CNI Sport News
၂၀၂၅ ခုနှစ်၊ နိုဝင်ဘာ ၁၅
ယူနိုက်တက်အသင်းဟာ တူရကီကလပ် ထရက်ဇွန်စပေါ်အသင်းထံ အငှားချထားတဲ့ ကင်မရွန်းဂိုးသမား အိုနာနာကို ရာသီကုန်ချိန်မှာ ရောင်းချဖို့ ဆုံးဖြတ်ထားတယ်လို့ ဖာဘရီဇီယိုရိုမာနိုက ဖော်ပြထားပါတယ်။
၂၀၂၃ ခုနှစ်က ပေါင် ၄၇.၂ သန်းနဲ့ အင်တာမီလန်အသင်းကနေ ပြောင်းရွှေ့လာခဲ့တဲ့ အိုနာနာဟာ ကြီးမားတဲ့ အမှားအယွင်းတွေ အများအပြား ပြုလုပ်ခဲ့တာကြောင့် ယူနိုက်တက်အသင်းမှာ သူ့ရဲ့နံပါတ်တစ်နေရာ ဆုံးရှုံး ခဲ့တာပါ။
အိုနာနာဟာ ထရက်ဇွန်စပေါ်အသင်းထံ အငှားနဲ့ မပြောင်းရွှေ့မီ ဒီရာသီမှာ ယူနိုက်တက်အသင်းအတွက် လိဂ်ဖလား ပွဲစဉ်တစ်ပွဲတည်းသာ ပါဝင်ကစားခွင့်ရခဲ့ပါတယ်။
ယူနိုက်တက်အသင်းဟာ ပြီးခဲ့တဲ့ နွေရာသီ အပြောင်းအရွှေ့ နောက်ဆုံးနေ့မှာ ဘယ်လ်ဂျီယံဂိုးသမား လမ်းမန်းစ်ကို ပေါင် ၁၈.၁ သန်းနဲ့ ခေါ်ယူခဲ့ပြီး သူဟာ အသင်းအတွက် ပွဲဦးထွက်ခဲ့တဲ့ ပထမဆုံး ၅ ပွဲမှာ လက်စွမ်းပြသ နိုင်ခဲ့ ပါတယ်။
လမ်းမန်းစ်ကို တွေ့ရစဉ်
ယူနိုက်တက်အသင်းဟာ ဒီ ၅ ပွဲစလုံး ရှုံးပွဲမရှိသေးတာ ဖြစ်ပါတယ်။
အိုနာနာရဲ့ အငှားစာချုပ်ထဲမှာ ထရက်ဇွန်စပေါ်အသင်းဟာ သူ့ကို အပြီးသတ်ဝယ်ယူဖို့ ရွေးချယ်ခွင့် မပါဝင်တာ ကြောင့် သူဟာ နွေရာသီမှာ ယူနိုက်တက်အသင်းထံ ပြန်လာရမှာပါ။
ယူနိုက်တက်အသင်းကတော့ ဂိုးသမား လမ်းမန်းစ်ကိုသာ လာမယ့်ရာသီမှာလည်း ပထမဦးစားပေး ဂိုးသမားအဖြစ် ဆက်ပြီး အသုံးပြုမှာဖြစ်လို့ ဂိုးသမား အိုနာနာကို ရောင်းချမှု ပြုလုပ်သွားမှာ ဖြစ်ပါတယ်။
ဖာဘရီဇီယိုရိုမာနိုက အိုနာနာဟာ ယူနိုက်တက်အသင်းရဲ့ အစီအစဉ်ထဲမှာ ပါဝင်တယ်လို့ မထင်တာကြောင့် သူ့ကို ရောင်းချဖို့ ဈေးကွက်ထဲမှာ ရှာဖွေမှုတွေ ပြုလုပ်သွားဖို့ရှိနေတယ်လို့ ပြောထားတာပါ။
ထရက်ဇွန်စပေါ်အသင်းမှာ လက်စွမ်းပြသနေတဲ့ အိုနာနာနဲ့ ယူနိုက်တက်အသင်းတို့ရဲ့ စာချုပ်ဟာ ၂ နှစ် ကျန်ရှိနေ သေးတာ ဖြစ်ပါတယ်။
Source: metro
