CNI Sport News

၂၀၂၄ ခုနှစ်၊ ဇွန်လ ၂၈

၂၀၂၆ ကမ္ဘာ့ဖလားခြေစစ်ပွဲ(အာရှဇုန်) တတိယအဆင့်အတွက် အုပ်စုမဲခွဲမှု ပြုလုပ်ခဲ့တာမှာ ထိပ်သီးအသင်းတွေ ဖြစ်တဲ့ ဂျပန်၊သြစတြေးလျနဲ့ ဆော်ဒီအသင်းတို့ တစ်အုပ်စုတည်း ကျရောက်ခဲ့တာ ဖြစ်ပါတယ်။

ပြီးခဲ့တဲ့ ဒုတိယအဆင့် ခြေစစ်ပွဲမှာ ခြေစစ်ပွဲအောင်မြင်ခဲ့တဲ့ အသင်း ၁၈ သင်းကို ၆ သင်းတစ်အုပ်စုနဲ့ အုပ်စု ၃ စုခွဲပြီး ယှဉ်ပြိုင်ရမှာပါ။ 

အုပ်စုတွင်းထိပ်ဆုံး ၂ သင်းစီ စုစုပေါင်း ၆ သင်းဟာ ၂၀၂၆ ကမ္ဘာ့ဖလားပြိုင်ပွဲကို တိုက်ရိုက်ယှဉ်ပြိုင်ခွင့် ရရှိမှာဖြစ် ပါတယ်။ ဒီနောက်မှာတော့ တတိယနဲ့ စတုတ္ထ ရရှိတဲ့အသင်း ၆ သင်းဟာ ကမ္ဘာ့ဖလားဝင်ခွင့်ရဖို့ စတုတ္ထအဆင့်၊ ပဉ္စမအဆင့်တွေဆက်ပြီး ယှဉ်ပြိုင်ရမှာ ဖြစ်ပါတယ်။

အုပ်စုမဲခွဲမှုအရ အုပ်စု A မှာ အီရန်၊ ကာတာ၊ ဥဇဘတ်ကစ္စတန်၊ ယူအေအီး၊ ကာဂျစ္စတန်နဲ့ မြောက်ကိုရီးယားတို့ ကျရောက်နေတာပါ။ 

ကမ္ဘာ့ဖလားပြိုင်ပွဲ အုပ်စုများကိုတွေ့ရစဉ်

အုပ်စု B မှာတော့ တောင်ကိုရီးယား၊ အီရတ်၊ ဂျော်ဒန်၊ အိုမန်၊ ပါလက်စတိုင်း၊ ကူဝိတ်တို့ ကျရောက်နေပြီး အုပ်စု C မှာ ဂျပန်၊ သြစတြေးလျ၊ ဆော်ဒီ၊ ဘာရိန်း၊ တရုတ်နဲ့ အင်ဒိုနီးရှားတို့ ကျရောက်နေတာ ဖြစ်ပါတယ်။

အင်ဒိုနီးရှားအသင်းဟာ တတိယအဆင့် ခြေစစ်ပွဲကို တက်နိုင်ခဲ့တဲ့ တစ်သင်းတည်းသော အရှေ့တောင်အာရှ အသင်းလည်း ဖြစ်တာပါ။

ဂျပန်အသင်းနည်းပြ မိုရီယာဆုက အလွန်ခက်ခဲတဲ့ အုပ်စုလို့ မဲခွဲအပြီး သတင်းထောက်တွေနဲ့ တွေ့ဆုံချိန် ပြောခဲ့ပါတယ်။

မိုရီယာဆုက “နောက်ဆုံးကစားခဲ့တဲ့ ကမ္ဘာ့ဖလားပြိုင်ပွဲအတွက် ခြေစစ်ပွဲအဆင့်တွေမှာ ကျနော်တို့ ခက်ခက်ခဲခဲ လုပ်ခဲ့ရပါတယ်။ ဒီတစ်ကြိမ်မှာ ကျနော်တို့ ပိုပြီးတော့ လုပ်ဆောင်ရမှာပါ။ ဒါပေမယ့် ကျနော်တို့ဟာ ဒီပွဲအတွက် အဆင်သင့်ဖြစ်ပြီး ရဲရင့်စွာသွားမှာပါ။ ပရိသတ်တွေလည်း ကျနော်တို့နဲ့အတူ တိုက်ပွဲဝင်ဖို့တောင်းဆိုပါတယ်”လို့ ပြောခဲ့တာပါ။

တတိယအဆင့် ခြေစစ်ပွဲတွေကို စက်တင်ဘာလကနေ ၂၀၂၅ ခုနှစ်၊ ဇွန်လအထိ ယှဉ်ပြိုင်ကစားသွားမှာ ဖြစ်ပါတယ်။

Source: CNA

CNI Sport News

၂၀၂၄ ခုနှစ်၊ ဇွန်လ ၂၈

ဂျော်ဂျီယာအသင်းဟာ ယူရို ၂၀၂၄ ပြိုင်ပွဲရဲ့ ၁၆ သင်းအဆင့်ကို တက်နိုင်ခဲ့ပြီးနောက် ဝန်ကြီးချုပ်ဟောင်းဖြစ်တဲ့ ဘီလျံနာ ဘစ်ဇီနာဆီကနေ ဆုကြေးပေါင် ၈.၄ သန်း ရရှိခဲ့ပါတယ်။

ယူရိုပြိုင်ပွဲကို ပထမဆုံးအကြိမ် ဝင်ရောက်ယှဉ်ပြိုင်တဲ့ ဂျော်ဂျီယာအသင်းဟာ အုပ်စုနောက်ဆုံးပွဲစဉ်မှာ ပေါ်တူဂီ အသင်းကို ၂ ဂိုး- ဂိုးမရှိနဲ့ အနိုင်ရပြီးနောက် အုပ်စုပွဲစဉ် ၃ ပွဲကစားအပြီးမှာ ရမှတ် ၄ မှတ်ရရှိကာ အကောင်းဆုံး အုပ်စုတတိယနဲ့ နောက်တစ်ဆင့် တက်နိုင်ခဲ့တာပါ။ 

အဲဒါကြောင့် ဂျော်ဂျီယာအသင်းရဲ့ အောင်မြင်မှုကို ဂုဏ်ပြုတဲ့အနေနဲ့ ဘီလျံနာ ဘစ်ဇီနာက အသင်းကို ပေါင် ၈.၄ သန်းပေးမယ်လို့ ကတိပြုခဲ့တာ ဖြစ်ပါတယ်။

ဂျော်ဂျီယာအိပ်မက်နိုင်ငံရေးပါတီကို တည်ထောင်ခဲ့တဲ့ ဘစ်ဇီနာဟာ ၂၀၁၂ ကနေ ၂၀၁၃ ခုနှစ်အထိ ဂျော်ဂျီယာ နိုင်ငံရဲ့ ဝန်ကြီးချုပ်အဖြစ် တာဝန်ထမ်းဆောင်ခဲ့တာပါ။ 

ပေါင် ၃.၈၇ ဘီလီယံ ကြွယ်ဝချမ်းသာတဲ့ ဘစ်ဇီနာပေးမယ့် ဆုကြေးငွေကို သူ့ရဲ့ပရဟိတဖောင်ဒေးရှင်းကနေ ရရှိမယ်လို့ သူ့ရဲ့ပါတီက ထုတ်ပြန်ထားပါတယ်။

ဘစ်ဇီနာကိုတွေ့ရစဉ်

ဒါအပြင် ဂျော်ဂျီယာအသင်းအနေနဲ့ စပိန်အသင်းကို ၁၆ သင်းအဆင့်မှာ အနိုင်ယူနိုင်ရင် ဘစ်ဇီနာဟာ နောက်ထပ် ပေါင် ၈.၄ သန်းပေးမယ်လို့ ပြောထားတာပါ။

ဘစ်ဇီနာဟာ ဂျော်ဂျီယာအသင်းရဲ့ သမိုင်းဝင် အိပ်မက်အောင်ပွဲအတွက် ဘောလုံးအသင်းက ကစားသမားတွေ၊ နည်းပြအဖွဲ့ဝင်တွေနဲ့ ဂျော်ဂျီယာ ပရိသတ်တွေ အားလုံးကို ကျေးဇူးတင်တယ်လို့ ပြောခဲ့တာ ဖြစ်ပါတယ်။ 

ဂျော်ဂျီယာအသင်းဟာ ယူရို ၂၀၂၄ ပြိုင်ပွဲဝင် အသင်းတွေထဲမှာ အဆင့်သတ်မှတ်ချက် အနိမ့်ဆုံးအသင်းဖြစ်ပြီး စပိန်အသင်းနဲ့ ယှဉ်ပြိုင်ခဲ့တဲ့ နောက်ဆုံး ၇ ပွဲမှာ ၁ ပွဲသာ အနိုင်ရရှိခဲ့တာပါ။

စပိန်အသင်းဟာ ဒီပြိုင်ပွဲမှာ အုပ်စုတွင်း ၃ ပွဲစလုံး အနိုင်ရပြီး ပေးဂိုးမပေးရသေးတဲ့ တစ်သင်းတည်းသော အသင်းအဖြစ် ရှိနေပါတယ်။ 

စပိန်အသင်းဟာ လက်ရှိခြေစွမ်းတွေကြောင့် ယူရို ၂၀၂၄ ပြိုင်ပွဲမှာ ဗိုလ်စွဲဖို့ ရေပန်းစားတဲ့ အသင်းတွေထဲက တစ်သင်းအဖြစ်ရှိနေတာ ဖြစ်ပါတယ်။

Source: Metro

CNI Sport News

၂၀၂၄ ခုနှစ်၊ ဇွန်လ ၂၈

အာဂျင်တီးနားအသင်းခေါင်းဆောင် မက်ဆီဟာ တံကောက်ကြောဒဏ်ရာ သက်သာမှုမရှိတဲ့အတွက် ပီရူးအသင်းနဲ့ ကိုပါအမေရိကဖလား အုပ်စုနောက်ဆုံးပွဲစဉ်မှာ အနားပေးခံရဖွယ် ရှိနေပါတယ်။

မက်ဆီဟာ အာဂျင်တီးနားအသင်းက ချီလီအသင်းကို အနိုင်ရရှိခဲ့တဲ့ ကိုပါအမေရိကဖလား အုပ်စုဒုတိယပွဲစဉ်မှာ ပြိုင်ဘက် ကစားသမားရဲ့ ဖျက်ထုတ်မှုကြောင့် ပထမပိုင်းအတွင်း ကုသမှုခံယူခဲ့ရတာပါ။ 

မက်ဆီဟာ ဒီပွဲမှာ အာဂျင်တီးနားအသင်းအတွက် ပွဲချိန်ပြည့် ပါဝင်ကစားသွားခဲ့ပေမယ့် ပွဲအပြီး အင်တာဗျူးမှာ ဒဏ်ရာ အခြေအနေအတွက် မစိုးရိမ်ရဖို့ မျှော်လင့်တယ်လို့ ပြောခဲ့ပါတယ်။

ESPN က အာဂျင်တီးနားအသင်းနည်းပြ စကာလိုနီဟာ ပီရူးအသင်းနဲ့ပွဲစဉ်မှာ မက်ဆီကို အနားပေးဖွယ်ရှိတယ်လို့ ဖော်ပြခဲ့တာပါ။

အာဂျင်တီးနားအသင်းဟာ မက်ဆီရဲ့ ဒဏ်ရာအခြေအနေကို သိရှိနိုင်ဖို့အတွက် နောက်ထပ် စစ်ဆေးမှုတွေ ပြုလုပ်သွားဖို့ ရှိနေတာ ဖြစ်ပါတယ်။ 

 မက်ဆီကို တွေ့ရစဉ်

စကာလိုနီဟာ ပီရူးအသင်းနဲ့ပွဲစဉ်မှာ ပွဲထွက်လူစာရင်းကို အပြောင်းအလဲ အများအပြားပြုလုပ်ဖို့ အစီအစဉ် ရှိတယ်လို့လည်း ကြေညာထားတာပါ။

အဲဒါကြောင့် ဒီပွဲစဉ်မှာ ပလာစီယို၊ ရိုဒရီဂွတ်ဇ်၊ ကာဘိုနီနဲ့ ဂါနာချိုတို့ဟာ အာဂျင်တီးနားအသင်းအတွက် ပါဝင်ကစားခွင့်ရနိုင်ဖို့ အခွင့်အရေးရှိနေတာ ဖြစ်ပါတယ်။

အာဂျင်တီးနားအသင်းဟာ အုပ်စုအဖွင့်ပွဲစဉ် ၂ ပွဲစလုံး အနိုင်ရရှိထားတာကြောင့် ကိုပါအမေရိကဖလား ကွာတားဖိုင်နယ်အဆင့်ကို တက်ရောက်နိုင်ခဲ့ပြီဖြစ်တာပါ။ 

ဒါအပြင် အာဂျင်တီးနားအသင်းဟာ ပီရူးအသင်းနဲ့ပွဲစဉ်မှာ အရေးနိမ့်ခဲ့ရင်တောင် အုပ်စုထိပ်ဆုံးနေရာကို ရရှိဖို့ သေချာနေတာ ဖြစ်ပါတယ်။ 

အဲဒါကြောင့် နည်းပြ စကာလိုနီဟာ လာမယ့်ကွာတားဖိုင်နယ် ပွဲစဉ်မတိုင်ခင်မှာ အဓိက ကစားသမားအချို့ကို အနားပေးသွားဖို့ ရှိနေတာပါ။

ကိုပါအမေရိကဖလားပြိုင်ပွဲရဲ့ လက်ရှိချန်ပီယံဖြစ်တဲ့ အာဂျင်တီးနားအသင်းဟာ အခုနှစ်ပြိုင်ပွဲမှာလည်း ချန်ပီယံဆုကို ဆက်ပြီး ထိန်းသိမ်းနိုင်ဖို့ ပစ်မှတ်ထားနေတာ ဖြစ်ပါတယ်။

Source: Goal

CNI Sport News

၂၀၂၄ ခုနှစ်၊ ဇွန်လ ၂၇

ယူနိုက်တက်ကြယ်ပွင့်ဟောင်း လင်ဂတ်ဟာ တောင်ကိုရီးယားကလပ် FC ဆိုးလ်အသင်း ကစားသမားဘဝ ပထမဆုံးသွင်းဂိုးကို ဂန်ဝမ်အသင်းနဲ့ ကစားခဲ့တဲ့ ကေလိဂ်ပွဲစဉ်မှာ သွင်းယူနိုင်ခဲ့ပါတယ်။

နော်တင်ဟမ်ဖောရက်စ်အသင်းက ထွက်ခွာပြီးကတည်းက အသင်းလက်မဲ့ ဖြစ်နေခဲ့တဲ့ လင်ဂတ်ဟာ ပြီးခဲ့တဲ့ ဖေဖော်ဝါရီလက FC ဆိုးလ်အသင်းထံ ၂ နှစ်စာချုပ်နဲ့ ပြောင်းရွှေ့ခဲ့တာပါ။ 

လင်ဂတ်ဟာ FC ဆိုးလ် ကစားသမားဘဝ ပွဲဦးထွက်မှာ ခြေစွမ်းပြသနိုင်ဖို့ ရုန်းကန်ခဲ့ရလို့ ဝေဖန်မှုတွေ ခံခဲ့ရပေ မယ့် ဂန်ဝန်အသင်းနဲ့ပွဲမှာ ဂိုးစတင် သွင်းယူနိုင်ခဲ့တာ ဖြစ်ပါတယ်။ 

FC ဆိုးလ်အသင်းက ဂန်ဝန်အသင်းကို ၂ ဂိုး- ဂိုးမရှိနဲ့ အနိုင်ရခဲ့တဲ့ ဒီပွဲစဉ်မှာ လင်ဂတ်ဟာ ပွဲချိန် ၅၆ မိနစ်မှာရရှိတဲ့ ပင်နယ်တီကို ဂိုးဝင်အောင် ကန်သွင်းနိုင်ခဲ့တာပါ။

အသက် ၃၁ နှစ်အရွယ်ရှိ လင်ဂတ်ဟာ ပြီးခဲ့တဲ့ မတ်က ဒူးခွဲစိတ်မှု ခံယူခဲ့ရတာကြောင့် မေလ တတိယပတ်အထိ အနားယူခဲ့ရတာ ဖြစ်ပါတယ်။ 

လင်ဂတ်ကို တွေ့ရစဉ်

လင်ဂတ်ဟာ ဒဏ်ရာကနေ သက်သာလာပြီးနောက် ပါဝင်ကစားခဲ့တဲ့ပွဲတွေမှာ ခြေစွမ်းပြသနိုင်ခဲ့ပြီး ဆူဝန် အသင်းကို ၃ ဂိုး- ဂိုးမရှိနဲ့ အနိုင်ရခဲ့တဲ့ ကေလိဂ်ပွဲစဉ်မှာ ပရိသတ်တွေရဲ့ ချီးကျူးမှုကို ရရှိခဲ့ပါတယ်။ 

လင်ဂတ်ဟာ ဒီအပတ်ကစားမယ့် ဂျီယွန်းဘွတ်အသင်းနဲ့ ပွဲစဉ်မှာ FC ဆိုးလ်အသင်းအတွက် ခြေစွမ်းပြပြီး ဂိုးထပ်သွင်းနိုင်ဖို့ မျှော်လင့်နေတာပါ။

FC ဆိုးလ်အသင်းဟာ ဒီရာသီ ကေလိဂ်ပွဲစဉ် ၁၉ ပွဲ ကစားအပြီးမှာ ၂၄ မှတ်နဲ့ အဆင့် ၆ နေရာ ရပ်တည်နေတာ ဖြစ်ပြီး အာရှချန်ပီယံလိဂ်ပွဲစဉ်တွေ ယှဉ်ပြိုင်ခွင့်ရဖို့အတွက် လာမယ့်ပွဲတွေမှာ ရလဒ်ကောင်းရရှိအောင် လုပ်ဆောင်ဖို့ လိုအပ်နေတာ ဖြစ်ပါတယ်။ 

Source: Goal

CNI Sport News

၂၀၂၄ ခုနှစ်၊ ဇွန်လ ၂၇

အင်္ဂလန်အသင်းရဲ့ အုပ်စုပွဲစဉ် ၃ ပွဲစလုံး မပါဝင်နိုင်ခဲ့တဲ့ ဘယ်နောက်ခံလူ လုပ်ခ်ရှောဟာ ဆလိုဗက်ကီးယား အသင်းနဲ့ ကစားမယ့် ယူရို ၂၀၂၄ ပြိုင်ပွဲ ၁၆ သင်းအဆင့်ပွဲစဉ်မှာ ပါဝင်ဖို့ အဆင်သင့်ဖြစ်နေပြီလို့ ပြောခဲ့ပါတယ်။

လုပ်ခ်ရှောဟာ တံကောက်ကြော ဒဏ်ရာကြောင့် ဖေဖော်ဝါရီလကတည်းက ယူနိုက်တက်အသင်းအတွက် ပါဝင် ကစားနိုင်ခြင်း မရှိခဲ့တာပါ။ 

ဒါပေမယ့် နည်းပြဆောက်ဂိတ်ဟာ လုပ်ခ်ရှောကို ယူရို ၂၀၂၄ ပြိုင်ပွဲဝင် အင်္ဂလန်အသင်း လူစာရင်းမှာ တစ်ဦးတည်းသော ဘယ်နောက်ခံလူ ကစားသမားအဖြစ် ခေါ်ယူခဲ့တာ ဖြစ်ပါတယ်။ 

လုပ်ခ်ရှောဟာ ပြိုင်ပွဲကျင်းပတဲ့ ဂျာမနီနိုင်ငံမှာ တစ်ဦးချင်းလေ့ကျင့်မှု အစီအစဉ်တွေသာ လုပ်ဆောင်ခဲ့ပေမယ့် အုပ်စုနောက်ဆုံးပွဲစဉ်ဖြစ်တဲ့ ဆလိုဗေးနီးယား အသင်းနဲ့ပွဲမတိုင်ခင် အသင်းရဲ့ လေ့ကျင့်ခန်း အစီအစဉ်မှာ ပူးပေါင်း လာခဲ့တာပါ။

ယူနိုက်တက်အသင်း နောက်ခံလူဟာ ဆလိုဗေးနီးယား အသင်းနဲ့ပွဲစဉ်မှာ အင်္ဂလန်အသင်းရဲ့ အရန်ကစားသမား အဖြစ် ပါဝင်ခဲ့တာ ဖြစ်ပါတယ်။ 

အင်္ဂလန်အသင်းဟာ အုပ်စုပွဲစဉ် ၃ ပွဲစလုံးမှာ ဘယ်နောက်ခံ နေရာအတွက် ထရစ်ပီယာကို အသုံးပြုခဲ့တာဖြစ်ပြီး သူကလည်း ခြေသလုံးကြွက်သားပြဿနာနဲ့ ရင်ဆိုင်နေရတာပါ။ 

လုပ်ခ်ရှောကို တွေ့ရစဉ်

ဆလိုဗေးနီးယား အသင်းနဲ့ပွဲ မတိုင်ခင် သတင်းထောက်တွေက ဒီပွဲကို ပါဝင်ကစားဖို့ အဆင်သင့်ဖြစ်ပြီလားလို့ မေးမြန်းခဲ့ချိန်မှာ လုပ်ခ်ရှောက လာမယ့်ပွဲကို ကစားမယ်လို့ ဖြေသွားခဲ့တာ ဖြစ်ပါတယ်။

အီတလီအသင်းနဲ့ ယူရို ၂၀၂၀ ပြိုင်ပွဲဗိုလ်လုပွဲမှာ အင်္ဂလန်အသင်းအတွက် ဂိုးသွင်းခဲ့တဲ့ လုပ်ခ်ရှောဟာ ပြီးခဲ့တဲ့ ရာသီက ယူနိုက်တက်အသင်းအတွက် ၁၅ ပွဲသာ ပါဝင်ကစားနိုင်ခဲ့တာပါ။ 

လုပ်ခ်ရှော ပြန်ကစားနိုင်မှာက နည်းပြဆောက်ဂိတ်အတွက် သတင်းကောင်းဖြစ်သလို အခြားတစ်ဖက်မှာလည်း သူဟာ လူစာရင်းရွေးချယ်ဖို့ အခက်အခဲတွေနဲ့ ကြုံတွေ့နေရပါတယ်။ 

ပြီးခဲ့တဲ့ ဆလိုဗေးနီးယားအသင်းနဲ့ပွဲမှာ အင်္ဂလန်အသင်းအတွက် လူစားဝင်ကစားပြီး ခြေစွမ်းပြသနိုင်ခဲ့တဲ့ ကိုဘီမိုင်နူး၊ ကိုးလ်ပယ်လ်မာနဲ့ ဂေါ်ဒွန်တို့ကို ပွဲထွက်လူစာရင်းအသုံးပြုဖို့ တောင်းဆိုမှုတွေ ရှိနေတာပါ။

အင်္ဂလန်အသင်းနည်းပြ ဆောက်ဂိတ်ဟာ ပြီးခဲ့တဲ့ အုပ်စုပွဲစဉ် ၃ ပွဲစလုံးမှာ ပွဲထွက်လူစာရင်းကို ၁ နေရာသာ ပြောင်းလဲအသုံးပြုခဲ့တာဖြစ်ပြီး အသင်းရဲ့စွမ်းဆောင်ရည်ဟာ ကောင်းမွန်မှုမရှိလို့ ပရိသတ်တွေရဲ့ လှောင်ပြောင်မှု တွေကို ခံနေရတာ ဖြစ်ပါတယ်။ 

Source: Metro

CNI Sport News

၂၀၂၄ ခုနှစ်၊ ဇွန်လ ၂၇

ဘယ်လ်ဂျီယံအသင်းခေါင်းဆောင် ဒီဘရိုင်းက ယူကရိန်းအသင်းနဲ့ ဂိုးမရှိ သရေကျခဲ့တဲ့ ယူရို ၂၀၂၄ ပြိုင်ပွဲအုပ်စု နောက်ဆုံးပွဲစဉ်အပြီးမှာ ဒေါသထွက်နေတဲ့ ဘယ်လ်ဂျီယံ ပရိသတ်တွေအနေနဲ့ သူတို့ကို အားပေးဖို့ တိုက်တွန်း သွားခဲ့ပါတယ်။

ဒီဘရိုင်းက “ကျနော်တို့ဒီပွဲကို အနိုင်ရရှိဖို့ ကြိုးစားခဲ့ပါတယ်။ ကျနော်တို့ဟာ ဂိုးရနိုင်မယ့် အခွင့်အရေးတွေ ရခဲ့ သလို ဂိုးပြန်ပေးရနိုင်တယ်ဆိုတာလည်း သိတဲ့အတွက် စွန့်စားမှုတွေကို မလုပ်ခဲ့ပါဘူး။ ဂိုးသာပေးရရင် ယူရိုပြိုင်ပွဲ က ကျနော်တို့ ထွက်ခွာရမှာပါ။ ပရိသတ်တွေ ကျနော်တို့နဲ့အတူ ရှိနေဖို့လိုအပ်ပါတယ်။ ဒီပရိသတ်တွေကို ကျနော် တို့ လိုအပ်ပါတယ်။ ကျနော် ဒါပဲပြောစရာရှိပါတယ်”လို့ ပြောခဲ့တာပါ။

ဘယ်လ်ဂျီယံအသင်းဟာ ဒီပွဲရလဒ်ကြောင့် အုပ်စုတွင်း ဒုတိယနေရာ ရပ်တည်ကာ ၁၆ သင်းအဆင့်ကို တက်နိုင် ခဲ့ပြီး ယူကရိန်းအသင်းကတော့ ရမှတ် ၄ မှတ်ရယူပြီး ယူရိုပြိုင်ပွဲကနေ ထွက်ခွာခဲ့ရတဲ့ ပထမဆုံးအသင်း ဖြစ်ခဲ့ပါတယ်။ 

ဘယ်လ်ဂျီယံအသင်း ခေါင်းဆောင် ဒီဘရိုင်းကိုတွေ့ရစဉ်

ဘယ်လ်ဂျီယံအသင်းဟာ ဒီပွဲစဉ်ရဲ့ ပွဲပြီးခါနီးမှာ အနိုင်ရယူဖို့ထက် သရေကျဖို့ကိုသာ ရွေးချယ်ခဲ့တာကြောင့် ပရိသတ်တွေဟာ ဒေါသထွက်ပြီး ကစားသမားတွေကို အော်ဟစ်မှုတွေ ပြုလုပ်ခဲ့တာပါ။

ဒီဘရိုင်းဟာ ပွဲအပြီးမှာ ပရိသတ်တွေထံ ချဉ်းကပ်ခဲ့ပေမယ့် အော်ဟစ်သံတွေ ပိုပြီးကျယ်လောင်လာတဲ့အတွက် အသင်းဖော်တွေကို ကွင်းထဲက ထွက်ခွာဖို့ ညွှန်ကြားခဲ့တာ ဖြစ်ပါတယ်။

ဒီပွဲစဉ်မှာ အကောင်းဆုံး ကစားသမားဆု ရရှိခဲ့တဲ့ ဒီဘရိုင်းက ပရိသတ်တွေ သူတို့ကို ဒေါသထွက်နေပေမယ့် လာမယ့်ပွဲတွေမှာ အားပေးမှုတွေ ပြုလုပ်ဖို့ ပြောခဲ့တာပါ။ 

ဘယ်လ်ဂျီယံအသင်းနည်းပြ တီဒက်စ်ကိုက ပရိသတ်တွေရဲ့ လှောင်ပြောင်အော်ဟစ်မှုတွေကြောင့် အံ့အားသင့် ခဲ့ရပေမယ့် သူတို့ဟာ အနိုင်ရဖို့ ကြိုးစားခဲ့တယ်လို့ ပွဲအပြီးအင်တာဗျူးမှာ ပြောခဲ့ပါတယ်။

ဘယ်လ်ဂျီယံအသင်းဟာ အုပ်စုတွင်း ဒုတိယသာရရှိခဲ့တာကြောင့် ယူရို ၂၀၂၄ ပြိုင်ပွဲ ၁၆ သင်းအဆင့်မှာ ပြင်သစ် အသင်းနဲ့ ယှဉ်ပြိုင်ရမှာဖြစ်ပါတယ်။ 

Source: ESPN

CNI Sport News

၂၀၂၄ ခုနှစ်၊ ဇွန်လ ၂၇

ယူရို ၂၀၂၄ ပြိုင်ပွဲအုပ်စု နောက်ဆုံးပွဲစဉ်မှာ ပေါ်တူဂီအသင်းကို အနိုင်ရပြီး ၁၆ သင်းအဆင့်ကို ဂျော်ဂျီယာအသင်း တက်နိုင်ခဲ့ပြီးနောက် ကာဗီချာက ဂျော်ဂျီယာ လူမျိုးတွေရဲ့ဘဝမှာ အကောင်းဆုံးနေ့ကို ကြုံခဲ့ရပြီလို့ ပြောခဲ့ပါ တယ်။

ကာဗီချာက “ကျနော်ဟာ ရော်နယ်ဒိုရဲ့ ဂျာစီကိုရရှိခဲ့ပြီး ကျနော်တို့ နောက်တစ်ဆင့်ကို တက်နိုင်ခဲ့ပါတယ်။ ဒီနေ့က ဂျော်ဂျီယာလူမျိုးတွေရဲ့ဘဝမှာ အကောင်းဆုံးနေ့ပါပဲ။ ဘယ်သူကမှ ကျနော်တို့ လုပ်နိုင်မယ်ဆိုတာ ယုံကြည်မှာ မဟုတ်ပေမယ့် ကျနော်တို့သမိုင်းကို ဖန်တီးနိုင်ခဲ့ပါပြီ။ ပေါ်တူဂီအသင်းကို အနိုင်ရမယ်လို့လည်း ယုံကြည်ကြမှာ မဟုတ်ပေမယ့် အခွင့်အရေး ၁ ရာခိုင်နှုန်းရှိရင်တောင် ကျနော်တို့ ဒါကို ဖြစ်အောင်လုပ်နိုင်တယ် ဆိုတာကို ပြသနိုင်ခဲ့ပါတယ်”လို့ ပြောခဲ့တာပါ။

ဂျော်ဂျီယာအသင်းဟာ ပေါ်တူဂီအသင်းကို ၂ ဂိုး- ဂိုးမရှိနဲ့ အနိုင်ရရှိခဲ့တာကြောင့် အုပ်စုတွင်း ၃ ပွဲ ကစားအပြီးမှာ ၄ မှတ်ရရှိကာ အကောင်းဆုံးအုပ်စု တတိယနဲ့ ၁၆ သင်းအဆင့်ကို တက်နိုင်ခဲ့တာ ဖြစ်ပါတယ်။ 

ဂျော်ဂျီယာအသင်းဟာ အဓိကပြိုင်ပွဲကို ပထမဆုံးအကြိမ် ဝင်ရောက်ယှဉ်ပြိုင်ခဲ့တဲ့ ယူရို ၂၀၂၄ ပြိုင်ပွဲမှာ ၁၆ သင်း အဆင့်ကို တက်နိုင်ခဲ့တာကြောင့် ဂျော်ဂျီယာအသင်း ပရိသတ်တွေဟာ အလွန်ပျော်ရွှင်နေခဲ့တာပါ။

ရော်နယ်ဒိုကိုတွေ့ရစဉ်

တောင်ပံကစားသမား ကာဗီချာဟာ ဒီပွဲမတိုင်ခင်မှာ သူ့ရဲ့ဟီးရိုးဖြစ်တဲ့ ရော်နယ်ဒိုနဲ့ တွေ့ဆုံခဲ့ပြီး ဒီလိုတွေ့ဆုံမှုက သူတို့ကို ယုံကြည်မှုရှိအောင် ကူညီပေးခဲ့တယ်လို့ ပြောခဲ့ပါတယ်။

ကာဗီချာက “ရော်နယ်ဒိုဟာ ကျနော့်ဆီကို လာပြီးစကားပြောမယ်လို့ မတွေးထားခဲ့မိပါဘူး။ သူဟာ ကြီးကျယ် ခမ်းနားတဲ့ ကစားသမားနဲ့ လူပုဂ္ဂိုလ်ပါ။ ကျနော်သူ့ကို အလွန်လေးစားပြီး သူဟာ ကမ္ဘာ့အကောင်းဆုံး ဘောလုံးသမားတွေထဲက တစ်ဦးပါ။ ပွဲမတိုင်ခင်မှာ သူစကားလာပြောတာက အံ့သြစရာကောင်းခဲ့ပြီး ဒါကလည်း ဒီပွဲမှာ ကျနော်တို့တစ်ခုခု လုပ်နိုင်မယ်ဆိုတာ ယုံကြည်အောင် ကူညီပေးခဲ့တယ်”လို့ ပြောခဲ့တာပါ။

ရော်နယ်ဒိုဟာ ဒီပွဲစဉ်မှာ ပေါ်တူဂီအသင်းအတွက် ပွဲချိန် ၆၅ မိနစ်အထိ ပါဝင်ကစားသွားခဲ့ပြီး အခုအချိန်ထိ ယူရို ၂၀၂၄ ပြိုင်ပွဲမှာ သွင်းဂိုးရရှိဖို့ ရုန်းကန်နေရပါတယ်။ 

ယူရို ၂၀၂၄ ပြိုင်ပွဲ ၁၆ သင်းအဆင့် ပွဲစဉ်တွေအဖြစ် ဂျော်ဂျီယာအသင်းက စပိန်အသင်း၊ ပေါ်တူဂီအသင်းက ဆလိုဗေးနီးယားအသင်းနဲ့ ယှဉ်ပြိုင်ရမှာ ဖြစ်ပါတယ်။ 

Source: ESPN

CNI Sport News

၂၀၂၄ ခုနှစ်၊ ဇွန်လ ၂၆

ချီလီအသင်းကို အနိုင်ရရှိခဲ့တဲ့ ကိုပါအမေရိကဖလား အုပ်စုဒုတိယပွဲစဉ်မှာ ညာဘက်ပေါင် ဒဏ်ရာပြဿနာကို ကုသမှုခံယူခဲ့ရတဲ့ အာဂျင်တီးနားအသင်း ခေါင်းဆောင် မက်ဆီက သူ့ရဲ့ဒဏ်ရာ အခြေအနေမစိုးရိမ်ရဖို့ မျှော်လင့် တယ်လို့ ပြောခဲ့ပါတယ်။

မက်ဆီက “အနည်းငယ် စိတ်အနှောင့်အယှက် ဖြစ်ခဲ့ရပေမယ့် ပွဲကိုပြီးဆုံးအောင်တော့ ကစားနိုင်ခဲ့ပါတယ်။ ဒဏ်ရာ အခြေအနေ မစိုးရိမ်ရဖို့ ကျနော်မျှော်လင့်ပါတယ်။ အခုအချိန်မှာ လွတ်လွတ်လပ်လပ် လှုပ်ရှားဖို့ ခက်ခဲ နေပြီး မနက်ဖြန်မှာ ဘယ်လိုခံစားရမလဲဆိုတာ ကြည့်ရမှာပါ။ ချီလီနဲ့ ကစားရတာဟာ အလွန်ခက်ခဲပါတယ်။ ဒါပေမယ့် ကျနော်တို့ ရည်မှန်းချက်က အောင်မြင်ခဲ့ပြီး ကွာတားဖိုင်နယ်ကို ရောက်ရှိသွားပါပြီ”လို့ ပွဲအပြီးမှာ သတင်းထောက်တွေကို ပြောခဲ့တာပါ။

ကိုပါအမေရိကဖလားပြိုင်ပွဲရဲ့ လက်ရှိချန်ပီယံ အာဂျင်တီးနားအသင်းဟာ အဖွင့်ပွဲစဉ်မှာ ကနေဒါအသင်းကို အနိုင်ရထားတာကြောင့် ၂ ပွဲကစား ၂ ပွဲအနိုင်နဲ့ ကွာတားဖိုင်နယ်အဆင့်ကို တက်ရောက်နိုင်ခဲ့တာ ဖြစ်ပါတယ်။ 

မက်ဆီဟာ ဒီပွဲစဉ်ရဲ့ ပထမပိုင်းအတွင်းမှာ ကုသမှုခံယူခဲ့ရတာကြောင့် အာဂျင်တီးနားအသင်းအတွက် စိုးရိမ်စရာ ဖြစ်ခဲ့ရတာပါ။

ဒါပေမယ့် မက်ဆီဟာ အာဂျင်တီးနားအသင်းအတွက် ပွဲချိန်ပြည့် ပါဝင်ကစားခဲ့ပြီး ဒဏ်ရာ အခြေအနေ မစိုးရိမ်ဖို့ မျှော်လင့်နေတာ ဖြစ်ပါတယ်။

မက်ဆီကိုတွေ့ရစဉ်

အာဂျင်တီးနားအသင်းနည်းပြ စကာလိုနီက ဒီပွဲစဉ်ဟာ သူတို့အတွက် မလွယ်ကူခဲ့ပေမယ့် အနိုင်ရဖို့ ထိုက်တန် တယ်လို့ ပြောခဲ့တာပါ။

အာဂျင်တီးနားအသင်းဟာ ချီလီအသင်းနဲ့ပွဲမှာ အနိုင်ဂိုး သွင်းယူပေးခဲ့တဲ့ လောတရိုမာတီနက်ဇ်ကို လူစားဝင် ကစားသမားအဖြစ်သာ အသုံးပြုခဲ့ပြီး အယ်လ်ဗားရက်ဇ်ကို ပွဲထွက်လူစာရင်းမှာ အသုံးပြုခဲ့တာ ဖြစ်ပါတယ်။ 

နည်းပြ စကာလိုနီက သူတို့ ၂ ဦးစလုံးဟာ အတူတွဲ ကစားနိုင်ပေမယ့် ဟန်ချက်ညီဖို့ကို ရှာဖွေရမယ်လို့ ပြောခဲ့ ပါတယ်။

ဒီအုပ်စုတွင်းက နောက်ထပ် ပွဲစဉ်တစ်ပွဲမှာ ကနေဒါအသင်းက ပီရူးအသင်းကို အနိုင်ရရှိခဲ့တာကြောင့် ချီလီအသင်း အနေနဲ့ ကွာတားဖိုင်နယ်ကို တက်ရောက်နိုင်ဖို့အတွက် အုပ်စုနောက်ဆုံးပွဲစဉ်မှာ ကနေဒါအသင်းကို အနိုင်ရယူဖို့ လိုအပ်နေတာဖြစ်ပါတယ်။ 

Source: ESPN 

CNI Sport News

၂၀၂၄ ခုနှစ်၊ ဇွန်လ ၂၆

အာဆင်နယ်အသင်း ဂန္ထဝင်ကစားသမား အွန်နရီဟာ ဝေးလ်စ်ဘောလုံးအဖွဲ့ချုပ်(FAW)ရဲ့ ဝေးလ်စ်အသင်း နည်းပြသစ် ဖြစ်လာနိုင်တဲ့ စာရင်းထဲမှာ ပါဝင်နေတာ ဖြစ်ပါတယ်။

ဝေးလ်စ်ဘောလုံးအဖွဲ့ချုပ်ဟာ ပြီးခဲ့တဲ့ရက်ပိုင်းကမှ အသင်းကို ၃ နှစ်ခွဲကြာ ကိုင်တွယ်ခဲ့တဲ့ နည်းပြ ရော့ဘ်ပေ့ချ် ကို ရာထူးက ထုတ်ပယ်ခဲ့တာပါ။ 

ဝေးလ်စ်အသင်းဟာ ယူရို ၂၀၂၄ ပြိုင်ပွဲမှာ ခြေစစ်ပွဲ မအောင်မြင်ခဲ့သလို နောက်ဆုံးကစားခဲ့တဲ့ ခြေစမ်းပွဲတွေမှာ ရလဒ်တွေ ဆိုးရွားခဲ့တာကြောင့် နည်းပြ ရော့ဘ်ပေ့ချ်ကို ရာထူးက ထုတ်ပယ်ဖို့ ဆုံးဖြတ်ခဲ့တာ ဖြစ်ပါတယ်။ 

အဲဒါကြောင့် FAW ဟာ ဝေးလ်စ်အသင်း နည်းပြရာထူးအတွက် သူတို့ရဲ့စာရင်းထဲ ပါဝင်သူတွေကို ချဉ်းကပ်မှု ပြုလုပ်ဖို့ စီစဉ်ထားတာပါ။

BBC က အွန်နရီဟာ ဝေးလ်စ်အသင်း နည်းပြသစ် ဖြစ်လာနိုင်တဲ့ စာရင်းထဲ ပါဝင်နေတယ်လို့ ဖော်ပြခဲ့ပါတယ်။ 

အွန်နရီဟာ လက်ရှိအချိန်မှာ အိုလံပစ်ပြိုင်ပွဲ ဝင်ရောက်ယှဉ်ပြိုင်ဖို့ ပြင်ဆင်နေတဲ့ ပြင်သစ် ယူ-၂၁ အသင်းကို ကိုင်တွယ်နေတာပါ။ 

ဝေးလ်စ်အသင်းကို တွေ့ရစဉ်

အွန်နရီဟာ နည်းပြလိုင်စင်ရရှိဖို့ လုပ်ဆောင်ခဲ့တုန်းက ဝေးလ်စ်ဘောလုံးအဖွဲ့ချုပ်နဲ့ ကောင်းမွန်တဲ့ ဆက်ဆံရေး တွေရှိခဲ့တာ ဖြစ်ပါတယ်။ 

ဝေးလ်စ်တိုက်စစ်မှူးဟောင်း အန်းရှောက အွန်နရီက ဝေးလ်စ်ဘောလုံး အကြောင်းကို နားလည်တဲ့အတွက် အာဆင်နယ် ကစားသမားဟောင်းကို နည်းပြအဖြစ် ဝေးလ်စ်အသင်းက ခန့်အပ်မယ့် အလားအလာကို ထောက်ခံ တယ်လို့ ပြောခဲ့ပါတယ်။

FAW ရဲ့ တာဝန်ရှိသူအချို့ဟာ ၂၀၁၈ ခုနှစ်က ရိုင်ယန်ဂစ်ကို နည်းပြအဖြစ် ခန့်အပ်ခဲ့သလို ပုံစံမျိုးနဲ့ နာမည်ကြီး နည်းပြတစ်ဦးကို ခန့်အပ်ဖို့ အလိုရှိနေတာပါ။

FAW ဟာ ဘဏ္ဍာရေး ကန့်သတ်မှုတွေ ရှိနေတာကြောင့် အွန်နရီသာ နည်းပြရာထူးကို လက်ခံမယ်ဆိုရင် သူ လက်ရှိ လုပ်နေတဲ့ မီဒီယာနဲ့ စပွန်ဆာကိစ္စရပ်တွေကို ဆက်ပြီးလုပ်ကိုင်ခွင့်ပေးဖို့ ရှိနေပါတယ်။ 

အွန်နရီဟာ ပြင်သစ် ယူ-၂၁ အသင်းကို မကိုင်တွယ်ခင်က ဘယ်လ်ဂျီယံအသင်းမှာ လက်ထောက်နည်းပြအဖြစ် တာဝန်ယူခဲ့သလို မိုနာကိုအသင်းနဲ့ မွန်ထရီရယ်လ်အသင်းတို့ကို နည်းပြချုပ်အဖြစ် ကိုင်တွယ်ခဲ့တာပါ။

ဝေးလ်စ်အသင်းဟာ စက်တင်ဘာမှာ နေးရှင်းလိဂ်ပွဲစဉ်အဖြစ် တူရကီအသင်းနဲ့ ယှဉ်ပြိုင်ရမှာဖြစ်လို့ ဒီမတိုင်ခင် နည်းပြသစ် ခန့်အပ်နိုင်ဖို့ ဝေးလ်စ်ဘောလုံးအဖွဲ့ချုပ်က လုပ်ဆောင်နေတာ ဖြစ်ပါတယ်။ 

Source: Goal