CNI International News

တိုကျို၊ ဇူလိုင် ၃၁

ယခုနှစ် နွေရာသီက ကမ္ဘာ့နိုင်ငံအသီးသီးတွင် စံချိန်တင် အပူပြင်းဆုံး နွေရာသီကို ခံစားခဲ့ရပြီးနောက် အပူချိန်များ ပြင်းထန်ခြင်းသည် ဦးနှောက်အပေါ် သက်ရောက်မှုရှိကြောင်း  ဂျပန်နိုင်ငံ၌ လေ့လာတွေ့ရှိခဲ့သည်ဟု Japan Times မှ ဖော်ပြခဲ့သည်။

ရာသီဥတု ဖောက်ပြန် ပြောင်းလဲမှုကြောင့် အပူချိန်များ မြင့်တက်လာသည့် ပြင်းထန်မိုးလေဝသ ဖြစ်စဉ်သည် လူသားများ၏ ဦးနှောက်အပေါ် နည်းမျိုးစုံဖြင့် သက်ရောက်မှုရှိခဲ့သည်။

ထို့နောက် ကျောင်းသားများ၏ စာမေးပွဲဖြေဆိုမှု စွမ်းဆောင်ရည်များကို ထိခိုက်စေခြင်း၊ လုပ်သားများ၏ အလုပ်လုပ်ကိုင်နိုင်စွမ်းကို ကျဆင်းစေခြင်းနှင့် စိတ်တို ဒေါသထွက်လွယ်သည့် သက်ရောက်မှုများရှိခဲ့သည်ဟု သိပ္ပံပညာရှင်များက လေ့လာတွေ့ရှိခဲ့သည်။

ဂျပန်က သက်ကြီးရွယ်အို အမျိုးသမီးများကို တွေ့ရစဉ်

သက်ကြီးပိုင်းလူဦးရေ လျင်မြန်စွာ မြင့်တက်နေမှုကြောင့် စိုးရိမ်နေရသည့် ဂျပန်နိုင်ငံတွင်လည်း အပူချိန် မြင့်မားမှုသည် အယ်လ်ဇိုင်းမား (Alzheimer's) နှင့် ပါကင်ဆန် (Parkinson's) ရောဂါများကဲ့သို့ ဦးနှောက်နှင့် အာရုံကြော ရောဂါများအပေါ် သက်ရောက်မှုရှိနေကြောင်း လေ့လာတွေ့ရှိခဲ့သည်။

ဂျပန်တွင် ဦးနှောက်မှတ်ဉာဏ် ပျောက်ဆုံးခြင်း၊ စကားပြောဆိုရန် ခက်ခဲခြင်းနှင့် အခြားလှုပ်ရှား သွားလာမှုတွင် တုံ့ဆိုင်းခြင်းတို့ကို ဖြစ်စေတတ်သည့် ဦးနှောက်နှင့်ပတ်သက်သော ရောဂါများရှိသည့် အသက် ၆၅ နှစ်နှင့် အထက် သက်ကြီးပိုင်း လူဦးရေ အရေအတွက်သည် ၂၀၄၀ ပြည့်နှစ်တွင် ၆ သန်းနီးပါးအထိ ရှိလာနိုင်ကြောင်း ခန့်မှန်းထား သည်။

ထိုခန့်မှန်းချက်အရ ဂျပန်တွင် အသက် ၆၅ နှစ်နှင့်အထက် သက်ကြီးပိုင်းအရွယ် ၇ ဦးတွင် ၁ ဦးသည် ဦးနှောက်နှင့် ပတ်သက်သည့် ရောဂါရှိနေသော အဓိပ္ပာယ်ဖြစ်သည်။

ဂျပန်သည် စီးပွားရေး ပူးပေါင်းဆောင်ရွက်ရေးနှင့် ဖွံ့ဖြိုးတိုးတက်ရေးအဖွဲ့ (OECD) အဖွဲ့ဝင်များအကြား ဦးနှောက်နှင့်ပတ်သက်သည့် ရောဂါများရှိသူ အရေအတွက် အမြင့်ဆုံး နှုန်းထားဖြစ်နေပြီး OECD ၏ ပျမ်းမျှ နှုန်းထားထက် ၂ ဆနီပါး မြင့်တက်လာဖွယ် ရှိနေသည်။

ဂျပန် နေပူရှိန်အတွင်း သွားလာနေသူများကိုတွေ့ရစဉ်

ဦးနှောက်အပေါ် သက်ရောက်မှုရှိသည့် အခြေအနေများ မြင့်တက်နေမှုနှင့်အတူ အပူချိန်များ မြင့်တက်နေခြင်း သည် ဦးနှောက်၏ ကျန်းမာရေးအတွက် ကြီးမားသော ခြိမ်းခြောက်မှု တစ်ခုဖြစ်နေကာ ဦးနှောက်နှင့် အာရုံကြော ရောဂါများကို ပိုမိုအန္တရာယ်ရှိစေခဲ့သည်ဟု သုတေသီတစ်ဦးဖြစ်သူ ကလေတန် ပေ့ချ် အယ်လ်ဒန်း (Clayton Page Aldern) က ပြောကြားခဲ့သည်။

အပူချိန်များ မြင့်တက်မှုသည် ဂျပန်တွင် ဦးနှောက်နှင့်သက်ဆိုင်သည့် ရောဂါ စုစုပေါင်း၏ ထက်ဝက်ခန့်ဖြစ်သည့် အယ်လ်ဇိုင်းမာရောဂါ ခံစားနေရသူများ၏ အခြေအနေကို ပိုမိုဆိုးရွားစေနိုင်ပြီး၊ ၎င်းတို့၏ လှုပ်ရှားသွားလာမှုများ ကို ဆိုးရွားစေနိုင်သည်ဟု နောက်ဆုံး တွေ့ရှိခဲ့သည့် လေ့လာချက်တွင် ဖော်ပြခဲ့သည်။

"ပြင်းထန်တဲ့ အပူချိန်တွေဟာ အယ်လ်ဇိုင်းမားရောဂါ ခံစားနေရသူတွေအတွက် အရင်က သူတို့မခံစားရဘူးတဲ့ ဆိုးရွားတဲ့ အခြေအနေကို ဖြစ်ပေါ်စေနိုင်ပါတယ်" ဟု နာဂိုယာ ဆေးတက္ကသိုလ် (Nagoya University's School of Medicine) မှ ဦးနှောက်နှင့် အာရုံကြောဆိုင်ရာ ပါမောက္ခ မာဆာဟီဆာ ကတ်ဆူနို (Masahisa Katsuno) က ပြောကြားခဲ့သည်။

Source: Japan Times