CNI Sport News

၂၀၂၅ ခုနှစ်၊ ဇန်နဝါရီ ၂၂

ဘာစီလိုနာအသင်းနည်းပြ ဟန်ဆီဖလစ်က ဘင်ဖီကာအသင်းကို အရှုံးကနေ ၅ ဂိုး-၄ ဂိုးနဲ့ အနိုင်ရရှိအောင် ကစားနိုင်ခဲ့တဲ့ ချန်ပီယံလိဂ်ပွဲစဉ်က အသင်းရဲ့စိတ်ဓါတ်ပိုင်းကို ချီးကျူးသွားခဲ့ပါတယ်။

ဟန်ဆီဖလစ်က “ဒီပွဲက ရူးသွပ်ဖို့ကောင်းတဲ့ပွဲပါ။ အပေါင်းလက္ခဏာ အရှိဆုံးအရာကတော့ ကျနော်တို့မှာရှိနေတဲ့ စိတ်ဓါတ်ပိုင်းပါ။ ကျနော်တို့ ပြန်လာနိုင်ခဲ့တာက အံ့သြဖို့ကောင်းပါတယ်။ ဒါက ဘောလုံးဖြစ်ပြီး ဒီလိုမျိုးအရာကို ကျနော်တို့ နှစ်သက်ပါတယ်။ ဒီလိုမျိုးပြန်လာနိုင်တာကို ကျနော်တစ်ကြိမ်မှ မကြုံတွေ့ဖူးဘူးလို့ ထင်ပါတယ်။ မယုံနိုင်စရာကောင်းခဲ့ပါတယ်။ ပထမပိုင်းမှာ သူတို့ကောင်းမွန်ခဲ့ပေမယ့် ဒုတိယပိုင်းမှာ ကျနော်တို့ ပိုကောင်းခဲ့ပြီး လူစားလဲမှုတွေက အများကြီး အကူအညီပေးခဲ့တယ်”လို့ Movistar ကိုပြောခဲ့တာပါ။ 

ဒီပွဲစဉ်ရဲ့ ပထမပိုင်းမှာ ဘာစီလိုနာအသင်းဟာ ဘင်ဖီကာအသင်းရဲ့ ၃ ဂိုး-၁ ဂိုးနဲ့ ဦးဆောင်ခြင်းကို ခံခဲ့ရပြီး ဒုတိယပိုင်းပွဲချိန် ၆၈ မိနစ်အထိ ၄ ဂိုး-၂ ဂိုးနဲ့ အရေးနိမ့်နေခဲ့တာ ဖြစ်ပါတယ်။ 

ဒါပေမယ့် ဘာစီလိုနာအသင်းဟာ ပွဲကစားချိန်မိနစ် ၉၀ အတွင်း ချေပဂိုးတွေသွင်းပြီး နာကျင်အချိန်ပိုမှာ အနိုင်ဂိုး သွင်းယူခဲ့တာကြောင့် ဘင်ဖီကာအသင်းကို ၅ ဂိုး-၄ ဂိုးနဲ့ အနိုင်ရရှိခဲ့တာပါ။

ဘာစီလိုနာအသင်းနဲ့ ဘင်ဖီကာအသင်း ယှဉ်ပြိုင်နေစဉ် 

ဘာစီလိုနာအသင်းဟာ ဒီနိုင်ပွဲကြောင့် ချန်ပီယံလိဂ် ၁၆ သင်းအဆင့်ကို တိုက်ရိုက် တက်ရောက်နိုင်ခဲ့ပြီ ဖြစ်ပါတယ်။ 

ဒီပွဲအပြီးမှာ ပြိုင်ဘက်နှစ်သင်း ကစားသမားတွေဟာ ဥမင်ထဲမှာ ထိပ်တိုက်တွေ့ဆုံမှုတွေ ရှိခဲ့ကြပြီး ဘာစီလိုနာ အသင်းအတွက် အနိုင်ဂိုးသွင်းယူခဲ့တဲ့ ရာဖင်ညာက ဘင်ဖီကာအသင်းရဲ့ စော်ကားမှုကြောင့် ပြန်လည်တုန့်ပြန် ခဲ့တယ်လို့ ပြောခဲ့တာပါ။ 

ရာဖင်ညာက သူဟာ လူတိုင်းကို လေးစားသလို ဘင်ဖီကာအသင်းက သူ့ကို လေးစားရင် ပြန်လေးစားမှာ ဖြစ်ပေမယ့် သူတို့က စော်ကားတဲ့အတွက် ပါးစပ်ပိတ်နေမှာ မဟုတ်ဘူးလို့ ပွဲအပြီးအင်တာဗျူးမှာ ပြောခဲ့တာပါ။ 

ဘာစီလိုနာအသင်းဟာ ချန်ပီယံလိဂ် အုပ်စုအဆင့် နောက်ဆုံးပွဲစဉ်အဖြစ် အတ္တလန်တာအသင်းနဲ့ ယှဉ်ပြိုင်ရမှာ ဖြစ်ပြီး ဒီတစ်ပတ် လာလီဂါပွဲစဉ်အဖြစ် ဗလင်စီယာအသင်းကို အိမ်ကွင်းလက်ခံ ယှဉ်ပြိုင်ရမှာဖြစ်ပါတယ်။ 

Source: CNA

CNI Sport News

၂၀၂၅ ခုနှစ်၊ ဇန်နဝါရီ ၂၁

ဝက်စ်ဟမ်းအသင်းဟာ အာဆင်နယ်နဲ့ ချယ်လ်ဆီးအသင်းတို့ရဲ့ ပစ်မှတ်ဖြစ်တဲ့ အက်စတွန်ဗီလာအသင်း တိုက်စစ်မှူး ဒူရမ်ကို ခေါ်ယူနိုင်ဖို့ ပေါင် ၅၇ သန်းနဲ့ ကမ်းလှမ်းမှု ပြုလုပ်ခဲ့ပါတယ်။ 

ကိုလံဘီယာ ကစားသမား ဒူရမ်ဟာ အက်စတွန်ဗီလာ အသင်းနဲ့အတူ ကောင်းမွန်တဲ့ ရာသီတစ်ခုကို ဖြတ်သန်း နေပြီး ဒီရာသီမှာ အသင်းအတွက် ၁၂ ဂိုး သွင်းယူထားတာပါ။

ဒူရမ်ဟာ အက်စတွန်ဗီလာအသင်းမှာ အင်္ဂလန်တိုက်စစ်မှူး ဝက်ကင်စ်ရဲ့အနောက်မှာ ဒုတိယတိုက်စစ်မှူးအဖြစ် ရှိနေပေမယ့် ပါဝင်ခွင့်ရတဲ့ပွဲတိုင်း အကောင်းဆုံး ခြေစွမ်းပြသနေတာ ဖြစ်ပါတယ်။ 

ဝက်ကင်စ်ဟာ သူ့ရဲ့ စွမ်းဆောင်ရည်ကြောင့် ပရီးမီးယားလိဂ် ကလပ်အသင်းတွေကို ဆွဲဆောင်မှုတွေ ပြုလုပ် နိုင်ခဲ့တာပါ။ 

ချယ်လ်ဆီးအသင်းဟာ ဒူရမ်ကို ကာလရှည်ကြာ ချိတ်ဆက်ခဲ့ပြီး နွေရာသီက ပေါင် ၄၂ သန်းနဲ့ ခေါ်ယူဖို့ နီးစပ်ခဲ့ သေးပါတယ်။ 

အာဆင်နယ်အသင်းကလည်း ဒူရမ်အတွက် အက်စတွန်ဗီလာအသင်းကို ချဉ်းကပ်မှု ပြုလုပ်ခဲ့ပြီး ဝက်စ်ဟမ်း အသင်းရဲ့ နွေရာသီမှာ ပြုလုပ်ခဲ့တဲ့ ကမ်းလှမ်းမှုကတော့ ပယ်ချခံခဲ့ရတာပါ။

The Athletic က ဝက်စ်ဟမ်းအသင်းဟာ ဒူရမ်ကို ခေါ်ယူနိုင်ဖို့ အလွန်စိတ်အား ထက်သန်နေပြီး နောက်ထပ် တရားဝင် ကမ်းလှမ်းမှု ပြုလုပ်ထားတယ်လို့ ဖော်ပြထားပါတယ်။ 

 ဒူရမ်ကိုတွေ့ရစဉ်

ဝက်စ်ဟမ်းအသင်းရဲ့ ပေါင် ၅၇ သန်းနဲ့ ကမ်းလှမ်းမှုဟာ ပြီးခဲ့တဲ့ ကမ်းလှမ်းမှုထက် ၂ ဆနီးပါး ဖြစ်ပေမယ့် အက်စတွန်ဗီလာအသင်းက သတ်မှတ်ထားတဲ့ ပေါင် ၇၅ သန်းထက် နည်းပါးနေတာကြောင့် ပယ်ချခံရဖို့ ရှိနေတာပါ။ 

ဝက်စ်ဟမ်းအသင်းဟာ ခက်ခဲတဲ့ ရာသီတစ်ခုကို ဖြတ်သန်းနေရပြီး ပရီးမီးယားလိဂ် အမှတ်ပေးဇယား အဆင့် ၁၄ နေရာမှာ ရပ်တည်နေကာ မကြာသေးခင်ကမှ ဂရေဟမ်ပေါ်တာကို နည်းပြသစ်အဖြစ် ခန့်အပ်ထားပါတယ်။

ဝက်စ်ဟမ်းအသင်းရဲ့ နွေရာသီက ခေါ်ယူခဲ့တဲ့ တိုက်စစ်မှူး ဖူလ်ကုဟာ တံကောက်ကြောဒဏ်ရာ ရရှိနေပြီး အသင်းခေါင်းဆောင် ဘိုဝင်ဟာ ဒဏ်ရာကြောင့် အနားယူနေရတာပါ။ 

ဒါအပြင် ဝါရင့်တိုက်စစ်မှူး အန်တိုနီယိုဟာ ကားတိုက်မှုကြောင့် လာမယ့်ရာသီမှသာ ပြန်ကစားနိုင်ဖွယ် ရှိနေပါတယ်။ 

အဲဒါကြောင့် ဝက်စ်ဟမ်းအသင်းဟာ တိုက်စစ်မှူး တစ်ဦးခေါ်ယူနိုင်ဖို့ ကြိုးပမ်းနေပြီး ဘရိုက်တန်အသင်း တိုက်စစ်မှူး အီဗန်ဖာဂူဆန်ကို ခေါ်ယူဖို့လည်း စိတ်ဝင်စားနေတာ ဖြစ်ပါတယ်။ 

Source: Metro

CNI Sport News

၂၀၂၅ ခုနှစ်၊ ဇန်နဝါရီ ၂၁

ဒီရာသီအကုန်မှာ မန်စီးတီးအသင်းနဲ့ စာချုပ်ကုန်ဆုံးတော့မယ့် ကွင်းလယ်လူ ဒီဘရိုင်းဟာ သူ့ရဲ့အနာဂတ်နဲ့ ပတ်သက်ပြီး အသင်းနဲ့ စကားပြောဆိုမှု ပြုလုပ်ရခြင်း မရှိသေးဘူးလို့ ပြောခဲ့ပါတယ်။

ဒီဘရိုင်းက “အခုအချိန်မှာ မန်စီးတီးအသင်းနဲ့ စကားမပြောရသေးပါဘူး။ ကျနော်ဟာ ပိုပြီးကောင်းချင်သလို ပိုပြီးကောင်းအောင် လုပ်နေတာကြောင့် ကျနော်ပျော်ပါတယ်။ တစ်ခုခုဖြစ်နိုင်လို့ ကျနော်တို့ ကြည့်ရမှာပါ။ ဘယ်ကိုသွားသွား ၁၀ နှစ် စာချုပ်ချုပ်ရမယ်လို့ မထင်တဲ့အတွက် စိတ်ဖိစီးစရာမလိုဘူး”လို့ အနာဂတ်နဲ့ ပတ်သက်တဲ့မေးခွန်းကို ဖြေခဲ့တာပါ။ 

မန်စီးတီးအသင်းဟာ ဒီဘရိုင်းကို စာချုပ်သက်တမ်း မတိုးဘူးဆိုရင် ၂၀၁၅ ခုနှစ်ကတည်းက အသင်းမှာရှိခဲ့တဲ့ ဘယ်လ်ဂျီယံကစားသမားရဲ့ ၁၀ နှစ်ကြာအချိန်ဟာ နွေရာသီကျရင် အဆုံးသတ်တော့မှာ ဖြစ်ပါတယ်။ 

မန်စီးတီးအသင်းဟာ ပြီးခဲ့တဲ့ရက်ပိုင်းက တိုက်စစ်မှူး ဟာလန်းကို ၂၀၃၄ ခုနှစ်အထိရှိမယ့် ကာလရှည် စာချုပ် ချုပ်ဆိုခဲ့ပြီးနောက် ဒီဘရိုင်းကိုလည်း စာချုပ်သစ် ချုပ်ဆိုလာနိုင်တယ်လို့ သတင်းတွေ ထွက်ခဲ့တာပါ။ 

ဒီဘရိုင်းကို တွေ့ရစဉ်

ဒီဘရိုင်းဟာ ပြီးခဲ့တဲ့ ရာသီတွေအတွင်းမှာ တံကောက်ကြောဒဏ်ရာနဲ့ ရုန်းကန်ခဲ့ရပြီး ဒီရာသီမှာ မန်စီးတီးအသင်း အတွက် ပရီးမီးယားလိဂ် ၁၅ ပွဲ ပါဝင်ကစားထားပါတယ်။ 

အသက် ၃၃ နှစ်အရွယ်ရှိ ဒီဘရိုင်းကို ခေါ်ယူဖို့ ဆော်ဒီနဲ့ မေဂျာလိဂ်ကလပ်တွေက ချိတ်ဆက်မှုတွေ ပြုလုပ် နေကြတာပါ။ 

မန်စီးတီးအသင်းနည်းပြ ဂွာဒီယိုလာကတော့ ဒီဘရိုင်းကို ဟာလန်းလိုမျိုး စာချုပ်သစ် ချုပ်ဆိုနိုင်ဖို့ သူမျှော်လင့် တယ်လို့ ပြောထားပါတယ်။ 

ဒါပေမယ့် ဒီဘရိုင်းနဲ့ မန်စီးတီးအသင်းတို့အကြားမှာ စာချုပ်သစ်အတွက် ဆွေးနွေးမှုတွေ ပြုလုပ်ရခြင်း မရှိသေးပါဘူး။ 

ဒီဘရိုင်းဟာ မန်စီးတီးအသင်းအတွက် ပြိုင်ပွဲစုံ ပွဲပေါင်း ၄၀၀ ကျော် ပါဝင်ကစားထားပြီး သွင်းဂိုး ၁၀၀ ကျော် သွင်းယူကာ ပရီးမီးယားလိဂ်ဖလား ၆ ကြိမ်၊ ချန်ပီယံလိဂ်ဖလား ၁ ကြိမ် အပါအဝင် ဆုဖလား အများအပြား ရယူထားတာ ဖြစ်ပါတယ်။ 

Source: Goal

CNI Sport News

၂၀၂၅ ခုနှစ်၊ ဇန်နဝါရီ ၂၁

ယူနိုက်တက်အသင်းကနေ ထွက်ခွာဖွယ်ရှိနေတယ်လို့ သတင်းတွေ ထွက်နေတဲ့ တိုက်စစ်မှူး ရက်ရှ်ဖို့ဒ်ဟာ အသင်းမှာ ဆက်ပြီးကစားဖို့ ဆန္ဒရှိနေတယ်လို့ ဗြိတိန်မီဒီယာတွေက ဖော်ပြထားပါတယ်။ 

ရက်ရှ်ဖို့ဒ်ကို အငှားနဲ့ခေါ်ယူဖို့ အေစီမီလန်၊ ဒေါ့မွန်၊ ဘာစီလိုနာနဲ့ ဂျူဗင်တပ်စ် အသင်းတို့က စိတ်ဝင်စားပြီး ဆွေးနွေးမှုတွေ ရှိခဲ့တာကြောင့် သူ့ရဲ့ယူနိုက်တက်အသင်း အနာဂတ်ဟာ မရေမရာဖြစ်ခဲ့တာပါ။ 

အသက် ၂၇ နှစ်အရွယ်ရှိ ရက်ရှ်ဖို့ဒ်ဟာ မန်ချက်စတာဒါဘီပွဲစဉ်မှာ ယူနိုက်တက်အသင်း လူစာရင်းကနေ ချန်လှပ်ခံရပြီးကတည်းက အသင်းနောက်ဆုံး ကစားခဲ့တဲ့ ၉ ပွဲစလုံး ပါဝင်ကစားခွင့် မရရှိခဲ့ပါဘူး။ 

ဒါပေမယ့် ရက်ရှ်ဖို့ဒ်ဟာ ယူနိုက်တက်အသင်းအတွက် ပါဝင်ကစားခွင့် မရရှိတဲ့အချိန်တွေမှာ ကြံ့ခိုင်မှုပိုင်း အကောင်းဆုံး ဖြစ်နေဖို့အတွက် လေ့ကျင့်မှု အများအပြားကို ပြုလုပ်နေခဲ့တာပါ။ 

သတင်းတွေမှာ ရက်ရှ်ဖို့ဒ်ဟာ ရိန်းဂျားစ်အသင်းနဲ့ ယှဉ်ပြိုင်မယ့် ယူရိုပါလိဂ်ပွဲစဉ်မှာ ယူနိုက်တက်အသင်း လူစာရင်းထဲ ပါဝင်လာနိုင်တယ်လို့ ဖော်ပြထားပါတယ်။

ရက်ရှ်ဖို့ဒ်ဟာ သူ့ရဲ့အသင်းဖော်တွေ ဘရိုက်တန်အသင်းနဲ့ပွဲအတွက် ပြင်ဆင်နေချိန် ကာရင်တန်မှာ လေ့ကျင့်မှုတွေ ပြုလုပ်နေခဲ့ပြီး သီးသန့်ကြံ့ခိုင်ရေး နည်းပြကိုလည်း အသုံးပြုခဲ့တာပါ။ 

ရက်ရှ်ဖို့ဒ်ဟာ နည်းပြအာမိုရင်နဲ့ ပြဿနာမရှိသလို နည်းပြက ရွေးချယ်မယ်ဆိုရင် ယူနိုက်တက်အသင်းအတွက် ၁၀၀ ရာခိုင်နှုန်းပေးဖို့ အဆင်သင့် ဖြစ်နေတယ်လို့ သိရပါတယ်။

ရက်ရှ်ဖို့ဒ်နဲ့ အာမိုရင်ကို တွေ့ရစဉ်

ရက်ရှ်ဖို့ဒ်ဟာ ယူနိုက်တက်အသင်း လူစာရင်းကနေ ချန်လှပ်ခံရပြီးနောက်မှာ စိန်ခေါ်မှုအသစ်အတွက် အဆင်သင့် ဖြစ်နေပြီလို့ပြောကာ ငယ်ဘဝကလပ်ကနေ ထွက်ခွာဖွယ်ရှိတဲ့ အရိပ်အမြွက်ပြောခဲ့တာပါ။ 

ယူနိုက်တက်အသင်းကလည်း ရက်ရှ်ဖို့ဒ်ကို အငှားချဖို့ ကြိုးပမ်းခဲ့ပေမယ့် သူ့ရဲ့တစ်ပတ် လုပ်ခလစာ ပေါင် ၃ သိန်း ကျော်ဟာ ဆွေးနွေးမှုတွေမှာ ကြီးမားတဲ့ အတားအဆီးတစ်ခုလို ဖြစ်နေခဲ့ပါတယ်။ 

ရက်ရှ်ဖို့ဒ်ဟာ ဒီရာသီမှာ ယူနိုက်တက်အသင်းအတွက် ပြိုင်ပွဲစုံ ၂၄ ပွဲ ပါဝင်ကစားထားပြီး ၇ ဂိုးသွင်းယူကာ အသင်းရဲ့ ထိပ်တန်းဂိုးသွင်းရှင်တွေထဲက တစ်ဦးအဖြစ် ရပ်တည်နေတာ ဖြစ်ပါတယ်။ 

Source: Dailymail

CNI Sport News

၂၀၂၅ ခုနှစ်၊ ဇန်နဝါရီ ၂၁

ချယ်လ်ဆီးအသင်းဟာ ဝုလ်ဗ်စ်အသင်းကို ၃ ဂိုး-၁ ဂိုးနဲ့ အနိုင်ရခဲ့ပြီးနောက် ပရီးမီးယားလိဂ်မှာ နိုင်ပွဲပျောက်ဆုံး နေတာကို အဆုံးသတ်ကာ နိုင်ပွဲပြန်ရယူနိုင်ခဲ့တဲ့ အသင်းရဲ့တုန့်ပြန်မှုကို နည်းပြမာရက်စ်ကာက ချီးကျူးခဲ့ပါတယ်။ 

မာရက်စ်ကာက “မိနစ် ၄၀ အထိ ကျနော်တို့ရဲ့ စွမ်းဆောင်ရည်ဟာ အလွန်ကောင်းမွန်ခဲ့ပေမယ့် နောက်ဆုံး ၅ မိနစ်မှာ ရုန်းကန်ခဲ့ရပါတယ်။ သူတို့ဂိုးသွင်းနိုင်ခဲ့တဲ့အတွက် ကျနော်တို့ ယုံကြည်မှု အနည်းငယ် လျော့သွားခဲ့ပြီး ဒါက ဒီရာသီမှာ အကြိမ်အနည်းငယ် ဖြစ်ပျက်ခဲ့တဲ့ အရာပါ။ ဒုတိယပိုင်းမှာ ကျနော်တို့ဟာ ကောင်းမွန်စွာ စတင် နိုင်ခဲ့သလို ဂိုးတွေလည်း သွင်းယူနိုင်ခဲ့ပါတယ်။ ကျနော်တို့ ဒီပွဲကို အနိုင်ရဖို့ ထိုက်တန်တယ်လို့ ကျနော် ထင်ပါ တယ်။ နိုင်ပွဲတွေ ပျောက်ဆုံးအပြီးမှာ ဒီလိုမျိုး ပြန်လုပ်ရတာက မလွယ်ကူတဲ့အတွက် ဒီပွဲအနိုင်ရဖို့က အရေးကြီးခဲ့ တယ်”လို့ BBC ကို ပြောခဲ့တာပါ။

ဒီပွဲမှာ ချယ်လ်ဆီးအသင်းအတွက် ဂိုးတွေကို တိုဆင်၊ ကူကူရယ်လာနဲ့ မာဒူကီတို့က သွင်းယူခဲ့ပြီး ဝုလ်ဗ်စ်အသင်း အတွက် ချေပဂိုးကို ဒိုဟာတီက သွင်းယူခဲ့တာဖြစ်ပါတယ်။ 

ချယ်လ်ဆီးအသင်းဟာ ဒီနိုင်ပွဲကြောင့် ပရီးမီးယားလိဂ် ပြိုင်ပွဲမှာ နောက်ဆုံး ၅ ပွဲဆက်တိုက် နိုင်ပွဲပျောက်ဆုံး တာကို အဆုံးသတ်နိုင်ခဲ့တာပါ။ 

ချယ်လ်ဆီးအသင်း ယှဉ်ပြိုင်နေစဉ်

ချယ်လ်ဆီးအသင်းဟာ နိုင်ပွဲရရှိခဲ့တဲ့အတွက် ပရီးမီးယားလိဂ် အမှတ်ပေးဇယားအဆင့် ၄ နေရာကို ပြန်တက် နိုင်ခဲ့ပြီး အဆင့် ၂ နဲ့ ၃ နေရာက အာဆင်နယ်၊ နော်တင်ဟမ်ဖောရက်စ်အသင်းတို့နဲ့ ၄ မှတ် ကွာဟနေပါတယ်။ 

ဒီပွဲမှာ ဝုလ်ဗ်စ်အသင်းအတွက် ချေပဂိုးကို အမှားအယွင်း ပြုလုပ်ပြီးပေးခဲ့တာကြောင့် ဝေဖန်မှုတွေခံနေရတဲ့ ဂိုးသမား ဆန်းချက်ဇ်ကို ချယ်လ်ဆီးအသင်း နည်းပြ မာရက်စ်ကာက ကာကွယ်ပေးခဲ့ပါတယ်။

ဆန်းချက်ဇ်ဟာ အမှားအယွင်းတွေ လုပ်ခဲ့ပေမယ့် အကြိမ်ပေါင်းများစွာ ကာကွယ်မှုတွေ ပြုလုပ်ခဲ့တာကြောင့် ပြဿနာမရှိဘူးလို့ နည်းပြမာရက်စ်ကာက ပြောခဲ့တာပါ။

ချယ်လ်ဆီးအသင်းဟာ ဒီရာသီ ပရီးမီးယားလိဂ် ပြိုင်ပွဲမှာ ၄၄ ဂိုး သွင်းယူထားပေမယ့် ၂၇ ဂိုး ခွင့်ပြုထားရပါတယ်။ 

ချယ်လ်ဆီးအသင်းဟာ လာမယ့် ပရီးမီးယားလိဂ် ပွဲစဉ်အဖြစ် မန်စီးတီးအသင်းအိမ်ကွင်း သွားရောက် ယှဉ်ပြိုင်ရမှာ ဖြစ်ပါတယ်။ 

Source: CNA

CNI Sport News

၂၀၂၅ ခုနှစ်၊ ဇန်နဝါရီ ၂၀

ရီးရယ်လ်အသင်းနည်းပြ အန်ဆယ်လော့တီဟာ ဒီရာသီအသင်းအတွက် ပင်နယ်တီ ကန်သွင်းသူတွေဖြစ်တဲ့ ဗီနီစီးယက်စ်၊ ဘတ်ပီနဲ့ ဘယ်လင်ဂမ်တို့ ၃ ဦးထဲမှာ ဗီနီစီးယက်စ်ကို ဦးစားပေး ပင်နယ်တီ ကန်သွင်းသူအဖြစ် သတ်မှတ်ခဲ့ပါတယ်။ 

ဗီနီစီးယက်စ်၊ ဘတ်ပီနဲ့ ဘယ်လင်ဂမ်တို့ ၃ ဦးဟာ ရီးရယ်လ်အသင်းရရှိတဲ့ ပင်နယ်တီကို ကန်သွင်းနေကြပေမယ့် အဓိက ကန်သွင်းသူအဖြစ် ဘယ်ကစားသမားကို တာဝန်ပေးမလဲဆိုတဲ့ မေးခွန်းတွေရှိနေတာပါ။ 

ပြီးခဲ့တဲ့ နွေရာသီက ပီအက်စ်ဂျီအသင်းကနေ အလွတ်နဲ့ ရောက်ရှိလာခဲ့တဲ့ ဘတ်ပီဟာ ရီးရယ်လ်အသင်းရဲ့ နံပါတ် ၉ အဖြစ် ပင်နယ်တီ ကန်သွင်းတဲ့ တာဝန်ကို ရယူနိုင်ဖို့ မျှော်လင့်ခဲ့တာဖြစ်ပါတယ်။ 

ဘတ်ပီဟာ ဒီရာသီမှာ ရီးရယ်လ်အသင်းအတွက် ပင်နယ်တီကနေ ၄ ဂိုး သွင်းယူထားပေမယ့် လီဗာပူးလ်အသင်းနဲ့ ချန်ပီယံလိဂ်၊ ဘီလ်ဘာအိုအသင်းနဲ့ လာလီဂါပွဲစဉ်တွေမှာ တစ်ပတ်အတွင်း ပင်နယ်တီ ၂ ကြိမ်လွဲချော်ခဲ့တာပါ။ 

ဗီနီစီးယက်စ်ကိုတွေ့ရစဉ်

ဘတ်ပီ လွဲချော်ပြီးနောက် ရီးရယ်လ်အသင်း နောက်ပိုင်းရရှိခဲ့တဲ့ ပင်နယ်တီကို ဘယ်လင်ဂမ် ကန်သွင်းခဲ့ပေမယ့် သူကလည်း ဇန်နဝါရီအစပိုင်းမှာ ကစားခဲ့တဲ့ ဗလင်စီယာအသင်းနဲ့ပွဲမှာ ပင်နယ်တီလွဲချော်ခဲ့တာ ဖြစ်ပါတယ်။

ဗီနီစီးယက်စ်ကတော့ ဒီရာသီ ရီးရယ်လ်အသင်းအတွက် သူကန်သွင်းခဲ့တဲ့ ပင်နယ်တီအားလုံးကို ဂိုးအဖြစ် ပြောင်းလဲ နိုင်ခဲ့တာကြောင့် နည်းပြအန်ဆယ်လော့တီရဲ့ ယုံကြည်မှုကို ရရှိခဲ့တာပါ။ 

အဲဒါကြောင့် နည်းပြ အန်ဆယ်လော့တီက ဗီနီစီးယက်စ်ကို ဦးစားပေး ပင်နယ်တီ ကန်သွင်းသူအဖြစ် သတ်မှတ်ခဲ့ ပြီး သူ့ရဲ့အနောက်မှာ ဘတ်ပီနဲ့ ဘယ်လင်ဂမ်တို့က ကန်သွင်းရမှာဖြစ်ပါတယ်။

ပြီးခဲ့တဲ့ ရီးရယ်လ်အသင်းက လက်စ်ပါးမက်စ်အသင်းကို ၄ ဂိုး-၁ ဂိုးနဲ့ အနိုင်ရခဲ့တဲ့ပွဲမှာ ဗီနီစီးယက်စ်ပွဲပယ်ကြောင့် မပါဝင်နိုင်ခဲ့လို့ အသင်းရရှိတဲ့ ပင်နယ်တီကို ဘတ်ပီက ကန်သွင်းခဲ့တာပါ။

ရီးရယ်လ်အသင်းဟာ ဒီနိုင်ပွဲကြောင့် လာလီဂါ အမှတ်ပေးဇယား ထိပ်ဆုံးနေရာကို တက်နိုင်ခဲ့ပြီး လာမယ့် ကြားရက်မှာ ချန်ပီယံလိဂ် ပွဲစဉ်အဖြစ် ဆဲလ်ဘတ်အသင်းနဲ့ ယှဉ်ပြိုင်ရမှာဖြစ်ပါတယ်။

Source: Goal

CNI News

၂၀၂၅ ခုနှစ်၊ ဇန်နဝါရီ ၂၀

ဘရာဇီးလ်တိုက်စစ်မှူး နေမာဟာ သူ့ရဲ့ငယ်ဘဝ ကလပ်ဖြစ်တဲ့ ဆန်းတို့စ်အသင်းထံ ပြန်လာဖို့ နီးစပ်နေပြီလို့ အပြောင်းအရွှေ့ကျွမ်းကျင်သူ ဖာဘရီဇီယိုရိုမာနိုက ဖော်ပြထားပါတယ်။

အယ်လ်ဟီလယ်အသင်းနည်းပြ ဂျော့ချ်ဂျီးဆပ်က နေမာဟာ ထိပ်တန်းအဆင့်မှာ ကစားနိုင်ခြင်း မရှိတော့ဘူးလို့ ပြောခဲ့တာကြောင့် ဘရာဇီးလ်ကစားသမားဟာ ဆော်ဒီကလပ်ကနေ ထွက်ခွာဖို့ရှိနေတာပါ။

အသက် ၃၂ နှစ်အရွယ်ရှိ နေမာဟာ ၂၀၂၃ ခုနှစ် နွေရာသီ အပြောင်းအရွှေ့က ပီအက်စ်ဂျီအသင်းကနေ ပေါင် ၇၈ သန်းနဲ့ အယ်လ်ဟီလယ်အသင်းထံ ပြောင်းရွှေ့လာခဲ့ပေမယ့် ဒဏ်ရာတွေနဲ့ ရုန်းကန်ခဲ့ပြီး ပြိုင်ပွဲစုံ ၇ ပွဲသာ ပါဝင် ကစားထားနိုင်ခဲ့တာ ဖြစ်ပါတယ်။ 

အယ်လ်ဟီလယ်အသင်းနည်းပြက နေမာကို ဒီရာသီ ဆော်ဒီပရိုလိဂ်ပြိုင်ပွဲ ဒုတိယရာသီဝက်အတွက် အသင်း လူစာရင်းထဲ စာရင်းသွင်းမှာ မဟုတ်ဘူးလို့ အတည်ပြုခဲ့ပြီးနောက် ဆန်းတို့စ်အသင်းက သူ့ကို ခေါ်ယူဖို့ ကမ်းလှမ်းမှု ပြုလုပ်ခဲ့တာပါ။

နေမာကို တွေ့ရစဉ်

ဆန်းတို့စ်အသင်းဟာ နေမာကို အငှားနဲ့ခေါ်ယူဖို့ ကမ်းလှမ်းမှု ပြုလုပ်ထားတာကြောင့် နေမာဟာ အသင်းဟောင်း ထံ ပြန်လာနိုင်ဖို့ နီးစပ်နေပြီလို့ ဖာဘရီဇီယိုရိုမာနိုက သူ့ရဲ့ဆိုရှယ်မီဒီယာမှာ ရေးသားထားပါတယ်။ 

နေမာကို ခေါ်ယူဖို့ မေဂျာလိဂ်ကလပ် ချီကာဂိုအသင်းကလည်း စိတ်ဝင်စားနေတာကြောင့် ဆန်းတို့စ်အသင်းဟာ အမြန်ဆုံးအငှားနဲ့ခေါ်ယူနိုင်ဖို့ ကြိုးပမ်းနေပြီး အယ်လ်ဟီလယ်အသင်းက မီးစိမ်းပြတာကို စောင့်ဆိုင်းနေတာပါ။ 

ဆန်းတို့စ်အသင်းဟာ နေမာကို အသင်းထံပြန်လာရင် သူရဲကောင်းတစ်ဦးလို ကြိုဆိုဖို့အသင့်ရှိနေတာ ဖြစ်ပါတယ်။ 

ဆန်းတို့စ်အသင်း လူငယ်စီမံကိန်းကနေ ထွက်ပေါ်လာခဲ့တဲ့ နေမာဟာ ဆန်းတို့စ်အသင်းကြီးအတွက် ပွဲပေါင်း ၂၂၅ ပွဲ ပါဝင်ကစားခဲ့ပြီး ၁၃၆ ဂိုးသွင်းယူကာ ထိပ်တန်းအသင်းတိုင်း အလိုရှိတဲ့သူအဖြစ် ရှိခဲ့တာပါ။ 

နေမာဟာ ဆန်းတို့စ်အသင်းမှာ ၅ ရာသီကြာ ကစားပြီးနောက် ဘာစီလိုနာ၊ ပီအက်စ်ဂျီအသင်းတွေထံ ပြောင်းခဲ့ပြီး ဆုဖလားအောင်မြင်မှု အများအပြားရရှိခဲ့ကာ အယ်လ်ဟီလယ်အသင်းအတွက် ကစားခဲ့တဲ့ ၇ ပွဲမှာ ၁ ဂိုး သွင်းယူ နိုင်ခဲ့တာ ဖြစ်ပါတယ်။

Source: Dailymail

CNI Sport News

၂၀၂၅ ခုနှစ်၊ ဇန်နဝါရီ ၂၀

မန်စီးတီးအသင်းဟာ အဝေးကွင်းမှာ အစ်စဝှစ်ချ်အသင်းကို ၆ ဂိုး-ဂိုးမရှိနဲ့ ဂိုးပြတ် အနိုင်ရပြီးနောက် နည်းပြ ဂွာဒီယိုလာက သူ့ရဲ့အသင်းဟာ အရင်ပုံစံအတိုင်း ပြန်လာပြီလို့ ပြောခဲ့ပါတယ်။ 

ဂွာဒီယိုလာက “၃ မှတ်နဲ့အတူ ချန်ပီယံလိဂ် ဝင်ခွင့်နေရာကို တက်နိုင်ခဲ့တဲ့အတွက် အလွန်ကျေနပ်ပါတယ်။ အသင်းဟာ လွန်ခဲ့တဲ့ ၁၀ နှစ်က သတ်မှတ်ထားတဲ့ အရာတွေကို လုပ်ပြီးပြန်လာနေပါတယ်။ ဒါက ကျနော်တို့ရဲ့ အကောင်းဆုံးပုံစံ မဟုတ်ပေမယ့် ပွဲမှာ ကျနော်တို့ရှိနေရမယ့် လိုက်လျောညီထွေမှုနဲ့ ပိုနီးစပ်ပါတယ်။ ဘောလုံး ရှိတဲ့ သူတိုင်းဟာ ပါးနပ်ပြီး၊ မြန်ဆန်သလို လူတိုင်းက ဆက်စပ်မှုတွေ ရှိနေပါတယ်။ ခံစစ်ပိုင်းနဲ့ မချိတ်ဆက်နိုင် ဘူးဆိုရင် ကောင်းမွန်စွာ လုပ်နိုင်မှာ မဟုတ်ပါဘူး”လို့ ပြောခဲ့တာပါ။ 

ပြီးခဲ့တဲ့လ အနည်းငယ်အတွင်းက ရုန်းကန်ခဲ့ရတဲ့ မန်စီးတီးအသင်းဟာ အစ်စဝှစ်ချ်အသင်းကို အနိုင်ရပြီးနောက် ပရီးမီးယားလိဂ် အမှတ်ပေးဇယားအဆင့် ၄ နေရာကို တက်နိုင်ခဲ့ပါတယ်။

ဒီပွဲမှာ မန်စီးတီးအသင်းအတွက် ဂိုးတွေကို ဖိုဒန်က ၂ ဂိုး၊ ကိုဗာဆစ်၊ ဒိုကူ၊ ဟာလန်းနဲ့ မက်အတီးတို့က သွင်းယူခဲ့ တာပါ။ 

မန်စီးတီးအသင်းဟာ ၂၀၂၅ ခုနှစ်ထဲမှာ ပြိုင်ပွဲစုံ ၄ ပွဲ ကစားထားပြီး ၃ ပွဲနိုင်၊ ၁ ပွဲသရေကျကာ ရလဒ်ကောင်းတွေ ပြန်လည် ရယူနိုင်ခဲ့တာပါ။ 

ဂွာဒီယိုလာကို တွေ့ရစဉ်

အစ်စဝှစ်ချ်အသင်းကတော့ အိမ်ကွင်းဂိုးပြတ် အရေးနိမ့်မှုကြောင့် ပရီးမီးယားလိဂ် အမှတ်ပေးဇယား  အဆင့် ၁၈ နေရာမှာ ရပ်တည်နေပြီး တန်းဆင်းဇုန်ကနေ လွတ်မြောက်ဖို့ ရုန်းကန်ရတော့မှာ ဖြစ်ပါတယ်။  

အစ်စဝှစ်ချ်အသင်း နောက်ခံလူ အိုရှီးယားက သူတို့ဟာ အမှားအယွင်း ပြုလုပ်ခဲ့တာတွေကို ပြန်ကြည့်ပြီး သင်ခန်းစာ ယူရမှာဖြစ်ကာ ဒီအဖွဲ့နဲ့ ကလပ်ဟာ ကြီးမားတဲ့ ယုံကြည်မှုရှိတယ်လို့ ပြောခဲ့တာပါ။ 

မန်စီးတီးအသင်းဟာ လာမယ့် ကြားရက်ထဲမှာ ချန်ပီယံလိဂ် အရေးကြီးပွဲစဉ်အဖြစ် ပီအက်စ်ဂျီအသင်း အိမ်ကွင်း သွားရောက် ယှဉ်ပြိုင်ရမှာ ဖြစ်ပါတယ်။ 

Source: ESPN

CNI Sport News

၂၀၂၅ ခုနှစ်၊ ဇန်နဝါရီ ၂၀

ယူနိုက်တက်အသင်းဟာ အိမ်ကွင်းမှာ ဘရိုက်တန်အသင်းကို ၃ ဂိုး-၁ ဂိုးနဲ့ အရေးနိမ့်ပြီးနောက် သူ့ရဲ့အသင်းဟာ ကလပ်သမိုင်းမှာ အဆိုးရွားဆုံးအသင်း ဖြစ်နိုင်တယ်လို့ နည်းပြအာမိုရင်က ပြောခဲ့ပါတယ်။

အာမိုရင်က “ပြီးခဲ့တဲ့ နည်းပြထက်ပိုပြီးရှုံးတဲ့ နည်းပြအသစ်ကို ကျနော်တို့ ရရှိနေပါပြီ။ ဒါကို ကျနော် အပြည့်အဝ သိပေမယ့် ကျနော်ကတော့ ပြောင်းလဲသွားမှာ မဟုတ်ပါဘူး။ ကျနော်တို့ အောင်မြင်မှု ရရှိနိုင်တယ်ဆိုတာ သိပေ မယ့် လက်ရှိ အခိုက်အတန့်ကို ရှင်သန်နေဖို့လိုပါတယ်။ ကျနော်ဟာ နုံအတဲ့သူ မဟုတ်ပါဘူး။ ကျ
နော်တို့ဟာ ယူနိုက်တက်သမိုင်းမှာ အဆိုးရွားဆုံးအသင်းဖြစ်နိုင်တယ်”လို့ ပြောခဲ့တာပါ။ 

ပေါ်တူဂီလူမျိုး နည်းပြအာမိုရင်ဟာ ယူနိုက်တက်အသင်းကို စတင်ကိုင်တွယ်ပြီးကတည်းက ပရီးမီးယားလိဂ် ပြိုင်ပွဲမှာ အိမ်ကွင်းရှုံးပွဲ ၄ ပွဲအထိ ကြုံတွေ့ထားသလို သူကိုင်တွယ်ခဲ့တဲ့ လိဂ်ပွဲပေါင်း ၁၁ ပွဲမှာ ရမှတ် ၁၁ မှတ်သာ ရယူနိုင်ခဲ့တာ ဖြစ်ပါတယ်။

ယူနိုက်တက်အသင်းဟာ ဘရိုက်တန်အသင်းနဲ့ပွဲစဉ်မှာ ဆိုးရွားတဲ့ စွမ်းဆောင်ရည်သာ ပြသနိုင်ခဲ့ပြီး အသင်း ခေါင်းဆောင် ဘရူနိုဖာနန်ဒက်စ်ရဲ့ ပင်နယ်တီကန်သွင်းတဲ့ တစ်ကြိမ်သာ ဂိုးပေါက်တည့်ခဲ့တာပါ။ 

ယူနိုက်တက်အသင်းဟာ ပြီးခဲ့တဲ့ လီဗာပူးလ်နဲ့ အာဆင်နယ်အသင်းတို့ ပွဲတွေမှာ ရလဒ်ကောင်းနဲ့ စွမ်းဆောင်ရည် ကောင်းကို ပြသနိုင်ခဲ့ပေမယ့် ဆောက်သမ်တန် အသင်းနဲ့ပွဲစဉ်မှာ နောက်ကျ သွင်းဂိုးတွေကြောင့် အနိုင်ရခဲ့ပြီး အခု ဘရိုက်တန်အသင်းကို အရေးနိမ့်ခဲ့တာ ဖြစ်ပါတယ်။ 

အာမိုရင်နဲ့ ယူနိုက်တက်အသင်းကစားသမားများကို တွေ့ရစဉ်

နည်းပြအာမိုရင်ဟာ ယူနိုက်တက်အသင်းကို ၁၅ ပွဲ ကိုင်တွယ်အပြီးမှာ ရှုံးပွဲ ၇ ပွဲ ကြုံတွေ့ထားတာပါ။ 

ယူနိုက်တက်အသင်းဟာ ဘရိုက်တန်အသင်းကို အရေးနိမ့်ပြီးနောက် ပရီးမီးယားလိဂ် အမှတ်ပေးဇယား အဆင့် ၁၃ နေရာမှာ ရပ်တည်နေပြီး တန်းဆင်းဇုန်နေရာနဲ့ ၁၀ မှတ်သာကွာဟတာ ဖြစ်ပါတယ်။

ယူနိုက်တက်အသင်းနည်းပြ အာမိုရင်က အသင်းမှာရှိတဲ့ လူတိုင်းရဲ့ စွမ်းဆောင်ရည်ဟာ နိမ့်ကျနေပြီး ပွဲ အများအပြား ရှုံးနိမ့်တာဟာ လက်ခံနိုင်စရာမရှိဘူးလို့ ပြောခဲ့ပါတယ်။ 

ဒါအပြင် ယူနိုက်တက်အသင်းဟာ အလွန်ခက်ခဲတဲ့ အခိုက်အတန့်ကို ရောက်ရှိနေပေမယ့် တခြားနည်းလမ်းမရှိဘဲ ရှေ့ဆက်သွားဖို့ပဲ လိုတယ်လို့ ပြောခဲ့တာပါ။

ယူနိုက်တက်အသင်းဟာ လာမယ့်ကြားရက်မှာ ယူရိုပါလိဂ် ပွဲစဉ်အဖြစ် ရိန်းဂျားစ်အသင်းနဲ့ ယှဉ်ပြိုင်ရမှာ ဖြစ်ပါတယ်။ 

Source: ESPN