CNI Interview
၂၀၂၅ ခုနှစ်၊ ဒီဇင်ဘာ ၄
ကချင်လွတ်လပ်ရေးတပ်မတော်(KIA)သည် စစ်ကိုင်းတိုင်းဒေသကြီးကို ထိန်းချုပ်နိုင်ရေး ကြိုးပမ်းလျက်ရှိသည်။ စစ်ကိုင်းတိုင်းဒေသကြီးကို KIA ထိန်းချုပ်နိုင်ပါက ရခိုင်ပြည်နယ်၊ ချင်းပြည်နယ်၊ စစ်ကိုင်းတိုင်းဒေသကြီးနှင့် ကချင် ပြည်နယ်တို့ကို ဆက်စပ်၍ မြန်မာနိုင်ငံ၏ အနောက်မြောက်တစ်လျောက်ကို ထိန်းချုပ်သွားနိုင်မည်ဖြစ်သည်။
ထို့နောက် မန္တလေးတိုင်းဒေသကြီးနှင့် မကွေးတိုင်းဒေသကြီးကို ဆက်လက်၍ စစ်ရေးအရ ဖိအားပေးကာ မြန်မာ့ တပ်မတော်၏ ထိုးစစ်ဆင် သူ့ထံ မရောက်အောင် ကာကွယ်ထားမည်ဖြစ်သလို ကချင်ပြည်နယ်အစ ရခိုင်ပြည်နယ် အဆုံး ပင်လယ်ထွက်ပေါက်ကို အသုံးပြု၍ အနောက်အုပ်စုနှင့် ကုန်သွယ်ရေး အပါအဝင် သံတမန် ဆက်ဆံရေးကို ထူထောင်လာမည်ဖြစ်သည်။
တခြားတစ်ဖက်မှာလည်း မြန်မာ့တပ်မတော်သည် ရွေးကောက်ပွဲ ကျင်းပ၍ နိုင်ငံရေး ထွက်ပေါက်ကို ဖွင့်ရန် ကြိုး ပမ်းနေသည်။
ထို့ကြောင့် ဒေါ်အောင်ဆန်းစုကြည် လွတ်မြောက်လာရေး အခြေအနေကိုလည်း အားလုံးက စိတ်ဝင်စား လာကြသည်။
အဆိုပါ အခြေအနေများနှင့် ပတ်သက်ပြီး ငြိမ်းချမ်းရေးလုပ်ငန်းစဉ်တွင် ပါဝင်နေသူ ဦးခွန်းဆိုင်ကို CNI သတင်းဌာနက ဆက်သွယ် မေးမြန်းထားသည်။
စစ်ကိုင်းတိုင်းဒေသကြီးအတွင်းက KIA-PDF စစ်ဆင်နေတဲ့ နယ်မြေတွေကို တွေ့ရစဉ်
မေး ။ ။ အမေရိကန်က မြန်မာနိုင်ငံကို တည်ငြိမ်အေးချမ်းသာယာပြီ ဖြစ်တဲ့အတွက် TPS တွေ ပေးတာကို သက်တမ်း မတိုးပေးတော့ဘူး၊ ရုပ်သိမ်းလိုက်တာရှိတော့ ဒါက အမေရိကန်က စစ်တပ်ဘက်ကို မူဝါဒ သဘော ထား ပြောင်းလဲလာတဲ့သဘောလို့ ပြောလို့ရမလား။ ဘယ်လိုမြင်မိလဲ။
ဖြေ ။ ။ ဒီကိစ္စကတော့ အားလုံး ဝိုင်းစဉ်းစားနေတဲ့ကိစ္စပဲ။ နားမလည်ကြဘူး။ ဘာဖြစ်လို့ အမေရိကန်က ဒီလိုလုပ်တာလဲ။ ဗမာပြည် ဘာတွေ ဖြစ်နေတယ်ဆိုတာ အမေရိကန်က သူ့ရဲ့သံရုံးကို ရန်ကုန်မှာထားပြီးတော့ မျက်စိ ဒေါက်ထောက်ကြည့်နေတာပဲ။ ဘာဖြစ်လို့ သူမသိမှာတုန်း။ သူသိရဲ့သားနဲ့ ဘာဖြစ်လို့ ဒီလိုလုပ်တာတုန်းလို့ ပြောလို့ရပါလိမ့်မယ်။ အဲဒီတော့ စဉ်းစားလို့ရမှာကို ပြောမှာပေါ့နော်။ မှားကောင်းမှားနိုင်ပါတယ်။ အကြီးအကျယ် လည်း မှားနိုင်တယ်။
အဲဒါကတော့ တစ်ခုက ဘာလဲဆိုတော့ အမေရိကန်ရဲ့ အရင့်အရင် ကတည်းက ဗမာပြည်ပေါ်မှာထားတဲ့ မူဝါဒက ဘာလဲဆိုတော့ သူတို့ ဘယ်လိုခေါ်လဲဆိုတော့ Washington Burma policy is Washington China policy ဝါရှင်တန်ရဲ့ ဗမာနဲ့ပတ်သက်တဲ့ ပေါ်လစီဟာ ဝါရှင်တန်ရဲ့ တရုတ်နဲ့ ပတ်သက်တဲ့ ပေါ်လစီပဲတဲ့။
အဲဒါကြောင့်မို့လို့ ဒီကိစ္စဟာ တရုတ်နဲ့ ပတ်သက်မယ်လို့ ပြောလို့ရမှာပေါ့။ ကျနော်ပြောခဲ့တဲ့ ဆိုထုံးသာ မှန်တယ် ဆိုရင် တရုတ်နဲ့ပတ်သက်လို့ ပြောလို့ရမယ်။ သတင်းအချက်အလက် မှားလို့တော့ မဖြစ်နိုင်ဘူး။ နောက်တစ်ခုက ဘာလဲဆိုတော့ အခုလောလောဆယ်မှာ ဗမာပြည်ပြန်လည် တည်ငြိမ်ရေးအတွက်ကို သူက ကျနော်တို့ အတိုက် အခံတွေ၊ တော်လှန်တဲ့ အင်အားစုတွေကို စောင့်ကြည့်နေတာ လဲ ၅ နှစ်ကျော်နေပြီ။ ၅ နှစ်ကျော်ပြီးတော့မှ အခု ထိကလည်း ဘာမှတိတိပပ အပေါင်း လက္ခာဏာဖြစ်တဲ့ လက္ခဏာကို မပြနိုင်သေးဘူး။ မပြနိုင်သေးတော့ အခု လောလောဆယ်မှာ ဦးမင်းအောင်လှိုင်တို့ကို မကြိုက်ပေမယ့်လည်း အောင့်ကာနမ်းရမယ့် ပုံစံမျိုး ဖြစ်နေတယ်လို့ ပြောလို့ရမလား။ အဲဒါကြောင့် အခုလို ပြောသွား တာဖြစ်မှာပေါ့။ ဒီမူဝါဒတွေ ချမှတ်တဲ့ နေရာမှာ ပါလာတာပေါ့။
ဒီနေရာမှာ တစ်ခုလေး သတိရတယ်။ အာဆီယံရဲ့ သူတို့ရဲ့ မိတ်ဖက်နိုင်ငံတွေအပေါ်မှာ သဘောထားဆိုတာကို ဒီနှစ်ဦးမှာ သူတို့ကောက်ယူခဲ့တယ်။ မိတ်ဖက် ဆိုတာထက် သူတို့ရဲ့ တရုတ်နဲ့ အမေရိကန်အပေါ်မှာ သဘော ထားပေါ့။ အဲဒီအခါကြတော့ အာဆီယံရဲ့ လုံခြုံရေးအတွက် အဓိက မိတ်ဖက်ကတော့ တရုတ်ဖြစ်တယ်လို့ တော် တော်များများက ပြောတယ်။
သို့သော်လည်း အမေရိကန် ဖြစ်တယ်ဆိုတဲ့အထဲမှာ ဘယ်နှစ်နိုင်ငံပါလဲဆိုတော့ နံပါတ်တစ်က ကမ္ဘောဒီယားနိုင်ငံ ပါတယ်။ ဒါလည်း အံ့အားသင့်စရာ ကောင်းတယ်။ ဘာလို့လဲဆို ကမ္ဘောဒီးယားက ကျနော်တို့ အားလုံးသိတဲ့ အတိုင်းပဲ။ တစ်လျှောက်လုံး တရုတ်ကို အားကိုးလာတာပဲ။ နောက်တစ်နိုင်ငံကတော့ ဦးမင်းအောင်လှိုင် ခေါင်းဆောင်တဲ့ မြန်မာနိုင်ငံပဲ ဖြစ်တယ်။
အဲဒီတော့ အခုအခြေအနေမှာ ဒီနှစ်နိုင်ငံစလုံးက တရုတ်ရဲ့ ဩဇာကို ပြန်လှန် တွန်းလှန်နိုင်ဖို့ဆိုရင် ဘယ်နည်းနဲ့ မဆို အင်အားရှိရှိနဲ့ တွန်းလှန်ပေးနိုင်တာက အမေရိကန်ပြည်ထောင်စုပဲ ဖြစ်တယ်လို့ မှတ်ပုံရတယ်။ google ထဲမှာ ရှာကြည့် ကျနော်ပြောတာ ရမ်းပြောတာ မဟုတ်ဘူးနော်။ အဲဒီတော့ ဒါကြောင့်မို့လို့ ဖြစ်မလားပေါ့။
စစ်ကိုင်းတိုင်းမှ ကချင်-ရခိုင်-ချင်းကို ဆက်စပ်ထားပုံကို တွေ့ရစဉ်
မေး ။ ။ လက်ရှိအခင်းအကျင်းမှာ “ဝ” ကလည်း လက်နက်ထောက်ပံ့မှုတွေကို တရုတ်ရဲ့ ဖိအားကြောင့် ရပ်ဆိုင်းထားတယ်။ MNDAA တို့ TNLA တို့ကလည်း ပံ့ပိုးမှုတွေမရှိတော့ တော်လှန်ရေးအင်အားစုတွေက KIA ဘက်ကို ချိတ်ဆက်နေတာမျိုးတွေ တွေ့ရတယ်။ KIA နဲ့ပတ်သက်ပြီး စစ်တပ်က ဘာလို့ဖိဖိစီးစီး မလုပ်နိုင်ရတာ လဲ။ ဆရာ့ရဲ့ ထင်မြင်ယူဆချက်က ဘယ်လိုရှိလဲ။
ဖြေ ။ ။ KIA ရဲ့ထူးခြားချက်က ၂ ခု ၃ ခု ရှိတာပေါ့။ တစ်ခုကတော့ ကချင်ပြည်နယ်က “ဝ” တို့လို တရုတ် နိုင်ငံ တစ်ခုတည်းကို မှီခိုအားထားရတာ မဟုတ်ဘဲ သူက အိန္ဒိယနဲ့ တရုတ်နိုင်ငံကြားထဲမှာ ရှိနေတယ်။ ဒါက ထူးခြားတဲ့ ပထဝီ အနေအထားပဲ။
ဆိုလိုတာက တရုတ်က လုံးလုံးလျားလျား ရာခိုင်နှုန်းပြည့် သူ့ကို နှိပ်ကွပ်ဖို့ ဖိအားပေးဖို့ဆိုတာ စဉ်းစားရမယ့်ကိစ္စ ဖြစ်တယ်။ နံပါတ်နှစ်က သူက တော်လှန်ရေးအင်အားစု အများစုနဲ့ကွာတာက ဘာလဲဆိုတော့ တစ်ဖက်က နေပြည်တော်နဲ့တိုက်နေပေမယ့် သူက တစ်ဖက်ကနေပြီးတော့မှ နေပြည်တော်နဲ့ ကြားလူထားပြီးတော့မှ အမြဲတမ်း ဆွေးနွေးနေတယ်။ စေ့စပ်သလား၊ မစေ့စပ်ဘူးလားတော့ မသိဘူး။
ဒါပေမယ့် အမြဲတမ်း ဆွေးနွေးနေတယ်လို့ ကြားသိရတာပေါ့။ တွေ့နိုင်တာက ကြားထဲမှာ ကြားလူလုပ်ပေးတာက peace talks creation group လို့ခေါ်တဲ့ PCG ဆိုတာ ကချင်ပြည်နယ်မှာ ၁၉၉၀ လောက်ကတည်းရှိတယ်။ အဲဒီ ကတည်းကနေ ပြီးတော့မှ သူက တစ်ဖက်တိုက်ရင်းနဲ့ တစ်ဖက်ကလည်း ဆွေးနွေးရင်းနဲ့ သူတို့ အမြဲတမ်းလုပ်ခဲ့ တယ်။ နံပါတ်သုံးက သူက NUG နဲ့ပေါင်းတယ်၊ အတိုက်အခံနဲ့ ပေါင်းတယ် ဆိုပေမယ့်လည်းသူက KIO အနေနဲ့ မပေါင်းဘူး။ ကြားထဲမှာ ဒီ peace ဆိုတာကို ကြားခံထားပြီး ပူးတွဲဆောင်ရွက်မှုတွေ ရှိတယ်။ သူ့ရဲ့အခြေအနေက တခြားအဖွဲ့တွေလိုမျိုး ရာခိုင်နှုန်းပြည့် နေပြည်တော်ကို ဆန့်ကျင်တာမျိုးလည်း မဟုတ်တဲ့အတွက်ကြောင့် သူ့ အနေနဲ့ လှုပ်ရှားလွယ်တယ်ပေါ့။
မေး ။ ။ တကယ်လို့ စစ်တပ်အနေနဲ့ KIA နဲ့ အပစ်အခတ်ရပ်စဲရေး မလုပ်နိုင်ဘူးဆိုရင် ဘယ်လောက်အထိ အန္တရာယ်ရှိနိုင်မလဲ။
ဖြေ ။ ။ ဒီဥစ္စာကတော့ ကျနော် မစဉ်းစားရသေးလို့ မပြောပါရစေနဲ့။
ဗိုလ်ချုပ်မှူးကြီးမင်းအောင်လှိုင်နဲ့ နိုင်ငံရေးပါတီတွေကို တွေ့ရစဉ်
မေး ။ ။ KIA က ကြည့်ရသလောက် ကချင်ဒေသအပြင် စစ်ကိုင်းတိုင်းကိုလည်း လိုချင်တဲ့ အနေအထားမျိုး ရှိတာပေါ့။ တကယ်လို့ KIA သာ စစ်ကိုင်းတိုင်းကို ထိန်းနိုင်မယ်ဆိုရင် ဘယ်လို အခင်းအကျင်း ဖြစ်သွားနိုင်မလဲ။
ဖြေ ။ ။ သူက စစ်ကိုင်းတိုင်းကို ထိန်းနိုင်မယ်ဆိုရင် တစ်ဖက်ကလည်း အိန္ဒိယနဲ့ ပိုနီးသွားတာပေါ့။ အိန္ဒိယနဲ့ ပိုနီးရုံတင် မကဘူး။ စစ်ကိုင်းတိုင်း ကနေတဆင့်၊ ချင်းကနေတဆင့်၊ ရခိုင်ကနေတဆင့် နိုင်ငံတကာနဲ့ ကုန်သွယ် ရေးမှာရော၊ နိုင်ငံခြား ဆက်သွယ်ရေးမှာရော သူ့အတွက် ကောင်းသွားနိုင်တာပေါ့။
သူလည်း ကုန်းတွင်းမှာ ပိတ်မိနေတဲ့ ပြည်နယ်တစ်ခုပဲ ရှမ်းလိုပဲပေါ့။ အဲဒါကြောင့် စစ်ကိုင်းတိုင်းလောက်နဲ့ပဲ သူပြီးမယ်လို့မထင်ပါဘူး။ ဆက်ပြီးတော့ ဆက်သိမ်းမယ်လို့ မဆိုဘူးပေါ့။ ဒါပေမယ့်လည်း ဆက်ပြီးတော့မှ ဆက်ဆံရေး အဆင်ပြေအောင် ဩဇာလွှမ်းမိုးနိုင်အောင်တော့ ကြိုးစားလိမ့်မယ်လို့ ထင်ပါတယ်။
မေး ။ ။ တကယ်လို့ အဲဒီဒေသတွေမရခင် စစ်ကိုင်းကိုပဲ KIA အနေနဲ့ ရသွားမယ်ဆိုရင်ရော အခု အားကောင်းတာ ထက်တောင် ကျော်လွန်အားကောင်း သွားနိုင်မယ်လို့ရော သုံးသပ်လို့ရနိုင်မလား။
ဖြေ ။ ။ ရနိုင်ပါလိမ့်မယ်။ ဒီကိစ္စတွေက KIA က သူက ကျွမ်းကျင်တာက ဒီလိုမျိုး နိုင်ငံရေးကိစ္စမှာ သူက သတိရှိရှိနဲ့ ရိုးရိုးလုပ်ရုံတင်မကဘူး၊ သံတမန်ရေးရာမှာလည်း သူက ကျနော်တို့ အများအားဖြင့် ကျွမ်းကျင်တယ်လို့ ပြောလို့ရတာပေါ့။
အဲဒါကြောင့်မို့လို့ ဒီသံတမန်ရေးမှာ ကျွမ်းကျင်တယ်ဆိုရင် တစ်ဖက် တရုတ်ကိုလည်း ဒီဆက်ဆံရေးမှာ ဆက်လက် ထိန်းသိမ်းထားပြီးတော့မှ အိန္ဒိယတို့၊ အမေရိကန်တို့ တခြားနိုင်ငံတွေနဲ့လည်း ဆက်လက်ပြီးတော့မှ ဆက်သွယ် နိုင်တယ်ဆိုရင် သူ့ရဲ့ အခြေအနေကလည်း ကောင်းနိုင်တာပေါ့။ ကျနော်တို့ဆိုရင် ကချင်ကို မနာလိုဖြစ်မယ့်အစား အားကျပြီးတော့မှ သူ့နည်းသူ့ဟန်ကို အတုခိုးဖို့ သင့်ပါတယ်။
မေး ။ ။ အရင် ဦးသန်းရွှေလက်ထက်ကနေ သမ္မတကြီး ဦးသိန်းစိန် အပြောင်းအလဲမှာ တုန်းကလည်း NLD မပါဝင်ဘူးပေါ့။ ဦးသိန်းစိန် အစိုးရလက်ထက်မှာတော့ NLD နဲ့ ညှိနှိုင်း သဘောတူညီချက်အရ ၂၀၀၈ အောက်က နေ ကြားဖြတ်ရွေးကောက်ပွဲမှာ ပါမယ်ဆိုတဲ့ သဘောတူညီချက်နဲ့ ဒေါ်အောင်ဆန်းစုကြည်ကို ပြန်လွှတ်ပေးပြီး တော့ ၂၀၀၈ ဥပဒေအရ NLD ပါတီအနေနဲ့ ကြားဖြတ်ရွေးကောက်ပွဲမှာ ပါဝင်လာတဲ့အခါ နိုင်ငံရေးအခင်းအကျင်း ပေါ့။
ဒေါ်အောင်ဆန်းစုကြည်နဲ့ KIA ခေါင်းဆောင် ဒုဗိုလ်ချုပ်ကြီးဂွမ်မော်ကို တွေ့ရစဉ်
အထူးသဖြင့် လက်နက်ကိုင်တွေနဲ့လည်း အဆင်ပြေမှုရှိခဲ့တယ်၊ NCA ဆိုတာကို လုပ်နိုင်ခဲ့ကြတယ်။ ဒါပေမယ့် လက်ရှိမှာ NLD မပါဝင်ဘူးပေါ့။ အများစု ခန့်မှန်းထားချက်အရ ရွေးကောက်ပွဲပြီး တက်လာမယ့် အစိုးရသည် လက်ရှိလူတွေပဲလို့ သုံးသပ်ခန့်မှန်းထားတာရှိတယ်။ အခုလိုမျိုး NLD သာ မရှိတော့ဘူးဆိုရင် လက်နက်ကိုင် ပဋိပက္ခတွေအပေါ်မှာ ပြောင်းလဲမှု ဖြစ်စေနိုင်ပါ့မလား
ဖြေ ။ ။ အခု ကျနော်တို့ တစ်ပြည်လုံးမှာ အုံကြွပြီးတော့မှ တွန်းလှန်တိုက်ခိုက်နေမှုဟာ ရာခိုင်နှုန်းပြည့် ပြောလို့မရသေးဘူး။ အများကတော့ ရာခိုင်နှုန်းပြည့်လို့ထင်တယ်။ ဒါပေမယ့် ရာခိုင်နှုန်းပြည့်လို့ ပြောလို့ မရသေး တာကတော့ ဒေါ်စုအပေါ်မှာ မျှော်လင့်ချက်တွေ ထားတာလည်းရှိမှာပေါ့။ အဲဒါကြောင့်မို့လို့ မပါဝင်ကြဘူး။
သို့သော်လည်းပဲ တကယ်လို့ ဒေါ်စုသာ တစ်ခုခု ဖြစ်သွားတယ်ဆိုရင်တော့ ဒါက NLD လည်း ပြီးသွားပြီဆိုရင် ကျနော်တို့ တော်လှန်ရေး အများစု အများစုက အင်အား ပိုကြီးထွားလာနိုင်ပါတယ်။ တစ်ဖက်ကလည်း ပြောမှာ ပေါ့။ ဒေါ်စု မရှိတော့တဲ့ အတွက်ကြောင့် ဒေါ်စုကို မှီပြီးတော့မှ လုပ်ဆောင်နေတဲ့ တော်လှန်ရေးအင်အားက စိတ်ဓာတ်ရေးရာမှာ အများကြီး ကျသွားနိုင်တယ်လို့ ပြောတာလည်း ရှိနေတယ်။ ဒါ ဒီနှစ်ခုမှာ ဘယ်ဟာဖြစ်မယ် ဆိုတာ ကျနော်တို့က စောင့်ကြည့်ရမှာပေါ့။
မေး ။ ။ ဒါဆို ရွေးကောက်ပွဲပြီးနောက် တက်လာမယ့် အစိုးရအနေနဲ့ ဒေါ်အောင်ဆန်းစုကြည်နဲ့ ပတ်သက် ပြီးတော့ရော NLD နဲ့ပတ်သက်ပြီးတော့ရော ဘယ်လိုလုပ်ဆောင်သင့်တယ်လို့ သုံးသပ်မိလဲ။
ဖြေ ။ ။ လုပ်သင့်တာကတော့ ကျနော်တို့ ပြောစရာမလိုတော့ဘူး။ ဦးသိန်းစိန် လုပ်ခဲ့ပြီးပြီပဲ။ သို့သော်လည်း အခုလောလာဆယ် ဖြစ်နိုင်တာကတော့ ဗိုလ်ချုပ်မှူးကြီးသန်းရွှေ လုပ်ခဲ့သလိုပဲ ရွေးကောက်ပွဲပြီးတဲ့အခါမှ ဒေါ်စု ကို လွှတ်ပေးတာပေါ့။ ဘာဖြစ်လို့လဲဆိုတော့ ရွေးကောက်ပွဲ မပြီးခင် လွှတ်ပေးလိုက်ရင် ဒီရွေးကောက်ပွဲက ရုန်း ရင်း ဆန်ခတ်များ ဖြစ်သွားနိုင်လား ဒါမှမဟုတ် ပျက်သွားနိုင်လား ဒါမျိုးလည်း ဖြစ်နိုင်တာပေါ့။ အခုဆိုရင် ပိုပြီးတော့မှ ဆိုးတာပေါ့။
ဒါကြောင့် အခုလောလောဆယ်ကတော့ ဒေါ်စုနဲ့ NLD ကို ရွေးကောက်ပွဲ မပြီးခင်မှာ ဘာမှ လွတ်လပ်ခွင့်ပေးမယ် လို့ မမြင်ကြဘူး။ အခုရွေးကောက်ပွဲကတော့ ဘယ်နည်းနဲ့မဆို တပ်မတော်က ဦးဆောင်တဲ့ပါတီက အနိုင်ရဖို့က သေချာပေါက်ပေါ့။ ယုံမှားစရာမရှိဘူး။
သို့သော်လည်းပဲ ရွေးကောက်ပွဲအပြီး ရလဒ်ပေါ်လာတဲ့ အခါကြရင် ဘာဖြစ်မလဲဆိုတာကို သုံးသပ်ချက်တွေ ရှိတယ်။ ဒီသုံးသပ်ချက် တစ်ခုကို ပြောပြမှာပေါ့။ တစ်ခုက ဘာလဲဆိုရင် ဗမာပြည်သူ ပြည်သားတွေ ကံကောင်း တယ်ပေါ့။ ဦးသိန်းစိန်လိုမျိုး ပြုပြင် ပြောင်းလဲလိုတဲ့ ပြုပြင်ပြောင်းလဲဖို့ ဆန္ဒပြင်းပြတဲ့ အစိုးရမျိုးတက်လာတာပေါ့။
ဒါဆိုရင်တော့ တိုင်းပြည်က ပြန်ပြီးတော့မှ ကောင်းသွားနိုင်တယ်လို့ ပြောတာတွေရှိပါတယ်။ နံပါတ်နှစ်ကတော့ ဦးမင်းအောင်လှိုင်အနေနဲ့ ကိုယ်တိုင် မတက်ဘဲနဲ့ သူကတပ်ချုပ် ဆက်လုပ်နေမယ်။ ပြီးတော့ သူယုံကြည်စိတ်ချ ရတဲ့ ပုဂ္ဂိုလ်တစ်ဦးကို ကိုယ်စား အစိုးရဦးဆောင်သူအဖြစ် တင်မြှောက်မယ်ဆိုရင်လည်း ဒီဥစ္စာလည်း တစ်နည်း တစ်လမ်းတော့ ကောင်းနိုင်တယ်ပေါ့။
ဒါပေမယ့် ပထမ နည်းလောက်တော့ မကောင်းဘူး။ ဒုတိယနည်းက နည်းနည်းတော့ ကောင်းနိုင်တယ်။ ဒါပေမယ့် စိတ်မချရဘူးပေါ့။ နံပါတ်သုံးကတော့ ဦးမင်းအောင်လှိုင် ကိုယ်တိုင် တက်ပြီးတော့မှ အစိုးရ ဦးဆောင်မှု လုပ်တာ ပေါ့။ အဲဒီလိုဆိုရင်တော့ သူက တစ်ဖက်ကလည်း တပ်ကို ဆက်ပြီးတော့မှ ကိုင်ထားတယ်၊ တစ်ဖက်ကလည်း အစိုးရကို ဦးဆောင်တယ်ဆိုတော့ ကျနော်တို့ရဲ့ တော်လှန်ရေးဘက်ကတော့ ဆက်ပြီးတော့မှ သွားမှာပဲ။
အများစုကတော့ ကျနော်တို့ တော်လှန်ရေးတွေဟာ ကိုယ့်ကိုယ်ကို ပိုပြီးတော့မှ အားထားရမယ့် အခြေအနေမျိုး ဖြစ်လာတာပေါ့။ အရင်ကလို ကိုယ့်ရဲ့ နိုင်ငံခြားရောက်နေတဲ့ ပြည်သူက ကူညီထောက်ပံ့တာလည်း လျော့လာ တယ်၊ နောက်ပြီး နိုင်ငံခြား အကူအညီလည်း မရနိုင်ဘူး၊ အသိအမှတ်ပြုမှုလည်း မရနိုင်ဘူးဆိုရင်တော့ အများကြီး အကျဉ်းအကြပ် တွေ့မှာပေါ့။ ဒါတွေကို ဦးမင်းအောင်လှိုင်တို့ကလည်း တွက်ဆထားပုံရပါတယ်။
သူအောင်ပွဲရ နိုင်အောင် ဆိုပြီးတော့မှလည်း မင်္ဂလာပြုတဲ့ အနေနဲ့ ဘယ်လာရုစ် သမ္မတကြီးကို ဖိတ်ခေါ်တာလည်း ဖြစ်နိုင်ပါတယ်။ ဒီကိစ္စမှာ ပထမနည်းလမ်း ဖြစ်ပါစေလို့တော့ ဆုတောင်းတာပေါ့။ နှစ်နဲ့ သုံးတော့ မဖြစ်ပါစေနဲ့လို့ ဆုတောင်းတာပေါ့။
ကျားဖြန့်တွေကို တွေ့ရစဉ်
မေး ။ ။ တကယ်လို့ ခုနကပြောခဲ့တဲ့ ၃ ချက်ထဲမှာ နောက်ဆုံး အချက် ၃ ဖြစ်လာမယ်လို့ အများစုက သုံးသပ်ထားကြတယ်။ တကယ်လို့ အဲဒီ အချက် ၃ သာဖြစ်လာခဲ့ရင် တိုင်းပြည်က တည်ငြိမ်ဖို့ လွယ်ကူပါ့မလား။
ဖြေ ။ ။ ကမ္ဘာကြေကြေ မပြေလည်ဘူးပေါ့။ ကျနော်တို့ ဆက်ပြီးတော့မှ ရုန်းကန်တိုက်ခိုက်သွားရတော့ မှာပေါ့။
မေး ။ ။ လက်ရှိ ကျားဖြန့်ကိစ္စနဲ့ ပတ်သက်ပြီးတော့ရော ဆရာ လေ့လာထားတာတွေ ရှိလား။
ဖြေ ။ ။ မရှိသေးဘူး။ ရိုးရိုးပဲပြောလို့ ရမှာကတော့ ကျားဖြန့်ဆိုတာလည်း သူက ကျနော်တို့ နိုင်ငံရေး သဘောတူညီချက် မရခဲ့လို့၊ ရပြီးတော့ မလုပ်ဆောင်နိုင်ခဲ့လို့ အကျိုးရလဒ်တစ်ခုပဲပေါ့။ ၁၉၄၇ မှာ ကျနော်တို့က နိုင်ငံကြီးကို ဖက်ဒရယ်စနစ်နဲ့ စီမံရေးဆိုပြီးတော့မှ ဆုံးဖြတ်ခဲ့တယ်။ ဒါပေမယ့် ဗိုလ်ချုပ်အောင်ဆန်း ကွယ်လွန် သွားပြီး နောက်ပိုင်းကြတော့ ဖက်ဒရယ်စနစ်ဆိုတာကို နာမည်အရယူပြီးတော့မှ လက်တွေ့အရတော့ တစ်ပြည် ထောင် စနစ်နဲ့ အုပ်ချုပ်တယ်။
အဲဒါကြောင့် ကျနော်တို့ နိုင်ငံက မငြိမ်မသက်ဖြစ်ပြီး ပြည်တွင်းစစ်က ပေါ်လာခဲ့တယ်။ ဒီလိုပေါ်လာတဲ့ အတွက် ကြောင့် အကျိုးဆက်တွေလည်း အများကြီး ပေါ်လာတယ်။ ရိုးရိုးကြည့်လိုက်ရင်တော့ အကြမ်းဖျင်း မြင်သာတာကို ကြည့်မယ်ဆိုရင် ပထမဆုံးကတော့ ဘိန်း၊ ဘိန်းကုန်ကူးပြီးတော့မှ အင်အားစုတာပေါ့။ နောက်ကြ ဘိန်းတင်မက ဘူး heroin လုပ်ပြီးတော့မှ အင်အားစုတာပေါ့။ နောက်ဆုံးကြတော့ ရာဘတွေ ဘာတွေ ပေါ်လာပြီးတော့မှ အဲဒီကနေ အင်အားစုတာပေါ့။ နောက်ဆုံး အခုပေါ်လာတဲ့ ကျားဖြန့်တွေဟာ နောက်ဆုံးပေါ်ပေါ့။
ဒီတော့ ကျနော်တို့ရဲ့ နိုင်ငံရေးအရ သဘောတူညီချက် မူလ သဘောတူညီချက်တွေကို ပြန်ပြီး အကောင်အထည် မဖော်နိုင်သမျှ ဒီလိုအကျိုးဆက်တွေက ဆက်ဖြစ်နေမှာပဲ။ ဘိန်းက သိပ်ဆိုးတယ်၊ ဘိန်းထက် ပိုဆိုးတာက heroin ဖြစ်တယ်၊ heroin ထက်ပိုဆိုးတာက ရာဘ၊ ရာဘထက်ပိုဆိုးတာက အခုကျားဖြန့်ဖြစ်တယ်။ ဒါကို ဒီတိုင်းပဲ လွှတ် ထားမယ်ဆိုရင် ကျားဖြန့်တဲ့ပိုဆိုးတဲ့ အရေးအခင်း ထပ်ပေါ်လာနိုင်တယ်။
ဒါကြောင့် အဲဒီအခြေအနေ မရောက်ခင် ကျနော်တို့ ၁၉၄၇ က ကျနော်တို့ သဘောတူထားပြီးတဲ့ ဖက်ဒရေးရှင်း၊ ဖက်ဒရယ်နိုင်ငံကို အမြန်ဆုံး တည်ဆောက်နိုင်အောင် ဝိုင်းဝန်းကြိုးပမ်းဖို့ လိုပါတယ်။
