CNI Sport News
၂၀၂၄ ခုနှစ်၊ စက်တင်ဘာ ၂၇
ယူနိုက်တက်အသင်းရဲ့ ကစားသမားဟောင်းနဲ့ နည်းပြဟောင်းဖြစ်သူ ဆိုးလ်ရှားက အသင်းဘက်ကသာ သူ့ကို ပြန်လာဖို့ တောင်းဆိုခဲ့မယ်ဆိုရင် ပြန်လာချင်တယ်လို့ ဝန်ခံခဲ့ပါတယ်။
ဆိုးလ်ရှားက “ယူနိုက်တက်ကသာ ကျနော့်ကို ပြန်လာစေချင်တယ်ဆိုရင် ကျနော် ခေါင်းညိတ်မှာပါ။ နည်းပြရှိပြီး သား အလုပ်တွေအကြောင်းကို ပြောရတာဟာ မှားယွင်းတယ်လို့ ခံစားရပေမယ့် ယူနိုက်တက်အသင်းဆိုရင်တော့ ပြန်သွားချင်တယ်လို့ပဲ ပြောရမှာပါ”လို့ Oslo Business Forum မှာပြုလုပ်ခဲ့တဲ့ အမေးအဖြေအစီအစဉ်မှာ ပြောခဲ့ တာပါ။
အသက် ၅၁ နှစ်အရွယ်ရှိ ဆိုးလ်ရှားဟာ ယူနိုက်တက်အသင်းကနေ ထုတ်ပယ်ခံခဲ့ရတဲ့ ၂၀၂၁ ခုနှစ်၊ နိုဝင်ဘာလ ကတည်းကနေ အခုအချိန်ထိ ဘယ်အသင်းကိုမှ ကိုင်တွယ်ရခြင်းမရှိသေးတာ ဖြစ်ပါတယ်။
ယူနိုက်တက်အသင်း ကစားသမားဘဝမှာ အောင်မြင်မှု အများအပြား ရယူနိုင်ခဲ့တဲ့ ဆိုးလ်ရှားဟာ ၂၀၁၈ ခုနှစ်၊ ဒီဇင်ဘာလမှာ နည်းပြဟောင်း မော်ရင်ဟိုရဲ့နေရာကို အစားထိုးဝင်ရောက်ပြီး အသင်းကို ၃ နှစ်နီးပါးကြာ ကိုင်တွယ်ခဲ့တာပါ။
ဆိုးလ်ရှားဟာ ယူနိုက်တက်အသင်းကို ကိုင်တွယ်ခဲ့တာမှာ ဆုဖလား အောင်မြင်မှု မရရှိခဲ့ဘဲ အမြင့်ဆုံးအောင်မြင်မှု အဖြစ် ပရီးမီးယားလိဂ်ပြိုင်ပွဲမှာ အဆင့် ၂ နဲ့ ယူရိုပါလိဂ်ဗိုလ်လုပွဲ ရောက်ရှိခဲ့တာဖြစ်ပါတယ်။
ယူနိုက်တက်အသင်း နည်းပြလုပ်ခဲ့တုန်းက ဆိုးလ်ရှားကိုတွေ့ရစဉ်
ယူနိုက်တက်အသင်းဟာ ၂၀၂၁ ခုနှစ်ကုန်ပိုင်းမှာ ရှုံးပွဲဆက်ပြီး ရလဒ်တွေ ဆိုးရွားခဲ့တာကြောင့် ဆိုးလ်ရှားကို နည်းပြ ရာထူးကနေ ထုတ်ပယ်ခဲ့တာပါ။
လက်ရှိ ယူနိုက်တက်အသင်းနည်းပြ အဲရစ်တန်ဟတ်ဟာ ဒီရာသီအသင်းကို ၈ ပွဲ ကိုင်တွယ်အပြီးမှာ နိုင်ပွဲ ၃ ပွဲသာ ရယူပေးထားတာကြောင့် ဖိအားအချို့ခံစားနေရချိန်မှာ ဆိုးလ်ရှားက အသင်းဟောင်းထံ ပြန်လာဖို့ကို ငြင်းဆန် ခဲ့ခြင်းမရှိတာ ဖြစ်ပါတယ်။
ဆိုးလ်ရှားဟာ ယူနိုက်တက်အသင်းကနေ ထွက်ခွာအပြီးမှာ နိုင်ငံအသင်း နည်းပြရာထူး အပါအဝင် ကမ်းလှမ်းမှု အများအပြားကို ရခဲ့ပေမယ့် ကိုင်တွယ်ခဲ့ခြင်းမရှိပါဘူး။
UEFA မှာ နည်းစနစ် လေ့လာသူအဖြစ် ဆောင်ရွက်နေတဲ့ ဆိုးလ်ရှားဟာ နော်ဝေလက်ရွေးစင်အသင်းကို နည်းပြ အဖြစ် ကိုင်တွယ်ဖို့လည်း ဆန္ဒရှိနေတာပါ။
နော်ဝေအသင်းရဲ့ လက်ရှိနည်းပြ ဆိုလ်ဘက်ကန်ဟာ ၂၀၂၆ ကမ္ဘာ့ဖလားပြိုင်ပွဲအပြီးမှာ ထွက်ခွာနိုင်တာကြောင့် ဆိုးလ်ရှားဟာ ဒီအချိန်မှာ နိုင်ငံအသင်းရဲ့ နည်းပြအဖြစ် ဆောင်ရွက်ဖို့ ပျော်ရွှင်စွာ ဆွေးနွေးသွားမယ်လို့ ပြောခဲ့တာ ဖြစ်ပါတယ်။
Source: ESPN
