CNI Sport News

၂၀၂၄ ခုနှစ်၊ ဇူလိုင် ၁၀

မာဆေးလ်မြို့တော်ဝန်က ကလပ်အသင်းအနေနဲ့ ယူနိုက်တက်အသင်း တိုက်စစ်မှူး ဂရင်းဝုဒ်ကို ခေါ်ယူမယ့် အပြောင်းအရွှေ့အပေါ် ကန့်ကွက်လိုက်ပါတယ်။

ယူနိုက်တက်အသင်းဟာ ဂရင်းဝုဒ်အတွက် မာဆေးလ်အသင်းရဲ့ ပေါင် ၂၇ သန်းနဲ့ ကမ်းလှမ်းမှုကို လက်ခံခဲ့တာပါ။ 

အဲဒါကြောင့် ယူနိုက်တက်အသင်းနဲ့ မာဆေးလ်အသင်းတို့ဟာ အပြောင်းအရွှေ့ကို အပြီးသတ်နိုင်ဖို့အတွက် ဂရင်းဝုဒ်နဲ့ ပုဂ္ဂိုလ်ရေးဆိုင်ရာ သဘောတူညီမှုရရှိဖို့ ကျန်ရှိနေသေးတာ ဖြစ်ပါတယ်။ 

ဂရင်းဝုဒ်ဟာ မုဒိမ်းမှု အပါအဝင် စွဲချက်တွေနဲ့ ရင်ဆိုင်ခဲ့ရပေမယ့် ၂၀၂၃ ခုနှစ်၊ ဖေဖော်ဝါရီမှာ စွဲချက်တင်ထားတဲ့ အမှုတွေ အားလုံးကနေ လွတ်မြောက်ခဲ့တာပါ။

ဂရင်းဝုဒ်ဟာ စွဲချက်တွေ အားလုံးကနေ လွတ်မြောက်ခဲ့ပြီးနောက် မနှစ်ကရာသီမှာ ဂီတာဖေးအသင်းထံ အငှားနဲ့ သွားရောက်ကစားပြီး ခြေစွမ်းပြသနိုင်ခဲ့တာကြောင့် အသင်းကြီးတွေရဲ့ ပစ်မှတ်အဖြစ်ရှိလာခဲ့ပါတယ်။ 

ယူနိုက်တက်အသင်းဟာ ဂရင်းဝုဒ်ကို ရောင်းချဖို့ ဆုံးဖြတ်ထားတာကြောင့် သူ့ကို ခေါ်ယူမယ့် ကမ်းလှမ်းမှုတွေကို လမ်းဖွင့်ခဲ့တာပါ။ 

မာဆေးလ်မြို့တော်ဝန်ကို တွေ့ရစဉ်

မာဆေးလ်အသင်းဟာ ဂရင်းဝုဒ်ကို ခေါ်ယူနိုင်ဖို့ ကြိုးစားခဲ့ပြီး ပြောင်းရွှေ့ကြေး သဘောတူညီခဲ့တာ ဖြစ်ပါတယ်။

ဒါပေမယ့် မာဆေးလ်မြို့တော်ဝန်က ဂရင်းဝုဒ်ကို ခေါ်ယူမယ့် ကလပ်ရဲ့ အပြောင်းအရွှေ့ကို ကန့်ကွက်ခဲ့ပြီး သူ့ကို မခေါ်ယူဖို့အတွက် မာဆေးလ်အသင်းဥက္ကဋ္ဌကို ပြောသွားမယ်လို့ ပြင်သစ်ရေဒီယို RMC ကို ပြောခဲ့တာပါ။ 

မာဆေးလ်အသင်း ပရိသတ်အချို့ကလည်း ဂရင်းဝုဒ်ကို ခေါ်ယူမယ့် ကလပ်အသင်းရဲ့ အပြောင်းအရွှေ့ကို ဝေဖန်မှုတွေ ပြုလုပ်ခဲ့ကြပါတယ်။

မာဆေးလ်အသင်းနည်းပြ ဒီဇာဘီက ဂရင်းဝုဒ်က ကမ္ဘာ့အဆင့် ကစားသမားဖြစ်ပြီး အသင်းထံ ရောက်လာခဲ့ရင် သူ့ရဲ့သားတစ်ဦးလို ဆက်ဆံခံရမယ်လို့ ပြောခဲ့တာပါ။ 

ဂရင်းဝုဒ်ဟာ ပြီးခဲ့တဲ့ရာသီက အငှားသွားရောက် ကစားခဲ့တဲ့ ဂီတာဖေးအသင်းအတွက် ၃၆ ပွဲ ပါဝင်ကစားပြီး ၁၀ ဂိုး သွင်းယူကာ အသင်းရဲ့တစ်နှစ်တာ အကောင်းဆုံး ကစားသမားဆုကို ရရှိခဲ့တာဖြစ်ပါတယ်။ 

Source: BBC

CNI Sport News

၂၀၂၄ ခုနှစ်၊ ဇူလိုင် ၁၀ 

ပြင်သစ်အသင်းခေါင်းဆောင် ဘတ်ပီက သူ့ရဲ့ယူရို ၂၀၂၄ ပြိုင်ပွဲဟာ ကျရှုံးခဲ့တယ်လို့ စပိန်အသင်းကို ဆီမီး ဖိုင်နယ်ပွဲစဉ်မှာ အရေးနိမ့်ကာ ပြိုင်ပွဲက ထွက်ခွာခဲ့ရပြီးနောက် ပြောခဲ့ပါတယ်။

ဘတ်ပီက “ဒါဟာ ခက်ခဲခဲ့ပြီး ကျနော့်အတွက် ကျရှုံးမှုတစ်ခုပါ။ ကျနော်တို့ဟာ ဥရောပချန်ပီယံဖြစ်ဖို့ ရည်မှန်း ချက်ရှိသလို ကျနော်ကလည်း ဥရောပချန်ပီယံဖြစ်ဖို့ ရည်မှန်းချက်ရှိပါတယ်။ ကျနော်တို့ဟာ ဒီလို မလုပ်နိုင်ခဲ့တဲ့ အတွက် ကျရှုံးမှုပါပဲ။ ဒါက ဘောလုံးဖြစ်ပြီး ကျနော်တို့ရှေ့ဆက်သွားရမှာပါ။ အားလပ်ရက်မှာ အနားယူတာက ကျနော့်ကို အများကြီးကောင်းလာစေမှာပါ။ သန်မာစွာနဲ့ ပြန်လာနိုင်ဖို့ ကျနော်ကြိုးစားသွားမှာပါ”လို့ ပြောခဲ့တာပါ။

ဘတ်ပီဟာ ဒီပြိုင်ပွဲမှာ ပြင်သစ်အသင်းအတွက် ၅ ပွဲပါဝင်ကစားခဲ့ပြီး ၁ ဂိုးသွင်းယူ ၁ ဂိုးသာဖန်တီးနိုင်ခဲ့တာ ဖြစ်ပါတယ်။ 

အသက် ၂၅ နှစ်အရွယ်ရှိ ဘတ်ပီဟာ ဒီပြိုင်ပွဲရဲ့ အုပ်စုအဖွင့်ပွဲစဉ်ဖြစ်တဲ့ သြစတြီးယားအသင်းနဲ့ပွဲမှာ နှာခေါင်းရိုးကျိုးခဲ့ပြီး ပြိုင်ပွဲကို ဆိုးရွားစွာစတင်ခဲ့ရတာပါ။ 

ဘတ်ပီဟာ နှာခေါင်းရိုးကျိုးဒဏ်ရာကြောင့် နယ်သာလန်အသင်းနဲ့ အုပ်စုဒုတိယပွဲစဉ်ကို လွဲချော်ခဲ့ပြီး ပိုလန်အသင်းနဲ့ ပွဲစဉ်မှ မျက်နှာဖုံးဝတ်ဆင်ပြီး ပြန်လည် ပါဝင်နိုင်ခဲ့တာဖြစ်ပါတယ်။ 

ဘတ်ပီဟာ မျက်နှာဖုံးဝတ်ဆင်ပြီး ယှဉ်ပြိုင်ကစားခဲ့ရတဲ့ပွဲတွေမှာ အကောင်းဆုံးပုံစံတွေ ပျောက်ဆုံးခဲ့ပြီး ခြေစွမ်း ပြသနိုင်ဖို့ပါ ရုန်းကန်ခဲ့ရတာပါ။ 

ပြင်သစ်အသင်းနည်းပြ ဒက်ချမ့်စ်က ဘတ်ပီဟာ မျက်နှာဖုံးဝတ်ဆင်ခဲ့ရတာ ကြောင့် သူ့ရဲ့အမြင်အာရုံကို ကန့်သတ်ထားသလိုဖြစ်ခဲ့ပြီး အဆင်မပြေဖြစ်ခဲ့တယ်လို့ စပိန်အသင်းနဲ့ ပွဲအပြီးမှာ ပြောခဲ့ပါတယ်။ 

ပြင်သစ်အသင်းကို ၂၀၁၂ ခုနှစ်က စတင်ကိုင်တွယ်ခဲ့တဲ့ ဒက်ချမ့်စ်ဟာ သူ့ရဲ့ လက်ထက်မှာ နိုင်ငံအသင်းကို ကမ္ဘာ့ဖလားပြိုင်ပွဲ ၂ ကြိမ်ဗိုလ်လုပွဲ ပို့ဆောင်ပေးခဲ့ပြီး ၂၀၁၈ ကမ္ဘာ့ဖလားပြိုင်ပွဲမှာ ချန်ပီယံဆု ရရှိစေခဲ့တာပါ။

ဒါ့အပြင် ဒက်ချမ့်စ်က ပြင်သစ်အသင်းကို ယူရို ၂၀၁၆ ပြိုင်ပွဲမှာ ဗိုလ်လုပွဲရောက်အောင် ပို့ဆောင်ပေးခဲ့ပေမယ့် ပေါ်တူဂီအသင်းကို အရေးနိမ့်ပြီး ဒုတိယနဲ့သာ ကျေနပ်ခဲ့ရတာဖြစ်ပါတယ်။ 

ပြင်သစ်အသင်းနဲ့ ၂ နှစ်စာချုပ် ကျန်ရှိနေတဲ့ ဒက်ချမ့်စ်ဟာ နိုင်ငံအသင်းကို ၂၀၂၆ ကမ္ဘာ့ဖလားပြိုင်ပွဲမှာ အောင်မြင်မှုရရှိအောင် ဦးဆောင်နိုင်ဖို့ မျှော်လင့်နေတာပါ။ 

ပြင်သစ်အသင်းဟာ လာမယ့်စက်တင်ဘာမှာ နေးရှင်းလိဂ်ပွဲစဉ်တွေအဖြစ် အီတလီ၊ ဘယ်လ်ဂျီယံအသင်းတို့နဲ့ ယှဉ်ပြိုင်ရမှာဖြစ်ပါတယ်။

Source:ESPN

CNI Sport News

၂၀၂၄ ခုနှစ်၊ ဇူလိုင် ၁၀

အာဂျင်တီးနားအသင်းဟာ ၂၀၂၄ ကိုပါအမေရိကဖလားပြိုင်ပွဲ ဆီမီးဖိုင်နယ်ပွဲစဉ်မှာ ကနေဒါအသင်းကို ၂ ဂိုး- ဂိုး မရှိနဲ့ အနိုင်ရပြီး ဗိုလ်လုပွဲ တက်ရောက်သွားခဲ့ပြီ ဖြစ်ပါတယ်။

ဒီပွဲမှာ အာဂျင်တီးနားအသင်းအတွက် ဂိုးတွေကို အယ်လ်ဗာရက်ဇ်နဲ့ မက်ဆီတို့က သွင်းယူခဲ့တာပါ။ 

အာဂျင်တီးနားအသင်းဟာ ဒီနိုင်ပွဲကြောင့် ကိုပါအမေရိကဖလား လက်ရှိချန်ပီယံဆုကို ဆက်ပြီး ကာကွယ်ဖို့ နီးစပ်သွားခဲ့တာ ဖြစ်ပါတယ်။ 

ဒီပွဲမှာ အာဂျင်တီးနားအသင်းအတွက် ဂိုးသွင်းယူနိုင်ခဲ့တဲ့ မက်ဆီဟာ ၂၀၂၄ ကိုပါအမေရိကဖလား ပြိုင်ပွဲမှာ ပထမဆုံး သွင်းဂိုးရရှိခဲ့သလို ခြေစွမ်းပြသနိုင်ခဲ့တာကြောင့် အကောင်းဆုံး ကစားသမားဆုကိုလည်း ရရှိခဲ့တာပါ။ 

ဒါအပြင် မက်ဆီဟာ နိုင်ငံတကာသွင်းဂိုး ၁၀၉ ဂိုးနဲ့ နိုင်ငံတကာသွင်းဂိုး အများဆုံး ကစားသမားစာရင်းရဲ့ နံပါတ် ၂ နေရာကို ရောက်ရှိလာခဲ့ပါတယ်။ 

မက်ဆီကိုတွေ့ရစဉ်

မက်ဆီက “အမှန်တရားက ဒီအဖွဲ့နဲ့ လုပ်ဆောင်ခဲ့တာတွေ၊ အာဂျင်တီးနားနဲ့ လုပ်ဆောင်တဲ့ အရာတွေက ရူးသွပ် စရာတွေပါ။ နောက်ထပ်တစ်ကြိမ် ဗိုလ်လုပွဲတက်ဖို့နဲ့ ချန်ပီယံဖြစ်ဖို့အတွက် နောက်ထပ်တစ်ကြိမ် ယှဉ်ပြိုင်ဖို့ဆို တာ မလွယ်ကူပါဘူး။ ပြီးခဲ့တဲ့ ကိုပါအမေရိကဖလား၊ ကမ္ဘာ့ဖလားပြိုင်ပွဲတွေတုန်းကလို ရှင်သန်ခဲ့သလိုမျိုး ရှင်သန် နေရတာပါ။ ဒါတွေက နောက်ဆုံး တိုက်ပွဲဖြစ်ပြီး အမြင့်ဆုံးအထိ ကျနော် ပျော်ရွှင်နေပါတယ်”လို့ ပွဲအပြီး TyC Sports နဲ့ အင်တာဗျူးမှာ ပြောခဲ့ပါတယ်။ 

ကနေဒါအသင်းဟာ ပထမဆုံးယှဉ်ပြိုင်ခဲ့ရတဲ့ ကိုပါအမေရိကဖလားပြိုင်ပွဲမှာ ဆီမီးဖိုင်နယ်အဆင့်ထိ တက်နိုင်ခဲ့ပြီး အားလုံးကို အံ့အားသင့်စေခဲ့ပေမယ့် မက်ဆီရဲ့ အာဂျင်တီးနားအသင်းကို ကျော်ဖြတ်နိုင်ခဲ့ခြင်းမရှိတာပါ။ 

အာဂျင်တီးနားအသင်းဟာ ကိုလံဘီယာနဲ့ ဥရုဂွေးအသင်းတို့ ပွဲစဉ်က အနိုင်ရတဲ့အသင်းနဲ့ ကိုပါအမေရိကဖလား ပြိုင်ပွဲ ဗိုလ်လုပွဲကို ယှဉ်ပြိုင်မှာဖြစ်ပြီး ဒီပွဲစဉ်က အရေးနိမ့်တဲ့အသင်းဟာ ကနေဒါအသင်းနဲ့ တတိယနေရာလုပွဲ ယှဉ်ပြိုင်ရမှာဖြစ်ပါတယ်။ 

Source: CNA

CNI Sport News

၂၀၂၄ ခုနှစ်၊ ဇူလိုင် ၁၀

ယူရို ၂၀၂၄ ပြိုင်ပွဲ ဆီမီးဖိုင်နယ်ပွဲစဉ်မှာ ပြင်သစ်အသင်းကို အနိုင်ရပြီး စပိန်အသင်းဗိုလ်လုပွဲ တက်နိုင်ပြီးနောက် လူငယ်ကြယ်ပွင့် ယာမဲလ်က ယူရိုဗိုလ်လုပွဲတက်ချင်တဲ့ သူ့ရဲ့အိပ်မက် အမှန်တကယ် ဖြစ်လာပြီလို့ ပြောခဲ့ပါတယ်။

ယာမဲလ်က “နိုင်ပွဲနဲ့အတူ ဗိုလ်လုပွဲ တက်နိုင်ခဲ့တဲ့အတွက် ကျနော် အလွန်ပျော်ရွှင်ပါတယ်။ ယူရိုပြိုင်ပွဲမှာ နိုင်ငံ အသင်းနဲ့အတူ ဗိုလ်လုပွဲ တက်နိုင်တာက ကျနော့်အတွက် အလွန်ထူးခြားပါတယ်။ စီနီယာအသင်းနဲ့အတူ ဗိုလ်လုပွဲ တက်နိုင်တာက ကျနော့်အတွက် အိပ်မက်ပါပဲ။ ကျနော့်အမေကလည်း ဒါဟာ သူမရဲ့အိပ်မက်လို့ ပြောခဲ့ပါတယ်။ ကျနော်ဟာ ဘာတွေဖြစ်နေလဲဆိုတာ အများကြီးတွေးဖို့ မကြိုးစားဘဲ ကိုယ့်ကိုယ်ကို ပျော်ရွှင်ပြီး အသင်းကို ကူညီ ချင်ပါတယ်။ ကျနော်ဟာ ပွဲတိုင်းအနိုင်ရဖို့ ဒီကိုလာခဲ့တဲ့အတွက် ဂျာမနီမှာ အသင်းဖော်တွေနဲ့အတူ ကျနော့်ရဲ့ မွေးနေ့ပွဲကို ကျင်းပနိုင်ပါတယ်”လို့ ပြောခဲ့ပါတယ်။

ယူရို ၂၀၂၄ ပြိုင်ပွဲ ဆီမီးဖိုင်နယ်ပွဲစဉ်မှာ စပိန်အသင်းက ပြင်သစ်အသင်းကို ၂ ဂိုး-၁ ဂိုးနဲ့ အနိုင်ရပြီး ဗိုလ်လုပွဲ တက်နိုင်ခဲ့တာ ဖြစ်ပါတယ်။

ဒီပွဲမှာ မူအာနီက ပြင်သစ်အသင်းအတွက် ဦးဆောင်ဂိုး သွင်းယူနိုင်ခဲ့ပေမယ့် စပိန်အသင်းအတွက် ယာမဲလ်က ချေပဂိုးနဲ့ အောလ်မိုက အနိုင်ဂိုး သွင်းယူပေးခဲ့တာပါ။

ပြင်သစ်အသင်းဘက်ကို ဂိုးသွင်းနိုင်ခဲ့တဲ့ ယာမဲလ်ဟာ အသက် ၁၆ နှစ် ၃၆၂ ရက်နဲ့ ယူရိုပြိုင်ပွဲသမိုင်းမှာ အသက်အငယ်ဆုံး ဂိုးသွင်းတဲ့သူအဖြစ် မှတ်တမ်းဝင်ခဲ့ပါတယ်။

ယာမဲလ်ကိုတွေ့ရစဉ်

ဘာစီလိုနာအသင်းကြယ်ပွင့် ယာမဲလ်ဟာ ဒီပွဲမှာပြသခဲ့တဲ့ စွမ်းဆောင်ရည်ကြောင့် အကောင်းဆုံး ကစားသမားဆု ရရှိခဲ့သလို ယူရို ၂၀၂၄ ပြိုင်ပွဲမှာ အခုအချိန်ထိ သွင်းဂိုး ၁ ဂိုးနဲ့ ဂိုးဖန်တီးမှု ၃ ကြိမ်ပြုလုပ်ထားတာပါ။ 

ယာမဲလ်ဟာ လာမယ့် စနေနေ့မှာ အသက် ၁၇ နှစ် ပြည့်မှာဖြစ်တဲ့အတွက် ဗိုလ်လုပွဲမတိုင်ခင် သူ့ရဲ့မွေးနေ့ပွဲကို အသင်းဖော်တွေနဲ့အတူ ကျင်းပနိုင်မှာ ဖြစ်ပါတယ်။ 

စပိန်အသင်းနည်းပြ ဒယ်လာဖွန်တေက ယာမဲလ်ဟာ ဆက်ပြီး တိုးတက်နေမယ့်သူဖြစ်ပြီး အသက် ငယ်ငယ် ရွယ်ရွယ်နဲ့ သူ့ရဲ့ရင့်ကျက်မှုက အတွေ့အကြုံရှိတဲ့ ကစားသမားတစ်ဦးလို ဖြစ်နေတယ်လို့ ပြောခဲ့တာပါ။

ဒီပွဲစဉ်အပြီး အောင်ပွဲခံမှု ပြုလုပ်ချိန်မှာ စပိန်အသင်းခေါင်းဆောင် မိုရာတာဟာ လုံခြုံရေးဝန်ထမ်းတစ်ဦးကြောင့် ဒဏ်ရာရရှိသွားခဲ့ပေမယ့် နည်းပြ ဒယ်လာဖွန်တေက သူဟာ ဗိုလ်လုပွဲမှာ ပါဝင်နိုင်မှာပါလို့ ပြောခဲ့ပါတယ်။ 

ယူရိုချန်ပီယံဆုကို ၄ ကြိမ်မြောက်ရရှိဖို့ ပစ်မှတ်ထားနေတဲ့ စပိန်အသင်းဟာ အင်္ဂလန်နဲ့ နယ်သာလန်အသင်း တို့ပွဲစဉ်က အနိုင်ရတဲ့အသင်းနဲ့ ယူရို ၂၀၂၄ ပြိုင်ပွဲ ဗိုလ်လုပွဲကို ယှဉ်ပြိုင်ရမှာ ဖြစ်ပါတယ်။ 

Source: CNA

CNI Sport News 

၂၀၂၄ ခုနှစ်၊ ဇူလိုင် ၉

ဝေးလ်စ်ဘောလုံးအဖွဲ့ချုပ်ဟာ ပြီးခဲ့တဲ့လက ထုတ်ပယ်ခဲ့တဲ့ နည်းပြ ရော့ဘ်ပေ့ချ်ရဲ့နေရာမှာ ကစားသမားဟောင်း ဘယ်လာမီကို ဝေးလ်စ်အသင်း နည်းပြသစ်အဖြစ် ခန့်အပ်ဖို့ရှိနေပါတယ်။ 

ဘယ်လာမီဟာ ဘန်လေအသင်းက စကော့ပါကားကို နည်းပြသစ်အဖြစ် မခန့်အပ်ခင် အသင်းကို ယာယီ နည်းပြအဖြစ် တာဝန်ယူခဲ့တာပါ။ 

စကော့ပါကားဟာ ဘန်လေအသင်းမှာ ဘယ်လာမီနဲ့ အလုပ်အတူတွဲ လုပ်ချင်နေပေမယ့် ဘယ်လာမီကတော့ သူ့ရဲ့နိုင်ငံအသင်းဖြစ်တဲ့ ဝေးလ်စ်အသင်းကို ကိုင်တွယ်ချင်နေတာ ဖြစ်ပါတယ်။

ဝေးလ်စ်ဘောလုံးအဖွဲ့ချုပ်ဟာ ဘယ်လာမီကို နည်းပြသစ်အဖြစ် ခန့်အပ်ကာ နည်းပြရှာဖွေမှုကို အမြန်ဆုံး အဆုံးသတ်ချင်နေတာပါ။

ဝေးလ်စ်ဘောလုံးအဖွဲ့ချုပ်ဟာ ဝေးလ်စ်အသင်း နည်းပြရာထူးအတွက် အာဆင်နယ်အသင်းဂန္ထဝင် အွန်နရီ၊ ဂျော်ဂျီယာအသင်းနည်းပြ ဆက်ဂ်ညောနဲ့ အောက်စဖို့ဒ်အသင်းနည်းပြ ဘက်ကင်ဟမ်တို့နဲ့ ဆွေးနွေးမှုတွေ ပြုလုပ်ခဲ့ပါတယ်။

ဒါပေမယ့် ဘယ်လာမီနဲ့ ဆွေးနွေးမှုတွေဟာ ပိုပြီးကောင်းမွန်ခဲ့တာကြောင့် ကစားသမားဟောင်းဟာ နိုင်ငံ အသင်းကို ၂၀၂၆ ကမ္ဘာ့ဖလားပြိုင်ပွဲ ယှဉ်ပြိုင်ခွင့် ရရှိနိုင်အောင် ဦးဆောင်ဖို့ အခွင့်အရေးရရှိမှာပါ။ 

ဘယ်လာမီကိုတွေ့ရစဉ်

ဘယ်လာမီအနေနဲ့ ဝေးလ်စ်အသင်း နည်းပြသစ်အဖြစ် ခန့်အပ်ခံရရင် လာမယ့် နေးရှင်းလိဂ်ပွဲစဉ်တွေကို သူ့ရဲ့ပထမဆုံးပွဲစဉ်အဖြစ် စတင်ကိုင်တွယ်ရမှာ ဖြစ်ပါတယ်။

ဝေးလ်စ်အသင်းဟာ လာမယ့် စက်တင်ဘာမှာ နေးရှင်းလိဂ်ပွဲစဉ်တွေအဖြစ် တူရကီအသင်းနဲ့ အိမ်ကွင်း၊ မွန်တီနီဂရိုး အသင်းနဲ့ အဝေးကွင်းပွဲစဉ် ယှဉ်ပြိုင်ရမှာပါ။ 

အသက် ၄၄ နှစ်အရွယ်ရှိ ဘယ်လာမီဟာ ဝေးလ်စ်အသင်းအတွက် ၇၈ ပွဲ ကစားခဲ့ပြီး ၁၉ ဂိုးသွင်းယူကာ ၂၀၁၄ ခုနှစ်မှာ ပရော်ဖက်ရှင်နယ် ဘောလုံးသမားဘဝက အနားယူခဲ့တာ ဖြစ်ပါတယ်။ 

ဘယ်လာမီဟာ ကစားသမားဘဝက အနားယူပြီးနောက် အန်ဒါလက်ချ်နဲ့ ဘန်လေအသင်းတို့မှာ မန်စီးတီး အသင်းဖော်ဟောင်း ကွန်ပနီရဲ့ လက်ထောက်နည်းပြအဖြစ် ဆောင်ရွက်ခဲ့တာပါ။

ဘယ်လာမီဟာ ဘန်လေအသင်းကနေ ကွန်ပနီ ထွက်ခွာချိန်မှာ ဘန်လေအသင်း နည်းပြအဖြစ် ခန့်အပ်ခံရဖို့ မျှော်လင့်ခဲ့ပေမယ့် စကော့ပါကားကို နည်းပြသစ်အဖြစ် ခန့်အပ်ခဲ့တာကြောင့် ဝေးလ်စ်အသင်းကို ကိုင်တွယ်ဖို့ ဝေးလ်စ်ဘောလုံးအဖွဲ့ချုပ်နဲ့ ဆွေးနွေးမှုတွေ ပြုလုပ်ခဲ့တာ ဖြစ်ပါတယ်။

Source: BBC

CNI Sport News 

၂၀၂၄ ခုနှစ်၊ ဇူလိုင် ၉

လုပ်ခ်ရှောက သူဟာ ဘောလုံးမကစားရဘဲ ယူရို ၂၀၂၄ ပြိုင်ပွဲကို အဆုံးသတ်ရမယ့်အပေါ် စိုးရိမ်မိခဲ့ပေမယ့် အခုအချိန်မှာတော့ နယ်သာလန်အသင်းနဲ့ ဆီမီးဖိုင်နယ်ပွဲစဉ်မှာ အင်္ဂလန်အသင်းရဲ့ ပွဲထွက်လူစာရင်းပါဝင်ဖို့ အဆင်သင့်ဖြစ်နေပြီလို့ ပြောခဲ့ပါတယ်။

လုပ်ခ်ရှောက “ကျနော်ဟာ မိနစ် ၉၀ ပါဝင်ကစားဖို့ ကြံ့ခိုင်မှုလည်း ပြည့်ဝနေသလို အဆင်သင့်ဖြစ်ပြီလို့လည်း ထင်ပါတယ်။ ဒါက နည်းပြရဲ့ ဆုံးဖြတ်ချက်အပေါ် မူတည်ပါတယ်။ ကျနော်ဟာ ကြံ့ခိုင်ပြီး အဆင်သင့်ဖြစ်နေပြီလို့ ခံစားရပါတယ်။ ပြီးခဲ့တဲ့ ၄ လက တကယ်ကို ခက်ခဲခဲ့ပါတယ်။ ကျနော်ဟာ အမြန်ဆုံးပြန်လာနိုင်ဖို့ မျှော်လင့်ခဲ့ပေ မယ့် အဆင်မပြေမှု အနည်းငယ် ကြုံတွေ့ခဲ့ရပါတယ်။ မိနစ်အနည်းငယ်ရခဲ့လို့ ကျနော်ပျော်ရွှင်ပြီး လာမယ့်ပွဲတွေ မှာလည်း ထပ်ပြီးရနိုင်ဖို့မျှော်လင့်တယ်”လို့ ပြောခဲ့တာပါ။

လုပ်ခ်ရှောဟာ တံကောက်ကြော ဒဏ်ရာကြောင့် ဖေဖော်ဝါရီကတည်းက ဘောလုံးကစားနိုင်ခဲ့ခြင်း မရှိပေမယ့် နည်းပြ ဆောက်ဂိတ်ဟာ ယူရို ၂၀၂၄ ပြိုင်ပွဲဝင်မယ့် အင်္ဂလန်အသင်း လူစာရင်းမှာ သူ့ကို ရွေးချယ်ခဲ့တာ ဖြစ်ပါတယ်။ 

လုပ်ခ်ရှောဟာ ဒီပြိုင်ပွဲမှာ အင်္ဂလန်အသင်းရဲ့ ပထမပွဲစဉ် ၄ ပွဲကို မပါဝင်နိုင်ခဲ့ပေမယ့် ဆွစ်ဇာလန်အသင်းနဲ့ ကွာတားဖိုင်နယ်ပွဲစဉ်ရဲ့ ပွဲချိန် ၇၈ မိနစ်မှာ လူစားဝင် ကစားသမားအဖြစ် ပါဝင်ခွင့်ရခဲ့တာပါ။

လုပ်ခ်ရှောကိုတွေ့ရစဉ် 

ယူနိုက်တက်အသင်း နောက်ခံလူဟာ အခုအချိန်မှာတော့ နယ်သာလန်အသင်းနဲ့ ပွဲစဉ်ကို ပါဝင်ဖို့ အဆင်သင့် ဖြစ်နေပြီလို့ ပြောခဲ့တာ ဖြစ်ပါတယ်။ 

ဒါအပြင် လုပ်ခ်ရှောက ဝေဖန်မှုတွေခံနေရတဲ့ နည်းပြ ဆောက်ဂိတ်ကို ကာကွယ်မှုပြုလုပ်ခဲ့ပါတယ်။

လုပ်ခ်ရှောက “ရိုးရိုးသားသားပြောရရင် ဝေဖန်မှုတွေကို ကျနော် နားမလည်နိုင်ပါဘူး။ သူဟာ ကျနော်တို့ကို နောက်တစ်ဆင့် တကယ်ခေါ်ဆောင်သွားတဲ့သူပါ။ သူဟာ တကယ်ကို ကောင်းမွန်ပြီး ကျနော်တို့အတွက် လိုအပ်တဲ့သူပါ။ ကျနော်ကတော့ သူ့ကို ကျေးဇူးတင်စရာတွေ အများကြီးရှိတယ်လို့ ထင်ပါတယ်။ သူဟာ ကျနော့် ကို ယုံကြည်မှုတွေ ပြသခဲ့ပြီး သူပြသခဲ့တဲ့ ယုံကြည်မှုတွေအတွက် ကျနော်ပြန်ဆပ်ရမယ်”လို့ ပြောခဲ့တာပါ။

ဆောက်ဂိတ်ဟာ သူ့ရဲ့လက်ထက်မှာ ယူရို ၂၀၂၄ ပြိုင်ပွဲ အပါအဝင် အင်္ဂလန်အသင်း နောက်ဆုံးကစားခဲ့တဲ့ ပြိုင်ပွဲ ၄ ခုမှာ ၃ ခုကို ဆီမီးဖိုင်နယ် တက်နိုင်အောင် ကိုင်တွယ်ပေးနိုင်ခဲ့ပါတယ်။ အင်္ဂလန်နဲ့ နယ်သာလန်အသင်းတို့ရဲ့ ဆီမီးဖိုင်နယ်ပွဲစဉ်ကို ဇူလိုင် ၁၁ ရက်မှာ ကျင်းပသွားမှာ ဖြစ်ပါတယ်။

Source: ESPN

CNI Sport News

၂၀၂၄ ခုနှစ်၊ ဇူလိုင် ၉

စပိန်အသင်းပရိသတ်တွေရဲ့ ဝေဖန်မှုတွေခံနေရတဲ့ အသင်းခေါင်းဆောင် မိုရာတာက ယူရို ၂၀၂၄ ပြိုင်ပွဲအပြီးမှာ စပိန်လက်ရွေးစင်အသင်းက အနားယူဖွယ်ရှိတယ်လို့ ပြောလိုက်ပါတယ်။

မိုရာတာက “ဒီပြိုင်ပွဲက စပိန်အသင်းနဲ့အတူ ကျနော့်ရဲ့ နောက်ဆုံးပြိုင်ပွဲ ဖြစ်နိုင်ပါတယ်။ အများကြီး မပြောချင် ပေမယ့် ဖြစ်နိုင်ဖို့ရှိပါတယ်။ ကျနော့်အတွက် စပိန်မှာ ပျော်ရွှင်ဖို့က ခက်ခဲပါတယ်။ စပိန်ပြင်ပမှာ ကျနော် ပိုပြီး ပျော်ရွှင်တယ်ဆိုတာ သံသယယမရှိပါဘူး။ ဒါကို ကျနော် အကြိမ်ကြိမ် ပြောခဲ့တာပါ။ ဘာကြောင့်လဲဆိုရင် လူတွေ က ကျနော့်ကို လေးစားမှုရှိလို့ပါ။ စပိန်မှာတော့ ကျနော့်ကို လေးစားမှုမရှိဘူး”လို့ El Mundo နဲ့ ပြုလုပ်ခဲ့တဲ့ အင်တာဗျူးမှာ ပြောခဲ့တာပါ။

အသက် ၃၁ နှစ်အရွယ်ရှိ မိုရာတာဟာ စပိန်အသင်းကစားခဲ့တဲ့ ယူရို ၂၀၂၄ ပြိုင်ပွဲ ၅ ပွဲမှာ ၄ ပွဲကို ပွဲထွက်လူစာရင်း ပါဝင်ခဲ့ပြီး ခရိုအေးရှားအသင်းနဲ့ အုပ်စုအဖွင့်ပွဲစဉ်မှာ အသင်းအတွက် ဂိုးသွင်းယူနိုင်ခဲ့ပါတယ်။

ဒါပေမယ့် မိုရာတာဟာ စပိန်အသင်းပရိသတ်တွေရဲ့ ဝေဖန်မှုတွေခံနေရတဲ့ အပေါ် နားမလည်နိုင်အောင် ဖြစ်နေတာပါ။ 

စပိန်အသင်းကိုတွေ့ရစဉ်

မိုရာတာဟာ အရင်ကတည်းက စပိန်အသင်း ပရိသတ်တွေနဲ့ ဆက်ဆံရေး အဆင်ပြေမှုမရှိခဲ့ဘဲ ယူရို ၂၀၂၀ ပြိုင်ပွဲ တုန်းကလည်း လှောင်ပြောင်ခံခဲ့ရသလို ပြီးခဲ့တဲ့ မတ်က ဘရာဇီးလ်အသင်းနဲ့ ခြေစမ်းပွဲမှာလည်း လှောင်ပြောင် ခံခဲ့ရတာ ဖြစ်ပါတယ်။

မိုရာတာက “ကျနော်ဟာ အဝါကတ်ထိလို့ ကွင်းဘေးမှာ ငိုနေတယ်ဆိုပြီး လူတွေက ပြောခဲ့ကြပါတယ်။ ဒါဟာ ဘာအဓိပ္ပါယ်မှ မရှိပါဘူး။ အသင်းခေါင်းဆောင် အနေနဲ့ နိုင်ငံအသင်း ဆီမီးဖိုင်နယ်တက်သွားလို့ ကျနော်ငိုကြွေး ခဲ့တာပါ။ နိုင်ငံအသင်းနဲ့ နောက်ဆုံးပွဲဖြစ်လာမယ့် ဒီပြိုင်ပွဲအတွက် ကျနော် အကောင်းဆုံး ကြိုးစားသွားမှာပါ”လို့ ပြောခဲ့တာပါ။

စပိန်အသင်းနည်းပြ ဒယ်လာဖွန်တေက အသင်းခေါင်းဆောင် မိုရာတာဘက်ကနေ ရပ်တည်ခဲ့ပြီး သူဟာ အသင်းအတွက် ကွင်းအတွင်းရော ကွင်းအပြင်ပါ အကောင်းဆုံး လုပ်ဆောင်ခဲ့လို့ သူ့အပေါ် ဆက်ဆံပုံတွေဟာ မျှတမှုမရှိဘူးလို့ ပြောခဲ့ပါတယ်။

၂၀၁၄ ခုနှစ်ကတည်းက စပိန်အသင်းအတွက် ပွဲထွက်ခွင့်ရခဲ့တဲ့ မိုရာတာဟာ နိုင်ငံအသင်းအတွက် ၇၈ ပွဲ ကစားထားပြီး ၃၆ ဂိုး သွင်းယူထားတာ ဖြစ်ပါတယ်။ 

Source: besoccer

CNI Sport News

၂၀၂၄ ခုနှစ်၊ ဇူလိုင် ၉

အာဂျင်တီးနားအသင်းနည်းပြ စကာလိုနီက အသင်းခေါင်းဆောင် မက်ဆီဟာ ကနေဒါအသင်းနဲ့ ယှဉ်ပြိုင်ရမယ့် ကိုပါအမေရိကဖလားပြိုင်ပွဲ ဆီမီးဖိုင်နယ်ပွဲစဉ်မှာ ကြံ့ခိုင်မှုအပြည့်နဲ့ ပါဝင်နိုင်မယ်လို့ ပြောခဲ့ပါတယ်။

စကာလိုနီက “မက်ဆီဟာ ကြံ့ခိုင်မှုအပြည့်နဲ့ ဒီပွဲကို ပါဝင်မယ်ဆိုတာ သံသယမရှိပါဘူး။ ဒါဟာ ကျနော့်အတွက် အလွန်လွယ်ကူတဲ့ ဆုံးဖြတ်ချက်ပါ။ သူဟာ ကြံ့ခိုင်မှု အပြည့်ရှိတိုင်း အမြဲတမ်းကစားသလို ၁၀၀ ရာခိုင်နှုန်း ကြံ့ခိုင်မှု မရှိရင်တောင် ကစားတဲ့သူပါ။ သူဟာ ကျနော်တို့အတွက် မရှိမဖြစ်တဲ့သူပါ”လို့ ပွဲကြိုသတင်းစာ ရှင်းလင်းပွဲမှာ ပြောခဲ့တာပါ။

မက်ဆီဟာ ဒဏ်ရာကြောင့် ပီရူးအသင်းနဲ့ အုပ်စုနောက်ဆုံးပွဲစဉ်ကို လွဲချော်ခဲ့ပေမယ့် အီကွေဒေါအသင်းနဲ့ ကွာတားဖိုင်နယ်ပွဲစဉ်မှာ အာဂျင်တီးနားအသင်းအတွက် ပြန်လည်ပါဝင်နိုင်ခဲ့ပါတယ်။

မက်ဆီဟာ အီကွေဒေါအသင်းနဲ့ပွဲစဉ်ကို ပွဲချိန်ပြည့် ပါဝင်ကစားခဲ့ပေမယ့် ကြံ့ခိုင်မှု အပြည့်အဝ ရှိပုံမပေါ်တာပါ။ 

ဒါပေမယ့် နည်းပြ စကာလိုနီကတော့ မက်ဆီဟာ ကိုပါအမေရိကဖလား ဆီမီးဖိုင်နယ်ပွဲစဉ်မှာ ကြံ့ခိုင်မှုအပြည့်နဲ့ ပါဝင်နိုင်မယ်လို့ ပြောခဲ့တာဖြစ်ပါတယ်။

စကာလိုနီကို တွေ့ရစဉ်

အာဂျင်တီးနားနဲ့ ကနေဒါအသင်းတို့ဟာ အုပ်စုတွင်းမှာလည်း တွေ့ဆုံခဲ့တာကြောင့် ဒီပြိုင်ပွဲမှာ ဒုတိယအကြိမ် မြောက် တွေ့ဆုံမှုဖြစ်ပြီး အုပ်စုပွဲတုန်းက အာဂျင်တီးနားအသင်းက ၂ ဂိုး- ဂိုးမရှိနဲ့ အနိုင်ရရှိခဲ့တာပါ။ 

အာဂျင်တီးနားအသင်းနည်းပြ စကာလိုနီက ဆီမီးဖိုင်နယ်ပွဲစဉ်မှာ ကနေဒါအသင်းနည်းပြ ဂျက်ဆီမာ့ရှ်ဟာ ကွဲပြားခြားနားတဲ့အရာကို လုပ်နိုင်ဖို့ ကြိုးစားလိမ့်မယ်လို့ ပြောခဲ့ပါတယ်။

စကာလိုနီက “နည်းပြတွေ အားလုံးဟာ အမှားတွေပြင်ပြီး ပြိုင်ဘက်တွေကို နာကျင်အောင်လုပ်ဖို့ မှတ်သားထား ကြပါတယ်။ နည်းပြတိုင်းဟာ မတူညီတဲ့အရာတွေကို လုပ်ပါလိမ့်မယ်။ ကျနော်တို့ဟာ ဘောလုံးကို ရအောင်ယူပြီး သူတို့ရဲ့ပွဲကစားတာကို ရပ်တန့်အောင်လုပ်မှာပါ။ ရုပ်ပိုင်းဆိုင်ရာအရ သူတို့နဲ့ ယှဉ်ပြိုင်ရတာ ခက်ခဲပါတယ်။ ဒါပေမယ့် ကျနော်တို့ဟာ အသင်းရဲ့ အကောင်းဆုံးပုံစံနဲ့ ပွဲကို ကစားနိုင်ဖို့ မျှော်လင့်ပါတယ်”လို့ ပြောခဲ့တာပါ။

အာဂျင်တီးနားနဲ့ ကနေဒါအသင်းတို့ရဲ့ ကိုပါအမေရိကဖလား ဆီမီးဖိုင်နယ်ပွဲစဉ်ကို ဇူလိုင် ၁၀ ရက်မနက်ပိုင်းမှာ ယှဉ်ပြိုင်သွားမှာ ဖြစ်ပါတယ်။ 

Source: CNA

CNI Sport News

၂၀၂၄ ခုနှစ်၊ ဇူလိုင် ၈

ပေါ်တူဂီလူမျိုးနည်းပြ မော်ရင်ဟိုဟာ ဘာစီလိုနာအသင်းကြယ်ပွင့် အန်ဆုဖာတီကို ဖီနာဘာချီအသင်းအတွက် ခေါ်ယူဖို့ စိတ်ဝင်စားနေတယ်လို့ သတင်းတွေ ထွက်ပေါ်နေပါတယ်။

မော်ရင်ဟိုဟာ ဖီနာဘာချီအသင်း နည်းပြသစ်အဖြစ် ခန့်အပ်ခံရပြီးနောက် သူ့ရဲ့ကိုယ်ပိုင် လူစာရင်းကို တည်ဆောက်ဖို့ ကြိုးစားနေပြီး နွေရာသီ အပြောင်းအရွှေ့မှာ အန်ဆုဖာတီကို ခေါ်ယူချင်နေတာပါ။ 

အန်ဆုဖာတီဟာ ပြီးခဲ့တဲ့ရာသီက ဘာစီလိုနာအသင်းကနေ ဘရိုက်တန်အသင်းထံ အငှားနဲ့ ကစားခဲ့ပေမယ့် ပရီးမီးယားလိဂ်ပြိုင်ပွဲမှာ ၃ ပွဲသာ ပွဲထွက်လူစာရင်း ပါဝင်ခွင့်ရခဲ့တာ ဖြစ်ပါတယ်။

ဘာစီလိုနာအသင်းဟာ အန်ဆုဖာတီကို ရောင်းချချင်ပေမယ့် စာချုပ်က ၂၀၂၇ ခုနှစ်အထိ ရှိနေတဲ့အတွက် အငှားအပြောင်းအရွှေ့က ပိုပြီးဖြစ်နိုင်ဖွယ်ရှိတာပါ။ 

ဒါပေမယ့် ဖီနာဘာချီအသင်းအနေနဲ့ အန်ဆုဖာတီကို ခေါ်ယူဖို့အတွက် ငွေကြေး အသုံးပြုနိုင်မလားဆိုတာ စောင့်ကြည့်ရဦးမှာ ဖြစ်ပါတယ်။ 

 အန်ဆုဖာတီကိုတွေ့ရစဉ်

ဘာစီလိုနာအသင်းဟာ မက်ဆီ ထွက်ခွာသွားပြီးနောက် သူ့ရဲ့ကျောနံပတ် ၁၀ ကို အန်ဆုဖာတီကို ပေးဝတ်ခဲ့ပြီး အများကြီး မျှော်လင့်ခဲ့တာပါ။ 

ဒါပေမယ့် အန်ဆုဖာတီဟာ ဒဏ်ရာကြောင့် ကာလရှည်ကြာ အနားယူခဲ့ရပြီးနောက် ပုံမှန်ခြေစွမ်းပါ ဆုံးရှုံးခဲ့ရတာ ဖြစ်ပါတယ်။

ဘာစီလိုနာအသင်းရဲ့ လူငယ်စီမံကိန်းက ထွက်ပေါ်လာခဲ့တဲ့ အန်ဆုဖာတီဟာ အသင်းကြီးအတွက် ၁၁၂ ပွဲ ပါဝင်ကစားထားပြီး ၂၉ ဂိုး သွင်းယူကာ လာလီဂါ၊ ကိုပါဒယ်ရေးနဲ့ စပိန်စူပါဖလားတို့ကို ၁ ကြိမ်စီရရှိထားတာပါ။ 

စပိန်အသင်းအတွက် ၁၀ ပွဲ ပါဝင်ကစားထားတဲ့ အန်ဆုဖာတီဟာ ၂၀၂၃ ခုနှစ်နောက်ပိုင်း လက်ရွေးစင်အသင်းနဲ့ ဝေးကွာနေတာ ဖြစ်ပါတယ်။ 

ဘာစီလိုနာအသင်းဟာ အန်ဆုဖာတီကို အနည်းဆုံး အမေရိကန် ရာသီကြို ခရီးစဉ်ပြီးဆုံးတဲ့ အချိန်အထိ ဆက်ပြီး ထားရှိဖို့ စီစဉ်နေတာပါ။ 

ဘာစီလိုနာအသင်းဟာ အမေရိကန်မှာ မန်စီးတီး၊ ရီးရယ်လ်၊ အေစီမီလန်အသင်းတို့နဲ့ ရာသီကြိုခြေစမ်းပွဲ ယှဉ်ပြိုင်သွားမှာ ဖြစ်ပါတယ်။ 

Source: Goal