CNI News
၂၀၂၄ ခုနှစ်၊ အောက်တိုဘာ ၂၅
နိုင်ငံခြားငွေဈေးနှုန်းများ တည်ငြိမ်နေသည်မှာ ကာလတစ်ခုအထိ ရှိနေပြီဖြစ်သောကြောင့် ပြည်ပမှ တင်သွင်း သည့် ကုန်ပစ္စည်းနှုန်းများမှာ ကျသင့်နေပြီဖြစ်ကြောင်း စီးပွားရေးလေ့လာသုံးသပ်သူများနှင့် လုပ်ငန်းရှင်များက ထောက်ပြကြသည်။
အစိုးရမှ အရေးကြီးကုန်စည်အဖြစ် တင်သွင်းခွင့်ပြုထားသည့် ကုန်စည်များအတွက် ဒေါ်လာများ ရောင်းချပေးနေ သဖြင့် စက်သုံးဆီ အပါအဝင် အခြားကုန်စည်နှုန်းထားများမှာ ကျသင့်နေပြီဖြစ်ကြောင်း၊ ဈေးနှုန်းမကျသည့် အပေါ်တွင် မေးခွန်းထုတ်စရာဖြစ်ကြောင်း စီးပွားရေးလုပ်ငန်းရှင် ဦးအောင်ပြည့်စုံက CNI သတင်းဌာနသို့ ပြော သည်။
၎င်းက “ပြည်ပကနေ တင်သွင်းတဲ့ ကုန်ပစ္စည်းတွေရဲ့ ဈေးနှုန်းကလည်း ကျရတော့မယ့်အနေအထားပေါ့။ ဒေါ်လာ ဈေးနဲ့ တွက်ပြီးသွင်းလာတဲ့ ကုန်တွေဆိုရင် ဆေးဝါးပဲဖြစ်ဖြစ် မဖြစ်မနေ ပြည်ပကနေ အရေးကြီးကုန်စည်ဆိုပြီး တင်သွင်းရမယ့် ကုန်စည်တွေကိုလည်း အစိုးရက ဒေါ်လာတွေ ချပေးနေတာတွေရှိတယ်။ ဆိုတော့ ဒီလိုအပိုင်း တွေမှာ စက်သုံးဆီလည်း ပါလာမယ်။ ဆေးဝါးတွေလည်း ပါလာမယ်ဆိုရင် ဈေးနှုန်းတွေကတော့ အတန်အသင့် တော့ အရင် ဒေါ်လာ ၄၀၀၀ ပတ်ချာလည်မှာ ဖြစ်နေတဲ့ စက်သုံးဆီဈေးနှုန်းနဲ့ ၆၀၀၀ ဝန်းကျင်လောက် ပေါက်ဈေး ဖြစ်သွားတဲ့ စက်သုံးဆီဈေးနှုန်းနဲ့က သိပ်မထူးခြားဘူး မကျဘူးဆိုရင် ဒါက မေးခွန်းထုတ်စရာ ဖြစ်လာပြီပေါ့။ ဘာကြောင့် မကျတာလဲ။ တစ်ဖက်မှာရော လောင်စာဆီဈေးနှုန်းက အဲဒီလောက်အထိ တက်နေလို့ ကျနော်တို့ဆီ က မကျတာလား။ သို့မဟုတ်ရင် ဘယ်သူတွေကြောင့် မကျတာလဲ မေးခွန်းထုတ်ရတော့မယ်။ အစိုးရအနေနဲ့လည်း ဒါကို ကိုင်တွယ်ဖို့လိုလာပြီ။ အဓိကက အစိုးရအနေနဲ့ ဒေတာတွေကို စနစ်တကျကိုင်တွယ်ပြီးတော့ လုပ်ငန်းရှင် တွေအပေါ်မှာလည်း ဖိအားပေးဖို့လိုအပ်လာပြီလို့ ထင်ပါတယ်” ဟု ပြောသည်။
ဗိုလ်ချုပ်ဈေးအတွင်း တစ်နေရာကို တွေ့ရစဉ်
အခြေခံစားသောက်ကုန် အပါအဝင် အခြားကုန်ပစ္စည်း နှုန်းထားများ မကျခြင်းက ရောင်းလိုအားလျော့ကာ ဝယ်လို အား ပိုမိုတက်လာခြင်းကြောင့်ဖြစ်ကြောင်း စီးပွားရေး လေ့လာသုံးသပ်သူများက ထောက်ပြကြသည်။
ပြည်တွင်းကုန်ထုတ်လုပ်မှု အပါအဝင် ပြည်ပမှ တင်သွင်းမှုများ အပေါ်လည်း တင်းကြပ်မှုများ ပြုလုပ်သဖြင့် ရောင်းလိုအား ကျဆင်းနေခြင်းဖြစ်ကြောင်း၊ ရောင်းလိုအားကျပြီး ဝယ်လိုအား တက်နေသရွေ့ ကုန်ဈေးနှုန်းများမှာ ဆက်လက် တက်နေဦးမည်ဖြစ်ကြေင်း စီးပွားရေးလေ့လာသုံးသပ်သူတစ်ဦးက CNI သတင်းဌာနသို့ ပြောသည်။
၎င်းက “အဲဒါလည်း Supply Demand ပဲ။ ရာသီဥတု ဖောက်ပြန်တယ်။ နိုင်ငံရေး မတည်ငြိမ်မှုကြောင့် ထုတ်လုပ်မှု တွေ လျော့ကျလာတယ်။ ဆိုတော့ supply က ကျလာတာပဲ။ demand က လူတွေရဲ့ ဝယ်လိုအားတင်မဟုတ်ဘူး ဈေးကွက်ထဲမှာ လှည့်လည်နေတဲ့ ငွေကြေးလည်းပါတယ်။ အဲဒီလှည့်လည်နေတဲ့ ငွေကြေးကလည်း တဖြေးဖြေး များလာတဲ့ သဘောရှိတယ်။ ဘာလို့လဲဆိုတော့ နိုင်ငံတော်က ဘတ်ဂျက်က လိုငွေပြမယ်။ နောက်ဆုံး လက်နက် က ငွေစက္ကူတွေ ရိုက်ထုတ်တာပေါ့။ အဲဒီလို ရိုက်ထုတ်လိုက်တဲ့အတွက် ဈေးကွက်ထဲမှာ များလာတယ်။ Supply ကျနေတယ် Demand က တက်လာတယ် ဆိုရင် ကုန်စည်ဈေးနှုန်းကတက်မှာပဲ။ ဒါ Local Production ပေါ့။ ပြည်ပ သွင်းကုန်လည်း အတူတူပဲ။ ဒီ export ဝင်ငွေကျလာတဲ့အတွက် နောက် FDI လည်း မရှိတဲ့အတွက် ဈေးကွက်ထဲမှာ နိုင်ငံခြားငွေက နည်းနေမှာပဲ။ နည်းနေတဲ့အတွက် import မလုပ်နိုင်ဘူး။ အဲဒီကြားထဲမှာမှ အစိုးရ ကနေ import လိုင်စင်တွေကို အကုန်လုံး ဖျက်ချတယ်။ import အတွက် ဘာမှ support လုပ်မပေးဘူးဆိုတဲ့ အခြေအနေဆိုတော့ ဈေးကွက်ထဲမှာ ပြည်တွင်း ထုတ်ကုန်ရော၊ ပြည်ပထုတ်ကုန်ရောရဲ့ supply က ကျနေတဲ့ သဘောရှိတယ်။ အဲဒီအချိန်မှာပဲ Demand က တိုးလာတယ်။ ဘယ်လိုပဲပြောပြော demand side က တက်လာ တယ် supply ကြတော့ လျော့ကျသွားတယ် ဆိုတော့ ကုန်ဈေးနှုန်းက တက်မှာပဲ” ဟု ပြောသည်။
ကုန်စိမ်သည်တစ်ဦးကို တွေ့ရစဉ်
တရားဝင်ကုန်များ လျော့ကျသော်လည်း တရားမဝင်ကုန်များမှာ အများအပြား ဝင်ရောက်လျက်ရှိနေသည်။
သို့သော် တရားမဝင် ကုန်သွယ်မှုဖြစ်သည့်အတွက် လမ်းကြောင်းခ အပါအဝင် အခြားသော ကုန်ကျစရိတ်မှာ လည်း တရားဝင်ကုန်သွယ်မှုထက် ပိုမိုကုန်ကျသောကြောင့် ထိုကုန်ပစ္စည်းများအပေါ်တွင် ဈေးနှုန်းများ တိုးမြှင့် ကာ သတ်မှတ်လိုက်ကြခြင်းဖြစ်သည်။
ထို့ကြောင့် နိုင်ငံခြားငွေဈေးကျသော်လည်း ကုန်ပစ္စည်းနှုန်းထားများမှာ မကျဆင်းနိုင်သေးခြင်းဖြစ်ကြောင်း သုံးသပ်ကြသည်။
