချင်း ငွေကျပ်သိန်း ၇၀ ၊ ကြေးအသင်းလိုက် တစ်ဦးချင်း ငွေကျပ် ၃၅ သိန်း၊ နည်းပြများအတွက် ရွှေတံဆိပ် ဆုရ အားကစားနည်းမှ နည်းပြတစ်ဦးလျှင် ငွေကျပ်သိန်း ၁၀၀၊ ငွေတံဆိပ်ဆုရ အားကစားနည်းမှ နည်းပြ တစ်ဦးလျှင် ငွေကျပ် သိန်း ၅၀၊ ကြေးတံဆိပ်ဆုရအားကစားနည်းမှ နည်းပြတစ်ဦးလျှင် ငွေကျပ်သိန်း ၃၀ တို့အား ချီးမြှင့် သွားမည်” ဟု ပြောသည်။

ထို့ပြင် အုပ်ချုပ်မှုအဖွဲ့များအတွက် ရွှေတံဆိပ်ဆုရအားကစားနည်းမှ အုပ်ချုပ်မှုအဖွဲ့တစ်ဖွဲ့လျှင် ငွေကျပ်သိန်း ၁၀၀၊ ငွေတံ ဆိပ်ဆုရ အားကစားနည်းမှ အုပ်ချုပ်မှုအဖွဲ့တစ်ဖွဲ့လျှင် ငွေကျပ်သိန်း ၅၀၊ ကြေးတံဆိပ်ဆုရ အားကစားနည်းမှ အုပ်ချုပ်မှု အဖွဲ့တစ်ဖွဲ့လျှင် ငွေကျပ်သိန်း ၃၀ တို့အား ပေးအပ်ချီးမြှင့်မည်ဟု ၎င်းက ပြောသည်။

နစကဥက္ကဋ္ဌက “ပြိုင်ပွဲတွင် အောင်နိုင်ရေးနှင့် အမိနိုင်ငံတော်၏ ဂုဏ်ကိုမြှင့်တင်ရေး တာဝန်ကြီးကို နိုင်ငံတော်က ပေးအပ်လိုက်ပြီး ဖြစ်သည့်အတွက် မြန်မာ့အားကစားအဖွဲ့ဝင်များ အားလုံး နိုင်ငံချစ်စိတ်၊ မျိုးချစ်စိတ်ကို အရင်းတည်ပြီး ဇွဲ၊ လုံ့လ၊ ဝီရိယစိုက်ထုတ်ကာ အစွမ်းကုန်ကြိုးပမ်းသွားကြရန် တိုက်တွန်းလိုပါတယ်”ဟု ပြောသည်။

(၃၁)ကြိမ်မြောက် ဆီးဂိမ်းပြိုင်ပွဲကို ဗီယက်နမ်နိုင်ငံက အိမ်ရှင်အဖြစ် ၂၀၂၂ ခုနှစ်၊ မေလ ၁၂ ရက်မှ ၂၃ ရက်အထိ ကျင်းပ သွားမည် ဖြစ်ပြီး မြန်မာနိုင်ငံက ဆီးဂိမ်းပြိုင်ပွဲတွင် အားကစားနည်း ၂၀ ၌ မြန်မာကိုယ်စားပြု အားကစားသမား ၂၉၃ ဦး ဝင်ရောက် ယှဉ်ပြိုင်မည်ဖြစ်သည်။

CNI Sport News

၂၀၂၂ ခုနှစ်၊ ဧပြီ ၂၈

မြန်မာ့လက်ရွေးစင် အမျိုးသမီးအသင်းဟာ ဗီယက်နမ်မှာ ကျင်းပမယ့် ဆီးဂိမ်းစ်ပြိုင်ပွဲအတွက် အကြိုပြင်ဆင်မှုအဖြစ် တောင်ကိုရီးယားနိုင်ငံ ပါဂျုမြို့မှာ စခန်းသွင်း လေ့ကျင့်နေတာ ဖြစ်ပါတယ်။

မြန်မာ့လက်ရွေးစင် အမျိုးသမီးအသင်းကို အာရှဖလားခြေစစ်ပွဲ၊ နောက်ဆုံးအဆင့် အာရှဖလား အမျိုးသမီး ဘောလုံး ပြိုင်ပွဲ အပြီး ပြုလုပ်ခဲ့တဲ့ စခန်းသွင်း လေ့ကျင့်မှုကနေ အကောင်းဆုံး အပြီးသတ် ၂၂ ဦးကို ရွေးချယ်ပြီးတော့ ဆီးဂိမ်းစ်ပြိုင်ပွဲမှာ သွားရောက် ယှဉ်ပြိုင်မှာပါ။

လက်ရှိအချိန်မှာ ဝင်းသိင်္ဂီထွန်းကလွဲပြီး ကစားသမား ၂၁ ဦးနဲ့ တောင်ကိုရီးယားမှာ လေ့ကျင့်နေတာ ဖြစ်ပါတယ်။ ဝင်းသိင်္ဂီထွန်းကတော့ အိန္ဒိယအမျိုးသမီး လိဂ်ပြိုင်ပွဲမှာ ဝင်ရောက် ကစားနေတဲ့အတွက် ပြိုင်ပွဲကျင်းပမယ့် ဗီယက်နမ်ကို တိုက်ရိုက်လာပြီး ပူးပေါင်းမှာပါ။

မြန်မာအမျိုးသမီး အသင်းဟာ တောင်ကိုရီးယားမှာ ခြေစမ်းပွဲ(၃)ပွဲကစားဖို့ စီစဉ်ထားပြီး ဧပြီ ၂၉ ရက်နဲ့ မေ ၃ရက်မှာ တောင်ကိုရီးယား ယူ-၂၀ အမျိုးသမီးအသင်း၊ မေလ ၁ ရက်မှာ ဆိုးလ်မြို့အမျိုးသမီး ဘောလုံးကလပ်တို့နဲ့ ကစားမှာ ဖြစ်ပါတယ်။

တောင်ကိုရီးယားမှာ လေ့ကျင့်နေတဲ့ မြန်မာအမျိုးသမီးအသင်း(MFF)

မြန်မာအမျိုးသမီး အသင်းဟာ ဆီးဂိမ်းစ်ပြိုင်ပွဲ အုပ်စု(ခ)မှာ ထိုင်း၊ လာအို၊ စင်ကာပူ အသင်းတို့နဲ့ တစ်အုပ်စုတည်း ကျရောက် နေတာပါ။ အုပ်စုပွဲစဉ်တွေအဖြစ် မေလ ၁၀ ရက်မှာ လာအို၊ မေလ ၁၃ ရက်မှာ ထိုင်း၊ မေလ ၁၅ ရက်မှာ စင်ကာပူ အသင်းတို့နဲ့ ယှဉ်ပြိုင်ရမှာ ဖြစ်ပါတယ်။ မြန်မာအမျိုးသမီး အသင်းကို နည်းပြချုပ်အဖြစ် ဦးတင်မြင့်အောင်က ကိုင်တွယ်နေတာ ဖြစ်ပါ တယ်။

မြန်မာအမျိုးသမီး အသင်းဟာ ၂၀၀၇ ကနေ ၂၀၁၉ အထိ ကစားခဲ့တဲ့ ဆီးဂိမ်းစ်ပြိုင်ပွဲတွေမှာ ကြေးတံဆိပ်တွေပဲ ရရှိခဲ့တာ ဖြစ်ပြီး အမြင့်ဆုံး အောင်မြင်မှုအဖြစ် ငွေတံဆိပ် ၃ ကြိမ် ရယူနိုင်ခဲ့တာ ဖြစ်ပါတယ်။

CNI Sport News

၂၀၂၂ ခုနှစ်၊ ဧပြီ ၂၅

လမ်ပန်ဝါရီယာ အသင်းဟာ ဧပြီ ၂၄ ရက်က ကစားခဲ့တဲ့ ထိုင်းလိဂ်(၂) ပွဲစဉ်မှာ ပရာချာ အသင်းကို ၂ ဂိုး-ဂိုးမရှိနဲ့ အနိုင်ရပြီး ထိုင်းလိဂ်(၁) ပြိုင်ပွဲကို တန်းတက်နိုင်ခဲ့ပြီ ဖြစ်ပါတယ်။

ထိုင်းလိဂ်(၂) ပြိုင်ပွဲပြီးဆုံးဖို့ ၁ ပွဲ ကျန်သေးပေမယ့် လမ်ပန်ဝါရီယာ အသင်းဟာ တတိယနေရာက ထရက် အသင်းကို ၄ မှတ် ဖြတ်ထားနိုင်တာကြောင့် လာမယ့်ရာသီ ထိုင်းလိဂ်(၁)ပြိုင်ပွဲကို တန်းတက်နိုင်ခဲ့တာပါ။ လမ်ပန်ဝါရီယာ အသင်းအနေနဲ့ နောက်ဆုံးပွဲစဉ်အဖြစ် ကဆတ်ဆာ့ဒ် အသင်းနဲ့ ယှဉ်ပြိုင်ရမှာဖြစ်ပြီး အနိုင်ရခဲ့မယ်ဆိုရင် ချန်ပီယံအဖြစ်ပါ အောင်ပွဲခံနိုင် မှာလည်း ဖြစ်ပါတယ်။

လမ်ပန်ဝါရီယာ အသင်းဟာ ပြီးခဲ့တဲ့နှစ်ကမှ ထိုင်းလိဂ်(၃)ပြိုင်ပွဲမှာ ချန်ပီယံဆုရယူပြီး ထိုင်းလိဂ်(၂)ကို တန်းတက်နိုင်ခဲ့တာပါ။ ဒါပေမယ့် တစ်ရာသီအကြာမှာပဲ ထိုင်းလိဂ်(၁)ပြိုင်ပွဲကို ထပ်မံတန်းတက်နိုင်ခဲ့တာ ဖြစ်ပါတယ်။

မောင်မောင်လွင် ကတော့ လမ်ပန်ဝါရီယာ အသင်း တန်းတက်တာမှာ အဓိက ကစားသမားအဖြစ် ခြေစွမ်းပြသနိုင်ခဲ့တာပါ။ မြန်မာ့လက်ရွေးစင် အသင်းခေါင်းဆောင်ဟာ လမ်ပန်ဝါရီယာကို ရောက်ရှိကတည်းက ပွဲထွက်ခွင့် တစ်နေရာကို ပုံမှန် ရယူ နိုင်ခဲ့ပြီး အသင်းဖော်တွေနဲ့ အတွဲအဖက်ညီခဲ့တာ ဖြစ်ပါတယ်။

မောင်မောင်လွင် ကစားနေတဲ့ လမ်ပန်ဝါရီယာအသင်း (Lamphun Warriors)

မောင်မောင်လွင်ဟာ လမ်ပန်ဝါရီယာ အသင်းက ပရာချာ အသင်းကို အနိုင်ရခဲ့တဲ့ပွဲမှာ အသင်းရယူခဲ့တဲ့ ပထမဂိုးကို သွင်းယူ ပေးနိုင်ခဲ့တာပါ။ မောင်မောင်လွင်ဟာဆိုရင် ထိုင်းလိဂ်(၂)က ပေးတဲ့ ဖေဖော်ဝါရီလ အတွက် တစ်လတာ အကောင်းဆုံး ကစားသမားဆုကိုလည်း ရယူထားတာ ဖြစ်ပါတယ်။

ဟံသာဝတီယူနိုက်တက်နဲ့ ရန်ကုန်ယူနိုက်တက် ကစားသမားဟောင်းဟာ လမ်ပန်ဝါရီယာ အသင်းအတွက် ပြိုင်ပွဲစုံ(၁၇)ပွဲ ပါဝင်ကစားထားပြီး ၄ ဂိုး သွင်းယူကာ ၇ ဂိုး ဖန်တီးထားတာပါ။

အခုဆိုရင် မောင်မောင်လွင်ဟာ ဗီယက်နမ်မှာ ကျင်းပမယ့် ဆီးဂိမ်းစ်ပြိုင်ပွဲအတွက် မြန်မာယူ-၂၃ အသင်းရဲ့ ပဏာမ လူစာရင်း မှာ ပါဝင်နေပြီး ထိုင်းလိဂ်ပြိုင်ပွဲ ပြီးဆုံးတာနဲ့ နိုင်ငံအသင်းနဲ့ သွားရောက်ပူးပေါင်း လေ့ကျင့်မှာ ဖြစ်တယ်လို့ သိရပါတယ်။

CNI Sport News

၂၀၂၂ ခုနှစ်၊ ဧပြီ ၁၈

မြန်မာအမျိုးသမီး ဖူဆယ်အသင်းဟာ NSDF Futsal Invitation Championship ၂၀၂၂ ပြိုင်ပွဲယှဉ်ပြိုင်ဖို့နဲ့ ဆီးဂိမ်းစ် ပြိုင်ပွဲအတွက် စခန်းသွင်း လေ့ကျင့်မှုတွေ ပြုလုပ်ဖို့ ဧပြီ ၁၈ ရက်က ထိုင်းနိုင်ငံကို ထွက်ခွာသွားခဲ့တာ ဖြစ်ပါတယ်။

NSDF ပြိုင်ပွဲကို ထိုင်းအသင်း၊ ထိုင်း ALL STARS အသင်း၊ အင်ဒိုနီးရှားအသင်း၊ မြန်မာအသင်းနဲ့ သြစတြေးလျကလပ် ဆောက်ပါ့ခ် အသင်းတို့ ဝင်ရောက်ယှဉ်ပြိုင် ကြမှာပါ။ ဒီပြိုင်ပွဲကို ဧပြီ ၂၀ ရက်ကနေ ၂၆ ရက်အထိ ထိုင်းနိုင်ငံမှာ အုပ်စု ပတ်လည်နဲ့ ကျင်းပသွားမှာ ဖြစ်ပါတယ်။

မြန်မာအမျိုးသမီး ဖူဆယ်အသင်းဟာ ဧပြီ ၂၀ ရက်မှာ ထိုင်း၊ ၂၃ ရက်မှာ ထိုင်း ALL STARS ၊ ၂၄ ရက်မှာ အင်ဒိုနီးရှား၊ ၂၆ ရက် မှာ သြစတြေးလျ ကလပ်တို့နဲ့ ယှဉ်ပြိုင်ကြမှာပါ။

မြန်မာအမျိုးသမီးဖူဆယ်အသင်း(MFF)

မြန်မာအမျိုးသမီး ဖူဆယ်အသင်းဟာ ဒီပြိုင်ပွဲအပြီးမှာတော့ ထိုင်းနိုင်ငံမှာ ဆက်နေပြီး ဆီးဂိမ်းစ်ပြိုင်ပွဲအတွက် စခန်းသွင်း လေ့ကျင့်မှုတွေ ဆက်လက် လုပ်ဆောင်သွားမှာ ဖြစ်ပါတယ်။ မြန်မာ အသင်းဟာ ထိုင်းနိုင်ငံကနေ ဆီးဂိမ်းစ်ပြိုင်ပွဲ ကျင်းပမယ့် ဗီယက်နမ်ကို ထွက်ခွာမှာပါ။ ဆီးဂိမ်းစ်ပြိုင်ပွဲရဲ့ အမျိုးသမီးဖူဆယ် ပွဲစဉ်တွေကို မေလ ၁၀ ရက်ကနေ ၁၉ ရက်အထိ ကျင်းပ သွားမှာ ဖြစ်ပါတယ်။

မြန်မာအမျိုးသမီး ဖူဆယ်အသင်းကို နည်းပြချုပ်အဖြစ် ဦးတင်မောင်ဋ္ဌေးက တာဝန်ယူထားတာဖြစ်ပြီး ကစားသမား ၂၂ ဦးနဲ့ ထိုင်းနိုင်ငံကို ထွက်ခွာခဲ့တာပါ။ မြန်မာအမျိုးသမီး ဖူဆယ်အသင်းဟာ ၂၀၁၁ က အင်ဒိုနီးရှားနိုင်ငံမှာ ကျင်းပခဲ့တဲ့ ဆီးဂိမ်းစ် ပြိုင်ပွဲမှာ ပူးတွဲ တတိယတစ်ကြိမ် ရရှိခဲ့ပါတယ်။

ထိုင်းအမျိုးသမီး အသင်းကတော့ ဆီးဂိမ်းပြိုင်ပွဲမှာ ကျင်းပခဲ့တဲ့ အမျိုးသမီးဖူဆယ်ပြိုင်ပွဲ ၄ ကြိမ်လုံးမှာ ရွှေတံဆိပ် ရယူနိုင်ခဲ့ တာ ဖြစ်ပါတယ်။

CNI Sport News

၂၀၂၂ ခုနှစ်၊ ဧပြီ ၈

မြန်မာအသင်းဟာ အာဆီယံဖူဆယ် ချန်ပီယံရှစ်ပြိုင်ပွဲ အကြိုဗိုလ်လုပွဲအဖြစ် ဧပြီ ၈ ရက် နေ့လယ်ပိုင်းက အင်ဒိုနီးရှား အသင်း နဲ့ ကစားခဲ့တာမှာ ၆ ဂိုး-၁ ဂိုးနဲ့ ဂိုးပြတ် အရေးနိမ့်သွားခဲ့တာ ဖြစ်ပါတယ်။

ပထမပိုင်းမှာ ဂိုးရဖို့ အပြန်အလှန်ရှိခဲ့ပြီး အင်ဒိုနီးရှား အသင်းက ၁ ဂိုး-ဂိုးမရှိနဲ့ ဦးဆောင်နိုင်ခဲ့တာပါ။ ပထမပိုင်းမှာ မြန်မာ အသင်း ပင်နယ်တီ ကန်သွင်းခွင့်ရခဲ့ပေမယ့် အင်ဒိုနီးရှား ဂိုးသမား ပုတ်ထုတ်ခဲ့တာကြောင့် ချေပဂိုးရမယ့် အခွင့်အရေး ဆုံးရှုံးခဲ့ တာ ဖြစ်ပါတယ်။

ဒုတိယပိုင်းမှာ အင်ဒိုနီးရှား အသင်းဟာ မြန်မာအသင်းဘက်ကို နောက်ထပ် ၅ ဂိုး သွင်းယူခဲ့ပြန်တာပါ။ မြန်မာ အသင်းအတွက် တစ်လုံးတည်းသော ချေပဂိုးကို လှိုင်မင်းထွန်းက သွင်းယူခဲ့တာ ဖြစ်ပါတယ်။

မြန်မာ အသင်းဟာ ဒီပွဲရှုံးနိမ့်ခဲ့တာကြောင့် အာရှဖူဆယ်ပြိုင်ပွဲအတွက် ခြေစစ်ပွဲ အောင်ချင်တယ်ဆိုရင် တတိယနေရာ လုပွဲ အဖြစ် ကစားရမယ့်ပွဲကို မဖြစ်မနေ အနိုင်ရဖို့ လိုအပ်နေတာပါ။

မြန်မာအသင်း နည်းပြ(MFF)

မြန်မာအသင်းနည်းပြ ဘန်လာတ့်ချီယိုဝါရမ်က “အင်ဒိုနီးရှား အသင်းနဲ့ ကစားသမားတွေအတွက် ဂုဏ်ယူပါတယ်။ သူတို့ အသင်း အနေနဲ့ နည်းစနစ်၊ နည်းဗျုဟာ ကြွယ်ဝစွာ ကစားနိုင်ခဲ့ပါတယ်။ ကျနော့် ကစားသမားတွေလည်း အကောင်းဆုံး ကြိုးစားကစားခဲ့ ကြပါတယ်။ အာရှခြေစစ်ပွဲ အောင်ဖို့အတွက် ဒီပြိုင်ပွဲမှာ တတိယရဖို့ အစွမ်းကုန် ကြိုးစားသွားပါမယ်။ ဒီပွဲရဲ့ အမှားတွေကို သေချာပြန်လည် သုံးသပ်ပြီး တတိယလုပွဲအတွက် ပြင်ဆင်သွားမယ်”လို့ ပြောခဲ့ပါတယ်။

မြန်မာ အသင်းကို အနိုင်ရခဲ့တဲ့ အင်ဒိုနီးရှား အသင်းကတော့ အခုနှစ်ထဲ ကျင်းပမယ့် အာရှဖူဆယ်ပြိုင်ပွဲကို ဝင်ရောက် ယှဉ်ပြိုင်ခွင့် ရရှိသွားပြီ ဖြစ်ပါတယ်။

CNI Sport News
၂၀၂၂ ခုနှစ်၊ မတ်လ ၂၆

ပရီးမီးယားလိဂ်ကလပ် ဘရန်ဖို့ဒ်အသင်းသားတွေ လက်မှတ်ရေးထိုးထားတဲ့ အသင်းရဲ့ဝတ်စုံတစ်စုံကို ဟားငါးကောင်အဖွဲ့ထံ ပေးပို့ခဲ့တယ်လို့ အဖွဲ့ဝင်တစ်ဦးဖြစ်သူ ပိုးလေးက သူ့ရဲ့ဖေ့စ်ဘွတ်ခ် စာမျက်နှာမှာ ရေးတင်ထားပါတယ်။

ဟားငါးကောင်အဖွဲ့ဟာ နွေဦးတော်လှန်ရေးတွင် အမှန်တရားဘက် ရပ်တည်နေတဲ့အတွက် သူတို့အသင်းက ဂုဏ်ပြုတာလို့လည်း ပိုးလေးက ရေးသားထားတာပါ။

ဘရန်ဖို့ဒ်အသင်းဟာ မြန်မာ့နွေဦးတော်လှန်ရေးကို ထောက်ခံကြောင်း သူတို့ရဲ့ဆိုရှယ်မီဒီယာမှာ ရေးတင်ခဲ့တဲ့ အသင်းလည်းဖြစ်ပါတယ်။ ဘရန်ဖို့ဒ် အသင်းဟာ ပြီးခဲ့တဲ့ရာသီကမှ ချန်ပီယံရှစ်ကနေ ပရီးမီးယားလိဂ်ကို တန်းတက်လာတဲ့ အသင်းလည်းဖြစ်ပါတယ်။

ဘရန်ဖို့ဒ် အသင်းဟာ ဒီရာသီ ပရီးမီးယားလိဂ်ပြိုင်ပွဲရဲ့အမှတ်ပေးဇယား အဆင့်(၁၅)နေရာမှာ ရပ်တည်နေပြီး အဲရစ်ဆင်တို့လို နာမည်ကျော်ကစားသမားတွေ ပါဝင်နေတာဖြစ်ပါတယ်။

Photos- Ko Ko Poe Lay FB