CNI International News
ဘန်ကောက်၊ ဒီဇင်ဘာ ၂၇
ထိုင်းနိုင်ငံတွင် မည်သည့် နေရာတွင်မဆို ဆေးဝါးကုသမှု ခံယူသည်ဖြစ်စေ ဘတ် ၃၀ သာ ကုန်ကျမည့် ကျန်းမာရေး စောင့်ရှောက်မှု အစီအစဉ်၏ နောက်ဆုံးအဆင့်ကို စတင် လုပ်ဆောင်တော့မည်ဖြစ်ကြောင်း ဘန်ကောက်ပို့စ်မှ ဖော်ပြခဲ့သည်။
ထိုအစီအစဉ်ကို ဇန်နဝါရီ ၁ ရက်မှစပြီး ထိုင်း၏ ပြည်နယ် ၃၁ ခုမှာ စတင် လုပ်ဆောင်မည်ဖြစ်ကြောင်း၊ ဆေးဘက် ဆိုင်ရာ ဝန်ဆောင်မှုများကို နည်းပညာနှင့် ပေါင်းစပ်ခြင်းဖြင့် လူနာများ တန်းစီစောင့်ရသည့် အချိန်ကို လျှော့ချရန် လည်း စီစဉ်ခဲ့သည်။
ထိုအစီအစဉ်နှင့်ပတ်သက်ပြီး ထိုင်းဝန်ကြီးချုပ် ပေတုန်တန် (Paetongtarn Shinawatra) ၊ ဒုဝန်ကြီးချုပ် ပရာဆက် ဂျန်တာရာရူအန်တန်(Prasert Jantararuangtong) နှင့် ပြည့်သူ့ကျန်းမာရေးဝန်ကြီး ဆွမ်ဆက် သက်ဆူတင် (Somsak Thepsutin) တို့က အခမ်းအနား ပြုလုပ်ခဲ့သည်။
ယခုနှစ် ဇန်နဝါရီ ၇ ရက်မှစပြီး ဘန်ကောက်မြို့တော် အပါအဝင် ပြည်နယ် ၄၆ ခုသည် အဆိုပါ ကျန်းမာရေး စောင့်ရှောက်မှု စနစ်အောက်တွင် ဆေးဝါးကုသမှုခံယူမည့် လူနားများအတွက် ဝန်ဆောင်မှုများပေးရန် ပါဝင် စာရင်းသွင်းခဲ့ကြသည်။
ပေတုန်တန်နဲ့ လူထုတွေ့ဆုံစဉ်
ထိုအစီအစဉ်၏ နောက်ဆုံးအဆင့်ကို ဇန်နဝါရီ ၁ ရက်မှစပြီး ချောင်ဘူရီ (Chon Buri) ၊ နာခွန်း ပက်သွမ် (Nakhon Pathom) ၊ ဆူရတ်သာနီ (Surat Thani) ၊ ဖူးခက် (Phuket) ၊ ဆူခိုထိုင်း (Sukhothai) နှင့် ခွန်ခန် (Khon Kaen) ပြည်နယ် အပါအဝင် ပြည်နယ် ၃၁ ခုတွင် လုပ်ဆောင်မည်ဖြစ်သည်။
၁ နှစ်အတွင်း အောင်မြင်စွာ အကောင်အထည် ဖော်နိုင်ခဲ့သည့် ထိုအစီအစဉ်သည် လူနာများ၏ ကျန်းမာရေး ကုန်ကျစရိတ်ကို သက်သာစေပြီး စျေးကြီးသည့် ကုထုံးများ သို့မဟုတ် ခွဲစိတ်ကုသမှုများအတွက် ငွေကြေး ချေးငှားပြီး ကုသမှုခံယူရသော အခြေအနေကို တားဆီးပေးနိုင်လိမ့်မည်ဟု ပေတုန်တန်က ပြောကြားခဲ့သည်။
နှာစေးချောင်းဆိုးကဲ့သို့ ပြင်းထန်ခြင်း မရှိသည့် ရောဂါများကို ခံစားရသော လူနာများအနေဖြင့် ဆေးရုံသို့ လာစရာ မလိုဘဲ ဗွီဒီယိုကောလ်ဖြင့် ဆရာဝန်၏ အကြံဉာဏ်နှင့် ဆေးညွှန်းများကို ရယူနိုင်မည်ဖြစ်သည်။
ထိုင်းနိုင်ငံသား အားလုံးကို သက်ရောက် အကျုံးဝင်သည့် ထိုကျန်းမာရေး စောင့်ရှောက်မှု အစီအစဉ်အတွက် အစိုးရက အဓိကရန်ပုံငွေ ထောက်ပံ့ပေးခြင်းဖြစ်သည်။
Source: ဘန်ကောက်ပို့စ်
