CNI Sport News
၂၀၂၅ ခုနှစ်၊ နိုဝင်ဘာ ၁၇
နော်ဝေအသင်းဟာ ၂၀၂၆ ကမ္ဘာ့ဖလား ခြေစစ်ပွဲ အုပ်စု နောက်ဆုံးပွဲစဉ်မှာ အီတလီအသင်းကို ၄ ဂိုး-၁ ဂိုးနဲ့ ဂိုးပြတ် အနိုင်ရပြီး ၁၉၉၈ နောက်ပိုင်း ကမ္ဘာ့ဖလားပြိုင်ပွဲကို ပထမဆုံးအကြိမ် ယှဉ်ပြိုင်ခွင့်ရရှိခဲ့ပါတယ်။
ဒီပွဲမှာ အက်စ်ပိုဆီတိုက အီတလီအသင်းအတွက် ဦးဆောင်ဂိုး သွင်းယူနိုင်ခဲ့ပေမယ့် နော်ဝေအသင်းအတွက် နူဆာက ချေပဂိုးသွင်းပြီး ဟာလန်းက ၂ ဂိုးနဲ့ လာဆန်က ၁ ဂိုးသွင်းယူခဲ့တာပါ။
နော်ဝေအသင်းဟာ ဒီနိုင်ပွဲကြောင့် ခြေစစ်ပွဲစဉ် ၈ ပွဲစလုံး ရာနှုန်းပြည့် နိုင်ပွဲရခဲ့ပြီး ၂၀၂၆ ကမ္ဘာ့ဖလားပြိုင်ပွဲ ယှဉ်ပြိုင်ခွင့်ရခဲ့တာ ဖြစ်ပါတယ်။
အီတလီအသင်းကတော့ ကမ္ဘာ့ဖလားပြိုင်ပွဲ ဝင်ခွင့်ရနိုင်ဖို့အတွက် ပလေးအော့ဖ် ထပ်ပြီးယှဉ်ပြိုင်ရမှာပါ။
နော်ဝေအသင်းဟာ ယူရို ၂၀၀၀ ပြိုင်ပွဲနောက်ပိုင်း အဓိကပြိုင်ပွဲတစ်ခုကို ပထမဆုံးအကြိမ် ပြန်လည် ယှဉ်ပြိုင်ခွင့် ရခဲ့တာ ဖြစ်ပါတယ်။
နော်ဝေအသင်းသားတွေကို တွေ့ရစဉ်
မန်စီးတီးအသင်း တိုက်စစ်မှူး ဟာလန်းဟာ ခြေစစ်ပွဲမှာ နော်ဝေအသင်း သွင်းယူနိုင်ခဲ့တဲ့ ၃၇ ဂိုးထဲက ၁၆ ဂိုးကို သွင်းယူနိုင်ခဲ့တာပါ။
ဟာလန်းက ဖိအားတွေနဲ့ အခြားအရာတွေ အများကြီး ခံစားခဲ့ရပေမယ့် ကမ္ဘာ့ဖလား ဝင်ခွင့်ရခဲ့တာကြောင့် ပျော်ရွှင်တယ်လို့ ပွဲအပြီး TV2 နဲ့ အင်တာဗျူးမှာ ပြောခဲ့ပါတယ်။
နော်ဝေအသင်းခေါင်းဆောင် အိုဒီဂတ်ကလည်း ကမ္ဘာ့ဖလားပြိုင်ပွဲ ယှဉ်ပြိုင်ခွင့်ရဖို့ အိပ်မက်အတွက် အချိန် အတော်ကြာ ကြိုးစားခဲ့ရတဲ့ အရာဖြစ်ပြီး အတူတကွ ကြိုးစားကာ လုံးဝယုံကြည်မှုရှိခဲ့တဲ့အတွက် ဒီအောင်မြင်မှုကို ရခဲ့တယ်လို့ ပြောခဲ့တာပါ။
အီတလီအသင်းနည်းပြ ဂတ်တူဆိုက ဂိုးပြတ်အရေး နိမ့်ခဲ့တဲ့ရလဒ်အတွက် ပရိသတ်တွေကို တောင်းပန်ခဲ့ပြီး ကမ္ဘာ့ဖလား ဝင်ခွင့်ရယူနိုင်ဖို့ ကြိုးစားသွားမယ်လို့ ပြောခဲ့ပါတယ်။
အီတလီအသင်းဟာ ပြီးခဲ့တဲ့ ၂၀၁၈ နဲ့ ၂၀၂၂ ကမ္ဘာ့ဖလားပြိုင်ပွဲတွေမှာ ခြေစစ်ပွဲ မအောင်မြင်ခဲ့တာကြောင့် ၂၀၂၆ ကမ္ဘာ့ဖလားပြိုင်ပွဲကို ထပ်ပြီး လွဲချော်မယ့်အပေါ် ပရိသတ်တွေက စိုးရိမ်နေကြပါတယ်။
အီတလီအသင်းဟာ ပလေးအော့ဖ် ပွဲတွေကို ၂၀၂၆ ခုနှစ်၊ မတ်လမှာ ယှဉ်ပြိုင်ရမှာဖြစ်ပါတယ်။
Source: CNA
