CNI Sport News

၂၀၂၄ ခုနှစ်၊ ဇူလိုင် ၂

ဘယ်လ်ဂျီယံအသင်းဟာ ယူရို ၂၀၂၄ ပြိုင်ပွဲမှာ ပြင်သစ်အသင်းကို အရေးနိမ့်ကာ ၁၆ သင်းအဆင့်ကနေ ထွက်ခွာခဲ့ရပြီးနောက် အသင်းခေါင်းဆောင် ဒီဘရိုင်းက သူ့ရဲ့နိုင်ငံအသင်းအနာဂတ်ကို စဉ်းစားဆုံးဖြတ်ဖို့ စောလွန်းတယ်လို့ ပြောခဲ့ပါတယ်။

ဒီဘရိုင်းက “နိုင်ငံအသင်းအနာဂတ်အတွက်ဖြေဖို့က စောလွန်းပါတယ်။ အလွန်ရှည်လျားတဲ့ ရာသီတစ်ခု ဖြစ်ခဲ့တာကြောင့် ကျနော့်ရဲ့ခန္ဓာကိုယ်ကို အနားပေးဖို့ လိုပါတယ်။ နွေရာသီအပြီးမှာ အနာဂတ်ကို ကျနော် ဆုံးဖြတ်မှာပါ” လို့ သတင်းထောက်တွေရဲ့မေးမြန်းမှုကို ဖြေခဲ့တာပါ။

ဘယ်လ်ဂျီယံအသင်းဟာ ယူရို ၂၀၂၄ ပြိုင်ပွဲ ၁၆ သင်းအဆင့်ပွဲစဉ်မှာ ဗာတွန်ဂန်ရဲ့ကိုယ့်ဂိုးကိုယ်သွင်းယူမှုကြောင့် ပြင်သစ်အသင်းကို ၁ ဂိုး- ဂိုးမရှိနဲ့ အရေးနိမ့်ခဲ့တာဖြစ်ပါတယ်။ 

အသက် ၃၃ နှစ်အရွယ်ရှိ ဒီဘရိုင်းဟာ ဘယ်လ်ဂျီယံ အသင်းနဲ့အတူ ၂၀၁၈ ကမ္ဘာ့ဖလားပြိုင်ပွဲမှာ တတိယနေရာရရှိခဲ့ပေမယ့် ဒီနောက်ပိုင်းမှာ ဘယ်လ်ဂျီယံအသင်းဟာ ဘယ်ပြိုင်ပွဲကိုမှ ဆီမီးဖိုင်နယ်အဆင့်ထိ ရောက်ခဲ့ခြင်းမရှိတော့တာပါ။ 

ဒီဘရိုင်းဟာ ဘယ်လ်ဂျီယံအသင်းရဲ့ ရှုံးပွဲ ကြောင့် စိတ်ပျက်နေပေမယ့် နိုင်ငံအသင်းအနာဂတ်ကို ဆုံးဖြတ်ရခြင်းမရှိသေးတာဖြစ်ပါတယ်။

ဘယ်လ်ဂျီယံအသင်းအတွက် ပွဲပေါင်း ၁၀၀ ကျော်ပါဝင်ကစားထားတဲ့ ဒီဘရိုင်းဟာ ၂၀၂၆ ကမ္ဘာ့ဖလား ပြိုင်ပွဲ မတိုင်ခင် ယှဉ်ပြိုင်ရမယ့် နေးရှင်းလိဂ်ပွဲစဉ်တွေနဲ့ ခြေစစ်ပွဲတွေမှာ နည်းပြ တီဒက်စ်ကိုရဲ့ အရေးပါတဲ့ အစိတ် အပိုင်းအဖြစ် ဆက်ပြီးရှိနေတာပါ။

တီဒက်စ်ကိုက “ဒါဟာ သူ့အတွက် ဘယ်လောက်အထိအရေးကြီးလဲဆိုတာ သူသိပါတယ်။ ဒါကို သူသိတဲ့အတွက်ကြောင့် ကျနော့်ရဲ့အမြင်ကို မလိုအပ်ပါဘူး။ ပွဲပြီးပြီးချင်းမှာ သူ့ကို ဒီလိုမေးခွန်းမျိုးမေးဖို့က ခက်ခဲပါတယ်”လို့ ဒီဘရိုင်းရဲ့မှတ်ချက်စကားအပေါ် ပြောခဲ့တာဖြစ်ပါတယ်။

ဘယ်လ်ဂျီယံအသင်းဟာ လာမယ့် စက်တင်ဘာမှာ UEFA နေးရှင်းလိဂ်ပွဲစဉ်အဖြစ် အစ္စရေး၊ပြင်သစ်အသင်းတို့နဲ့ ယှဉ်ပြိုင်ရမှာဖြစ်ပါတယ်။ 

Source:ESPN

CNI Sport News

 ၂၀၂၄ ခုနှစ်၊ ဇူလိုင် ၂

ပေါ်တူဂီအသင်းဟာ ယူရို ၂၀၂၄ ပြိုင်ပွဲ ၁၆ သင်းအဆင့်မှာ ဆလိုဗေးနီးယားအသင်းကို ပင်နယ်တီအဆုံးအဖြတ်နဲ့ အနိုင်ရပြီးနောက် အသင်းခေါင်းဆောင် ရော်နယ်ဒိုက အစမှာဝမ်းနည်းမှုက အဆုံးမှာ ပျော်ရွှင်မှုလို့ ပြောခဲ့ပါတယ်။

ရော်နယ်ဒိုက “အစမှာ ဝမ်းနည်းမှုဟာ အဆုံးမှာ ပျော်ရွှင်မှုပါပဲ။ ဘောလုံးဆိုတာ ဒါပါပဲ။ ကျနော့်ရဲ့ ကန်သွင်းချက် က ကောင်းလား၊ ဆိုးလားဆိုတာ မသိပေမယ့် တစ်နှစ်ပတ်လုံးတစ်ကြိမ်မှ မလွဲခဲ့တဲ့ ပင်နယ်တီဟာ ကျနော်အလို အပ်ဆုံးအချိန်မှာ အိုဘလက်ခ် ကာကွယ်နိုင်ခဲ့ပါတယ်။ ဆလိုဗေးနီးယားအသင်းဟာ တစ်ပွဲလုံးနီးပါး ခံစစ်ကစား ခဲ့ပြီး ကျနော်တို့ အနိုင်ရဖို့ ထိုက်တန်ပါတယ်။ အလွန်ခက်ခဲခဲ့ပြီး တစ်သင်းလုံးကို ဂုဏ်ပြုချင်ပါတယ်။ အထူးသဖြင့် ကျနော်တို့ရဲ့ ဂိုးသမားပါ။ သူဟာ အလွန်ကောင်းမွန်တဲ့ ကာကွယ်မှုပြုလုပ်ခဲ့ပါတယ်”လို့ ပြောပါတယ်။

ပေါ်တူဂီနဲ့ ဆလိုဗေးနီးယားအသင်းတို့ဟာ ပွဲချိန်အတွင်း ဂိုးမရှိ သရေကျခဲ့တာကြောင့် အချိန်ပိုဆက်ပြီး ကစားခဲ့ တာမှာလည်း ဂိုးမသွင်းနိုင်ခဲ့တဲ့အတွက် ပင်နယ်တီ အဆုံးအဖြတ် ခံယူခဲ့ရတာ ဖြစ်ပါတယ်။ 

အချိန်ပိုမှာ ပေါ်တူဂီအသင်း ပင်နယ်တီ ရရှိခဲ့ပေမယ့် ရော်နယ်ဒိုရဲ့ ကန်သွင်းမှုကို အိုဘလက်ခ်က ကာကွယ်နိုင်ခဲ့ ပါတယ်။ 

ရော်နယ်ဒိုဟာ ပင်နယ်တီ လွဲချော်ခဲ့တာကြောင့် ငိုကြွေးခဲ့ပြီး အသင်းဖော်တွေက သူ့ကို ဝိုင်းပြီး နှစ်သိမ့်မှုတွေ ပြုလုပ်ခဲ့တာ ဖြစ်ပါတယ်။ 

ပေါ်တူဂီအသင်းသားတွေကိုတွေ့ရစဉ်

ပင်နယ်တီ အဆုံးအဖြတ်မှာတော့ ပေါ်တူဂီအသင်းက ၃ ဂိုးစလုံးဝင်ခဲ့ပြီး ဆလိုဗေးနီးယားအသင်းရဲ့ ကန်သွင်းမှု ၃ ကြိမ်စလုံးကို ပေါ်တူဂီအသင်းဂိုးသမား ကော်စတာ ကာကွယ်သွားနိုင်ခဲ့တာပါ။ 

အဲဒါကြောင့် ပေါ်တူဂီအသင်းဟာ ပင်နယ်တီအဆုံးအဖြတ်မှာ ဆလိုဗေးနီးယားအသင်းကို ၃ ဂိုး- ဂိုးမရှိနဲ့ အနိုင် ရပြီး ယူရို ၂၀၂၄ ပြိုင်ပွဲ ကွာတားဖိုင်နယ်အဆင့်ကို တက်နိုင်ခဲ့တာပါ။ 

ရော်နယ်ဒိုဟာ အချိန်ပိုမှာ ပင်နယ်တီ လွဲခဲ့ပေမယ့် ပင်နယ်တီ အဆုံးအဖြတ်မှာ ဂိုးဝင်အောင် ကန်သွင်းနိုင်ခဲ့တာ ဖြစ်ပါတယ်။ 

ရော်နယ်ဒိုဟာ ယူရို ၂၀၂၄ ပြိုင်ပွဲမှာ သွင်းဂိုးတစ်ဂိုးမှ မရရှိသေးသလို ပင်နယ်တီလည်း လွဲခဲ့ပေမယ့် ပေါ်တူဂီ အသင်းနည်းပြ ရောဘတ်တိုမာတီနက်ဇ်က သူ့ရဲ့တုန့်ပြန်မှုအတွက် ဂုဏ်ယူတယ်လို့ ပြောခဲ့ပါတယ်။

ရောဘတ်တိုမာတီနက်ဇ်က “သူဟာ ပင်နယ်တီ လွဲချော်ခဲ့ပေမယ့် ကျနော်တို့ရဲ့ ပထမဆုံး ပင်နယ်တီ ကန်သွင်းသူ ဖြစ်ခဲ့ပါတယ်။ သူဟာ ပထမဆုံးကန်သွင်းပြီး အနိုင်ရမယ့်လမ်းကို ပြသခဲ့ပါတယ်။ သူ့ရဲ့တုန့်ပြန်မှုက ဥပမာဖြစ်ပြီး ကျနော်တို့ အလွန်ဂုဏ်ယူပါတယ်”လို့ ပြောခဲ့တာပါ။

ပေါ်တူဂီအသင်းဟာ ဆလိုဗေးနီးယားအသင်းကို အနိုင်ရရှိခဲ့တာကြောင့် ယူရို ၂၀၂၄ ပြိုင်ပွဲကွာတားဖိုင်နယ် ပွဲစဉ်အဖြစ် ပြင်သစ်အသင်းနဲ့ ယှဉ်ပြိုင်ရမှာ ဖြစ်ပါတယ်။

Source: DailyMail

CNI Sport News

၂၀၂၄ ခုနှစ်၊ ဇူလိုင် ၁

အီတလီအသင်းဟာ ယူရို ၂၀၂၄ ပြိုင်ပွဲ ၁၆ သင်းအဆင့်မှာ ဆွစ်ဇာလန်အသင်းကို အရေးနိမ့်ပြီး ပြိုင်ပွဲက ထွက်ခွာ ခဲ့ရပေမယ့် နည်းပြ စပယ်လက်တီဟာ စီစဉ်ထားတဲ့အတိုင်း ၂၀၂၆ ခုနှစ်အထိဆက်ရှိမယ်လို့ ဘောလုံးအဖွဲ့ချုပ် ဥက္ကဋ္ဌ ဂရာဗီနာက အတည်ပြုခဲ့ပါတယ်။

ဂရာဗီနာက “ကျနော်နည်းပြနဲ့ စကားအကြာကြီးပြောခဲ့ပြီး နှစ်ရှည်ပရောဂျက်ကို စွန့်လွှတ်ကာ ပြဿနာတွေကို ဖြေရှင်းဖို့ တွေးစရာမဟုတ်ဘူးလို့ထင်ပါတယ်။ ၈ လ၊ ၉ လကြာပြီးနောက် ဒီပရောဂျက်ကို မစွန့်လွှတ်နိုင်ပါဘူး။ ၉ ပွဲ ဒါမှမဟုတ် ၁၀ ပွဲလောက်တာဝန်ယူရတဲ့ နည်းပြဟာ ဒီပရောဂျက်အတွက် အဓိကကျပြီး သူဟာ ကစားသမား တွေအားလုံးကို အမြဲတမ်းမရရှိနိုင်ပါဘူး။ စပယ်လက်တီကို ကျနော်တို့ ယုံကြည်မှုရှိပါတယ်။ စိန်ခေါ်မှုအသစ် ရှိနေပြီဖြစ်လို့ သူအလုပ်လုပ်ရမှာပါ”လို့ သတင်းထောက်တွေကို ပြောခဲ့တာပါ။

ယူရိုပြိုင်ပွဲရဲ့ လက်ရှိချန်ပီယံ အီတလီအသင်းဟာ ၁၆ သင်းအဆင့်မှာ ဆွစ်ဇာလန်အသင်းကို ၂ ဂိုး- ဂိုးမရှိနဲ့ အရေးနိမ့်ကာ ပြိုင်ပွဲကနေ စောစီးစွာထွက်ခွာခဲ့ရတာဖြစ်ပါတယ်။ 

စပယ်လက်တီဟာ ပြီးခဲ့တဲ့နှစ် သြဂုတ်ကမှ ထွက်ခွာသွားတဲ့ နည်းပြ မန်စီနီရဲ့နေရာကို အစားထိုးဝင်ရောက်ပြီး အီတလီအသင်းနည်းပြသစ်အဖြစ် ၂၀၂၆ ခုနှစ် အထိ စာချုပ်ချုပ်ဆိုခဲ့တာပါ။ 

အသက် ၆၅ နှစ်အရွယ်ရှိ စပယ်လက်တီဟာ အီတလီအသင်းကို ၁၄ ပွဲသာကိုင်တွယ် ထားရသေးပြီး ဒီပွဲတွေမှာ ၇ ပွဲနိုင်ပွဲ ရယူပေးထားနိုင်ခဲ့ပါတယ်။

အီတလီဘောလုံးအဖွဲ့ချုပ်ဥက္ကဋ္ဌ ဂရာဗီနာက စီးရီးအေကလပ်အသင်းတွေဟာ အီတလူငယ်ကစားသမားတွေကို လုံလောက်တဲ့ နေရာမပေးတဲ့အတွက် စိုးရိမ်မှုရှိနေတာပါ။ 

အီတလီအသင်းဟာ ယူရို ၂၀၂၀ ပြိုင်ပွဲမှာ ချန်ပီယံဆု ရယူနိုင်ခဲ့ပေမယ့် ၂၀၂၂ ကမ္ဘာ့ဖလားပြိုင်ပွဲကိုတော့ ခြေစစ်ပွဲအောင်မြင်ခဲ့ခြင်းမရှိလို့ ဝင်ရောက် မယှဉ်ပြိုင် နိုင်ခဲ့ပါဘူး။ 

အဲဒါကြောင့် စပယ်လက်တီဟာ လာမယ့် ၂၀၂၆ ကမ္ဘာ့ဖလားပြိုင်ပွဲကို အီတလီအသင်း ဝင်ရောက် ယှဉ်ပြိုင်ခွင့်ရဖို့ လုပ်ဆောင်ပေးရမှာပါ။ 

အီတလီအသင်းဟာ စက်တင်ဘာထဲမှာ UEFA နေးရှင်းလိဂ်ပွဲစဉ်အဖြစ် ပြင်သစ်၊အစ္စရေးအသင်းတို့နဲ့ ယှဉ်ပြိုင်ရဖို့ ရှိနေတာဖြစ်ပါတယ်။

Source:ChannelNewsAsia

CNI Sport News

၂၀၂၄ ခုနှစ်၊ ဇူလိုင် ၁

ဘာစီလိုနာအသင်းဟာ အငှားနဲ့ခေါ်ယူထားတဲ့ ဂျာအိုဖီးလစ်နဲ့ ကန်ဆယ်လိုတို့ အသင်းက ထွက်ခွာပြီဆိုတဲ့ ကြေညာချက် ၂ ခုကို ဖျက်ပစ်ခဲ့ပါတယ်။

ဘာစီလိုနာအသင်းက ဂျာအိုဖီးလစ်နဲ့ ကန်ဆယ်လိုတို့ဟာ သူတို့ရဲ့ မိခင်ကလပ်တွေဖြစ်တဲ့ အသလက်တီကိုနဲ့ မန်စီးတီးအသင်းထံ ပြန်မှာဖြစ်ပြီး နောက်ခံလူ မားကို့စ်အလွန်ဆိုက အသင်းက ထွက်ခွာပြီလို့ ကြေညာခဲ့တာပါ။ 

ဒါပေမယ့် ဘာစီလိုနာအသင်းဟာ ဂျာအိုဖီးလစ်နဲ့ ကန်ဆယ်လိုတို့ ထွက်ခွာမယ့် ထုတ်ပြန်ချက် ၂ ခုကိုဖျက်ပစ်ခဲ့ပြီး မားကို့စ်အလွန်ဆိုရဲ့ ထုတ်ပြန်ချက်ကို သူတို့ရဲ့ဆိုရှယ်မီဒီယာပေါ်မှာ ထားရှိခဲ့တာ ဖြစ်ပါတယ်။ 

ဖာဘရီဇီယိုရိုမန်နိုကတော့ ဘာစီလိုနာအသင်းဟာ သူတို့ ၂ ဦးရဲ့ အနာဂတ်အတွက် ဆွေးနွေးညှိနှိုင်းမှုတွေ ဆက်လက် လုပ်ဆောင်သွားဖို့ ရှိနေတယ်လို့ ဖော်ပြထားတာပါ။

ဘာစီလိုနာအသင်း နည်းပြသစ် ဟန်ဆီဖလစ်က ဂျာအိုဖီးလစ်ကို ပြန်လည်ခေါ်ယူဖို့ စိတ်ဝင်စားနေတာ ဖြစ်ပါ တယ်။ 

စပိန်ကလပ်ဟာ ဂျာအိုဖီးလစ်နဲ့ ကန်ဆယ်လိုတို့ ၂ ဦးစလုံးကို အပြီးသတ်ခေါ်ယူဖို့ ကြိုးစားမလား ဒါမှမဟုတ် အငှားနဲ့ပဲ အသင်းမှာ ဆက်ပြီး ထိန်းသိမ်းမလားဆိုတာ စောင့်ကြည့်ရဦးမှာပါ။ 

ကန်ဆယ်လိုနဲ့ ဂျာအိုဖီးလစ်ကို တွေ့ရစဉ်

ဂျာအိုဖီးလစ်ဟာ ပြီးခဲ့တဲ့ရာသီက ဘာစီလိုနာအသင်းအတွက် ၄၄ ပွဲ ကစားခဲ့ပြီး ဂိုးပါဝင်ပတ်သက်မှု ၁၆ ဂိုး ရှိခဲ့ပါတယ်။

ကန်ဆယ်လိုကတော့ ဘာစီလိုနာအသင်းအတွက် ၄၂ ပွဲ ကစားခဲ့ပြီး ၉ ဂိုး ပါဝင်ပတ်သက်ခဲ့တာပါ။

သူတို့ ၂ ဦးရဲ့ အနာဂတ်ဟာ မကြာခင်မှာ အဖြေထွက်မှာဖြစ်ပေမယ့် ထွက်ခွာဖို့ ကြေညာတာကို ပြန်ဖျက်ခဲ့တာ ကြောင့် ဘာစီလိုနာအသင်းအတွင်းမှာ ရှုပ်ထွေးမှုတွေ ရှိနေနိုင်တာ ဖြစ်ပါတယ်။ 

ဂျာအိုဖီးလစ်နဲ့ ကန်ဆယ်လိုတို့ဟာ ဘာစီလိုနာအသင်းမှာ ဆက်ပြီးရှိနေချင်တဲ့ သူတို့ရဲ့ ဆန္ဒကို မကြာခဏ ဆိုသလို ပြောထားတာပါ။

သူတို့ ၂ ဦးဟာ လက်ရှိအချိန်မှာ ယူရို ၂၀၂၄ ပြိုင်ပွဲယှဉ်ပြိုင်နေတဲ့ ပေါ်တူဂီအသင်းအတွက် ပါဝင်ကစားနေတာ ဖြစ်ပါတယ်။

Source: Goal

CNI Sport News

၂၀၂၄ ခုနှစ်၊ ဇူလိုင် ၁

ဆလိုဗက်ကီးယားအသင်းကို အချိန်ပိုမှာ အနိုင်ရခဲ့တဲ့ ယူရို ၂၀၂၄ ပြိုင်ပွဲ ၁၆ သင်းအဆင့်မှာသွင်းယူခဲ့တဲ့ ဘယ်လင်ဂမ်ရဲ့ နောက်ပြန်ကန်ချက်သွင်းဂိုးဟာ အင်္ဂလန်ရဲ့အကောင်းဆုံးသွင်းဂိုးတွေထဲက တစ်ဂိုးလို့ အသင်းခေါင်းဆောင် ဟာရီကိန်းက ပြောခဲ့ပါတယ်။

ဟာရီကိန်းက “ဘယ်လင်ဂမ်ဟာ ဒီပွဲမှာ အကောင်းဆုံး လုပ်နိုင်ခဲ့ပြီး သူ့ရဲ့သွင်းဂိုးကလည်း မယုံနိုင်စရာပါပဲ။ ဒီဂိုးက ကျနော်တို့နိုင်ငံရဲ့သမိုင်းမှာ အကောင်းဆုံးသွင်းဂိုးတွေထဲက တစ်ဂိုးပါ။ သူဟာ အသင်းအတွက် အလွန်ကြိုးစားပါတယ်။ ကြီးမားတဲ့အခိုက်အတန့်မှာ သူလုပ်ခဲ့တဲ့အရာမျိုးကို ကျနော်တို့လိုအပ်ပါတယ်။ ကျနော်တို့ဟာ ဒီပွဲမှာ ပိုကောင်းအောင်လည်းလုပ်နိုင်ခဲ့သလို ပိုကောင်းအောင်လည်းကစားနိုင်ခဲ့ပါတယ်။ ကျနော်တို့ ဒီအရှိန်ကို လက်ကျန်ပွဲတွေမှာပါ ယူဆောင်နိုင်ဖို့မျှော်လင့်တယ်”လို့ ပြောခဲ့တာပါ။

အင်္ဂလန်အသင်းဟာ ဆလိုဗက်ကီးယားအသင်းနဲ့ ၁၆ သင်းအဆင့်ပွဲစဉ်မှာ ပွဲချိန်မိနစ် ၉၀ ပြည့်တဲ့အထိ ၁ ဂိုး- ဂိုးမရှိနဲ့ အရေးနိမ့်နေခဲ့ပေမယ့် နာကျင်အချိန်ပို ၅ မိနစ်မှာ ဘယ်လင်ဂမ်ကအဖိုးတန် ချေပဂိုး သွင်းယူနိုင်ခဲ့တာ ဖြစ်ပါတယ်။ 

ဟာရီကိန်းနဲ့ ဘယ်လင်ဂမ်ကို တွေ့ရစဉ်

အဲဒါကြောင့် ပွဲချိန်အတွင်း ၁ ဂိုးစီသရေကျခဲ့လို့အချိန်ပိုဆက်ကစားခဲ့ရပြီး အချိန်ပိုမှာ ဟာရီကိန်းက အင်္ဂလန်အသင်းအတွက် အနိုင်ဂိုး သွင်းယူပေးခဲ့တာပါ။ အချိန်ပိုအပြီးမှာ အင်္ဂလန်အသင်းဟာ ဆလိုဗက်ကီးယားအသင်းကို ၂ ဂိုး-၁ ဂိုးနဲ့ အနိုင်ရပြီး ကွာတားဖိုင်နယ်ကို တက်နိုင်ခဲ့ပါတယ်။

အင်္ဂလန်အသင်းနည်းပြ ဆောက်ဂိတ်ကလည်း ဒီပွဲမှာ အကောင်းဆုံး ကစားသမားဆု ရရှိခဲ့တဲ့ဘယ်လင်ဂမ်ကို ပွဲအပြီးမှာ ချီးကျူးမှုတွေပြုလုပ်ခဲ့ပါတယ်။

ဆောက်ဂိတ်က “ဘယ်လင်ဂမ်နဲ့ ဟာရီကိန်းတို့ဟာ ဒီလိုအခိုက်အတန့်တွေကို ဖန်တီးတက်ကြတာကြောင့် လူတွေက ကျနော့်ကို အပြောင်းအလဲပြုလုပ်ဖို့ ပြောပေမယ့် မလုပ်ခဲ့ပါဘူး။ ဘယ်လင်ဂမ်ဟာ ငယ်ရွယ်သေးပေမယ့် မယုံနိုင်လောက်တဲ့ သက်ရောက်မှုရှိတဲ့သူပါ။ သူဟာ ကြီးမားတဲ့ပွဲတွေကို ပြောင်းလဲသွားနိုင်တဲ့ အခိုက်အတန့်တွေကို ဖန်တီးနိုင်ပြီး ဒီပွဲမှာ ဒါကိုသူလုပ်ခဲ့ပါတယ်”လို့ ပြောခဲ့ပါတယ်။

အင်္ဂလန်အသင်းဟာ ယူရို ၂၀၂၄ ပြိုင်ပွဲကွာတားဖိုင်နယ်ပွဲစဉ်အဖြစ် ဇူလိုင် ၆ ရက်မှာဆွစ်ဇာလန်အသင်းနဲ့ ယှဉ်ပြိုင်ရမှာဖြစ်ပါတယ်။

Source:ESPN

CNI Sport News

၂၀၂၄ ခုနှစ်၊ ဇူလိုင် ၁

ယူရို ၂၀၂၄ ပြိုင်ပွဲ ၁၆ သင်းအဆင့်မှာ ဂျော်ဂျီယာအသင်းကို ဂိုးပြတ်အနိုင်ရကာ စပိန်အသင်း ကွာတားဖိုင်နယ် တက်နိုင်ခဲ့ပြီးနောက် နည်းပြ ဒယ်လာဖွန်တေက ဒီပြိုင်ပွဲမှာ စပိန်အသင်းထက် ပိုကောင်းတဲ့ အသင်းမရှိဘူးလို့ ယုံကြည်နေပါတယ်။

ဒယ်လာဖွန်တေက “ကျနော်တို့မှာ ကမ္ဘာ့အကောင်းဆုံး အသင်းနဲ့ ကစားသမားတွေရှိပါတယ်။ ဒါက ကျနော်တို့ အနိုင်ရမယ်လို့ ဆိုလိုတာ မဟုတ်ပေမယ့် ကျနော်တို့ဟာ ဒီအတွက် တိုက်ပွဲဝင်သွားမှာပါ။ ဂျာမနီဟာ အလွန် အားကောင်းတဲ့ အသင်းပါ။ ဒါပေမယ့် အသင်းတိုင်းမှာ အားနည်းချက်ရှိပြီး ဘယ်အသင်းကမှ ပြီးပြည့်စုံတာ မရှိပါ ဘူး။ ကျနော်တို့ဟာ အားသာချက်တွေကို အာရုံစိုက်ပြီး တိုးတက်အောင်ဆက်လုပ်သွားရမှာပါ”လို့ ပြောခဲ့တာပါ။

စပိန်အသင်းဟာ ၁၆ သင်း အဆင့်ပွဲစဉ်မှာ ဂျော်ဂျီယာအသင်းကို ၄ ဂိုး-၁ ဂိုးနဲ့ ဂိုးပြတ်အနိုင်ရရှိခဲ့တာ ဖြစ်ပါတယ်။ 

ဒီပွဲမှာ စပိန်အသင်းဟာ ကိုယ့်ဂိုးကိုယ် သွင်းယူမှုနဲ့ ဂျော်ဂျီယာအသင်းကို ဦးဆောင်ဂိုး ပေးခဲ့ရပေမယ့် ချေပဂိုးနဲ့ အနိုင်ဂိုးတွေ သွင်းယူကာ ကွာတားဖိုင်နယ်ကို တက်နိုင်ခဲ့တာပါ။ 

စပိန်အသင်းကိုတွေ့ရစဉ်

စပိန်အသင်းဟာ ဒီပွဲမှာ ဘောလုံးပိုင်ဆိုင်မှု ၇၅ ရာခိုင်နှုန်း၊ ဂိုးပေါက်ကန်သွင်းမှု ၃၅ ကြိမ်နဲ့ ဂိုးပေါက်တည့်မှု ၁၃ ကြိမ်အထိ ရှိခဲ့တာဖြစ်ပြီး နည်းပြ ဒယ်လာဖွန်တေက ဒီထက်ဂိုးပြတ်ပြီး အနိုင်ယူခဲ့သင့်တယ်လို့လည်း ပြော ခဲ့ပါတယ်။

စပိန်အသင်းဟာ ဒီနိုင်ပွဲကြောင့် ကွာတားဖိုင်နယ်အဆင့်မှာ အိမ်ရှင် ဂျာမနီအသင်းနဲ့ ယှဉ်ပြိုင်ရမှာပါ။ 

ဒီပွဲစဉ်ရဲ့ အကောင်းဆုံး ကစားသမားဆုရခဲ့တဲ့ ရိုဒရီက ဂျာမနီအသင်းနဲ့ ရင်ဆိုင်ရမှာကို ကြောက်နေမှာ မဟုတ် ဘူးလို့ ပြောခဲ့ပါတယ်။

ရိုဒရီက “ဂျာမနီက အိမ်ကွင်းမှာ အားကောင်းပေမယ့် ကျနော်တို့ ကြောက်နေမှာ မဟုတ်ပါဘူး။ နောက်တစ်ဆင့် တက်ချင်ရင် ကျနော်တို့ဟာ ကောင်းမွန်တဲ့ ပွဲတစ်ပွဲကို ကစားရမှာဖြစ်ပြီး ရှိသမျှအရာအားလုံးနဲ့ အနိုင်ယူဖို့ ကြိုးစားသွားမှာပါ။ ဒါက ဒီအသင်းရဲ့စိတ်ဓါတ်ပဲ”လို့ ပြောခဲ့တာပါ။

ဂျာမနီနဲ့ စပိန်အသင်းတို့ရဲ့ ယူရို ၂၀၂၄ ကွာတားဖိုင်နယ်ပွဲစဉ်ကို ဇူလိုင် ၅ ရက်မှာ ယှဉ်ပြိုင်သွားမှာ ဖြစ်ပါတယ်။

Source: ESPN

CNI Sport News

၂၀၂၄ ခုနှစ်၊ ဇွန်လ ၂၉

စပိန်ကွင်းလယ်လူဟောင်း ကာဇိုလာဟာ အာဆင်နယ်အသင်းထံ ပြန်လာဖို့ နည်းပြ အာတီတာနဲ့ ဆွေးနွေးမှု ပြုလုပ်ခဲ့ပေမယ့် စပိန်ကလပ် အိုဗီဒိုအသင်းမှာပဲ ဆက်ရှိတော့မှာ ဖြစ်ပါတယ်။

အာဆင်နယ်အသင်းမှာ ကစားခဲ့ချိန်က အာတီတာနဲ့အတူ ကွင်းလယ်မှာတွဲဖက်ပြီး ခြေစွမ်းပြသနိုင်ခဲ့တဲ့ အသက် ၃၈ နှစ်အရွယ်ရှိ ကာဇိုလာဟာ အခုအချိန်ထိ ဘောလုံးကစားတာကနေ အနားယူခြင်း မရှိသေးတာပါ။ 

ကာဇိုလာဟာ အသင်းဟောင်း အာဆင်နယ်အသင်းထံ ပြန်လာဖို့ အာတီတာနဲ့ ဆွေးနွေးမှုတွေရှိခဲ့ပေမယ့် ဒါဟာ ဖြစ်လာတော့မှာ မဟုတ်ပါဘူး။

ပြီးခဲ့တဲ့ အပတ်က ကာဇိုလာ ကစားနေတဲ့ အိုဗီဒိုအသင်းဟာ လာလီဂါထံ တန်းပြန်တက်မယ့် ပလေးအော့ဖ် ဗိုလ်လုပွဲမှာ အက်စ်ပန်ညိုအသင်းကို အရေးနိမ့်သွားခဲ့တာပါ။

ဒါပေမယ့် ကာဇိုလာဟာ သူ့ရဲ့ ငယ်ဘဝကလပ်ဖြစ်တဲ့ အိုဗီဒိုအသင်းမှာ ဆက်နေဖို့ ဆုံးဖြတ်ခဲ့ပြီး စာချုပ်ကို ၁ နှစ် သက်တမ်းတိုးခဲ့ပါတယ်။

ကာဇိုလာကို တွေ့ရစဉ်

ကာဇိုလာဟာ အိုဗီဒိုအသင်းကို သူ့ရဲ့နောက်ဆုံး လက်ဆောင်အဖြစ် စပိန်လာလီဂါပြိုင်ပွဲထံ ပြန်ပို့ပေးနိုင်ဖို့ မျှော်လင့်နေတာပါ။ 

ကာဇိုလာဟာ အာဆင်နယ်အသင်းမှာ ၆ ရာသီကြာ ကစားခဲ့ပြီး FA ဖလား ၂ ကြိမ်နဲ့ ကွန်မြူနတီဒိုင်း  ၂ ကြိမ် ရယူနိုင်ခဲ့ပါတယ်။ 

အာဆင်နယ်အသင်းဟာ ကစားသမားဟောင်း ကာဇိုလာ အသင်းထံ ပြန်လာမှာကို တံခါးဖွင့်ပေးထားပေမယ့် ကစားသမားကတော့ လာမယ့်ရာသီ အိုဗီဒိုအသင်းမှာပဲ ဆက်ပြီးရှိနေတော့မှာပါ။

ကာဇိုလာဟာ အိုဗီဒိုအသင်းနဲ့ စာချုပ်ကုန်ဆုံးချိန်မှာ နည်းပြလောကထဲကို ဝင်ရောက်ဖို့ ရှိနေပါတယ်။ 

စပိန်အသင်းအတွက် ၈၁ ပွဲ ပါဝင်ကစားခဲ့တဲ့ ကာဇိုလာဟာ နိုင်ငံအသင်းနဲ့အတူ ယူရို ၂၀၀၈၊ ၂၀၁၂ ဆုဖလား တွေကို ရယူနိုင်ခဲ့တာ ဖြစ်ပါတယ်။ 

Source: Goal

CNI Sport News

၂၀၂၄ ခုနှစ်၊ ဇွန်လ ၂၉

အသင်းခေါင်းဆောင် မက်ဆီနဲ့ နည်းပြ စကာလိုနီတို့ဟာ ကိုပါအမေရိကဖလား အုပ်စုနောက်ဆုံးပွဲစဉ်ဖြစ်တဲ့ ပီရူး အသင်းနဲ့ပွဲစဉ်ကို လွဲချော်မယ်လို့ အာဂျင်တီးနားအသင်းက အတည်ပြုခဲ့ပါတယ်။ 

ပြီးခဲ့တဲ့ ချီလီအသင်းနဲ့ အုပ်စုဒုတိယပွဲစဉ်မှာ ရရှိခဲ့တဲ့ မက်ဆီရဲ့ဒဏ်ရာဟာ သက်သာမှု မရှိတဲ့အတွက် ပီရူးအသင်း နဲ့ပွဲကို လွဲချော်မှာဖြစ်ပြီး သူ့ရဲ့အခြေအနေကို စောင့်ကြည့်မှုတွေ ပြုလုပ်ရမယ်လို့ အာဂျင်တီးနားအသင်း လက်ထောက်နည်းပြ ဆင်မြူရယ်က ပြောခဲ့တာပါ။

အာဂျင်တီးနားအသင်းဟာ ကိုပါအမေရိကဖလားပြိုင်ပွဲမှာ ကွာတားဖိုင်နယ်ကို တက်ရောက်ထားပြီး ဖြစ်တဲ့အတွက် ဒီပွဲစဉ်မှာ မက်ဆီ ပြန်လည်ပါဝင်ဖို့ နိုင်ငံအသင်းက မျှော်လင့်နေတာ ဖြစ်ပါတယ်။

အာဂျင်တီးနားအသင်းနည်းပြ စကာလိုနီဟာ ချီလီအသင်းနဲ့ပွဲစဉ်ရဲ့ ပထမပိုင်းအပြီးမှာ ကွင်းထဲကို နောက်ကျပြီးမှ ဝင်ရောက်လာခဲ့တဲ့အတွက် တောင်အမေရိကဘောလုံးအဖွဲ့ချုပ်က ပွဲပယ်ခဲ့တာကြောင့် သူကလည်း ပီရူးအသင်းနဲ့ ပွဲစဉ်ကို ကိုင်တွယ်နိုင်တော့မှာ မဟုတ်ပါဘူး။

မက်ဆီကိုတွေ့ရစဉ်

တောင်အမေရိကဘောလုံးအဖွဲ့ချုပ်ဟာ နည်းပြ စကာလိုနီကို ပွဲပယ်အပြင် အာဂျင်တီးနားအသင်းကိုလည်း ဒဏ်ကြေးငွေ ဒေါ်လာ ၁၅,၀၀၀ ချမှတ်ခဲ့တာပါ။ 

အာဂျင်တီးနားအသင်းဟာ ပီရူးအသင်းနဲ့ပွဲစဉ်မှာ အရေးနိမ့်ခဲ့ရင်တောင် အုပ်စုပထမနဲ့ ကွာတားဖိုင်နယ်ကို တက်မှာဖြစ်လို့ ပွဲထွက်လူစာရင်းကို အပြောင်းအလဲ အများအပြားပြုလုပ်ပြီး လူငယ်ကစားသမားတွေကို အသုံးပြုဖို့ စီစဉ်ထားပါတယ်။

ပီရူးအသင်းဟာ ၂ ပွဲ ကစားအပြီးမှာ ရမှတ် ၁ မှတ်ပဲ ရရှိထားလို့ ကွာတားဖိုင်နယ်ကို တက်ရောက်နိုင်ဖို့ မျှော်လင့်ချက် နည်းပါးနေတာ ဖြစ်ပါတယ်။ 

Source ESPN

CNI Sport News

၂၀၂၄ ခုနှစ်၊ ဇွန်လ ၂၉

ပေါ်တူဂီအသင်း ဝါရင့်နောက်ခံလူ ပီပီက အသင်းခေါင်းဆောင် ရော်နယ်ဒိုဟာ သွင်းဂိုးတွေနဲ့ ရှင်သန်နေတဲ့သူလို့ ပြောလိုက်ပြီး အသင်းအပေါ် သူ့ရဲ့သက်ရောက်မှုတွေကို ချီးကျူးသွားခဲ့ပါတယ်။

ပီပီက “ရော်နယ်ဒိုဟာ သွင်းဂိုးတွေနဲ့ ရှင်သန်နေတဲ့သူပါ၊ ဒါက အမှန်တရားပါပဲ။ ဒါပေမယ့် နိုင်ငံအသင်းအပေါ် ကူညီဖို့ ကွင်းထဲမှာ သူ့ရဲ့ရရှိနိုင်မှုတွေက မယုံနိုင်စရာပါပဲ။ သူဟာ အသက် ၃၉ နှစ်ရှိပြီဖြစ်ပေမယ့် အသင်းမှာ မိနစ်အများဆုံး ကစားထားတဲ့သူပါ။ သူဟာ ဒီပြိုင်ပွဲရဲ့ နောက်ဆုံးအဆင့်မှာ ကောင်းမွန်စွာ လုပ်ဆောင်ပြီး ကျနော်တို့ကို ပျော်ရွှင်မှုတွေ အများကြီးပေးလိမ့်မယ်”လို့ ပြောခဲ့တာပါ။ 

ယူရိုပြိုင်ပွဲကို စံချိန်တင် ၆ ကြိမ်မြောက်အဖြစ် ဝင်ရောက်ယှဉ်ပြိုင်နေတဲ့ ရော်နယ်ဒိုဟာ ယူရို ၂၀၂၄ ပြိုင်ပွဲမှာ ပေါ်တူဂီအသင်းအတွက် အုပ်စုပွဲစဉ် ၃ ပွဲစလုံး ပွဲထွက်လူစာရင်းမှာ ပါဝင်ခဲ့တာ ဖြစ်ပါတယ်။ 

ဒါပေမယ့် ရော်နယ်ဒိုဟာ သွင်းဂိုးရရှိဖို့ ရုန်းကန်နေရတာပါ။ ရော်နယ်ဒိုနဲ့ နိုင်ငံအသင်းမှာ နှစ်ပေါင်းများစွာ အတူတွဲ ကစားနေတဲ့ ပီပီကတော့ သူ့ရဲ့အသင်းဖော်ဟာ အသင်းကို အောင်မြင်မှုတွေရရှိအောင် လုပ်ဆောင်ပေးနိုင်မယ်လို့ ယုံကြည်မှုရှိနေတာ ဖြစ်ပါတယ်။ 

ပီပီနဲ့ ရော်နယ်ဒိုကို တွေ့ရစဉ်

အသက် ၄၁ နှစ်အရွယ်ရှိ ပီပီဟာ ယူရိုပြိုင်ပွဲမှာ အသက်အကြီးဆုံး ကစားသမားအဖြစ် ဒီပြိုင်ပွဲကို ဝင်ရောက် ယှဉ်ပြိုင်နေပြီး အသင်းရဲ့ အစိတ်အပိုင်း ဖြစ်ခွင့်ရတဲ့အတွက် ပျော်ရွှင်ကြောင်းလည်း ပြောခဲ့တာပါ။ 

၂၀၀၇ ခုနှစ်ကတည်းက ပေါ်တူဂီအသင်းအတွက် ပါဝင်ကစားခဲ့တဲ့ ပီပီဟာ နိုင်ငံအသင်းက အနားယူဖို့ အကြောင်း ကိုလည်း စဉ်းစားထားခြင်း မရှိသေးပါဘူး။ 

ပီပီဟာ ပေါ်တူဂီအသင်းနဲ့အတူ ယူရို ၂၀၂၄ ပြိုင်ပွဲရဲ့ ရှုံးထွက်အဆင့် ပွဲစဉ်တွေကစားဖို့ ပြင်ဆင်မှုတွေ ပြုလုပ် နေတာပါ။ 

ပေါ်တူဂီအသင်းဟာ ၁၆ သင်းအဆင့် ပွဲစဉ်အဖြစ် ဆလိုဗေးနီးယားအသင်းနဲ့ ဇူလိုင် ၁ ရက်မှာ ယှဉ်ပြိုင်သွားမှာ ဖြစ်ပါတယ်။ 

Source: ESPN