CNI News
၂၀၂၄ ခုနှစ်၊ အောက်တိုဘာ ၂၉
တရုတ်ဘက်မှ နယ်စပ်ဂိတ်များ ပိတ်ထားသဖြင့် လက်ရှိ မူဆယ်မြို့အတွက် စက်သုံးဆီဝယ်ယူရ အခက်အခဲဖြစ်နေ ပြီး လိုသလောက် မရရှိသည့်အပြင် အကန့်အသတ်ဖြင့်သာ ရောင်းချပေးနေကြောင်း မူဆယ်မြို့ရှိ ပရဟိတအသင်း များမှ တာဝန်ရှိသူများက CNI သတင်းဌာနသို့ ပြောသည်။
မူဆယ်မြို့တွင် စက်သုံးဆီ နှုန်းထားများမှာလည်း ယခင်ကထက် တိုးမြင့်သွားသကဲ့သို့ တစ်စီးလျှင် ၅ သောင်းနှုန်း ခန့်ဖြင့် တန်းစီစနစ်နှင့် ရောင်းချပေးနေကြောင်း၊ အခြားကုန်စည်များမှာလည်း ဈေးနှုန်းကြီးမြင့်နေပြီး လူသုံးကုန် ပစ္စည်းများမှာ ရှားပါးနေကြောင်းလည်း ၎င်းတို့က ပြောသည်။
ရှမ်းပြည်နယ် မြောက်ပိုင်း မူဆယ်မြို့ပေါ်မှာ သွားလာနေကြတဲ့ မော်တော်ယာဉ်တချို့ (AFP)
ကမ်းလက်ကူညီပရဟိတအသင်းမှ “ဝယ်မရတာ မဟုတ်ဘူး။ သူကထိန်းပြီး ရောင်းခိုင်းတာပေါ့နော်။ အစိုးရ ထိန်း ချုပ်ထားတဲ့ မြို့ဖြစ်တဲ့အတွက် ဟိုဘက်ကို ဖြတ်လေးဖြတ် လုပ်တဲ့ပုံစံမျိုးပေါ့။ အဲဒါကြောင့် ဒီဟာတွေကို ပေး မဖြတ်တာပေါ့။ ဆီကရှိတယ်။ ဒါပေမယ့် အကန့်အသတ်နဲ့ ရောင်းခိုင်းတာပေါ့။ လူတွေက ကြောက်လန့်ပြီး တော့ အတင်းဝယ်နေကြတာ။ လူ အဝင်/အထွက် ကတော့ရှိတယ်။ ဒါပေမယ့် ပစ္စည်းတွေကို သယ်လာလို့မရတော့ ပစ္စည်းသယ်တဲ့အဖွဲ့တွေက မသွားတော့ဘူး။ မသွားကြတော့ လူအဝင်/အထွက်က ကြဲတာပေါ့။ အလုပ်သွားလုပ် မယ့်သူကလည်း ဟိုဘက်က တရုတ်ကနေ စက်ရုံကနေ ခေါ်စာ ရဲစခန်းကို တင်ရတယ်။ တရုတ်ရဲစခန်းက ချပေး မှာ သွားလို့ရတာ။ ဥပမာ ဘယ်သူတွေသွားမယ်ဆိုတဲ့ စာရင်းကို စက်ရုံက တရုတ်ရဲစခန်းကို တင်ရတယ်။ တရုတ် ရဲစခန်းကနေ ဒီစက်ရုံမှာ ဒီလူတွေလာမယ်ဆိုတာသေချာမှ သူတို့ အရင်တုန်းက ပြစ်မှုရှိ၊ မရှိတွေဘာတွေ ပြန် လိုက်တယ်။ စစ်ပြီးတော့ ဟိုဟာဖြစ်တယ်ဆိုမှ ခွင့်ပြုတာ။ နောက်ဆုံးခွင့်ပြုမှ ဒီဘက်က ဝင်လို့ရတာ” ဟု ပြော သည်။
တိုက်ပွဲများကြောင့် နယ်စပ်ဂိတ် အားလုံးနီးပါး ပိတ်ထားရသည့်အထဲ လက်ကျန်ဂိတ်ဖြစ်သည့် မိုင်းလားဂိတ်အား တရုတ်ပစ္စည်းများ တင်သွင်းခြင်းကို တရုတ်ဘက်မှ ပိတ်လိုက်သဖြင့် မြန်မာ-တရုတ် နယ်စပ်ဂိတ် အားလုံး ပိတ်သွားသည့် အခြေအနေဖြစ်သည်။
လက်ရှိတွင် မူဆယ်မြို့၌ တရုတ်ယွမ်ငွေ ၁၀၀ အား မြန်မာငွေ ခြောက်သောင်းကျော် ပေါက်ဈေးဖြစ်နေပြီး လူသုံးကုန်ပစ္စည်းများအား တရုတ်ယွမ်ငွေဖြင့်သာ သတ်မှတ်ကြကြောင်းလည်း သိရသည်။
မူဆယ်အဝင်ကို တွေ့ရစဉ်
ထို့အပြင် တရုတ်ဘက်မှ နယ်စပ်ဂိတ်များ ရုတ်တရက် ပိတ်လိုက်သဖြင့် မြန်မာဘက်သို့ဝင်မည့် ကုန်ကားများမှာ လည်း တရုတ်နိုင်ငံထဲတွင် ပိတ်မိနေသဖြင့် မူဆယ်မြို့၌ ကုန်ဈေးနှုန်းများလည်း ဈေးကြီးနေခြင်းဖြစ်ကြောင်း နှလုံးလှပရဟိတအသင်းမှ တာဝန်ရှိသူတစ်ဦးက CNI သတင်းဌာနသို့ ပြောသည်။
၎င်းက “တရုတ်ပြည်နဲ့ မြန်မာပြည်နဲ့ အဝင်/အထွက်ကုန်တွေ သယ်တဲ့ကားတွေကတော့ တရုတ်ပြည်ထဲမှာ ပိတ်မိ နေတာပေါ့။ ပစ္စည်းတွေက သွင်းလို့မရဘူး။ ဒီမှာက အခုလက်ရှိ ပစ္စည်း အဝင်/အထွက်မရှိ၊ ရပ်တန့်တဲ့ပုံစံမျိုးဖြစ် တော့ ဆောက်လုပ်ရေးလုပ်ငန်းတွေမှာ ပစ္စည်းတွေပြတ်ပြီးတော့ အလုပ်သမားတွေ တချို့ နားလိုက်ရတယ် နားနေကြတာ အဲဒီလိုမျိုးတွေလည်းရှိတယ်။ အခြေခံလူတန်းစားတွေ ဒုက္ခရောက်တယ်။ အထိနာတာပေါ့။ ငွေဈေးတွေကတက်၊ ပစ္စည်းတွေကပြတ် ဝယ်လို့မရ။ မုန့်ပဲသရေစာကအစ ဈေးတွေ အကုန်တက်တာပေါ့။ ဈေးကြီးတာပေါ့” ဟု ပြောသည်။
သို့သော် လူ အဝင်/အထွက်များအား ပုံမှန်အတိုင်း ခွင့်ပြုပေးလျက်ရှိပြီး တရုတ်နိုင်ငံရှိ အထည်ချုပ်လုပ်ငန်းများသို့ သွားရောက်လုပ်ကိုင်ကြရန် ရောက်ရှိနေသူ များပြားကြောင်း သိရသည်။
ယခုကဲ့သို့ ကုန်ပစ္စည်းများ တင်သွင်းခြင်းပြုနေသည့် နယ်စပ်ဂိတ်များ တရုတ်ဘက်မှ ရေရှည် ပိတ်ထားမည် ဆိုပါက ဒေသခံပြည်သူလူထုများ ပို၍ အထိနာမည်ဖြစ်ကြောင်းလည်း မူဆယ်မြို့ရှိ ပရဟိတအသင်းများက ထောက်ပြကြသည်။
