CNI Sport News
၂၀၂၅ ခုနှစ်၊ ဒီဇင်ဘာ ၂၂
ယူနိုက်တက်အသင်းနည်းပြအာမိုရင်က အက်စတွန်ဗီလာအသင်းကို ၂ ဂိုး-၁ ဂိုးနဲ့ အရေးနိမ့်ခဲ့တဲ့ ပရီးမီးယားလိဂ်ပွဲမှာ အသင်းဟာ ပိုကောင်းတဲ့အသင်းဖြစ်ခဲ့ပေမယ့် ကံမကောင်းခဲ့ဘူးလို့ ပြောခဲ့ပါတယ်။
အာမိုရင်က “ဒီပွဲမှာ ကျနော်တို့က ပိုကောင်းတဲ့အသင်းလို့ ကျနော်ထင်ပါတယ်။ ဘရူနိုဒဏ်ရာရသွားတာနဲ့အတူ ကျနော်တို့ကံမကောင်းခဲ့ပါဘူး။ ဒါပေမယ့် သူမပါဘဲနဲ့တောင် ပွဲအတွင်းမှာ ကျနော်တို့က ပိုကောင်းတဲ့အသင်းပါ။ ကျနော်တို့ဟာ အလွန်ကောင်းမွန်တဲ့အလုပ်ကို လုပ်ခဲ့ပေမယ့် အရေးကြီးတာကတော့ ရလဒ်ပါပဲ”လို့ ပြောခဲ့ပါတယ်။
ယူနိုက်တက်အသင်းဟာ ဒီပွဲမှာ ဘောလုံးပိုင်ဆိုင်မှု၊ဂိုးပေါက်ကန်သွင်းမှုနဲ့ ဂိုးပေါက်တည့်မှုတို့မှာ အက်စတွန်ဗီလာအသင်းကို အသာရခဲ့ပေမယ့် အဆုံးသတ်ပိုင်းမသေချာမှုတွေကြောင့် ရှုံးပွဲကြုံတွေ့ခဲ့ရပါတယ်။
ဒါ့အပြင် ယူနိုက်တက်အသင်းဟာ ဒီပွဲရဲ့ ပထမပိုင်းမှာ အသင်းခေါင်းဆောင်ဘရူနိုဖာနန်ဒက်စ် ဒဏ်ရာရသွားခဲ့တာကြောင့် ဒုတိယပိုင်းမှာ လီဆန်ဒရိုမာတီနက်ဇ်နဲ့ လူစားလဲခဲ့ရပါတယ်။
ယူနိုက်တက်အသင်းနဲ့ အက်စတွန်ဗီလာအသင်း ယှဉ်ပြိုင်နေစဉ်
ဘရူနိုဖာနန်ဒက်စ်ဟာ ဒဏ်ရာကြောင့် ယူနိုက်တက်အသင်းရဲ့ လာမယ့်ပွဲအချို့ကို လွဲချော်ဖွယ်ရှိနေပြီး နည်းပြအာမိုရင်ကတော့ ဘယ်အရာကိုမှဆင်ခြေအဖြစ်အသုံးပြုလို့ရမှာမဟုတ်တဲ့အတွက် ဒါကိုရင်ဆိုင်ပြီး ပိုသန်မာလာအောင် လုပ်ရမယ်လို့ ပြောခဲ့ပါတယ်။
ယူနိုက်တက်အသင်းဟာ လက်ရှိအချိန်မှာ ဘရူနိုဖာနန်ဒက်စ်အပြင် ဒီလစ်၊မက်ဂွဲယားနဲ့ ကိုဘီမေနူးတို့ကို ဒဏ်ရာကြောင့် အနားပေးထားရပါတယ်။
အဓိက ကစားသမားတွေဖြစ်တဲ့ အမ်ဘူမို၊အာမက်နဲ့ မက်ဇရာအူရီတို့ကိုလည်း အာဖရိကဖလားပြိုင်ပွဲထံ စေလွှတ်ထားရတာကြောင့် ဘရူနိုဖာနန်ဒက်စ်ရဲ့ ဒဏ်ရာဟာ ယူနိုက်တက်အသင်းအတွက် ကြီးမားတဲ့ထိုးနှက်ချက် ဖြစ်ခဲ့ပါတယ်။
ယူနိုက်တက်အသင်းနောက်ခံလူဒါလော့က တခြားကစားသမားတွေအနေနဲ့ အခွင့်အရေးတွေရရှိလာချိန်မှာ သူတို့နဲ့ ထိုက်တန်ကြောင်း ပြသရမယ့်အချိန်ဖြစ်ပြီး အသင်းဟာ အနိုင်ရဖို့နည်းလမ်းတွေရှာဖွေရမယ်လို့ ပြောခဲ့ပါတယ်။
ယူနိုက်တက်အသင်းဟာ လာမယ့်ပရီးမီးယားလိဂ်ပွဲစဉ်အဖြစ် Boxing Day မှာ နယူးကာဆယ်အသင်းနဲ့ ယှဉ်ပြိုင်ရမှာ ဖြစ်ပါတယ်။
