CNI Sport News
၂၀၂၅ ခုနှစ်၊ နိုဝင်ဘာ ၁၅
ဝက်စ်ဟမ်းအသင်း ကွင်းလယ်လူ ပါကယ်တာက သူဟာ ပြီးခဲ့တဲ့နွေရာသီမှာ ဖလာမင်ဂိုအသင်းထံ ပြန်သွားဖို့ ကြိုးစားခဲ့ကြောင်း ဖွင့်ဟခဲ့ပြီး တစ်နေ့မှာ ဘရာဇီးလ်ကလပ်ထံ ပြန်လာမယ်လို့ ပြောခဲ့ပါတယ်။
ပါကယ်တာက “ဖလာမင်ဂိုနဲ့ ကျနော် စကားပြောခဲ့တဲ့ ဒုတိယအချိန်က ကျနော် ပုံမှန်အတိုင်း ဆက်ပြီး ကစားနိုင် မယ်ဆိုတာကို သိနေတဲ့အချိန်ပါ။ အဲ့ဒီအချိန်မှာ ကျနော်ဟာ ဖလာမင်ဂိုထံ ပြန်သွားဖို့ ဆန္ဒတွေ ပိုပြီးရှိလာခဲ့ ပါတယ်။ ကျနော် ပြန်သွားချင်တဲ့ ဆန္ဒကို ပြသခဲ့ပေမယ့် ဝက်စ်ဟမ်းအသင်းကို လေးစားဖို့ ဆုံးဖြတ်ခဲ့ပြီး ဘာကိုမှ အတင်းအကျပ် မလုပ်တော့ပါဘူး။ ဖလာမင်ဂိုဟာ ကျနော့်အတွက် တံခါးတွေ အမြဲတမ်း ဖွင့်ထားမယ်ဆိုတာ ကျနော်သိပြီး တစ်ချိန်ချိန်မှာ ပြန်လာဖြစ်မယ်ဆိုတာလည်း သိပါတယ်”လို့ Globoesporte ကို ပြောခဲ့တာပါ။
ပါကယ်တာဟာ အားကစားမှာ တရားမဝင် လုပ်ဆောင်တဲ့ အရာတွေရှိတယ်ဆိုပြီး အင်္ဂလန်ဘောလုံးအဖွဲ့ချုပ် (FA)ရဲ့ စွဲချက်တင်ခြင်းခံရကာ စုံစစ်းစစ်ဆေးမှုတွေ ပြုလုပ်ခံရပြီးနောက် ၂၀၂၄ ခုနှစ်၊ မေလမှာ ဖလာမင်ဂို အသင်းက သူ့ကို ချဉ်းကပ်ခဲ့တယ်လို့ ပြောခဲ့ပါတယ်။
ပါကယ်တာဟာ FA ရဲ့ စွဲချက်တွေကနေ လွတ်မြောက်ပြီးနောက် နွေရာသီ အပြောင်းအရွှေ့မှာ ဖလာမင်ဂို အသင်းက သူ့ကိုခေါ်ယူနိုင်ဖို့ထပ်ပြီး ကြိုးစားခဲ့တာပါ။
ပါကယ်တာကလည်း ဖလာမင်ဂိုအသင်းထံ ပြန်သွားချင်ခဲ့ပေမယ့် ဝက်စ်ဟမ်းအသင်းက သူ့ကိုပံ့ပိုးမှုတွေ ပြုလုပ်ပေးပြီး သူကလည်း ဒီအသင်းကို ချစ်မြတ်နိုးတာကြောင့် ဆက်ရှိခဲ့တယ်လို့ ပြောခဲ့ပါတယ်။
ပါကယ်တာကို တွေ့ရစဉ်
၂၀၂၂ ခုနှစ်မှာ လိုင်ယွန်အသင်းကနေ ရောက်ရှိလာခဲ့တဲ့ ပါကယ်တာနဲ့ ဝက်စ်ဟမ်းအသင်းရဲ့ စာချုပ်ဟာ ၂၀၂၇ ခုနှစ်၊ ဇွန်လအထိ သက်တမ်း ရှိနေပါတယ်။
ပါကယ်တာဟာ ဝက်စ်ဟမ်းအသင်းအတွက် ၁၃၂ ပွဲ ကစားထားပြီး ၂၂ ဂိုးသွင်းယူကာ ကွန်းဖရန့်လိဂ်ဖလား ရယူနိုင်ခဲ့တာပါ။
လူငယ် ကစားသမားဘဝ ကတည်းက ဖလာမင်ဂိုအသင်းမှာရှိခဲ့တဲ့ ပါကယ်တာဟာ အေစီမီလန်အသင်းထံ ပြောင်းရွှေ့ဖို့ ၂၀၁၉ ခုနှစ်၊ ဇန်နဝါရီလမှာ အသင်းကနေ ထွက်ခွာခဲ့ပါတယ်။
ပါကယ်တာဟာ လက်ရှိအချိန်မှာ နိုဝင်ဘာ နိုင်ငံတကာ ပွဲစဉ်တွေအတွက် ဘရာဇီးလ်အသင်းနဲ့အတူ လေ့ကျင့် ပြင်ဆင်မှုတွေ ပြုလုပ်နေတာ ဖြစ်ပါတယ်။
Source: ESPN
