CNI Sport News

၂၀၂၅ ခုနှစ်၊ ဖေဖော်ဝါရီ ၁ 

လီဗာပူးလ်အသင်းနည်းပြ အာနီဆလော့က တိုက်စစ်မှူး ဆာလက်ကို အသင်းမှာဆက်ရှိဖို့ ဆန္ဒရှိနေသလို ဆော်ဒီနိုင်ငံက ဆာလက်ကို စိတ်ဝင်စားတဲ့အပေါ် အံ့သြစရာမရှိဘူးလို့ ပြောခဲ့ပါတယ်။

အာနီဆလော့က “ဆာလက်ကို မလိုချင်ဘူးလို့ တစ်ဦးဦးက ပြောလာခဲ့ရင် ဒါက အံ့သြစရာကောင်းမှာပါ။ သူဟာ နှစ်ပေါင်းများစွာ ကောင်းမွန်စွာလုပ်ခဲ့ပြီး လူတိုင်းက သူ့ကို လိုချင်ကြပါလိမ့်မယ်။ ကျနော်တို့ အပါအဝင် လူတိုင်း က သူ့ကိုလိုချင်ပါတယ်။ ကျနော်တို့ဟာ သူ့ကို သက်တမ်း တိုးစေချင်တယ်ဆိုတာ ရှင်းပါတယ်။ တစ်ဦးဦးက သူ့ကို လိုချင်နေတာက အံ့သြစရာမကောင်းပါဘူး။ သူဟာ သူ့အတွက် မှန်ကန်တဲ့ ဆုံးဖြတ်ချက်ချနိုင်ဖို့နဲ့ ကျနော်တို့ အတွက်လည်း ဆုံးဖြတ်ချက် ချနိုင်ဖို့မျှော်လင့်တယ်”လို့ ပြောခဲ့တာပါ။ 

လီဗာပူးလ်အသင်းနဲ့ ဒီရာသီအကုန်မှာ စာချုပ်ကုန်ဆုံးမယ့် ဆာလက်က စာချုပ်သစ်အတွက် သဘောတူညီမှု ရရှိဖို့က ဝေးကွာတယ်လို့ ပြောထားပါတယ်။ 

ဆာလက်ကို တွေ့ရစဉ်

ဆာလက်ကို ခေါ်ယူဖို့ ဆော်ဒီပရိုလိဂ်က ကာလရှည်ကြာ ချိတ်ဆက်မှုတွေ ပြုလုပ်နေပြီး နိုင်ငံရဲ့ အားကစား ဝန်ကြီးဖြစ်တဲ့ မင်းသားအယ်လ်ဖိုင်ဆဲလ်က ဆော်ဒီပရိုလိဂ်မှာ ဆာလက်ကို မြင်တွေ့ရမှာ နှစ်သက်တယ်လို့ ထုတ်ပြောထားတာပါ။

အသက် ၃၂ နှစ်အရွယ်ရှိ ဆာလက်ဟာ ဒီရာသီမှာ လီဗာပူးလ်အသင်းအတွက် ပြိုင်ပွဲစုံ ၂၃ ဂိုးသွင်းယူထားပြီး အသင်းကို ပရီးမီးယားလိဂ်ပြိုင်ပွဲမှာ ထိပ်ဆုံးနေရာနဲ့ ချန်ပီယံလိဂ်ပြိုင်ပွဲမှာ ထိပ်ဆုံးနေရာ ရောက်ရှိအောင် ပို့ဆောင်ပေးထားတာ ဖြစ်ပါတယ်။ 

လီဗာပူးလ်အသင်းဟာ ဆာလက်အပြင် ရာသီအကုန်မှာ စာချုပ်ကုန်ဆုံးမယ့် အသင်းခေါင်းဆောင် ဗန်ဒိုက်နဲ့ ညာနောက်ခံလူ အာနိုးလ်တို့ကိုလည်း စာချုပ်သစ်အတွက် သဘောတူညီမှု မရရှိသေးတာကြောင့် အလွတ်နဲ့ ဆုံးရှုံးရဖွယ်ရှိနေတာပါ။

လီဗာပူးလ်အသင်းဟာ ဖေဖော်ဝါရီ ၁ ရက်မှာ ပရီးမီးယားလိဂ် ပွဲစဉ်အဖြစ် ရလဒ်ကောင်းတွေ ရရှိနေတဲ့ ဘုန်းမောက်အသင်း အိမ်ကွင်းသွားရောက် ယှဉ်ပြိုင်ရမှာဖြစ်ပါတယ်။ 

Source: ESPN

CNI Sport News

၂၀၂၅ ခုနှစ်၊ ဖေဖော်ဝါရီ ၁ 

နယူးကာဆယ်အသင်း တောင်ပံကစားသမား အယ်လ်မီရွန်ဟာ အသင်းဟောင်း မေဂျာလိဂ်ကလပ် အက်လန်တာ ယူနိုက်တက်အသင်းထံ ပေါင် ၈ သန်းနဲ့ အပြီးသတ် ပြောင်းရွှေ့ခဲ့ပါတယ်။ 

နယူးကာဆယ်အသင်းဟာ ၂၀၁၉ ခုနှစ်က အယ်လ်မီရွန်ကို ကလပ်စံချိန်တင် ပြောင်းရွှေ့ကြေး ပေါင်သန်း ၂၀ နဲ့ အက်လန်တာယူနိုက်တက် အသင်းကနေ ခေါ်ယူခဲ့တာပါ။ 

အသက် ၃၀ နှစ်အရွယ်ရှိ အယ်လ်မီရွန်ဟာ နယူးကာဆယ်အသင်းမှာ ရှိခဲ့တဲ့အချိန်အတွင်း ပွဲပေါင်း ၂၂၃ ပွဲ ပါဝင်ကစားခဲ့ပြီး သွင်းဂိုး ၃၀ သွင်းယူခဲ့ပါတယ်။ 

အယ်လ်မီရွန်ဟာ ပြီးခဲ့တဲ့ ဆောက်သမ်တန်အသင်းနဲ့ ပရီးမီးယားလိဂ်ပွဲစဉ်မှာ နယူးကာဆယ်အသင်းအတွက် လူစားလဲ ဝင်ရောက်ကစားခဲ့ပြီး ပွဲအပြီးမှာ အသင်းပရိသတ်တွေကို နှုတ်ဆက်မှုပြုလုပ်ခဲ့တာပါ။ 

အယ်လ်မီရွန်ဟာ ၂၀၂၂-၂၃ ရာသီက နယူးကာဆယ်အသင်း ကာရာဘောင်းဖလား ဗိုလ်လုပွဲ ရောက်ရှိတာနဲ့ ပရီးမီးယားလိဂ်ပြိုင်ပွဲမှာ အဆင့် ၄ နေရာနဲ့ ရာသီအဆုံးသတ်ခဲ့တာမှာ အဓိကအခန်းကဏ္ဍကနေ ပါဝင်ခဲ့ပါတယ်။ 

အယ်လ်မီရွန်ကို တွေ့ရစဉ်

နယူးကာဆယ်အသင်းနည်းပြ အက်ဒီဟိုဝီက သူတို့ အတူတူရှိခဲ့တဲ့ အချိန်အတွင်းမှာ အသင်းအတွက် အယ်လ်မီရွန် ပေးခဲ့တဲ့ အရာအားလုံးအတွက် အသင်းကိုယ်စား ကျေးဇူးတင်တယ်လို့ ပြောခဲ့ပါတယ်။ 

အယ်လ်မီရွန်ကတော့ သူ့ရဲ့နှလုံးသားထဲမှာ အထူးနေရာ တစ်ခုအဖြစ် အမြဲတမ်းရှိနေတဲ့ အက်လန်တာ ယူနိုက်တက်အသင်းထံ ပြန်လာရလို့ ပျော်ရွှင်ပြီး ပျော်ရွှင်စရာ အခိုက်အတန့်တွေကို ထပ်ဖန်တီးပေးနိုင်ဖို့ မျှော်လင့်တယ်လို့ ပြောခဲ့တာပါ။ 

အယ်လ်မီရွန်ဟာ အက်လန်တာယူနိုက်တက်အသင်းမှာ ပထမဆုံးအကြိမ် ကစားခဲ့တုန်းက ပြိုင်ပွဲစုံပွဲပေါင်း ၇၀ ပါဝင်ကာ သွင်းဂိုး ၂၂ ဂိုးသွင်းပြီး ၂၀၁၈ ခုနှစ်က မေဂျာလိဂ်ဖလားကို ရယူနိုင်ခဲ့ပါတယ်။ 

၂၀၂၅ ခုနှစ် မေဂျာလိဂ် ရာသီသစ်အတွက် ပြင်ဆင်မှုတွေ ပြုလုပ်နေတဲ့ အက်လန်တာယူနိုက်တက်အသင်းဟာ ဖေဖော်ဝါရီ ၂၂ ရက်မှာ မေဂျာလိဂ်အဖွင့်ပွဲစဉ်အဖြစ် မွန်ထရီရယ်လ်အသင်းနဲ့ ယှဉ်ပြိုင်ရမှာဖြစ်ပါတယ်။ 

Source: ESPN

 CNI Sport News

၂၀၂၅ ခုနှစ်၊ ဇန်နဝါရီ ၃၁

ရီးရယ်လ်အသင်းခေါင်းဆောင်ဟောင်း ရာမို့စ်ဟာ ဖြစ်နိုင်ဖွယ်ရှိတဲ့ အပြောင်းအရွှေ့နဲ့ပတ်သက်ပြီး မက္ကဆီကို ကလပ် မွန်တာရေးအသင်းနဲ့ ဆွေးနွေးမှုတွေပြုလုပ်ခဲ့ပါတယ်။ 

RG Deportiva က ရာမို့စ်ဟာ တစ်နှစ်လုပ်ခလစာဒေါ်လာ ၄ သန်းရရှိမယ့် မက္ကဆီကိုကလပ်ရဲ့ ကမ်းလှမ်းမှုကို လက်ခံဖို့ လမ်းဖွင့်ထားတယ်လို့ ဖော်ပြထားတာပါ။

 ဒါပေမယ့် ရာမို့စ်ဟာ စာချုပ်ထဲမှာ ထည့်သွင်းချင်နေတဲ့ စွမ်းဆောင်မှုအပေါ်မူတည်တဲ့ အပိုဆုကြေးတွေနဲ့ပတ်သက်ပြီး ဆွေးနွေးညှိနှိုင်းမှုပြုလုပ်တာမှာ အနည်းငယ် အခက်အခဲတွေရှိနေတာဖြစ်ပါတယ်။ 

ဒါ့အပြင် ရာမို့စ်ရဲ့ကိုယ်စားလှယ်တွေဟာ သူ့ရဲ့ကစားသမားကို ၂ နှစ် စာချုပ်ချုပ်ဖို့ တွန်းအားပေးနေပေမယ့် မွန်တာရေးအသင်းက ၁ နှစ်စာချုပ်သာချုပ်ဖို့ ဆန္ဒရှိနေတာပါ။

မွန်တာရေးအသင်းအကြီးအကဲ အန်တိုနီယိုနိုရီဂါက ဝါရင့်နောက်ခံလူ ရာမို့စ်ဟာ ကလပ်အသင်းစဉ်းစားနေတဲ့ ရွေးချယ်စရာတွေထဲမှာ တစ်ဦးအနေနဲ့ပါဝင်တယ်လို့ အတည်ပြုထားပါတယ်။

 မွန်တာရေးအသင်းနည်းပြ ဒီမစ်ချယ်လစ်ကတော့ ရာမို့စ်အသင်းထံလာရင် ကြိုဆိုသွားမှာဖြစ်ပြီး မက္ကဆီကိုလိဂ်အတွက်ရော အသင်း အတွက်ဂုဏ်ယူစရာဖြစ်မယ်လို့ ပြောထားတာပါ။

 ရာမို့စ်အတွက်တော့ ဥရောပပြင်ပမှာရှိနေတဲ့ ကလပ်အသင်း တွေရဲ့ချိတ်ဆက်မှုကိုခံရတာက ဒီတစ်ကြိမ်ဟာ ပထမဆုံးအကြိမ်မဟုတ်ပါဘူး။ 

ရာမို့စ်ဟာ မေဂျာလိဂ်ကလပ် ဆန်ဒီယေဂိုအသင်းနဲ့ ဆွေးနွေးမှုတွေရှိခဲ့ပေမယ့် အပြောင်းအရွှေ့မဖြစ်ခဲ့သလို ဆော်ဒီကလပ်အသင်းတွေရဲ့ ချိတ်ဆက်မှုတွေကိုလည်း ရရှိခဲ့တာပါ။

ရာမို့စ်ဟာ ပြီးခဲ့တဲ့နွေရာသီက ငယ်ဘဝ ကလပ် ဆီဗီလာအသင်းနဲ့ စာချုပ်ကုန်ဆုံးပြီးကတည်းက အသင်းသစ်မရရှိသေးတာဖြစ်ပါတယ်။

စပိန် နောက်ခံ လူဟောင်းဟာ ရီးရယ်လ်အသင်းရဲ့ခံစစ်ဒဏ်ရာအကျပ်အတည်းကြောင့် အသင်းဟောင်းထံ ပြန်လာချင်ပေမယ့် ရီးရယ်လ်အသင်းက သူ့ကိုခေါ်ယူခဲ့ခြင်းမရှိတာပါ။ 

ရာမို့စ်ဟာ ရီးရယ်လ်အသင်းမှာ ၂၀၀၅ ကနေ ၂၀၂၁ ခုနှစ်အထိ ကစားခဲ့ပြီး စပိန်လာလီဂါဖလား ၅ ကြိမ်၊ ချန်ပီယံလိဂ်ဖလား ၄ ကြိမ်အပါအဝင် ဆုဖလားအောင်မြင်မှုအများအပြားရရှိခဲ့ပါတယ်။

ရာမို့စ်ဟာ ရီးရယ်လ် အသင်းကနေ ထွက်ခွာပြီးနောက် ပီအက်စ်ဂျီအသင်းမှာ ၂ ရာသီကြာကစားခဲ့ကာ မနှစ်ကရာသီက ဆီဗီလာ အသင်းအတွက် တစ်ရာသီကြာပါဝင်ကစားခဲ့တာဖြစ်ပါတယ်။

Source:Goal

CNI Sport News

၂၀၂၅ ခုနှစ်၊ ဇန်နဝါရီ ၃၁

အယ်လ်နာဆာအသင်းခေါင်းဆောင် ရော်နယ်ဒိုက ဘာနေဗျူးက သူ့အတွက် အပျော်ရွှင်ဆုံးနေရာလို့ ဝန်ခံခဲ့ပြီး အနာဂတ်မှာ ရီးရယ်လ်အသင်းထံ ပြန်လာနိုင်တဲ့အကြောင်းကို ပြောခဲ့ပါတယ်။

ရော်နယ်ဒိုက “ရီးရယ်လ်အသင်းထံ ပြန်လာနိုင်လားဆိုရင် ကျနော့်ရဲ့ ကစားသမားဘဝ အဆုံးသတ် သွားပြီးနောက်မှာ ဒါက တစ်ခုခု ဖြစ်လာနိုင်ပါတယ်။ ရီးရယ်လ်အသင်းမှာရှိခဲ့တဲ့ ကျနော့်ရဲ့အချိန်က ဘောလုံးနဲ့ ပတ်သက်လာရင် ကျနော့်အတွက် အပျော်ရွှင်ဆုံးပါပဲ”လို့ စပိန်ဂျာနယ်လစ် အဂွီရီကို ပြောခဲ့တာပါ။ 

၂၀၀၉ ခုနှစ်က ယူနိုက်တက်အသင်းကနေ ရီးရယ်လ်အသင်းထံ ပြောင်းရွှေ့ခဲ့တဲ့ ရော်နယ်ဒိုဟာ စပိန်ကလပ်မှာ ၉ နှစ်ကြာကစားခဲ့ပြီး သူ့ရဲ့ကစားသမားဘဝ အောင်မြင်မှု အများအပြား ရယူနိုင်ခဲ့တာဖြစ်ပါတယ်။

ရော်နယ်ဒိုကို တွေ့ရစဉ် 

ရော်နယ်ဒိုဟာ ရီးရယ်လ်အသင်းအတွက် ပွဲပေါင်း ၄၃၈ ပွဲကစားခဲ့ပြီး ၄၅၀ ဂိုးသွင်းယူကာ ချန်ပီယံလိဂ်ဖလား ၄ လုံး အပါအဝင် အဓိကဆုဖလားပေါင်း ၁၅ ခုအထိ ရယူနိုင်ခဲ့တာပါ။ 

ဒါအပြင် ရော်နယ်ဒိုဟာ ရီးရယ်လ်အသင်းမှာ ဘောလွန်းဒီအောဆု ၄ ကြိမ် အပါအဝင် တစ်ဦးချင်း အောင်မြင်မှု အများအပြားကိုလည်း ရယူနိုင်ခဲ့တာဖြစ်ပါတယ်။ 

ရော်နယ်ဒိုဟာ ရီးရယ်လ်အသင်းကနေ ထွက်ခွာအပြီးမှာ ဂျူဗင်တပ်စ်၊ ယူနိုက်တက်နဲ့ လက်ရှိ အယ်လ်နာဆာ အသင်းမှာ ကစားနေတာပါ။ 

ရော်နယ်ဒိုနဲ့ အယ်လ်နာဆာအသင်းတို့ရဲ့ စာချုပ်ဟာ ဒီရာသီကုန်ရင် ကုန်ဆုံးမှာဖြစ်ပေမယ့် နောက်ထပ် တစ်နှစ် သက်တမ်းတိုးဖို့ သဘောတူညီမှု ရရှိထားပြီးဖြစ်ပါတယ်။ 

ရော်နယ်ဒိုဟာ အယ်လ်နာဆာအသင်းက အယ်လ်ရီဒ့်အသင်းကို ၂ ဂိုး-၁ ဂိုးနဲ့ အနိုင်ရရှိခဲ့တဲ့ ပြီးခဲ့တဲ့ ဆော်ဒီပရိုလိဂ် ပွဲစဉ်မှာ အသင်းအတွက် ၁ ဂိုးသွင်းပြီး ၁ ဂိုးဖန်တီးနိုင်ခဲ့တာပါ။ 

ရော်နယ်ဒိုဟာ ဒီရာသီမှာ အယ်လ်နာဆာအသင်းအတွက် ပြိုင်ပွဲစုံ ၂၄ ပွဲ ပါဝင်ကစားထားပြီး ၂၁ ဂိုးသွင်းယူကာ ခြေစွမ်းဆက်ပြီး ပြသနေတာဖြစ်ပါတယ်။ 

Source: Goal

CNI Sport News

၂၀၂၅ ခုနှစ်၊ ဇန်နဝါရီ ၃၁ 

ယူနိုက်တက်အသင်းဟာ ယူရိုပါလိဂ်အုပ်စု နောက်ဆုံးပွဲစဉ်မှာ စတူအာဘူခါရက်စ်အသင်းကို ၂ ဂိုး-ဂိုး မရှိနဲ့ အနိုင်ရရှိကာ ၁၆ သင်းအဆင့်ကို တက်ရောက်နိုင်ခဲ့ပြီးနောက် အသင်းဟာ ဆုဖလားရယူနိုင်ဖို့ ပစ်မှတ်ထား ရမယ်လို့ နည်းပြအာမိုရင်က ပြောခဲ့ပါတယ်။

အာမိုရင်က “ကျနော်တို့ရဲ့ ကစားပုံက ကြီးကြီးမားမား ကွာခြားတာကို မမြင်တွေ့ခဲ့ပေမယ့် ဒီပွဲမှာ စဉ်းစားဖို့ အချိန်ပိုရခဲ့ပြီး လှုပ်ရှားမှု အချို့ကို မြင်တွေ့နိုင်သလို အတွေးအခေါ်တွေလည်း ရှိနေပါတယ်။ ကျနော်တို့ဟာ တစ်ပွဲပြီးတစ်ပွဲ အနိုင်ရယူနိုင်မယ်လို့ ထင်ပါတယ်။ ခင်ဗျားအနေနဲ့ ဘယ်လို အခြေအနေပဲရှိရှိ ယူနိုက်တက်မှာ ရှိနေတယ်ဆိုရင် ဆုဖလားတွေ ရယူနိုင်ဖို့ တိုက်ပွဲဝင်ရမှာပါ။ ဘယ်အသင်းနဲ့မဆို အနိုင်ယူနိုင်တယ်ဆိုတာ သက်သေပြရမယ်”လို့ ပြောခဲ့တာပါ။ 

ပေါ်တူဂီလူမျိုးနည်းပြ အာမိုရင်ရဲ့ ယူနိုက်တက်အသင်း နည်းပြဘဝ အစပိုင်းဟာ ရုန်းကန်နေရပေမယ့် အသင်းဟာ နောက်ဆုံးကစားခဲ့တဲ့ ၃ ပွဲဆက်တိုက် နိုင်ပွဲပြန်လည်ရရှိခဲ့တာ ဖြစ်ပါတယ်။

အာမိုရင်ဟာ ယူနိုက်တက်အသင်းကို သူကိုင်တွယ်ခဲ့တဲ့ ယူရိုပါလိဂ် အုပ်စုပွဲစဉ် ၄ ပွဲစလုံး အနိုင်ရရှိအောင် စွမ်းဆောင်ပေးနိုင်ခဲ့တာပါ။ 

ယူနိုက်တက်အသင်းကို တွေ့ရစဉ်

ယူနိုက်တက်အသင်းဟာ စတူအာဘူခါရက်စ်အသင်းကို အနိုင်ရရှိခဲ့တာကြောင့် အမှတ်ပေးဇယား အဆင့် ၃ နေရာ ရပ်တည်ကာ ၁၆ သင်းအဆင့်ကို တိုက်ရိုက်တက်နိုင်ခဲ့တာ ဖြစ်ပါတယ်။ 

ယူနိုက်တက်အသင်းဟာ ပလေးအော့ဖ်အဆင့်ကို ရှောင်နိုင်ခဲ့တာကြောင့် နည်းပြအာမိုရင်က ဒါဟာ သူတို့အတွက် အလွန်အရေးပါပြီး ပွဲအတွက် ပြင်ဆင်နိုင်ဖို့ အချိန်ပိုရသလို ကစားသမားတွေ အကြောင်းကို ပိုပြီးနားလည်နိုင်မှာ ဖြစ်တယ်လို့ ပြောခဲ့တာပါ။

ယူနိုက်တက်အသင်းဟာ မတ်လရောက်ရှိမှသာ ယူရိုပါလိဂ် ၁၆ သင်းအဆင့်ပွဲစဉ်တွေကို ပြန်ပြီးယှဉ်ပြိုင်ရမှာ ဖြစ်ပါတယ်။ 

ယူနိုက်တက်အသင်းဟာ ယူရိုပါလိဂ်ပြိုင်ပွဲမှာ နောက်တဆင့် တက်ခဲ့ပြီးဖြစ်လို့ ပရီးမီးယားလိဂ်ပြိုင်ပွဲမှာ ရလဒ်ကောင်းတွေ ပြန်ရယူနိုင်ဖို့ အာရုံစိုက်ရတော့မှာပါ။ 

ပရီးမီးယားလိဂ် အမှတ်ပေးဇယား အဆင့် ၁၂ နေရာမှာ ရပ်တည်နေတဲ့ ယူနိုက်တက်အသင်းဟာ ဖေဖော်ဝါရီ ၂ ရက်မှာ ပဲလေ့စ်အသင်းကို အိမ်ကွင်း လက်ခံယှဉ်ပြိုင်ရမှာဖြစ်ပါတယ်။ 

 Source: ESPN

 CNI Sport News

၂၀၂၅ ခုနှစ်၊ ဇန်နဝါရီလ ၃၀

ဒေါ့မွန်အသင်းဟာ ရလဒ်ဆိုးတွေကြောင့် ထုတ်ပယ်ခဲ့တဲ့ နည်းပြနူရီဆာဟင်ရဲ့နေရာမှာ ကိုဗက်ကို နည်းပြသစ် အဖြစ်ခန့်အပ်ခဲ့ပါတယ်။ 

ဘိုင်ယန်မြူးနစ်အသင်းနည်းပြဟောင်း ကိုဗက်ဟာ လာမယ့်တနင်္ဂနွေနေ့မှာ ဒေါ့မွန်အသင်းကို နည်းပြသစ် အဖြစ် စတင်ကိုင်တွယ်သွားမှာပါ။ 

အသက် ၅၃ နှစ်အရွယ်ရှိ ကိုဗက်ဟာ ပြီးခဲ့တဲ့နှစ် မတ်က ဝုလ်ဖ်ဘတ်အသင်းကနေ ထွက်ခွာပြီးကတည်းက ဘယ်အသင်းကိုမှ ကိုင်တွယ်ရခြင်းမရှိသေးပါဘူး။ 

ပြီးခဲ့တဲ့ ရှက်တာဒိုးနက်အသင်းနဲ့ ချန်ပီယံလိဂ်ပွဲစဉ်မှာ ဒေါ့မွန်အသင်းကို လူငယ်အသင်းနည်းပြ တူလ်ဘာချ်က ကိုင်တွယ်ခဲ့ပြီး အနိုင်ရရှိအောင် စွမ်းဆောင်ပေးနိုင်ခဲ့တာဖြစ်ပါတယ်။

တူလ်ဘာချ်ဟာ လာမယ့် ဟိုင်ဒန်ဟိုင်းအသင်းနဲ့ ဘွန်ဒက်လီဂါပွဲစဉ်မှာလည်း ဒေါ့မွန်အသင်းကို ယာယီနည်းပြ အဖြစ်ဆက်ပြီးတာဝန်ယူသွားမှာပါ။ 

ဒေါ့မွန်အသင်းဟာ ဒီရာသီဘွန်ဒက်လီဂါပွဲစဉ် ၁၉ ပွဲကစားအပြီးမှာ ရမှတ် ၂၆ မှတ်နဲ့ အမှတ်ပေးဇယားအဆင့် ၁၁ နေရာမှာရပ်တည်နေတာဖြစ်ပါတယ်။

 ဒေါ့မွန်အသင်းဟာ ချန်ပီယံလိဂ် ပြိုင်ပွဲ မှာ အမှတ်ပေးဇယားအဆင့် ၁၀ နေရာမှာရပ်တည်ခဲ့တာကြောင့် နောက်တဆင့်တက်ဖို့ ပလေးအော့ဖ် ယှဉ်ပြိုင် ရမှာပါ။ 

ကိုဗက်ဟာ ဒေါ့မွန်အသင်းကို ဘွန်ဒက်လီဂါပြိုင်ပွဲမှာ ထိပ်ဆုံး ၄ သင်းထဲကို ပြန်လည်ဝင်ရောက်ဖို့နဲ့ ချန်ပီယံ လိဂ်ပြိုင်ပွဲမှာ ၁၆ သင်းအဆင့်တက်နိုင်အောင် ကိုင်တွယ်ပေးရတော့မှာဖြစ်ပါတယ်။ 

ကိုဗက်ဟာ နည်းပြဘဝမှာ ခရိုအေးရှား၊ဖရန့်ဖတ်၊ဘိုင်ယန်မြူးနစ်၊မိုနာကိုနဲ့ဝုလ်ဖ်ဘတ်အသင်းတွေကို ကိုင်တွယ်ခဲ့တာပါ။ 

ကိုဗက်ဟာ နည်းပြဘဝမှာ ဘိုင်ယန်မြူးနစ်အသင်းနဲ့ ဆုဖလား ၃ လုံး၊ဖရန့်ဖတ်အသင်းနဲ့ ဆုဖလား ၁ လုံးရယူ နိုင်ခဲ့တာ ဖြစ်ပါတယ်။ 

Source:BBC

CNI Sport News

၂၀၂၅ ခုနှစ်၊ ဇန်နဝါရီ ၃၀

ယူနိုက်တက်၊ ချယ်လ်ဆီးနဲ့ အာဆင်နယ်အသင်းတို့ရဲ့ အပြောင်းအရွှေ့ ပစ်မှတ်ဖြစ်တဲ့ ပြင်သစ်ကြယ်ပွင့် မာသီးတဲလ်ဟာ ဇန်နဝါရီအပြောင်းအရွှေ့မှာ အသင်းကနေ ထွက်ခွာချင်နေတယ်လို့ ဘိုင်ယန်မြူးနစ်အသင်းက အတည်ပြုခဲ့ပါတယ်။ 

မာသီးတဲလ်ဟာ ဒီရာသီ နည်းပြကွန်ပနီ လက်အောက် ဘိုင်ယန်မြူးနစ်အသင်းမှာ ပွဲကစားခွင့်ရဖို့ ခက်ခဲနေပြီး အိုလီဆီ၊ ကိုးမန်း၊ ဆာနေးနဲ့ ဂနာဘရီတို့ရဲ့ အနောက်မှာသာ ပွဲကစားခွင့် ရရှိနေတာပါ။ 

အသက် ၁၉ နှစ်အရွယ်ရှိ မာသီးတဲလ်ဟာ ပွဲကစားချိန် နည်းပါးနေတာကြောင့် ဘိုင်ယန်မြူးနစ်အသင်းမှာ သူ့ရဲ့အနာဂတ်ကို စဉ်းစားမှုတွေ ပြုလုပ်နေတာ ဖြစ်ပါတယ်။ 

အခုအချိန်မှာတော့ မာသီးတဲလ်ဟာ ပရီးမီးယားလိဂ် ကလပ်အသင်းတွေရဲ့ စိတ်ဝင်စားမှုနဲ့အတူ ဇန်နဝါရီ အပြောင်းအရွှေ့မှာ ဘိုင်ယန်မြူးနစ်အသင်းကနေ ထွက်ခွာဖို့ဆုံးဖြတ်ခဲ့တာပါ။ 

ဆလိုဗန်အသင်းကို အနိုင်ရခဲ့တဲ့ ချန်ပီယံလိဂ်ပွဲစဉ်မှာ ဘိုင်ယန်မြူးနစ်အသင်းရဲ့ ပွဲထွက်လူစာရင်းထဲ ပါဝင်ခဲ့တဲ့ မာသီးတဲလ်ဟာ သူ့ကိုလူစားလဲတဲ့အချိန်မှာ အသင်းပရိသတ်တွေကို နှုတ်ဆက်မှု ပြုလုပ်သွားခဲ့ပါတယ်။ 

ဘိုင်ယန်မြူးနစ်အသင်း အားကစားဒါရိုက်တာဖြစ်သူက မာသီးတဲလ်ဟာ အသင်းကနေ ထွက်ခွာခွင့် တောင်းဆို ထားတယ်လို့ ပွဲအပြီးမှာ ပြောခဲ့တာပါ။ 

မာသီးတဲလ်ကို တွေ့ရစဉ်

ဘိုင်ယန်မြူးနစ်အသင်းဟာ မာသီးတဲလ်ကို အငှား ဒါမှမဟုတ် အပြီးသတ် ထွက်ခွာခွင့်ပေးဖို့ ရှိနေပါတယ်။ 

မာသီးတဲလ်ကတော့ ပွဲအပြီးမှာ သူ့ရဲ့ထွက်ခွာမှု အခြေအနေနဲ့ပတ်သက်ပြီး Sky Germany ရဲ့မေးမြန်းမှုကို သူမသိဘူးလို့သာ ဖြေသွားခဲ့တာပါ။ 

ချယ်လ်ဆီးအသင်းဟာ မာသီးတဲလ်ကို ခေါ်ယူဖို့ ဇန်နဝါရီအပြောင်းအရွှေ့ အစောပိုင်းမှာကတည်းက ဘိုင်ယန်မြူးနစ်အသင်းကို စုံစမ်းမေးမြန်းမှုတွေ ပြုလုပ်ထားခဲ့တာ ဖြစ်ပါတယ်။

အာဆင်နယ်အသင်းကလည်း မာသီးတဲလ်ကို ကာလရှည်ကြာ စိတ်ဝင်စားနေခဲ့ပြီး ယူနိုက်တက်အသင်းကတော့ ဂါနာချိုနဲ့ ရက်ရှ်ဖို့ဒ်တို့ ထွက်ခွာနိုင်တဲ့ အခြေအနေကြောင့် မာသီးတဲလ်ကို ခေါ်ယူဖို့ ပစ်မှတ်ထားလာခဲ့တာပါ။ 

၂၀၂၂ ခုနှစ်က ရီးနက်စ်အသင်းကနေ ရောက်ရှိလာခဲ့တဲ့ မာသီးတဲလ်ဟာ ဘိုင်ယန်မြူးနစ်အသင်းအတွက် ပွဲပေါင်း ၈၃ ပွဲပါဝင်ကစားထားပြီး ၁၆ ဂိုး သွင်းယူထားတာဖြစ်ပါတယ်။ 

Source: Metro

 CNI Sport News

၂၀၂၅ ခုနှစ်၊ ဇန်နဝါရီ ၃၀

အက်စတွန်ဗီလာအသင်းဟာ တိုက်စစ်မှူး ဝက်ကင်စ်ကို ခေါ်ယူဖို့ အာဆင်နယ်အသင်းရဲ့ တရားဝင် ကမ်းလှမ်းမှု ပြုလုပ်ခဲ့တာကို ပယ်ချခဲ့ပါတယ်။ 

အာဆင်နယ်အသင်းဟာ ဇန်နဝါရီအပြောင်းအရွှေ့ ဈေးကွက်မပိတ်ခင်မှာ တိုက်စစ်မှူးတစ်ဦး ခေါ်ယူနိုင်ဖို့ လုပ်ဆောင်နေပြီး လိုက်ပ်ဇစ်အသင်း တိုက်စစ်မှူး ဆက်စ်ကို,ကို ခေါ်ယူဖို့ အဆင်မပြေခဲ့ပြီးနောက် ဝက်ကင်စ်ကို ခေါ်ယူနိုင်ဖို့ ကြိုးပမ်းခဲ့တာပါ။

အာဆင်နယ်အသင်းဟာ အက်စတွန်ဗီလာအသင်းက ဆဲလ်တစ်အသင်းကို ၄ ဂိုး-၂ ဂိုးနဲ့ အနိုင်ရခဲ့တဲ့ ချန်ပီယံလိဂ် ပွဲစဉ် မတိုင်ခင်မှာ ဝက်ကင်စ်ကိုခေါ်ယူဖို့ ပေါင်သန်း ၆၀ နဲ့ ကမ်းလှမ်းမှု ပြုလုပ်ခဲ့ပေမယ့် အက်စတွန်ဗီလာ အသင်းက ပယ်ချခဲ့တာဖြစ်ပါတယ်။

အက်စတွန်ဗီလာအသင်းဟာ ချန်ပီယံလိဂ်ပွဲစဉ် ယှဉ်ပြိုင်ရမယ့်အချိန်မှာ ဝက်ကင်စ်ကို ခေါ်ယူဖို့ အာဆင်နယ် အသင်းရဲ့ ကမ်းလှမ်းမှုကို မကျေမနပ် ဖြစ်နေတယ်လို့ သိရပါတယ်။ 

ဝက်ကင်စ်ကို တွေ့ရစဉ်

ဝက်ကင်စ်ဟာ ၂၀၂၀ ခုနှစ်က အာဆင်နယ်အသင်းအတွက် တစ်နေ့နေ့မှာ ကစားပေးဖို့က သူ့ရဲ့အိပ်မက်ဖြစ်တယ် လို့ ပြောထားတာကြောင့် လန်ဒန်ကလပ်က သူ့ကိုခေါ်ယူနိုင်ဖို့ ပစ်မှတ်ထားခဲ့တာပါ။ 

အက်စတွန်ဗီလာအသင်းရဲ့ တိုက်စစ်မှူး တစ်ဦးဖြစ်တဲ့ ဒူရန်ဟာ အယ်လ်နာဆာအသင်းထံ ပြောင်းရွှေ့မှာဖြစ်လို့ အာဆင်နယ်အသင်းအနေနဲ့ ဝက်ကင်စ်ကို ခေါ်ယူနိုင်ဖို့အတွက် ခက်ခဲနိုင်ဖွယ်ရှိနေပါတယ်။

အက်စတွန်ဗီလာအသင်းနည်းပြ အူနှိုင်းအမ်မရီက ဝက်ကင်စ်ကို မရောင်းချစေချင်ဘူးလို့ ဆဲလ်တစ်အသင်းကို အနိုင်ရခဲ့တဲ့ ချန်ပီယံလိဂ်ပွဲအပြီးမှာ ပြောခဲ့ပါတယ်။ 

အူနှိုင်းအမ်မရီက “ကျနော်ကတော့ ဝက်ကင်စ်ကို မရောင်းချစေချင်ပါဘူး။ တခြားအသင်းတွေဆီကနေ ကမ်းလှမ်း မှုရှိတာက သတင်းကောင်းပါပဲ။ ကစားသမားတိုင်းဟာ ကောင်းမွန်တယ်ဆိုရင် ဈေးကွက်ထဲမှာ ရှိနေနိုင်ပါတယ်။ ဒါပေမယ့် ဒီလိုသဘောတူညီမှုအတွက် ကျနော်တို့ဘက်က အလွန်တောင်းဆိုမှု ရှိလာမယ်ဆိုတာ သေချာပါတယ်။ ဝက်ကင်စ်က ကျနော်တို့ရဲ့တိုက်စစ်မှူးပါ”လို့ ပြောခဲ့တာပါ။ 

၂၀၂၀ ခုနှစ်က ဘရန်ဖို့ဒ်အသင်းကနေ ပြောင်းရွှေ့လာခဲ့တဲ့ ဝက်ကင်စ်ဟာ အက်စတွန်ဗီလာအသင်းအတွက် ပွဲပေါင်း ၂၀၀ ပါဝင် ကစားထားပြီး သွင်းဂိုး ၈၀ သွင်းယူကာ စာချုပ်သက်တမ်း ၃ နှစ် ကျန်ရှိနေသေးတာ ဖြစ်ပါတယ်။ 

Source: ESPN

CNI Sport News

၂၀၂၅ ခုနှစ်၊ ဇန်နဝါရီ ၃၀

မန်စီးတီးအသင်းဟာ ချန်ပီယံလိဂ်အုပ်စု နောက်ဆုံးပွဲစဉ်မှာ ကလပ်ဘရုဂျက်အသင်းကို ၃ ဂိုး-၁ ဂိုးနဲ့ အနိုင်ရပြီး ပလေးအော့ဖ် ယှဉ်ပြိုင်ခွင့်ရရှိခဲ့ပေမယ့် နည်းပြဂွာဒီယိုလာက သူ့ရဲ့အသင်းဟာ ဒီရာသီ ချန်ပီယံလိဂ်ဖလားကို ရယူနိုင်မယ်လို့ မထင်ကြောင်း ပြောခဲ့ပါတယ်။

ဂွာဒီယိုလာက “အခုပုံစံနဲ့ ချန်ပီယံလိဂ်ဖလားကို ကျနော်တို့ ရယူနိုင်မယ်လို့ မထင်ပါဘူး။ ကျနော်က အလွန် လက်တွေ့ ကျတဲ့သူပါ။ သူတို့တွေဟာ ကျနော်တို့ထက် ပိုအတွေ့အကြုံရှိပြီး မက်ဒရစ်ဆိုရင် နောက်ဆုံးပွဲတွေမှာ ပြန်လာနိုင်ခဲ့သလို ဘိုင်ယန်မြူးနစ်အသင်းဟာ ကွန်ပနီနဲ့အတူ မယုံနိုင်စရာကောင်းတဲ့ ရာသီတစ်ခုကို ရရှိထား ပါတယ်။ မနက်ဖြန်မှာ ကစားရင် ခက်ခဲနိုင်မှာ ဖြစ်ပေမယ့် လာမယ့် နှစ်ပတ်အတွင်းမှာ ကျနော်တို့ဟာ ပွဲကောင်း နှစ်ပွဲကို ကစားနိုင်ဖို့မျှော်လင့်တယ်”လို့ ပြောခဲ့တာပါ။ 

မန်စီးတီးအသင်းကို တွေ့ရစဉ်

မန်စီးတီးအသင်းဟာ ကလပ်ဘရုဂျက်အသင်းကို အနိုင်ရရှိခဲ့တာကြောင့် ချန်ပီယံလိဂ် အမှတ်ပေးဇယား အဆင့် ၂၂ နေရာ ရပ်တည်ကာ ပလေးအော့ဖ် ယှဉ်ပြိုင်ခွင့် ရရှိသွားခဲ့တာ ဖြစ်ပါတယ်။ 

မန်စီးတီးအသင်းဟာ ပလေးအော့ဖ်အဆင့်မှာ အဆင့် ၁၁ နဲ့ ၁၂ နေရာ ရပ်တည်ခဲ့တဲ့ ရီးရယ်လ်နဲ့ ဘိုင်ယန်မြူးနစ် အသင်းတို့ ၂ သင်းထဲက ၁ သင်းနဲ့ တွေ့ဆုံရမှာပါ။

အဲဒါကြောင့် မန်စီးတီးအသင်းဟာ ပလေးအော့ဖ်အဆင့်မှာ ခက်ခဲတဲ့ပွဲစဉ်ကို ယှဉ်ပြိုင်ရမှာဖြစ်ပါတယ်။ 

မန်စီးတီးအသင်းနည်းပြ ဂွာဒီယိုလာကတော့ ပလေးအော့ဖ် ပွဲစဉ်မတိုင်ခင်မှာ ကစားသမားသစ်တွေ၊ ဒဏ်ရာ ရနေတဲ့ ကစားသမားတွေ ပြန်လာနိုင်မှာဖြစ်လို့ သူတို့တွေသာ ပြန်ပါဝင်နိုင်ရင် ချန်ပီယံလိဂ်ပြိုင်ပွဲကို အကောင်းဆုံး ယှဉ်ပြိုင်နိုင်မယ်လို့ ပြောခဲ့တာပါ။

ရီးရယ်လ်အသင်းဟာ ပလေး‌အော့ဖ်အဆင့်မှာ မန်စီးတီးအသင်းနဲ့ တွေ့ဆုံနိုင်ဖွယ် ရှိနေပေမယ့် ဂိုးသမား ကော့တွိုက်စ်က သူတို့ဟာ ဘယ်အသင်းကိုမှ ကြောက်နေမှာ မဟုတ်ဘူးလို့ ပြောခဲ့ပါတယ်။ 

ချန်ပီယံလိဂ် ပလေးအော့ဖ် အဆင့်အတွက် မဲခွဲမှုကို ဇန်နဝါရီ ၃၁ ရက်မှာ ပြုလုပ်သွားဖို့ရှိနေပြီး ဒီပွဲတွေကို ဖေဖော်ဝါရီအတွင်းမှာ ကျင်းပသွားမှာပါ။ 

မန်စီးတီးအသင်းဟာ ဒီတစ်ပတ် ပရီးမီးယားလိဂ် ပွဲစဉ်အဖြစ် အာဆင်နယ်အသင်းနဲ့ ယှဉ်ပြိုင်ရမှာဖြစ်ပါတယ်။ 

Source: ESPN