CNI International News

ဘေဂျင်း၊ ဒီဇင်ဘာ ၂၉

တရုတ်အစိုးရသည်ခရီးသွားပတ်စ်ပို့များကိုပြန်လည်ထုတ်ပေးတော့မည်ဟု AP သတင်းတွင် ဖော်ပြသည်။ ယင်းက ကိုဗစ်တားဆီးရေးထိန်းချုပ်မှုများကို ဖြေလျော့မှုဆိုင်ရာ ကြီးမားသည့် ခြေလှမ်းအသစ်တစ်ခုဖြစ်ပြီး လာမည့်လ နှစ်ကူးအချိန်တွင် နိုင်ငံခြားထွက်မည့် တရုတ်ခရီးသွားအရေအတွက်လည်း မြင့်တက်လာဖွယ်ရှိနေသည်။

အင်္ဂါနေ့ကြေညာချက်က ကျဆင်းနေသော စီးပွားရေးအခြေအနေကို ပြန်လည်ဦးမော့လာစေရန် ကြိုးပမ်းမှုလည်း ဖြစ်သည်။ တရုတ်အစိုးသည် နိုင်ငံတွင်း ကိုဗစ်ရောဂါပျံ့နှံ့နေခြင်းကို တာဆီးရန် ကမ္ဘာပေါ်တွင် အတင်းကြပ်ဆုံး ထိန်းချုပ်ရေး စည်းမျဉ်းများကို ချမှတ်ခဲ့သည်။

ထိုထိန်းချုပ်မှုများကြောင့် ကိုဗစ်ကူးစက်နှုန်းမှာ လျော့ကျခဲ့သော်ငြားလည်း ပြည်သူများမှ ၎င်းတို့နေအိမ်များ တွင်သာ ကာလရှည်ပိတ်လှောင်ခံထားရခြင်းကြောင့် အမျက်ဒေါသထွက်ခဲ့ကြပြီး နိုင်ငံ၏စီးပွားရေးဖွံ့ဖြိုး တိုးတက်မှုကိုလည်း ထိခိုက်ခဲ့သည်။ ယခုကဲ့သို့ ပတ်စ်ပို့ဆိုင်ရာ ဖြေလျော့မှုကြောင့် ဇန်နဝါရီ ၂၂ ရက်တွင် စတင်မည့် နှစ်ကူးကာလတွင် တရုတ်ခရီးသွားများ၊ အာရှနှင့် ဥရောပဒေသများသို့ ခရီးသွားများ မြင့်တက်လာဖို့ ရှိနေသည်။ သို့သော် လက်ရှိတရုတ်နိုင်ငံအတွင်း ကိုဗစ်ကူးစက်မှုများ မြင့်တက်နေခြင်းကြောင့် ခရီးသွားများသည် ရောဂါပျံ့နှံ့စေမည်ကိုလည်း စိုးရိမ်မှုများရှိနေသည်။

တရုတ်နိုင်ငံအလယ်ပိုင်း ဂျန်ဇီ ပြည်နယ်ရှိ လေဆိပ်တွင် နိုဝင်ဘာ ၁ ရက်နေ့က ခရီးသည်များကို တွေ့ရစဉ် (ဓါတ်ပုံ-အေပီ)

အင်္ဂါနေ့ကြေညာချက်ကြောင့် နိုင်ငံတကာလက်မှတ်များကို ဘွတ်ကင်လုပ်ခြင်းနှင့် ဗီဇာဆိုင်ရာ အချက်အလက် များကို ရှာဖွေခြင်းတို့မှာ ငါးဆမှ ရှစ်ဆအထိမြင့်တက်လာသည်ဟု ခရီးသွားဝန်ဆောင်မှုကုမ္ပဏီနှစ်ခုက ပြောသည်။

တရုတ်ခရီးသွားများ အများဆုံးသဘောကျကြသည်မှာ ဂျပန်၊ ထိုင်း၊ တောင်ကိုရီးယား၊ အမေရိကန်၊ ဗြိတိန်နှင့် သြစတြေးလျတို့ဖြစ်သည်။ သို့သော် ဂျပန်၊ အိန္ဒိယ၊ တောင်ကိုရီးယားနှင့်ထိုင်ဝမ်တို့သည် တရုတ်တွင် ဗိုင်းရပ်စ် ကူးစက်မှုနှုန်းပြန်လည်မြင့်တက်နေခြင်းကို တုန့်ပြန်ရန် တရုတ်နိုင်ငံမှလာသော ဧည့်သည်များကို ရောဂါ စမ်းသပ်မှုများ လုပ်ဆောင်သွားမည်ဟု ဆိုသည်။ တရုတ်အစိုးရသည် ကိုဗစ်ရောဂါ စတင်ပြန့်ပွားလာသည့် ၂၀၂၀ ခုနှစ် အစပိုင်းကတည်းက နိုင်ငံခြားသားများအတွက် ဗီဇာထုတ်ပေးခြင်းနှင့် နိုင်ငံသားများအတွက် ပတ်စ်ပို့ ထုတ်ပေးခြင်းတို့ကို ရပ်တန့်လိုက်သည်။

နိုင်ငံခြားသွားမည့် ခရီးသွားများအတွက် လျှောက်လွှာများကို ဇန်နဝါရီ ၈ ရက်တွင် စတင်လက်ခံသွားမည်ဟု တရုတ်အမျိုးသားလူဝင်မှုကြီးကြပ်ရေးအေဂျင်စီက ပြောသည်။ ဗီဇာသက်တမ်းတိုးခြင်း၊ အသစ်ပြန်လုပ်ခြင်း သို့မဟုတ် ပြန်ထုတ်ခြင်းများကိုလည်းဆောင်ရွက်သွားမည်ဟု အေဂျင်စီကပြောသော်လည်း မည်သည့်အချိန်တွင် စတင်မည်ကိုတော့ မပြောထားပေ။ ဒါ့အပြင် နိုင်ငံခြားသားဧည့်သည်များကိုလည်း ပြန်လည်လက်ခံသွားမည်ဟု သိရသော်လည်း မည်သည့်အချိန်တွင် စတင်မည်ကို မသိရသေးပေ။

ယခုကဲ့သို့ပြောင်းလဲမှုများက နယ်စပ်ဖြတ် ကျော်ခရီးသွားလာမှုများအတွက် ပိုကောင်းသောအခြေအနေကို ဖန်တီးပေးကာ ကမ္ဘာလုံးဆိုင်ရာ စီးပွားရေးတိုးတက်မှုအတွက် ပိုမိုအကျိုးအမြတ်ဖြစ်ထွန်းစေလိမ့်မည်ဟုလည်း တရုတ်နိုင်ငံခြားရေးဌာန ပြောခွင့်ရပုဂ္ဂိုလ် ဝမ်ဝန်ဘင်း (Wang Wenbin) က ပြောသည်။

Source:AP

CNI News

၂၀၂၂ ခုနှစ်၊ ဒီဇင်ဘာ ၂၇

မြန်မာနိုင်ငံသို့ ယခုနှစ်အတွင်း ပြည်ပခရီးသွားဝင်ရောက်မှုတွင် တရုတ်နိုင်ငံထက် ထိုင်းနိုင်ငံမှ လာရောက်သည့် ခရီးသွား အများဆုံးဖြစ်ကြောင်း မြန်မာနိုင်ငံ ခရီးသွားလုပ်ငန်းရှင်များအသင်းမှ ဥက္ကဋ္ဌ ဦးနောင်းနောင်းဟန်က CNI သတင်းဌာနသို့ ပြောသည်။

ထိုင်းနိုင်ငံသားများသည် ပြီးခဲ့သည့် အောက်တိုဘာလမှစတင်ကာ အများအပြား ဝင်ရောက်ခဲ့ခြင်းဖြစ်ပြီး ယခုနှစ် အတွက် ထိုင်းနိုင်ငံသား ခရီးသွားများ သောင်းကဏန်းခန့် ဝင်ရောက်ခဲ့ကြောင်း မြန်မာနိုင်ငံ ခရီးသွားလုပ်ငန်းရှင် များအသင်းမှ ဥက္ကဋ္ဌ ဦးနောင်းနောင်းဟန်က CNI သတင်းဌာနသို့ ပြောသည်။

ပြည်ပ ခရီးသွားများကိုတွေ့ရစဉ်

၎င်းက “လက်ရှိ အများဆုံးကတော့ ထိုင်းနိုင်ငံကနေလာတဲ့ ခရီးသွားတွေက အများဆုံးပါပဲ။ ဒီခရီးသွား လုပ်ငန်း တွေ ပြန်စတဲ့အခါကြတော့ တရုတ်နိုင်ငံနဲ့ လေကြောင်းပျံသန်းမှုက တိုက်ရိုက်ပျံသန်းမှုတွေက နည်းသွားတယ်။ ယခင်လို မရှိတော့ဘူး။ အခုလည်း တစ်ခုလောက်ပဲ ရှိတော့တယ်။ ကွမ်ကျိုးတို့ ဘာတို့လောက်ပဲ ရှိတော့တယ် ဆိုတော့လေ။ အဲဒါကြောင့်မို့လို့။ ဒါပေမယ့် ထိုင်းနိုင်ငံနဲ့ကြတော့ တစ်နေ့ကို လေကြောင်းပျံသန်းမှုက ၈ ကြိမ်၊ ၉ ကြိမ်လောက် အနည်းဆုံး ရှိနေတာကို။ ထိုင်းနိုင်ငံသားတွေက မြန်မာနိုင်ငံမှာ ရက်တို ခရီးစဉ်တွေပဲ များပါတယ်။ ရန်ကုန်ကို ဝင်လာတယ်။ ရန်ကုန်ကနေ ပဲခူး၊ ကျိုက်ထီးရိုး အဲဒီလောက်အထိပဲ သွားကြတာများပါတယ်။ ၂ ညအိပ် ၃ ရက်၊ ၃ ညအိပ် ၄ ရက် ခရီးစဉ်တွေပဲ များပါတယ်။ ထိုင်းနိုင်ငံတွေကတော့ ဘာသာရေးရော၊ လူနေမှု ပုံစံကအစ တူတဲ့အတွက် ရန်ကုန်မြို့မှာရှိတဲ့ ရွှေတိဂုံဘုရားတို့၊ နောက်တစ်ခါ ဗိုလ်တစ်ထောင် အဲဒီဘုရားတွေကို အဓိကထား ပြီးတော့ လည်ပတ်ကြတာ၊ ဘုရားဖူးကြတာများတယ်။ နောက်တစ်ခါ ပဲခူးမှာရှိတဲ့ ဘုရားတွေရော၊ ကျိုက်ထီးရိုး ဘုရားရောပေါ့။ အဲဒါတွေကို လည်ပတ်ကြတာများပါတယ်။ ထိုင်းနိုင်ငံသားတွေ အနေနဲ့ကတော့ ဒီနေရာတွေကိုက လည်ပတ်သင့်တဲ့ နေရာပေါ့နော်။ သူတို့နိုင်ငံသားတွေအနေနဲ့ တစ်သက်တာမှာ တစ်ခါ ရောက်ဖူးသင့်တဲ့ နေရာထဲ မှာ သတ်မှတ်ထားကြတယ်ပေါ့လေ” ဟု ပြောသည်။

ကိုဗစ်မတိုင်ခင် ကာလတွင် တရုတ်နိုင်ငံမှ ခရီးသွားသည် အများဆုံးဖြစ်ခဲ့သော်လည်း ယခုနှစ်တွင် မြန်မာနိုင်ငံသို့ အပန်းဖြေ လာရောက်သည့် တရုတ်ခရီးသွားများမှာ နည်းပါးသွားပြီး စီးပွားရေးအရ လာရောက်ကြသူတို့သာ များပြားခဲ့ကြောင်း သိရသည်။

ယခု ၂၀၂၂ ခုနှစ်သည် ပြီးခဲ့သည့် ၂၀၂၁ ခုနှစ်နှင့် နှိုင်းယှဉ်ပါက ပြည်တွင်းခရီးသွား လာမှုသည် အနည်းဆုံး နှစ်ဆခန့် သိသိသာသာ တိုးတက်များပြား လာသကဲ့သို့ ပြည်ပခရီးသွား ဝင်ရောက်မှုသည်လည်း ကိုဗစ်ကာလ အလွန်အတွက် တိုးတက်ကောင်းမွန်သည့် အနေအထားတစ်ခု ဖြစ်ကြောင်းလည်း ခရီးသွားလုပ်ငန်းရှင်များနှင့် ဟိုတယ်လုပ်ငန်းရှင်များက သုံးသပ်ကြသည်။

လာမည့် ၂၀၂၃ ခုနှစ်တွင် ပြည်ပခရီးသွားများသည် ယခုထက် ပိုမိုဝင်ရောက်လာမည်ဟု မျှော်လင့်ထားကြသည့် အတွက် ပြည်တွင်းတွင် လုံခြုံရေး၊ လျှပ်စစ်မီး ရရှိမှုတို့အပြင် အထင်ကရ နေရာများတွင် ခရီးသွားများအား ဈေး အတင်းအကြပ် လုရောင်းခြင်းများအား ကြပ်မတ်သင့်ကြောင်း ခရီးသွားလုပ်ငန်းရှင်များနှင့် ဟိုတယ် လုပ်ငန်းရှင် များက အကြံပြုသည်။

ကျိုက်ထီးရိုးဘုရားကိုတွေ့ရစဉ်

မြန်မာနိုင်ငံ ဟိုတယ်ဆိုင်ရာ လုပ်ငန်းရှင်များအသင်း (ပုဂံဟိုတယ်ဇုန်) ဥက္ကဋ္ဌ ဦးဇော်ဝိတ် က “23(၂၀၂၃)အတွက် ကျတော့ အန်ကယ်တို့လည်း မျှော်လင့်နေတာပေါ့။ လာမလာတော့ မပြောတတ်ဘူး။ လာမယ်လို့လည်း မျှော်လင့် ထားပါတယ်။ တရုတ်တို့ ရုရှားတို့။ ဒါပေမယ့် နိုင်ငံရေးတို့၊ လျှပ်စစ်မီး အနေအထားတို့က အန်ကယ်တို့လည်း ဘာမှ ပြောလို့မရဘူး ဖြစ်နေတယ်။ အဆိုးဆုံးကတော့ လျှပ်စစ်မီးကလည်း ဆိုးတယ်ပေါ့။ လုံခြုံရေးရယ်၊ လျှပ်စစ် မီးရယ်။ West Market ထက် East Market ကိုတော့ လာမယ့်နှစ်မှာ ပိုများလာမယ်လို့တော့ မျှော်လင့်ပါတယ်။ တကယ့် အခြေအနေ အန်ကယ်တို့နိုင်ငံရဲ့ infrastructure တွေ အဲဒါ အဆင်ပြေဖို့ပဲ လိုပါတယ်။ မဟုတ်ရင်တော့ ဧည့်သည်က ဝင်ရောက်ပါ့မလား။ လျှပ်စစ်မီးမရဘဲနဲ့ ဘာဧည့်သည်မှ ပရိုမိုးရှင်းလုပ်လို့ မရဘူး။ လျှပ်စစ်မီး မရရင် ဒီဇယ်ဆီတွေ သုံးရတော့မယ်။ ဒီဇယ်ဆီက မကျဘူးဆိုရင် ဘယ်လိုလုပ် ပရိုမိုးရှင်းသွား လုပ်လို့ရမှာလဲ။ မဖြစ်နိုင် တဲ့ ကိစ္စတွေ။ နံပါတ်တစ်က လုံခြုံရေး ကောင်းဖို့ပဲ လိုတာပါ။ နံပါတ်နှစ် လျှပ်စစ်မီး ရရမယ်။ လုံခြုံရေးလည်း မကောင်းဘူး။ လျှပ်စစ်မီးကလည်း မရဘူး။ ဆီဈေးကလည်း ဒီအတိုင်းပဲ တက်နေတယ်ဆိုရင် ဘယ်လိုလုပ် ဖြစ် တော့မလဲ” ဟု CNI သတင်းဌာနသို့ ပြောသည်။

လာမည့် ၂၀၂၃ ခုနှစ်တွင် ပြည်ပခရီးသွားများ ယခုနှစ်ထက် ပိုမိုဝင်ရောက်လာစေရန် နိုင်ငံတကာတွင် ပြုလုပ် သည့် ခရီးသွားပြပွဲအချို့သို့ မြန်မာနိုင်ငံမှ ခရီးသွားကုမ္ပဏီများက သွားရောက်ပြသရန် ပြင်ဆင်နေသည်။

ထို့ကြောင့် လာမည့် ဇန်နဝါရီ၊ ဖေဖော်ဝါရီ၊ မတ်လ စသည့် သုံးလအတွင်း ပြည်ပခရီးသွား ဈေးကွက်အဖြစ် တရုတ်၊ ရုရှားနှင့်၊ အနောက်နိုင်ငံများမှ လူငယ်လူရွယ်များ ဝင်ရောက်လာမည်ဟု မြန်မာနိုင်ငံ ခရီးသွား လုပ်ငန်းရှင်များ အသင်းက ခန့်မှန်းထားသည်။

တရုတ်နှင့် ရုရှား ခရီးသွားများ လာမည့် ၂၀၂၃ ခုနှစ်တွင် မြန်မာနိုင်ငံသို့ ဝင်ရောက်လာမည်ဟု ခန့်မှန်းထားကြခြင်း မှာ မကြာခင်တွင် လေကြောင်းလိုင်း တိုက်ရိုက် ပျံသန်းပြေးဆွဲမှုများ ပြုလုပ်ကြတော့မည့် အတွက်ကြောင့် ဖြစ် သည်ဟု သိရသည်။

CNI News

၂၀၂၂ ခုနှစ်၊ နိုဝင်ဘာ ၉

မြန်မာနိုင်ငံသို့ ပြည်ပ ခရီးသွားဝင်ရောက်မှုသည် ယခင်လများနှင့် နှိုင်းယှဉ်ပါက ယခု နိုဝင်ဘာလဆန်း တန်ဆောင်တိုင် ပိတ်ရက်တွင် ပြန်မြင့်တက်လာကြောင်း မြန်မာနိုင်ငံ ခရီးသွားလုပ်ငန်းရှင်များအသင်းမှ CNI သတင်းဌာနသို့ ပြောသည်။

ထိုသို့ ပြည်ပခရီးသွား ဝင်ရောက်မှု မြင့်တက်လာခြင်းသည် ခရီးသွားကဏ္ဍ ပြန်လည်အားယူနေသည့် လက်ရှိ ကာလအတွက် အရှိန်ကောင်း တစ်ခုဖြစ်သည်ဟု မြန်မာနိုင်ငံခရီးသွား လုပ်ငန်းရှင်များအသင်းမှ ဥက္ကဋ္ဌ ဦးနောင်းနောင်းဟန်က CNI သတင်းဌာနသို့ ပြောသည်။

၎င်းက “ပြည်ပခရီးသည်တွေ ဝင်ရောက်မှုက နိုဝင်ဘာလဆန်းမှာ ပြန်ပြီးတက်လာတယ် ပြောလို့ရတယ်။ ပြည်တွင်းက ခရီးစဉ်တွေနဲ့ package tour တွေနဲ့ စီစဉ်မှုလေးတွေ နည်းနည်းပြန်ပြီး ဝင်ရောက်လာပါတယ်။ အများကြီးတော့ အရင်ကလို အုပ်စုလိုက်ကြီးတွေ လာရောက်မှုမျိုးတော့ မရှိပေမယ့် ဝင်ရောက်မှုတွေ ပြန်ဖြစ် လာပါတယ်။ နောက်တစ်ခါ ထိုင်းနိုင်ငံက ခရီးသည်တချို့လည်း ပြန်ပြီး အိမ်နီးချင်းပေါ့။ အာဆီယံရော၊ ထိုင်းနိုင်ငံ ရော အုပ်စု အသေးလေးတွေလည်း ပြန်လည် ဝင်ရောက်လာတဲ့အတွက် ပြည်ပ ခရီးသွားတွေ ဝင်ရောက်မှုက နည်းနည်း ပိုပြီးတော့ အဆင်ပြေလာတယ်လို့ ပြောလို့ရပါတယ်။ ပြီးခဲ့တဲ့ လတွေမှာ အောက်တိုဘာလတွေမှာ သီတင်းကျွတ် ကျောင်းပိတ်ရက်တွေမှာ ပြည်တွင်း ခရီးသွားတွေ တောက်လျှောက်တက်ခဲ့တယ်။ ဒါပေမယ့် ပြည်တွင်းကို ဝင်လာတဲ့ ပြည်ပခရီးသွားတွေက နိုင်ငံခြားသား Tourist တွေ ဝင်ရောက်မှုကတော့ အောက်တိုဘာ လမှာ နည်းခဲ့တယ်။ လဆန်းပိုင်းလောက်မှာ ထိုင်းနိုင်ငံက တက်လိုက်တယ်။ နောက်ပိုင်းမှာ လအလယ်လောက်မှာ ပြန်ကျသွားပြီးတော့ အောက်တိုဘာလအတွင်းမှာ ခရီးသည်ဝင်ရောက်မှု တော်တော်လေး နည်းသွားတယ်။ အခု ဒီလထဲမှာတော့ ပြည်တွင်း ခရီးသွားတွေလည်း များတယ်။ ပြည်ပခရီးသွား ဝင်ရောက်မှုတွေလည်း မြင့်တက်လာတယ်ပေါ့။ ခရီး သွား ကုမ္ပဏီအချို့မှာလည်း ခရီးစဉ်တွေ ရောင်းချမှုတွေ၊ ပြည်ပခရီးသွား ကုမ္ပဏီတွေနဲ့ ချိတ်ဆက်ပြီးတော့ package tour ရောင်းချမှုတွေကလည်း မြင့်တက်လာပါတယ်။ ပြည်ပ ခရီးသွား ဝင်ရောက်မှု မြင့်တက်လာတာ ကတော့ အသေအချာပါပဲ” ဟု ပြောသည်။

ပြင်ဦးလွင် ပိတ်ချင်းမြောင်တွင် ခရီးသွားများကိုတွေ့ရစဉ်

လက်ရှိ ဝင်ရောက်လာသည့် ပြည်ပခရီးသွားများထဲတွင် အနောက်နိုင်ငံများမှ ခရီးသွားများထက် အိမ်နီးချင်းနိုင်ငံ များက လာရောက်မှု များပြားကြောင်း၊ ထိုအထဲတွင် ထိုင်းနိုင်ငံမှ ခရီးသွား ပိုများကြောင်း သိရသည်။

တန်ဆောင်တိုင်(နိုဝင်ဘာလ) ပိတ်ရက်သည် ပြီးခဲ့သည့် သီတင်းကျွတ် ပိတ်ရက်များနှင့် နှိုင်းယှဉ်ပါက ပြည်ပ ခရီးသွား မြင့်တက် လာသကဲ့သို့ ပြည်တွင်း ခရီးသွားများလည်း ပိုမိုများပြားလာကြောင်း သိရသည်။

ယခု နိုဝင်ဘာလဆန်း တန်ဆောင်တိုင် ပိတ်ရက်တွင် ပြည်ပခရီးသွား ဝင်ရောက်မှု မြင့်တက်လာသော်လည်း ယခင်လများနှင့်နှိုင်းယှဉ်ပါက ရာဂဏန်းခန့်သာ တိုးလာခြင်းဖြစ်ကြောင်း ရှမ်းပြည်နယ် ဟိုတယ်နှင့် ခရီးသွား လာရေး ညွှန်ကြားမှုဦးစီးဌာနမှ ဒုတိယညွှန်ကြားရေးမှူး ဦးစည်သူကျော်က CNI သတင်းဌာနသို့ ပြောသည်။

၎င်းက “ကျနော်တို့ ရှမ်းပြည်နယ် တောင်ပိုင်းပေါ့၊ တောင်ကြီးနဲ့ ကလောဘက်မှာတော့ ဟိုတယ်အားလုံး အပြည့် နီးပါးလောက် ဧည့်သည် ဝင်ရောက်တာကို တွေ့ရပါတယ်။ စက်တင်ဘာလ ကုန်ပြီးကတည်းက စပြီးတော့ ပြောရ ရင် ခရီးသွားရာသီ ဆိုတာက အောက်တိုဘာဆိုရင် စတာပေါ့။ ကျနော်တို့ စက်တင်ဘာမှာဆိုရင် ဧည့်သည်က ရှမ်းပြည်နယ် တောင်ကြီးမှာ ဆိုရင် ၃ သောင်းလောက်ပဲ ဝင်ခဲ့တာပေါ့။ ဒီအောက်တိုဘာမှာဆိုရင် ၅ သောင်း ၃ ထောင်လောက်ကို ဝင်သွားတယ်ဆိုတော့ ဧည့်သည်ကတော့ သိသိသာသာ တက်သွားတာပေါ့။ နိုဝင်ဘာမှာလည်း အလားတူပါပဲ။ တန်ဆောင်တိုင် ပိတ်ရက်လည်း ဖြစ်သွားတဲ့အခါကျတော့ ဧည့်သည် အပြည့် နီးပါးလောက် လက်ခံ ရရှိတာကို တွေ့ရပါတယ်။ ပြည်ပခရီးသွားကတော့ နည်းသေးတာပေါ့နော်။ တိုးလာတယ် ဆိုပေမယ့် လည်း သူက ရာဂဏန်းပဲ ရှိသေးတာ။ ရာဂဏန်းဆိုတာကလည်း ၃၀၀ ပတ်ချာလည် လောက်ပေါ့။ ရှမ်းပြည်နယ် တောင်ပိုင်းဆိုရင် ၃၀၀ နီးပါး အဲဒီလို ရာဂဏန်းလောက်ပဲ ဝင်တာတွေ့ရတယ်။ ဒါပေမယ့် သိသိသာသာတော့ တက်တော့ တက်လာတယ်ပေါ့။ တိုးလာတာတော့ မှန်တယ်။ သို့သော် ရာဂဏန်း လောက်ပဲရှိသေးတယ်”ဟု ပြော သည်။

၂၀၂၂ ခုနှစ်၊ နို၀င်ဘာ ၆ ရက်နေ့က ပြင်ဦးလွင် တန်ဆောင်တိုင် ပွဲတော် ကျင်းပနေစဉ်

တန်ဆောင်တိုင် ပိတ်ရက်တွင် သီတင်းကျွတ်ကာလ ကျိုက်ထီးရိုး ဖြစ်စဉ်ကဲ့သို့ ဖြစ်စဉ်မျိုး မဖြစ်ပွားခဲ့သည့် အတွက် လာမည့် ဒီဇင်ဘာလ ခရစ္စမတ်ပိတ်ရက်နှင့် နှစ်သစ်ကူး ရုံးပိတ်ရက်တို့တွင် ပြည်တွင်း၊ ပြည်ပ ခရီးသွား ဝင်ရောက်မှု ပိုများလာနိုင်ကြောင်း ခရီးသွားလုပ်ငန်းရှင်များက သုံးသပ်သည်။

ပြည်တွင်း ခရီးသွားများတွင် ခရီးသွား လုပ်ငန်းများဖြင့် ခရီးသွားခြင်းသည် ယခင်လများ၌ မရှိသလောက် ဖြစ်ခဲ့ ကြောင်း၊ သို့သော် သီတင်းကျွတ် ပိတ်ရက်မှာတော့ အဖွဲ့လိုက် ခရီးသွားကြမှုများ ရှိလာသည့်အတွက် ပြည်တွင်း ခရီးသွား လုပ်ငန်းများ စတင်လည်ပတ်လာခဲ့ကြောင်း၊ တန်ဆောင်တိုင် ပိတ်ရက်တွင်လည်း ထို့အတူပင် ဖြစ် ကြောင်း သိရသည်။

ထို့ကြောင့် ယခုထက်ပို၍ ပြည်တွင်း၊ ပြည်ပ ခရီးသွားဝင်ရောက်မှု ပိုများလာမည်ဆိုပါက ကိုဗစ်ကာလ၌ ထိခိုက်ခဲ့ သည့် ခရီးသွားကဏ္ဍသည် ပြန်လည် လည်ပတ်လာနိုင်မည်ဖြစ်ကြောင်း ခရီးသွားလုပ်ငန်းရှင်များက သုံးသပ်သည်။

CNI News

၂၀၂၂ ခုနှစ်၊ အောက်တိုဘာ ၂၈

ပြီးခဲ့သည့် သီတင်းကျွတ်ကာလ အောက်တိုဘာ ၁၂ ရက်နေ့တွင်ဖြစ်ပွားခဲ့သည့် ကျိုက်ထီးရိုးဖြစ်စဉ်ကြောင့် လာမည့် တန်ဆောင်တိုင်ပိတ်ရက်ကာလတွင် ဘုရားဖူးခရီးသွားများထက် အပန်းဖြေခရီးသွားများမည့်သူ ပိုများလာနိုင်ကြောင်း ဟိုတယ်ခရီးသွားနှင့် ခရီးသွားလုပ်ငန်းရှင်များက CNI သတင်းဌာနသို့ ပြောသည်။

ထို့အပြင် တန်ဆောင်တိုင်ပိတ်ရက်တွင် ပြည်တွင်းခရီးသွားလာမှုသည် ပြီးခဲ့သည့် သီတင်းကျွတ်ပိတ်ရက် ပြည်တွင်းခရီးသွားလာမှုထက် များနိုင်ကြောင်းလည်း ဟိုတယ်ခရီးသွားနှင့် ခရီးသွားလုပ်ငန်းရှင်များက သုံးသပ်ကြသည်။

မြန်မာနိုင်ငံခရီးသွားလုပ်ငန်းရှင်များအသင်း ဥက္ကဋ္ဌ ဦးနောင်းနောင်းဟန်က “အခုကျတော့ သွားလို့ရမယ့် နေရာတွေက နည်းသွားတယ်။ လုံခြုံရေးနဲ့ ရပ်ရွာဒေသမှာ မတည်ငြိမ်မှုတွေကြောင့်မို့လို့ နည်းတယ်။ နည်းတဲ့ အခါကျတော့ သွားလို့ရတဲ့နေရာတွေကို စုပြုံသွားနေရတာဖြစ်တယ်။ သွားလို့ရတဲ့ နေရာနည်းတော့ ရတဲ့နေရာ ကိုပဲ စုပြုံပြီးသွားကြရတော့ ချောင်းသား၊ ငွေဆောင်တွေ ငပလီဆိုတဲ့ နေရာတွေမှာကတော့ အပြည့်နီးပါး ပါပဲ ခရီးသည်တွေကလေ။ ရှမ်းပြည်ဘက်ဆိုရင်လည်း ကလော၊ တောင်ကြီးဘက်ကို သွားကြတာတွေ များတယ်။ ဒီ တန်ဆောင်တိုင်ပိတ်ရက်က များပါမယ်။ ဒီ ကျိုက်ထီးရိုးမှာဖြစ်တဲ့အဖြစ်ကြောင့် ခရီးသွားမယ့်လူတွေ နည်းနည်း ကြောက်ရွံ့သွားတာရှိတယ်။ အဲဒါကြောင့် လူအရမ်းများတဲ့ နေရာတွေတော့ ရှောင်သွားလိမ့်မယ်ထင်တယ်။ ကမ်းခြေဒေသတွေကတော့ ပိုပြီးတော့ များပါလိမ့်မယ်။ ဒီဘုရားဖူးတဲ့နေရာတွေတော့ နည်းနည်း နည်းသွားမလား မသိဘူး။ ယခင် သီတင်းကျွတ်လပြည့်လောက်တော့ များပါ့မလားတောင် မသိဘူး။ ကျနော်တော့ နည်းနည်း စိုးရိမ်တယ်။ ကမ်းခြေဒေသတွေကတော့ ပိုများပါတယ်။ နောက်တစ်ခါ တနင်္သာရီတိုင်း ဘက်မှာရှိနေတဲ့ မြိတ်တို့ ကော့သောင်းတို့ အဲဒီဘက်တွေကိုလည်း လေယာဉ်ပျံနဲ့ ဒီကနေ သွားရောက်ပြီး ကျွန်းတွေကို။ ရန်ကုန်ကနေ မြိတ်ကိုသွားမယ်၊ ပြီးရင် ကော့သောင်းသွားမယ်၊ ပြီးသွားရင် အဲဒီဘက်မှာ ကျွန်းတွေကို သွားရောက်လည်ပတ်မယ့် ပြည်တွင်းခရီးစဉ်တွေပေါ့။ အဲဒါတွေလည်း ရောင်းရတယ်လို့ ကျနော်တို့ကြားရပါတယ်။ တော်တော်လေးလေ” ဟု ပြောသည်။

ယခုနှစ်ပွင့်လင်းရာသီအတွက် ပြည်တွင်းခရီးသွားလာမှုသည် ပြီးခဲ့သည့် သီတင်းကျွတ်ကာလမှ စတင်ကာ များလာခဲ့ခြင်းဖြစ်ပြီး လက်ရှိကြားရက်များတွင်လည်း ခရီးသွားဝင်ရောက်မှုသည် ထိုးကျမသွားဘဲ ပုံမှန် အနေ အထားတွင် ဆက်လက်ရှိနေကြောင်း သိရသည်။

ချောင်းသာကမ်းခြေမြင်ကွင်း

လက်ရှိတွင် ရှမ်းပြည်နယ်ရှိ ဟိုတယ်များတွင် တန်ဆောင်တိုင်ပိတ်ရက်အတွက် ဟိုတယ်ဘိုကင် ယူထားမှု များပြားနေပြီဖြစ်ပြီး တောင်ကြီးနှင့် ကလောမြို့တို့တွင် အများဆုံးဖြစ်ကြောင်း ရှမ်းပြည်နယ် ဟိုတယ်နှင့် ခရီးသွားလာရေးညွှန်ကြားမှုဦးစီးဌာနမှ ဒုတိယညွှန်ကြားရေးမှူး ဦးစည်သူကျော်က CNI သတင်းဌာနသို့ ပြောသည်။

"အခုဟိုတယ်တွေကို ဆာဗေးသဘောမျိုး မေးကြည့်တဲ့အခါကျတော့ တော်တော်များများ ဟိုတယ်တွေက ဘိုကင်ပြည့်နေပြီပေါ့နော် ကလောဘက်ဆိုရင်။ ဒါပေမယ့် တချို့တွေကျတော့လည်း work in guest ပေါ့ ဝင်လာတဲ့ဧည့်သည်ကို လက်ခံဖို့အတွက် အဲဒါမျိုးလေးတွေလည်း ရှိတော့ရှိတယ်။ ဒါပေမယ့် ခန့်မှန်းရခက် ပါတယ်။ ကျိုက်ထီးရိုးဘက်က ဖြစ်စဉ်တွေရှိသွားတော့ ဒီဘက်ကို ပိုလာမယ်လို့ ခန့်မှန်းရတာပေါ့။ ဖြစ်ရင်တော့ ညောင်ရွှေဘက်ကတော့ နည်းနည်းတက်လာမလား။ အစကတော့ ညောင်ရွှေက မပြည့်ဘူး။ သူက တောင်ကြီး ကနေ day return ရယ်၊ ကလောကနေ day return သွားတယ်၊ ဘုရားဖူးသွားတယ်။ over night နေတာ နည်း တယ်။ ညောင်ရွှေကတော့ သီတင်းကျွတ်ထက်စာရင် တန်ဆောင်တိုင်မှာများ ပိုရနိုင်မလား အဲဒါမျိုးလေးတော့ ကျနော်တို့ ခန့်မှန်းတာရှိပါတယ်" ဟု ၎င်းက ပြောသည်။

ကိုဗစ်မဖြစ်ခင်ကာလ တန်ဆောင်တိုင်ပိတ်ရက်များတွင် ခရီးသွားများသည် တောင်ကြီးနှင့် ပြင်ဦးလွင်တို့တွင် ပွဲတော်များပြုလုပ်သဖြင့် နှစ်စဉ် ခရီးသွား အများဆုံးသွားရောက်ကြလေ့ရှိကြကာ ယခုနှစ်တွင်မူ တောင်ကြီး တန်ဆောင်တိုင်ပွဲအား လက်ရှိတွင် ကျင်းပရန် အစီအစဉ်မရှိသေးကြောင်း သိရသည်။

သို့သော် ပြင်ဦးလွင်မြို့တန်ဆောင်တိုင်ပွဲတော်အား နိုဝင်ဘာ ၄ ရက်မှ ၈ ရက်နေ့အထိ ကျင်းပရန် စီစဉ်နေကြောင်း လည်း သိရသည်။

ထို့ကြောင့် မကြာခင်ရောက်ရှိမည့် တန်ဆောင်တိုင်ပိတ်ရက်တွင်လည်း ထိုဒေသများသို့ ခရီးသွားဝင်ရောက်မှု ပိုများနိုင်ကြောင်း ရခိုင်ပြည်နယ် ဟိုတယ်နှင့် ခရီးသွားလာရေး ညွှန်ကြားမှုဦးစီးဌာနမှ ညွှန်ကြားရေးမှူး ဦးတင်ထွန်းအောင်က CNI သတင်းဌာနသို့ပြောသည်။

"ရာသီပွဲကတော့ အဲဒီဘက်က ဦးစားပေးပေါ့။ ဒါပေမယ့် ဒီဘက်ကိုလည်း မလာဘူးလို့ မပြောနိုင်ပါဘူး။ ပြီးခဲ့တဲ့ သီတင်းကျွတ်ကလည်း ဒီဘက်လာတာပါပဲ။ လာတာတော့လာမှာပါ။ သီတင်းကျွတ်လောက်တော့ မများနိုင်ဘူး ထင်တယ်။ အန်ကယ်က ဟိုဟာနဲ့တွက်တာကို။ ပြီးခဲ့တဲ့ သီတင်းကျွတ်တုန်းက တို့ဆီမှာများသလို ပုဂံလည်း များတယ်။ အခုဆိုရင် တောင်ကြီးတို့ ဟိုဘက်တို့ ပွဲတွေရှိနေတဲ့အတွက် အဲဒီဘက်ကိုလည်း များသွားနိုင်တာပေါ့။ မျှပြီးတော့လေ။ ဒီဘက်ကကျတော့ အဓိကက လေယာဉ်နဲ့ပဲ အများအားဖြင့် လာကြတာကိုး" ဟု ၎င်းက ပြော သည်။

မကြာခင်ကျရောက်မည့် တန်ဆောင်တိုင်ပိတ်ရက်တွင် ပြည်တွင်းခရီးသွားများ သွားလာမှုတွင် တည်ငြိမ် အေးဆေးပါက ခရစ္စမတ်နှင့် နှစ်သစ်ကူးရုံးပိတ်ရက်တွင် ပြည်တွင်းခရီးသွားလားမှု ပိုမိုများပြားလာနိုင်မည်ဟု ခရီးသွားလုပ်ငန်းရှင်များက ခန့်မှန်ထားသည်။

CNI News

၂၀၂၂ ခုနှစ်၊ ဇူလိုင် ၁၃

ရွှေတိဂုံဘုရားသို့ ဝါဆိုလပြည့်နေ့(ဓမ္မစကြာအခါတော်နေ့)တွင် ဘုရားဖူးလာရောက်သူ နှစ်သိန်းကျော် ရှိကာ ပုံမှန်ရက်များထက်များပြားကြောင်း ရွှေတိဂုံဘုရား ဂေါပကအဖွဲ့မှ CNI သတင်းဌာနသို့ ပြောသည်။

ရွှေတိဂုံဘုရား ဂေါပကအဖွဲ့ဝင် ဦးဌေးလှိုင်က “မနေ့က လူလာတာတောင်မှ နှစ်သိန်းခွဲကျော်တယ်။ နှစ်သိန်း ငါးသောင်းနဲ့ ခုနှစ်ထောင်ကျော်တက်တာ။ များတယ်။ မနက်မိုးလင်းကတည်းက ပြည့်နေတာ။ ညနေ အထိပဲ” ဟု ပြောသည်။

ဘုရားဖူးများအား မြင်တွေ့ရစဉ် (ဓါတ်ပုံ - CNI)

ထို့အပြင် ဇူလိုင် ၁၂ ရက်နေ့က ရွှေတိဂုံဘုရားတွင် ဗုံးပေါက်သည်ဆိုသည်မှာ အမှားသာဖြစ်ကြောင်းနှင့် ရွှေတိဂုံ ဘုရားတွင် ဇူလိုင် ၁၂ ရက်နေ့ (ဝါဆိုလပြည့်နေ့)၌ အေးအေးဆေးဆေးသာဖြစ်ကြောင်း ၎င်းကဆက်ပြောသည်။

ရွှေတိဂုံဘုရား ဂေါပကအဖွဲ့ဝင် ဦးဌေးလှိုင်က “ဒါကတော့ ဗုဒ္ဓဘာသာရဲ့ အထွတ်အမြတ်နေ့မှာ ဘုရားကို သွားတာ၊ လူစည်ကားတာမကြိုက်တဲ့ လူတစ်စုကနေပြီးတော့ ဒါ လုပ်တဲ့သဘောပဲ။ ဒါ ဘုရားကိုတားမြစ်တာ အရမ်း အကုသိုလ်များတာပေါ့နော်။ အကုသိုလ်ကြီးတာပေါ့။ ဘယ်ဘာသာပဲဖြစ်ဖြစ် သူတို့ပွဲတော်ရက်တွေ ဘာတွေမှာ ဘာဖြစ်တယ် ညာဖြစ်တယ်ဆိုပြီး လူတွေ မသွားရဲ မလာရဲအောင် လုပ်တဲ့သဘောက အကုသိုလ်များတာပေါ့” ဟု ပြောသည်။

ဇူလိုင် ၁၂ ရက်နေ့ (ဝါဆိုလပြည့်နေ့)က ရွှေတိဂုံဘုရားတွင် ဗုံးပေါက်သည်ဆိုသည့် အကြောင်းအရာနှင့် ပတ်သက် ၍ သတင်းအမှား ဖြန့်ဝေမှု အများအပြားရှိခဲ့သည်။