CNI Sport News

၂၀၂၅ ခုနှစ်၊ ဩဂုတ် ၉

ချယ်လ်ဆီးအသင်းဟာ ဖီဖာကလပ် ကမ္ဘာ့ဖလားပြိုင်ပွဲမှာ ချန်ပီယံဆု ကာကွယ်ဖို့ အာမခံချက် မရှိတဲ့အတွက် ၂၀၂၉ ခုနှစ်ကျရင် ကျင်းပမယ့်ပြိုင်ပွဲမှာ ချန်ပီယံဆု ကာကွယ်ခွင့် လွဲချော်ဖွယ်ရှိနေပါတယ်။ 

ချယ်လ်ဆီးအသင်းဟာ ပြီးခဲ့တဲ့နွေရာသီက ပုံစံအသစ်နဲ့ ပြောင်းလဲကျင်းပခဲ့တဲ့ ဖီဖာကလပ် ကမ္ဘာ့ဖလားပြိုင်ပွဲမှာ PSG အသင်းကို ဗိုလ်လုပွဲမှာ အနိုင်ရပြီး ချန်ပီယံဆုရရှိခဲ့တာပါ။ 

ကမ္ဘာ့ဘောလုံးအဖွဲ့ချုပ်(ဖီဖာ)ရဲ့ ပွဲစီစဉ်သူတွေဟာ ချန်ပီယံဖြစ်တဲ့ အသင်းကို လာမယ့်ပြိုင်ပွဲမှာ အလိုအလျောက် ဝင်ခွင့်ပေးဖို့ ရှိ/မရှိ စဉ်းစားနေပြီး ဒါက လက်ရှိ အခြေအနေမှာ မဟုတ်ဘူးလို့ The Times က ဖော်ပြထားပါတယ်။ 

ဖီဖာဟာ ပြီးခဲ့တဲ့ပြိုင်ပွဲမှာ ထိပ်တန်းလိဂ်တွေကို ပြိုင်ပွဲဝင် ၂ သင်းစီ ယှဉ်ပြိုင်ခွင့်ပြုခဲ့ပြီး ပရီးမီးယားလိဂ်က မန်စီးတီးနဲ့ ချယ်လ်ဆီးအသင်းတို့ ယှဉ်ပြိုင်ခဲ့ကြတာပါ။ 

ချယ်လ်ဆီးအသင်းကို တွေ့ရစဉ်

ပြီးခဲ့တဲ့ရာသီက အင်္ဂလန်၊ အီတလီနဲ့ စပိန်လိဂ်တွေမှာ ချန်ပီယံဖြစ်ခဲ့တဲ့ လီဗာပူးလ်၊ နာပိုလီနဲ့ ဘာစီလိုနာအသင်း တို့ဟာ ၂၀၂၅ ဖီဖာကလပ် ကမ္ဘာ့ဖလားပြိုင်ပွဲမှာ ပါဝင်ခွင့် မရခဲ့ပါဘူး။ 

ဖီဖာကလပ် ကမ္ဘာ့ဖလားပြိုင်ပွဲမှာ ချန်ပီယံဖြစ်ခဲ့တဲ့ ချယ်လ်ဆီးအသင်းဟာ လက်ရှိအချိန်မှာ ရာသီသစ်အတွက် ပြင်ဆင်နေပြီး လေဗာကူဆင်အသင်းနဲ့ ခြေစမ်းပွဲကစားခဲ့တာမှာ ၂ ဂိုး-ဂိုးမရှိနဲ့ အနိုင်ရရှိထားပါတယ်။ 

ချယ်လ်ဆီးအသင်းဟာ သြဂုတ် ၁၀ ရက်မှာ အေစီမီလန်အသင်းနဲ့ ခြေစမ်းပွဲကစားဖို့ရှိနေပြီး ဒီပွဲပြီးရင် ပရီးမီးယားလိဂ် ရာသီသစ် အဖွင့်ပွဲစဉ်အဖြစ် ခရစ္စတယ်ပဲလေ့စ် အသင်းနဲ့ သြဂုတ် ၁၇ ရက်မှာ ယှဉ်ပြိုင်မှာ ဖြစ်ပါတယ်။ 

Source: Goal

CNI Sport News

၂၀၂၅ ခုနှစ်၊ ဩဂုတ် ၉

လီဗာပူးလ်အသင်းဂန္ထဝင် စတီဗင်ဂျရတ်က ယာမဲလ်နဲ့ ဘတ်ပီတို့ဟာ မယုံနိုင်စရာ ကောင်းတဲ့သူတွေ ဖြစ်ပေမယ့် ဆယ်ကျော်သက် အရွယ်ကစားသမားဘဝမှာ အသင်းဖော်ဟောင်း မိုက်ကယ်အိုဝင်က သူတို့ထက်ပိုပြီး ကောင်းတယ်ဆိုတာ ယုံကြည်တယ်လို့ ပြောခဲ့ပါတယ်။ 

စတီဗင်ဂျရတ်က “ဘတ်ပီနဲ့ယာမဲလ်တို့ဟာ Ballon d'Or ဆု နောက်ကို လိုက်နေပေမယ့် တစ်ဦးကတော့ ဒီဆုကို ရရှိထားပါတယ်။ ဒါကြောင့် မိုက်ကယ်အိုဝင်ကို ကမ္ဘာ့အကောင်းဆုံး ကစားသမားအဖြစ် မဲပေးရွေးချယ်ခဲ့တဲ့ အချက်ကို လေးစားသင့်တယ်လို့ ကျနော်ထင်ပါတယ်။ ကျနော်ဟာ သူနဲ့ကစားခဲ့ပြီး သူဟာ မယုံနိုင်ဖွယ်ကောင်းတဲ့ ဆယ်ကျော်သက်ပါ။ ဒါကြောင့် မိုက်ကယ်အိုဝင်က အကောင်းဆုံးလို့ ကျနော် ပြောချင်ပါတယ်။ ဘတ်ပီနဲ့ ယာမဲလ် တို့ကလည်း မယုံနိုင်စရာကောင်းတဲ့ သူတွေဆိုတာ ကျနော် ပြောချင်ပါတယ်”လို့ ESPN မှာ ပြောခဲ့တာပါ။ 

ဘာစီလိုနာအသင်းရဲ့ အသက် ၁၈ နှစ်အရွယ်ရှိ ယာမဲလ်ဟာ အခုနှစ်အတွက် ချီးမြှင့်မယ့် Ballon d'Or ဆုကို ရယူနိုင်မယ့် သူတွေထဲက တစ်ဦးအဖြစ် ရေပန်းစားနေပြီး ရယူနိုင်ခဲ့ရင် ဒီဆုကို ရယူနိုင်တဲ့ အသက်အငယ်ဆုံး ကစားသမားအဖြစ် စံချိန်သစ် တင်နိုင်မှာဖြစ်ပါတယ်။

အသက် ၂၆ နှစ်အရွယ်ရှိ ဘတ်ပီကလည်း အခုနှစ် Ballon d'Or ဆုရဲ့ ဆန်ခါတင် ၃၀ ဦးစာရင်းမှာ ပါဝင်နေတာပါ။ 

ဘတ်ပီနဲ့ ယာမဲလ်ကိုတွေ့ရစဉ်

မိုက်ကယ်အိုဝင်ဟာ အသက် ၁၇ နှစ်အရွယ် ၁၉၉၆ ခုနှစ်မှာ စတင်ပွဲဦးထွက်ခဲ့ပြီး ပရီးမီးယားလိဂ်သမိုင်းမှာ ဆယ်ကျော်သက် ကစားသမားတွေထဲ ဂိုးအများ ဆုံးသွင်းယူတဲ့ သူအဖြစ် မှတ်တမ်းတင်ထားပါတယ်။ 

မိုက်ကယ်အိုဝင်ဟာ လီဗာပူးလ်အသင်းကို ၂၀၀၀-၀၁ ရာသီမှာ လိဂ်ဖလား၊ FA ဖလားနဲ့ UEFA ဖလား ရရှိအောင် ကူညီပေးနိုင်ခဲ့ပြီးနောက် Ballon d'Or ဆုကို ရရှိခဲ့တာပါ။ 

မိုက်ကယ်အိုဝင်ဟာ ၁၉၇၉ ခုနှစ်က ကီဗင်ကီးဂန်း နောက်ပိုင်း Ballon d'Or ဆုကိုရရှိတဲ့ ပထမဆုံး အင်္ဂလန် ကစားသမား ဖြစ်ခဲ့ပါတယ်။ 

ယာမဲလ်ကတော့ ဘာစီလိုနာအသင်းအတွက် အသက် ၁၅ နှစ်အရွယ်မှာ ပွဲဦးထွက်ခဲ့ပြီး အသင်းကို လာလီဂါဖလား အပါအဝင် ပြည်တွင်းပြိုင်ပွဲတွေမှာ ဆုဖလား အောင်မြင်မှုတွေ ရယူနိုင်ခဲ့သလို စပိန်အသင်းကို ယူရို ၂၀၂၄ ချန်ပီယံဆု ရယူပေးနိုင်ခဲ့တာပါ။ 

ဘတ်ပီက အသက် ၁၉ နှစ်အရွယ်မှာ ပြင်သစ်အသင်းကို ၂၀၁၈ ကမ္ဘာ့ဖလားရရှိအောင် စွမ်းဆောင်ပေးနိုင်ခဲ့သလို PSG၊ ရီးရယ်လ်အသင်းတို့နဲ့ ဆုဖလား အောင်မြင်မှုတွေ ရခဲ့ပါတယ်။

Source: ESPN

CNI Sport News

၂၀၂၅ ခုနှစ်၊ ဩဂုတ် ၉

ဂျာမနီဂိုးသမား စတီဂန်ဟာ ဘာစီလိုနာအသင်းနဲ့ ဖြစ်နေတဲ့ အငြင်းပွားမှုတွေကို ဖြေရှင်းနိုင်ခဲ့ပြီးနောက် အသင်းခေါင်းဆောင် ရာထူးကို ပြန်လည်ရရှိခဲ့ပါတယ်။ 

စတီဂန်ဟာ ပြီးခဲ့တဲ့ဇူလိုင်က နောက်ကျော ခွဲစိတ်မှုနဲ့ပတ်သက်ပြီး အငြင်းပွားစရာတွေ ရှိခဲ့တဲ့အတွက် ဘာစီလိုနာ အသင်းဟာ သူ့ကို အသင်းခေါင်းဆောင် ရာထူးကနေ ဖယ်ရှားခဲ့တာပါ။

စတီဂန်အနေနဲ့ ဒဏ်ရာကြောင့် ကာလရှည်ကြာ အနားယူခဲ့ရမယ်ဆိုရင် ဘာစီလိုနာအသင်းဟာ သူ့ရဲ့လုပ်ခလစာ ၈၀ ရာခိုင်နှုန်းကို ရာသီလယ်အထိ ရှင်းထုတ်ပြီး ကစားသမားသစ်တွေကို စာရင်းသွင်းနိုင်ဖို့ လုပ်ဆောင်သွားမှာ ဖြစ်ပါတယ်။ 

ဒါပေမယ့် စတီဂန်က သူဟာ ၃ လကြာသာ အနားယူရမယ်လို့ ပြောခဲ့ပြီး လာလီဂါစည်းမျဉ်းအရ ကစားသမား တစ်ဦးဟာ အနည်းဆုံး ၄ လကြာ အနားယူရမှသာ ကာလရှည် အနားယူသူလို့သတ်မှတ်တာပါ။

စတီဂန်ကို တွေ့ရစဉ်

ဒါအပြင် စတီဂန်ရဲ့ ဆေးဘက်ဆိုင်ရာ အချက်အလက်တွေနဲ့ ပတ်သက်ပြီး သူနဲ့အသင်းတို့အကြားမှာ အငြင်းပွား မှုတွေရှိနေတာ ဖြစ်ပါတယ်။ 

အခုအချိန်မှာတော့ စတီဂန်ဟာ သူတို့ရဲ့ ဆေးဘက်ဆိုင်ရာ အစီရင်ခံ စာပေးပို့ဖို့ ခွင့်ပြုထားတဲ့ သက်ဆိုင်ရာ ပုံစံ တွေကို လက်မှတ်ထိုးလိုက်ပြီလို့ ဘာစီလိုနာအသင်းက ပြောခဲ့တာပါ။ 

အဲဒါကြောင့် ဘာစီလိုနာအသင်းဟာ စတီဂန်ကို အသင်းခေါင်းဆောင်ရာထူး ပြန်လည်ပေးခဲ့တာ ဖြစ်ပါတယ်။ 

၂၀၁၄ ခုနှစ်က မိုချန်ဂလာဘတ်အသင်းကနေ ရောက်ရှိလာခဲ့တဲ့ စတီဂန်ဟာ ဘာစီလိုနာအသင်းအတွက် ပွဲပေါင်း ၄၂၂ ပွဲ ပါဝင်ကစားထားပြီး ချန်ပီယံလိဂ်ဖလား ၁ ကြိမ်၊ လာလီဂါဖလား ၆ ကြိမ် အပါအဝင် ဆုဖလားအောင်မြင်မှု အများအပြား ရယူထားတာပါ။ 

စတီဂန်ဟာ ပြီးခဲ့တဲ့ရာသီကလည်း ဒဏ်ရာကြောင့် ကာလရှည်ကြာ အနားယူခဲ့ပြီး အသင်းအတွက် ပြိုင်ပွဲစုံ ၉ ပွဲ သာ ပါဝင်ကစားနိုင်ခဲ့ပါတယ်။ 

ဘာစီလိုနာအသင်းဟာ ဒီနွေရာသီ အပြောင်းအရွှေ့မှာ အက်စပန်ညိုအသင်း ဂိုးသမား ယိုအန်ဂါစီယာကို ခေါ်ယူထားတာကြောင့် စတီဂန်ရဲ့အနာဂတ်ဟာ အသင်းမှာ မရေမရာဖြစ်ခဲ့ပြီး အပြောင်းအရွှေ့ သတင်းတွေ ထွက်ခဲ့သေးတာ ဖြစ်ပါတယ်။

Source: BBC

CNI Sport News

၂၀၂၅ ခုနှစ်၊ ဩဂုတ် ၉

နယူးကာဆယ်အသင်းနည်းပြ အက်ဒီဟောင်းက တိုက်စစ်မှူး အစ်ဆက်ဟာ အသင်းရဲ့ ရာသီသစ် ပရီးမီးယားလိဂ် အဖွင့်ပွဲစဉ်ကို ပါဝင်နိုင်ဖွယ် မရှိဘူးလို့ ပြောခဲ့ပါတယ်။ 

နွေရာသီ အပြောင်းအရွှေ့မှာ နယူးကာဆယ်အသင်းကနေ ထွက်ခွာဖို့ ကြိုးပမ်းနေတဲ့ အစ်ဆက်ဟာ တစ်ဦးတည်း လေ့ကျင့်မှုတွေ ပြုလုပ်နေတာပါ။ 

လီဗာပူးလ်အသင်း ပစ်မှတ် အစ်ဆက်ဟာ အက်စ်ပန်ညိုအသင်းနဲ့ ၂ ဂိုးစီ သရေကျခဲ့တဲ့ပွဲ အပါအဝင် နယူးကာဆယ်အသင်းရဲ့ ရာသီကြို ခြေစမ်းပွဲတွေမှာ ပါဝင်ကစားခဲ့ခြင်း မရှိပါဘူး။ 

အစ်ဆက်ဟာ လာမယ့် အသလက်တီကိုအသင်းနဲ့ ခြေစမ်းပွဲအပြင် ပရီးမီးယားလိဂ် အဖွင့်ပွဲစဉ်ကိုလည်း ပါဝင် နိုင်ဖွယ်မရှိတာ ဖြစ်ပါတယ်။ 

နယူးကာဆယ်အသင်းနည်းပြ အက်ဒီဟောင်းက “ကျနော်တို့ ဆွေးနွေးမှုတွေရှိပြီး အခုအချိန်မှာ သူ့ကိုအဖွဲ့ထဲ ပတ်သက်ခွင့် မပြုနိုင်ဘူးဆိုတာ ရှင်းပါတယ်။ ဒါက ဘယ်လောက်ကြာမလဲဆိုတာ ကျနော် မသိပါဘူး။ ဆွေးနွေးမှု တွေက သီးသန့်ရှိနေမှာ ဖြစ်ပေမယ့် ကျနော်ကတော့ အခုအချိန်မှာ သူ့ကိုအဖွဲ့ထဲ ဝင်ရောက်ခွင့် မပြုနိုင်ဘူးဆိုတာ ရှင်းပါတယ်။ သူ့ကိုဒီပွဲမှာ ပါဝင်ကစားစေချင်သလို မနက်ဖြန် လေ့ကျင့်ရေးမှာလည်း ရှိစေချင်ပြီး သူ့ကို ကျနော်တို့ နဲ့အတူ ရှိစေချင်ပါတယ်”လို့ ပြောခဲ့တာပါ။ 

အစ်ဆက်ကို တွေ့ရစဉ်

လီဗာပူးလ်အသင်းဟာ အစ်ဆက်ကို ခေါ်ယူဖို့ ပေါင်သန်း ၁၁၀ နဲ့ ပြီးခဲ့အပတ်က ကမ်းလှမ်းမှု ပြုလုပ်ခဲ့တာကို နယူးကာဆယ်အသင်းက ပယ်ချထားတာ ဖြစ်ပါတယ်။ 

လီဗာပူးလ်အသင်းဟာ အစ်ဆက်နဲ့ နယူးကာဆယ်အသင်းရဲ့ အခြေအနေကို စောင့်ကြည့်ပြီး နောက်ထပ် ကမ်းလှမ်းမှု အသစ်ပြုလုပ်ဖို့ ရှိနေတာပါ။ 

နယူးကာဆယ်အသင်းဟာ အစ်ဆက်ရဲ့ နေရာမှာ အစားထိုးဖို့ တိုက်စစ်မှူးသစ်တွေ ခေါ်ယူဖို ကြိုးပမ်းနေပေမယ့် အဆင်ပြေမှု မရှိသေးတာဖြစ်ပါတယ်။ 

နယူးကာဆယ်အသင်းဟာ ပရီးမီးယားလိဂ် ရာသီသစ် အဖွင့်ပွဲစဉ်အဖြစ် သြဂုတ် ၁၆ ရက်မှာ အက်စတွန်ဗီလာ အသင်း အိမ်ကွင်းသွားရောက် ယှဉ်ပြိုင်ရမှာဖြစ်ပါတယ်။ 

Source: Dailymail

CNI Sport News

၂၀၂၅ ခုနှစ်၊ ဩဂုတ် ၈

စပါးအသင်းဟာ နောက်ဆုံးကစားခဲ့တဲ့ ခြေစမ်းပွဲမှာ ဘိုင်ယန်မြူးနစ်အသင်းကို ၄ ဂိုး-ဂိုးမရှိနဲ့ ဂိုးပြတ် အရေးနိမ့် ခဲ့ပေမယ့် PSG အသင်းနဲ့ ယှဉ်ပြိုင်ရမယ့် ဥရောပစူပါဖလားပွဲအတွက် သူတို့အဆင်သင့် ဖြစ်နေလိမ့်မယ်လို့ နည်းပြ သောမတ်စ်ဖရန့်ခ်က ပြောခဲ့ပါတယ်။

သောမတ်စ်ဖရန့်ခ်က “ဒီပွဲအတွက် ကျနော်တို့ ၁၀၀ ရာခိုင်နှုန်း အဆင်သင့် ဖြစ်နေမှာပါ။ ဒါနဲ့ပတ်သက်ပြီး ကျနော် ကတော့ သံသယမရှိပါဘူး။ ဒီပွဲအတွက် ပြင်ဆင်မှုတွေ ပြုလုပ်ဖို့ အချိန်ရှိပါသေးတယ်။ ကျနော်တို့ဟာ ကောင်းမွန် တဲ့ လေ့ကျင့်ခန်း အစီအစဉ် ၃ ကြိမ် ဒါမှမဟုတ် ၄ ကြိမ်လောက် ပြုလုပ်ပြီးရင် PSG အသင်းနဲ့ ယှဉ်ပြိုင်ကစားဖို့ အဆင်သင့်ဖြစ်နေမှာပါ”လို့ ပြောခဲ့တာပါ။ 

ဘိုင်ယန်မြူးနစ်အသင်းကို အရေးနိမ့်ခဲ့တာဟာ နည်းပြ သောမတ်စ်ဖရန့်ခ် လက်ထက်မှာ စပါးအသင်းရဲ့ ပထမဆုံး ရှုံးပွဲ ဖြစ်ခဲ့ပါတယ်။

စပါးအသင်းဟာ ဘိုင်ယန်မြူးနစ်အသင်းကို ပထမပိုင်းမှာ ၁ ဂိုး-ဂိုးမရှိနဲ့ အရေးနိမ့်ခဲ့ပေမယ့် ဒုတိယပိုင်းမှာ အသင်း ကြီး ကစားသမားတွေနဲ့ အကယ်ဒမီ ကစားသမားတွေကို တွဲဖက်အသုံးပြုခဲ့တာကြောင့် ၃ ဂိုး ထပ်ပေးရပြီး ဂိုးပြတ် ရှုံးနိမ့်ခဲ့တာပါ။ 

စပါးအသင်း နည်းပြ သောမတ်စ်ဖရန့်ခ်ကို တွေ့ရစဉ်

စပါးအသင်းဟာ ရာသီကြို ခြေစမ်းပွဲတွေမှာ ရက်ဒင်းနဲ့ အာဆင်နယ်အသင်းကို အနိုင်ရခဲ့ပြီး ဝိုင်ကမ်ဘီ၊ လူတန်နဲ့ နယူးကာဆယ်အသင်းတို့ကို သရေကစားနိုင်ခဲ့တာ ဖြစ်ပါတယ်။ 

စပါးအသင်းနည်းပြ သောမတ်စ်ဖရန့်ခ်က ဘိုင်ယန်မြူးနစ်အသင်းနဲ့ ပွဲရလဒ်ဟာ သူတို့အတွက် ဆိုးရွားခဲ့ပေမယ့် သင်ယူစရာတွေ ရခဲ့သလို အပြုသဘောဆောင်တဲ့ စွမ်းဆောင်ရည်လည်း ရခဲ့တယ်လို့ ပြောခဲ့ပါတယ်။

ဒါအပြင် သောမတ်စ်ဖရန့်ခ်က စပါးအသင်းဟာ သူတို့လိုချင်တဲ့ ပုံစံကို ရောက်ရှိဖို့ အချိန်အနည်းငယ် ယူရမှာ ဖြစ်ပေမယ့် ရောက်ရှိနိုင်မယ်ဆိုတာ သံသယ မရှိဘူးလို့လည်း ပြောခဲ့တာပါ။ 

စပါးအသင်းနဲ့ PSG အသင်းတို့ရဲ့ ဥရောပစူပါဖလား ပွဲစဉ်ကို သြဂုတ် ၁၃ ရက် အီတလီနိုင်ငံမှာ ကျင်းပသွားမှာ ဖြစ်ပါတယ်။ 

Source: Dailymail

CNI Sport News

၂၀၂၅ ခုနှစ်၊ ဩဂုတ် ၈

ပရီးမီးယားလိဂ် တန်းတက်ကလပ် ဘန်လေအသင်းဟာ ယူနိုက်တက်အသင်းနဲ့ စာချုပ်ကုန်ဆုံးပြီးနောက် အသင်းလက်မဲ့ဖြစ်နေတဲ့ ဒိန်းမတ်ကွင်းလယ်လူ အဲရစ်ဆန်ကို ခေါ်ယူနိုင်ဖို့ ကြိုးပမ်းနေပါတယ်။ 

အသက် ၃၃ နှစ်အရွယ်ရှိ အဲရစ်ဆန်ဟာ ကမ်းလှမ်းမှု အများအပြား ရရှိထားပြီး ချန်ပီယံရှစ်ကလပ် ရက်ဇ်ဟမ်း အသင်းရဲ့ ကမ်းလှမ်းမှုကို ငြင်းပယ်ထားပါတယ်။ 

အနောက်ဥရောပမှာ နေဖို့ဆန္ဒရှိနေတဲ့ အဲရစ်ဆန်ကို ဘန်လေအသင်းဟာ ပရီးမီးယားလိဂ်မှာ ဆက်ပြီး ကစားအောင် ဆွဲဆောင်နိုင်ဖို့ မျှော်လင့်နေတာ ဖြစ်ပါတယ်။ 

ဂျာမနီနဲ့ စပိန်ကလပ် အသင်းတွေကလည်း အဲရစ်ဆန်ရဲ့ အခြေအနေကို စောင့်ကြည့်မှုတွေ ပြုလုပ်နေတာပါ။ 

အဲရစ်ဆန်ကို တွေ့ရစဉ်

မန်စီးတီးအသင်း နောက်ခံလူဟောင်း ဝေါ်လ်ကာကို ခေါ်ယူထားတဲ့ ဘန်လေအသင်းဟာ ပရီးမီးယားလိဂ်မှာ ဆက်ပြီး ရှိနေနိုင်ဖို့အတွက် အတွေ့အကြုံရှိတဲ့ အဲရစ်ဆန်ကို ခေါ်ယူချင်နေတာ ဖြစ်ပါတယ်။ 

အဲရစ်ဆန်သာ အသင်းထံ လာရောက်ဖို့ လမ်းဖွင့်မယ်ဆိုရင် ဘန်လေအသင်းဟာ ပရီးမီးယားလိဂ် ရာသီသစ် အဖွင့် ပွဲစဉ်မတိုင်မီ ခေါ်ယူမှုကို အပြီးသတ်ချင်နေတာပါ။ 

စကော့ပါကား ကိုင်တွယ်နေတဲ့ ဘန်လေအသင်းဟာ ဒီနွေရာသီ အပြောင်းအရွှေ့မှာ ကစားသမား အများအပြား ခေါ်ယူ အားဖြည့်ထားပြီး  ချယ်လ်ဆီးအသင်းက အူဂိုချူကွီနဲ့ နယူးကာဆယ်အသင်းက ဒူဘရာ့ဗ်ကာတို့ကို နောက်ဆုံး ခေါ်ယူထားပါတယ်။ 

ဘန်လေအသင်းဟာ ရာသီကြို ခြေစမ်းပွဲ ၅ ပွဲ ကစားထားတာမှာ ၂ ပွဲနိုင်၊ ၂ ပွဲသရေ၊ ၁ ပွဲ ရှုံးနိမ့်ထားပြီး သြဂုတ် ၉ ရက်မှာ လာဇီယိုအသင်းနဲ့ ခြေစမ်းပွဲကစားဖို့ ရှိနေတာပါ။ 

ဘန်လေအသင်းဟာ ပရီးမီးယားလိဂ် ရာသီသစ် အဖွင့်ပွဲစဉ်အဖြစ် စပါးအသင်း အိမ်ကွင်း သွားရောက် ကစားရမှာဖြစ်ပြီး ယူနိုက်တက်၊ လီဗာပူးလ်၊ မန်စီးတီးအသင်းတို့နဲ့ ပွဲကြပ်တွေ ကစားရဖို့လည်း ရှိနေတာ ဖြစ်ပါတယ်။ 

Source: Goal

CNI Sport News

၂၀၂၅ ခုနှစ်၊ ဩဂုတ် ၈

ချယ်လ်ဆီးအသင်းဟာ အာဂျင်တီးနား တောင်ပံကစားသမား ဂါနာချိုကို ခေါ်ယူဖို့ ယူနိုက်တက်အသင်းနဲ့ ဆွေးနွေးမှုတွေ ပြုလုပ်နေပါတယ်။ 

ဂါနာချိုဟာ နွေရာသီ အပြောင်းအရွှေ့မှာ ယူနိုက်တက်အသင်းကနေ ထွက်ခွာဖို့ ကြိုးပမ်းနေပြီး အသင်းဘက် ကလည်း သူ့ကိုရောင်းချနိုင်ဖို့ လုပ်ဆောင်နေတာပါ။ 

ရာသီသစ်မှာ ဆုဖလား အောင်မြင်မှုတွေ ရယူနိုင်ဖို့အတွက် တိုက်စစ်ပိုင်းကို အားကောင်းအောင် ပြုလုပ်နေတဲ့ ချယ်လ်ဆီးအသင်းဟာ ဂါနာချိုကို ခေါ်ယူနိုင်မယ်လို့ ယုံကြည်မှုရှိနေပါတယ်။ 

ယူနိုက်တက်အသင်းဟာ ဂါနာချိုအတွက် ပြောင်းရွှေ့ကြေး ပေါင်သန်း ၅၀ သတ်မှတ်ထားတယ်လို့ သတင်းတွေမှာ ဖော်ပြထားပါတယ်။ 

ဂါနာချိုဟာ ယူနိုက်တက်အသင်းရဲ့ ရာသီကြို ခြေစမ်းပွဲတွေမှာ မပါဝင်ခဲ့သလို အခုအချိန်ထိ အသင်းနဲ့အဝေးမှာ သီးခြား လေ့ကျင့်မှုတွေ ပြုလုပ်နေတာပါ။ 

 ဂါနာချိုကို တွေ့ရစဉ်

နွေရာသီ အပြောင်းအရွှေ့မှာ ကွန်ညာ၊ အမ်ဘူမိုနဲ့ ဆက်စ်ကိုတို့ကို ခေါ်ယူထားတဲ့ ယူနိုက်တက်အသင်းဟာ ဂါနာချို အပါအဝင် ဆန်ချို၊ အန်တိုနီနဲ့ မာလာစီယာတို့ကို အပြောင်းအရွှေ့ မပိတ်မီမှာ အမြန်ဆုံးရောင်းချနိုင်ဖို့ စီစဉ်နေတာဖြစ်ပါတယ်။

ယူနိုက်တက်အသင်းနည်းပြ အာမိုရင်က ဂါနာချိုဟာ အရည်အသွေးရှိတဲ့ ကစားသမား ဖြစ်ပေမယ့် တစ်ခါတစ်ရံ မှာ အဆင်မပြေမှုတွေ ရှိတယ်လို့ အမေရိကန်ရာသီကြို ခရီးစဉ်မှာ ပြောထားတာပါ။ 

၂၀၂၀ ပြည့်နှစ်က အသလက်တီကို လူငယ်အသင်းကနေ ရောက်ရှိလာခဲ့တဲ့ ဂါနာချိုဟာ ၂၀၂၂ ခုနှစ်မှာ ယူနိုက်တက် အသင်းကြီးအတွက် စတင်ပွဲထွက်ခွင့်ရခဲ့ပါတယ်။ 

ဂါနာချိုဟာ ယူနိုက်တက်အသင်းကြီးအတွက် ၁၄၄ ပွဲ ကစားထားပြီး ၂၆ ဂိုး သွင်းယူကာ FA ဖလားနဲ့ လိဂ်ဖလား တို့ကို ရယူနိုင်ခဲ့တာပါ။ 

ပရီးမီးယားလိဂ် ရာသီသစ်ဟာ လာမယ့် အပတ်ထဲ စတင်တော့မှာဖြစ်လို့ ဂါနာချိုဟာ သူ့ရဲ့အပြောင်းအရွှေ့ကို အမြန်ဆုံး အပြီးသတ်နိုင်ဖို့ မျှော်လင့်နေတာဖြစ်ပါတယ်။ 

Source: BBC

CNI Sport News

၂၀၂၅ ခုနှစ်၊ ဩဂုတ် ၈

ပေါ်တူဂီအသင်းခေါင်းဆောင် ရော်နယ်ဒိုဟာ သူ့ရဲ့နာမည်ကျော် အောင်ပွဲခံဟန်ဖြစ်တဲ့ 'Siu' အောင်ပွဲခံဟန် ၁၂ နှစ်ပြည့်မှာ အယ်လ်နာဆာအသင်းအတွက် ဟက်ထရစ်ဂိုး သွင်းယူနိုင်ခဲ့ပါတယ်။ 

ရော်နယ်ဒိုဟာ အယ်လ်နာဆာအသင်းက ရီယိုအေဗီအသင်းကို ၄ ဂိုး-ဂိုးမရှိနဲ့ အနိုင်ရခဲ့တဲ့ ရာသီကြို ခြေစမ်းပွဲမှာ ဟက်ထရစ် သွင်းယူနိုင်ခဲ့တာပါ။ 

ပြီးခဲ့တဲ့ရာသီက ဆော်ဒီပရိုလိဂ်ပြိုင်ပွဲမှာ ၂၅ ဂိုးသွင်းယူခဲ့တဲ့ အသက် ၄၀ နှစ်အရွယ်ရှိ ရော်နယ်ဒိုဟာ သူ့ရဲ့ ပေါ်တူဂီအသင်းဖော် ဂျာအိုဖီးလစ်နဲ့အတူ ဒီပွဲမှာ အတွဲညီပြီး သွင်းဂိုးတွေ သွင်းယူနိုင်ခဲ့တာ ဖြစ်ပါတယ်။ 

ပြီးခဲ့တဲ့လက ပေါင် ၂၆ သန်းနဲ့ ချယ်လ်ဆီးအသင်းကနေ ပြောင်းရွှေ့လာခဲ့တဲ့ ဂျာအိုဖီးလစ်ဟာ ဒီပွဲမှာ ရော်နယ်ဒိုအတွက် ဂိုးဖန်တီးမှု ၂ ကြိမ် ပြုလုပ်နိုင်ခဲ့တာပါ။ 

ရော်နယ်ဒိုဟာ ပြီးခဲ့တဲ့ ခြေစမ်းပွဲမှာလည်း ဂိုးသွင်းယူထားတာကြောင့် အယ်လ်နာဆာအသင်းအတွက် ရာသီကြို ခြေစမ်းပွဲ ၂ ပွဲမှာ သွင်းဂိုး ၄ ဂိုး သွင်းယူထားတာ ဖြစ်ပါတယ်။ 

ရော်နယ်ဒိုဟာ ရာသီသစ်မှာ အယ်လ်နာဆာအသင်းနဲ့အတူ ဆုဖလား ရယူနိုင်ဖို့ ဆန္ဒပြင်းပြနေသလို အသင်းဘက် ကလည်း နည်းပြ အပြောင်းအလဲအပြင် ကစားသမားသစ် အားဖြည့်မှုတွေ ပြုလုပ်ပေးနေတာပါ။ 

ရော်နယ်ဒိုကို တွေ့ရစဉ်

အယ်လ်နာဆာအသင်းဟာ အယ်လ်ဟီလယ်အသင်း နည်းပြဟောင်း ဂျော့ချ်ဂျီးဆပ်ကို နည်းပြသစ်အဖြစ် ခန့်အပ်ထားတာ ဖြစ်ပါတယ်။ 

အယ်လ်နာဆာအသင်းဟာ ဘာစီလိုနာအသင်း နောက်ခံလူ အင်နီဂိုမာတီနက်ဇ်ကို ခေါ်ယူနိုင်တော့မှာ ဖြစ်သလို ဘရန်ဖို့ဒ်အသင်းက ဝီဆာကို ခေါ်ယူနိုင်ဖို့လည်း စိတ်ဝင်စားနေတာပါ။

ပြီးခဲ့တဲ့ရာသီက ဘရန်ဖို့ဒ်အသင်းအတွက် ပရီးမီးယားလိဂ် ပြိုင်ပွဲမှာ ၁၉ ဂိုး သွင်းယူနိုင်ခဲ့တဲ့ ဝီဆာကို ခေါ်ယူဖို့ နယူးကာဆယ်အသင်းကလည်း ပစ်မှတ်ထားနေပါတယ်။

အယ်လ်နာဆာအသင်းဟာ အက်စတွန်ဗီလာအသင်းကနေ ခေါ်ယူခဲ့တဲ့ တိုက်စစ်မှူး ဒူရန်ကို အငှားနဲ့ ထွက်ခွာခွင့် ပေးခဲ့တာကြောင့် သူ့ရဲ့နေရာမှာ အစားထိုးဖို့ တိုက်စစ်မှူးတစ်ဦး ခေါ်ယူချင်နေတာပါ။ 

အယ်လ်နာဆာအသင်းဟာ သြဂုတ် ၁၀ ရက်မှာ အယ်လ်မီရီယာအသင်းနဲ့ ရာသီကြို ခြေစမ်းပွဲ ယှဉ်ပြိုင်ဖို့ရှိပြီး ဒီပွဲပြီးရင် ဆော်ဒီစူပါဖလား ဆီမီးဖိုင်နယ်ပွဲစဉ်အဖြစ် ဟောင်ကောင်မှာ အယ်လ်အစ်တီဟတ်အသင်းနဲ့ ယှဉ်ပြိုင်မှာ ဖြစ်ပါတယ်။ 

Source: Dailymail

CNI Sport News

၂၀၂၅ ခုနှစ်၊ ဩဂုတ် ၇

ဘာစီလိုနာအသင်းဟာ ကလပ်နဲ့ အဆင်မပြေမှုတွေ ဖြစ်နေတဲ့ ဂျာမနီဂိုးသမား စတီဂန်ကို စည်းကမ်းပိုင်းဆိုင်ရာ အရေးယူမှု ပြုလုပ်ပြီး အသင်းခေါင်းဆောင် ရာထူးကနေ ဖယ်ရှားဖို့ စဉ်းစားနေပါတယ်။ 

စတီဂန်ဟာ သူ့ရဲ့နောက်ကျော ခွဲစိတ်မှုသတင်းကို လူသိရှင်ကြား ပြောခဲ့သလို ဒီခွဲစိတ်မှုကြောင့် ၃ လကျော်ကြာ အနားယူရဖွယ် ရှိနေတဲ့အတွက် ဘာစီလိုနာအသင်းကို ဒေါသထွက်စေခဲ့တာပါ။ 

စတီဂန်ရဲ့ ဒီလုပ်ရပ်တွေကြောင့် ဘာစီလိုနာအသင်း အကြီးအကဲတွေဖြစ်တဲ့ လာပေါ်တာနဲ့ ဒေကိုတို့ဟာ သူ့ကို ဒေါသထွက်နေပြီး အသင်းခေါင်းဆောင် ရာထူးကနေ ဖယ်ရှားဖို့ စဉ်းစားနေတယ်လို့ Mundo Deportivo က ဖော်ပြထားပါတယ်။ 

ဘာစီလိုနာအသင်းဟာ ဆာဂျီရော်ဘတ်တို အသင်းကနေ ထွက်ခွာခဲ့ပြီးနောက် ပြီးခဲ့တဲ့နှစ်မှာ ဂိုးသမား စတီဂန်ကို အသင်းခေါင်းဆောင်သစ်အဖြစ် ခန့်အပ်ခဲ့တာပါ။ 

ဘာစီလိုနာအသင်းဟာ နောက်ဆုံး ဆုံးဖြတ်ချက် မချမီမှာ နည်းပြဟန်ဆီဖလစ်နဲ့ တွေ့ဆုံဆွေးနွေးမှု ပြုလုပ်ဖို့ စီစဉ်ထားတာ ဖြစ်ပါတယ်။ 

စတီဂန်ကို တွေ့ရစဉ်

ဘာစီလိုနာအသင်းဟာ အာရှရာသီကြို ခြေစမ်းခရီးစဉ်ကနေ ပြန်ရောက်ရှိလာပြီးနောက် ရက်အနည်းငယ် အနားယူကာ လေ့ကျင့်မှုတွေ ပြန်ပြီးပြုလုပ်မှာပါ။ 

ဘာစီလိုနာအသင်းဟာ စပိန်ဂိုးသမား ယိုအန်ဂါစီယာကို အက်စ်ပန်ညိုအသင်းကနေ ခေါ်ယူခဲ့ပြီးနောက် စတီဂန်ရဲ့ အနာဂတ်ဟာ အသင်းမှာ မရေမရာဖြစ်လာခဲ့ပြီး ထွက်ခွာရဖွယ်ရှိတယ်လို့ သတင်းတွေ ထွက်ခဲ့ပါတယ်။ 

ဒါပေမယ့် ခွဲစိတ်ပြီး အနားယူရမှာဖြစ်တဲ့အတွက် စတီဂန်ဟာ ဘာစီလိုနာအသင်းမှာ ဆက်ပြီးရှိနေမှာပါ။ 

ဘာစီလိုနာအသင်းဟာ ယိုအန်ဂါစီယာကို ဦးစားပေး ဂိုးသမားအဖြစ် အသုံးပြုဖို့ စီစဉ်ထားပြီး ဆက်ဇနီကို အရန် ဂိုးသမားအဖြစ် အသုံးပြုဖို့ ရှိနေပါတယ်။

ဘာစီလိုနာအသင်းဟာ လာမယ့် သြဂုတ် ၁၀ ရက်မှာ ယိုအန်ဂန်ပါ ဆုဖလားပွဲအဖြစ် ကိုမိုအသင်းနဲ့ ယှဉ်ပြိုင်သွား မှာ ဖြစ်ပါတယ်။ 

Source: Goal