CNI Sport News

၂၀၂၅ ခုနှစ်၊ ဇူလိုင် ၄

ဆော်ဒီပရိုလိဂ်ကလပ် အယ်လ်နာဆာအသင်းဟာ နွေရာသီ အပြောင်းအရွှေ့မှာ အသင်းကနေ ထွက်ခွာမယ့် ကိုလံဘီယာ တိုက်စစ်မှူး ဒူရန်ရဲ့နေရာမှာ အာဆင်နယ်အသင်း တောင်ပံကစားသမား မာတင်နယ်လီကို အစားထိုးခေါ်ယူဖို့ စိတ်ဝင်စားနေတာ ဖြစ်ပါတယ်။ 

ရာသီသစ်မတိုင်မီ အသင်းရဲ့လူစာရင်းကို အားကောင်းအောင် ပြုလုပ်ချင်နေတဲ့ အယ်လ်နာဆာအသင်းဟာ လီဗာပူးလ်အသင်း တောင်ပံကစားသမား လူးဝစ်ဒီယက်ဇ်ကို ခေါ်ယူဖို့ကြိုးပမ်းခဲ့ပေမယ့် အဆင်ပြေမှုမရှိခဲ့တာပါ။ 

အဲဒါကြောင့် အယ်လ်နာဆာအသင်းဟာ အာဆင်နယ်အသင်း တောင်ပံကစားသမား မာတင်နယ်လီကို ခေါ်ယူဖို့ ပစ်မှတ်ထားလာခဲ့ပြီး ကြီးမားတဲ့ ပြောင်းရွှေ့ကြေးနဲ့ ကမ်းလှမ်းမှုပြုလုပ်ဖို့ ပြင်ဆင်နေတာ ဖြစ်ပါတယ်။

ပြီးခဲ့တဲ့ ဇန်နဝါရီကမှ အက်စတွန်ဗီလာအသင်းကနေ ရောက်ရှိလာခဲ့တဲ့ ဒူရန်ဟာ ဖီနာဘာချီအသင်းထံ အငှားနဲ့ ပြောင်းရွှေ့ဖို့ စီစဉ်ထားတာပါ။

အယ်လ်နာဆာအသင်းဟာ မာတင်နယ်လီကို ခန့်မှန်းခြေယူရို ၈၅ သန်းနဲ့ ကမ်းလှမ်းမှုပြုလုပ်ပြီး အာဆင်နယ် အသင်းကို စမ်းသပ်ဖို့ ဆန္ဒရှိနေတာ ဖြစ်ပါတယ်။ 

အာဆင်နယ်အသင်းဟာ မာတင်နယ်လီကို ချက်ချင်း ထွက်ခွာခွင့်ပြုဖို့ ရည်ရွယ်ထားခြင်း မရှိပေမယ့် ဒီကမ်းလှမ်းမှု ပမာဏကြောင့် ဆွေးနွေးညှိနှိုင်းမှုတွေ ပြုလုပ်ဖို့ တံခါးဖွင့် ပေးနိုင်ဖွယ်ရှိနေတာပါ။

ဒူရန်ကို တွေ့ရစဉ်

အာဆင်နယ်အသင်းဟာ တောင်ပံတိုက်စစ် ကစားသမားတွေဖြစ်တဲ့ ရီးရယ်လ်အသင်းက ရိုဒရီဂိုနဲ့ နယူးကာဆယ် အသင်းက ဂေါ်ဒွန်တို့ကိုလည်း ချိတ်ဆက်မှုတွေ ပြုလုပ်ထားပါတယ်။ 

မာတင်နယ်လီကို ရောင်းချတာကနေ ရရှိလာမယ့် ပြောင်းရွှေ့ကြေးဟာ ဒီကစားသမား ၂ ဦးထဲက ၁ ဦးကို ခေါ်ယူနိုင်ဖို့ အထောက်အကူ ဖြစ်လာနိုင်တာပါ။ 

အယ်လ်နာဆာအသင်းဟာ ဝက်စ်ဟမ်းအသင်းက ကူဒက်စ်နဲ့ လေဗာကူဆင်အသင်းက ဘိုနီဖေ့စ်တို့ကို ခေါ်ယူနိုင် ဖို့လည်း စဉ်းစားနေပါတယ်။ 

အယ်လ်နာဆာအသင်းဟာ ပြီးခဲ့တဲ့ရာသီက ဆုဖလားအောင်မြင်မှု မရရှိခဲ့တာကြောင့် ရာသီသစ်မှာ အောင်မြင်မှု ရယူနိုင်ဖို့ ထိပ်တန်းအဆင့် ကစားသမားတွေကို ခေါ်ယူနိုင်ဖို့ ကြိုးပမ်းနေတာပါ။

အယ်လ်နာဆာအသင်းဟာ အယ်လ်ဟီလယ်အသင်းကို ဆုဖလား အောင်မြင်မှုတွေ ရရှိအောင် ကိုင်တွယ်ပေး နိုင်ခဲ့တဲ့ ဂျော့ချ်ဂျီးဆပ်ကိုလည်း နည်းပြသစ်အဖြစ် ခန့်အပ်ထားတာဖြစ်ပါတယ်။

Source: Goal

CNI Sport News

၂၀၂၅ ခုနှစ်၊ ဇူလိုင် ၄

ဒေါ့မွန်အသင်းက အင်္ဂလန်တောင်ပံ ကစားသမား ဂစ်တန်စ်ဟာ ချယ်လ်ဆီးအသင်းထံ ပြောင်းရွှေ့မယ်လို့ အတည်ပြု ထုတ်ပြန်ခဲ့ပါတယ်။

ချယ်လ်ဆီးအသင်းဟာ အသက် ၂၀ နှစ်အရွယ်ရှိ ဂစ်တန်စ်ကို ပေါင် ၅၅ သန်းနဲ့ ၇ နှစ် စာချုပ်ချုပ်ဆိုမှာပါ။ 

ချယ်လ်ဆီးနဲ့ ဒေါ့မွန်အသင်းတို့ဟာ ဖီဖာကလပ် ကမ္ဘာ့ဖလားပြိုင်ပွဲ ယှဉ်ပြိုင်နေတဲ့ အမေရိကန်နိုင်ငံမှာ ရှိနေ ကြတာဖြစ်ပြီး ကွာတားဖိုင်နယ်ပြိုင်ပွဲအတွက် ပြင်ဆင်မှုတွေ ပြုလုပ်နေကြတာ ဖြစ်ပါတယ်။ 

နှစ်သင်းစလုံးဟာ အမေရိကန်နိုင်ငံမှာ အပြောင်းအရွှေ့အတွက် သဘောတူညီမှုရရှိခဲ့ကာ အပြောင်းအရွှေ့ အပြီးသတ်နိုင်ဖို့ အချက်အနည်းငယ် ကျန်ရှိနေသေးတာဖြစ်ပါတယ်။ 

ဂစ်တန်စ်ဟာ ၂၀၂၀ ခုနှစ်က မန်စီးတီး လူငယ်အသင်းကနေ ဒေါ့မွန်လူငယ်အသင်းကို ရောက်ရှိလာခဲ့တာဖြစ်ပြီး ၂၀၂၂ ခုနှစ်မှာ အသင်းကြီးအတွက် စတင်ပွဲဦး ထွက်ခွင့်ရခဲ့တာပါ။ 

ဂစ်တန်စ်ဟာ ဒေါ့မွန်အသင်းအတွက် ပြိုင်ပွဲစုံ ၁၀၇ ပွဲ ပါဝင်ကစားထားပြီး ၁၇ ဂိုး သွင်းယူနိုင်ခဲ့ကာ မနှစ်က ရာသီမှာ ပြသခဲ့တဲ့ စွမ်းဆောင်ရည်ကြောင့် အသင်းကြီးတွေရဲ့ ပစ်မှတ်ဖြစ်လာခဲ့ပါတယ်။

ဒေါ့မွန်အသင်းယှဉ်ပြိုင်နေစဉ်

ဂစ်တန်စ်ကို ခေါ်ယူဖို့ ဘိုင်ယန်မြူးနစ်အသင်းကလည်း စိတ်ဝင်စားခဲ့ပေမယ့် ချယ်လ်ဆီးအသင်းက သူ့ကို ခေါ်ယူနိုင်ခဲ့တာပါ။ 

ချယ်လ်ဆီးအသင်းဟာ ပြီးခဲ့တဲ့ရာသီက ယူနိုက်တက်အသင်းကနေ အငှားနဲ့ လာရောက်ကစားခဲ့တဲ့ ဆန်ချိုကို အပြီးသတ် မဝယ်ယူခဲ့တာကြောင့် ဘယ်တောင်ပံနေရာကို အားကောင်းအောင် ပြုလုပ်ဖို့ ရှာဖွေခဲ့ပြီး အခုအချိန်မှာ ဂစ်တန်စ်ကို ခေါ်ယူနိုင်ခဲ့တာဖြစ်ပါတယ်။ 

ဂစ်တန်စ်ဟာ ဒေါ့မွန်အသင်းအတွက် ဖီဖာကလပ် ကမ္ဘာ့ဖလားပြိုင်ပွဲမှာ ပါဝင်ကစားနေတာကြောင့် ဒီပြိုင်ပွဲ ပြီးမှသာ ချယ်လ်ဆီးအသင်းအတွက် ပါဝင်ကစားနိုင်မှာပါ။ 

ချယ်လ်ဆီးအသင်းဟာ ဒီနွေရာသီ အပြောင်းအရွှေ့မှာ အစ်စဝှစ်ချ်အသင်းက ဒီလပ်၊ ဘရိုက်တန်အသင်းက ပက်ဒရို၊ စပို့တင်းလစ္စဘွန်းအသင်းက အက်ဆူဂို၊ စထရာဘောင်းအသင်းက မာမာဒူဆားတို့ကိုလည်း ခေါ်ယူ အားဖြည့်ထားတာ ဖြစ်ပါတယ်။

Source: ESPN

CNI Sport News

၂၀၂၅ ခုနှစ်၊ ဇူလိုင် ၄

လီဗာပူးလ်အသင်းဟာ ဇူလိုင် ၃ ရက်မှာ ယာဉ်မတော်တဆမှုနဲ့ ကွယ်လွန်ခဲ့တဲ့ ပေါ်တူဂီတိုက်စစ်မှူး ဂျိုတာရဲ့ ကျောနံပါတ် ၂၀ ကို အနားပေးကြောင်း အတည်ပြုခဲ့ပါတယ်။ 

အသက် ၂၈ နှစ်အရွယ်ရှိ ဂျိုတာနဲ့ အသက် ၂၆ နှစ် အရွယ်ရှိ ညီဖြစ်သူ အန်ဒရီတို့ စီးနင်းလာတဲ့ Lamborghini ကားဟာ စပိန်နိုင်ငံ၊ ဇာမိုရာမှာ ကားတစ်စီးကို ကျော်ဖြတ်ဖို့ ကြိုးစားရင်း ကားဘီးပေါက်ပြီး လမ်းချော်ကာ ကားမီး လောင်သွားခဲ့တာပါ။ 

အဲဒါကြောင့် ဂျိုတာတို့ ညီအစ်ကို နှစ်ဦးစလုံးဟာ ကားမတော်တဆမှုဖြစ်တဲ့ နေရာမှာပဲ ပွဲချင်းပြီး သေဆုံးသွားခဲ့ ကြတာ ဖြစ်ပါတယ်။ 

ဂျိုတာဟာ အသေးစား ခွဲစိတ်မှု ခံယူထားတာကြောင့် ဆရာဝန်တွေက သူ့ကို လေယာဉ်မစီးဖို့ အကြံပြုထားတဲ့ အတွက် လီဗာပူးလ်အသင်းရဲ့ ရာသီကြို လေ့ကျင့်ခန်း အစီအစဉ်ကို ပူးပေါင်းနိုင်အောင် သင်္ဘောဖယ်ရီစီးဖို့ သွားရောက်ခဲ့တာပါ။

ဒါပေမယ့် ဂျိုတာနဲ့ သူ့ရဲ့ညီဟာ ကံဆိုးပြီး ဖြစ်ရပ်ဆိုးနဲ့ ကြုံတွေ့သွားခဲ့ရတာ ဖြစ်ပါတယ်။ 

ဂျိုတာဟာ သူသေဆုံးမယ့် ရက်မတိုင်မီ ပြီးခဲ့တဲ့ ၁၁ ရက်ကမှ သူ့ရဲ့ချစ်သူဖြစ်သူ ကာဒိုဆိုနဲ့ လက်ထပ်ခဲ့တာဖြစ်ပြီး သူတို့နှစ်ဦးဟာ ကလေး ၃ ဦး ပိုင်ဆိုင်ထားတာပါ။

 ဂျိုတာ လွမ်းသူပန်းခွေ ချထားကြစဉ်

ဂျိုတာ သေဆုံးမှုအတွက် လီဗာပူးလ်အသင်းအပြင် ကမ္ဘာပေါ်မှာရှိတဲ့ အသင်းတွေ အများအပြားက ဝမ်းနည်း ကြောင်း ဖော်ပြခဲ့ကြပြီး လီဗာပူးလ်အသင်းဖော်တွေ၊ ပေါ်တူဂီအသင်းဖော်တွေနဲ့ ကစားသမား အများအပြား ကလည်း သူတို့ရဲ့ဝမ်းနည်းမှုတွေကို ဖော်ထုတ်ခဲ့ကြပါတယ်။

ပရိသတ်အများအပြားဟာ အန်ဖီးလ်ကွင်း အပြင်ဘက်မှာ လွမ်းသူပန်းခွေ၊ ပန်းစည်းတွေ၊ သူ့ရဲ့ဂျာစီတွေကို ထားပြီး ဂျိုတာအတွက် ဝမ်းနည်းခြင်း အထိမ်းအမှတ် ပြုလုပ်ခဲ့ကြတာပါ။ 

လီဗာပူးလ်အသင်းကလည်း အသင်းမှာ ဂျိုတာဝတ်ဆင်ခဲ့တဲ့ ကျောနံပါတ် ၂၀ ကို ဘယ်သူ့ကိုမှ ပေးဝတ်မှာ မဟုတ်တော့ဘဲ ထာဝရအနားပေးခဲ့ပါတယ်။

ဂျိုတာနဲ့ ညီဖြစ်သူ အန်ဒရီရဲ့ ဈာပန အခမ်းအနားကို စနေနေ့ကျရင် ပေါ်တူဂီနိုင်ငံ၊ ပေါ်တိုမှာ ပြုလုပ်သွားမယ်လို့ သိရပါတယ်။

ဂျိုတာဟာ ပါကို့စ်ဒီဖာရဲရားအသင်းမှာ ပရော်ဖက်ရှင်နယ် ကစားသမားဘဝ စတင်ခဲ့ပြီး အသလက်တီကို၊ ပေါ်တို၊ ဝုလ်ဗ်စ်နဲ့ လီဗာပူးလ်အသင်းတွေမှာ ကစားခဲ့တာပါ။ 

ဂျိုတာဟာ ကလပ်အသင်းတွေအတွက် ပွဲပေါင်း ၃၉၅ ပွဲ ပါဝင်ကစားခဲ့ပြီး ၁၃၃ ဂိုးသွင်းယူခဲ့ကာ ဝုလ်ဗ်စ်အသင်းနဲ့ EFL ချန်ပီယံရှစ်ဖလား၊ လီဗာပူးလ်အသင်းနဲ့ ပရီးမီးယားလိဂ်၊ FA နဲ့ ကာရာဘောင်းဖလားတို့ကို ရယူနိုင်ခဲ့ပါတယ်။ ဂျိုတာဟာ ပေါ်တူဂီလက်ရွေးစင် အသင်းအတွက် ၄၉ ပွဲ ကစားခဲ့ပြီး ၁၄ ဂိုးသွင်းယူကာ နေးရှင်းလိဂ်ဖလား ၂ ကြိမ် ရယူနိုင်ခဲ့တာဖြစ်ပါတယ်။ 

Source: BBC

CNI Sport News

၂၀၂၅ ခုနှစ်၊ ဇူလိုင် ၃

အမေရိကန်နဲ့ မက္ကဆီကိုအသင်းဟာ ကွန်ကာကပ်ဖ် ရွှေဖလား ဆီမီးဖိုင်နယ်ပွဲစဉ်မှာ ပြိုင်ဘက်တွေကို အသီးသီး အနိုင်ယူခဲ့တာကြောင့် ဗိုလ်လုပွဲအဖြစ် ထိပ်တိုက် တွေ့ဆုံယှဉ်ပြိုင်ရတော့မှာ ဖြစ်ပါတယ်။ 

အမေရိကန်အသင်းဟာ ဆီမီးဖိုင်နယ်ပွဲစဉ်မှာ ဂွါတီမာလာအသင်းကို ၂ ဂိုး-၁ ဂိုးနဲ့ အနိုင်ရခဲ့ပြီး မက္ကဆီကိုအသင်းက ဟွန်ဒူးရပ်စ်အသင်းကို ၁ ဂိုး-ဂိုးမရှိနဲ့ အနိုင်ရရှိခဲ့တာပါ။

အဲဒါကြောင့် အမေရိကန်နဲ့ မက္ကဆီကိုအသင်းဟာ ကွန်ကာကပ်ဖ် ရွှေဖလား ဗိုလ်လုပွဲအဖြစ် ယှဉ်ပြိုင်ရမှာ ဖြစ်ပါတယ်။ 

မက္ကဆီကိုအသင်းဟာ ဒီပြိုင်ပွဲရဲ့ လက်ရှိချန်ပီယံဖြစ်ပြီး ချန်ပီယံဆုကို ၉ ကြိမ်နဲ့ အကြိမ်အရေအတွက် အများဆုံး ရရှိထားတာပါ။ 

အမေရိကန်အသင်းသားတွေကိုတွေ့ရစဉ်

အမေရိကန်အသင်းကတော့ ချန်ပီယံဆု ၇ ကြိမ်နဲ့ ဒုတိယမြောက် အအောင်မြင်ဆုံး အသင်းအဖြစ် ရပ်တည် နေတာ ဖြစ်ပါတယ်။ 

အမေရိကန်နဲ့ မက္ကဆီကိုအသင်းဟာ ဒီပြိုင်ပွဲရဲ့ဗိုလ်လုပွဲမှာ ၂၀၂၁ ခုနှစ်က နောက်ဆုံးအကြိမ် တွေ့ဆုံခဲ့ပြီး အမေရိကန်အသင်းက အချိန်ပိုမှာ အနိုင်ရရှိကာ ချန်ပီယံဆုကို ရယူနိုင်ခဲ့တာပါ။ 

အမေရိကန်နဲ့ မက္ကဆီကိုအသင်းဟာ ကွန်ကာကပ်ဖ် ရွှေဖလား ဗိုလ်လုပွဲမှာ နောက်ဆုံး ၅ ကြိမ်တွေ့ဆုံခဲ့ရာ အမေရိကန်အသင်းက ၂ ကြိမ် အနိုင်ရခဲ့ပြီး မက္ကဆီကိုအသင်းက ၃ ကြိမ် အနိုင်ရရှိခဲ့ပါတယ်။

အမေရိကန်နဲ့ မက္ကဆီကိုအသင်းရဲ့ ၂၀၂၅ ကွန်ကာကပ်ဖ် ရွှေဖလား ဗိုလ်လုပွဲကို ဇူလိုင် ၇ ရက် ဟောက်စတန်မှာ ယှဉ်ပြိုင်သွားမှာ ဖြစ်ပါတယ်။ 

Source: Goal

CNI Sport News

၂၀၂၅ ခုနှစ်၊ ဇူလိုင် ၃

ခရစ္စတယ်ပဲလေ့စ်အသင်းဟာ အာဆင်နယ်အသင်းက ခေါ်ယူဖို့ ကြိုးပမ်းနေတဲ့ အင်္ဂလန်ကြယ်ပွင့် အီဇီကို ပေါင် ၆၈ သန်းထက်နိမ့်တဲ့ ပြောင်းရွှေ့ကြေးနဲ့ ရောင်းချဖွယ်မရှိဘူးလို့ ဗြိတိန်မီဒီယာတွေက ဖော်ပြထားပါတယ်။

အာဆင်နယ်အသင်းဟာ ဖန်တီးမှုပိုပြုလုပ်နိုင်ပြီး တိုက်စစ်ရဲ့နေရာစုံမှာ ကစားနိုင်တဲ့ အီဇီကို သူတို့ရဲ့ နွေရာသီ အပြောင်းအရွှေ့ပစ်မှတ်စာရင်းထဲ ထည့်သွင်းထားတာပါ။ 

ပြီးခဲ့တဲ့ရာသီက ခရစ္စတယ်ပဲလေ့စ်အသင်းကို FA ဖလား ရရှိအောင် အနိုင်ဂိုးသွင်းယူပြီး ခြေစွမ်းပြသနိုင်ခဲ့တဲ့ အီဇီဟာ အာဆင်နယ်အသင်းထံ ပြောင်းရွှေ့ဖို့ စိတ်ဝင်စား နေတာဖြစ်ပါတယ်။ အီဇီဟာ အာဆင်နယ်လူငယ်အသင်းမှာ ကစားခဲ့ဖူးပြီး အသက် ၁၃ နှစ်အရွယ်မှာ ထွက်ခွာ ခဲ့တာပါ။ 

အပြောင်းအရွှေ့အတွက် အာဆင်နယ်နဲ့ အီဇီရဲ့ကိုယ်စားလှယ်တွေအကြား မကြာသေးမီက ဆွေးနွေးမှုတွေ ပြုလုပ်ထားတာဖြစ်ပါတယ်။ 

The Evening Standard က အာဆင်နယ်အသင်းဟာ အီဇီအတွက် အနည်းငယ် သက်သာတဲ့ ပြောင်းရွှေ့ကြေးကို ညှိနှိုင်းချင်နေတယ်လို့ ဖော်ပြထားတာပါ။ 

ဒါပေမယ့် ခရစ္စတယ်ပဲလေ့စ် အသင်းဟာ ပြောင်းရွှေ့ကြေးကို ၃ ကြိမ်အရစ်ကျခွဲပေးနိုင်တဲ့ ပေါင် ၆၈ သန်းထက်နိမ့်တဲ့ ဘယ်ပြောင်းရွှေ့ ကြေးကိုမှ စဉ်းစားမှာမဟုတ်ဘူးလို့ သိရပါတယ်။

အီဇီနဲ့ ခရစ္စတယ်ပဲလေ့စ်အသင်းရဲ့စာချုပ်ဟာ ၂ နှစ်ကျန်ရှိနေသေးတာကြောင့် ခရစ္စတယ်ပဲလေ့စ်အသင်းဟာ သူ့ကို ပြောင်းရွှေ့ကြေးအနည်းငယ်နဲ့ ထွက်ခွာခွင့်ပေးဖို့မရှိတာပါ။ 

အီဇီကို ခေါ်ယူဖို့ အာဆင်နယ်အသင်းရဲ့ လန်ဒန်ပြိုင်ဘက်စပါးအသင်းကလည်း ပစ်မှတ်ထားနေတာဖြစ်ပါတယ်။ 

အာဆင်နယ်အသင်းဟာ ပြီးခဲ့တဲ့ ရက်ပိုင်းက ချယ်လ်ဆီးအသင်းဂိုးသမား ကယ်ပါကို ခေါ်ယူထားပြီး ဆိုစီဒက်အသင်းကွင်းလယ်လူ ဇူဘီမန်ဒီ ကိုလည်း ခေါ်ယူထားတာပါ။

အာဆင်နယ်အသင်းဟာ စပို့တင်းလစ္စဘွန်းအသင်းတိုက်စစ်မှူးယိုကီရက်စ်ကို ခေါ်ယူနိုင်ဖို့ နီးစပ်နေသလို ဘရန်ဖိုဒ့်အသင်းက နော်ဂတ်ဒ်ရဲ့အပြောင်းအရွှေ့ကိုလည်း လာမယ့်ရက်ပိုင်းအတွင်းမှာ ကြေညာဖွယ် ရှိနေတာဖြစ်ပါတယ်။ 

Source: Metro

CNI Sport News

၂၀၂၅ ခုနှစ်၊ ဇူလိုင် ၃

လီဗာပူးလ်အသင်းဟာ ကိုလံဘီယာ လက်ရွေးစင် လူးဝစ်ဒီယက်ဇ်ကို ခေါ်ယူဖို့ ဂျာမန်ဘွန်ဒက်လီဂါ ချန်ပီယံ ဘိုင်ယန်မြူးနစ်အသင်းရဲ့ တရားဝင်ချဉ်းကပ်မှုကို ပယ်ချခဲ့ပါတယ်။

လီဗာပူးလ်အသင်းဟာ လူးဝစ်ဒီယက်ဇ်ကို ရောင်းချဖို့ ရည်ရွယ်ထားခြင်း မရှိသလို ဆွေးနွေးမှုမှာလည်း ပါဝင် နိုင်မှာ မဟုတ်ဘူးဆိုပြီး ဘိုင်ယန်မြူးနစ်အသင်း အားကစားဒါရိုက်တာကို အကြောင်းပြန်ခဲ့တာပါ။ 

လီဗာပူးလ်အသင်းဟာ လူးဝစ်ဒီယက်ဇ်အတွက် ဘိုင်ယန်မြူးနစ်အသင်းမတိုင်မီ ဘာစီလိုနာအသင်းရဲ့ ချဉ်းကပ် မှုကို ခံခဲ့ရပေမယ့် ပယ်ချထားတာ ဖြစ်ပါတယ်။

လူးဝစ်ဒီယက်ဇ်ဟာ အသင်းရဲ့ အဓိက ကစားသမားဖြစ်တာကြောင့် လီဗာပူးလ်အသင်းဟာ သူ့ကို ဘယ်လို ပြောင်းရွှေ့ကြေးနဲ့မှ မရောင်းချဖို့ ဆုံးဖြတ်ထားတာပါ။  

လူးဝစ်ဒီယက်ဇ်ဟာ ပြီးခဲ့တဲ့ရာသီက လီဗာပူးလ်အသင်း ပရီးမီးယားလိဂ် ချန်ပီယံဖြစ်အောင် ကူညီပေးနိုင်ခဲ့ပြီး အသင်းအတွက် ပါဝင်ကစားခဲ့တဲ့ ပွဲပေါင်း ၅၀ မှာ ၁၇ ဂိုးသွင်းပြီး ဂိုးဖန်တီးမှု ၈ ကြိမ် ပြုလုပ်နိုင်ခဲ့တာ ဖြစ်ပါတယ်။ 

လီဗာပူးလ်အသင်းဟာ စာချုပ်သက်တမ်း ၂ နှစ် ကျန်ရှိနေသေးတဲ့ လူးဝစ်ဒီယက်ဇ်ကို စာချုပ်သက်တမ်းတိုးဖို့ ကြိုးပမ်းနေပေမယ့် သဘောတူညီမှု မရရှိသေးတာပါ။

လူးဝစ်ဒီယက်ဇ်ကို တွေ့ရစဉ်

လူးဝစ်ဒီယက်ဇ်ဟာ လီဗာပူးလ်အသင်းမှာ အလွန်ပျော်ရွှင်နေတယ်လို့ ပြောထားပေမယ့် အပြောင်းအရွှေ့ တွေအတွက် လမ်းဖွင့်ထားတာ ဖြစ်ပါတယ်။ 

လီဗာပူးလ်အသင်းဟာ လာမယ့်ရာသီမှာ အောင်မြင်မှုတွေ ရယူနိုင်ဖို့ အဓိက ကစားသမားတွေကို ဆက်ထိန်းသိမ်း မှာဖြစ်သလို လေဗာကူဆင်အသင်းက ဖလော်ရီယန်ဗစ်ဇ်၊ ဖရင်ပေါင်၊ ဘုန်းမောက်အသင်းက ကာကတ်ဇ်နဲ့ ဂိုးသမား ၂ ဦးကို အားဖြည့်ထားတာပါ။

ဒါအပြင် လီဗာပူးလ်အသင်းဟာ တိုက်စစ်မှူးသစ် တစ်ဦးနဲ့ ခံစစ် ကစားသမားတစ်ဦးကို ခေါ်ယူနိုင်ဖို့လည်း ပြင်ဆင်နေပါတယ်။

လီဗာပူးလ်အသင်းဟာ လာမယ့် ရက်ပိုင်းအတွင်း ရာသီကြို လေ့ကျင့်မှုကို စတင်မှာဖြစ်ပြီး ဇူလိုင် ၁၃ ရက်မှာ ပရက်စတန်အသင်းနဲ့ ခြေစမ်းပွဲယှဉ်ပြိုင်မှာပါ။

လီဗာပူးလ်အသင်းဟာ အေဂျက်စ်အသင်းကို ကိုင်တွယ်ဖို့ ထွက်ခွာခဲ့တဲ့ လက်ထောက်နည်းပြဟောင်း ဟိုက်တင်ဂါရဲ့နေရာမှာ နယ်သာလန် ကစားသမားဟောင်း ဗန်ဘရွန်ခရော့စ်ကို လက်ထောက် နည်းပြသစ်အဖြစ် ခန့်အပ်ကြောင်းလည်း အတည်ပြုထားပါတယ်။ 

Source: BBC

CNI Sport News

၂၀၂၅ ခုနှစ်၊ ဇူလိုင် ၃

ဘယ်လ်ဂျီယံ တိုက်စစ်မှူး လူကာကူက သူဟာ ယူနိုက်တက်အသင်းထံ မပြောင်းရွှေ့ချင်ခဲ့ဘူးလို့ အင်တာဗျူး တစ်ခုမှာ ဖွင့်ဟလာခဲ့ပါတယ်။ 

လူကာကူက “ကျနော် ချယ်လ်ဆီးအသင်းကို သွားမယ်လို့ လူတိုင်းကို ပြောခဲ့ပါတယ်။ ဒါပေမယ့် ရုတ်တရက် မော်ရင်ဟိုက ကျနော့်ဆီကို ဖုန်းဆက်ပြီး ယူနိုက်တက်အသင်းက ကမ်းလှမ်းမှု ပြုလုပ်ခဲ့တယ်လို့ ပြောခဲ့ပါတယ်။ ကျနော်လည်း အားလပ်ရက်ကနေ ပြန်လာပြီး အဲဗာတန်အသင်းနဲ့ သဘောတူညီမှု ယူခဲ့ရပါတယ်။ အပြောင်းအရွှေ့ အပြီးမှာ ကျနော်ဒါကို မလိုချင်ဘူးဆိုတာ ရိုင်အိုလာကို ပြောခဲ့ပါတယ်။ ဒီနောက်ပိုင်းမှာ ကျနော်ဟာ အရာအားလုံးကို ကိုယ်တိုင်လုပ်ဖို့ ဆုံးဖြတ်ခဲ့တယ်”လို့  Het Nieuwsblad နဲ့ အင်တာဗျူးမှာ ပြောခဲ့တာပါ။ 

ယူနိုက်တက်အသင်းဟာ အဲဗာတန်အသင်းမှာ ခြေစွမ်းပြသနေတဲ့ လူကာကူကို ၂၀၁၇ ခုနှစ် နွေရာသီ အပြောင်းအရွှေ့မှာ ပေါင် ၇၅ သန်းနဲ့ ဝယ်ယူခဲ့တာ ဖြစ်ပါတယ်။ 

လူကာကူဟာ ပွဲဦးထွက်မှာ ခြေစွမ်းပြပြီး သွင်းဂိုးတွေ သွင်းယူနိုင်ခဲ့ပေမယ့် နောက်ပိုင်းမှာ ခြေစွမ်းပြသနိုင်ဖို့ ရုန်းကန်ခဲ့ရတာပါ။ 

လူကာကူကို တွေ့ရစဉ် 

နည်းပြမော်ရင်ဟို၊ ဆိုးလ်ရှားတို့ရဲ့ လက်အောက်မှာ အောင်မြင်မှု မရခဲ့တဲ့ လူကာကူဟာ ယူနိုက်တက်အသင်းမှာ နှစ်ရာသီကြာ ကစားပြီးနောက် အင်တာမီလန်အသင်းကို ပြောင်းရွှေ့သွားခဲ့တာ ဖြစ်ပါတယ်။

လူကာကူဟာ ယူနိုက်တက်အသင်းမှာ ကစားခဲ့တဲ့ နှစ်ရာသီအတွင်း ၉၆ ပွဲ ပါဝင်ကစားခဲ့ပြီး ၄၂ ဂိုးသွင်းယူကာ ဂိုးဖန်တီးမှု ၁၂ ကြိမ် ပြုလုပ်နိုင်ခဲ့တာပါ။ 

အခုအချိန်မှာတော့ လူကာကူက သူဟာ နည်းပြမော်ရင်ဟိုကြောင့် ယူနိုက်တက်အသင်းထံ ပြောင်းရွှေ့လာခဲ့ တာဖြစ်ပြီး ဒီအပြောင်းအရွှေ့ကို မလိုချင်ခဲ့ဘူးလို့ ဖွင့်ဟခဲ့ပါတယ်။ 

လူကာကူဟာ ယူနိုက်တက်အသင်းကနေ ထွက်ခွာချိန်မှာ အသင်းကို ဝေဖန်မှုတွေ ပြုလုပ်ခဲ့လို့ အသင်းပရိသတ် တွေရဲ့ မနှစ်သက်မှုကို ခံနေရတာဖြစ်ပါတယ်။ 

လူကာကူဟာ အင်တာမီလန်အသင်းမှာ နှစ်ရာသီကြာ ကစားပြီးနောက် သူပြောင်းရွှေ့ချင်နေတဲ့ ချယ်လ်ဆီး အသင်းထံ ပြောင်းရွှေ့ခွင့် ရခဲ့ပေမယ့် အဆင်မပြေခဲ့ဘဲ တစ်ရာသီကြာသာ ကစားခွင့်ရခဲ့ပြီး မနှစ်ကနွေရာသီမှာ အပြီးသတ် ရောင်းချခြင်း ခံခဲ့ရတာပါ။ 

လူကာကူဟာ လက်ရှိအချိန်မှာ နာပိုလီအသင်းနဲ့အတူ ပြီးခဲ့တဲ့ရာသီက စီးရီးအေဖလား ရယူနိုင်ခဲ့ပြီး ပြိုင်ပွဲစုံ ၃၈ ပွဲမှာ ၁၄ ဂိုး သွင်းယူနိုင်ခဲ့တာဖြစ်ပါတယ်။ 

Source: Goal

CNI Sport News

၂၀၂၅ ခုနှစ်၊ ဇူလိုင် ၂

ရီးရယ်လ်အသင်းနည်းပြ ဇာဘီအလွန်ဆိုက တိုက်စစ်မှူး ဘတ်ပီဟာ ဒေါ့မွန်အသင်းနဲ့ ယှဉ်ပြိုင်ရမယ့် ဖီဖာကလပ်ကမ္ဘာ့ဖလား ကွာတားဖိုင်နယ်ပွဲစဉ်မှာ အသင်းရဲ့ ပွဲထွက်လူစာရင်းထဲ ပြန်ပါဝင်ဖွယ်ရှိတယ်လို့ ပြောခဲ့ပါတယ်။ 

ဇာဘီအလွန်ဆိုက “ဘတ်ပီဟာ နေ့တိုင်း ပိုကောင်းလာပြီး ကွာတားဖိုင်နယ်မှာ အများကြီး ပိုကောင်းလာမယ်လို့ ကျနော်ထင်ပါတယ်။ ကျနော် နေ့တိုင်း သူနဲ့စကားပြောပြီး သူဘယ်လိုနေလဲဆိုတာ မေးကြည့်ပါတယ်။ သူဟာ ပိုပြီးကောင်းမွန်လာမှာပါ”လို့ ပြောခဲ့တာပါ။

အစာအိမ်နဲ့အူလမ်းကြောင်း ဝေဒနာကြောင့် ဆေးရုံတက်ပြီး ကုသမှုခံယူခဲ့ရတဲ့ ဘတ်ပီဟာ ရီးရယ်လ်အသင်းရဲ့ ဖီဖာကလပ်ကမ္ဘာ့ဖလား အုပ်စုပွဲစဉ် ၃ ပွဲစလုံး ပါဝင်နိုင်ခဲ့ခြင်း မရှိတာဖြစ်ပါတယ်။

ဒါပေမယ့် ဘတ်ပီဟာ ရီးရယ်လ်အသင်းက ဂျူဗင်တပ်စ်အသင်းကို ၁ ဂိုး-ဂိုးမရှိနဲ့ အနိုင်ရခဲ့တဲ့ ၁၆ သင်းအဆင့် ပွဲစဉ်မှာ လူစားဝင်အဖြစ် ပါဝင်ကစားခဲ့တာပါ။

ဘတ်ပီကိုတွေ့ရစဉ် 

ဘတ်ပီဟာ ဒီပွဲစဉ်ရဲ့ပွဲချိန် ၆၈ မိနစ်မှာ ဂွန်ဇာလိုဂါစီယာရဲ့ နေရာ လူစားလဲ ဝင်ရောက်ခဲ့ပြီး ၂၃ မိနစ်ကြာပွဲ ကစားခွင့်ရခဲ့တာ ဖြစ်ပါတယ်။ 

ဂွန်ဇာလိုဂါစီယာဟာ ဘတ်ပီ မပါဝင်နိုင်တဲ့ အချိန်မှာ ရီးရယ်လ်အသင်းရဲ့ ပွဲထွက်လူစာရင်းထဲ ပါဝင်ပြီး ခြေစွမ်းပြသနေတာပါ။

ဂွန်ဇာလိုဂါစီယာဟာ ဂျူဗင်တပ်စ်အသင်းနဲ့ပွဲစဉ်မှာ အနိုင်ဂိုး သွင်းယူခဲ့တာ အပါအဝင် ဒီပြိုင်ပွဲမှာ ရီးရယ်လ် အသင်းအတွက် ၃ ဂိုး သွင်းယူထားပြီး ၁ ဂိုး ဖန်တီးထားပါတယ်။

ရီးရယ်လ်အသင်းနည်းပြ ဇာဘီအလွန်ဆိုဟာ ဘတ်ပီနဲ့ ဂွန်ဇာလိုဂါစီယာတို့ နှစ်ဦးကို အတူတွဲ ပွဲထွက်နိုင်မယ့် အလားအလာကို မေးမြန်းခံခဲ့ရပြီး သူကတော့ နောက်ပွဲအတွက် မပြင်ဆင်ရသေးဘူးလို့ ဖြေခဲ့ပါတယ်။
ရီးရယ်လ်နဲ့ ဒေါ့မွန်အသင်းရဲ့ ဖီဖာကလပ် ကမ္ဘာ့ဖလား ကွာတားဖိုင်နယ်ပွဲစဉ်ကို ဇူလိုင် ၅ ရက်မှာ ယှဉ်ပြိုင် သွားမှာဖြစ်ပါတယ်။ 

Source: Metro

CNI Sport News

၂၀၂၅ ခုနှစ်၊ ဇူလိုင် ၂

အာဂျင်တီးနားအသင်း ခေါင်းဆောင် မက်ဆီရဲ့ အနာဂတ်နဲ့ပတ်သက်ပြီး ထင်ကြေးသတင်းတွေ ထွက်နေပေမယ့် အင်တာမိုင်ယာမီအသင်းက သူဟာအသင်းနဲ့ စာချုပ်သက်တမ်းတိုးမယ်လို့ ယုံကြည်မှုရှိနေပါတယ်။ 

ဖီဖာကလပ် ကမ္ဘာ့ဖလားပြိုင်ပွဲကနေ အင်တာမိုင်ယာမီအသင်း ထွက်ခွာခဲ့ရပြီးနောက်မှာ မက်ဆီအသင်းကနေ ထွက်ခွာဖွယ်ရှိတဲ့ ပြောဆိုမှုတွေ ပိုပြီးများလာခဲ့တာပါ။ 

သတင်းအချို့မှာ မက်ဆီဟာ တောင်အမေရိက ဒါမှမဟုတ် ဆော်ဒီရဲ့ အခွင့်အလမ်းတွေကို စဉ်းစားနေတယ်လို့ ဖော်ပြထားပါတယ်။ 

အင်တာမိုင်ယာမီအသင်းဟာ မက်ဆီကို ပြီးခဲ့တဲ့ဧပြီက စာချုပ်သစ် ကမ်းလှမ်းထားပေမယ့် သူဟာ စာချုပ်ပေါ်မှာ လက်မှတ်ရေးထိုးရခြင်း မရှိသေးတာပါ။

ဒါပေမယ့် အင်တာမိုင်ယာမီအသင်းဟာ သူ့ကို အသင်းမှာ ဆက်ထိန်းသိမ်းနိုင်ဖို့ ယုံကြည်ကြောင်း BBC က ဖော်ပြထားပါတယ်။

မက်ဆီ ရောက်ရှိလာပြီးကတည်းက အင်တာမိုင်ယာမီအသင်းရဲ့ တန်ဖိုးဟာ နှစ်ဆ မြင့်တက်လာခဲ့သလို မေဂျာလိဂ်မှာလည်း ပရိသတ်တွေကို စိတ်ဝင်စားအောင် ဆွဲဆောင်နေတာကြောင့် သူတို့ရဲ့ဘဏ္ဍာရေး အခြေအနေကို ပိုပြီးအားကောင်းစေခဲ့တာပါ။

မက်ဆီကို တွေ့ရစဉ် 

မက်ဆီဟာ ၂၀၂၆ ကမ္ဘာ့ဖလားပြိုင်ပွဲ အပြီးမှာ အာဂျင်တီးနား လက်ရွေးစင်အသင်းကနေ အနားယူဖို့ရှိနေတာ ဖြစ်ပါတယ်။ 

အင်တာမိုင်ယာမီအသင်းဟာ မက်ဆီကို စာချုပ်သက်တမ်းတိုးပြီး ၂၀၂၆ ခုနှစ်နွေဦးမှာ ဖွင့်မယ့် သူတို့ရဲ့ ကွင်းသစ်မှာ ပါဝင်စေချင်နေတာပါ။ 

အင်တာမိုင်ယာမီအသင်းဟာ မက်ဆီ ရောက်ရှိလာအပြီးမှာ သူတို့ရဲ့ပထမဆုံး ဆုဖလားအဖြစ် လိဂ်ဖလား ရရှိခဲ့သလို ပြီးခဲ့တဲ့ရာသီက Supporter’s Shield ရရှိခဲ့ပါတယ်။ 

အသက် ၃၈ နှစ်အရွယ်ရှိ မက်ဆီဟာ အင်တာမိုင်ယာမီအသင်းအတွက် မေဂျာလိဂ် ၃၈ ပွဲ ပါဝင်ကစားထားပြီး ၃၁ ဂိုးသွင်းယူကာ ဂိုးဖန်တီးမှု ၂၂ ကြိမ်နဲ့ ပြီးခဲ့တဲ့ရာသီက မေဂျာလိဂ် အကောင်းဆုံး ကစားသမားဆုကို ရရှိခဲ့တာပါ။ 

အင်တာမိုင်ယာမီအသင်းဟာ ကလပ်ကမ္ဘာ့ဖလားပြိုင်ပွဲကနေ ထွက်ခွာရပြီးနောက် မေဂျာလိဂ်ပြိုင်ပွဲအပေါ် အာရုံစိုက်ရတော့မှာဖြစ်ပြီး လာမယ့်ပွဲစဉ်အဖြစ် မွန်ထရီရယ်လ်အသင်းနဲ့ ယှဉ်ပြိုင်ရမှာ ဖြစ်ပါတယ်။ 

Source: Goal