CNI International News

ဘန်ကောက်၊ ဒီဇင်ဘာ ၄

ထိုင်းနိုင်ငံက အိမ်ရှင်အဖြစ် လက်ခံကျင်းပမည့် ၂၀၂၅ ခုနှစ် SEA Games ပြိုင်ပွဲမတိုင်မီ ထိုင်းအာဏာပိုင်များက ကြိုတင်ပြင်ဆင်မှုများ လုပ်ဆောင်နေသော်လည်း အားနည်းချက်များရှိနေသဖြင့် ဝေဖန်ခံနေရသည်ဟု The Nation မှ ဖော်ပြခဲ့သည်။

၃၃ ကြိမ်မြောက် အရှေ့တောင်အာရှ အားကစားပြိုင်ပွဲ (SEA Games) ကို ဒီဇင်ဘာ ၉ ရက်တွင် ထိုင်းနိုင်ငံ၌ စတင် ကျင်းပတော့မည်ဖြစ်ပြီး ထိုင်းသည် ၁၈ နှစ်ကြာ စောင့်ဆိုင်းပြီးမှ အိမ်ရှင်အဖြစ် နောက်တစ်ကြိမ် လက်ခံ ကျင်းပ ခွင့် ရခဲ့ခြင်းဖြစ်သည်။

ပွဲစီစဉ်သူများက SEA Games ပြိုင်ပွဲအတွက် ၁၀၀ ရာခိုင်နှုန်း အဆင့်သင့် ဖြစ်ပြီဖြစ်ကြောင်း ပြောကြားခဲ့သော် လည်း ပြိုင်ပွဲမတိုင်မီ အဓိကအချက် ၄ ချက်တွင် အားနည်းချက်များ ရှိနေကြောင်း ဝေဖန်ခံနေရသည်။

ပထမအချက်မှာ SEA Games ပြိုင်ပွဲနှင့်ပတ်သက်ပြီး ကြော်ငြာမှု အားနည်းနေခြင်းဖြစ်သည်။ 

ထိုင်းဆီးဂိမ်း ပြင်ဆင်မှုကိုတွေ့ရစဉ်

ထိုင်းပြည်သူ အများစုသည် SEA Games ပြိုင်ပွဲ၏ အစီအစဉ်များ၊ အားကစားကွင်းများကို မသိကြသလို အချို့ကမူ SEA Games ပြိုင်ပွဲ ကျင်းပမည့်အကြောင်းကိုပင် မသိကြပေ။

ထို့ကြောင့် သမိုင်းတစ်လျှောက် လူသိအနည်းဆုံး SEA Games ဟုပင် ဝေဖန်ခံခဲ့ကြသည်။

ဒုတိယအချက်မှာ အားကစားကွင်းများ နေရာရွှေ့ပြောင်းခြင်း၊ နှောင့်နှေးကြန့်ကြာခြင်းနှင့် သဘာဝဘေးအန္တရာယ် များကြောင့် ဖြစ်သည်။

ယခင်က ဘန်ကောက် (Bangkok) ၊ ချောင်ဘူရီ (Chonburi) နှင့် ဆောင်ခလာ (Songkhla) ပြည်နယ်များတွင် ပြိုင်ပွဲများ ကျင်းပရန် စီစဉ်ခဲ့သော်လည်း ထိုနေရာများတွင် ရေလွှမ်းမိုးမှုများကြောင့် လုံခြုံရေးကို အကြောင်းပြပြီး ပြိုင်ပွဲ ၁၀ ပွဲကို ဘန်ကော်ကနှင့် ချောင်ဘူရီ၌ နေရာရွှေ့ပြောင်းခဲ့ရသည်။

တတိယအချက်မှာ ပြိုင်ပွဲဝင် အားကစားသမားများအတွက် ခံစားခွင့်နည်းပါးခြင်း၊ အသုံးစရိတ်များပေးရန် နှောင့်နှေးကြန့်ကြာခြင်းတို့ ဖြစ်သည်။

ထိုအခြေအနေများကြောင့် အားကစားသမားများကြား စိတ်ပျက်ခြင်း၊ ပြိုင်ပွဲဝင်စိတ် လျော့ကျခြင်းတို့ ဖြစ်စေခဲ့ သည်။

ဥပမာတစ်ခု အနေဖြင့် ထိုင်းကြက်တောင် အားကစားသမား ပွန်ပါဝီ ချိုချူဝေါင် (Pornpawee Chochuwong) သည် ထိုအခြေအနေများကို စိတ်ပျက်သဖြင့် ပြိုင်ပွဲမှ နုတ်ထွက်ခဲ့သည်။

ထို့ကြောင့် တာဝန်ရှိသူများက ၎င်းအား ပြိုင်ပွဲတွင် ပြန်လည်ဝင်ရောက် ယှဉ်ပြိုင်ရန် နားချနိုင်ခဲ့သည်။

ထိုင်းဆီးဂိမ်း ပြင်ဆင်မှုကိုတွေ့ရစဉ်

ထို့အတူ ထိုင်းလက်ဝှေ့အသင်း၏ မန်နေဂျာကလည်း အားကစားအဖွဲ့ချုပ်ထံမှ အသုံးစရိတ်များ ရရှိရန် နှောင့်နှေး ကြန့်ကြာခြင်း ပွင့်လင်းမြင်သာမှု အားနည်းခြင်းတို့ကြောင့် အားကစားသမားများကို စိတ်ဓာတ်ကျစေခဲ့သည်ဟု ပြောကြားခဲ့သည်။

စတုတ္ထအချက်မှာ နိုင်ငံရေး စိန်ခေါ်မှုဖြစ်ပြီး ထိုင်းနှင့် ကမ္ဘောဒီးယား နယ်စပ်ပြဿနာက SEA Games ပြိုင်ပွဲကို ဂယက်ရိုက်ခတ်ခဲ့ခြင်းဖြစ်သည်။

ကမ္ဘောဒီးယားသည် လုံခြုံရေးကို အကြောင်းပြပြီး အားကစားပြိုင်ပွဲအချို့ကို ဝင်ရောက်ယှဉ်ပြိုင်မည် မဟုတ် ကြောင်း ဆိုင်းမဆင့်၊ ဗုံမဆင့် ကြေညာခဲ့သည်။

ကမ္ဘောဒီးယား အားကစားအသင်းများ၏ နုတ်ထွက်မှုကြောင့် ပြိုင်ပွဲအချိန်ဇယား ရေးဆွဲမှုတွင် ရှုပ်ထွေးသွားစေ ခဲ့ပြီး အချို့ပြိုင်ပွဲများသည် ကျင်းပမည့်ရက်ကို အတိအကျ မသတ်မှတ်ရသေးပေ။

ထိုအချက်များကြောင့် SEA Games ပြိုင်ပွဲကို အိမ်ရှင်အဖြစ် လက်ခံကျင်းပမည့် ထိုင်း၏ ကြိုတင်ပြင်ဆင်မှုများ သည် ဝေဖန်ခံနေရခြင်းဖြစ်သည်။

Source: The Nation