CNI Sport News

၂၀၂၅ ခုနှစ်၊ ဇူလိုင် ၁၇

အမေရိကန်ကြယ်ပွင့် ပူလီဆစ်ဟာ ပေါ်တူဂီအသင်းခေါင်းဆောင် ရော်နယ်ဒိုနဲ့ အယ်လ်နာဆာအသင်းမှာ အတူတွဲ ကစားခွင့်ရမယ့် အခွင့်အရေးကို ငြင်းပယ်ခဲ့ပါတယ်။

Corriere dello Sport က ပူလီဆစ်ဟာ အီတလီမှာ ဆက်ပြီး ရှိချင်နေတာကြောင့် အေစီမီလန်အသင်းကနေ အယ်လ်နာဆာအသင်းထံ ပြောင်းရွှေ့ခွင့်ရမယ့် အခွင့်အရေးကို ငြင်းပယ်ခဲ့တယ်လို့ ဖော်ပြထားတာပါ။

ပူလီဆစ်နဲ့ အေစီမီလန် အသင်းတို့ကြားမှာ စာချုပ်သက်တမ်းတိုးဖို့ ဆွေးနွေးမှုတွေက ရပ်တန့်နေတယ်လို့ သတင်းတွေ ထွက်နေပေမယ့် သူဟာ အသင်းရဲ့ ရာသီကြို လေ့ကျင့်ပြင်ဆင်မှုတွေမှာ နည်းပြသစ် အယ်လီဂရီကို အထင်ကြီးမှု ရရှိစေခဲ့တာဖြစ်ပါတယ်။

၂၀၂၃ ခုနှစ်က ချယ်လ်ဆီးအသင်းကနေ ရောက်ရှိလာခဲ့တဲ့ ပူလီဆစ်ဟာ ပြီးခဲ့တဲ့ရာသီမှာ အေစီမီလန်အသင်း အတွက် ပြိုင်ပွဲစုံပွဲပေါင်း ၅၀ ပါဝင်ကစားခဲ့ပြီး ၁၇ ဂိုးသွင်းယူကာ ဂိုးဖန်တီးမှု ၁၂ ကြိမ် ပြုလုပ်နိုင်ခဲ့တာပါ။ 

ပူလီဆစ်နဲ့ မိုဒရစ်ကို တွေ့ရစဉ်

ပူလီဆစ်ဟာ ရာသီသစ်မှာ အေစီမီလန်အသင်းကို ရလဒ်ကောင်းတွေ ရရှိအောင် ကူညီပေးချင်တာကြောင့် လန်းလန်းဆန်းဆန်း ရှိနေဖို့အတွက် ပြီးခဲ့တဲ့ ကွန်ကာကပ်ဖ် ရွှေဖလားပြိုင်ပွဲမှာ အမေရိကန်အသင်းအတွက် ပါဝင်ကစားဖို့ ငြင်းဆန်ခဲ့ပါတယ်။

အေစီမီလန်အသင်းဟာ ပြီးခဲ့တဲ့ရာသီက စီးရီးအေပြိုင်ပွဲမှာ အဆင့် ၈ နေရာနဲ့ ရာသီအဆုံးသတ်ခဲ့တာကြောင့် ရာသီသစ်မှာ ဥရောပပြိုင်ပွဲ ယှဉ်ပြိုင်ခွင့် ဆုံးရှုံးခဲ့တာပါ။

ပူလီဆစ်နဲ့ အေစီမီလန်အသင်းရဲ့ စာချုပ်ဟာ ၂၀၂၇ ခုနှစ်၊ ဇွန်လ ၃၀ ရက်အထိ သက်တမ်းရှိနေပါတယ်။ 

အေစီမီလန်အသင်းဟာ ဒီနွေရာသီ အပြောင်းအရွှေ့မှာ တိုရီနိုအသင်း ကွင်းလယ်လူ ရီချီနဲ့ ရီးရယ်လ်အသင်းကနေ ထွက်ခွာခဲ့တဲ့ ဝါရင့်ကွင်းလယ်လူ မိုဒရစ်တို့ကို အားဖြည့်ထားတာပါ။ 

အေစီမီလန်အသင်းဟာ ရာသီသစ် မတိုင်မီ ခြေစမ်းပွဲတွေအဖြစ် အာဆင်နယ်၊ လီဗာပူးလ်၊ ပါ့ချ်ဂလိုရီ၊ လိဒ်စ်၊ ချယ်လ်ဆီးအသင်းတို့နဲ့ ယှဉ်ပြိုင်သွားမှာ ဖြစ်ပါတယ်။ 

Source: Goal

CNI Sport News

၂၀၂၅ ခုနှစ်၊ ဇူလိုင် ၁၇

အီတလီအသင်းဟာ အမျိုးသမီးယူရို ၂၀၂၅ ပြိုင်ပွဲ ကွာတားဖိုင်နယ်ပွဲစဉ်မှာ နော်ဝေအသင်းကို ၂ ဂိုး-၁ ဂိုးနဲ့ အနိုင်ရပြီး ဆီမီးဖိုင်နယ်တက်ကာ ယူရိုဆီမီးဖိုင်နယ်တက်ဖို့ ၂၈ နှစ်ကြာ စောင့်ဆိုင်းခဲ့ရတာကို အဆုံးသတ် နိုင်ခဲ့တာ ဖြစ်ပါတယ်။ 

ဒီပွဲမှာ အီတလီအသင်း ခေါင်းဆောင် ဂျီရယ်လီက ပွဲချိန်မိနစ် ၅၀ မှာ ဦးဆောင်ဂိုး သွင်းယူခဲ့ပြီး ၆၆ မိနစ်မှာ ဟီဂါဘတ်က နော်ဝေအသင်းအတွက် ချေပဂိုး သွင်းယူနိုင်ခဲ့တာပါ။ 

ဒါပေမယ့် မိနစ် ၉၀ မှာ ဂျီရယ်လီက အီတလီအသင်းအတွက် အဖိုးတန် အနိုင်ဂိုး သွင်းယူခဲ့တာကြောင့် အီတလီ အသင်းဟာ ၁၉၉၇ ခုနှစ်နောက်ပိုင်း ပထမဆုံးအကြိမ်အဖြစ် ယူရိုဆီမီးဖိုင်နယ်ကို တက်နိုင်ခဲ့တာဖြစ်ပါတယ်။ 

ဂျီရယ်လီက ဒါဟာ လက်တွေ့ဖြစ်လာတဲ့ အိပ်မက်ဖြစ်ပြီး အံ့သြစရာကောင်းတယ်လို့ ပွဲအပြီးအင်တာဗျူးမှာ ပြောခဲ့တာပါ။

ဂျီရယ်လီက “ဒါက အသင်းအတွက် အောင်ပွဲတင် မဟုတ်ဘဲ အီတလီ အမျိုးသမီး ဘောလုံးလောကမှာရှိတဲ့ လူတိုင်းနဲ့ သက်ဆိုင်မှုရှိပါတယ်။ မျိုးဆက်သစ်အတွက် မယုံနိုင်စရာဖြစ်သလို ဥရောပရဲ့ထိပ်ဆုံး ၄ သင်းထဲမှာ ပါဝင်ဖို့က အိပ်မက်တစ်ခု အမှန်တကယ် ဖြစ်လာတာပါ။ ဒုက္ခတွေ အများကြီး ခံစားခဲ့ရပေမယ့် တစ်သင်းလုံး အဆုံးထိ တိုက်ပွဲဝင်နိုင်ခဲ့ပါတယ်”လို့ RAI ကို ပြောခဲ့ပါတယ်။

အီတလီအမျိုးသမီး အသင်းကို တွေ့ရစဉ်

အီတလီအသင်းနည်းပြ ဆွန်စင်ဟာ ယူရိုဆီမီးဖိုင်နယ် တက်နိုင်ခဲ့တဲ့အတွက် ဂုဏ်ယူနေပြီး အခုအချိန်မှာ ပျော်ရွှင်မှုကို အပြည့်အဝ ခံစားပြီးရင် ဆီမီးဖိုင်နယ်အကြောင်းကို စဉ်းစားရတော့မယ်လို့ ပြောခဲ့တာပါ။ 

အီတလီအသင်းခေါင်းဆောင် ဂျီရယ်လီက နည်းပြဆွန်စင်ကို ချီးကျူးမှုတွေ ပြုလုပ်ခဲ့ပြီး သူ့ကြောင့် အသင်းဟာ ယုံကြည်မှုတွေ အများကြီး တိုးလာခဲ့တယ်လို့ ပြောခဲ့ပါတယ်။

အီတလီအသင်းဟာ ယူရိုဆီမီးဖိုင်နယ် ပွဲစဉ်အဖြစ် အင်္ဂလန်နဲ့ ဆွီဒင်အသင်းတို့ ပွဲစဉ်က အနိုင်ရတဲ့အသင်းနဲ့ ယှဉ်ပြိုင်ရမှာ ဖြစ်ပါတယ်။ 

Source: ESPN

CNI Sport News

၂၀၂၅ ခုနှစ်၊ ဇူလိုင် ၁၇

စပိန်ကြယ်ပွင့် ယာမဲလ်ဟာ အသင်းရဲ့ အထင်ကရ ကျောနံပါတ်ဖြစ်တဲ့ နံပါတ် ၁၀ အင်္ကျီကို ဝတ်ဆင်မယ်လို့ ဘာစီလိုနာအသင်းက အတည်ပြုခဲ့ပါတယ်။ 

အသက် ၁၈ နှစ်ပြည့်ခဲ့ပြီဖြစ်တဲ့ ယာမဲလ်ဟာ မိုနာကိုအသင်းထံ ရာသီကုန်အထိ အငှားစာချုပ်နဲ့ ပြောင်းရွှေ့သွား ခဲ့တဲ့ အန်ဆုဖာတီဆီကနေ ကျောနံပါတ် ၁၀ အမွေအနှစ်ကို ဆက်ခံမှာပါ။ 

ယာမဲလ်ဟာ ပြီးခဲ့တဲ့လက ဘာစီလိုနာအသင်းမှာ ၂၀၃၁ ခုနှစ်အထိရှိမယ့် စာချုပ်သစ်ချုပ်ဆိုဖို့ သဘောတူညီမှု ရရှိခဲ့တာ ဖြစ်ပါတယ်။ 

မက်ဆီဟာ ဘာစီလိုနာအသင်းရဲ့ကျောနံပါတ် ၁၀ ကို ၂၀၀၈ ကနေ ၂၀၂၁ ခုနှစ်အထိ ဝတ်ဆင်ခဲ့ပြီး အသင်းရဲ့ ဂန္ထဝင် တစ်ဦးအဖြစ်နဲ့ ဆုဖလားအောင်မြင်မှု အများအပြား ရယူနိုင်ခဲ့တာပါ။

မက်ဆီထွက်ခွာပြီးနောက် အန်ဆုဖာတီဟာ သူ့ရဲ့ကျောနံပါတ် ၁၀ အမွေအနှစ်ကို ဆက်ခံခဲ့ပေမယ့် ဒဏ်ရာတွေနဲ့ ရုန်းကန်ခဲ့ရတာကြောင့် ပွဲကစားခွင့်ဆုံးရှုံးခဲ့ပြီး နောက်ဆုံးမှာ အသင်းကနေ အငှားနဲ့ ထွက်ခွာခဲ့ရပါတယ်။ 

ယာမဲလ်ကတော့ နံပါတ် ၁၀ ဟာ သူ့အတွက် ဖိအားမရှိဘဲ ဒီနံပါတ်ကို ဝတ်ဆင်ခဲ့တဲ့ သူတွေရဲ့ အမွေအနှစ်တွေကို ဆက်ပြီးထိန်းသိမ်းဖို့ ကြိုးစားသွားမယ်လို့ ပြောခဲ့တာပါ။ 

ယာမဲလ်ကို တွေ့ရစဉ်

ယာမဲလ်က “ငယ်ငယ်ကတည်းက ကျနော့်ရဲ့အိပ်မက်က ဘာစီလိုနာအသင်းအတွက် ပွဲထွက်ပြီး ကြီးပြင်းလာဖို့နဲ့ နံပါတ် ၁၀ ဝတ်ဆင်ပြီးကစားဖို့ပါ။ ဘာစီလိုနာမှာ မွေးတဲ့ကလေးတိုင်းက ဒါကို အိပ်မက်မက်ကြပါတယ်။ မက်ဆီ က သူ့ရဲ့ပုံစံနဲ့ အကောင်းဆုံး လုပ်ခဲ့သလို ကျနော်လည်း ကျနော့်ရဲ့ပုံစံနဲ့ပဲ အကောင်းဆုံးလုပ်သွားမှာပါ”လို့ ပြောခဲ့ပါတယ်။

ယာမဲလ်ဟာ ဘာစီလိုနာအသင်းအတွက် ပွဲဦးထွက်ခဲ့တဲ့ ၂၀၂၂-၂၃ ရာသီမှာ ကျောနံပါတ် ၄၁ ဝတ်ဆင်ခဲ့ပြီး၊ နောက်ပိုင်းမှာ ကျောနံပါတ် ၂၇ ဝတ်ဆင်ခဲ့တာပါ။ 

ပြီးခဲ့တဲ့ရာသီမှာတော့ ယာမဲလ်ဟာ ကျောနံပါတ် ၁၉ ဝတ်ဆင်ခဲ့ပြီး ရာသီသစ်မှာ ကျောနံပတ် ၁၀ ဝတ်ဆင်သွားမှာ ဖြစ်ပါတယ်။

ယာမဲလ်ဟာ ဘာစီလိုနာအသင်းအတွက် ၁၀၆ ပွဲ ကစားထားပြီး ၂၅ ဂိုးသွင်းယူကာ လာလီဂါဖလား ၂ ကြိမ်၊ ကိုပါဒယ်ရေးနဲ့ စပိန်စူပါဖလားတို့ကို ရယူနိုင်ခဲ့တာပါ။

ယာမဲလ်ဟာ ပြီးခဲ့တဲ့ရက်ပိုင်းက အသက် ၁၈ နှစ်ပြည့် မွေးနေ့ပါတီ ကျင်းပခဲ့တာမှာ မသန်စွမ်းမှုဆိုင်ရာ ဥပဒေ တွေကို ချိုးဖောက်နိုင်ဖွယ်ရှိတဲ့ စွပ်စွဲချက်တွေနဲ့ စပိန်အစိုးရရဲ့ စုံစမ်းစစ်ဆေးမှုတွေကို ခံနေရပါတယ်။ 

ယာမဲလ်က သူဟာ ဘာစီလိုနာအသင်းအတွက် အလုပ်လုပ်ပေမယ့် လေ့ကျင့်ရေးစင်တာနဲ့ ဝေးကွာတဲ့အချိန်မှာ သူ့ရဲ့ဘဝကို ပျော်ပျော်ရွှင်ရွှင် ဖြတ်သန်းတယ်လို့ ပြောခဲ့ပါတယ်။

Source: ESPN

CNI Sport News

၂၀၂၅ ခုနှစ်၊ ဇူလိုင် ၁၆

ပရီးမီးယားလိဂ်ကို တန်းပြန်တက်လာခဲ့တဲ့ ဆန်းဒါးလန်းအသင်းဟာ အာဆင်နယ်အသင်း ခေါင်းဆောင်ဟောင်း ရှာခါကို လေဗာကူဆင်အသင်းကနေ ခေါ်ယူဖို့ စိတ်ဝင်စားနေပါတယ်။

Sacha Tavolieri က ဂျာမနီမှာ ၂ နှစ်ကြာ ကစားပြီးနောက် နွေရာသီမှာ လေဗာကူဆင်အသင်းကနေ ထွက်ခွာဖို့ ရှိနေတဲ့ ရှာခါကို ခေါ်ယူဖို့ ဆန်းဒါးလန်းအသင်းက ချဉ်းကပ်မှု ပြုလုပ်ခဲ့တယ်လို့ ဖော်ပြထားတာပါ။ 

ဆန်းဒါးလန်းအသင်းဟာ လေဗာကူဆင်အသင်းနဲ့ ဆက်သွယ်မှု ပြုလုပ်နေပြီး ပြောင်းရွှေ့ကြေး ယူရို ၁၀ သန်း၊ ရှာခါကို ၃ နှစ်စာချုပ်နဲ့ ကမ်းလှမ်းမှုပြုလုပ်ဖို့ ဆန္ဒရှိနေတာ ဖြစ်ပါတယ်။ 

ရှာခါကို ခေါ်ယူဖို့ ဆန်းဒါးလန်းအသင်း အပါအဝင် အသင်းအချို့ကလည်း ဆွေးနွေးမှုတွေ ပြုလုပ်နေကြတာပါ။ 

ရှာခါဟာ လုပ်ခလစာ အများအပြားရရှိမယ့် ဆော်ဒီကလပ် နီယွန်အသင်းနဲ့ ဆွေးနွေးမှုတွေ ပြုလုပ်ထားပါတယ်။ 

အေစီမီလန်အသင်းကလည်း လေဗာကူဆင်အသင်းနဲ့ ဆွေးနွေးမှုမှာ တိုးတက်မှု မရှိပေမယ့် ရှာခါကို ခေါ်ယူဖို့ စိတ်ဝင်စားနေတာပါ။ 

ရှာခါကို တွေ့ရစဉ် 

ဆန်းဒါးလန်းအသင်းဟာ ပရီးမီးယားလိဂ် ပြိုင်ပွဲကို တန်းပြန်တက်ပြီးနောက် အသင်းကို အားဖြည့်မှုတွေ အများကြီး ပြုလုပ်နေတာဖြစ်ပါတယ်။ 

အန်ဇိုလီဖီးကို အပြီးသတ် ခေါ်ယူခဲ့သလို ဟာဘစ်ဒီယာရာ၊ ဆာဒီကီ၊ ရီနယ်လ်ဒို၊ တာလ်ဘီနဲ့ အဒင်ဂါရာတို့ကို ခေါ်ယူထားတာပါ။ 

ဆန်းဒါးလန်းအသင်းဟာ လူငယ်ကြယ်ပွင့် ဘယ်လင်ဂမ်ကို ဒေါ့မွန်အသင်းထံ ရောင်းချထားပါတယ်။ 

အဲဒါကြောင့် ဆန်းဒါးလန်းအသင်း အနေနဲ့ ရှာခါကို ခေါ်ယူနိုင်မယ်ဆိုရင် သူ့ကို ဘယ်လင်ဂမ် နေရာ အစားထိုး နိုင်မှာပါ။ 

လေဗာကူဆင်အသင်းအတွက် ၉၉ ပွဲ ပါဝင်ကစားထားပြီး ၆ ဂိုး သွင်းယူထားတဲ့ ရှာခါဟာ အသင်းကို ဘွန်ဒက်လီဂါပြိုင်ပွဲမှာ ရှုံးပွဲမရှိ ချန်ပီယံ၊ ပိုကယ်ဖလားနဲ့ စူပါဖလားရရှိအောင် ကူညီပေးထားနိုင်ပါတယ်။ 

ဆန်းဒါးလန်းအသင်းဟာ ရာသီသစ် ပရီးမီးယားလိဂ် အဖွင့်ပွဲစဉ်အဖြစ် ဝက်စ်ဟမ်းအသင်းကို အိမ်ကွင်း ယှဉ်ပြိုင်ရမှာ ဖြစ်ပါတယ်။

 Source: Goal

CNI Sport News

၂၀၂၅ ခုနှစ်၊ ဇူလိုင် ၁၆

အင်္ဂလန်နောက်ခံလူ ဂျွန်စတုန်းစ်ဟာ နွေရာသီ အပြောင်းအရွှေ့မှာ မန်စီးတီးအသင်း ရောင်းချမယ့် ကစားသမား ၆ ဦးထဲမှာ ပါဝင်နေတယ်လို့ ဗြိတိန်မီဒီယာ အများအပြားက ဖော်ပြထားပါတယ်။

မန်စီးတီးအသင်းဟာ ပြီးခဲ့တဲ့ရာသီကို ဆုဖလားလက်မဲ့နဲ့ အဆုံးသတ်ခဲ့ရပြီးနောက် နည်းပြဂွာဒီယိုလာဟာ အသင်းလူစာရင်းကို ကြီးကြီးမားမား ပြောင်းလဲမှုတွေ ပြုလုပ်ချင်နေတာပါ။ 

မန်စီးတီးအသင်းဟာ ဒီနွေရာသီ အပြောင်းအရွှေ့မှာ အေစီမီလန်အသင်း ကွင်းလယ်လူ ရိန်းဒါးစ်ကို ပေါင် ၄၆ သန်း၊ လိုင်ယွန်အသင်း ကြယ်ပွင့်ချာကီကို ပေါင် ၃၄ သန်း၊ ဝုလ်ဗ်စ်အသင်း ဘယ်တောင်ပံ နောက်ခံလူ အစ်နော်ရီကို ပေါင် ၃၁ သန်း၊ ချယ်လ်ဆီးအသင်း ဂိုးသမား ဘီတင်နယ်လီတို့ကို ခေါ်ယူအားဖြည့်ထားပါတယ်။

မန်စီးတီးအသင်းနည်းပြ ဂွာဒီယိုလာဟာ အသင်းမှာ လူစာရင်း များပြားနေတဲ့အပေါ်  စိတ်ပျက်နေတာကြောင့် အသင်းဘက်က ကစားသမားအချို့ကို ရောင်းချနိုင်ဖို့ စီစဉ်နေတာပါ။ 

မန်စီးတီးအသင်းဟာ ပြီးခဲ့တဲ့ ရက်သတ္တပတ် အတွင်းမှာ အသင်းခေါင်းဆောင်ဟောင်း ဝေါ်လ်ကာကို ဘန်လေ အသင်းထံ ရောင်းချထားတာ ဖြစ်ပါတယ်။ 

The Athletic က မန်စီးတီးအသင်းဟာ ဂျွန်စတုန်းစ် အပါအဝင် အိုရီလေး၊ ကိုဗာချစ်၊ ဂွန်ဒိုဂန်၊ အီချီဗာရီနဲ့ အော်စကာဘော့ဘ်တို့ကို ရောင်းချမယ့် စာရင်းထဲ ထည့်သွင်းထားတယ်လို့ ဖော်ပြထားပါတယ်။

ဂျွန်စတုန်းစ်ကို တွေ့ရစဉ်

၂၀၁၆ ခုနှစ်က အဲဗာတန်အသင်းကနေ ရောက်ရှိလာခဲ့တဲ့ ဂျွန်စတုန်းစ်ဟာ ပြီးခဲ့တဲ့ရာသီမှာ ဒဏ်ရာတွေနဲ့ ရုန်းကန်ခဲ့ရပြီး ပရီးမီးယားလိဂ်ပြိုင်ပွဲမှာ မန်စီးတီးအသင်းအတွက် ၁၁ ပွဲသာ ပါဝင်ကစားနိုင်ခဲ့တာပါ။ 

မန်စီးတီးအသင်းဟာ ပြီးခဲ့တဲ့ဇန်နဝါရီ အပြောင်းအရွှေ့က ခူဆာနော့ဗ်ကို ခေါ်ယူထားတာကြောင့် သူ့ကို ဂျွန်စတုန်းစ်ရဲ့ နေရာမှာ အစားထိုးဖို့ အဆင်သင့် ဖြစ်နေပါတယ်။

ဂျွန်စတုန်းစ်ဟာ မန်စီးတီးအသင်းအတွက် ၂၇၇ ပွဲ ပါဝင်ကစားထားပြီး ၁၉ ဂိုးသွင်းယူကာ ဆုဖလားပေါင်း ၁၅ ခု ရယူနိုင်ခဲ့တာပါ။

ဖီဖာကလပ် ကမ္ဘာ့ဖလားပြိုင်ပွဲကို ဝင်ရောက်ယှဉ်ပြိုင် ထားတာကြောင့် အနားယူနေတဲ့ မန်စီးတီးအသင်းဟာ ရာသီသစ်မတိုင်မီ ခြေစမ်းပွဲအဖြစ် သြဂုတ် ၉ ရက်မှာ ပါလာမိုအသင်းနဲ့ ယှဉ်ပြိုင်မှာဖြစ်ပါတယ်။

Source: Mirror

CNI Sport News

၂၀၂၅ ခုနှစ်၊ ဇူလိုင် ၁၆

ခရစ္စတယ်ပဲလေ့စ်အသင်း ပရိသတ်တွေဟာ အသင်းကို ယူရိုပါလိဂ်ပြိုင်ပွဲကနေ ကွန်းဖရန့်လိဂ်ပြိုင်ပွဲကို ဆင်းပြီး ကစားခိုင်းတဲ့ ဥရောပဘောလုံးအဖွဲ့ချုပ်(UEFA)ရဲ့ ဆုံးဖြတ်ချက်ကို ကန့်ကွက်ဆန္ဒပြခဲ့ကြပါတယ်။

အင်္ဂါနေ့က ရာနဲ့ချီတဲ့ ခရစ္စတယ်ပဲလေ့စ်အသင်း ပရိသတ်တွေဟာ အသင်းရဲ့အိမ်ကွင်းကို ချီတက် ခဲ့ကြပြီး UEFA ကို ဆန့်ကျင်တဲ့ စာတန်းကို ကိုင်ဆောင်ကာ သီကြွေးမှုတွေလည်း ပြုလုပ်ခဲ့ကြတာပါ။ 

ခရစ္စတယ်ပဲလေ့စ်အသင်းဟာ ပြီးခဲ့တဲ့ရာသီက FA ဖလား ချန်ပီယံဆုကို ရယူနိုင်ခဲ့တာကြောင့် အသင်းရဲ့ သမိုင်း တစ်လျှောက် ပထမဆုံးအကြိမ်အဖြစ် ဥရောပပြိုင်ပွဲဖြစ်တဲ့ ယူရိုပါလိဂ် ဝင်ခွင့်ရရှိခဲ့တာ ဖြစ်ပါတယ်။ 

ဒါပေမယ့် ခရစ္စတယ်ပဲလေ့စ်အသင်းဟာ ပိုင်ရှင်တစ်ဦးတည်းက ကလပ်အသင်း အများအပြားကို ပိုင်ဆိုင်တဲ့ စည်းမျဉ်း ချိုးဖောက်ခဲ့တယ်ဆိုပြီး UEFA က သူတို့ကို ကွန်းဖရန့်လိဂ်ပြိုင်ပွဲဆင်းပြီး ယှဉ်ပြိုင်ကစားဖို့ ဆုံးဖြတ်ခဲ့ တာပါ။ 

ခရစ္စတယ်ပဲလေ့စ်အသင်း ပရိသတ်တွေ ဆန္ဒပြနေကြစဉ်

အမေရိကန်စီးပွားရေး လုပ်ငန်းရှင် ဂျွန်တက်စ်တာဟာ ခရစ္စတယ်ပဲလေ့စ်အသင်းရဲ့ အစုရှယ်ယာ ပိုင်ဆိုင်ထား သလို ယူရိုပါလိဂ် ဝင်ခွင့်ရရှိထားတဲ့ လိုင်ယွန်အသင်းမှာ အစုရှယ်ယာ အများအပြား ပိုင်ဆိုင်ထားတာ ဖြစ်ပါတယ်။

ဂျွန်တက်စ်တာဟာ သူ့ရဲ့ ခရစ္စတယ်ပဲလေ့စ်အသင်း ရှယ်ယာတွေကို ရောင်းချဖို့ လုပ်ခဲ့ပေမယ့် UEFA က ခရစ္စတယ်ပဲလေ့စ်အသင်းကို ကွန်းဖရန့်လိဂ်ပြိုင်ပွဲသာ ယှဉ်ပြိုင်ခွင့်ပြုခဲ့ပြီး သူ့ရဲ့နေရာမှာ နော်တင်ဟမ်ဖောရက်စ် အသင်းကို ယူရိုပါလိဂ် ဝင်ခွင့်ပေးခဲတာပါ။

ခရစ္စတယ်ပဲလေ့စ်အသင်းဟာ UEFA ရဲ့ ဆုံးဖြတ်ချက်ကို အားကစားခုံရုံးထံ အယူခံဝင်သွားဖို့ ပြင်ဆင်နေပါတယ်။ 

ဒီအချိန်မှာ ခရစ္စတယ်ပဲလေ့စ်အသင်း ပရိသတ်တွေကလည်း UEFA ရဲ့ ဆုံးဖြတ်ချက်ဟာ မျှတမှုမရှိဘူးဆိုပြီး ဆန္ဒပြမှုတွေ ပြုလုပ်ခဲ့ကြတာပါ။

ခရစ္စတယ်ပဲလေ့စ်အသင်းဥက္ကဋ္ဌ စတိဗ်ပါရစ်က UEFA ရဲ့ ဆုံးဖြတ်ချက်ဟာ ဘောလုံးအတွက် ဆိုးရွားတဲ့နေ့ဖြစ်ပြီး အလွန်ဆိုးရွားတဲ့ မတရားမှုလို့ ပြောခဲ့ပါတယ်။ 

Source: BBC

CNI Sport News 

၂၀၂၅ ခုနှစ်၊ ဇူလိုင် ၁၆

လီဗာပူးလ်အသင်းဟာ နယူးကာဆယ်အသင်းမှာ အနာဂတ် မရေမရာဖြစ်လာတဲ့ ဆွီဒင်တိုက်စစ်မှူး အစ်ဆက်ကို ခေါ်ယူနိုင်ဖို့အတွက် ဗြိတိန်အပြောင်းအရွှေ့ စံချိန်အား ထပ်ပြီးချိုးဖျက်ဖို့ ပြင်ဆင်နေပါတယ်။

လီဗာပူးလ်အသင်းဟာ ဒီနွေရာသီ အပြောင်းအရွှေ့မှာ လေဗာကူဆင်အသင်းက ဖလော်ရီယန်ဗစ်ဇ်ကို ဗြိတိန် စံချိန်တင် ပြောင်းရွှေ့ကြေးဖြစ်တဲ့ ပေါင် ၁၁၆ သန်းနဲ့ ခေါ်ယူထားသလို ဖရင်ပေါင်နဲ့ ကာကတ်ဇ်တို့ကိုလည်း ခေါ်ယူထားတာပါ။ 

ပရီးမီးယားလိဂ် လက်ရှိ ချန်ပီယံအသင်းဟာ တိုက်စစ်မှူး နေရာအတွက် နယူးကာဆယ်အသင်း တိုက်စစ်မှူး အစ်ဆက်ကို ခေါ်ယူဖို့ ချဉ်းကပ်မှုတွေ ပြုလုပ်နေပြီး ဗြိတိန်စံချိန်တင် ပြောင်းရွှေ့ကြေး အသစ်ဖြစ်တဲ့ ပေါင် ၁၂၅ သန်းကျော်နဲ့ ခေါ်ယူနိုင်ဖို့ ပြင်ဆင်နေတာ ဖြစ်ပါတယ်။ 

နယူးကာဆယ်အသင်း ဘက်ကသာ အစ်ဆက်ကို ရောင်းချဖို့ လမ်းဖွင့်မယ်ဆိုရင် လီဗာပူးလ်အသင်းဟာ ကမ်းလှမ်းမှုတွေပြုလုပ်ဖို့ အသင့်ရှိနေတာပါ။

ဒါပေမယ့် နယူးကာဆယ်အသင်းဟာ အစ်ဆက်ကို ရောင်းချဖို့ ဆန္ဒမရှိဘဲ စာချုပ်သက်တမ်းတိုးဖို့ ကြိုးပမ်းနေတာ ဖြစ်ပါတယ်။ 

အစ်ဆက်ကို တွေ့ရစဉ် 

နယူးကာဆယ်နဲ့ အစ်ဆက်တို့ရဲ့ စာချုပ်သက်တမ်းတိုးဖို့ ဆွေးနွေးမှုတွေဟာ အခုနှစ် အစောပိုင်းကတည်းက ရပ်တန့်နေပြီး တိုးတက်မှုမရှိဘူးလို့ ဗြိတိန်မီဒီယာတွေက ဖော်ပြထားတာပါ။ 

အစ်ဆက်ဟာ လက်ရှိအချိန်မှာ ရာသီကြိုပြင်ဆင်မှုတွေ ပြုလုပ်ဖို့ နယူးကာဆယ်အသင်းနဲ့ ပူးပေါင်းနေပြီး သြစတြီးယားရှိ လေ့ကျင့်ရေးစခန်းမှာ အတူရှိနေတာဖြစ်ပါတယ်။ 

လီဗာပူးလ်အသင်းဟာ အမှတ်ပေးဖလားကို အကြိမ် ၂၀ မြောက် ရယူပြီးကတည်းက တိုက်စစ်မှူးသစ် တစ်ဦး ခေါ်ယူဖို့ ဆုံးဖြတ်ထားပြီး အစ်ဆက်ဟာ သူတို့ရဲ့ဦးစားပေးအဖြစ် ရှိခဲ့တာပါ။

လီဗာပူးလ်အသင်းဟာ အစ်ဆက်ကို ခေါ်ယူဖို့အဆင်မပြေရင် နယူးကာဆယ်အသင်းရဲ့ ပစ်မှတ်ဖြစ်တဲ့ ဖရန့်ဖတ်အသင်း တိုက်စစ်မှူး အီကီတိုက် အပါအဝင် အခြားတိုက်စစ်မှူး အချို့ကိုလည်း သူတို့ခေါ်ယူမယ့် စာရင်းထဲမှာ ထည့်သွင်းထားပါတယ်။

၂၀၂၂ ခုနှစ်က ဆိုစီဒက်အသင်းကနေ ရောက်ရှိလာခဲ့တဲ့ အသက် ၂၅ နှစ်အရွယ်ရှိ အစ်ဆက်ဟာ နယူးကာဆယ် အသင်းအတွက် ၁၀၉ ပွဲ ကစားထားပြီး ၆၂ ဂိုးသွင်းယူကာ ၂၀၂၈ ခုနှစ်ရာသီကုန်အထိ စာချုပ်ရှိနေတာ ဖြစ်ပါ တယ်။ 

Source: Dailymail

CNI Sport News

၂၀၂၅ ခုနှစ်၊ ဇူလိုင် ၁၅

နယူးကာဆယ်အသင်းဟာ ဖရန့်ဖတ်အသင်း တိုက်စစ်မှူး ဟူဂိုအီကီတိုက်ကို ခေါ်ယူနိုင်ဖို့ ဆွေးနွေးမှုတွေကို အရှိန်မြှင့် လုပ်ဆောင်နေပြီး ဒီအပြောင်းအရွှေ့ဟာ ကလပ်ရဲ့ စံချိန်တင် အပြောင်းအရွှေ့ ဖြစ်လာနိုင်ပါတယ်။

ဖရန့်ဖတ်အသင်းဟာ ပြင်သစ်တိုက်စစ်မှူး အီကီတိုက်အတွက် ပေါင် ၈၆ သန်း လိုချင်နေပေမယ့် နယူးကာဆယ် အသင်းရဲ့ကနဦးဆွေးနွေးမှုတွေဟာ ပေါင် ၆၅ သန်းဝန်းကျင် ဖြစ်တာကြောင့် သူတို့လိုချင်တဲ့ ပြောင်းရွှေ့ကြေး ပမာဏနဲ့ အနည်းငယ် ဝေးကွာနေတာပါ။

နယူးကာဆယ်အသင်းဟာ ဘရာဇီးလ် တိုက်စစ်မှူး ဂျော်အိုပက်ဒရိုကို ပစ်မှတ်ထားခဲ့ပေမယ့် သူဟာ ချယ်လ်ဆီး အသင်းထံ ပြောင်းရွှေ့သွားခဲ့တာကြောင့် အီကီတိုက်ကို ခေါ်ယူနိုင်ဖို့ ကြိုးပမ်းလာခဲ့တာဖြစ်ပါတယ်။ 

နယူးကာဆယ်အသင်းရဲ့ စံချိန်တင် ပြောင်းရွှေ့ကြေးကတော့ ၂၀၂၂ ခုနှစ်က ဆိုစီဒက်အသင်းကနေ ခေါ်ယူခဲ့တဲ့ အစ်ဆက်ဖြစ်ပြီး ပေါင် ၆၃ သန်းနဲ့ ခေါ်ယူခဲ့တာပါ။

လီဗာပူးလ်အသင်းဟာ အစ်ဆက်ရဲ့ အခြေအနေကို စောင့်ကြည့်နေပေမယ့် နယူးကာဆယ်အသင်းဟာ သူ့ကို အသင်းမှာ အနည်းဆုံး နောက်ထပ် တစ်ရာသီ ဆက်ပြီးကစားနိုင်အောင် ဆွဲဆောင်နိုင်ဖို့ မျှော်လင့်နေသလို အီကီတိုက်နဲ့ အတူတွဲဖက်ပြီး အသုံးပြုချင်နေတာ ဖြစ်ပါတယ်။ 

ဟူဂိုအီကီတိုက်ကို တွေ့ရစဉ် 

၂၀၂၂ ခုနှစ်ကတည်းက နယူးကာဆယ်အသင်းရဲ့ ပစ်မှတ်စာရင်းထဲ ပါဝင်ခဲ့တဲ့ အီကီတိုက်ဟာ ယူနိုက်တက်နဲ့ ချယ်လ်ဆီးအပါအဝင် အသင်းအချို့ရဲ့ စိတ်ဝင်စားမှုကို ခံခဲ့ရတာပါ။ 

ပြီးခဲ့တဲ့နွေရာသီက PSG အသင်းကနေ အပြီးသတ် ပြောင်းရွှေ့လာခဲ့တဲ့ အီကီတိုက်ဟာ ဖရန့်ဖတ်အသင်းနဲ့ ၄ နှစ် စာချုပ် ကျန်ရှိနေသေးပါတယ်။

အသက် ၂၃ နှစ်အရွယ်ရှိ အီကီတိုက်ဟာ ပြီးခဲ့တဲ့ရာသီက ဖရန့်ဖတ်အသင်းအတွက် ၂၂ ဂိုး သွင်းယူနိုင်ခဲ့တာ အပါအဝင် ဂျာမန်ကလပ်အတွက် ကစားခဲ့တဲ့ ပြိုင်ပွဲစုံ ၆၄ ပွဲမှာ ၂၆ ဂိုး သွင်းယူထားတာပါ။ 

နယူးကာဆယ်အသင်းဟာ ချန်ပီယံလိဂ်ပြိုင်ပွဲ ယှဉ်ပြိုင်ရမှာ ဖြစ်တာကြောင့် အသင်းရဲ့ တိုက်စစ်ပိုင်းကို အားကောင်းအောင် ပြုလုပ်နေပြီး မကြာသေးမီက နော်တင်ဟမ်ဖောရက်စ်အသင်းက အီလန်ဂါကို ပေါင် ၅၅ သန်းနဲ့ ခေါ်ယူထားပါတယ်။ 

ရာသီကြို ပြင်ဆင်မှုတွေ ပြုလုပ်နေတဲ့ နယူးကာဆယ်အသင်းဟာ ခြေစမ်းပွဲတွေအဖြစ် ဆဲလ်တစ်၊ အာဆင်နယ်၊ K League အကောင်းဆုံးအသင်း၊ စပါး၊ အက်စ်ပန်ညို၊ အသလက်တီကိုအသင်းတို့နဲ့ ယှဉ်ပြိုင်သွားမှာဖြစ်ပါတယ်။ 

Source: Dailymail

CNI Sport News

၂၀၂၅ ခုနှစ်၊ ဇူလိုင် ၁၅

စပိန်ကွင်းလယ် တိုက်စစ်ကစားသမား အဆန်စီယိုဟာ တူရကီကလပ် ဖီနာဘာချီအသင်းရဲ့ ငွေကြေး အများအပြားနဲ့ ကမ်းလှမ်းမှုကို ငြင်းပယ်ခဲ့ပြီး သူ့ရဲ့အနာဂတ်ကို မကြာမီမှာ ရွေးချယ်မှုပြုလုပ်ဖို့ ရှိနေပါတယ်။

Mundo Deportivo က အဆန်စီယိုဟာ ပေါ်တူဂီလူမျိုးနည်းပြ မော်ရင်ဟိုရဲ့ လက်အောက်မှာ ကစားဖို့ ဖီနာဘာချီ အသင်းရဲ့ ယူရို ၉ သန်းနဲ့ ကမ်းလှမ်းမှုကို ငြင်းပယ်ခဲ့တယ်လို့ ဖော်ပြထားတာပါ။

အသက် ၂၉ နှစ်အရွယ်ရှိ ရီးရယ်လ် ကစားသမားဟောင်းဟာ ဥရောပထိပ်တန်းလိဂ်မှာသာ ဆက်ကစားချင်နေပြီး သူ့ကိုခေါ်ယူဖို့ ကလပ်အသင်း အများအပြားက စိတ်ဝင်စားနေကြပါတယ်။ 

စီးရီးအေကလပ် အင်တာနဲ့ အေစီမီလန်အသင်းတို့ဟာ အဆန်စီယိုကို သူတို့ခေါ်ယူမယ့် စာရင်းထဲ ထည့်သွင်းထား သလို လာလီဂါကလပ် ဗီလာရီးရယ်လ် အသင်းကလည်း သူ့ကိုပစ်မှတ်ထားနေတာပါ။

အဆန်စီယိုကို တွေ့ရစဉ်

အဆန်စီယိုဟာ နည်းပြလူးဝစ်အင်းနရစ်ရဲ့ PSG အသင်း အစီအစဉ်မှာ မပါဝင်တာကြောင့် နွေရာသီ အပြောင်းအရွှေ့မှာ ထွက်ခွာဖို့ ဆန္ဒရှိနေပါတယ်။ 

အဆန်စီယိုအနေနဲ့ ဖီနာဘာချီအသင်းထံ ပြောင်းရွှေ့ခဲ့ရင် ပွဲကစားချိန် မိနစ်တွေ အများကြီးရမှာဖြစ်ပေမယ့် သူက ငြင်းပယ်ခဲ့တာပါ။

အဆန်စီယိုဟာ ဥရောပထိပ်တန်းလိဂ်မှာ ဆက်ရှိချင်တာကြောင့် အသင်းကြီးတစ်သင်းထံ ပြောင်းရွှေ့ချင်ရင် လုပ်ခလစာကို လျှော့ပြီးယူဖို့ လိုအပ်ပါတယ်။ 

တစ်နှစ်လုပ်ခ ယူရို ၁၄ သန်း ဝန်းကျင်ရရှိနေတဲ့ အဆန်စီယိုဟာ ပြီးခဲ့တဲ့ ဇန်နဝါရီက အငှားကစားခဲ့တဲ့ အက်စတွန်ဗီလာအသင်းမှာ ခြေစွမ်းပြသနိုင်ခဲ့ပြီး ထိပ်တန်းအသင်းမှာ ကစားနိုင်တဲ့ စွမ်းဆောင်ရည်ကို ပြသနိုင်ခဲ့တာပါ။

PSG နဲ့ အဆန်စီယိုရဲ့ စာချုပ်ဟာ ၂၀၂၆ ခုနှစ် ရာသီကုန်ရင် ကုန်မှာဖြစ်လို့ အသင်းဟာ သူ့ကို နွေရာသီ အပြောင်းအရွှေ့မှာ ရောင်းချဖို့ ပြင်ဆင်ထားပါတယ်။ 

PSG အသင်းဟာ အဆန်စီယိုအတွက် ပြောင်းရွှေ့ကြေး ယူရို ၁၀ သန်း သတ်မှတ်ထားတာပါ။

၂၀၂၃ ခုနှစ်က ရီးရယ်လ်အသင်းနဲ့ စာချုပ်ကုန်ဆုံးပြီးနောက် PSG အသင်းထံ ပြောင်းရွှေ့လာခဲ့တဲ့ အဆန်စီယိုဟာ ပြင်သစ်ကလပ်အတွက် ၄၇ ပွဲ ပါဝင်ကစားခဲ့ပြီး ၇ ဂိုးသွင်းယူကာ ဆုဖလား ၄ ခု ရယူနိုင်ခဲ့ပါတယ်။

Source: Goal