CNI News

၂၀၂၃ ခုနှစ်၊ ဧပြီ ၁၉

ရခိုင်ပြည်နယ်သို့ သင်္ကြန်ပိတ်ရက် ကာလဖြစ်သည့် ဧပြီလ ၈ ရက်မှ ၁၇ ရက်နေ့အထိ ခရီးသွားဝင်ရောက်မှု သုံးသောင်းကျော်ရှိခဲ့ကြောင်း ရခိုင်ပြည်နယ် ဟိုတယ်နှင့် ခရီးသွားလာရေးညွှန်ကြားမှုဦးစီးဌာနမှ ညွှန်ကြားရေးမှူး ဦးတင်ထွန်းအောင်က CNI သတင်းဌာနသို့ ပြောသည်။

ယခုနှစ်တွင် ရခိုင်ပြည်နယ်သို့ ခရီးသွား ဝင်ရောက်မှုသည် ပြီးခဲ့သည့် ၂၀၂၂ ခုနှစ် သင်္ကြန်ပိတ်ရက်ကာလ၌ ဝင် ရောက်ခဲ့သည့် ခရီးသွားဦးရေထက် များပြားသည့်အပြင် ယခုနှစ် ရခိုင်ပြည်နယ်မှာ ကျင်းပသည့် သင်္ကြန်သည် ပို၍ စည်ကားကြောင်းလည်း ၎င်းက ပြောသည်။

ဦးတင်ထွန်းအောင်က “သင်္ကြန် ၁၀ ရက်အတွင်းမှာ သံတွဲကို ပြောတာပေါ့နော်၊ ငပလီပေါ့ လာတဲ့ဧည့်သည်က ၂၈၈၀၅ ယောက်ရှိတယ်။ ဒါက ဟိုတယ်မှာတည်းတဲ့ ဧည့်သည်ပေါ့နော်။ မြောက်ဦးက မနှစ်က ဧည့်သည်လောက် တော့ မရသေးဘူး။ ဒါပေမယ့် မြောက်ဦးလည်း တော်တော်လေး လာပါတယ်။ ၂၀၀၀ ကျော်ကျော်လေး လာတယ်။ ပြီးခဲ့တဲ့ နှစ်ကတော့ မြောက်ဦးက ၃၀၀၀ ကျော်ကျော် လာတယ်။ စစ်တွေကတော့ မြောက်ဦးအပေါ်မှာ တချို့ လမ်းကြောင်းတွေက မှီနေတာပေါ့။ တချို့ကျတော့လည်း လေကြောင်းနဲ့လာတယ်။ မြောက်ဦးကို မော်တော်ယာဉ် နဲ့ သွားကြတာပေါ့။ စစ်တွေက ဖြတ်သွား ဖြတ်လာပေါ့။ သို့သော်လည်းပဲ စစ်တွေကိုလာတဲ့ ဧည့်သည်က စစ်တွေ ကတော့ ရုံးဆိုက်ရာ မြို့ဖြစ်တဲ့အတွက် ရုံးလုပ်ငန်းနဲ့ လာတာပဲ များပါတယ်။ ဧည့်သည်ကတော့ နည်းတယ်။ နည်း တယ် ဆိုသော်လည်းပဲ စစ်တွေမှာလည်း ၂၂၀၀ ကျော်ကျော်လောက်တော့ သင်္ကြန်အတွင်းမှာ လာလိုက်တာပေါ့။ ၈ ရက်ကနေ ၁၇ ရက်နေ့အထိ လေယာဉ်အဆင်း ၁၀၅ ခေါက်ဆင်းတယ်။ ၁၃ ရက်နေ့မှာဆိုရင် ၁၇ ခေါက်တောင် ဆင်းတယ်။ သံတွဲလေဆိပ်။ စစ်တွေကတော့ ပုံမှန်ပါပဲ။ အနည်းဆုံးတော့ မနှစ်ကလောက် စည်ရမယ်လို့ မှန်းထား တာပေါ့။ ဒီနှစ်ကတော့ အေးအေးချမ်းချမ်းလည်း ရှိတဲ့အခါကျတော့ ပိုပြီးတော့ စည်ပါတယ်” ဟု ပြောသည်။

ပြီးခဲ့သည့် မတ်လ တစ်လလုံးတွင် ဝင်ရောက်သည့် ခရီးသွားဦးရေ ပမာဏသည် ၂၇၀၀၀ ကျော်သာ ရှိခဲ့သည်။

ရခိုင်ပြည်နယ်ရှိ ကမ်းခြေတစ်ခုမှာ ခရီးသွားများကိုတွေ့ရစဉ် (ဦးသောင်းထွန်း)

ထို့ကြောင့် သင်္ကြန်ပိတ်ရက် ကာလအတွင်း ခရီးသွား ဝင်ရောက်မှုသည် မတ်လ တစ်လလုံး၏ ခရီးသွား ဝင်ရောက် မှုထက် များပြားကြောင်း ရခိုင်ပြည်နယ် ဟိုတယ်နှင့် ခရီးသွားလာရေးညွှန်ကြားမှုဦးစီးဌာန၏ စာရင်းများအရ သိရသည်။

ထို့အပြင် ယခု သင်္ကြန်ပိတ်ရက် ကာလ၌ ခရီးသွား သုံးသောင်းကျော် ဝင်ရောက်ခြင်းသည် ဟိုတယ်နှင့် တည်းခို ရိပ်သာများတွင် တည်းခိုကြသည့် ခရီးသွားများ၏ စာရင်းများသာဖြစ်ကြောင်း ရခိုင်ပြည်နယ် ဟိုတယ်နှင့် ခရီးသွား လာရေး ညွှန်ကြားမှုဦးစီးဌာနမှ ညွှန်ကြားရေးမှူး ဦးတင်ထွန်းအောင်က ပြောသည်။

ဘုန်းကြီးကျောင်းများတွင် တည်းခိုသူများ၊ ကျေးရွာများမှ လူနေအိမ်များတွင် တည်းခိုသူများ အစရှိသည်တို့ကိုပါ ထည့်တွက်မည်ဆိုပါက ငပလီကမ်းခြေဒေသသို့ ခရီးသွား ဝင်ရောက်မှုသည် ခန့်မှန်းချေ ငါးသောင်း ဝန်းကျင်ရှိ ကြောင်း မြို့မိမြို့ဖ တစ်ဦးဖြစ်သည့် ဦးထွန်းသန့်ကျော်က CNI သတင်းဌာနသို့ ပြောသည်။

ဦးထွန်းသန့်ကျော်က “၃၊ ၄၊ ၅ သောင်းလောက်ရှိတယ်။ ဘာလို့လဲဆိုတော့ ကျနော်တို့ ဒီ Express တွေဆိုရင် လည်း အစီး ၅၀-၁၀၀ ကြားရှိတယ်။ ကားလေးတွေဆို အစီး ၅၀၀ ကျော် နေ့စဉ်လောက် ဆင်းနေတာလေ။ ဆင်း တော့ ကမ်းခြေမှာ Guest House တွေရော၊ ဟိုတယ်တွေရော၊ နောက်ပြီး ရွာတွေထဲက အိမ်တွေပါ အကုန်အပြည့် ပဲ။ ငပလီ ကမ်းခြေမှာဆိုရင် ရေသူမ အနားမှာဆိုရင် ရေကူးဖို့ ဘောကွင်းချဖို့ နေရာတောင် မရှိဘူး အဲဒီလောက် စည်တယ်။ ဒါပေမယ့် ကျနော်တို့ဆီ လာတာက ပြည်တွင်း ခရီးသွားများတယ်။ ပြည်ပခရီးသွားက မရှိသလောက်ပဲ နည်းတယ်။ ဒေသခံတွေက ပွင့်ပွင့်လင်းလင်းပြောရင် အလုပ်အကိုင် အခွင့်အလမ်းတွေ ကောင်းတာပေါ့။ ဟိုတယ် တွေ အကုန်ဖွင့်တဲ့ အတွက်လည်း ဝန်ထမ်းပေါင်း ၄၀၀၀ လောက်က အလုပ်ရ သွားတယ်လေ။ နောက်တစ်ချက် က စားသောက်ဆိုင်တွေပေါ့ အကုန်လုံးက ရောင်းရတယ်။ လမ်းဘေးဆိုင်၊ ကြက်ဥပြုတ် ရောင်းတဲ့ဆိုင်၊ အုန်းသီး အရည်သောက် ရောင်းတဲ့ဆိုင်ကအစ အကုန်လုံး ဖြစ်ထွန်းကြတယ်။ ပွင့်ပွင့်လင်းလင်းပြောရင် မိုးတွင်းအတွက် သူတို့ရဲ့ ဝမ်းစာလေးတွေက ဖူလုံသွားကြတယ်ပေါ့။ စားသောက်ဆိုင်ကြီးတွေဆိုလည်း အကုန်အပြည့်ပဲ။ ဘိုကင် တောင်မရကြလို့ ပြန်သွားရတဲ့လူတွေဆို အများကြီးပဲ” ဟု ပြောသည်။

ရခိုင်ပြည်နယ်ရှိ ကမ်းခြေတစ်ခုမှာ ခရီးသွားများကိုတွေ့ရစဉ် (ဦးသောင်းထွန်း)

ပြီးခဲ့သည့် ၂၀၂၂ ခုနှစ် သင်္ကြန်ပိတ်ရက် ကာလတွင် ရခိုင်ပြည်နယ်သို့ ခရီးသွား ဝင်ရောက်မှုသည် ၁၅၀၀၀ ကျော် သာ ရှိခဲ့ကြောင်း ရခိုင်ပြည်နယ် ဟိုတယ်နှင့် ခရီးသွားလာရေး ညွှန်ကြားမှုဦးစီးဌာန၏ စာရင်းများအရ သိရသည်။

ထို့အပြင် ယခုနှစ် သင်္ကြန်ပိတ်ရက်ကာလတွင် ရခိုင်ပြည်နယ်သို့ ခရီးသွား ဝင်ရောက်မှုသည် ပြည်တွင်းခရီးသွား အများဆုံး ဖြစ်ကာ ပြည်ပခရီးသွား အနည်းငယ်သာရှိပြီး ထိုထဲတွင် Tourist visa ဖြင့်လာသူများထက် သံရုံးများ၊ အဖွဲ့အစည်းများမှ လူပုဂ္ဂိုလ်များသာ ဖြစ်ကြောင်းလည်း သိရသည်။

သို့သော် မကြာခင်တွင် မိုးတွင်းကာလ ရောက်ရှိတော့မည် ဖြစ်သောကြောင့် ခရီးသွား ဝင်ရောက်မှုသည် မေလ အလယ်ခန့်အထိသာ လာရောက်ကြမည်ဖြစ်ပြီး မိုးတွင်းကာလများ၌ ခရီးသွားဝင်ရောက်မှု အနည်းငယ်သာ ရှိနိုင် ကြောင်း ရခိုင်ပြည်နယ် ဟိုတယ်နှင့် ခရီးသွားလာရေးညွှန်ကြားမှုဦးစီးဌာနမှ သိရသည်။

CNI News

၂၀၂၃ ခုနှစ်၊ ဧပြီ ၁၈

ရှမ်းပြည်နယ်သို့ သင်္ကြန်ကာလအတွင်း ပြည်တွင်း၊ ပြည်ပ ခရီးသွား ဝင်ရောက်မှုသည် ကိုဗစ် - ၁၉ ကပ်ရောဂါ မဖြစ်ပွားခင်ကာလ ၂၀၁၉ ခုနှစ်နှင့် နှိုင်းယှဉ်ပါက ၂၀ ရာခိုင်နှုန်းခန့် များပြားသည်ဟု ရှမ်းပြည်နယ် ဟိုတယ်နှင့် ခရီးသွားဝန်ကြီးဌာနထံမှ သိရသည်။

ရှမ်းပြည်နယ်အတွင်းသို့ ခရီးသွား ၇၅၀၀၀ ကျော် ဝင်ရောက်ခဲ့ပြီး၊ ပြည်တွင်းခရီးသွား ၇၂၀၀၀ ကျော်နှင့် နိုင်ငံခြား သား ခရီးသွား ၄၃၀၀ ကျော် ဝင်ရောက်ခဲ့သည်ဟု ရှမ်းပြည်နယ် ဟိုတယ်နှင့် ခရီးသွား ညွှန်ကြားမှုဦးစီးဌာန တောင်ကြီးရုံးခွဲမှ ညွှန်ကြားရေးမှူး ဦးထင်အောင်နိုင်က CNI သတင်းဌာနသို့ ပြောသည်။

ရှမ်းပြည်နယ် တောင်ပိုင်းမှာ အဆိုတော် ဝိုင်းစုခိုင်သိန်း သင်္ကြန်တွင်း ဖျော်ဖြေနေစဉ်

ကိုထင်အောင်နိုင်က “ကျနော်တို့ ၂၀၁၉ မှာလည်း ရေပေါ်သင်္ကြန် တစ်ခါ လုပ်ခဲ့ဖူးပါတယ်။ အခုကတော့ ဒုတိယ အကြိမ် လုပ်တာပေါ့နော်။ အဲဒီတုန်းကတော့ လာတော့ လာကြပါတယ်။ အဲဒီတုန်းကလည်း နိုင်ငံခြားသားက လည်း ကိုဗစ် မတိုင်ခင်ဆိုတော့ ပိုများတယ်။ local ကတော့ လာတော့ လာကြတယ်။ ဒါပေမယ့် အခု တစ်ခါက ပိုများတယ် ၂၀ ရာခိုင်နှုန်းလောက် ပိုများတယ်။ ဒီမှာတော့ အဓိကတော့ ရှမ်းပြည်နယ် ၈ ရက်နေ့ သင်္ကြန် ရုံးပိတ် ရက်ကို ၈ ရက်ကနေ မနေ့ကအထိကို ကျနော်တို့ ဟိုတယ်ခရီးကို တည်းခိုခဲ့တဲ့ ဧည့်သည်ကတော့ ၇၅၀၀၀ ကျော် ရှိပါတယ်ဗျ။ အတိအကျဆိုရင် အားလုံးပေါင်း ၇၆၅၁၇ ယောက်၊ နိုင်ငံခြားသားက ၄၃၂၀ ယောက်ပါပါတယ်။ local က ၇၂၁၉၇ ယောက်” ဟု ပြောသည်။

၂၀၁၉ သင်္ကြန်ကာလတုန်းက ရှမ်းပြည်နယ်သို့ ခရီးသွား ၂၇၀၆၂ ဦးသာ ဝင်ရောက်ခဲ့သည်။ ထို့နောက် တခြားသော နှစ်များတွင် ကိုဗစ်ကာလဖြစ်၍ သင်္ကြန်ပွဲတော် ကျင်းပနိုင်ခြင်း မရှိခဲ့ပေ။

ဟိုတယ်နှင့် ခရီးသွားဝန်ကြီးဌာန၏ စာရင်းတွင် ရှမ်းပြည်နယ်တောင်ပိုင်းသို့ ခရီးသွားဝင်ရောက်မှုသည် ၅ သောင်း ကျော်ရှိပြီး ရှမ်းပြည်နယ် မြောက်ပိုင်းနှင့် အရှေ့ပိုင်းပါ ပေါင်းလိုက်ပါက ၇၆၅၁၇ ဦး ဝင်ရောက်ခဲ့သည်။

သို့သော် ဟိုတယ်နှင့်ခရီးသွားဝန်ကြီးဌာန အပြင် စည်ပင်သာယာရေးမှ ခွင့်ပြုပေးထားသည့် ဟိုတယ်နှင့် တည်းခို ရိပ်သာများတွင် အခန်းများ ပြည့်သွား၍ ဘုန်းကြီးကျောင်းများနှင့် လူနေအိမ်များတွင် တည်းခိုကြသည့် ခရီးသွား မှာ ၂ သိန်းကျော်ရှိကြောင်း ရှမ်းပြည်နယ် ဟိုတယ်နှင့် ခရီးသွား ညွှန်ကြားရေးမှူး ဦးထင်အောင်နိုင်က ပြောသည်။

ရှမ်းပြည်နယ် တောင်ပိုင်းမှာ L ဆိုင်းဇီးဖျော်ဖြေနေစဉ်

ဦးထင်အောင်နိုင်က “ရှမ်းပြည်နယ် တောင်ပိုင်းကတော့ အများဆုံးပဲ။ ကျနော်တို့ ဒီဘက်မှာ ကလော၊ အင်းလေး၊ တောင်ကြီး ဒီဧရိယာ လာတဲ့လူတွေက များတယ်လေ။ နောက် ဒီဘက်က လာရင်လည်း လွယ်ကူတာကိုး။ လွယ်ကူတဲ့အတွက် ရှမ်းပြည်နယ် တောင်ပိုင်းဆိုရင် local က ၄၈၆၂၁ ယောက် ဝင်တယ်။ foreigner ၇၄၅ ယောက် ဝင်တယ်ပေါ့လေ။ စုစုပေါင်း ၄၉၀၀၀ ပေါ့ ၅ သောင်းလောက် ဝင်တယ်ပေါ့နော်။ ရှမ်းပြည်နယ် အရှေ့ပိုင်း ဆိုရင် ၁၁၃၈၉ ယောက် ဝင်တယ်။ ရှမ်းပြည်နယ် မြောက်ပိုင်းဆိုရင် ၁၅၇၅၃ ယောက်ဝင်တယ်။ ရှမ်း ပြည်နယ် တောင်ပိုင်းကတော့ ပိုများတာပေါ့။ ဘယ်လိုဖြစ်သွားလဲဆိုတော့ ပြောရရင် ကျနော်တို့ရဲ့ ဟိုတယ်ခရီးရဲ့ ဟိုတယ်၊ တည်းခိုခန်းတွေလည်း ပြည့်တယ်။ စည်ပင်ရဲ့ တည်းခိုခန်းတွေလည်း ပြည့်တဲ့အပြင်ကို နောက်ဆုံး သက်ဆိုင်ရာ မိတ်ဆွေအိမ်တွေ၊ သက်ဆိုင်ရာ ဘုန်းကြီးကျောင်းတွေ၊ ဒီစာရင်းဇယားတွေ ကျနော်တို့ မကောက် နိုင်ပါဘူး တကယ်တမ်းပြောရရင်။ တကယ်တမ်း ပြောရရင်တော့ ကျနော်တို့ ရှမ်းပြည်နယ် တောင်ပိုင်းကို ဝင်တဲ့ ဧည့်သည်က သိန်းဂဏန်း ရှိပါတယ်ဗျ။ ကျနော် ထင်ပါတယ်ဗျ။ ရှမ်းပြည်နယ် တောင်ပိုင်းကို ဝင်တဲ့ဧည့်သည်က အနည်းဆုံး ၂ သိန်းနဲ့ ၃ သိန်းကြားတော့ ရှိပါမယ်” ဟု CNI သတင်းဌာနသို့ ပြောသည်။

နိုင်ငံခြားသား ခရီးသွား ဝင်ရောက်မှု အနေဖြင့် ရှမ်းပြည်နယ် အရှေ့ပိုင်းသို့ ပိုမိုဝင်ရောက်ခဲ့ပြီး ထိုင်းနိုင်ငံနှင့် တရုတ်နိုင်ငံတို့မှ အများဆုံးဖြစ်ကြောင်း သိရသည်။

ရှမ်းပြည်နယ်တွင် ဟိုတယ်နှင့် ခရီးသွားဝန်ကြီးဌာနမှ ခွင့်ပြုပေးထားသည့် ဟိုတယ်နှင့် တည်းခိုရိပ်သာ ၄၂၈ လုံး၊ အခန်းပေါင်း ၁၆၀၀၀ ကျော်နှင့်၊ စည်ပင်သာယာရေးကော်မတီမှ ခွင့်ပြုပေးထားသည့် ဟိုတယ်နှင့် တည်းခိုရိပ်သာ အလုံး ၅၀၀ ရှိကြောင်း သိရသည်။

CNI News

၂၀၂၃ ခုနှစ်၊ ဧပြီ ၆

ကိုဗစ်ကာလအလွန် ၂၀၂၂ ခုနှစ်တွင် ပြန်လည်ကျင်းပသည့် သင်္ကြန်ကာလ၌ ပြည်ပခရီးသွားဝင်ရောက်မှု မရှိ သလောက် ဖြစ်ခဲ့သော်လည်း ယခုနှစ် သင်္ကြန်ကာလတွင် ပြည်ပခရီးသွားဝင်ရောက်မှုများ ပြန်ရှိလာမည် ဖြစ် ကြောင်း မြန်မာနိုင်ငံခရီးသွားလုပ်ငန်းရှင်များအသင်းမှ CNI သတင်းဌာနသို့ ပြောသည်။

ပြီးခဲ့သည့် ၂၀၂၂ ခုနှစ် သင်္ကြန်ကာလတွင် Tourist Visa ဖြင့် လာရောက်လည်ပတ်သည့် ပြည်ပခရီးသွားမှာ မရှိသလောက်ဖြစ်ခဲ့ပြီး စီးပွားရေးအရ Business Visa ဖြင့် လာရောက်ကြသူများသာရှိခဲ့ကြောင်း သိရသည်။

သို့သော် ယခုနှစ်သင်္ကြန်ကာလတွင် Tourist Visa ဖြင့် ပြည်ပခရီးသွားများ လာရောက်ကြမည်ဖြစ်ကြောင်း မြန်မာနိုင်ငံခရီးသွားလုပ်ငန်းရှင်များအသင်းမှ ဥက္ကဋ္ဌ ဦးနောင်းနောင်းဟန်က CNI သတင်းဌာနသို့ ပြောသည်။

၎င်းက “မနှစ်ကထက်စာရင်တော့ ရှိနေဦးမှာပါ။ အထူးသဖြင့် တရုတ်နိုင်ငံသားခရီးသွားတွေ လေကြောင်းလိုင်း ဖွင့်လိုက် တဲ့အတွက် တရုတ်နိုင်ငံသားခရီးသွားတချို့က ဝင်ရောက်မှု တောက်လျှောက်ရှိနေတယ်။ တစ်နေ့ကို Flight တစ်ကြောင်းပေါ်မှာ အနည်းဆုံး လူ ၁၀၀၊ ၂၀၀ လောက် ပါလာတာမျိုးတွေ ရှိနေတဲ့အတွက် ဒီခရီးသွား ဝင်ရောက် မှုကတော့ ရှိနေဦးမှာပါပဲ။ အဓိကကတော့ ဒီထိုင်းနိုင်ငံကနေ လာဖို့ရှိပါတယ် အချို့လေ။ သူတို့က မြန်မာနဲ့က ယဉ်ကျေးမှုလည်း တူတယ်။ သူတို့ဆီမှာလည်း သင်္ကြန်ပွဲရှိတယ်ပေါ့လေ ဒီမှာလည်းရှိတော့ အဲဒီလိုမျိုး လာချင်တဲ့ သူတွေရှိပါတယ်။ ဒီနှစ်က ထိုင်းနိုင်ငံကို ဝင်လာတဲ့ တချို့ခရီးသည်ရှိပါတယ်။ အနောက်နိုင်ငံသား တချို့ရှိတယ်။ များသောအားဖြင့် လူငယ်ခရီးသွားတွေ များပါတယ်။ အသက် ၂၀-၂၅ ဝန်းကျင်တွေပေါ့နော်။ အဲဒီခရီးသွားတွေက သူတို့ ဒေသန္တရ ဗဟုသုတ ရှာဖွေချင်တဲ့သူတွေက များပါတယ်။ ဒါကြောင့်မို့လို့ မြန်မာနိုင်ငံကို ကျောပိုးအိတ် တစ်လုံး ဆွဲပြီးတော့ လာကြတဲ့လူတွေ ရှိပါတယ်။ ဒါဆိုရင် အပန်းဖြေခရီးလို့ ကျနော်တို့ ပြောလို့ရ ပါတယ်။ နောက်တစ်ခါ ရုရှားနိုင်ငံကအပြင် အခြားသောနိုင်ငံတချို့ ကနေပြီးတော့ ဒီခရီးသည်တချို့တွေ ဝင် ရောက်မှု ရှိနေပါတယ်။ Tourist နဲ့ပဲ ဝင်လာတာပဲပေါ့”ဟု ပြောသည်။

ပြီးခဲ့သည့် သင်္ကြန်တွင်းက ပြည်ပခရီးသွားများကိုတွေ့ရစဉ်

ယခုနှစ် သင်္ကြန်ကာလတွင် ပြည်ပခရီးသွားဝင်ရောက်မှု ပြန်ရှိလာမည် ဖြစ်သော်လည်း ပမာဏအားဖြင့် အနည်း ငယ်သာ ရှိနိုင်ကြောင်း၊ ပြည်ပမှ လာရောက်သည့် ခရီးသွားများအနေဖြင့် သင်္ကြန်ကာလတွင် ရန်ကုန်၊ မန္တလေးသို့ သွားရောက်လည်ပတ်ခြင်းမျိုး ရှိနိုင်ကြောင်း၊ ရန်ကုန်မြို့တွင် နေထိုင်သည့် ပြည်ပခရီးသွားများ အနေဖြင့် သင်္ကြန် ကာလတွင် ကမ်းခြေဒေသများသို့ သွားရောက် လည်ပတ်နိုင်ဖွယ်ရှိကြောင်း သိရသည်။

ထို့အပြင် ရခိုင်ပြည်နယ်သို့ ပြီးခဲ့သည့် ၂၀၂၂ ခုနှစ် သင်္ကြန်ပိတ်ရက်တွင် ပြည်တွင်းရှိ NGO အဖွဲ့အစည်းများ၊ သံရုံးမှ လူပုဂ္ဂိုလ်များ၊ အလုပ်ကိစ္စဖြင့် ဝင်ရောက်လာသည့် ပြည်ပခရီးသွား ၂၆၀ ဦးခန့် လာရောက်ခဲ့သော်လည်း ယခုနှစ် တွင် ထိုပမာဏထက် များပြားမည်ဟု ခန့်မှန်းထားကြောင်း ရခိုင်ပြည်နယ် ဟိုတယ်နှင့် ခရီးသွား ညွှန်ကြားမှုဦးစီး ဌာနမှ ညွှန်ကြားရေးမှူး ဦးတင်ထွန်းအောင်က CNI သတင်းဌာနသို့ ပြောသည်။

၎င်းက “များနိုင်ပါတယ်။ အရေအတွက်တော့ မမှန်းနိုင်ဘူးပေါ့နော်။ ဘာလို့ဆို လေကြောင်းတွေ ဘာတွေ အခြေ အနေတွေက ရှိသေးတာကို။ အနည်းဆုံးတော့ ဘယ်သူမှ မရှိဘူးဆိုရင်တောင် သံရုံးတို့ ဘာတို့က ဧည့်သည်တွေက တော့ အများကြီး လာကြမှာပေါ့။ လက်ရှိမှာ ရခိုင်ပြည်နယ် တစ်ခုလုံးမှာ ဟိုတယ် တည်းခိုရိပ်သာ ၁၀၂ လုံးရှိ တယ်။ အဲဒီမှာ ၉၁ လုံး ဖွင့်ထားတယ်။ သံတွဲမြို့နယ်မှာ ၆၅ လုံးရှိတဲ့အထဲမှာ ၅၇ လုံး ဖွင့်ထားတယ်။ အခု ဖွင့်ထား တဲ့ ဟိုတယ်တွေ အကုန်လုံးက သံတွဲပေါ့နော် ငပလီကိုပဲ ပြောမယ်ဆိုရင် ၈၉ ရာခိုင်နှုန်းလောက် ဘိုကင်ရထားပြီး ပြီ။ ကျန်တာကတော့ ဟိုတယ် အငယ်တွေကတော့ မပြည့်သေးဘူးပေါ့။ ဒါလည်း ပြည့်သွားမှာပါ အခုကြားထဲမှာ ဘာမှမှ မကျန်တော့တာ။ ဒီနှစ်လည်း မနှစ်ကလိုပဲ တော်တော်လေး စည်စည်ကားကား ဖြစ်မယ်လို့ မျှော်လင့်ပါ တယ်” ဟု ပြောသည်။

ပြီးခဲ့သည့် သင်္ကြန်တွင်းက ပြည်ပခရီးသွားများကိုတွေ့ရစဉ်

သင်္ကြန်ကာလတွင် လေကြောင်းလိုင်းများ၊ ခရီးစဉ်နှင့် ဟိုတယ်ခများမှာ ပုံမှန်နှုန်းထားထက် ပိုမိုများပြား သွား သဖြင့် ထိုအချက်သည်လည်း သင်္ကြန်ပိတ်ရက်၌ ပြည်ပခရီးသွား ဝင်ရောက်မှု မများရခြင်း၏ အကြောင်းတရား တစ်ခု ဖြစ်ကြောင်း မြန်မာနိုင်ငံခရီးသွားလုပ်ငန်းရှင်များအသင်းမှ ဥက္ကဋ္ဌ ဦးနောင်းနောင်းဟန်က ပြောသည်။

ထို့ကြောင့် ခရီးသွားလုပ်ငန်းရှင်များ အနေဖြင့် ပြည်ပခရီးသွားများအတွက် သင်္ကြန်ခရီးစဉ်အဖြစ် သီးခြားခွဲကာ ရောင်းချခြင်းမျိုး၊ လေယာဉ်လက်မှတ်များအား ကြိုတင်ဘိုကင်ယူခြင်းမျိုး လုပ်ဆောင်နိုင်ပါက လာမည့် နှစ်များ တွင် သင်္ကြန်ပိတ်ရက် ကာလများတွင် ပြည်ပခရီးသွား ဝင်ရောက်မှု များလာနိုင်ဖွယ်ရှိကြောင်း ၎င်းက အကြံပြု သည်။

CNI News
၂၀၂၃ ခုနှစ်၊ မတ်လ ၁၈

ဓနုကိုယ်ပိုင်အုပ်ချုပ်ခွင့်ရဒေသအနေဖြင့် ပြည်တွင်း/ပြည်ပ ငွေရှာဖွေပေးနေသည့် ခရီးသွားလုပ်ငန်းကို မြှင့်တင် နိုင်ရန် ဒေသထုတ်ကုန်များကိုလည်း ရိုးရားမပျက် တိုးမြှင့်ထုတ်လုပ်နိုင်ရန်လိုကြောင်း နစကဒုဥက္ကဋ္ဌ ဒုတိယ ဗိုလ်ချုပ်မှူးကြီး စိုးဝင်းက ပြောသည်။

၂၀၂၃ ခုနှစ်၊ မတ်လ ၁၈ ရက်က ရှမ်းပြည်နယ်(တောင်ပိုင်း)၊ ဓနုကိုယ်ပိုင်အုပ်ချုပ်ခွင့်ရဒေသအတွင်းရှိ အသေး စား၊ အငယ်စားနှင့် အလတ်စား စီးပွားရေး လုပ်ငန်းရှင်များ၊ ဌာနဆိုင်ရာ တာဝန်ရှိသူများနှင့် ဒေသခံတိုင်းရင်း သားများအား တွေ့ဆုံစဉ် ၎င်းက အထက်ပါ အတိုင်းပြောကြားခဲ့ခြင်း ဖြစ်သည်။

နစကဒုဥက္ကဋ္ဌက “ပင်းတယဒေသသည် နိုင်ငံ၏ ခရီးသွားလုပ်ငန်းအတွက် အထင်ကရ နေရာတစ်ခုဖြစ်၍ ပြည်တွင်း/ပြည်ပ ခရီးသွားများကို ဆွဲဆောင်ရာ ဒေသတစ်ခုဖြစ်ကြောင်း၊ မီးခိုးမထွက်သော စက်ရုံများဟု တင် စား ခေါ်ဝေါ်သော ပြည်တွင်း/ပြည်ပ ငွေရှာဖွေပေးနေသည့် ခရီးသွားလုပ်ငန်းကို မြှင့်တင်နိုင်ရန် ဒေသထုတ် ကုန်များကိုလည်း ရိုးရာမပျက် တိုးမြှင့်ထုတ်လုပ်နိုင်ရန် လိုကြောင်း။ ဓနုကိုယ်ပိုင်အုပ်ချုပ်ခွင့်ရဒေသည် ပြည်ပ ခရီးသွားများ စိတ်ဝင်စားကာ လာရောက်လည်ပတ်သည့် ဒေသဖြစ်၍ ရိုးရာထွက်ကုန် ပစ္စည်းများကို တရားဝင် မှတ်ပုံတင်၍ စနစ်တကျ ထုတ်လုပ်ရန် လိုတယ်”ဟု ပြောသည်။

ယခုအခါ ပို့ကုန်နှင့်သွင်းအားစု မျှတစွာ ဆောင်ရွက်ခြင်း၊ သွင်းကုန် အစားထိုး ကုန်ထုတ်လုပ်မှုများကို အားပေး ခြင်း၊ ပြည်တွင်းကုန်ထုတ်လုပ်မှု လုပ်ငန်းများကို အားပေးခြင်းတို့ကြောင့် နိုင်ငံ၏ စီးပွားရေး အသင့်အတင့် ကောင်းမွန်လာပြီဖြစ်ကြောင်း၊ ဒေသဖွံ့ဖြိုးတိုးတက်ရေးအတွက် အစိုးရတစ်ဖွဲ့တည်းဖြင့် ဆောင်ရွက်၍မရဘဲ ဒေသခံပြည်သူများ၊ ဌာနဆိုင်ရာများ ပူးပေါင်းဆောင်ရွက်မှုဖြင့် ဓနုကိုယ်ပိုင်အုပ်ချုပ်ခွင့်ရဒေသသည် ယခုထက် ပိုမိုဖွံ့ဖြိုးတိုးတက်ရေးအတွက် အားလုံးဝိုင်းဝန်းပူးပေါင်း ဆောင်ရွက်သွားကြရန်လိုကြောင်း ၎င်းက ပြောသည်။

ထို့နောက် တက်ရောက်ခဲ့သော အသေး စား၊ အငယ်စားနှင့် အလတ်စား စီးပွားရေး လုပ်ငန်းရှင်များကတော့ လက်ဖက်၊ ကော်ဖီ၊ အားလူး စိုက်ပျိုးရေးနှင့် မိရိုးဖလာ ဒေသထွက်ကုန် လုပ်ငန်း အခြေအနေများကို တင်ပြ ဆွေးနွေးခဲ့ကြသလို သွင်းအားစု စရိတ်များ ကြီးမြင့်နေသည့် အခြေအနေများကိုလည်း တင်ပြဆွေးနွေးခဲ့ကြ ကြောင်း သိရသည်။

CNI News

၂၀၂၃ ခုနှစ်၊ မတ်လ ၁၆

ရှမ်းပြည်နယ်တွင် မကြာခင်ကျရောက်တော့မည့် သင်္ကြန်ပိတ်ရက်အတွက် ပြည်တွင်း ခရီးသွားများအနေဖြင့် ဟိုတယ်များအား ကြိုတင်ဘိုကင် ယူထားမှု များပြားနေကြောင်း ရှမ်းပြည်နယ် ဟိုတယ်နှင့် ခရီးသွားလာရေး ညွှန်ကြားမှုဦးစီးဌာနနှင့် ဟိုတယ်လုပ်ငန်းရှင်များက CNI သတင်းဌာနသို့ ပြောသည်။

လက်ရှိတွင် ကလော၊ တောင်ကြီး၊ ကျောက်မဲ၊ လားရှိုး၊ မူဆယ်၊ လောက်ကိုင်မြို့တို့၌ ဟိုတယ်များအား ကြိုတင် ဘိုကင်ယူထားမှု များပြားနေခြင်းဖြစ်ပြီး အချို့ဟိုတယ်ကြီးများ၌ ဘိုကင်ယူထားမှုမှာ ပြည့်နေပြီ ဖြစ်ကြောင်း ၎င်းတို့က ပြောသည်။

ရှမ်းပြည်နယ်မြောက်ပိုင်း ဟိုတယ်လုပ်ငန်းရှင်များအသင်းမှ ဥက္ကဋ္ဌ ဦးဇော်ဇော်က “အဓိကကတော့ သင်္ကြန်တွင်း မှာပါပဲ။ တချို့လည်း ရန်ကုန်၊ မန္တလေးက လုပ်ငန်းရှင်တွေက စီးပွားရေး ဒီဘက်မှာ ကောင်းတယ်လို့လည်း ကြား တဲ့ အခါကျတော့ သူတို့လုပ်ငန်းပိတ်တဲ့ အချိန်လေးမှာ လာလေ့လာရင်းနဲ့ သင်္ကြန်လည်း လာလည်မယ်ပေါ့ အဲဒီလို မျိုးလေးတွေ တွေ့ရပါတယ်။ ရှမ်းမြောက်မှာတော့ မြို့ကြီးတွေအကုန် တော်တော်များများ ယူထားပါတယ်။ ဧည့် သည်များတဲ့ နေရာတွေ ဖြစ်တဲ့အတွက် demand နဲ့ supply မမျှဘူးပေါ့နော်။ အခန်းတွေ လိုအပ်ချက်ရှိတဲ့ အတွက်။ အဲဒီတော့ ဧည့်သည်တွေ ကြိုတင်ဘိုကင် မလုပ်ရင် ဒီမှာက အဆင်မပြေဘူး။ အရင်တုန်းကတော့ ဒီလို မျိုး သိပ်မရှိခဲ့ဘူးပေါ့နော်။ သင်္ကြန်အတွက် ကြိုတင်ဘိုကင်လုပ်တာတို့ ဘာတို့ သိပ်မရှိဘူးပေါ့။ မနှစ်ကတော့ ဘိုကင်လုပ်တာတော့မရှိဘူး။ ဒါပေမယ့် သင်္ကြန်တွင်းမှာ ဝင်လာတဲ့ ဧည့်သည်တွေတော့ များပါတယ်။ မနှစ်က ပထမ တစ်ရက်၊ နှစ်ရက်တော့ နည်းတယ်ပေါ့။ နောက်ရက်တွေတော့ တော်တော်လေး များလာတာတွေ့ပါတယ်။ ဒီနှစ်သင်္ကြန် ပိတ်ရက်ကတော့ အခုကြည့်ပုံအရဆိုရင် သင်္ကြန်တောင်မှ ရောက်ဖို့ လိုသေးတယ် အခုကတည်းက ဘိုကင်တွေ လုပ်နေတယ်၊ လုပ်ထားတာလေးတွေ ရှိတယ်။ နီးရင် ဒီထက် ပိုများ မယ်လို့ ထင်ပါတယ်” ဟု CNI သတင်းဌာနသို့ ပြောသည်။

ရှမ်းပြည်နယ်(တောင်ပိုင်း) ညောင်ရွှေအင်လေး ရေပေါ် သင်္ကြန်ပွဲတော်

ပြီးခဲ့သည့် ၂၀၂၂ ခုနှစ် သင်္ကြန်ပိတ်ရက်တွင် ရှမ်းပြည်နယ် မြောက်ပိုင်းသို့ လာရောက်လည်ပတ်သည့် ခရီးသွား ဦးရေမှာ ၅၀၀၀ ဝန်းကျင်သာ ရှိခဲ့ကြောင်း၊ ယခုနှစ်တွင် ထိုပမာဏထက် များပြားမည်ဟု ခန့်မှန်းထားကြောင်း လည်း သိရသည်။

ယခုနှစ်တွင် ရှမ်းပြည်နယ်၌ သင်္ကြန်အတွက် မဏ္ဍပ်များ၊ လမ်းလျှောက်သင်္ကြန်တို့အပြင် အခြားသော အစီအစဉ် များလည်း လုပ်ဆောင်ရန် သက်ဆိုင်ရာ အာဏာပိုင်များမှ ဆွေးနွေးနေလျက်ရှိကြောင်း ရှမ်းပြည်နယ် ဟိုတယ်နှင့် ခရီးသွားလာရေး ညွှန်ကြားမှုဦးစီးဌာနမှ ဒုတိယညွှန်ကြားရေးမှူး ဦးစည်သူကျော်က CNI သတင်းဌာနသို့ ပြော သည်။

၎င်းက “ကျနော်တို့ ဒီနှစ်ကိုတော့ အချိန်လေး နည်းနည်း စောင့်ကြည့်ရမယ် ထင်တယ်။ ဘာလို့ဆို ဒီဘက်မှာ အခု ကြားတာပေါ့နော် ရေပေါ်သင်္ကြန်လုပ်မယ်တို့ ညောင်ရွှေ အင်းလေးမှာဆိုလည်း၊ ဒီဘက်တောင်ကြီးမြို့ဘက်မှာ ဆိုလည်း မဏ္ဍပ်တွေဘာတွေ လုပ်ဖို့ အစည်းအဝေးထိုင်နေတဲ့ သတင်းတွေ ဘာတွေလည်း ကျနော်တို့ တွေ့နေ ကြားနေရတာပေါ့။ အဲဒီတော့ အဲဒါတွေ အတည်ဖြစ်ပြီ public ကို ချပြပြီဆိုရင်တော့ အပြောင်းအလဲတော့ ရှိနိုင် တာပေါ့နော် မနှစ်က အနေအထားနဲ့ဆိုရင်။ တခြားသင်္ကြန်နဲ့ပတ်သက်တဲ့ activities တွေကို လုပ်လာမယ် ဆိုရင် တော့ အနေအထားလေးက တမျိုးဖြစ်ရင် ဖြစ်သွားမှာပါ။ သင်္ကြန်နဲ့ပတ်သက်လို့ နည်းနည်း စည်စည် ကားကား လေးဖြစ်အောင် လုပ်မယ်ဆိုတဲ့ information လေးတွေတော့ ရထားတာပေါ့နော်။ ဒါပေမယ့် ဘယ်လိုမျိုးလဲဆို တာတော့ ကျနော်လည်း အတိအကျ မသိသေးဘူး။ နာမည်ရှိတဲ့ image ရထားပြီးသား ဟိုတယ်တွေကတော့ ကြိုတင်ဘိုကင်တွေ ပြည့်နေပြီ ဆိုတာမျိုးတွေ မေးကြည့်တော့ ပြောလာတာမျိုးတွေ ရှိတာပေါ့။ အဓိကကတော့ ညောင်ရွှေကိုတော့ ဧည့်သည်ဝင်ဖို့ပေါ့နော် overnight visitor လေးတွေ ပိုရအောင် အဲဒါမျိုးလေးတွေ နည်းနည်း စဉ်းစားနေတဲ့ အပိုင်းတော့ ရှိတယ်”ဟု ၎င်းကပြောသည်။

ရှမ်းပြည်နယ်(တောင်ပိုင်း) ညောင်ရွှေအင်လေး ရေပေါ် သင်္ကြန်ပွဲတော်

ထို့ကြောင့် ဟိုတယ်လုပ်ငန်းရှင်များအနေဖြင့် သင်္ကြန်ပိတ်ရက် ကာလများတွင် လာရောက်တည်းခိုသည့် ခရီးသွား များအတွက် ယခုထက် ပိုမို ကောင်းမွန်သည့် ဝန်ဆောင်မှုများ၊ လုံခြုံရေးပိုင်းများအား ဆောင်ရွက်ပေးရန် လိုကြောင်း ဟိုတယ်လုပ်ငန်းရှင်များက အကြံပြုသည်။

မကြာခင် ရောက်ရှိမည့် သင်္ကြန်ပိတ်ရက်များအတွက် ယခုကတည်းက ကမ်းခြေဒေသများတွင် ဟိုတယ် ဘိုကင်ယူထားမှုများ ပြည့်နေပြီဖြစ်သကဲ့သို့ မြန်မာ့ယဉ်ကျေးမှု အမွေအနှစ်ဖြစ်သည့် ပုဂံဒေသတွင်လည်း ဟိုတယ်ဘိုကင် ယူထားမှုများ ရှိနေပြီဖြစ်ကြောင်း သိရသည်။

CNI News

၂၀၂၃ ခုနှစ်၊ မတ်လ ၈

မြန်မာနိုင်ငံတွင် ၂၀၁၂ ခုနှစ်မှ စတင်ကာ ၂၀၁၉ ခုနှစ်အထိ ပြည်ပခရီးသွား ဝင်ရောက်မှု များပြားခဲ့ပြီး ရွှေခေတ်သို့ ရောက်ခဲ့သည့် အနေအထားအား လက်ရှိ ကိုဗစ်ကာလအလွန်တွင် မမှီနိုင်သေးကြောင်း ခရီးသွားလုပ်ငန်းရှင်များ နှင့် ဟိုတယ်လုပ်ငန်းရှင်များက CNI သတင်းဌာနသို့ ပြောသည်။

မြန်မာနိုင်ငံ၏ ခရီးသွားကဏ္ဍတွင် ပြည်ပခရီးသွား ဝင်ရောက်မှုသည် ၂၀၀၃ ခုနှစ်မှစတင်ကာ ၂၀၀၆ ခုနှစ်အထိ အားကောင်းခဲ့ပြီး ၂၀၀၇ မှ ၂၀၁၁ ခုနှစ်တွင် ပြန်ကျသွားခဲ့ကြောင်း၊ သို့သော် ၂၀၁၂ ခုနှစ်မှ စတင်ကာ ၂၀၁၉ ခုနှစ် အထိ ပြန်၍ အားအလွန်ကောင်းခဲ့ကြောင်း၊ ၂၀၁၉ ခုနှစ် တစ်နှစ်တည်းတွင် ပြည်ပခရီးသွားဝင်ရောက်မှုမှာ ၄ ဒဿမ ၄ သန်းခန့် အထိ ရှိခဲ့သည်။

သို့သော် ကိုဗစ်နှင့် နိုင်ငံရေး မတည်ငြိမ်မှုများကြောင့် လက်ရှိအချိန်အထိ မြန်မာနိုင်ငံ၏ ခရီးသွားကဏ္ဍတွင် ပြည်ပ ခရီးသွားဝင်ရောက်မှုမှာ ဆက်လက် ကျဆင်းနေကြောင်း ခရီးသွားလုပ်ငန်းရှင်များနှင့် ဟိုတယ် လုပ်ငန်းရှင် များက ထောက်ပြ ပြောဆိုကြခြင်း ဖြစ်သည်။

ခရီးသွားလုပ်ငန်းရှင် ဦးသက်လွင်တိုးက “အဲဒီအခြေအနေကတော့ အခု 1 million တောင် မပြည့်တော့ပါဘူး။ သိန်းဂဏန်းလောက်တောင် အနိုင်နိုင် ဖြစ်သွားတယ်။ ကောင်းခဲ့တယ်ဆိုတာက image ပေါ့။ ကျနော်တို့ တိုင်းပြည်က ရင်းနှီးမြှုပ်နှံလို့လည်း ကောင်းတယ်၊ နောက်တစ်ခါ လည်စရာပတ်စရာတွေက ဒီထက် လုံခြုံ စိတ်ချ ရတယ်။ နောက် ၂၀၀၃၊ ၄၊ ၅၊ ၆၊ ၇ တုန်းကလည်း ဘာဖြစ်လဲဆိုတော့ visa on arrival တွေ ဖွင့်ပေးခဲ့တယ်။ သံရုံး ချည်းပဲ မဟုတ်တော့ဘဲ ဘယ်လူမျိုးမဆိုပေါ့ visa ယူဖို့ အခက်အခဲရှိသူတွေကို on arrival ပေးတယ်၊ အဲဒီအခါမှာ လည်း agent တွေရဲ့ အကူအညီနဲ့ လုပ်ရတဲ့အတွက်ကြောင့် agent တွေက အလုပ်ရတယ်။ agent တွေ အလုပ်ရ တဲ့ အတွက်ကြောင့် ဂိုက်(ဧည့်လမ်းညွန်)တွေလည်း အလုပ်ရတယ်။ ဒီဘက်ခေတ်ကျတော့ ခေတ်က ပြောင်းသွား ပြီ။ online နဲ့ e-visa တွေ လုပ်ခဲ့တယ်။ e-visa လုပ်ရင်းနဲ့မှ visa free တွေပေးလာတဲ့ အခါကျတော့ FIT Tour တွေလည်း မြင့်လာတယ်။ ဘယ်လိုပဲပြောပြော အလုံးနဲ့အရင်းနဲ့ လာပြီဆိုကတည်းက လူ ၁၀ ယောက် လာလို့ ၃ ယောက်လောက်က package tour ယူမယ်၊ ၇ ယောက်လောက်က free visa ပဲ ဖြစ်ဖြစ် independent traveler အနေနဲ့ လာရင်ဖြစ်ဖြစ် ကိုယ့်တိုင်းပြည်ကို သပိတ်ဝင် အိတ်ဝင် ဝင်တာပဲလေ။ Barrier Field ဆိုတာ ဘာတွေလဲ။ ဘာ barrier တွေလဲဆိုတာကို သူတို့ အောက်ခြေ level ကို သိဖို့လိုတယ်။ စကားလုံး လှလှပပကြီး သုံးပြီးတော့ ပြောနေတာထက်စာရင် လက်တွေ့ ဘာတွေလဲဆိုတာကို သူတို့ နားထောင်ဖို့ လိုတယ်” ဟု CNI သတင်းဌာနသို့ ပြောသည်။

ကမ်းခြေမှာ တွေ့ရသည့် ခရီးသွားများ

နိုင်ငံတစ်နိုင်ငံ၏ ခရီးသွားလုပ်ငန်းတွင် ပြည်တွင်းခရီးသွားထက် ပြည်ပခရီးသွား ဝင်ရောက်မှုများပါက နိုင်ငံ၏ GDP (gross domestic product) လည်း တက်သည့်အတွက် ပြည်ပခရီးသွား ဝင်ရောက်မှုသည် နိုင်ငံတစ်နိုင်ငံ အတွက် အလွန်အရေးပါကြောင်း ရှမ်းပြည်နယ်မြောက်ပိုင်း ဟိုတယ်လုပ်ငန်းရှင်များအသင်းမှ ဥက္ကဋ္ဌ ဦးဇော်ဇော် က CNI သတင်းဌာနသို့ ပြောသည်။

ပြည်ပခရီးသွား ဝင်ရောက်မှုနှင့် ပတ်သက်၍ ယခင်အချိန်ကာလနှင့် လက်ရှိ အနေအထားကို နှိုင်းယှဉ်ကြည့်မည် ဆိုလျှင် လက်ရှိသည် မြန်မာနိုင်ငံအတွင်းမှာ မတည်ငြိမ်သေးဟု ပြည်ပနိုင်ငံများမှ ထင်မြင်ယူဆသည့် အတွက် ကြောင့် ယခုလက်ရှိ ဝင်ရောက်မှု နည်းနေခြင်းဖြစ်ကြောင်း ၎င်းက ပြောသည်။

ဦးဇော်ဇော်က “နီးနီးနားနား ထိုင်းဆိုရင် ဒါပြည်ပ ခရီးသွား ဝင်ရောက်မှုနဲ့ပဲ ရပ်တည်တာ များပါတယ်။ အရင်တုန်း က ဦးသိန်းစိန် အစိုးရလက်ထက်မှာ တရုတ်နိုင်ငံသားတွေကို ရွှေလီ-မူဆယ် ဝင်ပေါက်ကနေ border pass ကနေ ဝင်ခွင့်ပေးတယ်။ ဝင်ခွင့်ပေးပြီး သွားတဲ့အခါမှာ အဲဒီအချိန်မှာ ခရီးသွားလုပ်ငန်းက တအားကို ဆက်စပ်တာပေါ့ နော်။ တရုတ်နိုင်ငံသားတွေ လာလိုက်ရင် ကားအစင်းလိုက် ရာချီလာတယ်။ သူတို့အတွက် နေစရာတွေ၊ စား သောက် စရာတွေ စီစဉ်ပေးရတယ်။ ကားတွေ အဆင်ပြေတယ်၊ souvenir shop တွေ အဆင်ပြေတယ်။ တရုတ် နိုင်ငံသားတွေ ဒီမှာ ပိုက်ဆံလာသုံးတာ ဖြစ်တဲ့အတွက် ပြည်သူပြည်သားတွေလည်း သူ့ ဆက်စပ်တဲ့ လုပ်ငန်းတွေ အားလုံးပေါ့ အကုန်လုံးက ဝင်ငွေရကြတယ်။ ဒါလေးက သာဓကတစ်ခုပါပဲ”ဟု CNI သတင်းဌာနသို့ ပြောသည်။

ထို့ကြောင့် မြန်မာနိုင်ငံသို့ ပြည်ပခရီးသွားများ ဝင်ရောက်လာရန် နည်းလမ်းမျိုးစုံဖြင့် ဆွဲဆောင်နိုင်ရန် လိုအပ်ပြီး ဝန်ကြီးဌာန အနေဖြင့်လည်း အသင်းအဖွဲ့များ၊ သက်ဆိုင်ရာနယ်ပယ်မှ ကျွမ်းကျင်သူများ၏ အကြံပြုမှု များအား နားထောင်ရန် လိုအပ်ကြောင်း ခရီးသွားလုပ်ငန်းရှင်များနှင့် ဟိုတယ်လုပ်ငန်းရှင်များက ပြောသည်။

ခရီးသွားလုပ်ငန်းရှင် ဦးသက်လွင်တိုးက “ဘယ်သူက research လုပ်သလဲ။ အဲဒါမျိုးတွေလုပ်မှ အဖြေမှန်သိမှ barrier field tourism ဟာ ဘာ barrier တွေဖြစ်သလဲ။ နံပါတ်တစ်က visa ကလည်း barrier ဖြစ်တယ်။ visa on arrival တောင် ပြန်မပေးတော့ဘူး။ သံရုံးတွေနဲ့ အွန်လိုင်းကပဲ ပေးတော့တယ်။ နံပါတ်နှစ် insurance တွေ ကျနော်တို့ မြန်မာနိုင်ငံမှာက အခုထိ နောက်ပြန်ဆွဲတုန်း။ ဒေါ်လာ ၅၀ က စပေးရတယ်။ ၇၀၊ ၈၀ အထိလည်း ပေး ရတယ် အသက်အရွယ်ကြီးရင် ကြီးသလို။ ဒါတွေကို ဘာမှ ဆေးကုသမှု cover တွေ တိတိကျကျ မပြောဘဲနဲ့ မဖြစ် မနေ ဒေါ်လာ ၅၀ ယူရမယ်၊ ပေးမှပဲ visa လျှောက်ခွင့်ရမယ်။ အဲဒါကလည်း နှစ်ပတ်လား သုံးပတ်လား ပြီးသွားရင် အကျုံးမဝင်တော့ဘူး။ ဒါတွေဟာ ဘာတွေလဲဆိုတော့ ငမ်းငမ်းတက် ဒေါ်လာကို ယူတဲ့ သဘောမျိုး ဖြစ်တဲ့အတွက် ကြောင့် တချို့ Tourist တွေက လုံးဝ မကြိုက်တော့ဘူး” ဟု CNI သတင်းဌာနသို့ ပြောသည်။

ပြည်ပခရီးသွားများကို ပုဂံဒေသမှာ တွေ့ရစဉ်

သို့သော် နိုင်ငံတစ်နိုင်ငံ၏ ခရီးသွားလုပ်ငန်း ပြန်လည် တိုးတက်ကောင်မွန်ရေးတွင် ၎င်းနိုင်ငံ၏ ပုံရိပ်မှာ ကောင်း၊ မကောင်း ဆိုသည့်အပေါ်တွင် အဓိကကျကြောင်း ခရီးသွားလုပ်ငန်းရှင်များနှင့် ဟိုတယ်လုပ်ငန်းရှင်များက သုံးသပ် သည်။

ထို့အပြင် ဒေသတွင်း တည်ငြိမ်မှုမရှိခြင်း၊ လမ်းခရီး စစ်ဆေးရေးဂိတ်များ ပေါများခြင်း၊ လမ်းပန်း ဆက်သွယ်ရေး ကြန့်ကြာခြင်း အစရှိသည်တို့မှာလည်း ခရီးသွား ဧည့်သည်များအတွက် အတားအဆီးများ ဖြစ်နေကြောင်းနှင့် လမ်းပန်း ဆက်သွယ်ရေး အခြေအနေကြောင့် လမ်းကြောင်းပြောင်းလဲ၍ သွားရသည့် အခါတွင်လည်း ကုန်ကျ စရိတ်မှာ ပိုများသွားကြောင်း ၎င်းတို့က သုံးသပ်သည်။

သက်ဆိုင်ရာ ဌာနဆိုင်ရာများ အနေဖြင့် ခရီးသွားလုပ်ငန်းဖွံ့ဖြိုးရေးအတွက် နှုတ်ဖြင့် ပူးပေါင်းဆောင်ရွက်၍ မရ ကြောင်း၊ လက်တွေ့ မြေပြင် အခြေအနေအား သေချာကွင်းဆင်းလေ့လာပြီး မည်ကဲ့သို့ လုပ်ဆောင် သင့်သည်ကို အဖြေရှာသင့်ကြောင်း ၎င်းတို့က အကြံပြုသည်။

CNI News

၂၀၂၃ ခုနှစ်၊ မတ်လ ၇

မြန်မာ့ယဉ်ကျေးမှု အမွေအနှစ် ပုဂံဒေသသို့ လက်ရှိတွင် ပြည်တွင်းခရီးသွား ဝင်ရောက်မှု ယခင်ကထက် ပိုမိုဝင် ရောက်လျက် ရှိနေသည့်အပြင် သင်္ကြန်ရုံးပိတ်ရက် ကာလအတွက်လည်း ဟိုတယ်ကြိုတင်ဘိုကင် လုပ်ဆောင်မှုများ ရှိနေပြီဖြစ်ကြောင်း ပုဂံ - ညောင်ဦး ခရီးသွားဝန်ဆောင်မှု လုပ်ငန်းဆောင်ရွက်သူများထံမှ သိရသည်။

ပုဂံဒေသသည် တခြားသော မြို့များနှင့် နှိုင်းယှဉ်ပါက နယ်မြေတည်ငြိမ်သည့် အခြေအနေ ရှိနေသည့်အတွက် သင်္ကြန်ကာလတွင် ခရီးသွားများ ဦးစားပေး လာရောက်ကြမည် ဖြစ်ကြောင်း၊ သို့သော်လည်း ကိုဗစ်မတိုင်ခင်ကာလ အရေအတွက်ကို မရောက်ရှိနိုင်ကြောင်း ပုဂံခရီးသွား ဝန်ဆောင်မှုလုပ်ငန်းမှ ကိုကျော်စွာလင်းက CNI သတင်းဌာနသို့ ပြောသည်။

ကိုကျော်စွာလင်းက “သင်္ကြန်ကတော့ ပုံမှန်နှစ်တွေ အတိုင်းပါပဲ ကျနော်တို့ ကြိုတင်ဘိုကင်တွေ အခုကတည်းက နေပြီးတော့မှ ကြိုလုပ်ကြနေတာပေါ့နော်။ ဘာလို့ဆို နီးမှ သင်္ကြန်နီးမှ လာမယ်ဆိုလို့ရှိရင် ရက်ကြီး အခါကြီး ရက်တွေမှာ ပုဂံက ဟိုတယ်တွေ ပြည့်တာများတယ်။ အဲဒါကြောင့်မို့လို့ သင်္ကြန်က ၄ လပိုင်းဆိုပေမယ့် အခုကတည်း က ကြိုပြီးတော့ အခုကတည်းက ဘိုကင် ယူနေတဲ့သူတွေ ရှိကြပါတယ်။ အရင်တုန်းကပေါ့ဗျာ ကိုဗစ်မတိုင်ခင်က ကာလမျိုးနဲ့တော့ မျှော်လင့်လို့ မရဘူးပေါ့။ သို့သော် လက်ရှိကလည်း ပုဂံက တည်ငြိမ်နေတဲ့ အခြေအနေတစ်ခု ဖြစ်တယ်။ ပတ်ဝန်းကျင် မြို့တွေထက် စာရင်တော့ ပုဂံက ခရီးသွားဧည့်သည်တွေ လာတဲ့နေရာမှာ အဓိက စဉ်းစားတဲ့ မြို့တစ်မြို့ဖြစ်တော့ အရင်တုန်းက ကိုဗစ်မတိုင်ခင် ကာလမျိုးလောက်တော့ မျှော်လင့်လို့ မရဘူးဆိုပေမယ့် ကျနော်တို့ အဲဒီ နီးပါးလောက်တော့ လာမယ့်သင်္ကြန်မှာ ဘုရားဖူးဧည့်သည်တွေ ဖြစ်လာမှာပါ” ဟု ပြော သည်။

ပုဂံဒေသကိုတွေ့ရစဉ်

လက်ရှိတွင် ပုဂံဒေသသို့ ခရီးသွားလာမှု မြင့်တက်လျက်ရှိနေပြီး တစ်ရက်လျှင် ခရီးသွားဦးရေ ၁ သောင်းခန့်ရှိ ကြောင်း ဟိုတယ်နှင့် ခရီးသွားဝန်ကြီးဌာန၊ ပုဂံဌာနထံမှ သိရသည်။

သင်္ကြန်ကာလအတွင်း ပုဂံဒေသသို့ ဘုရားဖူးရန်အတွက် ကြိုတင်ပြင်ဆင်မှုများ ရှိနေပြီး ခရီးသွားလုပ်ငန်းများမှ စီစဉ်သည့် ခရီးစဉ်ထက် မိသားစုအလိုက် သွားရောက်သည့် ခရီးစဉ်များက ပို၍ များကြောင်း၊ ယခင်နှစ်များထက် ပုဂံဒေသသို့ ခရီးသွားဝင်ရောက်မှု နည်းနိုင်သော်လည်း တခြားသော ဒေသများထက် သင်္ကြန်ကာလတွင် ပုဂံသို့ ခရီးသွားလာရောက်မှု ပိုများလာမည် ဖြစ်ကြောင်း မြန်မာနိုင်ငံ ခရီးသွားလုပ်ငန်းရှင်များအသင်း ဥက္ကဋ္ဌ ဦးနောင်း နောင်းဟန်က CNI သတင်းဌာနသို့ ပြောသည်။

ဦးနောင်းနောင်းဟန်က “သင်္ကြန်ကာလ အတွင်းမှာတော့ ပုဂံဒေသ ခရီးသွားမှုတွေက မြင့်တက်လာလိမ့်မယ်လို့ ကျနော်ထင်တယ်။ ဘာလို့လဲဆိုတော့ ပြည်တွင်းမှာက တချို့တွေက ပြည်တွင်းခရီးသွားဖို့ ပုဂံဒေသကို ဘုရားဖူး သွားဖို့အတွက်ကို ပြင်ဆင်နေကြတာ ရှိတယ်။ ဘိုကင်တွေကတော့ ဘယ်လောက်ထိ ရနေတာရှိတယ်ဆိုတာ မသိပေမယ့်လည်း ဒီသင်္ကြန်ကာလ အတွင်းမှာတော့ ပုဂံက ခရီးသွားတွေ အများကြီး လာရောက်လိမ့်မယ်လို့ ကျနော်တို့ မျှော်လင့်ထားပါတယ်။ အဓိကက တချို့တွေက ကမ်းခြေဒေသကို သွားပြီးတဲ့သူတွေ ရှိတယ်ပေါ့နော်။ သွားပြီးတဲ့ ကမ်းခြေဒေသကို ထပ်မသွားတော့ဘူး။ ဘုရားဖူးဖို့အတွက် ပုဂံဒေသကို သွားဖို့အတွက် ပြင်ဆင်နေ ကြတာ ရှိပါတယ်။ ခရီးစဉ်အနေနဲ့ ပက်ကေ့စ်အနေနဲ့ ရောင်းတာမျိုးတွေတော့ မရှိပါဘူး။ ချောင်းသာ၊ ငွေဆောင် ကတော့ ကားရော၊ ဟိုတယ်ရောက ပက်ကေ့စ်လုပ်ပြီးတော့ ရောင်းနေတာမျိုးတော့ ရှိတယ်။ ပုဂံကျတော့ အဲဒီ လိုမျိုး ရောင်းတာမျိုးတွေ ကျနော်တို့ သိပ်မတွေ့ရဘူး။ မတွေ့ရဘဲနဲ့ တစ်မိသားစုကနေ ဒီကနေ တိုက်ရိုက် ဘိုကင် ပေါ့နော်၊ မိသားစုအလိုက် သွားတဲ့ဟာတွေကတော့ အများကြီး မြင့်တက်နေတယ်လို့ ကျနော်တို့ သိထားပါတယ်။ ပုဂံမှာ ခါတိုင်းနှစ်ထက် များလာနိုင်လားဆိုတော့ ခါတိုင်းနှစ်ထက် များတယ်လို့ ပြောလို့မရပေမယ့် ကျန်တဲ့ဒေသ တွေနဲ့ ယှဉ်ရင်တော့ ပုဂံက အများကြီး ပိုများလာပါလိမ့်မယ်” ဟု ပြောသည်။

ပုဂံဒေသကိုတွေ့ရစဉ်

ပုံမှန်ကာလများတွင် ပုဂံသို့ ခရီးသွားဝင်ရောက်မှုသည် တစ်ရက်လျှင် လူဦးရေ ၁ သောင်းခန့် ဝင်ရောက်မှုရှိ ခဲ့သည့်အတွက် သင်္ကြန် ပိတ်ရက် ခရီးသွားဝင်ရောက်မှုမှာ မြင့်တက်လာနိုင်ကြောင်း၊ ပြီးခဲ့သည့် ၂၀၂၂ ခုနှစ် သင်္ကြန်ကာလတွင် ပုဂံဒေသသို့ သင်္ကြန်ရုံးပိတ်ရက်ကာလ ၉ ရက်အတွင်း ခရီးသွားဝင်ရောက်မှု ၂ သိန်းနီးပါး ရှိခဲ့ကြောင်း ဟိုတယ်နှင့်ခရီးသွားလာရေးဝန်ကြီးဌာန(ပုဂံဌာနခွဲ)မှ သိရသည်။

ပုဂံတွင် ဟိုတယ် ၁၅၄ လုံးရှိသော်လည်း လက်ရှိတွင် ကိုဗစ်စည်းကမ်း လမ်းညွှန်ချက်များနှင့်အညီ ပြန်လည် ဖွင့်လှစ်ထားသည့် ဟိုတယ် ၇၄ လုံးသာ ရှိသေးကြောင်း၊ ကျန်ရှိသည့် ဟိုတယ်များသည် ဆက်လက် ပိတ်ထားဆဲ ဖြစ်သည်ဟု ဟိုတယ်နှင့် ခရီးသွားဝန်ကြီးဌာနထံမှ သိရသည်။