CNI Sport News
၂၀၂၅ ခုနှစ်၊ ဒီဇင်ဘာ ၂၂
ယူနိုက်တက်အသင်းကွင်းလယ်လူဟောင်း မာတစ်က အသင်းဟာ နည်းပြဟောင်းဆိုးလ်ရှားလက်ထက်မှာ တိုးတက်မှုတွေရှိခဲ့တယ်လို့ ယုံကြည်တာကြောင့် သူဟာ အချိန်ပိုပြီးရဖို့ထိုက်တန်တယ်လို့ ပြောခဲ့ပါတယ်။
မာတစ်က “ကျနော်တို့ဟာ သူ့ရဲ့လက်ထက် ပရီးမီးယားလိဂ်မှာ ဒုတိယနဲ့ တတိယနေရာရခဲ့ပါတယ်။ ကျနော်ကတော့ အိုလီဟာ အချိန်ပိုပြီးရဖို့ထိုက်တန်တယ်လို့ထင်ပါတယ်။ သူအပါအဝင် မိုက်ကယ်ကာရစ်နဲ့ မက်ကန်နာတို့ကလည်း အသင်းကို လမ်းကြောင်းမှန်ပေါ်ရောက်ရှိအောင်ပို့ဆောင်ပေးနိုင်ဖို့သွားခဲ့ပါတယ်။
ဒါပေမယ့် အသင်းဟာ အိုလီရဲ့ နောက်ဆုံးရလဒ်တွေပေါ်မူတည်ပြီး ထုတ်ပယ်ဖို့ဆုံးဖြတ်ခဲ့ပါတယ်။
သူဟာ ကလပ်အတွက် မှန်ကန်တဲ့ပရိုဖိုင်နဲ့ အံ့သြစရာကောင်းတဲ့လူတစ်ဦးပါ”လို့ FourFourTwo နဲ့ အင်တာဗျူးမှာ ပြောခဲ့ပါတယ်။
ယူနိုက်တက်အသင်းမှာ ၅ ရာသီကြာရှိခဲ့တဲ့ မာတစ်ဟာ မော်ရင်ဟို ၊ဆိုးလ်ရှား၊ ကာရစ် ၊ရက်ဂ်နစ်တို့ရဲ့ လက်အောက်မှာ ကစားခဲ့ရတာပါ။
မာတစ်ကတော့ ယူနိုက်တက်အသင်းဟာ ဆိုးလ်ရှားကို ထုတ်ပယ်ခဲ့တာမှားယွင်းပြီး အချိန်ပိုပြီးပေးဖို့ ထိုက်တန်တယ်လို့ ခံစားနေရပါတယ်။
နည်းပြဟောင်း ဆိုးလ်ရှားကို တွေ့ရစဉ်
ဆိုးလ်ရှားဟာ ယူနိုက်တက်အသင်းက အိမ်ကွင်းမှာ လီဗာပူးလ်အသင်းကို ၅ ဂိုး-ဂိုးမရှိနဲ့ အရေးနိမ့်ခဲ့တဲ့ပွဲအပါအဝင် နောက်ပိုင်းပွဲတွေမှာ ရလဒ်တွေဆိုးရွားမှုကြောင့် ၂၀၂၁ ခုနှစ်၊နိုဝင်ဘာမှာ နည်းပြရာထူးကနေ ထုတ်ပယ်ခြင်းခံခဲ့ရပါတယ်။
ဆိုးလ်ရှားဟာ သူ့ရဲ့ လက်ထက်မှာ ယူနိုက်တက်အသင်းကို ပရီးမီးယားလိဂ်ပြိုင်ပွဲမှာ အဆင့် ၂ ၊ ၃ နေရာတွေရပ်တည်နိုင်အောင် ကိုင်တွယ်ပေးနိုင်ခဲ့သလို ယူရိုပါလိဂ်ဗိုလ်လုပွဲရောက်ရှိအောင် ပို့ဆောင်ပေးနိုင်ခဲ့တာပါ။
ဆိုးလ်ရှားထုတ်ပယ်ခံရတဲ့ ရာသီမှာ ယူနိုက်တက်အသင်းဟာ ပရီးမီးယားလိဂ်အဆင့် ၆ နေရာနဲ့ ရာသီအဆုံးသတ်ခဲ့ပြီး နောက်ပိုင်းနှစ်တွေမှာ အသင်းဟာ အဆင့် ၃ နဲ့ ၈ နေရာတွေရပ်တည်ခဲ့ပါတယ်။
ယူနိုက်တက်အသင်းဟာ မနှစ်ကရာသီမှာတော့ အဆင့် ၁၅ နဲ့ အဆုံးသတ်ခဲ့ရပြီး ပရီးမီးယားလိဂ်ခေတ်မှာ သူတို့ရဲ့ အဆိုးရွားဆုံးအဆင့်ရပ်တည်မှုဖြစ်ခဲ့ပါတယ်။
