CNI Sport News

၂၀၂၅ ခုနှစ်၊ ဩဂုတ် ၁

ယူနိုက်တက်အသင်းဟာ လိုက်ပ်ဇစ်အသင်း တိုက်စစ်မှူး ဆက်စ်ကို,ကို အဓိက တိုက်စစ်မှူး ပစ်မှတ်အဖြစ် သတ်မှတ်ထားပေမယ့် ဟော့ဂျ်လန်းကတော့ အသင်းမှာ သူ့ရဲ့နေရာအတွက် တိုက်ပွဲဝင်ဖို့ အသင့်ပဲလို့ ပြောခဲ့ ပါတယ်။

ဟော့ဂျ်လန်းက “ကျနော့်ရဲ့ အစီအစဉ်က ရှင်းပါတယ်။ ဒီမှာဆက်နေပြီး ကျနော့်ရဲ့ နေရာအတွက် တိုက်ပွဲဝင် သွားဖို့ အဆင်သင့်ပါပဲ။ ကျနော်ဟာအခုမှ အသက် ၂၂ နှစ်ပဲရှိသေးပြီး လူတွေက ဒါကိုမေ့နေကြပါတယ်။ ကျနော် ဟာ အများကြီး သင်ယူပြီးပြီဆိုတာ ကျနော် ကစားနေတဲ့ပွဲတွေမှာ ပြသထားတယ်လို့ ထင်ပါတယ်။ ရာသီကြို ကာလမှာ အလွန်ကောင်းမွန်စွာ လုပ်ဆောင်နေတယ်လို့”ပြောခဲ့တာပါ။ 

ဟော့ဂျ်လန်းဟာ ပြီးခဲ့တဲ့ရာသီက ယူနိုက်တက်အသင်းမှာ ပုံမှန်ခြေစွမ်းပြသနိုင်ဖို့ ရုန်းကန်ခဲ့ရပြီး ပြိုင်ပွဲစုံ ၁၀ ဂိုးသာ သွင်းယူနိုင်ခဲ့တာ ဖြစ်ပါတယ်။

အဲဒါကြောင့် ဟော့ဂျ်လန်းဟာ ဝေဖန်မှုတွေခံခဲ့ရပြီး ဒီနွေရာသီမှာ ယူနိုက်တက်အသင်းကနေ ထွက်ခွာရဖွယ် ရှိတယ်လို့ သတင်းတွေ ထွက်နေတာပါ။ 

ဟော့ဂျ်လန်းကို ခေါ်ယူဖို့ စီးရီးအေ ကလပ်အသင်း အချို့ကလည်း ချိတ်ဆက်မှုတွေ ရှိခဲ့တာဖြစ်ပါတယ်။ 

ဟော့ဂျ်လန်းဟာ ယူနိုက်တက်အသင်းက ဘုန်းမောက်အသင်းကို ၄ ဂိုး-၁ ဂိုးနဲ့အနိုင်ရခဲ့တဲ့ Premier League Summer Series ပွဲစဉ်မှာတော့ ခေါင်းတိုက်ပြီး ဂိုးသွင်းယူနိုင်ခဲ့တာပါ။ 

ဟော့ဂျ်လန်းကို တွေ့ရစဉ်

ယူနိုက်တက်အသင်းဟာ ဒီပွဲမတိုင်မီမှာ ဆက်စ်ကို,ကို ခေါ်ယူဖို့အတွက် လိုက်ပ်ဇစ်အသင်းကို ချဉ်းကပ်မှုတွေ ပြုလုပ်ခဲ့ပြီး ကစားသမားကလည်း ယူနိုက်တက်အသင်းထံ ပြောင်းရွှေ့ဖို့ လမ်းဖွင့်ခဲ့တာ ဖြစ်ပါတယ်။ 

ဘုန်းမောက်အသင်းနဲ့ပွဲအပြီး သတင်းထောက်တွေနဲ့ တွေ့ဆုံချိန်မှာ ဟော့ဂျ်လန်းက သူဟာ ယူနိုက်တက်အသင်း ကနေ ထွက်ခွာဖို့ အစီအစဉ်မရှိဘဲ နေရာအတွက် တိုက်ပွဲဝင်သွားမယ်လို့ ပြောခဲ့တာပါ။ 

ယူနိုက်တက်အသင်းနည်းပြ အာမိုရင်ဟာ ဘုန်းမောက်အသင်းနဲ့ပွဲအပြီးမှာ ဟော့ဂျ်လန်း ဂိုးသွင်းယူနိုင်ဖို့က အရေး ကြီးပြီး သူဟာအသင်းနဲ့ ကောင်းမွန်စွာ ချိတ်ဆက်နေသလို တိုးတက်မှုလည်း ရှိတယ်လို့ ပြောခဲ့ပါတယ်။ 

ဒါပေမယ့် ဈေးကွက် ပိတ်ပြီးတဲ့အထိ ဘာတွေ ဖြစ်မလဲဆိုတာတော့ သူမသိဘူးလို့ နည်းပြအာမိုရင်က ထပ်ပြီး ပြောခဲ့တာပါ။ 

၂၀၂၃ ခုနှစ်က အတ္တလန်တာအသင်းကနေ ပေါင် ၇၂ သန်းနဲ့ ရောက်ရှိလာခဲ့တဲ့ ဟော့ဂျ်လန်းဟာ ယူနိုက်တက် အသင်းအတွက် ပြိုင်ပွဲစုံ ၉၅ ပွဲ ကစားထားပြီး ၂၆ ဂိုး သွင်းယူထားပါတယ်။ 

ယူနိုက်တက်အသင်းဟာ ရာသီသစ်မတိုင်မီ အဲဗာတန်၊ ဖီအိုရင်တီးနားအသင်းတို့နဲ့ ခြေစမ်းပွဲ ယှဉ်ပြိုင်သွားဦးမှာ ဖြစ်ပါတယ်။ 

Source: Metro

CNI Sport News

၂၀၂၅ ခုနှစ်၊ ဩဂုတ် ၁

တူရကီစူပါလိဂ် ချန်ပီယံ ဂါလာတာစာရေးအသင်းဟာ နိုင်ဂျီးရီးယား တိုက်စစ်မှူး အိုစီမန်ကို တူရကီ အပြောင်းအရွှေ့ စံချိန်ချိုးဖျက်ပြီး ယူရို ၇၅ သန်းနဲ့ နာပိုလီအသင်းကနေ ခေါ်ယူကြောင်း ကြေညာခဲ့ပါတယ်။ 

အိုစီမန်ရဲ့ ဒီအပြောင်းအရွှေ့ဟာ တူရကီဘောလုံးလောကရဲ့ ဈေးအကြီးဆုံး ကစားသမား ခေါ်ယူမှုအဖြစ် အရင်က စံချိန်တင်ထားတဲ့ ဖီနာဘာချီအသင်း တိုက်စစ်မှူး အန်နက်ဆရီရဲ့ ယူရိုသန်း ၂၀ စံချိန်ကို ချိုးဖျက်ပြီး စံချိန်သစ် တင်နိုင်ခဲ့တာပါ။

အိုစီမန်ရဲ့ အပြောင်းအရွှေ့ထဲမှာ သဘောတူညီမှု အစိတ်အပိုင်းအဖြစ် သူ့ရဲ့နောက်ထပ် အပြောင်းအရွှေ့ကနေ ရရှိမယ့် ပြောင်းရွှေ့ကြေးရဲ့ ၁၀ ရာခိုင်နှုန်းကို နာပိုလီအသင်းထံ ပေးချေရမယ်လို့ ဂါလာတာစာရေးအသင်းက ပြောခဲ့ပါတယ်။

ဂါလာတာစာရေးအသင်းဟာ အိုစီမန်ကို ၄ နှစ် စာချုပ်ချုပ်ဆိုခဲ့ပြီး အိုစီမန်ဟာ တစ်ရာသီကို ယူရို ၁၅ သန်း ရရှိမယ်လို့ သိရပါတယ်။ 

စီးရီးအေ ချန်ပီယံ နာပိုလီအသင်းကလည်း အိုစီမန်ရဲ့ အပြောင်းအရွှေ့ကို အတည်ပြုခဲ့ပါတယ်။ 

အိုစီမန်ကို တွေ့ရစဉ် 

အိုစီမန်ဟာ ပြီးခဲ့တဲ့ ရာသီကတည်းက နာပိုလီအသင်းကနေ ထွက်ခွာဖို့ ချိတ်ဆက်မှုတွေရှိခဲ့ပြီး ဂါလာတာစာရေး အသင်းထံ အငှားနဲ့ပြောင်းရွှေ့လာခဲ့တာပါ။ 

အိုစီမန်ဟာ ဒီနွေရာသီ အပြောင်းအရွှေ့မှာ ဆော်ဒီပရိုလိဂ် အပါအဝင် ချယ်လ်ဆီး၊ PSG အသင်းတို့ရဲ့ ချိတ်ဆက်မှု တွေ ခံခဲ့ရပါတယ်။

ဒါပေမယ့် အိုစီမန် ကိုယ်တိုင်က ပြီးခဲ့တဲ့ရာသီက အငှားကစားခဲ့ချိန်မှာ ခြေစွမ်းပြသနိုင်ခဲ့တဲ့ ဂါလာတာစာရေး အသင်းထံ အပြီးသတ် ပြောင်းရွှေ့ဖို့ ဆုံးဖြတ်ခဲ့တာပါ။ 

အသက် ၂၆ နှစ်အရွယ်ရှိ အိုစီမန်ဟာ ပြီးခဲ့တဲ့ရာသီက ဂါလာတာစာရေး အသင်းအတွက် ပြိုင်ပွဲစုံ ၄၁ ပွဲ ပါဝင် ကစားခဲ့ပြီး ၃၇ ဂိုးသွင်းယူကာ ဂိုးဖန်တီးမှု ၈ ကြိမ် ပြုလုပ်နိုင်ခဲ့ပါတယ်။ 

အိုစီမန်ဟာ ဂါလာတာစာရေးအသင်းနဲ့အတူ တူရကီစူပါလိဂ်၊ တူရကီဖလားတို့ကို ရယူနိုင်ခဲ့ပြီး တူရကီစူပါလိဂ် အကောင်းဆုံး ကစားသမားဆုနဲ့ ဂိုးသွင်း အများဆုံးဆုတို့ကိုလည်း ရရှိခဲ့ပါတယ်။ 

Source: CNA

CNI Sport News

၂၀၂၅ ခုနှစ်၊ ဇူလိုင် ၃၁

ယူနိုက်တက်အသင်းက ဘုန်းမောက်အသင်းကို ၄ ဂိုး-၁ ဂိုးနဲ့အနိုင်ရခဲ့တဲ့ Premier League Summer Series ပွဲစဉ်မှာ ဂိုးသွင်း၊ဂိုးဖန်တီးမှုပြုလုပ်နိုင်ခဲ့တဲ့ ဘယ်နောက်ခံလူဒေါဂူကို နည်းပြအာမိုရင်က ချီးကျူးခဲ့ပါတယ်။

အာမိုရင်က “ဒေါဂူဟာ အသက် ၂၀ ပဲရှိသေးပြီး အထင်ကြီးစရာကောင်းခဲ့ပါတယ်။ သူဟာ ယူနိုက်တက်အသင်းမှာ အသားကျတဲ့ပုံစံဖြစ်လာခဲ့ပြီး အားကောင်းသလို သူ့ရဲ့နည်းစနစ်ကိုလည်း ဒီပွဲမှာလုပ်နိုင်ခဲ့ပါတယ်။ သူဟာ ခံစစ် ပိုင်းစွမ်းဆောင်ရည်လည်းကောင်းမွန်လာပြီး အစစအရာရာတိုးတက်လာခဲ့ပါတယ်။ ဒါကြောင့် သူ့ရဲ့ဒီပွဲက စွမ်းဆောင်ရည်ကို ကျနော်အလွန်နှစ်သက်တယ်”လို့ MUTV နဲ့ အင်တာဗျူးမှာ ပြောခဲ့တာပါ။ 

ပြီးခဲ့တဲ့ဇန်နဝါရီအပြောင်းအရွှေ့က လက်ချီအသင်းကနေ ရောက်ရှိလာခဲ့တဲ့ ဒေါဂူဟာ ခြေစွမ်းပိုင်းပုံမှန် ပြသ နိုင်ခြင်းမရှိလို့ ဝေဖန်မှုတွေခံခဲ့ရပေမယ့် ရာသီသစ်မတိုင်မီ ခြေစမ်းပွဲတွေမှာ ခြေစွမ်းကောင်းတွေ ပြသနိုင်ခဲ့တာ ဖြစ်ပါတယ်။ 

ဒေါဂူဟာ ဘုန်းမောက်အသင်းနဲ့ပွဲစဉ်မှာ အဖွင့်ဂိုးသွင်းယူခဲ့တဲ့ တိုက်စစ်မှူးဟော့ဂျ်လန်းရဲ့သွင်းဂိုးကို ဖန်တီးနိုင်ခဲ့ပြီး သူကိုယ်တိုင်လည်း အသင်းရရှိတဲ့ ဒုတိယမြောက်သွင်းဂိုးကို သွင်းယူနိုင်ခဲ့တာပါ။ 

ယူနိုက်တက်အသင်းနည်းပြအာမိုရင်ဟာ ဘုန်းမောက်အသင်းနဲ့ပွဲစဉ်က အသင်းရဲ့စွမ်းဆောင်ရည်ကို ကျေနပ် နေပြီး ကစားသမားတွေဟာ ပွဲအပေါ်မှာရော လေ့ကျင့်ရေးကွင်းမှာလည်း အပြည့်အဝအာရုံစိုက်နေကြတယ်လို့ ပြောခဲ့ပါတယ်။ ဒါ့အပြင် အသင်းရဲ့ရုပ်ပိုင်းဆိုင်ရာလည်း တိုးတက်လာခဲ့ပြီး လုပ်စရာတွေအများကြီး ကျန်နေ ပေမယ့် ဒီလိုမျိုးကစားတာကို မြင်တွေ့ရတာကောင်းမွန်တယ်လို့ နည်းပြအာမိုရင်က ပြောခဲ့ပါတယ်။ 

ယူနိုက်တက်အသင်းဟာ ၂၀၂၅ Premier League Summer Series ပြိုင်ပွဲမှာ ၂ ပွဲစလုံးအနိုင်ရရှိထားပြီး နောက်ဆုံးပွဲစဉ်ဖြစ်တဲ့ အဲဗာတန်အသင်းနဲ့ပွဲစဉ်မှာ ရလဒ်ကောင်းရင် ချန်ပီယံဆုကို ရယူနိုင်မှာဖြစ်ပါတယ်။ 

Source:manutd.com

CNI Sport News

၂၀၂၅ ခုနှစ်၊ ဇူလိုင် ၃၁

အတ္တလန်တာအသင်း CEO က တိုက်စစ်မှူး လွတ်ခ်မန်းဟာ နွေရာသီအပြောင်းအရွှေ့မှာ အသင်းကနေ ထွက်ခွာ ချင်နေပြီး အင်တာမီလန်အသင်းဟာ သူ့အတွက် ကမ်းလှမ်းမှု ပြုလုပ်ထားတယ်လို့ အတည်ပြုခဲ့ပါတယ်။ 

အင်တာမီလန်အသင်းဟာ လွတ်ခ်မန်းကို add-ons အပါအဝင် ပြောင်းရွှေ့ကြေးယူရို ၄၅ သန်းနဲ့ ကမ်းလှမ်းမှု ပြုလုပ်ထားပြီး အတ္တလန်တာအသင်းဟာ သူ့အတွက် ယူရိုသန်း ၅၀ တောင်းဆိုထားတာပါ။ 

ဆွေးနွေးမှုတွေ ရှိနေဆဲဖြစ်နေပေမယ့် ပြောင်းရွှေ့ကြေးနဲ့ပတ်သက်ပြီး သဘောတူညီမှု မရရှိသေးတာ ဖြစ်ပါတယ်။ 

အင်တာမီလန်အသင်းဟာ သူတို့ရဲ့ကမ်းလှမ်းမှုကို အတ္တလန်တာအသင်းက ငြင်းဆန်မယ်ဆိုရင် ပြောင်းရွှေ့ကြေး ထပ်တိုးပြီး ကမ်းလှမ်းဖို့ မရှိဘူးလို့ သိရပါတယ်။

ဒီလိုသာဖြစ်ခဲ့ရင် လွတ်ခ်မန်းအနေနဲ့ သူပြောင်းရွှေ့ချင်နေတဲ့ အပြောင်းအရွှေ့ကို လက်လွှတ်ရမယ့် စိုးရိမ်စရာ ရှိနေတာပါ။

လွတ်ခ်မန်းရဲ့ အဖွဲ့ကတော့ ဒီအပြောင်းအရွှေ့ ဖြစ်မြောက်ဖို့ အနောက်ကွယ်ကနေ အတ္တလန်တာအသင်းကို တွန်းအားပေးနေပြီး အတ္တလန်တာအသင်းဟာ ယူရို ၄၈ သန်းရရင် ထွက်ခွာခွင့်ပေးဖွယ်ရှိတယ်လို့ Corriere della Sera က ဖော်ပြထားပါတယ်။

လွတ်ခ်မန်းကို တွေ့ရစဉ်

၂၀၂၂ ခုနှစ်က လိုက်ပ်ဇစ်အသင်းကနေ ရောက်ရှိလာခဲ့တဲ့ လွတ်ခ်မန်းဟာ အတ္တလန်တာအသင်း ယူရိုပါလိဂ်ဖလား ရခဲ့တာမှာ အဓိက အခန်းကဏ္ဍကပါဝင်ခဲ့တာပါ။ 

အတ္တလန်တာအသင်းဟာ လွတ်ခ်မန်းအတွက် ရရှိထားတဲ့ ကမ်းလှမ်းမှုကို သေချာအကဲဖြတ်ပြီး အဖြေပေးသွားမှာ ဖြစ်သလို ကစားသမားရဲ့ထွက်ခွာမှုတန်ဖိုးကို ကလပ်အသင်းကသာ ဆုံးဖြတ်တယ်လို့ CEO ပါကက်ဆီက ပြောခဲ့ ပါတယ်။ 

အတ္တလန်တာအသင်းဟာ ဒီနွေရာသီ အပြောင်းအရွှေ့မှာ ပြီးခဲ့တဲ့ရာသီက စီးရီးအေ ဂိုးသွင်းဘုရင် ရီတေဂူကို ဆော်ဒီပရိုလိဂ်ကလပ် အယ်လ်ကတ်ဒ်ဆီယာအသင်းထံ ရောင်းချထားတာပါ။

လွတ်ခ်မန်းဟာ အတ္တလန်တာအသင်းအတွက် ၁၁၇ ပွဲ ပါဝင်ကစားထားပြီး ၅၂ ဂိုး သွင်းယူထားပါတယ်။

လွတ်ခ်မန်းကတော့ အတ္တလန်တာနဲ့ အင်တာမီလန်အသင်းတို့ကြား အပြောင်းအရွှေ့ လုပ်ဆောင်မှုတွေကို အမြန်ဆုံး အဆုံးသတ်နိုင်ဖို့ မျှော်လင့်နေတာဖြစ်ပါတယ်။

Source: Goal

CNI Sport News

၂၀၂၅ ခုနှစ်၊ ဇူလိုင် ၃၁

ဆွီဒင်တိုက်စစ်မှူးယိုကီရက်စ်ဟာ နွေရာသီအပြောင်းအရွှေ့မှာ အသင်းအများအပြားရဲ့ စိတ်ဝင်စားမှု ခံခဲ့ရပေမယ့် အာဆင်နယ်အသင်းထံပြောင်းရွှေ့ဖို့က သူ့အတွက်လွယ်ကူတဲ့ရွေးချယ်မှုလို့ ပြောခဲ့ပါတယ်။ 

ယိုကီရက်စ်က “အခြားအသင်းတွေရဲ့စိတ်ဝင်စားမှုတွေလည်းခံခဲ့ရပေမယ့် ကျနော့်အတွက် ဒီအပြောင်းအရွှေ့ဟာ ခက်ခဲတဲ့ရွေးချယ်မှုလို့ မခံစားခဲ့ရပါဘူး။ အင်္ဂလန်ကိုပြန်လာဖို့ အမြဲတမ်းစိတ်ထဲမှာ ရှိမနေပေမယ့် ကျနော် ပေါ်တူဂီမှာရှိခဲ့တုန်းက ပြန်လာဖို့ ရွေးချယ်စရာတစ်ခုဖြစ်နိုင်ခဲ့ပါတယ်။ ဘာလို့လဲဆိုရင် ဒါက ကမ္ဘာ့အကောင်းဆုံး လိဂ်ဖြစ်နေလို့ပါ။ ဒါကြောင့်လည်း ပရီးမီးယားလိဂ်မှာကစားဖို့ အမြဲတမ်းရည်မှန်းခဲ့ပါတယ်။ အချိန်တန်ပြီဆိုပြီး ခံစားမိတဲ့အချိန်မှာတော့ ပြန်လာဖို့တွန့်ဆုတ်မနေခဲ့ပါဘူး”လို့ ပြောခဲ့တာပါ။ 

ယူနိုက်တက်အသင်းအပါအဝင် ဥရောပထိပ်တန်းကလပ်အချို့ရဲ့ပစ်မှတ်ဖြစ်ခဲ့တဲ့ ယိုကီရက်စ်ရဲ့ အာဆင်နယ် အသင်းထံ အပြောင်းအရွှေ့ဟာ ဖြစ်မြောက်ဖို့ကြာမြင့်ခဲ့ပြီး မကြာသေးမီရက်သတ္တပတ်ကမှ ပြီးမြောက်ခဲ့တာ ဖြစ်ပါတယ်။ 

စပို့တင်းလစ္စဘွန်းအသင်းအတွက် ၁၀၂ ပွဲကစားခဲ့ပြီး ၉၇ ဂိုးသွင်းယူနိုင်ခဲ့တဲ့ ယိုကီရက်စ်ဟာ အခြားအသင်းတွေရဲ့စိတ်ဝင်စားမှုခံခဲ့ရပေမယ့် သူကတော့ အာဆင်နယ်အသင်းထံ ပြောင်းရွှေ့ဖို့ကိုသာ ဆုံးဖြတ်ခဲ့တာပါ။ 

အာဆင်နယ်အသင်းဟာ နည်းပြအာတီတာရဲ့ပထမဆုံးရာသီဖြစ်တဲ့ ၂၀၂၀ ခုနှစ်မှာ FA ဖလားရယူပြီးနောက်ပိုင်း ဆုဖလားတွေနဲ့ဝေးကွာနေသလို ပရီးမီးယားလိဂ်ပြိုင်ပွဲရဲ့နောက်ဆုံး ၃ ရာသီစလုံး အဆင့် ၂ နေရာတွေနဲ့ ကျေနပ် ခဲ့ရပါတယ်။ 

စပို့တင်းလစ္စဘွန်းအသင်းမှာ ဆုဖလားအောင်မြင်မှုတွေ ရယူနိုင်ခဲ့တဲ့ ယိုကီရက်စ်က အောင်မြင်မှု ရယူချင်ရင် တစ်သင်းလုံးအတူလက်တွဲအလုပ်လုပ်ဖို့လိုအပ်ပြီး ဒါမှလည်း ကောင်းမွန်တဲ့ရာသီတစ်ခုကို ပိုင်ဆိုင် နိုင်မယ်လို့ ပြောခဲ့ပါတယ်။

ဒါ့အပြင် ယိုကီရက်စ်က ဂန္ထဝင်အွန်နရီဝတ်ဆင်ခဲ့တဲ့ ကျောနံပတ် ၁၄ ဝတ်ဆင်မယ့်အပေါ်မှာလည်း သူနဲ့နှိုင်းယှဉ်ဖို့ ရည်ရွယ်ထားခြင်းမရှိကြောင်းနဲ့ ကိုယ်ပိုင်လုပ်ဆောင်မှုတွေသာ ချပြချင်တယ်လို့ ပြောခဲ့ပါတယ်။ 

Source:ESPN

CNI Sport News

၂၀၂၅ ခုနှစ်၊ ဇူလိုင် ၃၀ 

ခရစ္စတယ်ပဲလေ့စ်အသင်း နည်းပြ ဂလက်စ်နာက ဒီနွေရာသီမှာ အဓိက ကစားသမား အီဇီ မထွက်ခွာဖို့ မျှော်လင့် ထားသလို အသင်းရဲ့ အပြောင်းအရွှေ့ လုပ်ဆောင်မှု နည်းပါတဲ့အပေါ် စိတ်ပျက်ကြောင်း ပြောခဲ့ပါတယ်။ 

ဂလက်စ်နာက “ကစားသမားတွေ အားလုံးရှိနေပေမယ့် ကျနော်တို့ဟာ အခုအချိန်ထိ အပြောင်းအရွှေ့ကို အကောင်းဆုံး လုပ်နိုင်ခြင်း မရှိသေးပါဘူး။ ကျနော်တို့ဟာ ဈေးကွက်မှာ ပိုလှုပ်ရှားပြီး ကစားသမားသစ်တွေ ခေါ်ယူပေးမယ်လို့ ကျနော့်ကို ကတိပေးထားပါတယ်။ ကျနော်ကတော့ အသင်းမှာရှိနေတဲ့ ကစားသမားတွေ ထပ်မံ ဆုံးရှုံးဖို့ မျှော်လင့်ထားသလို ကစားသမားသစ်တွေ အမြန်ဆုံး ရောက်လာဖို့လည်း မျှော်လင့်တယ်”လို့ ပြောခဲ့ တာပါ။ 

ခရစ္စတယ်ပဲလေ့စ်အသင်းဟာ ပြီးခဲ့တဲ့ရာသီက FA ဖလားပြိုင်ပွဲမှာ ချန်ပီယံဖြစ်ခဲ့တဲ့အတွက် ရာသီသစ်မှာ ဥရောပပြိုင်ပွဲ ယှဉ်ပြိုင်ရမှာဖြစ်လို့ ဒီနွေရာသီ အပြောင်းအရွှေ့ဟာ အသင်းအတွက် အလွန်အရေးပါတဲ့ အပြောင်းအရွှေ့ ဖြစ်ပါတယ်။ 

ဒါပေမယ့် ခရစ္စတယ်ပဲလေ့စ်အသင်းဟာ ဂိုးသမား တစ်ဦးဖြစ်တဲ့ ဘင်နီတက်ဇ်ကို အလွတ်နဲ့ခေါ်ယူထားပြီး ဘယ်နောက်ခံလူ ဆိုဆာကို ပေါင် ၃ သန်းနဲ့ ခေါ်ယူထားတာပါ။

ခရစ္စတယ်ပဲလေ့စ်အသင်းဟာ ကစားသမားသစ် အားဖြည့်မှု နည်းပါးနေသလို အပြောင်းအရွှေ့ မပိတ်မီမှာ အဓိက ကစားသမားတွေ ဆုံးရှုံးမယ့် အခြေအနေကို နည်းပြဂလက်စ်နာက စိုးရိမ်နေတာဖြစ်ပါတယ်။ 

အီဇီကို တွေ့ရစဉ် 

ခရစ္စတယ်ပဲလေ့စ်အသင်းရဲ့ အင်္ဂလန်ကစားသမားတွေဖြစ်တဲ့ အီဇီနဲ့ ဂူဟီတို့ဟာ ပရီးမီးယားလိဂ် အသင်းကြီး တွေရဲ့ ပစ်မှတ်အဖြစ် ရှိနေတာပါ။

အီဇီကို အာဆင်နယ်အသင်းက ခေါ်ယူဖို့ ကြိုးပမ်းနေပြီး ခရစ္စတယ်ပဲလေ့စ်အသင်းနဲ့ သူ့ရဲ့စာချုပ်ထဲမှာ ပါဝင်တဲ့ စာချုပ်ဖျက်သိမ်းကြေး ပေါင် ၆၈ သန်းကို အပြည့်အဝ မပေးနိုင်တာကြောင့် အပြောင်းအရွှေ့ မဖြစ်သေးတာ ဖြစ်ပါတယ်။

ဒါပေမယ့် အာဆင်နယ်အသင်းဟာ အီဇီကို ခေါ်ယူနိုင်ဖို့ထပ်ပြီး ကြိုးပမ်းဖို့ရှိနေတာပါ။ 

ဗဟိုနောက်ခံလူနဲ့ အသင်းခေါင်းဆောင်ဖြစ်တဲ့ ဂူဟီရဲ့ ခရစ္စတယ်ပဲလေ့စ်အသင်း စာချုပ်ဟာ နောက်ဆုံးနှစ်ထဲကို ရောက်ရှိနေပြီး သူ့ကိုခေါ်ယူဖို့ လီဗာပူးလ်နဲ့ စပါးအသင်းတို့က စောင့်ကြည့်နေပါတယ်။ 

ခရစ္စတယ်ပဲလေ့စ်အသင်း အကြီးအကဲတွေဟာ အပြောင်းအရွှေ့ လုပ်ဆောင်မှုတွေကို စောစီးစွာပြီး မြောက်စေ မယ်လို့ နည်းပြဖြစ်သူ ဂလက်စ်နာကို ကတိပေးခဲ့ပေမယ့် အခုအချိန်ထိ လုပ်ဆောင်နိုင်ခြင်း မရှိသေးတာ ဖြစ်ပါတယ်။ 

Source: metro

CNI Sport News

၂၀၂၅ ခုနှစ်၊ ဇူလိုင် ၃၀

ဂါလာတာစာရေးအသင်းဟာ အေစီမီလန်အသင်းကနေ အငှားနဲ့ လာရောက်ကစားနေတဲ့ စပိန်တိုက်စစ်မှူး မိုရာတာရဲ့ အငှားစာချုပ်ကို စောစီးစွာ အဆုံးသတ်ဖို့အတွက် ကိုမိုအသင်းကို ပြောင်းရွှေ့ကြေးပေးဖို့ တောင်းဆိုခဲ့ပါတယ်။

ပြီးခဲ့တဲ့ဇန်နဝါရီက အေစီမီလန်အသင်းကနေ တစ်နှစ်အငှားစာချုပ်နဲ့ ဂါလာတာစာရေးအသင်းထံ ပြောင်းရွှေ့ လာခဲ့တဲ့ မိုရာတာဟာ စီးရီးအေကလပ် ကိုမိုအသင်းထံ ပြောင်းရွှေ့ဖို့ ပုဂ္ဂိုလ်ရေး သဘောတူညီမှု ရရှိထားတာပါ။ 

ဂါလာတာစာရေးအသင်းဟာ မိုရာတာရဲ့ စာချုပ်ကို အဆုံးသတ်ပေးဖို့ ကိုမိုအသင်းကို ယူရို ၅ သန်း တောင်းခဲ့ ပေမယ့် ကိုမိုအသင်းက ယူရို ၂ သန်းသာပေးဖို့ ပြင်ဆင်ခဲ့တယ်လို့ Calciomercato သတင်းမှာ ဖော်ပြထားပါတယ်။ 

မိုရာတာဟာ ၂၀၂၄ ခုနှစ် နွေရာသီမှာ အသလက်တီကိုအသင်းကနေ ထွက်ခွာပြီး အေစီမီလန်အသင်းထံ ပြောင်းရွှေ့ လာခဲ့တာပါ။

ဒါပေမယ့် မိုရာတာဟာ အေစီမီလန်အသင်းမှာ နည်းပြဖြစ်သူနဲ့ အဆင်မပြေမှုတွေ ရှိခဲ့တာကြောင့် ဂါလာတာစာရေးအသင်းထံ အငှားနဲ့ ထွက်ခွာခဲ့တာ ဖြစ်ပါတယ်။

မိုရာတာကို တွေ့ရစဉ်  

ဂါလာတာစာရေးအသင်းဟာ မိုရာတာကို အငှားစာချုပ် ကုန်ဆုံးချိန်မှာ ယူရို ၁၀ သန်းဝန်းကျင်နဲ့ အပြီးသတ် ဝယ်ယူဖို့ ရွေးချယ်ခွင့်ရှိနေတာပါ။ 

လက်ရှိအချိန်မှာ ကိုမိုအသင်း နည်းပြ ဖာဘရီဂတ်စ်ဟာ သူ့ရဲ့အသင်းဖော်ဟောင်း မိုရာတာကို အီတလီထံ ပြန်ခေါ်ပြီး သူနဲ့လက်တွဲ အလုပ်လုပ်ဖို့ စိတ်အားထက်သန်နေပါတယ်။

ဂါလာတာစာရေးအသင်းဟာ နာပိုလီအသင်း တိုက်စစ်မှူး အိုဆင်ဟမ်ကို ခေါ်ယူမှု အပြီးသတ်ပြီးတာနဲ့ မိုရာတာကို ထွက်ခွာခွင့်ပေးဖို့ စဉ်းစားဖွယ်ရှိနေတာပါ။

ကိုမိုအသင်း အကြီးအကဲက သူတို့ဟာ မိုရာတာအတွက် ကစားသမား၊ အေစီမီလန်အသင်းတို့နဲ့ သဘောတူညီမှု ရရှိပြီးသား ဖြစ်သလို သူတို့ဘက်က လုပ်စရာ အကုန်လုပ်ပြီးပြီ ဖြစ်တာကြောင့် အေစီမီလန်နဲ့ ဂါလာတာစာရေး အသင်းတို့ ဆွေးနွေးဖို့ လိုအပ်တယ်လို့ ပြောထားပါတယ်။ 

မိုရာတာကတော့ ဒီအခြေအနေတွေကို အမြန်ဆုံးဖြေရှင်းပြီး ကိုမိုအသင်းထံ မကြာမီ ပြောင်းရွှေ့နိုင်ဖို့ မျှော်လင့်နေ ပါတယ်။ 

မိုရာတာဟာ ဂါလာစာရေးအသင်းအတွက် ၁၆ ပွဲ ကစားခဲ့ပြီး ၇ ဂိုးသွင်းယူကာ တူရကီစူပါလိဂ်နဲ့ တူရကီဖလား တို့ကို ရယူနိုင်ခဲ့တာဖြစ်ပါတယ်။ 

Source: Goal

CNI Sport News

၂၀၂၅ ခုနှစ်၊ ဇူလိုင် ၃၀

မန်စီးတီးအသင်းဟာ အင်္ဂလန်ဂိုးသမား ဂျိမ်းစ်ထရက်ဖို့ဒ်ကို ပရီးမီးယားလိဂ် တန်းတက်ကလပ် ဘန်လေအသင်း ကနေ ပြန်လည်ခေါ်ယူကြောင်း ကြေညာခဲ့ပါတယ်။ 

မန်စီးတီးအသင်းဟာ ဂျိမ်းစ်ထရက်ဖို့ဒ်အတွက် ဘန်လေအသင်းကို ပြောင်းရွှေ့ကြေးပေါင် ၂၇ သန်း ပေးချေခဲ့ရပြီး ၅ နှစ် စာချုပ်ချုပ်ကာ စာချုပ်ကုန်ဆုံးချိန်မှာ နောက်ထပ် သက်တမ်းတိုးဖို့ ရွေးချယ်ခွင့်ရှိနေတာပါ။ 

မန်စီးတီးအသင်းဟာ လွန်ခဲ့တဲ့ ၂ နှစ်က ဘန်လေအသင်းထံ ထွက်ခွာခွင့်ပေးခဲ့တဲ့ ဂျိမ်းစ်ထရက်ဖို့ဒ်ကို ပြန်လည် ခေါ်ယူနိုင်ဖို့အတွက် နယူးကာဆယ်အသင်းကို အသာရရှိခဲ့တာဖြစ်ပါတယ်။ 

အသက် ၂၂ နှစ်အရွယ်ရှိ ဂျိမ်းစ်ထရက်ဖို့ဒ်ဟာ ပြီးခဲ့တဲ့ရာသီက ဘန်လေအသင်း ပရီးမီးယားလိဂ်ပြိုင်ပွဲထံ တန်းပြန်တက်နိုင်ဖို့အတွက် ပွဲပေါင်း ၂၉ ပွဲအထိ ပေးဂိုးမပေးရအောင် လက်စွမ်းပြသနိုင်ခဲ့တာပါ။ 

ဂျိမ်းစ်ထရက်ဖို့ဒ်ဟာ မန်စီးတီးအသင်းမှာ ကျောနံပါတ် ၁ ဝတ်ဆင်မှာဖြစ်ပြီး သူဟာ ဒီနွေရာသီ အပြောင်းအရွှေ့ မှာ မန်စီးတီးအသင်းထံ ရောက်ရှိလာတဲ့ ၆ ဦးမြောက် ကစားသမားလည်း ဖြစ်ခဲ့ပါတယ်။ 

ဂျိမ်းစ်ထရက်ဖို့ဒ်ကို တွေ့ရစဉ် 

ဂျိမ်းစ်ထရက်ဖို့ဒ်က “မန်စီးတီးအသင်းထံ ပြန်လည်ပြောင်းရွှေ့ခွင့်ရတာဟာ ကျနော်နဲ့ ကျနော့်ရဲ့ မိသားစုအတွက် အလွန်ဂုဏ်ယူစရာကောင်းတဲ့ အခိုက်အတန့်ပါ။ ကျနော်ဟာ တစ်နေ့ ဒီကိုပြန်လာနိုင်မယ်ဆိုတာ အမြဲတမ်း အိပ်မက်မက်ခဲ့ပါတယ်။ ကျနော်ဟာ ငယ်ရွယ်သေးတဲ့အတွက် ဆက်ပြီးသင်ယူဖို့နဲ့ တိုးတက်ဖို့ ဆာလောင်နေပါ သေးတယ်။ ကျနော် ဖြစ်ချင်တဲ့ အကောင်းဆုံး ဂိုးသမား ဖြစ်လာအောင် ကူညီပေးဖို့ မန်စီးတီးထက် ပိုကောင်းတဲ့ ပတ်ဝန်းကျင် မရှိဘူးဆိုတာ ကျနော်သိပါတယ်”လို့ ပြောခဲ့ပါတယ်။

ဂျိမ်းစ်ထရက်ဖို့ဒ်ဟာ မန်စီးတီးအသင်းမှာ ပွဲထွက် ဂိုးသမား နေရာအတွက် အသင်းမှာရှိတာ ၈ နှစ်ကြာပြီဖြစ်တဲ့ ဘရာဇီးလ်ဂိုးသမား အီဒါဆန်နဲ့ ယှဉ်ပြိုင်ရမှာပါ။ 

ဂါလာတာစာရေးအသင်းရဲ့ စိတ်ဝင်စားမှုတွေ ခံနေရတဲ့ အီဒါဆန်ဟာ လာမယ့်ရာသီကုန်ရင် မန်စီးတီးအသင်းနဲ့ စာချုပ်ကုန်ဆုံးပြီဖြစ်ပါတယ်။ 

Source: ESPN

CNI Sport News

၂၀၂၅ ခုနှစ်၊ ဇူလိုင် ၃၀

စပါးအသင်းနည်းပြ သောမတ်စ်ဖရန့်ခ်က ဟောင်ကောင်မှာ ကစားမယ့် စပါးနဲ့အာဆင်နယ် အသင်းတို့ရဲ့ မြောက်လန်ဒန် ဒါဘီပွဲစဉ်ဟာ ခြေစမ်းပွဲထက် ပိုတယ်ဆိုပြီး အာဆင်နယ်အသင်းကို သတိပေးခဲ့ပါတယ်။

သောမတ်စ်ဖရန့်ခ်က “ကျနော်တို့ရဲ့ အကြီးမားဆုံး ပြိုင်ဘက်နဲ့ ကြီးမားတဲ့ စိန်ခေါ်မှု ဖြစ်မယ်လို့ ထင်ပါတယ်။ သူတို့ဟာ လက်ရှိအချိန်မှာ ကမ္ဘာ့အကောင်းဆုံး အသင်းတွေထဲက တစ်သင်းလို့ ပြောရမှာဖြစ်ပြီး ဒါကို ကျနော်တို့ ရိုးသားဖို့ လိုပါတယ်။ ဒါက ကြီးမားတဲ့ စမ်းသပ်မှု ဖြစ်လာမှာဖြစ်ပေမယ့် ခြေစမ်းပွဲထက် ပိုပါတယ်။ ကျနော်တို့ အနိုင်ရရှိဖို့ ကြိုးစားသွားမယ်”လို့ ပြောခဲ့တာပါ။ 

ဇူလိုင် ၃၁ ရက်မှာ ကစားမယ့် ဒီပွဲစဉ်ဟာ ဗြိတိန်အပြင်ဘက်မှာ သူတို့နှစ်သင်း ပထမဆုံးအကြိမ် ထိပ်တိုက် တွေ့ဆုံမယ့် ပွဲစဉ်လည်း ဖြစ်ပါတယ်။

စပါးနဲ့အာဆင်နယ်အသင်းတို့ဟာ ထိပ်တိုက်တွေ့ဆုံတိုင်း ပြိုင်ဆိုင်မှု ပြင်းထန်တာကြောင့် ခြေစမ်းပွဲဖြစ်မယ့် ဒီပွဲကလည်း ပြိုင်ဆိုင်မှု ပြင်းထန်မယ်လို့ နည်းပြသောမတ်စ်ဖရန့်ခ်က ပြောခဲ့တာပါ။ 

နည်းပြ သောမတ်စ်ဖရန့်ခ်ကို တွေ့ရစဉ် 

စပါးအသင်း နောက်ခံလူ ဗန်ဒီဗန်က ဒီပွဲမှာ သူတို့ရဲ့ ပရိသတ်တွေလည်း အများကြီးရှိမှာ ဖြစ်တဲ့အတွက် သူတို့ကို ပျော်ရွှင်အောင် လုပ်ပေးနိုင်ဖို့ မျှော်လင့်တယ်လို့ ပြောခဲ့ပါတယ်။

စပါးအသင်းဟာ ရာသီသစ်မှာ အောင်မြင်မှု ရယူနိုင်ဖို့အတွက် ဘရန်ဖို့ဒ်အသင်း နည်းပြဟောင်း သောမတ်စ်ဖရန့်ခ် ကို နည်းပြသစ်အဖြစ် ခန့်အပ်ထားပြီး ဒန်ဆိုနဲ့မာသီးတဲလ်စ်ကို အပြီးသတ် ခေါ်ယူခဲ့သလို ဝက်စ်ဟမ်းအသင်းက ကူဒက်စ်ကိုလည်း အားဖြည့်ထားတာပါ။ 

စပါးအသင်းဟာ ရာသီကြို ခြေစမ်းပွဲတွေအဖြစ် ရက်ဒင်း၊ ဝိုင်ကမ်ဘီ၊ လူတန်အသင်းတို့နဲ့ ယှဉ်ပြိုင်ထားပြီး ၁ ပွဲနိုင်၊ ၂ ပွဲသရေ ကျထားပါတယ်။ 

စပါးအသင်း ခေါင်းဆောင် ဆွန်ဟောင်မင်ဟာ မေဂျာလိဂ် ကလပ်တွေရဲ့ ချိတ်ဆက်မှုတွေ ခံနေရပြီး အနာဂတ် မရေမရာဖြစ်နေပေမယ့် နည်းပြသောမတ်စ်ဖရန့်ခ်က သူဟာ အသင်းနဲ့အတူ ရှိနေတဲ့အတွက် ပျော်ရွှင်တယ်လို့ ပြောခဲ့ပါတယ်။ 

စပါးအသင်းဟာ အာဆင်နယ်အသင်းနဲ့ပွဲပြီးရင် နယူးကာဆယ်၊ ဘိုင်ယန်မြူးနစ်အသင်းတို့နဲ့ ခြေစမ်းပွဲ ဆက်ပြီး ယှဉ်ပြိုင်သွားမှာ ဖြစ်ပါတယ်။ 

Source: Dailymail