CNI News

၂၀၂၄ ခုနှစ်၊ မေလ ၉

တရုတ်နိုင်ငံသို့ မြန်မာ့သရက်သီး တင်ပို့မှုသည် လမ်းကြောင်း အခြေအနေများကြောင့် ယခုနှစ်တွင် ၃ ပုံ ၁ ပုံ ခန့်သာရှိသည်ဟု သရက်သီးကုန်သည်များက ပြောသည်။

တရုတ်သို့ သွားသည့် နယ်စပ်ကုန်သွယ်ရေး လမ်းကြောင်းတလျှောက် တိုက်ပွဲဖြစ်ပွားမှုများကြောင့် အချိန် ကြန့်ကြာမှုများ ဖြစ်ပေါ်နေသည့်အတွက် သရက်သီး တင်ပို့ရာတွင် အရည်အသွေး ကျဆင်းမှုများ မဖြစ်ပေါ်စေရန် သရက်သီးကို အရေးကြီးကုန်စည်အဖြစ် green line ရရှိရန် ကုန်သည်များနှင့် နှစ်နိုင်ငံ အစိုးရအဖွဲ့များ ဆွေးနွေး ကြသော်လည်း အဆင်မပြေကြောင်း သိရသည်။

ထိုသို့ အဆင်မပြေသည့်အတွက် သရက်သီး တင်ပို့ရာတွင် အချိန်ကြန့်ကြာမှုများ ရှိနေမည်ဖြစ်၍ ယခုနှစ် တရုတ်သို့ သရက်သီး တင်ပို့မှုမှာ လျော့နည်းလာသည်ဟု သရက်ကုန်သည် ကိုသစ္စာက CNI သတင်းဌာနသို့ ပြောသည်။

မြန်မာ့သရက်သီးကို တွေ့ရစဉ်

၎င်းက “တရုတ်ဘက်က အစကတည်းက ရှိတယ်၊ မြန်မာပြည်ဘက်မှာ green line မရဘူး။ မရဘူးဆိုတာက လုပ်လို့မရတာ စနစ်ပေါ့။ အခုချိန်မှာ green line ရဲ့ သဘောသဘာဝကို လုပ်ပေးနိုင်မယ့် လက်ရှိ အာဏာပိုင် အဖွဲ့အစည်းရော၊ နှစ်ဖက် ရှိနေသော အဖွဲ့တွေက green line ကို သူတို့ နားမလည်ဘူး။ နားမလည်တဲ့အတွက်က အဲဒါ လုပ်လို့မရဘူး။ ကားသမားတွေကိုပဲ ဂရုစိုက်ပြီးတော့ မောင်းဖို့၊ အချိန်မကြန့်ကြာဖို့ ဒီလောက်ပဲ ပြောလို့ရ မယ်၊ ကျန်တဲ့အပိုင်းတွေ ဘာမှလုပ်လို့မရဘူး။ ထိခိုက်တယ်၊ ထိခိုက်ပေမယ့်လည်း ပြောချင်တာက လွတ်သွားခဲ့ရင် လည်း မြန်မာနိုင်ငံတွင်းမှာ ရောင်းတော့လည်း တရုတ်ဈေးမှ မရတာကိုး။ မရတော့လည်း ဒီအတိုင်းပဲ သွားရတာ ပေါ့။ ဒါပေမယ့် သွားတဲ့အရေအတွက် လျော့တယ်။ အများကြီး လျော့သွားတာပေါ့။ အရင်တုန်းက လမ်းကြောင်း ကောင်းနေတဲ့ အချိန်တုန်းက အစီး ၁၀၀ ဆိုရင် အခုက အစီး ၃၀ လောက်ပဲ သွားတော့တယ်လေ” ဟု ပြောသည်။

ယခင်က မူဆယ်နှင့် ကျင်စန်းကျော့ နယ်စပ်ကုန်သွယ်ရေးမှတဆင့် သရက်သီးများကို တင်ပို့ရာတွင် ၂ ရက်ခန့်သာ ကြာမြင့်သော်လည်း ထိုနယ်စပ်ကုန်သွယ်ရေးဂိတ်များသည် လက်ရှိ၌ တိုက်ပွဲဖြစ်ပွားမှုကြောင့် ပိတ်ထားခဲ့ရသည်။

ထို့ကြောင့် သရက်သီးကို လက်ရှိတွင် မိုင်းလားနယ်စပ်ကုန်သွယ်ရေးမှတဆင့် တင်ပို့နေရပြီး တစ်ပတ်ခန့် ကြာမြင့် ကြောင်း၊ သရက်တင်ပို့မှု အနေဖြင့် တစ်ရက်လျှင် အစီးရေ ၃ စီးမှ ၁၀ စီးခန့်သာ ရှိသည်ဟု သိရသည်။

 မြန်မာ့သရက်သီးကို တွေ့ရစဉ်

အစီးရေ နည်းပါးခြင်းကြောင့် ဈေးကွက်ပျက်လုနီးပါး ဖြစ်ပေါ်နေပြီး သရက်တောင်သူများမှ တင်ပို့မှုသည် မရှိသလောက် နည်းပါးနေကြောင်း၊ ကုမ္ပဏီများ၊ ပွဲရုံများမှ တင်ပို့မှုသာ ရှိနေသည်ဟု သရက်ကုန်သည် ဦးဆန်းဝင်း က CNI သတင်းဌာနသို့ ပြောသည်။

၎င်းက “ဈေးနှုန်း အပိုင်းတွေကတော့ အခုက ပြောချင်တာက ဘယ်လိုဖြစ်နေလဲဆိုတော့ ခြံသမား တောင်သူတွေ တင်တာ နည်းသွားတယ်၊ မရှိသလောက် ဖြစ်သွားတယ်။ တစ်ဖက်မှာ ကုမ္ပဏီတို့၊ ပွဲရုံတို့ကနေပြီးတော့ တရုတ် တစ်ဖက်ဝင်တဲ့ buyer ကို price ကို ကြိုထုတ်ပြီးတော့ ရသလောက် တင်ပို့တာ။ အရင်တုန်းကလိုမျိုး လေလံ တင်ပြီးတော့ လုပ်တဲ့စနစ်တွေ မရှိသလောက် ဖြစ်သွားတယ်။ အဲဒါမျိုးစနစ် ဖြစ်ဖို့ဆိုတာ ကားအရေအတွက် များမှလည်း ဖြစ်မှာလေ ဈေးကွက်ကြီးတစ်ခု ဖြစ်လာတာကလေ။ အဲဒီလိုတော့ ဖြစ်သွားတယ်။ ပြည်တွင်းမှာ တောင်မှ သရက်သီးက အရမ်းပေါနေတယ်။ ဈေးကွက်ပျက်တဲ့ ပုံစံမျိုးအထိကို ဖြစ်လာတာ” ဟု ပြောသည်။

ယခုနှစ်တွင် မြန်မာ့သရက်သီးကို ဂျပန်၊ စင်္ကာပူနှင့် တခြားသော နိုင်ငံများမှ ဝယ်ယူရန် ကမ်းလှမ်းမှုများ ရှိသော် လည်း အရည်အသွေးပိုင်းဆိုင်ရာ လိုအပ်ချက်များ ရှိနေခြင်းကြောင့် တင်ပို့နိုင်ခြင်း မရှိကြောင်း သိရသည်။