CNI Sport News
၂၀၂၅ ခုနှစ်၊ အောက်တိုဘာ ၂၉
ဘိုင်ယန်မြူးနစ်အသင်း နည်းပြ ကွန်ပနီက ချယ်လ်ဆီးအသင်းကနေ အငှားနဲ့ လာရောက်ကစားနေတဲ့ တိုက်စစ်မှူး ဂျက်ဆန်ရဲ့ စွမ်းဆောင်ရည်ကို ကာကွယ်မှု ပြုလုပ်ခဲ့ပါတယ်။
ကွန်ပနီက “ကျနော်ဟာ ဂျက်ဆန်နဲ့ ပတ်သက်ပြီး ပြင်ပက အမြင်တွေနဲ့ ကွဲပြားတဲ့အမြင် ရှိပေမယ့် သူ ဂိုး အနည်းငယ် ထပ်သွင်းနိုင်ခဲ့ရင်တော့ အငြင်းပွားရမယ့် အရာတွေရှိတော့မှာ မဟုတ်ပါဘူး။ သူဟာ ကျနော်တို့ကို အများကြီး ကူညီပေးခဲ့ပြီးပြီလို့ ကျနော်ထင်ကြောင်း”ပြောခဲ့တာပါ။
ဆီနီဂေါ တိုက်စစ်မှူး ဂျက်ဆန်ဟာ ပြီးခဲ့တဲ့ နွေရာသီ အပြောင်းအရွှေ့မှာ ချယ်လ်ဆီးအသင်းကနေ အငှားနဲ့ ရောက်ရှိလာပြီးကတည်းက ဝေဖန်မှု အများအပြားနဲ့ ရင်ဆိုင်ခဲ့ရတာ ဖြစ်ပါတယ်။
ဂျက်ဆန်ဟာ ဘိုင်ယန်မြူးနစ်အသင်းအတွက် ပြိုင်ပွဲစုံ ၉ ပွဲ ပါဝင်ကစားထားပြီး ဘွန်ဒက်လီဂါပြိုင်ပွဲမှာ ဂိုးပေါက် ပျောက်ဆုံးနေပေမယ့် ချန်ပီယံလိဂ်ပြိုင်ပွဲမှာ ၂ ဂိုးသွင်းယူကာ ဂိုးဖန်တီးမှု ၁ ကြိမ် ပြုလုပ်ထားတာပါ။
ဘိုင်ယန်မြူးနစ်အသင်းဟာ လက်ရှိအချိန်မှာ ပြိုင်ပွဲစုံ ၁၃ ပွဲစလုံး အနိုင်ရထားပြီး အကောင်းဆုံးပုံစံ ရရှိနေပါတယ်။
ဂျက်ဆန်နဲ့ ကွန်ပနီကို တွေ့ရစဉ်
ဘိုင်ယန်မြူးနစ်အသင်းဟာ ဒီယက်ဇ်၊ အိုလီဆီနဲ့ ဒီရာသီဂိုး ၂၀ သွင်းယူထားတဲ့ ဟာရီကိန်းတို့ကိုသာ ပွဲထွက် လူစာရင်းမှာ ပုံမှန်အသုံးပြုတာကြောင့် ဂျက်ဆန်ဟာ ဂနာဘရီ၊ ကားလ်တို့နဲ့အတူ နေရာရဖို့ ယှဉ်ပြိုင်နေရတာပါ။
ဘိုင်ယန်မြူးနစ်အသင်းနည်းပြ ကွန်ပနီက ဘယ်သူ့မှ သူတို့ရဲ့ နေရာအတွက် အာမခံချက် မရှိဘဲ လူတိုင်းက သူတို့ရဲ့ ပွဲကစားချိန် မိနစ်တွေကို စွမ်းဆောင်ရည်နဲ့ ရယူရမှာဖြစ်တယ်လို့ ပြောခဲ့ပါတယ်။
ဘိုင်ယန်မြူးနစ်အသင်းဟာ ကိုလုံးအသင်းနဲ့ ဂျာမန်ဖလား ပွဲစဉ်ပြီးရင် လေဗာကူဆင်အသင်းနဲ့ ဘွန်ဒက်လီဂါ၊ PSG အသင်းနဲ့ ချန်ပီယံလိဂ် ပွဲကြီးပွဲကောင်း ယှဉ်ပြိုင်ရမှာဖြစ်ပါတယ်။
Source: ESPN
