CNI Sport News

၂၀၂၅ ခုနှစ်၊ ဖေဖော်ဝါရီ ၇

ကာရာဘောင်းလိဂ်ဖလားပြိုင်ပွဲရဲ့ လက်ရှိချန်ပီယံ လီဗာပူးလ်အသင်းဟာ စပါးအသင်းကို ဆီမီးဖိုင်နယ် ဒုတိယ အကျော့ပွဲစဉ်မှာ ၄ ဂိုး-ဂိုးမရှိနဲ့ ဂိုးပြတ်အနိုင်ရပြီး ချန်ပီယံဆုကာကွယ်ဖို့အတွက် ဗိုလ်လုပွဲကို တက်နိုင်ခဲ့ပါတယ်။ 

လီဗာပူးလ်အသင်းဟာ ကာရာဘောင်းလိဂ်ဖလား ဆီမီးဖိုင်နယ် ပထမအကျော့ပွဲစဉ်မှာ စပါးအသင်းကို ၁ ဂိုး-ဂိုး မရှိနဲ့ အရေးနိမ့်ခဲ့ပေမယ့် ဒုတိယအကျော့ပွဲစဉ်မှာ ဂိုးပြတ်အနိုင်ရရှိခဲ့တာကြောင့် နှစ်ကျော့ပေါင်းရလဒ် ၄ ဂိုး-၁ ဂိုးနဲ့ အနိုင်ရရှိခဲ့တာပါ။ 

ဒုတိယအကျော့ပွဲစဉ်မှာ လီဗာပူးလ်အသင်းအတွက် ဂိုးတွေကို ဂတ်ပို၊ ဆာလက်၊ ဆိုဘို့ဆလိုင်းနဲ့ ဗန်ဒိုက်တို့က သွင်းယူခဲ့တာ ဖြစ်ပါတယ်။

လီဗာပူးလ်အသင်းဟာ ဗိုလ်လုပွဲမှာ အာဆင်နယ်အသင်းကို အနိုင်ရရှိခဲ့တဲ့ နယူးကာဆယ်အသင်းနဲ့ ယှဉ်ပြိုင် ရမှာပါ။ 

လီဗာပူးလ်အသင်းဟာ ပရီးမီးယားလိဂ်ပြိုင်ပွဲမှာ ထိပ်ဆုံးနေရာ ဦးဆောင်နေပြီး ချန်ပီယံလိဂ်ပြိုင်ပွဲမှာ ၁၆ သင်း အဆင့်၊ FA ဖလားပြိုင်ပွဲမှာ စတုတ္ထအဆင့် ယှဉ်ပြိုင်ရမှာဖြစ်လို့ ဒီရာသီဆုဖလား ၄ လုံးရယူနိုင်မယ့် လမ်းကြောင်း ပေါ်မှာ ရှိနေတာဖြစ်ပါတယ်။ 

ပြီးခဲ့တဲ့နွေရာသီက လီဗာပူးလ်အသင်းကို နည်းပြသစ်အဖြစ် စတင်ကိုင်တွယ်ခဲ့တဲ့ ဒတ်ချ်လူမျိုးနည်းပြ အာနီဆလော့ဟာ အင်္ဂလိပ်ဘောလုံးလောကမှာ သူ့ရဲ့ပထမဆုံး ဗိုလ်လုပွဲကို ကိုင်တွယ်ရတော့မှာပါ။

စပါးနဲ့လီဗာပူးလ် ယှဉ်ပြိုင်နေစဉ်

အာနီဆလော့က “ကျနော်တို့ရဲ့ စွမ်းဆောင်ရည်က ကျနော့်ကို အကျေနပ်ဆုံးပါပဲ။ ဗိုလ်လုပွဲကို ရောက်ရှိတာက ဒီကလပ်အတွက်တောင် အမြဲတမ်း ထူးခြားနေသင့်ပါတယ်။ ကျနော်တို့ဟာ တိုးတက်မှုရှိဖို့ နေ့တိုင်းလုပ်ဆောင်နေ ပါတယ်။ ဒါပေမယ့် ဗိုလ်လုပွဲတွေ ကစားဖို့ကလည်း ကျနော်တို့ရဲ့လုပ်ဆောင်မှုတွေမှာ ပါဝင်
တယ်”လို့ ပြောခဲ့ တာပါ။ 

ကလပ်အသင်း တစ်သင်းကို နည်းပြတဲ့ ဒုတိယရာသီမှာ ဆုဖလားတွေ ရယူပေးနိုင်ခဲ့တဲ့ စပါးအသင်းနည်းပြ ပိုစတီကိုဂလူး အတွက်တော့ ကာရာဘောင်းဖလား ပြိုင်ပွဲကနေ ထွက်ခွာခဲ့ရတာဟာ စိတ်ပျက်စရာ ဖြစ်ခဲ့ရပါ တယ်။ 

ဒါပေမယ့် စပါးအသင်းဟာ ဒီရာသီမှာ ရယူနိုင်စရာ ဆုဖလားအဖြစ် FA ဖလားနဲ့ ယူရိုပါလိဂ်ဖလား ကျန်ရှိနေ သေးတာပါ။ 

ပိုစတီကိုဂလူးဟာ ပွဲအပြီးမှာ လီဗာပူးလ်အသင်းကို ချီးကျူးမှုတွေပြုလုပ်ခဲ့ပါတယ်။ 

လာမယ့် FA ဖလားစတုတ္ထအဆင့် ပွဲတွေအဖြစ် လီဗာပူးလ်အသင်းက ပလိုင်းမောက်အသင်း၊ စပါးအသင်းက အက်စတွန်ဗီလာအသင်းတို့နဲ့ အဝေးကွင်းပွဲစဉ်တွေ ယှဉ်ပြိုင်ရမှာဖြစ်ပါတယ်။ 

Source: ESPN

CNI Sport News

၂၀၂၅ ခုနှစ်၊ ဖေဖော်ဝါရီ ၆

အင်တာမိုင်ယာမီအသင်းနည်းပြ မာရှေယာနိုက ပေါ်တူဂီအသင်းခေါင်းဆောင် ရော်နယ်ဒိုက သူဟာ အချိန်တိုင်းရဲ့ အကောင်းဆုံး ကစားသမား(GOAT)ဖြစ်တယ်လို့ ပြောဆိုမှုကို တုန့်ပြန်ခဲ့ပါတယ်။ 

မာရှေယာနိုက “ဒါတွေက ထင်မြင်ချက်တွေပါ။ ကျနော်ဟာ ရော်နယ်ဒိုကို လေးစားမှု အများကြီးရှိပြီး သူ့ရဲ့ ထင်မြင်ချက်ကို သုံးသပ်ဖို့ မလိုပါဘူး။ ဒါတွေက သူ့ရဲ့ထင်မြင်မှုပါ။ ကျနော်တို့မှာ ကိုယ်ပိုင်အတွေးအမြင်ရှိပြီး ဒါက မဟုတ်ပါဘူး။ တခြားတော့ ဘာမှမရှိပါဘူး”လို့ BBC Match of the Day ရဲ့မေးမြန်းမှုကို ဖြေခဲ့တာပါ။ 

ရော်နယ်ဒိုနဲ့ မက်ဆီတို့အကြားမှာ GOAT ပြောဆိုမှုဟာ နှစ်ပေါင်းများစွာ ကြာရှိနေခဲ့တာဖြစ်ပါတယ်။ 

မာရှေယာနိုကို တွေ့ရစဉ်

ရော်နယ်ဒိုဟာ မကြာသေးခင်က ပြုလုပ်ခဲ့တဲ့ အင်တာဗျူးမှာ သူက မက်ဆီ၊ မာရာဒိုနာ၊ ပီလီတို့ထက် ပြီးပြည့်စုံတဲ့ အကောင်းဆုံး ဘောလုံးသမား ဖြစ်တယ်လို့ ပြောခဲ့တာပါ။

အယ်လ်နာဆာအသင်းခေါင်းဆောင် ရော်နယ်ဒိုက သူဟာ ခြေထောက်နှစ်ဖက်စလုံးနဲ့ ဂိုးသွင်းနိုင်ကြောင်း၊ မြန်ပြီး သန်မာသလို ခုန်တဲ့နေရာမှာလည်း ကောင်းမွန်တဲ့သူ ဖြစ်တယ်လို့ ပြောခဲ့တာဖြစ်ပါတယ်။ 

ရော်နယ်ဒိုရဲ့ ဒီပြောဆိုမှုဟာ ဝေဖန်မှုတွေ အများကြီးရှိခဲ့သလို သူ့ကိုအားပေးကြတဲ့ ပရိသတ်တွေကလည်း ထောက်ခံခဲ့ကြတာပါ။

မာရှေယာနိုကတော့ သူ့အတွက် GOAT ဟာ ဘာစီလိုနာနဲ့ အာဂျင်တီးနား အသင်းဖော်ဟောင်းဖြစ်တဲ့ မက်ဆီလို့ သတ်မှတ်ထားတာ ဖြစ်ပါတယ်။ 

မာရှေယာနိုဟာ လက်ရှိအချိန်မှာ အင်တာမိုင်ယာမီအသင်းကို ရာသီကြို ခြေစမ်းပွဲတွေအတွက် ပြင်ဆင်နေပြီး ခြေစမ်းပွဲ ၃ ပွဲ ကစားထားတာမှာ ၁ ပွဲကို ပွဲချိန်အတွင်း အနိုင်ရရှိခဲ့ပြီး ကျန် ၂ ပွဲကို ပင်နယ်တီ အဆုံးအဖြတ်နဲ့ အနိုင်ရရှိခဲ့တာပါ။ 

အင်တာမိုင်ယာမီအသင်းဟာ နောက်ထပ် ခြေစမ်းပွဲအဖြစ် ဖေဖော်ဝါရီ ၉ ရက်မှာ အိုလင်ပီယာအသင်းနဲ့ ဟွန်ဒူးရပ်စ်မှာ ယှဉ်ပြိုင်သွားမှာဖြစ်ပါတယ်။ 

Source: Goal

CNI Sport News

၂၀၂၅ ခုနှစ်၊ ဖေဖော်ဝါရီ ၆

ဆော်ဒီပရိုလိဂ်ကလပ် အယ်လ်ဟီလယ်အသင်းနဲ့ စာချုပ်ဖျက်သိမ်းခဲ့ပြီး မကြာသေးခင် ရက်ပိုင်းကမှ ငယ်ဘဝ ကလပ် ဆန်းတို့စ်အသင်းနဲ့ စာချုပ်ချုပ်ခဲ့တဲ့ နေမာဟာ ဆန်းတို့စ်အသင်းအတွက် ၁၂ နှစ်အကြာမှာ ပထမဆုံးပွဲကို ပြန်ကစားနိုင်ခဲ့ပါတယ်။ 

နေမာဟာ ဆန်းတို့စ်အသင်းနဲ့ ဘိုတာဖိုဂိုအသင်းတို့ ၁ ဂိုးစီ သရေကျခဲ့တဲ့ Campeonato Paulista ပြိုင်ပွဲရဲ့ ဒုတိယပိုင်းအစမှာ လူစားလဲဝင်ရောက်ပြီး ပါဝင်ကစားခဲ့တာပါ။ 

ဆန်းတို့စ်အသင်းဟာ ဒီပွဲစဉ်ရဲ့ ပထမပိုင်းမှာ ဦးဆောင်ဂိုး သွင်းယူနိုင်ခဲ့ပေမယ့် ဒုတိယပိုင်းမှာ ဘိုတာဖိုဂိုအသင်း က ချေပဂိုး သွင်းယူနိုင်ခဲ့တဲ့အတွက် သရေနဲ့ ပွဲပြီးဆုံးခဲ့တာ ဖြစ်ပါတယ်။ 

နေမာကတော့ ဆန်းတို့စ်အသင်းအတွက် ပြန်ကစားနိုင်ခဲ့တဲ့ ခံစားချက်ကို ဖော်ပြဖို့ စကားလုံးမရှိဘူးလို့ ပြောခဲ့ သလို ရုပ်ပိုင်းဆိုင်ရာ အကောင်းဆုံး အခြေအနေမှာ မရှိဘူးလို့လည်း ဝန်ခံခဲ့ပါတယ်။ 

နေမာကို တွေ့ရစဉ်

နေမာက “ကျနော် ဆန်းတို့စ်ကို ချစ်ပြီး ကွင်းထဲထပ်ခြေချရတဲ့ ခံစားချက်ကို ဖော်ပြဖို့ စကားလုံးမရှိပါဘူး။ ကျနော်ဟာ ပွဲကစားဖို့နဲ့ မိနစ်တွေရရှိဖို့ လိုအပ်ပါတယ်။ ကျနော်ဟာ ၁၀၀ ရာခိုင်နှုန်း မရှိသေးပါဘူး။ လာမယ့် ၄ ပွဲ ဒါမှမဟုတ် ၅ ပွဲကစားရင် ကျနော်ပိုပြီးကောင်းမယ်လို့ ထင်ကြောင်း”ပြောခဲ့တာပါ။ 

ပြီးခဲ့တဲ့ ဖေဖော်ဝါရီ ၅ ရက်ကမှ အသက် ၃၃ နှစ်ပြည့်ခဲ့တဲ့ နေမာဟာ ဆန်းတို့စ်အသင်းနဲ့ ၆ လ စာချုပ်ချုပ်ခဲ့တာ ဖြစ်ပြီး ဘရာဇီးလ်ကလပ်က သူ့ကို ၂၀၂၆ ကမ္ဘာ့ဖလားပြိုင်ပွဲ အထိရှိနေမယ့် သက်တမ်းတိုးစာချုပ်ချုပ်ဖို့ ဆန္ဒရှိနေပါတယ်။ 

နေမာဟာ ကမ္ဘာ့အကောင်းဆုံး ကစားသမားတွေထဲက တစ်ဦးအဖြစ် သတ်မှတ်ခံခဲ့ရပေမယ့် ပြီးခဲ့တဲ့နှစ်တွေ အတွင်း ဒဏ်ရာနှိပ်စက်မှုတွေကြောင့် သူ့ရဲ့ကစားသမားဘဝဟာ ထိခိုက်မှုတွေရှိခဲ့တာပါ။ 

အဲဒါကြောင့် အယ်လ်ဟီလယ်အသင်းဟာ နေမာကို စာချုပ်မကုန်ဆုံးခင်မှာ စာချုပ်ဖျက်သိမ်းပြီး ထွက်ခွာခွင့် ပေးခဲ့ပါတယ်။

နေမာဟာ သူ့ကိုခေါ်ယူဖို့ မေဂျာလိဂ်ကလပ် အသင်းအချို့က စိတ်ဝင်စားခဲ့ပေမယ့် သူ့ရဲ့ကစားသမားဘဝ ပြန်လည်တည်ဆောက်ဖို့နဲ့ ကမ္ဘာ့ဖလားပြိုင်ပွဲမှာ ဘရာဇီးလ်အသင်းအတွက် ပါဝင်ကစားချင်တဲ့ ရည်ရွယ် ချက်ကြောင့် ငယ်ဘဝကလပ် ဆန်းတို့စ်အသင်းထံ ပြန်လာဖို့ ဆုံးဖြတ်ချက်ချခဲ့တာ ဖြစ်ပါတယ်။ 

Source: ESPN

CNI Sport News

၂၀၂၅ ခုနှစ်၊ ဖေဖော်ဝါရီ ၆

ရီးရယ်လ်အသင်းနည်းပြ အန်ဆယ်လော့တီက လီဂါနက်စ်အသင်းကို ၃ ဂိုး-၂ ဂိုးနဲ့အနိုင်ရခဲ့တဲ့ ကိုပါဒယ်ရေးဖလား ကွာတားဖိုင်နယ်ပွဲစဉ်မှာ ပွဲကိုခြားနားမှုဖြစ်အောင်လုပ်နိုင်ခဲ့တဲ့ လူငယ်ကစားသမားတွေကို ချီးကျူးမှု ပြုလုပ်ခဲ့ ပါတယ်။

အန်ဆယ်လော့တီက “ဒီပွဲမှာ လူငယ်ကစားသမားတွေ လုပ်နိုင်ခဲ့တဲ့အရာကို ကျနော်တို့အလွန် ကျေနပ်ရမှာ ဖြစ်သလို သူတို့ကို ဆက်ပြီးအားကိုးနေရမှာပါ။ သူတို့ဟာ အတွေ့အကြုံနည်းပေမယ့် အခြေခံအားဖြင့် သူတို့ကို လိုအပ်ပါတယ်။ ကျနော်ဟာ အသင်းတစ်သင်းကို ပေါင်းစည်းတဲ့အချိန်မှာ ပွဲကိုအနိုင်ရဖို့ကြိုးစားတဲ့အတွက် လူငယ်အကယ်ဒမီကိုမိနစ်ပေးခဲ့ခြင်းမရှိပါဘူး။ ဒါပေမယ့် ဒီနှစ်မှာတော့ ဒဏ်ရာနဲ့အခြားအချက်တွေကြောင့် သူတို့အခွင့်အရေးရခဲ့ပြီး သူတို့ကလည်း အလွန်ကောင်းမွန်ခဲ့ပါတယ်” လို့ ပြောခဲ့တာပါ။ 

ရီးရယ်လ်အသင်းဟာ အသလက်တီကို၊မန်စီးတီးအသင်းတို့နဲ့ အရေးကြီးပွဲတွေကစားဖို့ရှိတဲ့အတွက် လီဂါနက်စ် အသင်းနဲ့ပွဲစဉ်မှာ အဓိက ကစားသမားအများအပြားကို အနားပေးခဲ့တာဖြစ်ပါတယ်။ 

ရီးရယ်လ်အသင်းဟာ ဒီပွဲမှာ အသက် ၂၁ အရွယ်ရှိ အဆန်စီယို၊၂၀ နှစ်အရွယ်ရှိ ရာမွန်၊၁၉ နှစ်အရွယ်ရှိ ဂူလာနဲ့ ၁၈ နှစ်အရွယ်ရှိ အန်းဒရစ်တို့ကို ပွဲထွက်လူစာရင်းထဲ ထည့်သွင်းအသုံးပြုခဲ့တာပါ။ 

ရီးရယ်လ်အသင်းဟာ ဒီပွဲမှာ အန်းဒရစ်၊မိုဒရစ်တို့ရဲ့သွင်းဂိုးတွေနဲ့ ဦးဆောင်နိုင်ခဲ့ပေမယ့် လီဂါနက်စ်အသင်းအတွက် ခရုဇ်က ချေပဂိုးတွေပြန်သွင်းယူနိုင်ခဲ့ပါတယ်။ 

ရီးရယ်လ်အသင်းအတွက် အနိုင်ဂိုးကို လူစားလဲဝင်ရောက်လာတဲ့ အသက် ၂၀ နှစ်အရွယ်ရှိ အကယ်ဒမီတိုက်စစ်မှူး ဂွန်ဇာလိုဂါစီယာက မိနစ် ၉၀ ပြည့်ပြီးနာကျင်အချိန်ပိုမှာ သွင်းယူခဲ့တာပါ။ 

အဲဒါကြောင့် ရီးရယ်လ်အသင်းဟာ လီဂါနက်စ်အသင်းကို အနိုင်ရပြီး ကိုပါဒယ်ရေးဖလားဆီမီးဖိုင်နယ်ကို တက်နိုင်ခဲ့တာဖြစ်ပါတယ်။ ရီးရယ်လ် အသင်းဟာ လက်ရှိအချိန်မှာ ရူဒီဂါ၊အလာဘာတို့ရဲ့ ဒဏ်ရာတွေကြောင့် ခံစစ်အကျပ်အတည်းနဲ့ ရင်ဆိုင်နေရပြီး လာမယ့်ပွဲတွေမှာ လူငယ်ကစားသမားအချို့ကို ခံစစ်မှာဆက်ပြီး အသုံးပြုသွားရမှာပါ။ 

ရီးရယ်လ်အသင်းနည်းပြ အန်ဆယ်လော့တီက လီဂါနက်စ်အသင်းနဲ့ပွဲမှာ အဓိက ကစားသမားတွေကို ချန်လှပ်ထား ခဲ့တာကြောင့် သူတို့ဟာ လာမယ့်ပွဲမှာ အဆင်သင့်ဖြစ်မယ်လို့ ပြောခဲ့ပါတယ်။ 

ရီးရယ်လ်အသင်းဟာ ဒီတစ်ပတ် လာလီဂါပွဲစဉ်အဖြစ် အသလက်တီကိုအသင်းနဲ့ ယှဉ်ပြိုင်ရမှာဖြစ်ပြီး အဆင့် ၁ နေရာနဲ့ ၂ နေရာမှာရပ်တည်နေတဲ့ သူတို့နှစ်သင်းရဲ့အကြားမှာ ရမှတ် ၁ မှတ်သာကွာဟတာဖြစ်ပါတယ်။ 

Source:ChannelNewsAsia

 CNI Sport News

၂၀၂၅ ခုနှစ်၊ ဖေဖော်ဝါရီ ၆

နယူးကာဆယ်အသင်းဟာ ကာရာဘောင်းလိဂ်ဖလား ဆီမီးဖိုင်နယ် ဒုတိယအကျော့ပွဲစဉ်မှာ အာဆင်နယ်အသင်း ကို ၂ ဂိုး-ဂိုးမရှိနဲ့အနိုင်ရပြီး ဗိုလ်လုပွဲကို တက်နိုင်ခဲ့ပါတယ်။ 

ဒီပွဲမှာ နယူးကာဆယ်အသင်းအတွက် ဂိုးတွေကို မာဖီနဲ့ ဂေါ်ဒွန်တို့က သွင်းယူခဲ့တာပါ။

နယူးကာဆယ်အသင်းဟာ ဆီမီးဖိုင်နယ် ပထမအကျော့ ပွဲစဉ်မှာလည်း အာဆင်နယ်အသင်းကို ၂ ဂိုး-ဂိုးမရှိနဲ့ အနိုင်ရခဲ့တဲ့အတွက် နှစ်ကျော့ပေါင်းရလဒ် ၄ ဂိုး-ဂိုးမရှိနဲ့ အနိုင်ရရှိခဲ့တာ ဖြစ်ပါတယ်။ 

နယူးကာဆယ်အသင်းဟာ ကာရာဘောင်းလိဂ်ဖလား ဗိုလ်လုပွဲကို နောက်ဆုံး ၃ ရာသီအတွင်း ဒုတိယအကြိမ် မြောက် တက်နိုင်ခဲ့တာဖြစ်ပြီး ၂၀၂၃ ခုနှစ်က ဗိုလ်လုပွဲမှာ ယူနိုက်တက်အသင်းကို အရေးနိမ့်ခဲ့တာပါ။ 

နယူးကာဆယ်အသင်းဟာ ၁၉၅၅ ခုနှစ်က FA ဖလားပြိုင်ပွဲမှာ ချန်ပီယံဖြစ်ပြီးကတည်းက အဓိကပြိုင်ပွဲတွေမှာ ဆုဖလားတွေနဲ့ ဝေးကွာနေခဲ့တာ ဖြစ်ပါတယ်။

 နယူးကာဆယ်အသင်းကို တွေ့ရစဉ်

အဲဒါကြောင့် ဒီနှစ် ကာရာဘောင်းဖလားပြိုင်ပွဲမှာ ချန်ပီယံဆုကို ရယူနိုင်ဖို့ မျှော်လင့်နေတာပါ။ 

နယူးကာဆယ်အသင်းနည်းပြ အက်ဒီဟိုဝီက ဒီပွဲက ခက်ခဲတဲ့ပွဲဖြစ်ခဲ့ပေမယ့် သူတို့အတွက် အလွန်ကောင်းမွန်တဲ့ ညဖြစ်ခဲ့ပြီး ဝင်ဘာလေကို ပြန်သွားရတာကောင်းတယ်လို့ ပြောခဲ့ပါတယ်။

အက်ဒီဟိုဝီက “ဝင်ဘာလေကို ပြန်သွားရတာက အလွန်ကြီးမားပါတယ်။ ဒီနှစ်ပြိုင်ပွဲမှာ ဗိုလ်လုပွဲ တက်နိုင်ခဲ့တာ က ကျနော်တို့အတွက် မလွယ်ကူခဲ့ပါဘူး။ ပရီးမီးယားလိဂ် ၄ သင်းနဲ့ ရင်ဆိုင်ခဲ့ရပြီး ခက်ခဲခဲ့ပါတယ်။ ကျနော်တို့ ဟာ နောက်ဆုံးကြုံတွေ့ခဲ့တဲ့ အတွေ့အကြုံတွေကနေ သင်ယူပြီး စွမ်းဆောင်ရည်ကို ပိုပြီးကောင်းအောင်လုပ်နိုင်ဖို့ မျှော်လင့်တယ်”လို့ ပြောခဲ့တာပါ။ 

အာဆင်နယ်အသင်းနည်းပြ အာတီတာက ဆုဖလားတစ်လုံး လက်လွှတ်ခဲ့ရပေမယ့် နောက်ထပ် ဆုဖလား ပစ်မှတ်တွေအတွက် အားအင်တွေ ပြန်ဖြည့်ရမယ်လို့ ပြောခဲ့ပါတယ်။ 

အာဆင်နယ်အသင်းဟာ FA ဖလားပြိုင်ပွဲကနေ ထွက်ခွာထားရလို့ သူတို့အတွက် ဒီရာသီမှာ ရယူနိုင်စရာ ဆုဖလား အဖြစ် ပရီးမီးယားလိဂ်နဲ့ ချန်ပီယံလိဂ်ပြိုင်ပွဲသာ ရှိတော့တာပါ။ 

အာဆင်နယ်အသင်းဟာ လာမယ့် ရက်ပိုင်းအတွင်းမှာ ဒူဘိုင်းကို သွားရောက်ပြီး အသင်းလိုက် စုဖွဲ့လေ့ကျင့်မှုတွေ ပြုလုပ်သွားဖို့ရှိနေတာ ဖြစ်ပါတယ်။ 

Source: ESPN

CNI Sport News

၂၀၂၅ ခုနှစ်၊ ဖေဖော်ဝါရီ ၅

ယူနိုက်တက်အသင်း နောက်ခံလူဟောင်း ဂယ်ရီနဗီးလ်က အသင်းဟာ နည်းပြဟောင်း အဲရစ်တန်ဟတ် လက်ထက်ကထက် လက်ရှိနည်းပြ အာမိုရင်လက်ထက်မှာ ပိုပြီးဆိုးနေတယ်လို့ ပြောလိုက်ပါတယ်။ 

ဂယ်ရီနဗီးလ်က “အာမိုရင် ရောက်ရှိလာခဲ့တုန်းက ပိုပြီးကောင်းလာမယ်လို့ ကျနော်ထင်ခဲ့တာပါ။ စိတ်အား ထက်သန်မှုနဲ့ စနစ်သစ်ကိုတွေးခဲ့ပြီး သူတို့ဟာ ကစားသမားတွေ ဝယ်ယူကာ ပြန်လာနိုင်တာကို မြင်တွေ့ရမယ်လို့ ထင်ခဲ့ပါတယ်။ ဒါပေမယ့် လုံးဝဆန့်ကျင်ဘက် ဖြစ်နေတာကို တွေ့ခဲ့ရပါတယ်။ အသင်းဟာ ပိုဆိုးရွားလာပြီး အံ့သြ စရာပါပဲ။ ဒီလိုသာ ဆက်သွားရင် ရာသီကုန်ခါနီးမှာ နာကျင်စရာတွေ အများကြီးရှိလာပြီး ထိခိုက်လာနိုင်တယ်”လို့ ပြောခဲ့တာပါ။ 

ယူနိုက်တက်အသင်းဟာ ဒီရာသီအစပိုင်း ရလဒ်ဆိုးရွားမှုတွေကြောင့် ပြီးခဲ့တဲ့နှစ် အောက်တိုဘာလမှာ ဒတ်ချ်လူမျိုးနည်းပြ အဲရစ်တန်ဟတ်ကို ရာထူးကနေ ထုတ်ပယ်ခဲ့တာဖြစ်ပါတယ်။

ယူနိုက်တက်အသင်းဟာ နည်းပြသစ်အဖြစ် စပို့တင်းလစ္စဘွန်းအသင်းကို ဆုဖလားတွေ ရယူပေးနိုင်ခဲ့တဲ့ ပေါ်တူဂီ လူမျိုးနည်းပြ အာမိုရင်ကို ခန့်အပ်ခဲ့တာပါ။ 

ယူနိုက်တက်အသင်းကို တွေ့ရစဉ်

မန်ချက်စတာကလပ်က အာမိုရင်ဟာ သူတို့ကို ရလဒ်ကောင်းတွေ ရယူပေးနိုင်ဖို့ မျှော်လင့်ခဲ့ပေမယ့် ပရီးမီးယားလိဂ်မှာ သူတို့ရဲ့စွမ်းဆောင်ရည်ဟာ ကြီးကြီးမားမား ပြောင်းလဲမှုမရှိခဲ့တာ ဖြစ်ပါတယ်။ 

အာမိုရင်ဟာ ယူနိုက်တက်အသင်းကို တာဝန်ယူပြီး ကတည်းက ပရီးမီးယားလိဂ် အိမ်ကွင်း ၇ ပွဲ ကိုင်တွယ် ထားတာမှာ ၂ ပွဲသာ အနိုင်ရလဒ် ရယူပေးထားတာပါ။ 

ယူနိုက်တက်အသင်းဟာ အာမိုရင် လက်ထက်မှာ ပရီးမီးယားလိဂ် နိုင်ပွဲ ၄ ပွဲသာရထားပြီး အမှတ်ပေးဇယား အဆင့် ၁၃ နေရာမှာ ရပ်တည်နေတာ ဖြစ်ပါတယ်။

အဲဒါကြောင့် ဂယ်ရီနဗီးလ်က အာမိုရင် လက်ထက်မှာ ယူနိုက်တက်အသင်းဟာ ပိုပြီးဆိုးရွားနေတယ်လို့ ပြောခဲ့တာပါ။ 

ယူနိုက်တက်အသင်းဟာ လာမယ့် ဖေဖော်ဝါရီ ၇ ရက်မှာ FA ဖလား စတုတ္ထအဆင့် ပွဲစဉ်အဖြစ် လက်စတာ အသင်းကို အိမ်ကွင်း ယှဉ်ပြိုင်ရမှာဖြစ်ပြီး လက်ရှိချန်ပီယံဆုကို ဆက်ထိန်းသိမ်းချင်ရင် အနိုင်ရလဒ် ရယူဖို့လိုအပ်တာ ဖြစ်ပါတယ်။ 

Source: Goal

CNI Sport News

၂၀၂၅ ခုနှစ်၊ ဖေဖော်ဝါရီ ၅

ဘိုင်ယန်မြူးနစ်အသင်းဟာ ရီးရယ်လ်အသင်းရဲ့ ကာလရှည်ကြာ ပစ်မှတ်ဖြစ်နေတဲ့ ဘယ်နောက်ခံလူ အယ်လ်ဖွန်ဆိုဒေးဗီးစ်ကို စာချုပ်သက်တမ်းတိုးဖို့ သဘောတူညီမှု ရရှိခဲ့တယ်လို့ ကြေညာခဲ့ပါတယ်။ 

ဘိုင်ယန်မြူးနစ်အသင်းဟာ အသက် ၂၄ နှစ်အရွယ်ရှိ အယ်လ်ဖွန်ဆိုဒေးဗီးစ်ကို ၂၀၃၀ ခုနှစ် ရာသီအကုန်ထိ စာချုပ် သက်တမ်းတိုးခဲ့တာပါ။

အယ်လ်ဖွန်ဆိုဒေးဗီးစ်အနေနဲ့ စာချုပ်ကုန်ဆုံးတဲ့အထိ ဆက်ရှိမယ်ဆိုရင် ဂျာမနီကလပ်မှာ ကစားတာ ၁၁ နှစ်ကြာ ရှိသွားမှာဖြစ်ပါတယ်။

ကနေဒါနောက်ခံလူဟာ ၂၀၁၈ ခုနှစ်ကတည်းက ဘိုင်ယန်မြူးနစ်အသင်းကို ရောက်ရှိလာခဲ့ပြီး ၂၀၁၉ ခုနှစ်မှာ အသင်းကြီးအတွက် စတင်ပွဲထွက်ခွင့်ရရှိခဲ့တာပါ။ 

အယ်လ်ဖွန်ဆိုဒေးဗီးစ်က “ဘိုင်ယန်မြူးနစ်အသင်းနဲ့ စာချုပ်သက်တမ်း တိုးခွင့်ရလို့ ကျနော် အလွန်ပျော်ပါတယ်။ ကျနော်ဟာ အသက် ၁၈ နှစ်အရွယ်မှာ ဘိုင်ယန်မြူးနစ်ကို ရောက်ရှိလာခဲ့ပြီး ကျနော်ကစားတဲ့ နေရာမှာ အကောင်းဆုံးတွေထဲက တစ်ဦးဖြစ်လာဖို့ နေ့တိုင်း သင်ယူချင်ခဲ့ပါတယ်။ အခုနောက်ထပ် ၅ နှစ် အတူရှိရတော့မှာ ဖြစ်ပြီး အောင်မြင်မှု အများကြီး ရယူထားပေမယ့် နောက်ထပ်ရယူချင်သေးတယ်”လို့ ပြောခဲ့ပါတယ်။ 

အယ်လ်ဖွန်ဆိုဒေးဗီးစ်ကို တွေ့ရစဉ်

ရီးရယ်လ်အသင်းဟာ အယ်လ်ဖွန်ဆိုဒေးဗီးစ်ကို ပြီးခဲ့တဲ့ နွေရာသီကတည်းက ခေါ်ယူချင်ခဲ့ပေမယ့် အဆင်မပြေခဲ့ တာကြောင့် ဘိုင်ယန်မြူးနစ်အသင်းနဲ့ စာချုပ်ကုန်ဆုံးမယ့် ဒီနွေရာသီမှာ အလွတ်နဲ့ခေါ်ယူနိုင်ဖို့ ကြိုးပမ်းခဲ့တာပါ။ 

ဒါပေမယ့် ဘိုင်ယန်မြူးနစ်အသင်းရဲ့ စာချုပ်သက်တမ်းတိုးမှုကြောင့် အယ်လ်ဖွန်ဆိုဒေးဗီးစ်ကို ခေါ်ယူချင်တဲ့ ရီးရယ်လ်အသင်းရဲ့ မျှော်လင့်ချက်တွေ ထိခိုက်ခဲ့တာဖြစ်ပါတယ်။ 

ရီးရယ်လ်အသင်းဟာ နွေရာသီမှာ လီဗာပူးလ်အသင်းနဲ့ စာချုပ်ကုန်ဆုံးမယ့် အာနိုးလ်ကို အလွတ်နဲ့ခေါ်ယူနိုင် ဖို့လည်း ထပ်ပြီးပစ်မှတ်ထားနေတာပါ။ 

အယ်လ်ဖွန်ဆိုဒေးဗီးစ်ဟာ ဘိုင်ယန်မြူးနစ်အသင်းအတွက် ပွဲပေါင်း ၂၂၀ ပါဝင်ကစားထားပြီး ၁၂ ဂိုးသွင်းယူကာ ဘွန်ဒက်လီဂါဖလား ၅ ကြိမ်၊ ချန်ပီယံလိဂ်ဖလား ၁ ကြိမ် အပါအဝင် ဆုဖလားပေါင်း ၁၃ လုံး ရယူထားတာ ဖြစ်ပါတယ်။

Source: ESPN

CNI Sport News

၂၀၂၅ ခုနှစ်၊ ဖေဖော်ဝါရီ ၅

ချယ်လ်ဆီးအသင်း ကွင်းလယ်တိုက်စစ် ကစားသမား ဂျာအိုဖီးလစ်ဟာ ဒီရာသီအကုန်ထိ စီးရီးအေကလပ် အေစီမီလန်အသင်းထံ အငှားနဲ့ပြောင်းရွှေ့ခဲ့ပါတယ်။ 

အေစီမီလန်အသင်းဟာ ဂျာအိုဖီးလစ်အတွက် ချယ်လ်ဆီးအသင်းကို အငှားခေါ်ယူကြေး ပေါင် ၅ သန်းပေးခဲ့ရပြီး သူ့ရဲ့လုပ်ခလစာကိုလည်း အပြည့်အဝ ပေးချေရမှာပါ။ 

ဒါပေမယ့် အေစီမီလန်အသင်းဟာ အငှားစာချုပ် ကုန်ဆုံးချိန်မှာ ဂျာအိုဖီးလစ်ကို အပြီးသတ်ဝယ်ယူဖို့အတွက် ရွေးချယ်ခွင့်မရှိတာ ဖြစ်ပါတယ်။

ပြီးခဲ့တဲ့နွေရာသီက အသလက်တီကိုအသင်းကနေ ပြောင်းရွှေ့လာခဲ့ပြီး ချယ်လ်ဆီးအသင်းနဲ့ ၇ နှစ် စာချုပ်ချုပ်ခဲ့တဲ့ ဂျာအိုဖီးလစ်ဟာ လန်ဒန်ကလပ်မှာ ပွဲကစားခွင့်ရရှိဖို့ ရုန်းကန်ခဲ့ရတာပါ။ 

ဂျာအိုဖီးလစ်ဟာ ဒီရာသီ ပရီးမီးယားလိဂ်ပြိုင်ပွဲမှာ ၃ ပွဲသာ ပွဲထွက်လူစာရင်း ပါဝင်ခဲ့ရပြီး ဖလားပြိုင်ပွဲတွေမှာသာ အဓိက ကစားနေရတဲ့အတွက် ပွဲကစားချိန် ပိုပြီးလိုချင်ခဲ့တာဖြစ်ပါတယ်။ 

ဇန်နဝါရီအပြောင်းအရွှေ့မှာ ဂျာအိုဖီးလစ်ကို ခေါ်ယူဖို့ အက်စတွန်ဗီလာအသင်း အပါအဝင် အသင်းအချို့က စိတ်ဝင်စားခဲ့ပေမယ့် ကစားသမားဟာ အေစီမီလန်အသင်းထံ အငှားနဲ့ပြောင်းရွှေ့ခဲ့တာပါ။ 

အေစီမီလန်အသင်းကို တွေ့ရစဉ်

အသက် ၂၅ နှစ်အရွယ်ရှိ ဂျာအိုဖီးလစ်ဟာ ဒီရာသီမှာ ချယ်လ်ဆီးအသင်းအတွက် ပွဲပေါင်း ၂၀ ပါဝင်ကစားခဲ့ပြီး ၇ ဂိုး သွင်းယူထားပါတယ်။ 

အေစီမီလန်အသင်းဟာ ဇန်နဝါရီအပြောင်းအရွှေ့မှာ ဂျာအိုဖီးလစ် အပါအဝင် ကစားသမား ၅ ဦးအထိ ခေါ်ယူထားပြီး ပေါ်တူဂီကစားသမားဟာ မန်စီးတီးအသင်းကနေ အငှားနဲ့လာရောက်ကစားနေတဲ့ ဝေါ်လ်ကာနဲ့ တစ်သင်းတည်း အတူတွဲကစားရတော့မှာပါ။

ဘင်ဖီကာအသင်းမှာ ကစားသမားဘဝ စတင်ခဲ့တဲ့ ဂျာအိုဖီးလစ်ဟာ ၂၀၁၉ ခုနှစ်က အသလက်တီကိုအသင်းထံ ပေါင် ၁၁၃ သန်းနဲ့ ပြောင်းရွှေ့ခဲ့ပြီး နောက်ပိုင်းမှာ ချယ်လ်ဆီး၊ ဘာစီလိုနာအသင်းတွေထံ အငှားနဲ့ကစားခဲ့ရတာ ဖြစ်ပါတယ်။ 

အေစီမီလန်အသင်းဟာ ဒီရာသီ စီးရီးအေပြိုင်ပွဲမှာ အမှတ်ပေးဇယား အဆင့် ၈ နေရာမှာ ရပ်တည်နေတာကြောင့် ဂျာအိုဖီးလစ်အနေနဲ့ အသင်းကို အမှတ်ပေးဇယား အထက်ပိုင်းတက်နိုင်အောင် ကူညီပေးရတော့မှာပါ။ 

အေစီမီလန်အသင်းဟာ ချန်ပီယံလိဂ်ပြိုင်ပွဲမှာ ပလေးအော့ဖ်အဖြစ် ဖီယင်နုအသင်းနဲ့ ယှဉ်ပြိုင်ရဖို့ရှိနေတာလည်း ဖြစ်ပါတယ်။ 

Source: BBC

CNI Sport News

၂၀၂၅ ခုနှစ်၊ ဖေ‌ဖော်ဝါရီ ၅

အာဆင်နယ်အသင်း နည်းပြအာတီတာက အသင်းဟာ ဇန်နဝါရီအပြောင်းအရွှေ့ ဈေးကွက်မှာ ကစားသမားတစ်ဦး မှ ခေါ်ယူနိုင်ခဲ့ခြင်းမရှိလို့ စိတ်ပျက်မိကြောင်း ပြောခဲ့ပါတယ်။ 

အာတီတာက “ကျနော်တို့ဟာ သက်ရောက်မှုရှိနိုင်တဲ့ ကစားသမားတွေနဲ့ လူစာရင်းကို ပိုပြီးတိုးတက်နိုင်မယ့် အခွင့်အလမ်းတွေကို ရှာဖွေဖို့ အပြောင်းအရွှေ့ဖွင့်တဲ့အချိန်မှာ အမြဲတမ်းရှင်းလင်းတဲ့ ရည်ရွယ်ချက်ရှိခဲ့ပါတယ်။ ကျနော်တို့ဟာ ဒါကို မလုပ်နိုင်ခဲ့တဲ့အတွက် စိတ်ပျက်မိပါတယ်။ ဒါပေမယ့် ကျနော်တို့ဟာ အသင်းကို ပိုပြီး ကောင်းမွန်အောင် လုပ်ပေးနိုင်မယ်လို့ ယုံကြည်တဲ့ ကစားသမားမျိုးကိုသာ ခေါ်ယူချင်တယ်ဆိုတာ သိပါတယ်။ 

အချို့သော အကြောင်းပြချက်တွေနဲ့ မလုပ်နိုင်ခဲ့တာကို ကျနော်တို့ လက်ခံရမှာပါ။ ကျနော်တို့ဟာ ရှိနေတဲ့ အဖြစ်မှန်ကို ရင်ဆိုင်ရမယ်လို့ ထင်ကြောင်း”ပြောခဲ့တာပါ။ 

အာဆင်နယ်အသင်းဟာ အဓိက ကစားသမားတွေဖြစ်တဲ့ ဆာကာနဲ့ ဂျီးဆပ်စ်တို့ရဲ့ ဒဏ်ရာတွေကြောင့် ဇန်နဝါရီ အပြောင်းအရွှေ့မှာ တိုက်စစ်ပိုင်းကို အားဖြည့်ဖို့ လိုအပ်မှုတွေရှိခဲ့တာ ဖြစ်ပါတယ်။

အာဆင်နယ်အသင်းကို တွေ့ရစဉ်

ဒါပေမယ့် အာဆင်နယ်အသင်းဟာ အပြောင်းအရွှေ့ပိတ်ချိန်မှာ ကစားသမားတစ်ဦးမှ ခေါ်ယူနိုင်ခဲ့ခြင်းမရှိတာပါ။ 

နည်းပြအာတီတာ ကိုယ်တိုင်က တိုက်စစ်ကစားသမားအသစ် ခေါ်ယူချင်တယ်လို့ ရှင်းရှင်းလင်းလင်း ပြောခဲ့ပေ မယ့် အသင်းဘက်က အပြောင်းအရွှေ့ဖြစ်အောင် လုပ်ပေးနိုင်ခဲ့ခြင်းမရှိပါဘူး။ 

အာဆင်နယ်အသင်းဟာ အင်္ဂလန်တိုက်စစ်မှူး ဝက်ကင်စ်ကို ခေါ်ယူဖို့ ပေါင်သန်း ၄၀ နဲ့ ကမ်းလှမ်းမှု ပြုလုပ်ခဲ့ ပေမယ့် အက်စတွန်ဗီလာအသင်းဟာ တိုက်စစ်မှူး ဒူရန်ကို အယ်လ်နာဆာအသင်းထံ ရောင်းချခဲ့လို့ ဒီကမ်းလှမ်းမှု ကို ပယ်ချခဲ့ပါတယ်။

ဒါအပြင် အာဆင်နယ်အသင်းဟာ စပါးအသင်းထံ ရောက်ရှိသွားခဲ့တဲ့ မာသီးတဲလ်ကို ခေါ်ယူဖို့ ကြိုးစားမှုကနေ လည်း ထွက်ခွာခဲ့တာပါ။

အာဆင်နယ်အသင်းဟာ တိုက်စစ်ကစားသမား မခေါ်ယူနိုင်ခဲ့ပေမယ့် နောက်ဆုံးကစားခဲ့တဲ့ ပရီးမီးယားလိဂ် ပွဲစဉ်မှာ မန်စီးတီးအသင်းကို ၅ ဂိုး-၁ ဂိုးနဲ့ ဂိုးပြတ်အနိုင်ရရှိခဲ့ပါတယ်။ 

အာဆင်နယ်အသင်းဟာ ဖေဖော်ဝါရီ ၆ ရက် မနက်ပိုင်းမှာ ကာရာဘောင်းဖလား ဆီမီးဖိုင်နယ် ဒုတိယအကျော့ ပွဲစဉ်အဖြစ် နယူးကာဆယ်အသင်း အိမ်ကွင်းသွားရောက် ယှဉ်ပြိုင်ရမှာပါ။

အာဆင်နယ်အသင်းဟာ ပထမအကျော့က ၂ ဂိုး-ဂိုးမရှိနဲ့ အရေးနိမ့်ခဲ့တာကြောင့် ဗိုလ်လုပွဲ တက်နိုင်ဖို့ဆိုရင် ဂိုးပြတ်နိုင်ပွဲ ရယူနိုင်ဖို့လိုအပ်တာ ဖြစ်ပါတယ်။ 

Source: Goal