CNI International News

တိုကျို၊ ဇူလိုင် ၃၀

ဂျပန်အာဏာပိုင်များသည် နိုင်ငံအတွင်းရှိ လမ်းများပေါ်တွင် လူတစ်ဦး လိုက်ပါစီးနင်းနိုင်သည့် လျှပ်စစ်ခရီး ဆောင်လက်ဆွဲသေတ္တာ(အိတ်)များ အသုံးပြုမှုကို ထိန်းချုပ်ကန့်သတ်မှုများ လုပ်ဆောင်လျက်ရှိကြောင်း ဘန်ကောက်ပို့စ်မှ ဖော်ပြခဲ့သည်။

ပြည်ပခရီးသွားများသည် လမ်းများပေါ်တွင် အဆိုပါ လျှပ်စစ်ခရီးဆောင် လက်ဆွဲသေတ္တာများကို စီးနင်းရာမှ မတော်တဆမှုများ မြင့်တက်လာခဲ့ပြီးနောက် ဂျပန်အာဏာပိုင်များက စည်းကမ်းတင်းကျပ်မှုများ ပြုလုပ်လာခြင်း ဖြစ်သည်။

မကြာသေးမီက တရုတ်အမျိုးသမီး တစ်ဦးသည် အိုဆာကာ (Osaka) မြို့ရှိ လူသွားစင်္ကြံများပေါ်တွင် ဘီးသုံးဘီး ပါသည့် လျှပ်စစ်ခရီးဆောင် လက်ဆွဲသေတ္တာကို စီနင်းခဲ့သည်ကို တွေ့ရှိခဲ့သည်။

ထို့နောက် ထိုလျှပ်စစ်ခရီးဆောင် လက်ဆွဲသေတ္တာကို တရားမဝင် အသုံးပြုမှုဖြင့် တရားစွဲဆိုခံရသည့် ပထမဆုံး အမှု ဖြစ်လာခဲ့သည်။

လျှပ်စစ်ခရီးဆောင်အိတ်ကို Black pink အဖွဲ့၀င်က စီးနေစဉ်

ဘက်ထရီအားဖြင့် စွမ်းအင်ပေးထားသည့် ထိုလက်ဆွဲသေတ္တာများသည် ပုံမှန်လက်ဆွဲ သေတ္တာများကဲ့သို့ ဖြစ်သော်လည်း လက်ကိုင်များ ဆွဲထုတ်နိုင်ပြီး လိုရာကို သွားလာနိုင်သဖြင့် ခရီးသွားများသည် ၎င်းတို့၏ ခရီးဆောင် သေတ္တာပေါ်တွင်ထိုင်ပြီး စီးနင်းနိုင်သည်။

ထိုလျှပ်စစ် လက်ဆွဲသေတ္တာများကို Black pink အဖွဲ့ဝင်များ အပါအဝင် K-pop ကြယ်ပွင့်များက စီးနင်းခဲ့ကြ သဖြင့် အာရှနိုင်ငံ အများအပြားတွင် ထိုလျှပ်စစ် လက်ဆွဲသေတ္တာများ အသုံးပြုမှုသည် လျင်မြန်စွာ မြင့်တက်လာ ခဲ့သည်။

ယခုလ အစောပိုင်းကလည်း အင်ဒိုနီးရှားနိုင်ငံမှ ယောကျ်ားလေးတစ်ဦးသည် ဂျပန်၏ လူအစည်းကားဆုံး စျေးဝယ် နေရာများထဲတွင် တစ်ခု အပါအဝင် ဖြစ်သည့် အိုဆာကာမြို့ရှိ ဒိုတွန်ဘိုရီ (Dotonbori) ရပ်ကွက်၏ လူသွားစင်္ကြံ လမ်းများပေါ်တွင် လျှပ်စစ်လက်ဆွဲသေတ္တာကို စီးနင်းခဲ့သဖြင့် တာဝန်ရှိသူများက ဟန့်တားခဲ့ရသည်။

လျှပ်စစ်ခရီးဆောင်အိတ်ကိုတွေ့ရစဉ်

ဂျပန်တွင် ပြည်ပခရီးသွား ဝင်ရောက်မှု ကျဆင်းနေချိန်၌ ထိုကဲ့သို့ လျှပ်စစ် လက်ဆွဲသေတ္တာများကို စီးနင်းမှု ကြောင့် မတော်တဆမှုများ မြင့်တက်လာသဖြင့် အာဏာပိုင်များက စည်းမျဉ်းစည်းကမ်းများအား ပြောင်းလဲ ထုတ်ပြန်ခဲ့ရသည်။

လက်ရှိ ထုတ်ပြန်ခဲ့သည့် စည်းမျဉ်းစည်းကမ်းများအရ ထိုလျှပ်စစ် ခရီးဆောင်လက်ဆွဲသေတ္တာကို မော်တော်ယာဉ် အမျိုးအစားထဲတွင် ထည့်သွင်းသတ်မှတ်လိုက်ပြီး ဘေးကင်းလုံခြုံစွာနှင့် မှန်မှန်ကန်ကန် အသုံးပြုရမည်ဖြစ်ကာ စီးနင်းသူသည် ယာဉ်မောင်းလိုင်စင် ရှိရမည်ဖြစ်ကြောင်း စည်းကမ်းထုတ်ပြန်ခဲ့သည်။

လျှပ်စစ်ခရီးဆောင် လက်ဆွဲသေတ္တာများသည် ဘက်ထရီအားအပြည့် သွင်းထားပါက အလေးချိန် ပေါင် ၂၆၀ ကို တင်ဆောင်ကာ တစ်နာရီ ၈ မိုင်နှုန်းအရှိန်ဖြင့် ၆ မိုင် အကွာအဝေးထိ စီနင်းအသုံးပြုနိုင်သည်။

Source: ဘန်ကောက်ပို့စ်