CNI International News

ဘေကျင်း၊ ဖေဖော်ဝါရီ ၂၂

နှလုံးရောဂါ ဖြစ်ပွားနိုင်မည့် အန္တရာယ်ကို လျှော့ချရာတွင် အထောက်အကူ ပြုစေနိုင်သည့် မော်လီကျူးတစ်မျိုးကို ထုတ်လုပ်ပေးသော ဆန်စပါး အမျိုးအစားသစ်တစ်ခုကို တီထွင်ဖန်တီးခဲ့ကြောင်း တရုတ်သိပ္ပံပညာရှင်များက ပြောကြားခဲ့သည်ဟု South China Morning Post မှ ဖော်ပြခဲ့သည်။

CoQ10 သို့မဟုတ် ubiquinone ဟု လူသိများသည့် Coenzyme Q10 သည် ခန္ဓာကိုယ်အတွင်း အသက်အရွယ် ကြီးရင့်မှုကြောင့် အိုမင်းမှုကို သဘာဝအရ လျှော့ချပေးပြီး အရွယ်တင် နုပျိုစေသည့် ဓာတ်တိုးဆန့်ကျင်ပစ္စည်း (antioxidant) တစ်မျိုးဖြစ်သည်။

ထို့ပြင် Coenzyme Q10 သည် ခန္ဓာကိုယ်တွင်း ဆဲလ်များကို ကာကွယ်ပေးပြီး စွမ်းအင်ကို ထုတ်လုပ်ပေးသည့် ဓာတ်တစ်မျိုးလည်း ဖြစ်သည်။

နှလုံးရောဂါ ဖြစ်ပွားနေသည့် လူနာများ သို့မဟုတ် ကိုလက်စထရော လျှော့ချသော ဆေးဝါးများကို မှီဝဲနေရသူ များတွင် coenzyme မော်လီကျူး လယ်ဗယ်သည် လျော့ကျနေသည်ကို တွေ့ရသည်။

ထို့ပြင် CoQ10 ကို သည် နှလုံးကျန်းမာရေးကို ကောင်မွန်းစေသည်ဟု သုတေသနများတွင် လေ့လာတွေ့ရှိ ပြီးနောက် ၎င်းကို ဖြည့်စွက်ဓာတ်စာအဖြစ်လည်း အသုံးပြုလေ့ရှိသည်။

တရုတ်ဆေးပညာရှင်ကိုတွေ့ရစဉ်

CoQ10 သည် အသား၊ ငါး၊ အစေ့အဆန်များကဲ့သို့ သဘာဝ အစားအစာများထဲတွင် ပါဝင်ပြီး အခြေခံ အစားအစာ များဖြစ်သည့် ဆန်၊ ဂျုံနှင့် အုတ်ဂျုံများထဲတွင်လည်း CoQ9 ဟုခေါ်ဆိုသည့် coenzyme မော်လီကျူးပုံစံဖြင့် ပါဝင်နေသည်။

CoQ10 နှင့် CoQ9 တို့သည် ခန္ဓာကိုယ်အတွက် ကောင်းကျိုးများ ဖြစ်စေသော်လည်း ၎င်းတို့၏ ကောင်းကျိုး သက်ရောက်မှုများသည် အနည်းငယ်ကွဲပြားသည်။

"CoQ10 မော်လီကျူးကို စိုက်ခင်းတွေထဲမှာ ထုတ်လုပ်နိုင်မှုဟာ လူသားတွေရဲ့ ကျန်းမာရေးအတွက် အကျိုးရှိ စေပါလိမ့်မယ်" ဟု တရုတ်သိပ္ပံအကယ်ဒမီ (CAS) က ဖေဖော်ဝါရီ ၁၃ ရက်က Cell သုတေသနဂျာနယ်တွင် ရေးသားဖော်ပြခဲ့သည်။

ထိုမော်လီကျူးကို ထုတ်လုပ်နိုင်ရန်အတွက် သုတေသနပညာရှင်များသည် အပင်မျိုးစိတ် ၆၇ ခုမှ နမူနာ ၁၃၄ ခုကို လေ့လာခဲ့ပြီး CoQ9 ထက်ပိုမိုကောင်းမွန်သည့် CoQ10 မော်လီကျူးကို ထုတ်လုပ်နိုင်ရန် ကြိုးပမ်းခဲ့ခြင်းဖြစ်သည်။

ထိုနမူနာများကို အသုံးပြု၍ သိပ္ပံပညာရှင်များက မျိုးဗီဇဖြင့် တည်းဖြတ်ဖန်တီးပြီး  CoQ10 မော်လီကျူးများ ထုတ်လုပ်နိုင်သည့် ဆန်စပါးနှင့် ဂျုံ အမျိုးအစားသစ်ကို အောင်မြင်စွာ တီထွင်နိုင်ခဲ့ခြင်းဖြစ်သည်။

Source: South China Morning Post