CNI Sport News
၂၀၂၅ ခုနှစ်၊ အောက်တိုဘာ ၂၉
ယူနိုက်တက်အသင်းမှာ နည်းပြ အများအပြားနဲ့ လက်တွဲ အလုပ်လုပ်ခဲ့တဲ့ ရက်ရှ်ဖို့ဒ်က နည်းပြဟောင်း ဆိုးလ်ရှား လက်အောက်မှာ ကစားရတာကို သူနှစ်သက်တယ်လို့ ပြောခဲ့ပါတယ်။
ရက်ရှ်ဖို့ဒ်က “အိုလီဟာ အံ့သြစရာကောင်းတဲ့ လူပုဂ္ဂိုလ်တစ်ဦးဖြစ်ပြီး သူ့လက်အောက်မှာ ကစားရတာကို ကျနော် နှစ်သက်ပါတယ်။ ကျနော်တို့ဟာ သူ့အတွက် ကစားရတာကို နှစ်သက်ပျော်ရွှင်တယ်လို့ ကျနော် ပြောတဲ့အချိန်မှာ ယူနိုက်တက် ကစားသမား အများအပြား ကိုယ်စား ကျနော် ပြောနိုင်ပါတယ်။ အိုလီ လက်အောက်မှာ ကျနော်တို့ ဘောလုံး ကောင်းမွန်စွာ ကစားနိုင်ခဲ့ပါတယ်။ ကျနော့်အတွက် အလွန်အောင်မြင်တဲ့ ကာလဖြစ်ခဲ့ပြီး အိုလီနဲ့ ပတ်သက်ရင် ကျနော့်မှာ မကောင်းတဲ့စကား ပြောစရာမရှိပါဘူး”လို့ TV2 ကို ပြောခဲ့တာပါ။
နော်ဝေလူမျိုးနည်းပြ ဆိုးလ်ရှားဟာ အသင်းဟောင်း ယူနိုက်တက်အသင်းကို ယာယီနည်းပြအဖြစ် ကိုင်တွယ်ဖို့ ၂၀၁၈ ခုနှစ်၊ ဒီဇင်ဘာမှာ ရောက်ရှိလာခဲ့တာဖြစ်ပြီး ရလဒ်ကောင်းတွေ ရယူပေးနိုင်ခဲ့တာကြောင့် အမြဲတမ်းနည်းပြ အဖြစ် ခန့်အပ်ခံခဲ့ရပါတယ်။
ဆိုးလ်ရှားဟာ ယူနိုက်တက်အသင်းကို ချန်ပီယံလိဂ် ဝင်ခွင့်ရရှိအောင် ကိုင်တွယ်ပေးနိုင်ခဲ့သလို ယူရိုပါလိဂ် ဗိုလ်လုပွဲ ရောက်ရှိအောင် ပို့ဆောင်ပေးနိုင်ခဲ့ပေမယ့် အသင်းဟာ ဗီလာရီးရယ်လ်အသင်းကို အရေးနိမ့်ခဲ့တာ ကြောင့် ဆုဖလား မရရှိခဲ့တာပါ။
ဆိုးလ်ရှားနဲ့ ရက်ရှ်ဖို့ဒ်ကို တွေ့ရစဉ်
ဒါပေမယ့် ဆိုးလ်ရှားဟာ ယူနိုက်တက်အသင်းရဲ့ ဆိုးရွားတဲ့ ရလဒ်တွေကြောင့် ၂၀၂၁ ခုနှစ်၊ နိုဝင်ဘာမှာ နည်းပြ ရာထူးကနေ ထုတ်ပယ်ခံခဲ့ရပါတယ်။
ရက်ရှ်ဖို့ဒ်ဟာ ဆိုးလ်ရှားလက်ထက် ၂၀၁၉-၂၀ ရာသီမှာ ယူနိုက်တက်အသင်းအတွက် ၄၄ ပွဲ ကစားခဲ့ပြီး ၂၂ ဂိုး သွင်းယူကာ ခြေစွမ်းပြသနိုင်ခဲ့ပါတယ်။
ရက်ရှ်ဖို့ဒ်ရဲ့ ယူနိုက်တက်အသင်း ကစားသမားဘဝ အကောင်းဆုံး ရာသီကတော့ ဒတ်ချ်လူမျိုးနည်းပြ အဲရစ်တန်ဟတ် လက်အောက် ၂၀၂၂-၂၃ ရာသီမှာဖြစ်ပြီး ပြိုင်ပွဲစုံသွင်းဂိုး ၃၀ သွင်းယူနိုင်ခဲ့တာပါ။
ရက်ရှ်ဖို့ဒ်ဟာ လက်ရှိအချိန်မှာ ဘာစီလိုနာအသင်းထံ အငှားနဲ့ လာရောက်ကစားပြီး ခြေစွမ်းပြသနေကာ အသင်းအတွက် ပါဝင်ကစားထားတဲ့ ၁၃ ပွဲမှာ ၅ ဂိုးသွင်းပြီး ဂိုးဖန်တီးမှု ၇ ကြိမ် ပြုလုပ်ထားတာ ဖြစ်ပါတယ်။
Source: dailymail
