CNI News
၂၀၂၄ ခုနှစ်၊ အောက်တိုဘာ ၂၅
ပြည်ပသို့ တင်ပို့ရန်အတွက် ဖရဲသခွားစိုက်ပျိုးထုတ်လုပ်မည့် တောင်သူများအနေဖြင့် နယ်စပ်ဂိတ်ပေါက် အခြေအနေနှင့် လမ်းကြောင်း အခြေအနေများကို ပွဲရုံများနှင့်ပွဲစားများကို သေချာစွာ မေးမြန်းပြီးမှသာ စိုက်ပျိုးစေလိုကြောင်း ဖရဲစိုက်ပျိုးထုတ်လုပ်သူများနှင့် ကုန်သည်များက ပြောသည်။
လက်ရှိတွင် တရုတ်သို့ တင်ပို့နေကျဖြစ်သည့် တရုတ်နယ်စပ်ကုန်သွယ်ရေး ဂိတ်ပေါက် အားလုံးနီးပါး ပိတ်ထား ရပြီး ယခင်နှစ်က တင်ပို့ခဲ့သော မိုင်းလား - တာလော့ နယ်စပ်ဂိတ်ပေါက်သည်လည်း လက်ရှိမှာ အဖွင့်အပိတ် မသေချာသည့် အခြေအနေ ဖြစ်နေခြင်းကြောင့် တောင်သူများအနေဖြင့် ချင့်ချိန်စိုက်ပျိုးကြရန် လိုအပ်သည်ဟု စစ်ကိုင်းတိုင်းဒေသကြီးမှ ဖရဲစိုက်တောင်သူ ကိုသစ္စာက CNI သတင်းဌာနသို့ ပြောသည်။
ဖရဲစိုက်တောင်သူကိုတွေ့ရစဉ်
၎င်းက “လတ်တလောက အခုက မိုင်းလား - တာလော့ဂိတ်က လောလောဆယ်က တရုတ်ပြည်ဘက်ခြမ်းပေါ့ မြန်မာဘက်ခြမ်း မဟုတ်ဘူး၊ လောလောဆယ် ပိတ်ထားတယ်။ အစ်ကိုတို့ အဲဒီတစ်ပေါက်ပဲ ရှိတာကိုး သွားဖို့ရာ လေ။ အဲဒီတစ်ပေါက်ပဲ ရှိတဲ့အခါကျတော့ အဲဒီအပေါက်က ပိတ်ထားတယ်ဆိုလို့ရှိရင် တရုတ်ဈေးကွက်မှာ လက်ရှိ သွင်းအားစုနဲ့က ကုန်ကျစရိတ်နဲ့က ဈေးကွက်က လုံးဝ မကိုက်ဘူး။ သွားနိုင်ဖို့ အလားအလာ မမြင်သေးဘူး။ အလားအလာ မမြင်သေးဘူးဆိုတာက လမ်းပန်းဆက်သွယ်ရေးရော၊ government body ကြောင့်ရော မလွယ်ဘူး၊ တော်တော်ကို ခဲယဉ်းတယ်” ဟု ပြောသည်။
ယခုနှစ်တွင် ဖရဲစိုက်တောင်သူများသည် ယခင်က တရုတ်နိုင်ငံမှ တင်သွင်းသည့် ဖရဲမျိုးများကို စိုက်ပျိုးသဖြင့် စိုက်ပျိုးစရိတ် ကြီးမြင့်မှု၊ အထွက်နှုန်းနှင့် အရည်အသွေး ကျဆင်းမှုများကြောင့် အရှုံးနှင့် ကြုံခဲ့ကြရသည်။
ထို့ကြောင့် ယခုနှစ်တွင် ကိုရီးယားနိုင်ငံမှ တင်သွင်းသည့် ဖရဲမျိုးများကို ပြောင်းလဲစိုက်ပျိုးလာရာ စိုက်ပျိုးစရိတ် လျော့ကျသွားသည့်အပြင် အရည်အသွေးနှင့် အထွက်နှုန်းလည်း မြင့်မားကြောင်း ဖရဲစိုက်တောင်သူ ကိုသစ္စာက CNI သတင်းဌာနသို့ ပြောသည်။
ဖရဲသီးများကို တွေ့ရစဉ်
၎င်းက “ဒီမျိုးစေ့သည် မှန်ကန်တဲ့မျိုးစေ့ ဖြစ်နေတဲ့အတွက် သူ့ကို ကုရမယ့်စရိတ် ဥပမာ သူများက ဆေး ၅ ကြိမ် ဖြန်းရမယ်ဆိုရင် သူက ၂ ကြိမ်နဲ့ ပြီးတယ်။ သူများတွေ မြေဆီ ၅ အိတ်လောက် သွင်းတဲ့နေရာမှာ သူက ၃ အိတ် လောက်နဲ့ ပြီးသွားတယ်။ အထွက်နှုန်းမှာကျတော့ အပင် ၁၀ ပင်ကို ကြည့်လိုက်တယ်၊ ပုတဲ့ကောင်က ပု၊ ရှည်တဲ့ ကောင်ကရှည်၊ ချွန်တဲ့ကောင်က ချွန်ဆိုတာကြောင့် ပယ်သီးဆိုတာ ထွက်လာမယ်။ အခု ဒီကောင်ကျတော့ အဲဒီလို မဟုတ်ဘူး။ ၁၀ ပင်ကြည့်လိုက်ရင် ၉ ပင်က ဖြောင့်ရမယ်၊ ရှည်ရမယ်၊ လုံးပတ်လှရမယ်။ အဲဒီအတွက်ကြောင့် ၁ လုံးကို သူက သတ်မှတ်ပေးထားတယ်၊ ဥပမာတစ်ခု ၃ ဒသမ ၅ ကီလို၊ ၄ ကီလို ထားပါတော့၊ အပင် ၁၀၀၀ သည် ကီလို ၄၀၀၀ ဖြစ်နေရမယ်။ အပင် ၃၀၀၀ သည် ကီလို ၁၂,၀၀၀၊ ၁ ဧကရဲ့ အထွက်နှုန်းသည် ၁၂ တန် ထွက်တယ် လို့ သတ်မှတ်တယ်။ အခြားသောမျိုးကို စိုက်လိုက်လို့ရှိရင် ၈ တန် ထွက်ရတာနဲ့၊ ၇ တန် ထွက်ရတာနဲ့ အဲဒီမှာ ကွာသွားပြီ” ဟု ပြောသည်။
ဖရဲစိုက်ပျိုးရာတွင် မျိုးစေ့များကို ပြည်ပမှ တင်သွင်းလျက်ရှိကြောင်း၊ သို့သော် တင်သွင်းခွင့် ပါမစ်များ ကန့်သတ် ထားခြင်းကြောင့် စိုက်ပျိုးချိန်အမှီ မစိုက်ပျိုးနိုင်သည့် အခြေအနေများလည်း ဖြစ်ပေါ်နေကြောင်း၊ မျိုးစေ့များကို တရားမဝင် တင်သွင်းနေရခြင်းကြောင့် ကုန်ကျစရိတ်များလည်း မြင့်မားလျက် ရှိနေကြောင်း တောင်သူများက ပြောသည်။
ထို့နောက် ဓာတ်မြေဩဇာ ဝယ်ယူရာတွင်လည်း အစိုးရမှ သတ်မှတ်ထားသည့် ဈေးနှုန်းဖြင့် မရရှိဘဲ ဈေးနှုန်း ကြီးမြင့်စွာ ဝယ်ယူနေကြရသည်ဟု သိရသည်။
