CNI News

၂၀၂၂ ခုနှစ်၊ စက်တင်ဘာ ၂၁

ရခိုင်ပြည်နယ်ရှိ မိုးစပါးအများဆုံးစိုက်ပျိုးသော ဒေသများတွင် တိုက်ပွဲဖြစ်ပွားနေခြင်းနှင့် စစ်ရေးတင်းမာနေမှုများ ရှိနေခြင်းကြောင့် တောင်သူများသည် လုပ်လက်စ လယ်ယာများကို စွန့်ခွာ၍ ထွက်ပြေးတိမ်းရှောင် နေကြရသည့် အတွက် ယခုနှစ် မိုးစပါးအထွက်နှုန်းမှာ ပို၍ လျော့ကျမည်ဖြစ်ကြောင်း တောင်သူများက CNI သတင်းဌာနသို့ ပြောသည်။

ရခိုင်ပြည်နယ်တွင် မိုးစပါးအား တစ်ပြည်နယ်လုံးတွင် စိုက်ပျိုးကြသော်လည်း မြောက်ဦး၊ မင်းပြား၊ ဘူးသီးတောင်၊ ရသေ့တောင်နှင့် ကျောက်တော်မြို့တို့၌ အများဆုံး စိုက်ပျိုးခြင်းဖြစ်ကာ ထိုဒေသများတွင် တပ်မတော်နှင့် ရက္ခိုင့် တပ်တော်(ULA/AA)တို့အကြား လက်ရှိ တိုက်ပွဲနှင့် စစ်ရေးတင်းမာမှုတို့ကြောင့် ဒေသခံများမှာ ဘေးလွတ်ရာသို့ ထွက်ပြေး တိမ်းရှောင်နေရခြင်း ဖြစ်သည်။

ရခိုင်တောင်သူတစ်ဦးကိုတွေ့ရစဉ်

ရခိုင်တောင်သူ ဦးမင်းဦးက “အခု နောက်ဆုံးမိုးမှာ စိုက်တဲ့တောင်သူတွေဆိုရင် မြေဆီကျွေးမယ်၊ ပိုးမွှားအန္တရာယ် တွေကို ကြီးကြပ်ပြီး ဆောင်ရွက်ရတဲ့ အချိန်ဖြစ်နေတယ်။ အဲဒီလို ကြီးကြပ်ဆောင်ရွက်ရမယ့်အချိန်မှာ အခုလို စစ်ဘေး အန္တရာယ်ကြောင့် ပြေးလွှားနေရတဲ့အတွက် ဘာမှကြည့်ရှုခြင်း မရှိတဲ့အတွက် ပစ်ထားရတဲ့ ဘဝ အခြေ အနေမျိုး ဖြစ်နေတယ်။ ဒီလို တောင်သူတွေက ပစ်ထားရတဲ့ အတွက်ကြောင့် သီးချိန်မှာဆိုရင် နှစ်စဉ် နှစ်တိုင်း ထက် ပိုမို လျော့နည်းလာမယ်လို့ မျှော်လင့်မိပါတယ်။ ဘာဖြစ်လို့လဲဆို ဒီအထွက်နှုန်း ကောင်းဖို့အတွက်က စပါး ကို တောင်သူတွေမှာ ဘာလုပ်ရလဲဆိုရင် ပိုးမွှားအန္တရာယ်က ကင်းစင်အောင် ရေသွင်း၊ ရေထုတ် ဒါတွေကို အမြဲတမ်း တောင်သူတွေက ကြည့်ရှုပြီးတော့ လိုအပ်ရင် လိုအပ်သလို ဆောင်ရွက်ပေးရတာပါ။ အခုက အသက် အိုးအိမ်ကို စွန့်ခွာပြီးတော့ သွားရတဲ့အတွက်ကြောင့် လုပ်ခင်းကိုင်ခင်းတွေမှာ စပါးတွေကို ဒီအတိုင်း ပစ်ထားခဲ့ရ တာပါ။ ဒါကြောင့် ပိုးမွှားအန္တရာယ်ကျလည်း မလုပ်နိုင်ဘူး။ ရေသွင်း၊ ရေထုတ်ကိုလည်း မလုပ်နိုင်ဘူး။ ဒီလို မလုပ်နိုင်တဲ့ အတွက်ကြောင့် အထွက်နှုန်းက လျော့မှာကတော့ သေချာပါတယ်” ဟု CNI သတင်းဌာနသို့ ပြော သည်။

တောင်သူများအနေဖြင့် တိုက်ပွဲမဖြစ်ခင် ကာလက လုံခြုံရေး အခြေအနေအကြောင့် စိုက်ပျိုးရေး သွင်းအားစုများ အား သယ်ယူရသည့် အခါတွင် အချိန်ကာလအားဖြင့် ကြာမြင့်ကာ လိုချင်သလောက် မရရှိခြင်းနှင့် ကြုံတွေ့ခဲ့ရ သော်လည်း လက်ရှိတိုက်ပွဲ ဖြစ်ပွားနေသည့် ကာလတွင် ပို၍ အခက်အခဲဖြစ်ကြောင်း ရခိုင်တောင်သူများထံက သိရသည်။

ရခိုင်တိုက်ပွဲရှောင်များကိုတွေ့ရစဉ်

လက်ရှိတွင် ရခိုင်ပြည်နယ်၌ ဒီဇယ်ဆီ တစ်ပေပါ ဈေးနှုန်းမှာ ၇ သိန်းခန့် ပေးဝယ်နေရသည့်အပြင် တိုက်ပွဲ အခြေ အနေ ယခုထက် ပိုမိုပြင်းထန်လာပါက ကုန်းလမ်းနှင့် ရေလမ်း အသွားအလာများ ပြတ်တောက်သွားမည်ကို စိုးရိမ် ကြောင်း ရခိုင်တောင်သူ ဦးအောင်ကျော်မြက CNI သတင်းဌာနသို့ ပြောသည်။

၎င်းက “ဘာကြောင့်လဲဆိုတော့ ဒီလိုပြတ်တောက် သွားမယ်ဆိုရင် ကျနော်တို့ သယ်ယူရတဲ့ အခြေအနေ ပြတ် တောက်တယ်ဆိုရင် ကျနော်တို့ ဒီမှာ လိုအပ်တဲ့ ဓာတ်မြေဩဇာတို့၊ ဒီဇယ်ဆီတို့၊ ဆန်စပါး သယ်ရတာတို့မှာအစ အခက်အခဲတွေကတော့ ဒီစစ်ရဲ့ ဘေးထွက်ဆိုးကျိုးတွေကတော့ ကျနော်တို့ တောင်သူလယ်သမားတွေဖြစ်ကြတဲ့ ပြည်သူအပေါ်မှာပဲ သက်ရောက်မှု အများတွေ ဖြစ်လာမှာပေါ့။ စစ်ရေးပဋိပက္ခကြောင့် တောင်သူလယ်သမားတွေ မှာ ဖြစ်လာနိုင်တဲ့ အခက်အခဲတွေ အများကြီး ရှိလာနိုင်ပါတယ်။ နေရာတိုင်း လိုလိုသာ တိုက်ပွဲဧရိယာတွေ ကျယ်ပြန့်လာမယ်ဆိုရင်တော့ ကျနော်တို့ ကောင်းကောင်းမွန် ရိတ်သိမ်းနိုင်မှာ မဟုတ်ဘူးလေ” ဟု ပြောသည်။

ရခိုင်ပြည်နယ်မှ ထွက်ရှိသည့် စပါးများအား ၎င်းတို့ဒေသတွင်းရှိ ရခိုင်ပြည်သူများသာ စားသုံးကြခြင်း ဖြစ်သည့် အတွက် လက်ရှိစိုက်ပျိုးထားသည့် မိုးစပါးများ အထွက်နှုန်းလျော့ကျပါက လာမည့်နှစ်တွင် တောင်သူများနှင့် စားသုံးသူ ဒေသခံများအတွက် အကျိုးသက်ရောက်မှု ကြီးကြောင်း ရခိုင်တောင်သူ ဦးမင်းဦးက CNI သတင်းဌာနသို့ ပြောသည်။

စပါးစိုက်ပျိုးနေကြသူများကိုတွေ့ရစဉ်

“ဒါကတော့ တိုက်ရိုက်သက်ဆိုင်နေတယ်လေ။ ဒီနှစ်စိုက်ပျိုးတဲ့ စပါးရာသီမှာ အခုစိုက်ပျိုးပြီးတဲ့ အချိန်မှာ နှစ်တိုင်း စိုက်တဲ့ လယ်မြေဧက၏ တဝက်ခန့်လောက်ပဲ စိုက်ပျိုးနိုင်တယ်။ အဲဒီ တဝက်ခန့်လောက်မှာ သဘာဝဘေး အန္တရာယ် မိုးခေါင်မှုကြောင့် ဧက ၂၀ လောက်ပဲ အကောင်းဖြစ်တယ်။ ၂၀၊ ၃၀ လောက်မှာ ပျက်စီးတာရယ်၊ နောက် တစ်ခုက ကုန်ဈေးနှုန်းကြီးလို့ မြေဆီမသုံးနိုင်တာရယ် ၂၀ လောက်ပဲရှိတယ်။ အဲဒီ ၂၀ လောက်မှာ အခုတစ်ခါ စစ် ဘေးရှောင်တွေ ဖြစ်လာတဲ့အတွက်ကြောင့် လာမယ့်နှစ်မှာကတော့ ကျနော်တို့ ရခိုင်ပြည်တွင်းမှာရှိသော တောင်သူ လယ်သမားများနှင့် စားသုံးသူအားလုံးသည် ယခုဖြစ်နေသော ကုန်ဈေးနှုန်း ဆန်ဈေးထက် တစ်ဆမြင့် မယ်လို့ ကျနော်တို့ ပြောနိုင်ပါတယ်။ ကျနော်တို့ ရခိုင်ပြည်နယ်မှာ ထွက်ရှိတဲ့ ဆန်စပါးကလည်း လာမယ့်နှစ်မှာ ရခိုင်ပြည်သူလူထု စားသုံးဖို့အတွက် လုံလောက်ချင်မှ လုံလောက်မယ်” ဟု ၎င်းက ပြောသည်။

ပြီးခဲ့သည့် ၂၀၁၇-၁၈ ခုနှစ်ကာလများကလည်း တပ်မတော်နှင့် AA အကြား တိုက်ပွဲများ ပြင်းထန်ခဲ့ကြသည့် အတွက် ထွက်ပြေး တိမ်းရှောင်ခဲ့ရမှုကြောင့် ရခိုင် တောင်သူများမှာ အရှုံးပေါ်ခဲ့ကြပြီး ချေးငွေများလည်း မဆပ်နိုင်သည်အထိ ဖြစ်ခဲ့ကြကာ ယခုမှ ပြန်လည်နလန်ထူနိုင်ကာစ ဖြစ်ကြောင်း သိရသည်။