CNI News
၂၀၂၄ ခုနှစ်၊ အောက်တိုဘာ ၂၈
နိုင်ငံခြားငွေ အပါအဝင် ရွှေဈေးနှုန်းများ ကျဆင်းစေရန် ဗဟိုဘဏ်၌ အရန်သိမ်းထားသည်များကို ထုတ် ရောင်းပေးခြင်းက လိုအပ်သည်ထက် ပိုမထုတ်သင့်ကြောင်း စီးပွားရေးလေ့လာသုံးသပ်သူများက ထောက်ပြ ကြသည်။
ထိုသို့ ထုတ်ရောင်းပေး၍ ကာလတို ဖြေရှင်းနည်းအစား အဓိကပြဿနာ အရင်းအမြစ်အား ရှာဖွေဖြေရှင်းရမည် ဖြစ်ကြောင်း၊ ထိုသို့ မဖြေရှင်းနိုင်သရွေ့ တစ်ခုမဟုတ်တစ်ခု ပြဿနာပေါ်နေမည်ဖြစ်ကြောင်း ဘဏ်ရေးရာ ကျွမ်းကျင်သူ ဦးဋ္ဌေးအောင်ကြည်က CNI သတင်းဌာနသို့ ပြောသည်။
၎င်းက “သူဘယ်အချိန်ထိ ရောင်းနိုင်မှာလဲလို့ Question ရှိတယ်လို့ ပြောခဲ့ဖူးတယ်။ အားလုံးကတော့ demand နဲ့ supply မှာ သွားပြီးနိဂုံးချုပ်တာပဲ။ foreign currency demand and supply ပေါ့။ အဓိကက supply က ချို့နဲ့နေ တယ်။ main problem ဒါကို မရှင်းနိုင်ဘဲနဲ့တော့ ကျန်တာက consequence problem ပေါ့ အကျိုးဆက်တွေ ကတော့ ဆက်ရှိနေဦးမှာပဲ။ rule course ကို ရှင်းနိုင်ဖို့ဆိုတာက ကျနော်တို့ရဲ့ political structure ၊ economic structure အပေါ် အများကြီး မူတည်တာပေါ့။ ဒီ structure ကြီး တစ်ခုလုံးကို စဉ်းစားပုံ စဉ်းစားနည်းက ပြောင်းလဲစဉ်းစားမှ ရတော့မှာလို့ ကျနော်ပြောဖူးပါတယ်။ အဓိကကတော့ rule course မမိဘဲနဲ့ ကျန်တဲ့ consequence problem တွေကတော့ ရှိနေမှာပဲ။ ဒီဟာလုပ်လိုက် ဟိုဘက်ကပြဿနာပေါ်လိုက်။ ပဲ့နင်းတော့ ဦးထောင် ဦးနင်းတော့ပဲ့ထောင် အဲဒီလိုပဲ ဖြစ်နေမှာပဲ” ဟု ပြောသည်။
နိုဝင်ဘာလတွင် နစက ဥက္ကဋ္ဌ တရုတ်သို့ သွားရောက်မည့်ခရီးစဉ်သငွေကြေးကိစ္စများပါဝင်နိုင်ပြီး တရုတ် ကြောင့် တိုးတက်သွားသည့်နိုင်ငံ သေချာမတွေ့ဖူးသေးကြောင်း၊ သီရိလင်္ကာနှင့် ဘင်္ဂလားဒေ့ရှ်တို့မှာ နမူနာ ဖြစ်ကြောင်း စီးပွားရေးလေ့လာသုံးသပ်သူများက ထောက်ပြကြသည်။
ထိုခရီးစဉ်သည် မြန်မာနိုင်ငံအတွက် အကျိုးသက်ရောက်မှု ရှိနိုင်သော်လည်း ၎င်းနိုင်ငံများကဲ့သို့ မဖြစ်စေရန် သေချာဦးဆောင်၍ လုပ်ဆောင်ရမည်ဖြစ်ကြောင်းလည်း ၎င်းတို့က သုံးသပ်သည်။
မြန်မာကျပ်ငွေ၊ နိုင်ငံခြားဒေါ်လာငွေနှင့် အကယ်ဒမီအခေါက်ရွှေ
အရန်သိမ်းထားသည်များကို အထိန်းအကွပ်မရှိ ထုတ်ရောင်းမည်ဆိုပါက ၂၀၂၅ ခုနှစ် ရွေးကောက်ပွဲ ကျင်းပပြီး တက်လာမည့် အစိုးရအသစ်အပေါ် အခက်အခဲဖြစ်စေနိုင်ကြောင်း စီးပွားရေးလေ့လာသုံးသပ်သူတစ်ဦးက CNI သတင်းဌာနသို့ ထောက်ပြပြောဆိုသည်။
“ဗဟိုဘဏ်က ထုတ်ရောင်းတာတွေ ခပ်စိတ်စိတ်ဖြစ်လာတယ်။ အရင်ကတစ်ခါမှ မရောင်းဖူးဘူး။ နိုင်ငံခြားငွေ ထုတ်ရောင်းတဲ့ဟာကတော့ သိသာတယ်။ ရွှေရော ဒီဗဟိုဘဏ်မှာက နိုင်ငံတော်မှာက အရန်ရွှေလည်း ရှိတယ်။ အဲဒီရွှေတွေပါ ထုတ်ရောင်းနေတယ်။ ဒါလည်း နည်းနည်းတော့ ထည့်စဉ်းစားရမယ်။ ဘာလို့ဆို ပွင့်ပွင့်လင်းလင်း ပြောရရင် ရှေ့နှစ်မှာ ရွေးကောက်ပွဲလုပ်မယ်။ ရွေးကောက်ပွဲလုပ်ပြီး တက်လာတဲ့ အစိုးရဖြစ်ချင်တာဖြစ် နိုင်ငံတော်မှာရှိတဲ့ အရန်ငွေရော အရန်ရွှေရောကို သုံးသွားမယ်ဆိုတဲ့ သဘောလားတော့ မသိဘူး။ အဲဒီလိုလည်း စဉ်းစားရတာပေါ့လေ။ ဒါက အခုရွှေနဲ့ငွေ ဈေးကျပြီးတော့ ငြိမ်နေတဲ့ အခြေအနေကို သုံးသပ်ရတာပေါ့” ဟု ၎င်းက ပြောသည်။
နစကဥက္ကဌ ဗိုလ်ချုပ်မှူးကြီးမင်းအောင်လှိုင်သည် လာမည့် နိုဝင်ဘာလ၌ တရုတ်သို့ သွားရောက်မည့် ခရီးစဉ်သည် ဘက်ပေါင်းစုံ၌ တရုတ်ဘက်မှ ကူညီထောက်ပံ့မှုများရရှိရန်အတွက် သွားရောက်တွေ့ဆုံခြင်းဖြစ်ပြီး ချေးငွေများ လည်း ရရှိလာနိုင်ကြောင်း စီးပွားရေးလေ့လာသုံးသပ်သူများက ယူဆကြသည်။
ထိုသို့ ကူညီထောက်ပံ့မှုများရရှိရေး ညှိနှိုင်းဆွေးနွေးကြရာတွင် တရုတ်ကလည်း သူ၏ အကျိုးစီးပွားအတွက် ပြန်လည်တောင်းဆိုမှုများ ပြုလုပ်လာနိုင်ကြောင်း တရုတ်မှ ရပ်ဝန်းတစ်ခု ၊ လမ်းကြောင်းတစ်ခု One Belt One Road (OBOR) ကို အဓိက လိုချင်နေသဖြင့် ထိုစီမံကိန်း အကောင်အထည်ဖော်နိုင်ရေး တောင်းဆိုလာနိုင်ဖွယ် ရှိကြောင်းလည်း သုံးသပ်ကြသည်။
