CNI International News

ဝါရှင်တန်၊ ဇန်နဝါရီ ၂၂

အမေရိကန်သမ္မတ ဒေါ်နယ်ထရမ့် (Donald Trump) သည် ကမ္ဘာ့ကျန်းမာရေးအဖွဲ့ (WHO) မှ အမေရိကန် နုတ်ထွက်မည့် သမ္မတအုပ်ချုပ်ရေးအမိန့်ကို လက်မှတ်ရေးထိုးခဲ့ကြောင်း ဘန်ကောက်ပို့စ်မှ ဖော်ပြခဲ့သည်။

ထိုဆုံးဖြတ်ချက်ကြောင့် နိုင်ငံတကာ ထောက်ပံ့ရေးနှင့် ရောဂါဆိုင်ရာ တုန့်ပြန်ဆောင်ရွက်ရေးအဖွဲ့ဖြစ်သည့် WHO ၏ အကြီးဆုံး ရန်ပုံငွေ ရင်းမြစ်များထဲမှ တစ်ခုသည် ပြတ်တောက်သွားတော့မည်ဖြစ်သည်။

ဇန်နဝါရီ ၂၀ ရက်က အိမ်ဖြူတော်၏ ဘဲဥပုံရုံးခန်းတွင် စတင်တာဝန် ထမ်းဆောင်ချိန်တွင် ထရမ့် လက်မှတ် ရေးထိုးခဲ့သည့် သမ္မတအုပ်ချုပ်ရေး အမိန့်များထဲ၌ တစ်ခုအပါအဝင်ဖြစ်သော WHO မှ နုတ်ထွက်ရေး ညွှန်ကြားချက် အသေးစိတ်ကို ချက်ချင်းထုတ်ပြန်ခဲ့ခြင်းမရှိပေ။

“ဒါက တော်တော်ကြီးမားတဲ့ ကိစ္စဖြစ်ပါတယ်” ဟု ထရမ့်က WHO မှ နုတ်ထွက်မည့်အမိန့်ကို လက်မှတ်မရေးထိုးမီ ပြောကြားခဲ့သည်။

ဂျီနီဗာ (Geneva) အခြေစိုက် WHO သည် ကမ္ဘာလုံးဆိုင်ရာကျန်းမာရေး ခြိမ်းခြောက်မှုများကို ဖြေရှင်းရာတွင် အဓိကအခန်းကဏ္ဍမှ ပါဝင်ခဲ့ပြီး လူသားချင်း စာနာထောက်ထားမှုနှင့် ရောဂါအမျိုးမျိုးကို တုန့်ပြန်ဆောင်ရွက် နေသည့် အဖွဲ့ဖြစ်သည်။

ဒေါ်နယ်ထရမ့် အုပ်ချုပ်ရေးအမိန့်လက်မှတ်ထိုးနေစဉ်

WHO မှ အမေရိကန် နုတ်ထွက်ခြင်းသည် WHO ၏ ရန်ပုံငွေကို ဆိုးရွားစွာ ထိခိုက်စေမည်ဖြစ်သည်။

၂၀၂၄-၂၀၂၅ ဘတ်ဂျက်ကာလက အမေရိကန်သည် WHO အား ဒေါ်လာ ၆၆၂ သန်း ထောက်ပံ့ပေးခဲ့ပြီး ထိုပမာဏသည် WHO က ရရှိသည့် ရန်ပုံငွေ စုစုပေါင်း၏ ၁၉ ရာခိုင်နှုန်း ဖြစ်သည်။

ထရမ့်သည် ၎င်း၏ ပထမသက်တမ်း ကုန်ဆုံးကာနီး အချိန်ကလည်း WHO သည် COVID-19 ကပ်ရောဂါ ကာလ အစောပိုင်းတွင် တရုတ်အစိုးရကို အလွန်လိုက်လျောလွန်းသည်ဟုဆိုကာ WHO မှ နုတ်ထွက်ရန် ကြိုးပမ်းခဲ့ဖူး သည်။

အမေရိကန်သည် ၁၉၄၈ ခုနှစ်တွင် WHO အဖွဲ့ဝင်နိုင်ငံ ဖြစ်လာခဲ့ပြီး ထိုအဖွဲ့မှ နုတ်ထွက်ရန် ၁ နှစ်ကြာ ကြိုတင် အသိပေးကာလအဖြစ် သတ်မှတ်ခံရမည်ဖြစ်သည်။

ထရမ့်သည် ပထမသက်တမ်း ကုန်ကာနီးက WHO မှ နုတ်ထွက်ရန် လက်မှတ် ရေးထိုးခဲ့သော်လည်း ထိုနုတ်ထွက် မှု၏ ၁ နှစ်ကြာ ကြိုတင်အသိပေးကာလ မကုန်ခင်တွင် ဂျိုးဘိုင်ဒန် (Joe Biden) အစိုးရအဖွဲ့ တက်လာခဲ့ပြီး နောက် ထရမ့်၏အမိန့်ကို ပြန်လည်ဖျက်သိမ်းခဲ့သည်။

Source: ဘန်ကောက်ပို့စ်