CNI News

၂၀၂၄ ခုနှစ်၊ သြဂုတ် ၂၉

မြန်မာနိုင်ငံတွင် EV (လျှပ်စစ်ကား) ခရီးသည်တင် အဝေးပြေးကား အစီးရေ ၂၀ ကျော် တင်သွင်းခွင့်ပြုထား ကြောင်း စက်မှုဝန်ကြီးဌာနမှ တာဝန်ရှိသူတစ်ဦးက CNI သတင်းဌာနသို့ ပြောသည်။

လက်ရှိ မြန်မာနိုင်ငံတွင် EV ခရီးသည်တင် အဝေးပြေးကား ၃ စီး ရောက်ရှိထားပြီး ဖြစ်ကြောင်း သိရသည်

စက်မှုဝန်ကြီးဌာနမှ တာဝန်ရှိသူတစ်ဦးက “လောလောဆယ်မှာ ရောက်နေတာကတော့ ၃ စီးပေါ့။ ထပ်ပြီးတော့ လာဖို့လည်း ရှိသေးတယ်။ ထပ်ပြီးတော့ လာဖို့ရှိသေးတယ်ဆိုတာ ကျမတို့က ၂၀ ကျော် ခွင့်ပြုထားတာဆိုတော့ အဲ့ ၂၀ ကျော်အကုန် သူ့အချိန်နဲ့သူ ရောက်လာမှာပေါ့နော်။ ဒါက ခွင့်ပြုထားတဲ့ ပမာဏဆိုတော့လေ။ ဘယ်တော့ ရောက်မယ် ဆိုတာကတော့ အဲလိုတော့ အတိအကျပြောလို့ မရဘူးပေါ့နော် " ဟု ပြောသည်။

လက်ရှိ EV အဝေးပြေးကားအား ရန်ကုန်အခြေစိုက် ခရီးသည်တင် ယာဥ်လိုင်းဖြစ်သော မန္တလာမင်းမှ ပြေးဆွဲနေပြီ ဖြစ်သော်လည်း ရာဇာမင်းယာဥ်လိုင်းမှ စက်တင်ဘာလကုန်တွင် EV လျှပ်စစ်ကားဖြင့် စတင်ပြေးဆွဲမည်ဖြစ် ကြောင်း ထုတ်ပြန်ထားသည်။

သို့သော်လည်း EV လျှပ်စစ်သုံးကားများဖြင့် ခရီးသည်တင် အဝေးပြေးခရီးစဥ်များ ပြေးဆွဲရန် ယာဉ်လိုင်းအသစ် များမှ ထပ်မံ လာရောက်လျှောက်ထားခြင်း မရှိသေးကြောင်း သိရသည်။

EV အဝေးပြေးကား စတင်ပြေးဆွဲနေသည့် မန္တလာမင်း ယာဥ်လိုင်းသည် ရန်ကုန်-နေပြည်တော် ခရီးစဉ်ကိုသာ ကနဦး ပြေးဆွဲနေခြင်းဖြစ်ပြီး တစ်ဦးလျှင် ၂၅၀၀၀ ကျပ်(နှစ်သောင်းခွဲကျပ်) ကျသင့်မည်ဟု သိရသည်။

ရန်ကုန်-မန္တလေး အမြန်လမ်းမကြီး၊ ရန်ကုန်-တောင်ငူ-မိတ္ထီလာ-မန္တလေး ပြည်ထောင်စုလမ်းမကြီး၊ ရန်ကုန်-ပြည်လမ်း၊ ရန်ကုန်-ပုသိမ်လမ်းတို့တွင်လည်း ပြေးဆွဲနိုင်ရေး ဆောင်ရွက်နေကြောင်း သိရသည်။

မန္တလာမင်းယာဥ်လိုင်းမှ EV ခရီးသည်တင် အဝေးပြေးကားကို တွေ့ရစဥ်

EV ခရီးသည်တင် အဝေးပြေးကားများသည် အပူချိန်မြင့်တက်မှု၊ လေထုညစ်ညမ်းမှုနှင့် လောင်စာဆီ သုံးစွဲမှုကို လျှော့ချပေးပြီး သဘာဝပတ်ဝန်းကျင်ကို ထိန်းသိမ်းရာ‌ ရောက်ကြောင်း၊ အလားတူ ဆူညံသံကင်းပြီး ခရီးသည်များ ဇိမ်ကျကျ ခရီးသွားနိုင်ရေးအတွက် ပြေးဆွဲနိုင်ရန် ပြင်ဆင်နေခြင်းဖြစ်သည်ဟု မန္တလာမင်းယာဥ်လိုင်းမှ ထုတ်ပြန် ထားသည်။

EV ခရီးသည်တင် အဝေးပြေးကားများကို ၂၀၂၅ ခုနှစ်အထိ လမ်းတံတားကြေး ကင်းလွတ်ခွင့် ပေးထားကြောင်း၊  EV ခရီးသည်တင် အဝေးပြေးကားများကို ၂၀၂၅ ခုနှစ်၊ ၃ လပိုင်းအထိ တင်သွင်းခွင့်အား အခွန်ကင်းလွတ်ခွင့် ပေးထားကြောင်း သိရသည်။

ထို့အပြင် EV အဝေးပြေး ကားများအတွက် အားသွင်းရန်နေရာ (Charging Station) များ လိုအပ်ပါက ထပ်မံ ဆောက်လုပ်ပေးသွားမည်ဖြစ်ကြောင်း စက်မှုဝန်ကြီးဌာနမှ တာဝန်ရှိသူ တစ်ဦးက CNI သတင်းဌာနသို့ ပြောသည်။

၎င်းက “EV အတွက်ကို Charging Station ပိုင်းမှ ၂ ပိုင်းရှိတယ်။ Public နဲ့ private ပေါ့နော်။ ကိုယ့်ကိုယ်ပိုင် အစီအစဥ်နဲ့ လုပ်တာနဲ့ အများပြည်သူ အားသွင်းလို့ ရအောင်လုပ်တာပေါ့။ အမြန်လမ်းမှာ ဆိုလို့ရှိရင် ကျနော်တို့ အများပြည်သူ အားသွင်းနိုင်ဖို့ Charging Station တွေ လုပ်ပေးထားပါတယ်။ နောက်ထပ်တိုး ချဲ့ဆောက်လုပ်ဖို့ ကျ ဒီ EV ကားရောက်ရှိမှု၊ သုံးစွဲမှုနဲ့ Charging Station ကို သုံးစွဲဖို့အတွက် ချိန်ပြီးတော့ ခွင့်ပြုပေးတာပေါ့နော်။ နောက်ထပ်တိုးချဲ့ဖို့ အတွက်ကတော့ လုံလောက်တယ်ဆိုရင်တော့ မတိုးချဲ့သေးဘူးပေါ့လေ၊ မလုံလောက်တော့ ဘူးဆိုရင်တော့ တစ်ချိန်ချိန်ပေါ့နော် ကားရောက်တာများပြီးတော့ သုံးစွဲမှုများလာတဲ့ အချိန်ကျရင်တော့ ကျနော် တို့ တိုးချဲ့ဖို့ အစီအစဥ်ရှိပါတယ်။ အခုလက်ရှိ အချိန်ထိကတော့ ကျနော်တို့ ရောက်ရှိနေတဲ့ ကားနဲ့ ရှိနေတဲ့ Charging Station နဲ့ လုံလောက်တာဖြစ်တဲ့အတွက် မတိုးချဲ့သေးပါဘူး" ဟု ပြောသည်။

EV ကားများအတွက် Charging Station နေရာများကို နေပြည်တော်တွင် ၄ နေရာ၊ ရန်ကုန်မြို့တွင် ၅ နေရာ၊ မန္တလေးမြို့တွင် ၅ နေရာနှင့် ရန်ကုန်-မန္တလေး အမြန်လမ်းမကြီးပေါ်တွင် ၅ နေရာ၊ စုစုပေါင်း ၁၉ နေရာကို အကောင်အထည်ဖော် ဆောင်ရွက်ခဲ့ပြီးဖြစ်သည်။

ထို့အပြင် အစိုးရအနေဖြင့် ၂၀၅၀ ပြည့်နှစ်မတိုင်မီ မြန်မာတစ်ပြည်လုံးတွင် လျှပ်စစ်ကားများသာ အသုံးပြုမည်ဟု ရည်မှန်းထားသည်။

CNI News

၂၀၂၄ ခုနှစ်၊ ဩဂုတ် ၂၈

စက်သုံးဆီအရောင်းဆိုင်လုပ်ငန်းများတွင် ဆီအများဆုံး သိုလှောင်နိုင်ခွင့်ပြုထားသည့် ပမာဏအား ယခင်ထက် တိုးမြှင့်သတ်မှတ်ပေးလိုက်ကြောင်း သယံဇာတနှင့် သဘာဝပတ်ဝန်းကျင်ထိန်းသိမ်းရေးဝန်ကြီးဌာနမှ ထုတ်ပြန် ထားသည်။

ယခင်က စက်သုံးဆီအရောင်းဆိုင်လုပ်ငန်းများအား ဆီသိုလှောင်နိုင်သည့်ပမာဏအဖြစ် အနည်းဆုံး ဂါလန် ၅၆၀၀၁ မှ အများဆုံးဂါလန် ၇၆၈၀၀ အထိသာ ခွင့်ပြုပေးထားခြင်းဖြစ်ပြီး ၎င်းအစား ယခုအခါအတွင်  နည်းဆုံး ၇၆၈၀၁ မှ စတင်ကာ သိုလှောင်နိုင်ပြီဖြစ်သည်။

ယခုကဲ့သို့ ဆီသိုလှောင်ခွင့်ပမာဏအား တိုးမြှင့်သတ်မှတ်လိုက်ခြင်းသည် စက်သုံးဆီပြဿနာအတွက် ကောင်းမွန် သည်ဟု ဆိုရမည်ဖြစ်ကြောင်း ဘဏ်ရေးရာကျွမ်းကျင်ပညာရှင် ဦးဋ္ဌေးအောင်ကြည်က CNI သတင်းဌာနသို့ ပြောသည်။

“လောလောဆယ်ကတော့ ယာယီအားဖြင့် ဒါကောင်းတယ် ပြောရမှာပေါ့လေ။ ကောင်းတယ်ဆိုတာက affective ဘက်က ရှိတာကို။ ပြဿနာတစ်ရပ်ကိုကြည့်တယ်ဆိုတာက ကိစ္စတိုင်းမှာ ဗမာပြည်ရဲ့ပြဿနာက ထိရောက်မှုနဲ့ စွမ်းဆောင်ရည်ရှိမှုက အမြဲတမ်းတွဲစဉ်းစားရမှာပေါ့။ အဲဒီလိုမတွဲဘူးပေါ့လေ အမြဲတမ်း။ ကောင်းတယ်ဆိုတာက တစ်ခုရှိတာပေါ့လေ။ ဆီဆိုင်ပိုင်ရှင်တွေရဲ့ attitude ပေ့ါလေ။ ဒီအပေါ်လည်း မူတည်တာပေါ့။ သိုလှောင်ခွင့် ဘယ်လောက်ပဲ ပေးထား ပေးထား သူတို့ရဲ့ attitude က တက်ရင်တက်သလို၊ ကျရင်ကျသလို အဆင်ပြေသလို လုပ်မယ်ဆိုတဲ့ စိတ်မျိုး ရှိရင်တော့လည်း ဒါက သိပ်ထိရောက်မှုမရှိဘူးပေါ့။ အဲဒီလိုစိတ်မျိုးမရှိဘူးဆိုရင် ဒါသည် အမျိုးသားပြဿနာလို့ မြင်ရင် ဒါတော့ ကောင်းပါတယ်။ စွမ်းဆောင်ရည်ရှိတယ်ဆိုတာက logistics သဘောတရားမှာ JIT ဆိုတာ ရှိတယ်။ Just In Time ဒီနေ့ကို ဂါလံ တစ်သိန်း ရောင်းရမယ်ဆိုရင် ၁ သိန်း အဆင်သင့်ရှိနေရမှာပေါ့။ ဒါကတော့ Professional ဆန်ဆန်တွေးတာပေါ့။ JIT ဆိုတာက လက်တွေ့ သဘောတရားအရ ဖြစ်ဖို့မလွယ်ဘူး” ဟု ၎င်းက ပြောသည်။

ဆီဘောက်စာကားများ

လက်ရှိဖြစ်ပေါ်နေသည့် စက်သုံးဆီပြဿနာသည် သိုလှောင်နိုင်မှုပမာဏအား တိုးပေးခြင်းနှင့်မသက်ဆိုင်ဘဲ နိုင်ငံခြားငွေမလုံလောက်ခြင်းသည် အဓိကဖြစ်ကြောင်း စီးပွားရေးလေ့လာသုံးသပ်သူများက ထောက်ပြကြသည်။

စက်သုံးဆီပြဿနာသည် ရေနံများပြတ်လပ်ခြင်း၊ ရှားပါးခြင်း အစရှိသည့် ဆီအကျပ်အတည်းသည် တစ်ကမ္ဘာလုံး ၌ ဖြစ်ပွားနေခြင်းမျိုးမဟုတ်ဘဲ မြန်မာနိုင်ငံတွင်သာ စက်သုံးဆီပြဿနာဖြစ်ပေါ်နေခြင်းဖြစ်ကြောင်းလည်း ၎င်းတို့ က ထောက်ပြကြသည်။

ထိုသို့ ဖြစ်ပေါ်နေရခြင်း၏ အဓိက ပြဿနာမှာ နိုင်ငံခြားငွေမရှိခြင်းကြောင့်ဟု စီးပွားရေးလေ့လာ သုံးသပ်သူ တစ်ဦးက CNI သတင်းဌာနသို့ ပြောသည်။

“ပထမဆုံးစပြီးတော့မှားတာက နိုင်ငံခြားငွေကို အစိုးရကသွားပြီးကိုင်လိုက်တာပဲ။ ငွေလဲနှုန်းကိုသွားပြီးတော့ မနိုင်မနင်း ကိုယ်မနိုင်တဲ့ကိစ္စကိုသွားပြီးကိုင်လိုက်တဲ့အခါမှာ သူက အစိုးရဈေးသတ်မှတ်တယ်၊ အဲဒီတော့ ဒီ exporter ကမကိုက်တော့ဘူး။ မကိုက်တော့ မပို့တော့ဘူး။ အလားတူပဲ နိုင်ငံခြားရင်းနှီးမြှုပ်နှံတဲ့သူတွေကလည်း နိုင်ငံရေးအခြေအနေဆိုးနေတဲ့ ကြားထဲမှာ အဲဒီလိုနိုင်ငံခြားငွေဈေးနှုန်းတွေ သတ်မှတ်တယ်။ ပြီးရင် သူတို့ရတဲ့ အမြတ်လည်းပြန်ပြီး ပို့လို့မရ၊ ဘာမရဖြစ်တယ်။ အဲဒီလိုမျိုးစပြီး ကိုင်တာက စမှားတာပဲ။ အဲဒီလိုလုပ်လိုက်တဲ့ အတွက် export လည်းကျသွားတယ်။ ပြည်ပရင်းနှီးမြှုပ်နှံမှုတွေလည်း ကျသွားတယ်။ ကျသွားတော့ နိုင်ငံခြားငွေ ကဝင်မလာဘူး။ နိုင်ငံခြားငွေဝင်မလာတော့ ဒီသွင်းကုန်တွေကို ကန့်သတ်လိုက်တယ်။ သွင်းကုန်တွေကို ကန့်သတ် လိုက်တော့ အခုလိုမျိုး အကုန်လုံး shortage တွေဖြစ်ကုန်တာပေါ့” ဟု ၎င်းကပြောသည်။
စက်သုံးဆီပြတ်လပ်မှု ဖြစ်ပေါ်သည့်အခါမျိုးတွင် ဗဟိုဘဏ်မှ ဒေါ်လာများ ထုတ်ရောင်းပေးခြင်းမျိုး လုပ်ဆောင် သော်လည်း ၎င်းထုတ်ရောင်းသည့်ပမာဏသည် လုပ်ငန်းရှင်များ အမှန်တကယ် လိုအပ်နေသည့် ပမာဏနှင့် ကွာဟကြောင်းလည်း သိရသည်။

ထိုသို့ စက်သုံးဆီပြတ်လပ်မှု ဖြစ်ပေါ်မှ ‌ဒေါ်လာထုတ်ရောင်းပေးခြင်းသည်လည်း ကာလတိုအတွက်သာ ပြဿနာ ကိုဖြေရှင်းရန် အဆင်ပြေကြောင်းလည်း စီးပွားရေးလုပ်ငန်းရှင်များက ထောက်ပြကြသည်။

CNI News

၂၀၂၄ ခုနှစ်၊ ဩဂုတ် ၂၇

ယခင်က ကျပ်ငွေတန်ဖိုးကျဆင်းသည့်အခါတွင် ရန်ကုန်ရှိ အိမ်ခြံမြေလုပ်ငန်းများမှာ အရောင်းအဝယ် အများ အပြား ဖြစ်ခဲ့သော်လည်း လက်ရှိကာလတွင် ငွေပြန်ဖော်ရမလွယ်ကူသဖြင့် အရောင်းအဝယ် အေးနေကြောင်း အိမ်ခြံမြေလုပ်ငန်း လုပ်ကိုင်သူများက CNI သတင်းဌာနသို့ ပြောသည်။

ပုံမှန်အားဖြင့် မြေကွက်တစ်ကွက်၊ နှစ်ကွက်ခန့်သာ အရောင်းအဝယ်ဖြစ်နေတာမျိုးတွေ့ရပြီး စီးပွားရေးလုပ်ငန်း လုပ်ကိုင်သူများအနေဖြင့် ဆိုင်ခန်း အများအပြားဖွင့်လာသည်ကို ထူးခြားစွာတွေ့ရကြောင်း အိမ်ခြံမြေလုပ်ငန်း လုပ်ကိုင်နေသူ ကိုမင်းမင်းက CNI သတင်းဌာနသို့ ပြောသည်။

“အခုက အဲဒီလိုမျိုး အိမ်ခြံမြေဘက်ကို အရမ်းကြီး သွားနေတာမျိုး ပြိုဆင်းလာတာမျိုးတော့ အရမ်းမများနေဘူး။ အိမ်ခြံမြေကတော့ ကျနော်တို့ ငွေပြန်ဖော်ရတာများတဲ့ဘက်တွေ လွယ်တဲ့ဘက်တွေ သူတို့ သွားနေကြတာမျိုး တွေ့ရတယ်။ လောဆယ်တော့ ‌ရောင်းချင်တဲ့သူတွေရှိတာတောင် ဝယ်လက် အဝယ်အားနည်းနေတော့ သူတို့ အချင်းချင်း ငွေဖော်ဖို့မလွယ်တော့ invest က အထူးသဖြင့် ရတဲ့ ရွှေဝယ်တယ်၊ ဒေါ်လာဝယ်တယ် ဒီလိုပုံစံမျိုးမှာ ရှိနေတာပဲတွေ့ရတယ်။ အိမ်ခြံမြေကတော့ အခု အရမ်းကြီးတော့ သိပ်မထူးခြားလှပါဘူး။ ပြီးခဲ့တဲ့ လတွေအတိုင်း ပါပဲ အရောင်းအဝယ်က အေးနေတာပဲရှိပါတယ်။ အဝယ်က အရမ်းကြီးများနေတဲ့ ပုံစံမျိုးမရှိဘူး။ ပေါက်ဈေးထက် အများကြီးလျှော့ရောင်းနေတာမျိုးမရှိဘူး။ အရောင်းသမားကလည်း ကြိုက်ဈေးရမှရောင်းမယ်  အဝယ်သမားက လည်း ချိန်ကြည့်နေတဲ့ ပုံစံမျိုးပဲရှိတယ်” ဟု ၎င်းက ပြောသည်။

ရန်ကုန်-ပဲခူးလမ်းနှင့်မြို့ပတ်လမ်းထောင့်ရှိ တြိဂံပုံကျွန်းနေရာတွင် တည်ဆောက်ထားသည့် ရန်ကုန်မြို့အဝင်ဆိုင်းဘုတ်

လက်ရှိတွင် အိမ်ခြံမြေ အရောင်းအဝယ် ဈေးကွက်ထက် အငှားဈေးကွက်မှာ ပိုမိုအလုပ်ဖြစ်နေပြီး တာမွေ၊ ကျောက်မြောင်း၊ သာကေတ၊ မင်္ဂလာတောင်ညွန့်ဘက်များတွင် အိမ်ခန်း၊ တိုက်ခန်း အငှားများ ပိုမို အလုပ်ဖြစ်နေ ကြောင်းလည်း သိရသည်။

ကျပ်ငွေတန်ဖိုး ကျဆင်းသည့်အခါတိုင်း အိမ်ခြံမြေများကို အဝယ်လိုက်လာကြသလို မည်သည့်ကာလတွင် အဆိုပါ အနေအထားအတိုင်း အရောင်းအဝယ် ပြန်ဖြစ်မည်ကို မခန့်မှန်းနိုင်ကြောင်းလည်း အိမ်ခြံမြေလုပ်ငန်း လုပ်ကိုင်သူ များက သုံးသပ်သည်။

ဒလတွင် အိမ်ခြံမြေ လုပ်ငန်းလုပ်ကိုင်သူတစ်ဦးက “ဒလကတော့ အခြေအနေ ၂ မျိုးရှိတာပေါ့။ ပထမတစ်မျိုး ကတော့ တစ်နိုင်ငံလုံးနဲ့ ဆိုင်တဲ့ အကြောင်းပေါ့။ အဓိက ငွေဈေးတည်ငြိမ်လာမယ်။ ငွေဈေးတည်ငြိမ်ပြီးတော့မှ ရင်းနှီးမြှုပ်နှံမှုတွေက အိမ်ခြံမြေဘက်ကို ပြန်ရောက်လာမယ်။ ဒါကတစ်ပိုင်းပေါ့။ နောက် ဒလတံတားရဲ့ အရင် ထက်ပိုပြီးတော့ မြန်မြန်လေးလုပ်နေတယ်။ နောက်ပြီး မြို့ထဲ development infrastructure လမ်းတွေ လမ်းတွေပေ့ါလေ သပ်သပ်ရပ်ရပ်နဲ့ မြန်မြန်ဆန်ဆန် လုပ်နေတာမျိုးတွေ့တော့ တံတားရဲ့ တိုးတက်မှုရာခိုင်နှုန်း ကောင်းလာလေလေ ဒလမှာ အိမ်ခြံမြေ ဈေးကွက် စိတ်ဝင်စားမှု ပြန်မြင့်လာလိမ့်မယ်လို့ သုံးသပ်မိတယ်” ဟု ၎င်းက ပြောသည်။

အချို့ငွေလိုအပ်သူများအနေဖြင့် အိမ်ခြံမြေများအား ကာလပေါက်ဈေးထက် သိန်းရာချီ လျှော့ပေါ့၍ ထုတ်ရောင်း ကြသော်လည်း ဝယ်ယူမည့်သူမှာ မရှိသလောက်နည်းပါးနေကြောင်း၊ နေရာကောင်း ရပ်ကွက်ကောင်းဖြစ်ပါက ဝယ်ယူမှုများရှိသော်လည်း ယခင်ထက် ပိုမို နည်းပါးကြောင်း သိရသည်။

CNI News 

၂၀၂၄ ခုနှစ်၊ သြဂုတ် ၂၇

ဒေသဖွံ့ဖြိုးတိုးတက်ရေးနှင့် စားရေးရိက္ခာဖူလုံရေး ဒေသအလိုက် စိုက်ပျိုးမွေးမြူရေး လုပ်ငန်းများကို စနစ်တကျ ဆောင်ရွက်ရန် လိုအပ်သည်ဟု နစကဥက္ကဋ္ဌ ဗိုလ်ချုပ်မှူးကြီး မင်းအောင်လှိုင်က ပြောသည်။

၂၀၂၄ ခုနှစ်၊ သြဂုတ် ၂၅ ရက်နေ့က မန္တလေးမြို့၊ မြို့တော်ခန်းမ၌ ဒေသဖွံ့ဖြိုး တိုးတက်ရေးဆိုင်ရာများ ဆွေးနွေးပွဲ တွင် ၎င်းက ထိုသို့ ပြောကြားခဲ့ခြင်း ဖြစ်သည်။

ဒေသဖွံ့ဖြိုးတိုးတက်ရေးနှင့် ပတ်သက်၍ အဓိကအားဖြင့် စားရေးရိက္ခာဖူလုံရေးပင်ဖြစ်ပြီး စိုက်ပျိုးမွေးမြူရေး လုပ်ငန်းများကို စနစ်တကျဖြင့် ဆောင်ရွက်မည်ဆိုပါက စားရေးရိက္ခာဖူလုံမည်ဟု နစကဥက္ကဋ္ဌက ပြောသည်။

၎င်းက “စိုက်ဧကများအလိုက် ပန်းတိုင်ရည်မှန်းချက် ပြည့်မီအောင် စိုက်ပျိုးရန်လိုပြီး သီးထပ်များ စိုက်ပျိုးရန် လည်း လိုကြောင်း၊ အနည်းဆုံးသီးထပ် ၂၀၀ ရာခိုင်နှုန်း စိုက်ပျိုးနိုင်ရန်လိုပြီး ထိုသို့ စိုက်ပျိုးနိုင်မည်ဆိုပါက အထွက်နှုန်းများ ၂ ဆ တိုးလာမည်ဖြစ်ကြောင်း၊ မန္တလေးတိုင်းဒေသကြီးရှိ မြို့၊ ရွာများသည် ဧရာဝတီမြစ်၏ ဝဲ၊ ယာတွင်ရှိပြီး စနစ်တကျဖြင့် အကျိုးရှိအောင် အသုံးချနိုင်မည်ဆိုပါက များစွာအကျိုး ဖြစ်ထွန်းစေမည်ဖြစ်ကြောင်း၊ ဆည်ရေသောက်ဧရိယာများမှ သီးထပ်စွမ်းအားများကိုလည်း မြင့်တက်လာအောင် ဆောင်ရွက်နိုင်ရန်လိုသည်” ဟု ပြောသည်။

ကချင်ပြည်နယ်၊ မန္တလေးတိုင်းဒေသကြီး၊ စစ်ကိုင်းတိုင်းဒေသကြီးနှင့် မကွေးတိုင်းဒေသကြီးတို့ အနေဖြင့်လည်း စိုက်ပျိုးရေးလုပ်ငန်းများကို အောင်မြင်အောင် ဆောင်ရွက်နိုင်မည်ဆိုပါက ‌ဒေသတွင်း စားရေးဖူလုံမှုကို များစွာ အထောက်အကူ ဖြစ်စေမည်ဟု နစကဥက္ကဋ္ဌက ပြောသည်။

 စိုက်ပျိုးမွေးမြူရေးလုပ်ငန်းများကို လိုက်လံကြည့်ရှုနေစဥ်

အလားတူ ပြည်တွင်းစားသုံးဆီ လုံလောက်မှုရရှိရန် ဆီထွက်သီးနှံများကို အထွက်နှုန်းတိုးအောင် စိုက်ပျိုးနိုင်ရန်လို ကြောင်း နစကဥက္ကဋ္ဌက ပြောသည်။ 

၎င်းက “ဆီထွက်သီးနှံများကို ဆီအဖြစ် ထုတ်ယူသုံးစွဲခြင်းထက် ပို့ကုန်များအဖြစ် တင်ပို့ခြင်းနှင့် တိုက်ရိုက်စားကုန် များအဖြစ် စားသုံးခြင်းများကြောင့် ဒေသတွင်း ဆီလိုအပ်ချက်များ ဖြစ်ပေါ်လျက်ရှိကြောင်း၊ ဆီထွက်သီးနှံများကို အထွက်နှုန်း တိုးတက်အောင် စိုက်ပျိုးနိုင်မည်ဆိုပါက အထွက်နှုန်းများ ပိုမိုတိုးတက်လာမည်ဖြစ်ကြောင်း၊ ပြည်တွင်းမှ ထွက်ရှိသည့် ပိုလျှံဆီထွက်သီးနှံ နှမ်း၊ နေကြာနှင့် မြေပဲတို့ကို စားသုံးဆီအဖြစ် ကြိတ်ခွဲဆောင်ရွက် မည်ဆိုပါက ပြည်တွင်းစားသုံးဆီ လုံလောက်မှုရှိနိုင်မည်” ဟု ပြောသည်။

 ဒေသဖွံ့ဖြိုး တိုးတက်ရေးဆိုင်ရာများ ဆွေးနွေးပွဲကို တွေ့ရစဥ်

ထို့နောက် သီးထပ်စွမ်းအား အနည်းဆုံး ၂၀၀ ရာခိုင်နှုန်း တိုးတက်အောင် ဆောင်ရွက်သွားကြရန်လိုပြီး မွေးမြူရေး လုပ်ငန်းများကိုလည်း ဒေသအလိုက် တိုးတက်အောင် ဆောင်ရွက်သွားကြစေလိုကြောင်း နစကဥက္ကဋ္ဌက ပြော သည်။

နစကအနေဖြင့် ပြည်တွင်း စားရေးရိက္ခာ ဖူလုံရေးအတွက် ဆောင်ရွက်နေရသလို အခြေခံကုန်စျေးနှုန်းကိုလည်း ထိန်းနေရသည်။

လက်ရှိတွင် ဇွန်လနှင့် ဇူလိုင်လအတွင်း မိုးသည်းထန်စွာ ရွာသွန်း၍ မြစ်‌ရေကြီးမှုကြောင့် စိုက်ပျိုးမြေဧကများ ပျက်စီးမှုများရှိနေသည်။

ထို့နောက် နစကသည် အမြန်ပြန်လည် စိုက်ပျိုးနိုင်ရေး လုပ်ငန်းများ လုပ်ဆောင်နေသလို ပြည်တွင်းစားသုံးဆီ ကိုလည်း သမဝါယမစနစ်ဖြင့် ရောင်းချနိုင်ရန် စတင်လုပ်ဆောင်လျက်ရှိသည်။

CNI News

၂၀၂၄ ခုနှစ်၊ ဩဂုတ် ၂၆

နိုင်ငံမတည်ငြိမ်သည်နှင့်အမျှ စီးပွားရေးကျဆင်းမှုကို ကြုံတွေ့ရတတ်ပြီး ၎င်းအခြေအနေအပေါ် ကုစားနိုင်မည့် နည်းလမ်းများအား အုပ်ချုပ်သူအစိုးရတွင် ရှိရန်လိုအပ်ကြောင်း စီးပွားရေးလုပ်ငန်းရှင်များနှင့် စီးပွားရေး လေ့လာ သုံးသပ်သူများက CNI သတင်းဌာနသို့ ပြောသည်။

လက်ရှိတွင် အခွန်ရရှိနေသည့် နယ်စပ်ကုန်သွယ်ရေးများမှာလည်း ရပ်တန့်နေကြောင်း၊ အခွန်မရှိဘဲ နိုင်ငံတစ်ခု လည်ပတ်၍မရကြောင်း၊ နိုင်ငံခြားရင်းနှီးမြှုပ်နှံမှုများ ပိုမိုဝင်လာစေရန် နစကအနေဖြင့် ကြိုးပမ်းသင့်ကြောင်း စီးပွားရေး လေ့လာသုံးသပ်သူတစ်ဦးက CNI သတင်းဌာနသို့ ပြောသည်။

၎င်းက “ကုန်သွယ်မှုတွေ ရပ်တန့်နေတဲ့ အတွက်ကြောင့် ရနိုင်တဲ့ အခွန်ငွေတွေ အများအပြား ဆုံးရှုံးနေတယ်။ ဒီဟာကို ဘာနဲ့ကုစားနေလဲဆိုတဲ့ အစိုးရကိုမေးရမယ့် မေးခွန်းတွေရှိတယ်။ နိုင်ငံ တစ်ခုချင်းမှာ အခွန်ကအဓိကပဲ အခွန်မရဘူးဆိုရင်တော့ အစိုးရအနေနဲ့ တကယ့်ကို ကျဉ်းထဲကြပ်ထဲကို ရောက်မယ်။ အခွန်မရတော့တဲ့ အစိုးရ တစ်ခုက ရပ်တည်ဖို့ ခက်ခဲမယ်။ အခွန်မရဘူးဆို ဘာနဲ့ နိုင်ငံလည်ပတ် နိုင်အောင် သူလုပ်မလဲပေါ့။ နိုင်ငံခြား ရင်းနှီးမြှုပ်နှံမှုတွေ သူဘယ်လောက် ခေါ်နိုင်မလဲ။ နိုင်ငံခြားချေးငွေ ဘယ်လောက်အထိ ရမလဲ။ နိုင်ငံမတည်ငြိမ် တာနဲ့ အမျှ စီးပွားရေးကျဆင်းမှုကတော့ ကြုံတွေ့ရမှာပဲ။ အဲဒီမှာ ကုစားဖို့နည်းလမ်းတွေ အစိုးရမှာရှိဖို့လိုတယ်။ အဓိကအားဖြင့် နိုင်ငံတကာ အထောက်အပံ့တွေ ဒီအချိန်မှာ အများကြီး လိုအပ်နေပါတယ်” ဟု ပြောသည်။

 စားသောက်ကုန်ဆိုင် တစ်ခုကိုတွေ့ရစဉ်

နိုင်ငံတကာမှ အထောက်အပံ့များရရှိရန် ဆောင်ရွက်ရာတွင် ရုရှားနှင့် မဟာမိတ်နိုင်ငံအဖြစ် ရှိနေသော်လည်း ပထဝီ အနေအထားအရ အလွန်ဝေးကွာကြောင်း၊ ရေရှည်၌ ရုရှားထံမှ နည်းပညာအကူအညီများ ရနိုင်သော်လည်း ရေတိုအရ ဖြေရှင်းရမည့် ပြဿနာများ မြန်မာနိုင်ငံတွင် ရှိနေကြောင်း စီးပွားရေးလုပ်ငန်းရှင် တစ်ဦးဖြစ်သည့် ဦးအောင်ပြည့်စုံက CNI သတင်းဌာနသို့ ပြောသည်။

ထိုပြဿနာများအပေါ် နီးစပ်သော အင်အားကြီး အိမ်နီးချင်းနိုင်ငံများဖြစ်သည့် တရုတ်၊ အိန္ဒိယတို့နှင့် ပိုမို ဆက်သွယ်ကာ အကူအညီများရရှိရန် ဆောင်ရွက်မှုများ လုပ်ဆောင်ရန် လိုအပ်ကြောင်း၊ လက်ရှိတွင် ဈေးကွက် အား အစိုးရမှ ထိန်းချုပ်ထားမှုအစား ဖွင့်ပေးလိုက်မည်ဆိုပါက အခြေခံ လူတန်းစားများအတွက် ပို၍ ခက်ခဲသွား နိုင်ကြောင်း၊ ထိန်းချုပ်ရာတွင်လည်း အကန့်အသတ်ဖြင့် ထိန်းချုပ်ရန် လိုအကြောင်း ၎င်းက ပြောသည်။

သတင်းစာရောင်းချသူ ၂ ဦးကို တွေ့ရစဉ်

စီးပွားရေးလုပ်ငန်းရှင် တစ်ဦးဖြစ်သည့် ဦးအောင်ပြည့်စုံက “ဈေးကွက် ဖွင့်ပေးလိုက်တယ်ဆိုရင် အခြေခံ လူတန်းစားတွေအတွက် ပိုပြီး ခက်ခဲသွားနိုင်တယ်။ ဘာကြောင့်လဲဆိုတော့ ဈေးကွက်ဖွင့်ပေးလိုက်တာနဲ့ အမျှ ငွေကြေးတတ်နိုင်တဲ့သူတွေက ငွေကြေးတတ်နိုင်တဲ့ အရာတွေကို သူတို့လုပ်လာမယ်၊ ဥပမာ ဆီဝယ်မယ်၊ ရွှေဝယ်မယ်၊ အစရှိတဲ့ ဥစ္စာ။ ဒါပေမယ့် အခြေခံ လူတန်းစားတွေအတွက် လုံလောက်တဲ့ ဝင်ငွေပမာဏ မရှိဘူး ဆိုရင် ဈေးကွက်က ဖွင့်ချလိုက်ရင် ပိုပြီးတော့ ကျပ်တည်းမှုတွေ ဖြစ်နိုင်တယ်။ နောက်တစ်ခုက ဈေးကွက်ကို ဆက်ပြီးတော့ ချုပ်ကိုင်တယ်ဆိုရင်လည်း အစိုးရက ဘယ်အပိုင်းတွေလောက်အထိ ချုပ်ကိုင်မလဲပေါ့ အကန့် အသတ်နဲ့ ချုပ်ကိုင်ဖို့တော့ လိုတယ်။ ဒီလိုကြီး တစ်သတ်မတ်တည်းတော့ သွားလို့မရဘူး။ နိုင်ငံရေး နည်းလမ်းနဲ့ ပြဿနာတွေကို ဖြေရှင်းတဲ့အခါမှာ စီးပွားရေး အပိုင်းမှာ ခိုင်ခိုင်မာမာနဲ့ ပြန်လည်တည်ဆောက်ဖို့ လိုတယ်” ဟု ပြောသည်။

လက်ရှိတွင် ကျပ်ငွေတန်ဖိုး ကျဆင်းနေမှုအပေါ် နိုင်ငံရေးတည်ငြိမ်မှ ဖြေရှင်းနိုင်မည်ဆိုသည်မှာ ယေဘူယျအား ဖြင့် မှန်ကန်သော်လည်း နိုင်ငံခြားချေးငွေ လုံလောက်စွာ ရရှိမည်ဆိုပါက ထိုပြဿနာမှာ ရပ်တန့်သွားနိုင်ကြောင်း စီးပွားရေးလုပ်ငန်းရှင်များနှင့် စီးပွားရေး လေ့လာသုံးသပ်သူများက သုံးသပ်ကြသည်။

CNI News

၂၀၂၄ ခုနှစ်၊ ဩဂုတ် ၂၃

မြဝတီမြို့၏ အိမ်ထောင်စုစာရင်းနှင့် မှတ်ပုံတင် ရှိသူများကိုသာ UID စမတ်ကဒ် ပြုလုပ်ပေးတော့သဖြင့် နယ်စပ်ထွက်ခွာရန် ရောက်ရှိနေသည့် အခြားဒေသခံများမှာ အခက်တွေ့နေကြကြောင်း ပရဟိတအသင်းအဖွဲ့ များက CNI သတင်းဌာနသို့ ပြောသည်။

ယခင်က မြဝတီမြို့တွင် မည်သည့်ဒေသမှ ရောက်ရှိလာသူမဆို UID စမတ်ကဒ် ပြုလုပ်ပေးနေခြင်းဖြစ် သော်လည်း ထိုသို့ ကန့်သတ်မှုဖြစ်ပေါ်သွားခြင်းမှာ UID ကဒ် အတုပြုလုပ်သည့် ပြဿနာများ မြဝတီတွင် ဖြစ်ပေါ်သွားသော အတွက်ကြောင့်ဖြစ်ကြောင်း သိရသည်။

နယ်စပ်ဂိတ်မှ အကြောင်းအမျိုးမျိုးဖြင့် ထွက်ခွာမည်ဆိုပါက UID ကဒ်ပါရှိမှ ရသဖြင့် အခြားဒေသခံများ အခက်တွေ့နေခြင်းဖြစ်ကြောင်း အလင်းသစ် ပရဟိတအသင်းမှ တာဝန်ရှိသူတစ်ဦးက CNI သတင်းဌာနသို့ ပြောသည်။

မြဝတီမှာ UID ကဒ်လုပ်နေကြသူများကိုတွေ့ရစဉ်

၎င်းက “အဲဒီလိုမျိုး လုပ်လိုက်တဲ့အခါကြတော့ အပေါ်မှာ ရောက်နေတဲ့သူတွေက သူတို့ဒေသ သူတို့ပြန်ပြီး UID ပြန်လုပ်ရမယ့် ပုံစံမျိုး ဖြစ်သွားတာပေါ့။ မြဝတီမှာ လုပ်လို့မရတော့ဘူးလေ။ လမ်းခရီးကြမ်းတယ် နောက် တောလမ်းတွေကနေ သွားရတဲ့အတွက်ကို ခရီးစရိတ်တွေက တအားများတယ်။ ခရီးစရိတ်တွေက ပုံမှန် သောင်း ကဏန်းပေါ့နော်။ မြဝတီ-ဘားအံဆိုရင် ပုံမှန်ဆို ၁ သောင်းခွဲလောက်နဲ့ သွားနေတဲ့ လမ်းခရီးကို အနိမ့်ဆုံး တစ်သိန်းသုံးသောင်း၊ တစ်သိန်းခွဲ အဲဒီလောက် ပေးပြီးတော့ သွားလာနေကြတာ တွေ့ရတယ်။ သူတို့တွေက အခုက တချို့ဆိုရင် အိမ်ငှားလိုက်တာပေါ့။ အိမ်ငှားပြီးတော့ စုနေကြတဲ့ပုံစံမျိုးတွေ တွေ့ရတယ်။ နောက်ပြီးတော့ ကျနော်တို့မြဝတီမှာက နှစ်ပိုင်းကွဲနေတယ်။ ထိုင်းဘက်ကိုမသွားပဲနဲ့ မြဝတီနယ်စပ် ကာစီနိုရုံတွေမှာ အလုပ်ဝင်ဖို့ လာစောင့်နေတဲ့ သူတွေလည်း ရှိတယ်။ အဲဒီလိုလူတွေကလည်း အလုပ်မဝင်ခင်ကို မြို့ပေါ်က ရပ်ကွက်တွေထဲမှာ အိမ်လုံးချင်းတွေငှားပြီး စုပြီးနေကြပြီးတော့ ချက်ပြုတ်စားသောက် နေတာမျိုးလည်း တွေ့ရတယ်” ဟု ပြောသည်။

သို့သော် မြဝတီဒေသခံ မဟုတ်ဘဲ သက်ဆိုင်ရာ အာဏာပိုင်များနှင့် ဆက်နွယ်နေသူများဖြစ်ပါက ပြုလုပ်ပေး ကြောင်း သိရသည်။

ယခုကဲ့သို့ မြဝတီဒေသခံများကိုသာ UID ပြုလုပ်ပေးမည်ဟု ထုတ်ပြန်ထားသော်လည်း အခြားဒေသခံများအတွက် ပွဲစားများမှ နည်းလမ်းတစ်မျိုးဖြင့် လုပ်ဆောင်လာကြဦးမည်ဖြစ်ကြောင်း ပရဟိတအသင်းအဖွဲ့နှင့် ဒေသခံများက ပြောသည်။

နယ်စပ်ဒေသများတွင် အလုပ်လုပ်ကိုင်ရန် ရောက်ရှိနေကြသူများ၊ တိုက်ပွဲရှောင်များကြောင့် လက်ရှိ မြဝတီမြို့၌ အိမ်ငှားရမ်းရ ခက်ခဲနေကြောင်း၊ ငှားရမ်း၍ရသော်လည်း အိမ်အငှားဈေးကွက်မှာ ယခင်ကထက် ဈေးမြင့်တက် နေကြောင်း သိရသည်။

မြဝတီမှာ UID ကဒ်လုပ်ရန် စောင့်နေကြသူများကို တွေ့ရစဉ်

လက်ရှိတွင် ကျပ်ငွေတန်ဖိုး ကျဆင်းမှုများကြောင့် မြဝတီမြို့တွင် အစစအရာရာ ဘတ်ငွေဈေးဖြင့်သာ ရောင်းချ နေကြကြောင်း မြဝတီဒေသခံ ဦးအောင်ခင်က CNI သတင်းဌာနသို့ ပြောသည်။

၎င်းက “မြဝတီမှာ‌တော့ ဘယ်ဆိုင်ရယ်လို့ မဟုတ်ဘူး ထိုင်းဘတ်နဲ့ ဆိုင်တိုင်းလိုလို ဝယ်လို့ရတယ်။ ကျပ်ရော ဘတ်ရော နှစ်မျိုးလုံးတွဲသုံးကြတာလေ။ ထိုင်းဘတ်သုံးချင်တဲ့သူရှိရင် ထိုင်းဘတ်နဲ့ဝယ်လို့ရတယ်။ တကယ်လို့ ထိုင်းဘတ်နဲ့ ဈေးနှုန်းသတ်မှတ်ထားတာကို ဝယ်မယ်ဆိုရင်လည်း ဗမာငွေကို တွက်ပြီးတော့ လက်ခံတာမျိုးတွေ ရှိတယ်။ ထိုင်းဘတ်ငွေနဲ့ပဲ ဈေးထားထားကြတယ်။ ဈေးနှုန်းတွက်တော့လည်း ထိုင်းဘတ်ငွေနဲ့ပဲ” ဟု ပြောသည်။

လက်ရှိတွင် မြဝတီနယ်စပ်ဂိတ်၌ အလုပ်သွားရောက် လုပ်ကိုင်မည့် သူများမှအပ အခြားကိစ္စဖြင့် သွားရောက်မည့် သူများ မရှိကြောင်းလည်း သိရသည်။

ထို့အပြင် တရားမဝင် ခိုးဝင်သည့် လမ်းကြောင်းမှာလည်း ပိုမိုများပြားလာသည့်အပြင် ယခင်က ကုန်ကျစရိတ် သိန်း ၂၀ ဝန်းကျင်ရှိသော်လည်း ယခုအခါတွင် သိန်း ၄၀ ဝန်းကျင်ရှိကြောင်း သိရသည်။

CNI News

၂၀၂၄ ခုနှစ်၊ ဩဂုတ် ၂၂

လက်ရှိ မြန်မာနိုင်ငံတွင် ကျပ်ငွေတန်ဖိုး တရှိန်ထိုးကျဆင်းနေသည့် ပြဿနာကို ပြန်လည်ထိန်းချုပ်ရန်အတွက် နိုင်ငံရေးတည်ငြိမ်ခြင်းမှအပ အခြားနည်းလမ်းများ ရှိနိုင်သေးသလားဆိုသည့်အပေါ် စီးပွားရေးလုပ်ငန်းရှင်များ၊ နိုင်ငံရေးလေ့လာသုံးသပ်သူများနှင့် ငွေကြေးကျွမ်းကျင်ပညာရှင်များအကြား သုံးသပ်ဆွေးနွေးလျက်ရှိနေသည်။

မြန်မာနိုင်ငံတွင် လတ်တလော ကြုံတွေ့နေရသည့် ကျပ်ငွေတန်ဖိုး ကျဆင်းကာ ငွေကြေး အဆမတန် ဖောင်းပွ လာနေခြင်းသည် နိုင်ငံရေး မတည်ငြိမ်သည့် အတွက်ကြောင့်ဖြစ်ကြောင်း၊ နိုင်ငံရေးတည်ငြိမ်ပါက စီးပွားရေးမှာ အထိုက်အလျောက် ပြန်လည်အဆင်ပြေသွားမည်ဖြစ်ကြောင်း ၎င်းတို့က သုံးသပ်ကြသည်။

ထိုပြဿနာအား ဖြေရှင်းရန်နည်းလမ်းမှာ နိုင်ငံရေးတည်ငြိမ်မှုအပြင် အခြားမရှိကြောင်း၊ လက်ရှိ အနေအထား အရ ထွက်ပေါက်တစ်ခု ရရန်ခက်ကြောင်း ဘဏ်ရေးရာကျွမ်းကျင်ပညာရှင် ဦးဋ္ဌေးအောင်ကြည်က CNI သတင်းဌာနသို့ ပြောသည်။

ထိုင်းငွေနဲ့ မြန်မာငွေကို တွေ့ရစဉ်

၎င်းက “အခုအချိန်က ဆေးမရှိဘူး။ ဆေးရှိတယ်လို့ ပြောတဲ့လူတွေကလည်း ဒါကို ထမင်းစားကောင်းအောင် ပြောတာပေါ့။ ကျနော့်အမြင်ကလေ။ အခက်အခဲ အကျပ်အတည်းတွေက ဒါတွေက မဖြစ်ဘူးမဟုတ်ဘူး ဖြစ်တယ် ကမ္ဘာမှာ။ ဖြစ်ပေမယ့် ၂ ချက်လိုတယ်။ နံပါတ်တစ်အချက်က နည်းစနစ်လိုတယ်။ နံပါတ်နှစ်အချက်က ဒီဥစ္စာကို ဖြေရှင်းနိုင်တဲ့ နောက်ခံအင်အား ငွေကြေးလိုတာပေါ့။ ဒီ ၂ ခုစလုံးက ကျနော်တို့မှာ မရှိဘူးလေ။ တည့်တည့် ပြောရ ရင် နိုင်ငံခြားရန်ပုံငွေ လိုတာပေါ့။ သူများနိုင်ငံရဲ့ အကူအညီလိုတာပေါ့။ ငွေရေးကြေးရေး အရလည်း လိုတယ်၊ နည်းပညာအရလည်း လိုတယ်။ အဲဒီ ၂ ခုလုံး ကျနော်တို့မှာမရှိဘူး။ နည်းပညာကတော့ မရှိဘူးမဟုတ်ဘူး ရှိမှာ ပေါ့။ လက်ရှိအနေအထားအရ ဆရာ့အမြင်ကတော့ ထွက်ပေါက်ရဖို့ခက်တယ်” ဟု ပြောသည်။

နိုင်ငံရေးမတည်ငြိမ်သည့် နိုင်ငံတိုင်း ငွေတန်ဖိုး ကျဆင်းနေခြင်း မဟုတ်ကြောင်း၊ ရုရှားနှင့် ယူကရိန်းသည် နိုင်ငံနှင့်ချီသော ပဋိပက္ခဖြစ်သော်လည်း ယူကရိန်းသည် နိုင်ငံတကာ၏ ထောက်ပံ့မှုများရရှိခြင်းနှင့် ရုရှားသည် လည်း ဖွံ့ဖြိုးပြီး အင်အားကြီးသည့် နိုင်ငံဖြစ်သောကြောင့် ၎င်းတို့ ငွေကြေးများမှာ ပုံမှန်လည်ပတ်၍ရနေကြောင်း စီးပွားရေးလေ့လာသုံးသပ်သူများက ထောက်ပြကြသည်။

နိုင်ငံရေးတည်ငြိမ်မှ ဖြေရှင်းနိုင်မည်ဆိုသည်မှာ ယေဘူယျအားဖြင့် မှန်ကန်သော်လည်း မြန်မာနိုင်ငံအတွက် နိုင်ငံခြားချေးငွေ လုံလောက်စွာ ရရှိမည်ဆိုပါက ကျပ်ငွေတန်ဖိုး ကျဆင်းမှုပြဿနာ ရပ်တန့်သွားနိုင်ကြောင်း စီးပွားရေးလုပ်ငန်းရှင်တစ်ဦးဖြစ်သည့် ဦးအောင်ပြည့်စုံက CNI သတင်းဌာနသို့ ပြောသည်။

 အိန္ဒိယငွေ ရူပီးကို တွေ့ရစဉ်

၎င်းက “ကျနော်တို့နိုင်ငံကြတော့ သဘာဝသယံဇာတ အရင်းအမြစ်တွေ ပေါကြွယ်ဝတယ်ဆိုပေမယ့် sanction (အရေးယူပိတ်ဆို့မှု) တွေ ရှိနေတယ်။ ဒီ sanction တွေ အပြင် ကျနော်တို့မှာက နိုင်ငံခြားချေးငွေကလည်း အလုံအလောက် မရဘူးပေါ့။ အခုလိုမျိုး နိုင်ငံရေးပြဿနာတွေ ဖြစ်နေတဲ့အချိန်မှာ ကျနော်တို့အတွက် နိုင်ငံတကာ က တကယ်စိတ်ရင်း စေတနာမှန်မှန်နဲ့ ရှိမယ်ဆိုရင် sanction တွေ ရုတ်သိမ်းပြီးတော့ အစိုးရအတွက် ထွက်ပေါက် တစ်ခု လုပ်ပေးနိုင်မယ်ဆိုရင် ပြည်သူတွေအတွက်လည်း ချောင်လည်နိုင်မယ်။ ကျပ်ငွေကျဆင်းမှု ပြဿနာလည်း ရပ်တန့်သွားမယ်လို့ သုံးသပ်လို့ရပါတယ်” ဟု ပြောသည်။

လက်ရှိတွင် နစကအနေဖြင့် နိုင်ငံတည်ငြိမ်ရန် ရွေးကောက်ပွဲကျင်းပနိုင်ရေးကို ဖော်ဆောင်နေသော်လည်း ထို ရွေးကောက်ပွဲ ကျင်းပနိုင်မှုသည် အခက်အခဲစိန်ခေါ်မှုများစွာ ရှိကြောင်းလည်း နိုင်ငံရေးလေ့လာသုံးသပ်သူများ အကြား သုံးသပ်မှုများရှိသည်။

ထိုသို့ ရွေး‌ကောက်ပွဲကျင်းပနိုင်ရေး ပြင်ဆင်နေချိန်ကြားထဲတွင် ကျပ်ငွေတန်ဖိုး ကျဆင်းမှုပြဿနာကို မည်သည့် အတိုင်းအတာအထိ ပြည်သူလူထုအနေဖြင့် ခံစားကြုံတွေ့ရမည်ကို မသိနိုင်ကြောင်း စီးပွားရေးလုပ်ငန်းရှင်များ၊ နိုင်ငံရေးလေ့လာသုံးသပ်သူများနှင့် ငွေကြေးကျွမ်းကျင်ပညာရှင်များက ထောက်ပြကြသည်။

လက်ရှိတွင် ကျပ်ငွေတန်ဖိုး ကျဆင်းမှုများကြောင့် နယ်စပ်ဒေသများတွင် ကျပ်ငွေအစား သက်ဆိုင်ရာ နယ်စပ် အလိုက် နိုင်ငံခြားငွေများကိုသာ ပြောင်းလဲလက်ခံ၍ အသုံးပြုလာနေကြကြောင်းလည်း သိရသည်။

CNI News

၂၀၂၄ ခုနှစ်၊ ဩဂုတ် ၂၁

ကျပ်ငွေတန်ဖိုး တရှိန်ထိုး ကျဆင်းလာမှုကြောင့် မြန်မာ-တရုတ်နယ်စပ်ဒေများ၊ မြန်မာ-ထိုင်း နယ်စပ် ဒေသများတွင် ကျပ်ငွေအစား နိုင်ငံခြားငွေကိုသာ ယခင်ကထက် ပိုမို လက်ခံ အသုံးပြုလာနေကြကြောင်း စီးပွားရေးလုပ်ငန်းရှင်များနှင့် ဒေသခံများထံက သိရသည်။

ယခုကဲ့သို့ ဖြစ်လာခြင်းသည် မြန်မာကျပ်ငွေတန်ဖိုး မမာတော့သည့်အတွက်ကြောင့်ဖြစ်ကြောင်း၊ မြန်မာကျပ်ငွေ တန်ဖိုးအတိုင်းအတာတစ်ခုတွင် ရပ်တန့်နေမည်ဆိုပါက ပြဿနာမရှိနိုင်သော်လည်း တရှိန်ထိုးကျဆင်းကာ ငွေကြေးဖောင်းပွမှုနှုန်း ပိုများလာသည့်အတွက် ယခုပြဿနာဖြင့် ကြုံရခြင်းဖြစ်ကြောင်း စီးပွားရေးလုပ်ငန်းရှင် တစ်ဦးဖြစ်သည့် ဦးအောင်ပြည့်စုံက CNI သတင်းဌာနသို့ပြောသည်။

“ငွေလဲလှယ်နှုန်းက မခိုင်မာပဲ ဖြစ်နေတဲ့အခါမှာ တစ်ဖက်မှာရှိတဲ့လုပ်ငန်းရှင်တွေ၊ ဈေးရောင်းတဲ့ လူတွေကလည်း ဒါသူတို့ကို အပြစ်သွားပြောလို့တော့မရဘူး။ ကိုယ့်နိုင်ငံရဲ့ အချုပ်အခြာအာဏာပိုင် နိုင်ငံထဲမှာ ဘာကြောင့် ကိုယ့် နိုင်ငံငွေကို မသုံးစွဲလဲဆို အရေးယူမယ်ဆိုရင် အရေးယူလို့ရတယ်ဆိုပေမယ့် တကယ့်တကယ် ရောင်းတဲ့သူတွေက ၅ ကျပ်တန်ပစ္စည်းကို ၁၀ နဲ့ အမြတ်တင်ပြီးရောင်းလိုက်တယ်။ အဲဒီ ၁၀ နဲ့ ရောင်းလိုက်တဲ့အချိန်မှာ သူတို့ပြန်ဝယ် တော့ အဲဒီပစ္စည်းက ၁၅ ကျပ်ဖြစ်နေပြီဆိုတော့ ဘယ်လိုမှကို အဆင်မပြေနိုင်တော့ဘူး ပေါ့။ အဲဒါကြောင့် ခိုင်မာ တဲ့ငွေကြေးတစ်ခုရှိနေတဲ့ ယွမ်ဆို ယွမ်နဲ့ရောင်းမယ်၊ ဘတ်နဲ့ ရောင်းမယ်။ အဓိက ကတော့ ကျနော်တို့နိုင်ငံက ထုတ်တဲ့ငွေစက္ကူမဟုတ်ဘဲနဲ့ နိုင်ငံခြားငွေသုံးစွဲမှုများလာမယ်ဆိုရင်လည်း ကျနော်တို့မှာ ရှိတဲ့ နယ်စပ်မှာရှိတဲ့ ပြည်သူတွေက နိုင်ငံခြားငွေရတဲ့အလုပ် လုပ်နေတယ်ဆိုရင်တော့ ပြဿနာမရှိဘူး။ မြန်မာငွေနဲ့ ပိုက်ဆံရပြီးတော့ နိုင်ငံခြားငွေပဲသုံးပြီး နိုင်ငံခြားငွေနဲ့ပဲ ရောင်းမယ်ဆိုရင် သူတို့ စားဝတ်နေရေး ခက်ခဲမယ်” ဟု ၎င်းက ပြောသည်။

ယခင်ကတည်းက နယ်စပ်ဒေသများတွင် ကျပ်ငွေနှင့် နိုင်ငံခြားငွေကို တပြိုင်တည်း သုံးစွဲကြခြင်းဖြစ်သည်။

မြန်မာကျပ်ငွေ တစ်သောင်းတန်နှင့် ငါးထောင်တန်များ

သို့သော် ယခုအခါတွင် မြန်မာ-တရုတ်နယ်စပ် မူဆယ်မြို့ရှိ အချို့ဆိုင်များမှာ ကျပ်ငွေအစား ယွမ်ငွေကိုသာ လက်ခံကြတော့ခြင်း၊ ထိုင်း-မြန်မာနယ်စပ် မြဝတီမြို့တွင်လည်း စက်သုံးဆီဖြည့်ရာ၌ ကျပ်ငွေနှင့်ဆိုပါက အကန့် အသတ်ဖြင့်သာရောင်းချပြီး ဘတ်ငွေပေးပါက လိုသလောက် ရောင်းချပေးခြင်းဖြစ်ကြောင်း သိရသည်။

ယခု ပြဿနာအား ဖြေရှင်းရန်အတွက် သက်ဆိုင်ရာဒေသရှိ အစိုးရအာဏာပိုင်အဖွဲ့အစည်းများအနေဖြင့် ကိုင်တွယ်ဖြေရှင်းရန်လိုအပ်မှုများ ရှိလာနိုင်ကြောင်းလည်း ထောက်ပြကြသည်။

ကျပ်ငွေတန်ဖိုး ကျဆင်းပြီး နိုင်ငံခြားငွေတန်ဖိုး မြင့်တက်လာနေခြင်းသည် တိုင်းပြည် ဆင်းရဲသွားသည့် သဘောကို ဖော်ပြကြောင်း ဘဏ်ရေးရာကျွမ်းကျင်ပညာရှင် ဦးဋ္ဌေးအောင်ကြည်က CNI သတင်းဌာနသို့ ပြောသည်။

“သူများတိုင်းပြည်နဲ့ ကိုယ့်တိုင်းပြည်နဲ့ ယှဉ်မယ်ဆိုရင် ကိုယ်ကဆင်းရဲ၊ ဆင်းရဲသွားတာ။ သူများက ပိုပြီး ချမ်းသာ၊ ချမ်းသာလာတာ။ ပြီးခဲ့တဲ့ နှစ် ၃၀ က ဘတ်ဈေးနဲ့ အခု ဘတ်နဲ့ ကျပ်နဲ့ လဲတဲ့ဈေးနဲ့ မတူတော့ဘူးလေ။ ဒါက တိုင်းပြည် ပိုပိုပြီးတော့ ဆင်းရဲသွားတာကိုပြတာပေါ့။ ဒါသည် ကိုယ့်တိုင်းပြည်က စီးပွားရေးအနေအထားက စွမ်းဆောင်ရည်မရှိလို့ပေါ့။ အဓိကက စီးပွားရေးစနစ်ကြီးကမှားနေတာ ကြာပြီ။ ဒီပုံအတိုင်းဆက်သွားရင် ပြဿနာက ပိုပို ဆိုးဆိုးလာမှာပေါ့။ တစ်နည်းအားဖြင့် ကိုယ့်ငွေတန်ဖိုး ကျကျပြီး သူများငွေတန်ဖိုး တက်တက် လာလေ ကိုယ့်တိုင်းပြည်က ပိုပို ဆင်းရဲသွားတယ်ဆိုတဲ့ သဘောကို ဖော်ပြတာပေါ့” ဟု ၎င်းကပြောသည်။

ဗဟိုဘဏ်အနေဖြင့် ငွေကြေးဖောင်းပွမှုနှုန်းကို လျော့ကျစေရန်အတွက် လာမည့် စက်တင်ဘာလ ၁၁ ရက်နေ့က စတင်ကာ ဘဏ်အတိုးနှုန်းများအား တိုးမြှင့်ပေးသွားမည်ဖြစ်ကြောင်း သြဂုတ် ၁၄ ရက်နေ့က ထုတ်ပြန်ကြေညာ ထားသည်။

ကျပ်နှင့် နိုင်ငံခြားငွေကြေးတန်ဖိုး ကွာဟမှုမှာ အင်မတန်မြင့်မားလာနေသည့်အတွက် နယ်စပ်ဒေသများတွင် နေထိုင်သူများသာမက စီးပွားရေးလုပ်ငန်းလုပ်ကိုင်သူအပါအဝင် ပြည်သူလူထုအားလုံး အကျပ်အတည်းနှင့် ရင်ဆိုင်နေရခြင်းဖြစ်သည်။

CNI News

၂၀၂၄ ခုနှစ်၊ ဩဂုတ် ၂၀

စက်သုံးဆီပြတ်လပ်မှု ဖြစ်ပေါ်သည့်အခါမျိုးတွင် မြန်မာနိုင်ငံဗဟိုဘဏ်မှ ဒေါ်လာများ ထုတ်ရောင်းပေးခြင်းသည် ကာလတိုအတွက်သာ ပြဿနာကိုဖြေရှင်းရန် အဆင်ပြေကြောင်း စီးပွားရေးလေ့လာသုံးသပ်သူများက CNI သတင်းဌာနသို့ ပြောသည်။

လက်ရှိ ဖြစ်ပေါ်နေသည့် စက်သုံးဆီပြဿနာကြောင့် ဗဟိုဘဏ်မှ ဒေါ်လာ သန်း ၁၀၀ ထုတ်ရောင်းပေးမည်ဟု ထုတ်ပြန်ထားသည်။

မြန်မာနိုင်ငံ၌ တစ်ရက်လျှင် စက်သုံးဆီး အသုံးပြုမှုသည် ဒေါ်လာ ၁၀ သန်းနှင့်အထက်မှာရှိသဖြင့် ဗဟိုဘဏ်ထုတ် ရောင်းပေးမည့် ပမာဏသည် ကာလတိုအတွက်သာ အဆင်ပြေမည်ဖြစ်ကြောင်း၊ ကာလရှည်အတွက် အဆင်ပြေ စေရန် အစိုးရမှ စက်သုံးဆီနှင့် ဒေါ်လာကို ချုပ်ကိုင်မထားရန်လိုကြောင်း စီးပွားရေးလေ့လာသုံးသပ်သူ တစ်ဦးက CNI သတင်းဌာနသို့ ပြောသည်။

၎င်းက “ကာလရှည် အဆင်ပြေဖို့ဆိုရင် ဒီစက်သုံးဆီကို အစိုးရကသွားပြီး ချုပ်ကိုင်လို့မရဘူး။ ဒေါ်လာကိုလည်း အစိုးရက ချုပ်ကိုင်မထားနဲ့။ အစိုးရက ဒါကိုချုပ်ကိုင်တဲ့ ရည်ရွယ်ချက်ကတော့ ကောင်းပါတယ် ဒါတွေဈေးမတက် အောင်နဲ့ ဈေးမကစားနိုင်အောင် လုပ်ပေးတာ။ ဒါပေမယ့် သူ့မှာ အဲဒီလို ဒေါ်လာ လုံလုံလောက်လောက် ထုတ် ပေးနိုင်တဲ့ အင်အားမရှိဘူး။ အဲဒီအခြေအနေမှာ လွှတ်ပေးလိုက်တာ အကောင်းဆုံးပဲ။ လွှတ်ပေးလိုက်ရင် သူ့ ဘာသာသူ ဈေးကွက်က ထိန်းပြီးတော့ လုပ်သွားလိမ့်မယ်။ ဒါ‌ပေမယ့် အဲဒီရဲ့ effect ကတော့ exchange rate တွေ ထပ်တက်ကောင်း တက်မယ်၊ ဒီဇယ် ဓာတ်ဆီဈေးတွေ ထပ်တက်ကောင်းတက်မယ်။ အခုဟာက ချုပ်ထားရင် လည်း တက်မယ်၊ ချုပ်ထားရင် မှောင်ခိုဈေးကွက်ဖြစ်ပြီးတက်မယ်။ လွှတ်ပေးလိုက်ရင် ဈေးကွက်က ကစားပြီး တော့ တက်မယ်၊ ၂ ခုလုံးက အတက်ကြီးပဲ။ ဘာလို့ဆို လက်ရှိစီးပွားရေး အခြေအနေအရ။ အဲဒီမှာ ကုန်ပစ္စည်း ရှားပါးတဲ့ အခြေအနေနဲ့ အတက်ခံမလား၊ ကုန်ပစ္စည်းပေါတယ် ဈေးပဲတက်တာဆိုတဲ့ အခြေအနေနဲ့ အတက်ခံ မလား အဲဒီ ၂ ခုကိုတော့ အစိုးရရွေးရမှာပေါ့” ဟု ပြောသည်။

စက်သုံးဆီထည့်ရန် စောင့်နေကြစဉ်

စက်သုံးဆီ လုပ်ငန်းရှင်များအနေဖြင့် တစ်နေ့နှင့်တစ်နေ့ နိုင်ငံခြားငွေဈေး ပြောင်းလဲမတည်ငြိမ်မှုများကြောင့် ကွာခြားချက် နည်းပါက ခုသာခံသာ အနေအထားရှိသော်လည်း လက်ရှိအနေအထားအရ ကွာခြားချက်များလွန်း သဖြင့် အခက်အခဲရှိကြောင်း၊ ဗဟိုဘဏ်ဘက်မှလည်း လုံလောက်စွာ မရောင်းချပေးနိုင်ကြောင်း စီးပွားရေး လေ့လာသုံးသပ်သူများက ထောက်ပြကြသည်။

ထို့အပြင် မြန်မာနိုင်ငံရှိ ဆီသိုလှောင်ကန်များ၏ ဝင်ဆံ့နိုင်မှု ပမာဏအား တိုးချဲ့သင့်ကြောင်းလည်း ထောက်ပြ ကြသည်။

စက်သုံးဆီရောင်းချသည့် လုပ်ငန်းရှင်များအား အစိုးရသတ်မှတ်ဈေးဖြင့် စက်သုံးဆီများကို ရောင်းချခိုင်းမည် ဆိုပါက တစ်ဖက်တွင် ထိုလုပ်ငန်းရှင်များအတွက် အကျိုးခံစားခွင့်အနေဖြင့် ပါမစ်များ ချပေးခြင်းတို့ ပြုလုပ်ပေး သင့်ကြောင်းလည်း အချို့စီးပွားရေးလုပ်ငန်းရှင်များက အကြံပြုမှုများရှိသည်။

ထိုကဲ့သို့ အစိုးရမှ ချပေးမည်ဆိုပါက လုပ်ငန်းရှင်တွင် အကျိုးခံစားခွင့်ရှိသကဲ့သို့ အစိုးရ၌လည်း တာဝန်ယူမှု၊ တာဝန်ခံမှု ရှိရမည်ဖြစ်ကြောင်း၊ ထိုသို့ လုပ်ဆောင်ခြင်းသည် စီးပွားရေးမူဘောင် ပေါက်ကွဲနိုင်ပြီး လက်ဝါးကြီး အုပ်မှုများ ဖြစ်လာနိုင်ကြောင်း စီးပွားရေးလုပ်ငန်းရှင် ဦးအောင်ပြည့်စုံက CNI သတင်းဌာနသို့ ပြောသည်။

စက်သုံးဆီထည့်ရန် စောင့်နေကြစဉ်

၎င်းက “ကျနော့်အမြင်ကတော့ အဲဒါက စီးပွားရေးမူဘောင် ပေါက်ကွဲနိုင်တဲ့ အခြေအနေမျိုးပေါ့။ အဲဒါကိုတော့ ကျနော် အားမပေးချင်ဘူး။ ဘာကြောင့်လဲဆိုတော့ အဲဒီလိုကျင့်သုံးတာမျိုး ဘင်္ဂလားဒေ့ရှ်၊ သီရိလင်္ကာမှာလည်း ကျင့်သုံးဖူးတယ်။ ဘာလဲဆိုတော့ အစိုးရရဲ့ သတ်မှတ်ထားတဲ့ ဈေးအတိုင်း ရောင်းတဲ့စက်သုံးဆီဆိုင်သည် အစိုးရ က ချပေးတဲ့ပါမစ် သို့မဟုတ် အကျိုးခံစားခွင့် တစ်စုံတစ်ရာကို ရမယ်ဆိုတာမျိုး လုပ်တယ်။ ပြဿနာက ဘာသွား ဖြစ်လဲဆိုတော့ အစိုးရဈေးနှုန်းအတိုင်း ရောင်းပေးမယ်ဆိုတဲ့ဆိုင်တွေက ဘယ်လိုဆိုင်တွေဖြစ်လာမလဲ၊ ဘယ်လို ကုမ္ပဏီတွေက လက်ဝါးကြီးအုပ်သွားမလဲ။ ဒီပါမစ်တွေကို သူတို့က ဘယ်လိုအသုံးချမလဲဆိုတဲ့ ပြဿနာပါ စဉ်းစား စရာရှိတယ်။ နောက်တစ်ခုက အချိန်ကာလ စက်သုံးဆီကို အစိုးရက ချပေးတဲ့ဈေးအတိုင်း အဲဒီဆိုင်က ရောင်းနေ မယ် ၅ နှစ်ရောင်းမှာလား၊ ၁၀ နှစ်ရောင်းမှာလား။ သူ့ကိုပေးမယ့် ပါမစ်ကတော့ အဲဒီနှစ်တွေမှာ ဘယ်နှခုအထိ ပေး နေမှာလဲ။ နိုင်ငံစီးပွားရေး ပြိုလဲဖို့အတွက်ကို ဒါက တစ်ဖက်တစ်လမ်းကနေ အားပေးနိုင်တယ်လို့ မြင်တယ်။ လုပ်ငန်းရှင်တွေဘက်မှာ အဂတိတွေ ဖြစ်လာနိုင်တယ်” ဟု ပြောသည်။

နစက လက်ထက်တွင် စက်သုံးဆီ ပြတ်လပ်မှုပြဿနာကို စတင်ကြုံတွေ့ရချိန်၌ လူထုနှင့် ရောင်းဝယ်သူများ အကြား စိုးရိမ်ထိတ်လန့်မှုများကြောင့် တည်ငြိမ်မှုမရှိခဲ့သော်လည်း ယခုနောက်ပိုင်းမှာတော့ မော်တော်ယာဉ် တစ်စီးလျှင် နှုန်းထားတစ်ခုဖြင့် ရောင်းချပေးခြင်းကို လုပ်ဆောင်လာနေကြသည်။

လက်ရှိ စက်သုံးဆီ ပြတ်လပ်မှုသည် ရန်ကုန်မြို့တစ်ခုတည်းတွင် ဖြစ်ပေါ်နေခြင်းမဟုတ်ဘဲ မန္တလေး၊ နေပြည်တော် အပါအဝင် မြို့ကြီးများတွင်ပါ တွေ့ကြုံနေရခြင်းဖြစ်ပြီး စက်သုံးဆီ တင်သွင်းသိုလှောင် ဖြန့်ဖြူးခြင်း လုပ်ငန်း ကြီးကြပ်ရေးကော်မတီမှ စိစစ်ဆောင်ရွက်ရန် နစကမှ ထုတ်ပြန်ထားသည်။

ထို့အပြင် စက်သုံးဆီဝယ်ယူခွင့်ပြုထားသည့် Importer ကုမ္ပဏီများအနေဖြင့် Terminal များတွင် Demand တင်ပြီး စက်သုံးဆီ အရောင်းဆိုင်များသို့ အမြန်ဆုံးပို့ဆောင်ရေး စီမံဆောင်ရွက်ပေးသွားရန် နစက မှ ထုတ်ပြန်ထားသည်။

CNI News

၂၀၂၄ ခုနှစ်၊ ဩဂုတ် ၁၉

မြန်မာနိုင်ငံအနေဖြင့် သမဝါယမစနစ်အား မဖြစ်မနေ ဖော်ဆောင်မည်ဆိုပါက စီမံခန့်ခွဲမှုအားကောင်းပြီး သေချာ ကြပ်မတ်နိုင်ရန် လိုအပ်ကြောင်း ထိုသို့ လုပ်နိုင်မှသာ အလုပ်ဖြစ်မည်ဟု စီးပွားရေးလေ့လာသုံးသပ်သူများနှင့် ဘဏ်ရေးရာကျွမ်းကျင်ပညာရှင်များက CNI သတင်းဌာနသို့ ပြောသည်။

ယခင်က သမဝါယမစနစ် မအောင်မြင်ခဲ့ဘဲ ကြွေးမြီများ တင်ခဲ့ခြင်းသည် စီမံခန့်ခွဲမှု မကောင်းခဲ့သည့်အတွက် ဖြစ်ကြောင်း ထောက်ပြကြသည်။

ယခုအခါတွင် ထိုစနစ်အား မဖြစ်မနေ အသက်သွင်းမည်ဆိုပါက သမဝါယမစနစ် အောင်မြင်ခဲ့သည့် ပြင်သစ်၊ နယ်သာလန်၊ နယူးဇီလန် တို့ကဲ့သို့ အခြေအနေမျိုး မြန်မာနိုင်ငံတွင် ရှိ/မရှိ စဉ်းစားရမည်ဖြစ်ကြောင်း ဘဏ်ရေးရာ ကျွမ်းကျင်ပညာရှင် ဦးဋ္ဌေးအောင်ကြည်က CNI သတင်းဌာနသို့ ပြောသည်။

လိုအပ်သည်များကို ဝယ်ယူရန် တန်းစီစောင့်ဆိုင်းနေကြသူများ

၎င်းက “နှစ်ချက်ပေါ့။ နံပါတ်တစ်အချက်က စီမံခန့်ခွဲမှုကောင်းရမယ်။ နံပါတ်နှစ် အချက်က အားနည်းချက်၊ လိုအပ်ချက်ကို ပံ့ပိုးတယ်ဆိုတာက မြင်တဲ့ တစ်ပွိုင့်တည်း၊ နှစ်ပွိုင့်တည်းမရဘူး။ ဆိုကြပါစို့ လူတွေ အရင်းအနှီး လိုတယ် ပိုက်ဆံတွေ ချေးပေးလိုက်တယ်။ ကိုယ်ချေးပေးလိုက်တဲ့ ပိုက်ဆံရဲ့ အတိုးနှုန်းသည် ဘင်္ဂလား လယ်သမားက လေးကျပ်၊ ငါးကျပ်ပေးရတဲ့အချိန်မှာ ဗမာလယ်သမား ဆယ့်သုံးကျပ် ပေးနေရတယ်။ ဆိုတော့ ဖြစ်နိုင်မလား သဘောက finance တစ်ဖွဲ့တည်း ကြည့်တာရှိသေးတာကို။ အားလုံးက ဗမာတစ်ပြည်လုံး အားနည်း တယ်။ management၊ Technology၊ business industry structure အစစ အရာရာအားနည်းတယ်။ ၆ ချက် လောက် ရှိတယ်။ အဲဒီ ၆ ချက်လုံးကို တစ်ပြိုင်တည်း ပံ့ပိုးပေးနိုင်မှရမှာ” ဟု ပြောသည်။

ပါတီစုံဒီမိုကရေစီစနစ်တွင် စျေးကွက်စီးပွားရေးစနစ်ကို ကျင့်သုံးနေပြီး အစိုးရက ပါဝင် မဆောင်ရွက်နိုင်သည့် လုပ်ငန်းများရှိကြောင်း၊ ၎င်းလုပ်ငန်းများ အဆင်ပြေချောမွေ့စွာ ဆောင်ရွက်နိုင်ရန် သမဝါယမစနစ်သည် သင့်တော်သည့် စနစ်တစ်ခုဖြစ်ကြောင်း နစကဥက္ကဋ္ဌက ပြောကြားထားခြင်းဖြစ်သည်။

သမဝါယမအသင်းများဖွဲ့ပြီး စိုက်ပျိုးမွေးမြူရေးနှင့် ကုန်ထုတ်လုပ်ငန်းများကို ဖွံ့ဖြိုးတိုးတက်အောင် ဆောင်ရွက်၍ ထိုမှ တစ်ဆင့် စိုက်ပျိုး မွေးမြူရေး ထုတ်ကုန်များ အခြေခံသည့် စက်ရုံ၊ အလုပ်ရုံများ တည်ထောင်ဆောင်ရွက် သွားစေလိုကြောင်းလည်း ၎င်းက ပြောကြားထားသည်။

ထို့အပြင် အရင်းအနှီး၊ နည်းပညာနှင့် အခြားလိုအပ်သည်များအား ထောက်ပံ့ကူညီသွားမှာဖြစ်ကြောင်း၊ သမဝါယမစနစ်ဖြင့် တန်ဖိုးမြင့် ထုတ်ကုန်များ ထုတ်လုပ်နိုင်ရေး ကြိုးပမ်းစေလိုကြောင်း ၎င်းက ပြောသည်။

လက်ရှိ မြန်မာနိုင်ငံ၏ အနေအထားအရ သမဝါယမစနစ်ကို အသက်သွင်းပါက မှောင်ခိုဈေးကွက်ပိုမို များပြား လာနိုင်ကြောင်းလည်း စီးပွားရေးလေ့လာသုံးသပ်သူများနှင့် ဘဏ်ရေးရာကျွမ်းကျင်ပညာရှင်များက သုံးသပ် ကြသည်။

ကိုဗစ်ကာ ရန်ကုန်မြို့ အလုံမြို့နယ်ရှိ သမဝါယမအသင်းစုမှ ငါးများကို သက်သာဈေးနှုန်းများဖြင့် ရောင်းချပေးနေစဉ်

ထို့အပြင် သမဝါယမစနစ်အား တစ်နိုင်ငံလုံးအတိုင်းအတာဖြင့် ပြုလုပ်မည်ဆိုပါက အဆင်မပြေကြောင်း စီးပွားရေးလေ့လာသုံးသပ်သူတစ်ဦးက CNI သတင်းဌာနသို့ ပြောသည်။

“တစ်နိုင်ငံလုံးအတိုင်းအတာနဲ့ လုပ်နိုင်ဖို့က အဆင်မပြေဘူး။ ဥပမာ ကျေးရွာအုပ်စု တစ်ခုမှာ လုပ်ရင် လုပ်နိုင်မယ်၊ မြို့နယ်တစ်ခုလုံးမှာ လုပ်ကောင်းလုပ်နိုင်မယ်။ သမဝါယမက အဓိကက စီးပွားရေးတိုးတက်ဖို့ ဆိုတာထက် SME တွေ စုစုစည်းစည်း လုပ်နိုင်ကိုင်နိုင်ဖို့အတွက်ပဲ အဓိကရည်ရွယ်တာ။ အဲဒီ SME တွေရဲ့ နိုင်ငံစီးပွားရေးကို support ပေးနိုင်တာက ဘယ်လောက်မှမရှိဘူး less than 25% ပဲ။ ၄ ပုံ ၂ ပုံတောင်မရှိဘူး။ ကျန်တဲ့ ၇၅ ရာခိုင်နှုန်း လောက် က အကြီးစားလုပ်ငန်းကြီးတွေကပဲ support လုပ်နိုင်တာ။ အဲဒီ အကြီးစားလုပ်ငန်းကြီးတွေကလည်း သမဝါယမ  လုပ်ဖို့ မလိုဘူး။ သမဝါယမစနစ်ကြီး နိုင်ငံရဲ့ စီးပွားရေးကို ဦးဆောင်ဖို့ဆိုတာတော့ မဖြစ်နိုင်တဲ့အခြေအနေပဲ” ဟု ၎င်းက ပြောသည်။

နိုင်ငံတကာတွင် သမဝါယမစနစ်အား အသေးစား၊ အငယ်စား စီးပွားရေး လုပ်ငန်းများတွင်သာ အသုံးပြုကြခြင်း ဖြစ်ကြောင်း၊ မြန်မာနိုင်ငံအနေဖြင့် သမဝါယမစနစ်သို့ ပြန်သွားမည်ဆိုပါက ၎င်းတို့ကဲ့သို့သာ ရည်ရွယ်လုပ်ဆောင် ၍ ရမည်ဖြစ်ကြောင်း စီးပွားရေးလေ့လာသုံးသပ်သူများက ထောက်ပြကြသည်။

မြန်မာနိုင်ငံ၏ GDP စာရင်းတွင် သမဝါယမမှ ထုတ်လုပ်ပေးနိုင်မှုသည် ၁ ရာခိုင်နှုန်းသာရှိပြီး ပုဂ္ဂလိကကဏ္ဍမှ ၇၀ ရာခိုင်နှုန်းအထိ ထုတ်လုပ်ပေးနိုင်ကြောင်း၊ အစိုးရကဏ္ဍအနေဖြင့် ၃၀ ရာခိုင်နှုန်းခန့် ထုတ်လုပ်ပေးနိုင်နေခြင်း ဖြစ်ကြောင်း သိရသည်။

CNI News 

၂၀၂၄ ခုနှစ်၊ သြဂုတ် ၁၉

ရန်ကုန်မြို့တွင် စက်သုံးဆီ မှောင်ခိုစျေးကွက် များပြားလာပြီး ၁ လီတာလျှင် ကျပ် ၉၀၀၀ အထိ ဖြစ်ပေါ်နေ ကြောင်း ရန်ကုန်မြို့မှာ ဘေးတွဲဆိုင်ကယ် မောင်းနှင်သူများက CNI သတင်းဌာနသို့ ပြောသည်။

ဘေးတွဲဆိုင်ကယ် မောင်းနှင်သူများသည် စားဝတ်နေရေးကြောင့် အခြားသူများကဲ့သို့ စက်သုံးဆီ ရရှိရေးအတွက် အချိန်တစ်ခုပေးပြီး တန်းမစီနိုင်ကြသဖြင့် မှောင်ခိုစျေးကွက်မှ စက်သုံးဆီကိုသာ အားထားနေရခြင်းဖြစ်ကြောင်း၊ လက်ရှိတွင် ဆီပြတ်လပ်၍ အလုပ်ရပ်နားရမှုများထိ ရှိကြောင်းလည်း သိရသည်။

မှောင်ခိုစျေးကွက်တွင် ပုဂ္ဂလိကဆိုင်များမှ ရောင်းချသည့် စက်သုံးဆီ စျေးနှုန်းထက် သုံးဆနီးပါး မြင့်တက်နေသော ကြောင့် အခက်အခဲကြုံတွေ့နေရကြောင်း ဘေးတွဲဆိုင်ကယ် အငှားယာဥ်မောင်းနှင်သူ တစ်ဦးက ပြောသည်။

၎င်းက "အရင်က ဆီဆိုင်တွေမှာ သွားဖြည့်လို့ရတော့ လွယ်တယ်လေ၊ အချိန်ကုန်လည်း သက်သာတယ်၊ ပြီးတော့ ခရီးသည်လည်းရတော့ နေ့တွက်ကိုက်တယ်။ အခုကကျ ဆီကလွယ်ဖို့နေနေသာသာ အတန်းလိုက်ကြီး  တန်းစီ နေရတော့ အချိန်ကုန် လူပင်ပန်းတာပေါ့။ အဲဒါကြောင့် နှစ်ဆင့် ပြန်လည်ရောင်းချတာတွေ ဥပမာ (မှောင်ခို) လို မျိုး ‌ရောင်းချတာတွေစီကပဲ ဝယ်ကြရတာပေါ့။ အဲလို ဝယ်ရတဲ့အခါ စျေးက သူတို့ပြောသလောက် ပေးရတာပေါ့။ ဒီမနက်ပဲ ကျနော်ဝယ်လာတာ တစ်လီတာ ၉၀၀၀ နဲ့ နှစ်ဗူးဝယ်လာတာ မှောင်ခိုမှာက အခု ၈၀၀၀၊ ၉၀၀၀ ထက် မလျော့တော့ဘူးလေ" ဟု CNI သတင်းဌာနသို့ ပြောသည်။

စက်သုံးဆီရရှိရေး မော်တော်ယာဉ်များ တန်းစီနေကြစဉ်

စက်သုံးဆီ မှောင်ခိုရောင်းချသူများသည် ပုဂ္ဂလိက စက်သုံးဆီဆိုင်ရှိ မန်နေဂျာများဖြင့် ညှိနှိုင်းကာ အရောင်း/ အဝယ် ပြုလုပ်ကြပြီး ပြင်ပ၌ တဆင့် ပြန်လည်ရောင်းချကြခြင်းများရှိကြောင်း သိရသည်။

ထို့အတူ စက်သုံးဆီ တန်းစီသော ယာဥ်တန်းများထဲတွင်လည်း မှောင်ခိုအဖြစ် ပြန်လည်ရောင်းချရန် တန်းစီနေ သည့် ယာဉ်များလည်းရှိကြောင်း သိရသည်။

လက်ရှိ စက်သုံးဆီ တန်းစီကြရာတွင် မိမိကိုယ်ပိုင် လိုအပ်ချက်ကြောင့် တန်းစီသူများရှိသကဲ့သို့ နေ့စဥ် လုပ်ကိုင် နေသည့် အလုပ်အားမလုပ်ဘဲ စီးပွားဖြစ်အနေဖြင့် တန်းစီနေကြသူများရှိကြောင်း ရန်ကုန်မြို့နေသူတစ်ဦးက ပြောသည်။

၎င်းက "တချို့ဆိုရင် စီးပွားဖြစ်အနေနဲ့ ဒီဆီတန်းစီတာကိုလုပ်ပြီး ပြန်‌ရောင်းကျတာပေါ့၊ ကျန်တဲ့အလုပ်တောင် မလုပ်ဘဲ ဆီတိုးတဲ့ အလုပ်ပဲလုပ်ကိုင်တယ်။ မတိုးနိုင်တဲ့ သူတွေကိုကြတော့ သူတို့က ဆိုင်ကပေါက်စျေးထက် နှစ် ဆ၊ သုံးဆလောက်နဲ့ ပြန်ရောင်းတာပေါ့။ ဆီဆိုင် မန်နေဂျာတွေကလည်း မှောင်ခိုသမားတွေနဲ့ ညှိနှိုင်းလုပ်တာတွေ လည်းရှိတယ်၊ ဝန်ထမ်းတွေ အနေနဲ့လည်း ပူးပေါင်းပြီး လုပ်တာတွေလည်းရှိတယ်" ဟု CNI သတင်းဌာနသို့ ပြော သည်။

စက်သုံးဆီရရှိရေး မော်တော်ယာဉ်များ တန်းစီနေကြစဉ်

စက်သုံးဆီ ပြတ်လပ်နေမှုကြောင့် ပုဂ္ဂလိက စက်သုံးဆီဆိုင်များသည် ဆီကို လိုသ‌လောက်‌ ရောင်းချပေးခြင်း မရှိဘဲ အနည်းဆုံး ၃၀၀၀၀ ကျပ်မှ အများဆုံး ၅၀၀၀၀ ကျပ်အထိသာ ရောင်းချပေးလျက်ရှိသည်။

လက်ရှိ စက်သုံးဆီ ပြတ်လပ်မှုသည် ရန်ကုန်မြို့ တစ်ခုတည်းတွင် ဖြစ်ပေါ်နေခြင်း မဟုတ်ဘဲ မန္တလေး၊ နေပြည်တော် အပါအဝင် မြို့ကြီးများတွင်ပါ တွေ့ကြုံနေရခြင်းဖြစ်ပြီး ယခင်ကထက် ပို၍ဆိုးရွားကြောင်းလည်း သုံးသပ်မှုများရှိသည်။

မြန်မာနိုင်ငံတော်ဗဟိုဘဏ်အနေဖြင့် နိုင်ငံခြားငွေကြေးဈေးကွက်တွင် ‌စက်သုံးဆီလုပ်ငန်းရှင်များအား အမေရိကန်ဒေါ်လာ သန်း ၁၀၀ ပံ့ပိုးပေးရန် စီစဉ်ထားကြောင်း မြန်မာနိုင်ငံတော်ဗဟိုဘဏ်က သြဂုတ် ၁၄ ရက်တွင် ထုတ်ပြန်ထားသည်။

ထိုအခြေအနေများနှင့်ပတ်သက်၍ စက်သုံးဆီ တင်သွင်းသိုလှောင် ဖြန့်ဖြူးခြင်းလုပ်ငန်း ကြီးကြပ်ရေးကော်မတီမှ စိစစ်ဆောင်ရွက်ရန်၊ စက်သုံးဆီ ဝယ်ယူခွင့်ပြုထားသည့် Importer ကုမ္ပဏီများအနေဖြင့် Terminal များတွင် Demand တင်ပြီး စက်သုံးဆီ အရောင်းဆိုင်များသို့ အမြန်ဆုံးပို့ဆောင်ရေး စီမံဆောင်ရွက်ပေးသွားရန် နစကမှ ထုတ်ပြန်ထားသည်။

CNI News

၂၀၂၄ ခုနှစ်၊ ဩဂုတ် ၁၆

သမ္မတဦးသိန်းစိန်(ငြိမ်း)သည် လာမည့်နှစ် ကြားဖြတ်အစိုးရအဖွဲ့တွင် ပါဝင်လာနိုင်သည်ဟု မှန်းဆချက်များ ထွက်ပေါ်လာနေခြင်းကြောင့် စီးပွားရေး ကျဆင်းမှုကနေ ကြီးပွားချမ်းသာနေသော စီးပွားရေးသမားများသည် ကြောက်ရွံ့မှုများရှိနေကြောင်း စီးပွားရေးလေ့လာသုံးသပ်သူများက ထောက်ပြကြသည်။

ယခင် ဗိုလ်ချုပ်မှူးကြီး သန်းရွှေ(ငြိမ်း) လက်ထက်မှ ဦးသိန်းစိန် ဦးဆောင်သည့် အစိုးရအဖွဲ့သို့ နိုင်ငံတော်အာဏာ လွှဲပြောင်းပေးခဲ့ရာတွင် စီးပွားရေးနှင့်ပတ်သက်ပြီး အကုန်ဖွင့်ပေးခဲ့သည့် အတွက်ကြောင့် စီးပွားရေးတိုးတက်ခဲ့ သည်။

ထို့ကြောင့် လက်ရှိနိုင်ငံရေးတွင် သမ္မတဦးသိန်းစိန်(ငြိမ်း) ပါဝင်လာမည်ကို စီးပွားရေး ကျဆင်းမှုကနေ အခွင့်အရေးရှာပြီး ကြီးပွားချမ်းသာနေသော စီးပွားရေးသမားများက ကြောက်ရွံ့နေကြသည်။

စီးပွားရေးလေ့လာသုံးသပ်သူတစ်ဦးက “ဦးသိန်းစိန် လက်ထက်က သိသလောက်တော့ ပေါ်လစီပိုင်းဆိုင်ရာ ချုပ်ကိုင်ထားတာမရှိဘူး။ ဒါပေမယ့် အားလုံးကို ဖွင့်ပေးလိုက်တာမျိုးတော့ ရှိတယ်။ အဲဒီလို‌ အားလုံးကို ဖွင့်ပေး လိုက်တဲ့အတွက် ခရိုနီပဲပြောမလား။ နဂိုတုန်းက ဖွင့်မပေးတုန်းက အဲဒီဖွင့်မပေးတဲ့အပေါ်မှာ အကျိုးအမြတ် ရနေတဲ့ သူတွေကတော့ အဲဒီဖွင့်ပေးတာကို ကြောက်မှာပေါ့လေ။ အဲဒါကြောင့်လို့ပဲ ထင်တယ်။ တခြားကြောက် စရာအချက်တော့ မတွေ့မိသလိုပဲ။ ဦးသိန်းစိန် တက်တုန်းက စစ်အစိုးရအုပ်ချုပ်ရေးကနေ ဒီမိုကရေစီဘက်ကို ပြောင်းတဲ့အခါကြတော့ နိုင်ငံတကာကလည်း လက်ခံတယ်၊ ကြိုဆိုတယ်။ ပြည်တွင်းကလည်း နဂိုတုန်းက တင်းတင်းကြပ်ကြပ် နေခဲ့တာကနေ Relax ဖြစ်သွားတဲ့ဟာဆိုတော့ ပြည်တွင်းရော ပြည်ပရော အဲဒီတုန်းက ထောက်ခံတယ် ပြောရမှာပေါ့။ သူလုပ်ခဲ့တဲ့ ဟာတွေကလည်း လုပ်နည်းကိုင်နည်းတွေ မှန်တယ်။ မှန်တယ်ဆိုတာ က အရင်တုန်းက ပိတ်ထားတာတွေကို ဖွင့်ပေးရုံပါပဲ။ သိပ်အများကြီး ပညာသားပါးပါးတော့ မဟုတ်ဘူး” ဟု CNI သတင်းဌာနသို့ ပြောသည်။

သမ္မတ ဦးသိန်းစိန်(ငြိမ်း) တရုတ်ကို သွားစဉ်

သမ္မတဦးသိန်းစိန်(ငြိမ်း)သည် နအဖ၏ ဗဟိုချုပ်ကိုင်မှုစနစ်ကနေ ဒီမိုကရေစီစနစ်သို့ ကူးပြောင်းခဲ့သည့်အတွက် ပြည်တွင်း/ပြည်ပမှ ထောက်ခံမှုများ ရရှိခဲ့ခြင်းဖြစ်ကြောင်း၊ သို့သော် လက်ရှိမြန်မာနိုင်ငံ၏ အခြေအနေမှာ လွတ်လပ်သည့် အခြေအနေမှ ချုပ်ကိုင်ထားသော အနေအထားသို့ ပြန်လည်ရောက်ရှိသွားသဖြင့် မတူညီကြောင်း ထောက်ပြသူများလည်း ရှိကြသည်။

ယခင် ဗိုလ်ချုပ်မှူးကြီး သန်းရွှေ(ငြိမ်း) လက်ထက်မှ ဦးသိန်းစိန်သို့ လွှဲပြောင်းပေးခဲ့ရာတွင် နိုင်ငံရေးမှာ တည်ငြိမ် နေပြီး နိုင်ငံတကာ ရင်းနှီးမြှုပ်နှံမှုများ ဝင်ရောက်လာသကဲ့သို့ နိုင်ငံခြားငွေ‌ဈေးနှုန်းများ၊ ကုန်ဈေးနှုန်းများ၊ ကား ဈေးနှုန်းများ၊ ဖုန်းဆင်းကဒ် ဈေးနှုန်းများမှာလည်း လျော့ကျသွားခဲ့သည်။

အလားတူ ပြည်ပမှ လူသုံးကုန်နှင့် စားသုံးကုန်များလည်း အလွယ်တကူ တင်သွင်းဖြန့်ဖြူးနိုင်အောင် ဖန်တီးပေးခဲ့ ခြင်းကြောင့် ဈေးနှုန်းသက်သာစွာဖြင့် ပြည်သူလူထုက သုံးစွဲနိုင်ခဲ့ကြသလို အိမ်ခြံမြေ ဈေးကွက်မှာလည်း တည် ငြိမ်ပြီး ဈေးသက်သာခဲ့သည်။

လက်ရှိ အခြေအနေသည် နိုင်ငံရေး မတည်ငြိမ်သည့်အတွက် သမ္မတဦးသိန်းစိန်(ငြိမ်း) အနေဖြင့် အစိုးရပိုင်းတွင် တာဝန်ယူမည်၊ မယူမည်ကို မပြောနိုင်ကြောင်းလည်း နိုင်ငံရေးအကဲခတ်များက ထောက်ပြကြသည်။

သမ္မတဦးသိန်းစိန်(ငြိမ်း) အုပ်ချုပ်ခဲ့စဉ်က ပြည်တွင်း၌ ဈေးနှုန်းများ အစစအရာရာ ကျဆင်းသွားခဲ့သော်လည်း ထိုအချိန်က ကမ္ဘာ့ဈေးကွက် အနေအထားအရကြည့်လျှင် ဈေးနှုန်းကျဆင်းသွားသည့်အဆင့် မဟုတ်ကြောင်း ဘဏ်ရေးရာကျွမ်းကျင်ပညာရှင် ဦးဋ္ဌေးအောင်ကြည်က CNI သတင်းဌာနသို့ ပြောသည်။

သမ္မတ ဦးသိန်းစိန်(ငြိမ်း) တရုတ်သမ္မတ ရှီကျင့်ဖျင်နဲ့တွေ့ဆုံစဉ်

၎င်းက “ဈေးဆိုတာက ဈေးနှုန်းမှန်ရတယ်။ ဈေးနှုန်းမမှန်ပဲနဲ့ ဈေးကွက်စီးပွားရေးက ဖြစ်လို့မရဘူး။ ဈေးတွေကျ တယ် ဥပမာ ကားဈေးပေါ့။ ကျနော်တို့ဆီမှာ harrier လိုကား အဲဒီအချိန်တုန်းက ၂၄၀ လောက်ရှိတယ်။ ထိုင်းရောက်သွားတော့ ထိုင်းမှာ ၁၅၀ လောက်ပဲရှိတယ်။ ကျတယ်ဆိုတာ ဒါကမ္ဘာ့ဈေးကွက် Right Price ကို ချဥ်းနင်းဝင်ရောက်တဲ့ အဆင့်ပဲရှိသေးတယ်။ တကယ်ကျတဲ့အဆင့် မဟုတ်သေးဘူး။ အဲဒီလိုဖြစ်မှ စျေးကွက်က စွမ်းဆောင်ရည်ရှိမှာ‌ပေါ့။ ဒါမျိုးကို မလိုလားဘူး ဆိုရင် ကျနော့်အမြင်အရ‌တော့ ကလေးဆန်တာပေါ့။ ကိုယ့်ရဲ့အတ္တအကျိုးစီးပွား တစ်ခုတည်းကို ကြည့်တာပေါ့” ဟု ပြောသည်။

သမ္မတဦးသိန်းစိန်(ငြိမ်း)သည် တရုတ် အပါအဝင် နိုင်ငံတကာနှင့် အပေါင်းလက္ခဏာဆောင်သည့် အနေအထားမှာ ရှိပြီး မကြာသေးခင်ကလည်း တရုတ်နိုင်ငံ၏ ဖိတ်ကြားမှုကြောင့် တရုတ်နိုင်ငံသို့ သွားရောက်ခဲ့ပြီး တရုတ်ကွန်မြူ နစ်ပါတီ ဗဟိုကော်မတီဝင်၊ တရုတ်ဗျူရိုအဖွဲ့ဝင်နှင့် တရုတ်နိုင်ငံခြားရေးဝန်ကြီးဝမ်ယိနှင့်လည်း တွေ့ဆုံခဲ့သည်။

အလားတူ ထိုတရုတ်ခရီးစဉ်အတွင်းမှာ တရုတ်သမ္မတ ရှီကျင့်ဖျင်နှင့်လည်း အခမ်းအနားတစ်ခုမှာ လက်ဆွဲ နှုတ်ဆက်ကာ တွေ့ဆုံခဲ့သေးသည်။

ထို့နောက် တရုတ်အစိုးရသည် လက်ရှိ မြန်မာ့နိုင်ငံရေး အကျပ်အတည်းကို ဖြေရှင်းရာတွင် သမ္မတဦးသိန်းစိန် (ငြိမ်း)ကို ကြားဖြတ်အစိုးရ သို့မဟုတ် အသွင်ကူးပြောင်းရေးအစိုးရ တစ်ရပ်ဖွဲ့စည်း၍ ရွေးကောက်ပွဲ ကျင်းပ ပေးကာ အပြောင်းအလဲ လုပ်သွားစေလိုသော သဘောထားရှိနေသည်ဟု ပြည်တွင်းနိုင်ငံရေးအကဲခတ်များက ထောက်ပြလျက်ရှိသည်။