CNI Sport News
၂၀၂၅ ခုနှစ်၊ ဒီဇင်ဘာ ၄
ချယ်လ်ဆီးအသင်းဟာ လိဒ်စ်အသင်းကို ၃ ဂိုး-၁ ဂိုးနဲ့ အရေးနိမ့်ခဲ့ပြီးနောက် နည်းပြမာရက်စ်ကာက အသင်းဟာ သူတို့နဲ့ ထိုက်တန်တဲ့ ရလဒ်ကို ရရှိခဲ့တယ်လို့ ပြောခဲ့ပါတယ်။
မာရက်စ်ကာက “အလွန်ညံ့ဖျင်းခဲ့တဲ့ပွဲပါ။ လိဒ်စ်အသင်းဟာ ဒီပွဲကို အနိုင်ရဖို့ထိုက်တန်ပြီး နေရာစုံမှာ သူတို့ ပိုကောင်းခဲ့ပါတယ်။ ကျနော်တို့ဟာ ဒီပွဲမှာလုပ်ခဲ့တဲ့အမှားတွေကို နားလည်အောင်ကြိုးစားဖို့နဲ့ ပြန်ပြီး စတင် နိုင်အောင် ကြိုးစားဖို့ကိုသာ ကျနော်တို့လုပ်နိုင်ပါတယ်။ ဘာလို့လဲဆိုရင် ၄၈ နာရီအတွင်းမှာ ကျနော်တို့ နောက်ထပ်တစ်ပွဲကစားရဖို့ ရှိနေလို့ပါ”လို့ ပြောခဲ့ပါတယ်။
ပြီးခဲ့တဲ့ ပရီးမီးယားလိဂ်ပွဲစဉ်မှာ ကစားသမားတစ်ဦးလျော့နဲ့ အာဆင်နယ်အသင်းကို သရေကစားနိုင်ခဲ့တဲ့ ချယ်လ်ဆီးအသင်းဟာ လိဒ်စ်အသင်းနဲ့ ပွဲစဉ်မှာတော့ ရှုံးနိမ့်ခဲ့ရတာပါ။
ချယ်လ်ဆီးအသင်းဟာ ဒီရှုံးပွဲကြောင့် ပရီးမီးယားလိဂ်အဆင့် ၄ နေရာကိုဆင်းပေးခဲ့ရပြီး အဆင့် ၁ နေရာက အာဆင်နယ်အသင်းနဲ့ ၉ မှတ်ကွာဟ သွားခဲ့ပါတယ်။
ဒီရှုံးနိမ့်မှုဟာ ချယ်လ်ဆီးအသင်းအတွက် ပရီးမီးယားလိဂ်ဆုဖလားကို စိန်ခေါ်နိုင်ဖို့ မျှော်လင့်ချက် တွေကို ထိခိုက်ခဲ့ရတာဖြစ်ပါတယ်။
ရုပ်သံဘောလုံးဝေဖန်သူအဖြစ်ဆောင်ရွက်နေတဲ့ ဂယ်ရီနဗီးလ်က ချယ်လ်ဆီးအသင်းရဲ့ ခံစစ်စွမ်းဆောင်ရည်ကို ဝေဖန်ခဲ့ပြီး သူတို့ဟာ ဒီရာသီထိပ်ဆုံး ၄ သင်း ဒါမှမဟုတ် ၅ သင်းထဲသာ ဝင်ရောက်နိုင်မယ်လို့ မှတ်ချက်ပေးခဲ့ ပါတယ်။
ချယ်လ်ဆီးအသင်းရဲ့ တိုက်စစ်မှူး၊ဗဟိုနောက်ခံလူတွေနဲ့ ဂိုးသမားတို့က အမှတ်ပေးဖလားကို ရယူနိုင်ဖို့ လုံလောက်တဲ့ အရည်အသွေးမရှိဘူးလို့ ဂယ်ရီနဗီးလ်က ပြောခဲ့ပါတယ်။
ဒဏ်ရာကြောင့် ၂ လကျော်ကြာအနားယူခဲ့ရတဲ့ ကိုးလ်ပါလ်မာဟာ ဒီပွဲမှာ ချယ်လ်ဆီးအသင်းအတွက် လူစားဝင် အဖြစ်ပါဝင်ကစားသွားခဲ့ပါတယ်။
ချယ်လ်ဆီးအသင်းဟာ လာမယ့်ပရီးမီးယားလိဂ်ပွဲစဉ်အဖြစ် ဘုန်းမောက်အသင်း အိမ်ကွင်း သွားရောက်ယှဉ်ပြိုင်ရမှာဖြစ်ပါတယ်။
Source:ESPN
