CNI Sport News

၂၀၂၅ ခုနှစ်၊ မေလ ၁၇

လီဗာပူးလ်အသင်း တောင်ပံကစားသမား ဆာလက်က ရာသီကုန်မှာ အသင်းကနေ ထွက်ခွာမယ့် ညာနောက်ခံလူ အာနိုးလ်ကို ဒီရာသီ လက်ကျန်ပွဲတွေမှာ လှောင်ပြောင်မှုတွေ မပြုလုပ်ဖို့ အသင်းပရိသတ်တွေကို တောင်းဆို ခဲ့ပါတယ်။ 

ဆာလက်က “အာနိုးလ်ဟာ ဒီမှာ နှစ် ၂၀ ကြာကစားပြီး အရာအားလုံးကို ပေးခဲ့တဲ့သူ ဖြစ်တဲ့အတွက် ဒီလိုတုံ့ပြန် တာမျိုး မခံရသင့်ပါဘူး။ သူဟာ ကောင်းမွန်တဲ့ နှုတ်ဆက်မှုခံရဖို့ ထိုက်တန်ပါတယ်။ ကျနော်သူ့ကို အရမ်းလွမ်း နေမှာဖြစ်ပြီး နှုတ်ဆက်ပွဲမှာ မျက်လုံးချင်းဆုံအောင် မကြည့်ဖို့တောင် သူ့ကိုပြောခဲ့ပါတယ်။ သူဟာ မြို့နဲ့ကလပ် အတွက် အများကြီးလုပ်ခဲ့ပြီး လီဗာပူးလ်အသင်း သမိုင်းမှာ အကောင်းဆုံး ကစားသမားတွေထဲက တစ်ဦးဖြစ် နိုင်ပါတယ်။ သူဟာ စိန်ခေါ်မှုအသစ် လိုချင်နေပြီး ဒါကသူ့ရဲ့ ဆုံးဖြတ်ချက်ပါ”လို့ Sky Sports မှာ ပြောခဲ့တာပါ။ 

ဒီရာသီကုန်မှာ လီဗာပူးလ်အသင်းကနေ ထွက်ခွာမယ်လို့ ကြေညာခဲ့တဲ့ အာနိုးလ်ဟာ ပြီးခဲ့တဲ့ အာဆင်နယ်အသင်း နဲ့ပွဲစဉ်မှာ လူစားလဲဝင်ရောက်ချိန် အသင်းပရိသတ်အချို့ရဲ့ လှောင်ပြောင်မှုကို ခံခဲ့ရတာဖြစ်ပါတယ်။

အာနိုးလ်ဟာ နှစ်ပေါင်း၂၀ ကြာ ကစားခဲ့တဲ့ လီဗာပူးလ်အသင်းကနေ ထွက်ခွာမယ့် သူ့ရဲ့ဆုံးဖြတ်ချက်အပေါ် အသင်းပရိသတ်တွေက ဝေဖန်မှုတွေ အများအပြား ပြုလုပ်ခဲ့ကြတာပါ။

အာနိုးလ်နဲ့ဆာလက်ကို တွေ့ရစဉ်

ဆာလက်ကတော့ အာနိုးလ်ကို လှောင်ပြောင်ခဲ့တဲ့ လုပ်ရပ်အပေါ် ဝမ်းနည်းမိကြောင်းနဲ့ လာမယ့်ပွဲတွေမှာ လှောင်ပြောင်တာကို ရပ်တန့်ပေးဖို့ တောင်းဆိုခဲ့တာဖြစ်ပါတယ်။ 

အာနိုးလ်ဟာ လီဗာပူးလ်အသင်းနဲ့ စာချုပ်ကုန်ဆုံးမယ့် နွေရာသီမှာ ရီးရယ်လ်အသင်းထံ ပြောင်းရွှေ့ဖွယ်ရှိနေပြီး စပိန်ကလပ်ဟာ သူ့ကို ဖီဖာကလပ် ကမ္ဘာ့ဖလားပြိုင်ပွဲမှာ ပါဝင်ကစားနိုင်စေဖို့ ကြိုးပမ်းနေတာပါ။ 

အသက် ၂၆ နှစ်အရွယ်ရှိ အာနိုးလ်ဟာ လီဗာပူးလ်အသင်းအတွက် ပွဲပေါင်း ၃၅၃ ပွဲ ပါဝင်ကစားထားပြီး ၂၃ ဂိုး သွင်းယူကာ ပရီးမီးယားလိဂ်ဖလား ၂ ကြိမ်၊ ချန်ပီယံလိဂ်ဖလား ၁ ကြိမ် အပါအဝင် ဆုဖလား ၈ ခု ရယူထား နိုင်ပါတယ်။ 

ချန်ပီယံ လီဗာပူးလ်အသင်းဟာ ဒီရာသီ ပရီးမီးယားလိဂ် လက်ကျန်ပွဲစဉ်တွေအဖြစ် ဘရိုက်တန်၊ ပဲလေ့စ်အသင်း တို့နဲ့ ယှဉ်ပြိုင်ရမှာ ဖြစ်ပါတယ်။ 

Source: ESPN

CNI Sport News
၂၀၂၅ ခုနှစ်၊ မေလ ၁၈

အာဆင်နယ်အသင်းနည်းပြ အာတီတာက ဒဏ်ရာကြောင့် အနားယူနေရတဲ့ ဂျာမန်တိုက်စစ်မှူး ကိုင်ဟာဗက်ဇ် ဟာ နယူးကာဆယ်အသင်းနဲ့ပွဲစဉ်မှာ အသင်းအတွက် ပါဝင်ဖွယ်ရှိတယ်လို့ ပြောခဲ့ပါတယ်။ 

အာတီတာက “ဟာဗက်ဇ်ဟာ ပြီးခဲ့တဲ့ ၂ ရက်က လေ့ကျင့်ခန်း အစီအစဉ်တွေမှာ ပါဝင်ခဲ့ပါတယ်။ သူကိုကြည့်ရ တာ ကောင်းမွန်တဲ့ ပုံစံရှိနေပေမယ့် ဆေးအဖွဲ့ဝင်တွေက သူ့ရဲ့အခြေအနေကို ရှင်းပေးဖို့လိုပါတယ်။ သူပါဝင်ဖွယ် ရှိ၊မရှိ ကျနော်တို့ဆုံးဖြတ်မှာပါ”လို့ ပြောခဲ့တာပါ။ 

ကိုင်ဟာဗက်ဇ်ဟာ ပြီးခဲ့တဲ့ ဖေဖော်ဝါရီက ဒူဘိုင်းမှာ ပြုလုပ်ခဲ့တဲ့ လေ့ကျင့်ခန်း အစီအစဉ်မှာ တံကောက်ကြော ဒဏ်ရာ ရရှိခဲ့ပြီး ခွဲစိတ်မှုခံယူခဲ့ရကာ ရာသီကုန်အထိ အနားယူရဖွယ် ရှိတယ်လို့ သတင်းတွေမှာ ဖော်ပြခဲ့တာ ဖြစ်ပါတယ်။ 

ဒါပေမယ့် ကိုင်ဟာဗက်ဇ်ဟာ မကြာသေးမီက အသင်းနဲ့အတူ လေ့ကျင့်ခန်း အစီအစဉ်တွေမှာ ပါဝင်ကာ ဒီရာသီ လက်ကျန်ပွဲတွေမှာ ပါဝင်ကစားနိုင်ဖို့ အခွင့်အရေးရှိလာခဲ့တာပါ။ 

လာမယ့်ရာသီ ချန်ပီယံလိဂ် ဝင်ခွင့်ရယူနိုင်ဖို့ သေချာအောင် လက်ကျန် ပရီးမီးယားလိဂ်ပွဲတွေမှာ ရလဒ်ကောင်း တွေ ရယူနိုင်ဖို့လိုအပ်တဲ့ အာဆင်နယ်အသင်းအတွက် ဟာဗက်ဇ် ပြန်ပါဝင်ကစားနိုင်မှာက သတင်းကောင်း ဖြစ်ခဲ့ပါတယ်။ 

အာဆင်နယ်အသင်းဟာ လာမယ့် ပရီးမီးယားလိဂ် ပွဲစဉ်အဖြစ် နယူးကာဆယ်အသင်းနဲ့ ယှဉ်ပြိုင်ရမှာဖြစ်ပြီး အနိုင်ရလဒ်ရယူနိုင်ရင် ချန်ပီယံလိဂ် ဝင်ခွင့်ရရှိမှာပါ။

အာဆင်နယ်နဲ့ နယူးကာဆယ်အသင်းတို့ကြား ရမှတ်ကွာဟမှုက ၂ မှတ်သာရှိပါတယ်။ 

အာဆင်နယ်အသင်းဟာ နယူးကာဆယ်အသင်းနဲ့ ယှဉ်ပြိုင်ပြီးရင် ဒီရာသီ ပရီးမီးယားလိဂ် နောက်ဆုံးပွဲစဉ်အဖြစ် ဆောက်သမ်တန်အသင်းနဲ့ ယှဉ်ပြိုင်ရမှာဖြစ်ပါတယ်။ 

Source: Goal

CNI Sport News

၂၀၂၅ ခုနှစ်၊ မေလ ၁၇

မန်စီးတီးအသင်းနည်းပြ ဂွာဒီယိုလာက FA ဖလားဟာ ဒီရာသီမှာ အသင်းရဲ့ဦးစားပေး မဟုတ်ပေမယ့် ဆုဖလားကို ရယူချင်တယ်လို့ ပဲလေ့စ်အသင်းနဲ့ ယှဉ်ပြိုင်ရမယ့် ဗိုလ်လုပွဲမတိုင်မီ ပြောခဲ့ပါတယ်။ 

ဂွာဒီယိုလာက “ကျနော်တို့ဟာ ဗိုလ်လုပွဲကို ရောက်ရှိနေတဲ့အတွက် ဆုဖလားကို ရယူချင်ပါတယ်။ ဒါကအလွန် အရေးကြီးပါတယ်။ ပြီးခဲ့တဲ့ရာသီက ဗိုလ်လုပွဲကတော့ စိတ်ပျက်စရာ ဖြစ်ခဲ့ရပါတယ်။ FA ဖလားဗိုလ်လုပွဲဟာ ဂုဏ်ယူစရာကောင်းတဲ့ အခွင့်ထူးဖြစ်ပြီး ၃ နှစ်ဆက်တိုက် ရောက်ရှိခဲ့တဲ့အတွက် ကျနော်တို့ကောင်းမွန်စွာ စွမ်းဆောင်ရမှာပါ။ ချန်ပီယံဆုကိုရယူဖို့ လန်ဒန်ကို ရောက်ရှိနေပြီ”လို့ ပြောခဲ့တာပါ။ 

မန်စီးတီးအသင်းဟာ ဒီရာသီမှာ ရလဒ်တွေ ဆိုးခဲ့တဲ့အတွက် ပရီးမီးယားလိဂ်ပြိုင်ပွဲမှာ ချန်ပီယံလိဂ် ဝင်ခွင့်ရယူ နိုင်ဖို့ ရုန်းကန်နေရသလို ချန်ပီယံလိဂ် ပြိုင်ပွဲကနေလည်း စောစီးစွာ ထွက်ခွာခဲ့ရတာ ဖြစ်ပါတယ်။

ဒါပေမယ့် မန်စီးတီးအသင်းဟာ ဒီရာသီမှာ ရယူနိုင်စရာ ဆုဖလားအဖြစ် FA ဖလားဗိုလ်လုပွဲ ယှဉ်ပြိုင်ရဖို့ ရှိနေတာပါ။ 

ဂွာဒီယိုလာကို တွေ့ရစဉ်

မန်စီးတီးအသင်းနည်းပြ ဂွာဒီယိုလာက FA ဖလား ရယူနိုင်ခဲ့ရင်တောင် ဒီရာသီဟာ သူတို့အတွက် အလွန် ဆိုးရွားတဲ့ ရာသီအဖြစ် သတ်မှတ်ထားတာ ဖြစ်ပါတယ်။ 

ဒါပေမယ့် ဂွာဒီယိုလာဟာ မန်စီးတီးအသင်းအတွက် FA ဖလား ချန်ပီယံဆုကို ရယူပေးဖို့ ဆန္ဒရှိနေတာပါ။ 

မန်စီးတီးအသင်းဟာ FA ဖလားဗိုလ်လုပွဲကို ၃ နှစ်ဆက်တိုက် တက်နိုင်ခဲ့ပြီး နောက်ဆုံး ၂ ရာသီမှာ ချန်ပီယံဆုကို ၁ ကြိမ် ရယူနိုင်ခဲ့ပါတယ်။ 

ပဲလေ့စ်အသင်းဟာ FA ဖလား ဗိုလ်လုပွဲကို နောက်ဆုံးရောက်ရှိခဲ့တဲ့ ၂ ကြိမ်စလုံး အရေးနိမ့်ခဲ့တဲ့အတွက် ဒီနှစ်ဗိုလ်လုပွဲမှာ ချန်ပီယံဆုကို ရယူနိုင်ဖို့ ပြင်းပြင်းထန်ထန် လေ့ကျင့်ပြင်ဆင်မှုတွေ ပြုလုပ်ထားတာပါ။ 

မန်စီးတီးနဲ့ ပဲလေ့စ်အသင်းတို့ရဲ့ FA ဖလားဗိုလ်လုပွဲကို မေလ ၁၇ ရက် ည ၁၀ နာရီ ဝင်ဘာလေကွင်းမှာ ကျင်းပသွားမှာ ဖြစ်ပါတယ်။

Source: CNA

CNI Sport News

၂၀၂၅ ခုနှစ်၊ မေလ ၁၇

ယူနိုက်တက်အသင်းနည်းပြ အာမိုရင်က ချယ်လ်ဆီးအသင်းကို ၁ ဂိုး-ဂိုးမရှိနဲ့ အရေးနိမ့်ခဲ့တဲ့ပွဲက ယူရိုပါလိဂ် ဗိုလ်လုပွဲအတွက် အသင်းလူစာရင်းကို ဆုံးဖြတ်ဖို့ အကူအညီဖြစ်တယ်လို့ ပြောခဲ့ပါတယ်။ 

အာမိုရင်က “ဒီပွဲက ဗိုလ်လုပွဲအတွက် ပြင်ဆင်ဖို့ အလွန်ကောင်းမွန်တဲ့ ပွဲဖြစ်ခဲ့ပါတယ်။ ကစားသမားတွေကို ၁၀ ရက်လောက် ပွဲမကစားခိုင်းခဲ့ရင် အမှားအယွင်း ဖြစ်သွားပါလိမ့်မယ်။ သူတို့ဟာ ဒီပွဲမှာ ဘောလုံးပိုင်ဆိုင်မှု ရယူနိုင် ခဲ့ပြီး ပြိုင်ဘက်အသင်းကို တွန်းအားပေးနိုင်ခဲ့ပါတယ်။ ဒီကလပ်မှာတော့ ပွဲတွေအနိုင်ရဖို့ လိုအပ်ပြီး ကျနော်တို့ဟာ နိုင်ပွဲတွေ မရယူနိုင်ခဲ့ပါဘူး။ ဒီပွဲက ဗိုလ်လုပွဲအတွက် ပွဲထွက်လူစာရင်းကို ရွေးချယ်ဖို့ ကျနော့်ကို အများကြီး အကူအညီ ဖြစ်စေခဲ့ပါတယ်။ ဗိုလ်လုပွဲမှာ ဂိုးတွေအများကြီး သွင်းယူနိုင်ဖို့ မျှော်လင့်တယ်”လို့ ပြောခဲ့တာပါ။ 

ယူနိုက်တက်အသင်းဟာ ဒီရှုံးပွဲကြောင့် ဒီရာသီ ပရီးမီးယားလိဂ်ပြိုင်ပွဲမှာ ၁၈ ပွဲအထိ ရှုံးပွဲကြုံတွေ့ခဲ့ပြီး ၈ ပွဲဆက် နိုင်ပွဲ ပျောက်ဆုံးခဲ့တာဖြစ်ပါတယ်။ 

ဒါဟာ ယူနိုက်တက်အသင်းအတွက် ပရီးမီးယားလိဂ်သမိုင်းမှာ ပထမဆုံးအကြိမ် အရှည်ကြာဆုံး နိုင်ပွဲပျောက်ဆုံး ခဲ့တာပါ။ 

ချယ်လ်ဆီးနဲ့ယူနိုက်တက် ယှဉ်ပြိုင်နေစဉ်

ယူနိုက်တက်အသင်းဟာ ပရီးမီးယားလိဂ် ပြိုင်ပွဲမှာ ရမှတ် ၃၉ မှတ်နဲ့ အမှတ်ပေးဇယားအဆင့် ၁၆ နေရာမှာ ရပ်တည်နေတာ ဖြစ်ပါတယ်။ 

ချယ်လ်ဆီးအသင်းကတော့ ဒီနိုင်ပွဲကြောင့် အမှတ်ပေးဇယားအဆင့် ၄ နေရာအထိ တက်နိုင်ခဲ့ပြီး နောက်ဆုံး ပွဲစဉ်မှာ အနိုင်ရခဲ့ရင် လာမယ့်ရာသီ ချန်ပီယံလိဂ်ပြိုင်ပွဲ ယှဉ်ပြိုင်ခွင့်ရရှိမှာပါ။ 

ယူနိုက်တက်အသင်းဟာ ပရီးမီးယားလိဂ်သမိုင်းမှာ အဆိုးရွားဆုံး အခြေအနေနဲ့ ကြုံတွေ့နေရပေမယ့် ယူရိုပါလိဂ် ဗိုလ်လုပွဲ ယှဉ်ပြိုင် ကစားရဖို့ရှိနေပြီး နိုင်ပွဲရယူနိုင်ခဲ့ရင် လာမယ့်ရာသီ ချန်ပီယံလိဂ်ပြိုင်ပွဲ ယှဉ်ပြိုင်ခွင့် ရရှိမှာဖြစ် ပါတယ်။ 

အဲဒါကြောင့် ယူနိုက်တက်အသင်းဟာ ယူရိုပါလိဂ်ပြိုင်ပွဲကို အပြည့်အဝ အာရုံစိုက်နေတာပါ။ 

ယူနိုက်တက်နဲ့ စပါးအသင်းရဲ့ ယူရိုပါလိဂ်ဗိုလ်လုပွဲကို မေလ ၂၂ ရက် ဘီလ်ဘာအိုအသင်း အိမ်ကွင်းမှာ ယှဉ်ပြိုင် သွားမှာ ဖြစ်ပါတယ်။ 

Source: tntsports 

CNI Sport News

၂၀၂၅ ခုနှစ်၊ မေလ ၁၆

၁၃ နှစ်ကြာကစားခဲ့တဲ့ လက်စတာအသင်းကနေ ရာသီကုန်မှာ ထွက်ခွာမယ့် အသင်းခေါင်းဆောင်ဗာဒီက သူဟာ ပရီးမီးယားလိဂ်မှာ ကစားနိုင်သေးတယ်လို့ ယုံကြည်ကြောင်း ပြောခဲ့ပါတယ်။ 

ဗာဒီက “ကျနော်ဟာ ထိပ်တန်းအဆင့်မှာ ၁၀၀ ရာခိုင်နှုန်း ဆက်ပြီးရှိချင်ပါတယ်။ ဒါပေမယ့် ဘောလုံးဆိုတာ ရူးသွပ်ဖို့ကောင်းတဲ့ ကမ္ဘာပါ။ ဒါကြောင့် ဘာတွေ ဖြစ်လာမလဲဆိုတာ ဘယ်သူမှ သိနိုင်မှာမဟုတ်ပါဘူး။ ကျနော် ဟာ နောက်လာမယ့် အရာအတွက် အမြဲတမ်း စိတ်လှုပ်ရှားနေပါတယ်။ ကျနော့် ခြေထောက်တွေ အဆင်ပြေနေတဲ့ အချိန်ထိ ဆက်ကစားသွားမယ်” လို့ Sky Sports ကိုပြောခဲ့တာပါ။ 

ဗာဒီဟာ လာမယ့် အစ်စဝှစ်ချ်အသင်းနဲ့ အိမ်ကွင်းပွဲစဉ်မှာ လက်စတာအသင်းအတွက် သူ့ရဲ့နောက်ဆုံးပွဲစဉ်အဖြစ် ပါဝင်ကစားသွားမှာ ဖြစ်ပါတယ်။ 

ဒီပွဲဟာ ဗာဒီအတွက် လက်စတာအသင်း ကစားသမားဘဝ ပွဲပေါင်း ၅၀၀ ပြည့်မယ့်ပွဲပါ။

ဗာဒီကို တွေ့ရစဉ်

လက်စတာအသင်းဟာ ရာသီပိတ် နောက်ဆုံးပွဲစဉ်အဖြစ် ဘုန်းမောက်အသင်းနဲ့ ယှဉ်ပြိုင်ရဖို့ ရှိသေးပေမယ့် ဗာဒီကို ဒီပွဲမှာ အသုံးပြုဖို့ မရှိတော့တာဖြစ်ပါတယ်။ 

လက်စတာအသင်းကနေ ထွက်ခွာမယ့် အသက် ၃၈ နှစ်အရွယ်ရှိ ဗာဒီကို ခေါ်ယူဖို့ ချန်ပီယံရှစ်ကလပ်တွေ စိတ်ဝင်စားနေသလို မေဂျာလိဂ် ကလပ်အသင်း အချို့ကလည်း သူ့ကို ပစ်မှတ်ထားနေတာပါ။ 

ဒါပေမယ့် ဗာဒီကတော့ ပရီးမီးယားလိဂ်ပြိုင်ပွဲလို ထိပ်တန်းအဆင့်မှာ ပွဲတွေဆက်ပြီးကစားဖို့ အာရုံစိုက် နေတာဖြစ်ပါတယ်။

ဗာဒီဟာ ဒီရာသီ ပရီးမီးယားလိဂ်ပြိုင်ပွဲမှာ လက်စတာအသင်းအတွက် ၈ ဂိုးသာ သွင်းယူနိုင်ခဲ့ပြီး အသင်းကို တန်းဆင်းဇုန်ကနေ လွတ်မြောက်အောင် ကူညီပေးနိုင်ခဲ့ခြင်းမရှိတာပါ။ 

ဗာဒီဟာ သူ့ရဲ့ ၁၃ နှစ်ကြာ လက်စတာအသင်း ကစားသမားဘဝမှာ ပရီးမီးယားလိဂ်၊ FA ဖလားနဲ့ ကွန်မြူနတီဒိုင်း ၁ ကြိမ်စီ၊ ချန်ပီယံရှစ်ဖလား ၂ ကြိမ် ရယူနိုင်ခဲ့တာဖြစ်ပါတယ်။

Source: Dailymail

CNI Sport News

၂၀၂၅ ခုနှစ်၊ မေလ ၁၆

အာဂျင်တီးနားအသင်းဟာ ဇွန်လထဲမှာ ယှဉ်ပြိုင်မယ့် ၂၀၂၆ ကမ္ဘာ့ဖလားခြေစစ်ပွဲ (တောင်အမေရိကဇုန်) ပွဲတွေ အတွက် လူစာရင်း ထုတ်ပြန်ခဲ့တာမှာ အသင်းခေါင်းဆောင် မက်ဆီနဲ့ ယူနိုက်တက်အသင်းကြယ်ပွင့် ဂါနာချိုတို့ ပြန်လည် ပါဝင်လာခဲ့ပါတယ်။

အသက် ၃၇ နှစ်အရွယ်ရှိ မက်ဆီဟာ ဒဏ်ရာကြောင့် ပြီးခဲ့တဲ့မတ်လက ခြေစစ်ပွဲတွေမှာ အာဂျင်တီးနားအသင်း အတွက် မပါဝင်နိုင်ခဲ့တာပါ။

ဒါပေမယ့် အာဂျင်တီးနားအသင်းဟာ ဥရုဂွေးနဲ့ ဘရာဇီးလ်အသင်းတို့ကို အနိုင်ယူပြီး ၂၀၂၆ ကမ္ဘာ့ဖလားပြိုင်ပွဲ ဝင်ရောက် ယှဉ်ပြိုင်ခွင့်ရရှိဖို့ ခြေစစ်ပွဲ အောင်မြင်ခဲ့တာ ဖြစ်ပါတယ်။

မက်ဆီဟာ အာဂျင်တီးနားအသင်းနဲ့ ကမ္ဘာ့ဖလားခြေစစ်ပွဲ ပါဝင်ယှဉ်ပြိုင်ပြီးရင် အမေရိကန်နိုင်ငံထံ ပြန်လာကာ အင်တာမိုင်ယာမီအသင်းနဲ့ ဖီဖာကလပ် ကမ္ဘာ့ဖလားပြိုင်ပွဲ ယှဉ်ပြိုင်ရမှာပါ။

ယူနိုက်တက်အသင်း တောင်ပံကစားသမား ဂါနာချိုဟာ ပြီးခဲ့တဲ့ပွဲတွေမှာ နည်းဗျူဟာဆိုင်ရာ အကြောင်း ပြချက်တွေနဲ့ အာဂျင်တီးနားအသင်း လူစာရင်းကနေ ချန်လှပ်ခြင်းခံခဲ့ရတာ ဖြစ်ပါတယ်။

ဂါနာချိုကို တွေ့ရစဉ်

ဒါပေမယ့် ဂါနာချိုဟာ ဇွန်လထဲမှာ ယှဉ်ပြိုင်မယ့် ၂၀၂၆ ကမ္ဘာ့ဖလား ခြေစစ်ပွဲတွေအတွက် အာဂျင်တီးနား အသင်းရဲ့ ကစားသမား ၂၈ ဦး လူစာရင်းမှာ ပါဝင်လာခဲ့တာပါ။

ခြေစစ်ပွဲ ၂ ပွဲထဲက ပထမဆုံးပွဲစဉ်ကို ပွဲပယ်ကြောင့် ပါဝင်နိုင်မှာ မဟုတ်တဲ့ အော်တာမန်ဒီ၊ အန်ဇိုဖာနန်ဒက်ဇ်နဲ့ ပါရီဒက်စ်တို့ကို နည်းပြစကာလိုနီက အာဂျင်တီးနားအသင်း လူစာရင်းထဲမှာ ထည့်သွင်းခဲ့ပါတယ်။

ဒိုင်ဘားလားနဲ့ မွန်တီရယ်လ်တို့ဟာ ဒဏ်ရာကြောင့် လူစာရင်းထဲ မပါဝင်ခဲ့သလို နောက်ခံလူတွေဖြစ်တဲ့ အကူနာနဲ့ ပီဇဲလ်လာတို့ကို နည်းပြက လူစာရင်းကနေ ချန်လှပ်ခဲ့ပါတယ်။ 

အာဂျင်တီးနားအသင်းဟာ ၂၀၂၆ ကမ္ဘာ့ဖလား ခြေစစ်ပွဲတွေအဖြစ် ဇွန်လ ၅ ရက်မှာ ချီလီအသင်းနဲ့ အဝေးကွင်း၊ ၁၀ ရက်မှာ ကိုလံဘီယာအသင်းကို အိမ်ကွင်းယှဉ်ပြိုင်ရမှာပါ။ 

အာဂျင်တီးနားအသင်းဟာ ၂၀၂၆ ကမ္ဘာ့ဖလားခြေစစ်ပွဲ(တောင်အမေရိကဇုန်)မှာ ၁၄ ပွဲ ကစားထားပြီး ရမှတ် ၃၁ မှတ်နဲ့ အမှတ်ပေးဇယားအဆင့် ၁ နေရာမှာ ရပ်တည်နေတာဖြစ်ပါတယ်။ 

Source: ESPN

CNI Sport News

၂၀၂၅ ခုနှစ်၊ မေလ ၁၆

ယူနိုက်တက်အသင်းဟာ အက်စတွန်ဗီလာအသင်းထံ အငှားချထားတဲ့ တိုက်စစ်မှူး ရက်ရှ်ဖို့ဒ်ကို လာမယ့် နွေရာသီ အပြောင်းရွှေ့မှာ ပေါင်သန်း ၄၀ နဲ့ အပြီးသတ် ရောင်းချဖို့ အဆင်သင့် ဖြစ်နေပါတယ်။ 

ဒါပေမယ့် အက်စတွန်ဗီလာအသင်းဟာ ရက်ရှ်ဖို့ဒ်ကို ဝယ်ယူဖို့အတွက် ပထမဆုံး ရွေးချယ်ခွင့်မရှိဘူးလို့ သိရပါ တယ်။ 

အက်စတွန်ဗီလာအသင်းဟာ ပြီးခဲ့တဲ့ဇန်နဝါရီမှာ ရက်ရှ်ဖို့ဒ်ကို အငှားနဲ့ခေါ်ယူခဲ့ချိန်က ရာသီကုန်ချိန်မှာ ပေါင်သန်း ၄၀ နဲ့ အပြီးသတ်ခေါ်ယူနိုင်မယ့် အချက်စာချုပ်ထဲမှာ ပါဝင်ခဲ့ပါတယ်။ 

ယူနိုက်တက်အသင်းကတော့ လာမယ့် နွေရာသီ အပြောင်းအရွှေ့မှာ ရက်ရှ်ဖို့ဒ်အတွက် သူတို့သတ်မှတ်ထားတဲ့ ပြောင်းရွှေ့ကြေးကို ပေးချေနိုင်တဲ့ ဘယ်အသင်းမဆို အပြောင်းအရွှေ့အတွက် လွတ်လပ်စွာ ဆွေးနွေးမှုတွေ ပြုလုပ်ခွင့်ရှိတယ်လို့ ပြောထားတာပါ။

ရက်ရှ်ဖို့ဒ်ဟာ လက်ရှိအချိန်မှာ ဒဏ်ရာကြောင့် ဒီရာသီ လက်ကျန်ပွဲတွေမှာ အက်စတွန်ဗီလာအသင်းအတွက် ပါဝင်နိုင်ခြင်း မရှိတော့ပါဘူး။

ရက်ရှ်ဖို့ဒ်ကို တွေ့ရစဉ်

ရက်ရှ်ဖို့ဒ်ဟာ အက်စတွန်ဗီလာအသင်းအတွက် ၁၇ ပွဲ ပါဝင်ကစားခဲ့တာမှာ ၄ ဂိုးသွင်းပြီး ၆ ဂိုးဖန်တီးကာ ခြေစွမ်း ပြသနိုင်ခဲ့တာပါ။

ယူနိုက်တက်အသင်းနဲ့ ၂၀၂၈ ခုနှစ်အထိ စာချုပ်ရှိနေတဲ့ ရက်ရှ်ဖို့ဒ်ဟာ ဇူလိုင်အစမှာ ရာသီကြိုလေ့ကျင့်မှုတွေ ပြုလုပ်ဖို့ ကာရင်တန် လေ့ကျင့်ရေးကွင်းကို ပြန်လာရဖွယ်ရှိနေပါတယ်။

ယူနိုက်တက်အသင်းဟာ ရက်ရှ်ဖို့ဒ်ကို ရောင်းချဖို့ စီစဉ်ထားပေမယ့် အဆင်မပြေခဲ့ရင်လည်း နောက်ထပ် အငှားချဖို့ ဖြစ်နိုင်ဖွယ်ရှိနေတာပါ။

ရက်ရှ်ဖို့ဒ်ဟာ ချန်ပီယံလိဂ်ပြိုင်ပွဲ ယှဉ်ပြိုင်မယ့် အသင်းထံ ပြောင်းရွှေ့ချင်ကြောင်း ရှင်းရှင်းလင်းလင်း ပြောထား ပါတယ်။ 

အင်္ဂလန်ကစားသမားဟာ နည်းပြအာမိုရင် လက်ထက်မှာ ယူနိုက်တက်အသင်းအတွက် ပြန်လည် ကစားပေး ဖွယ်မရှိလို့ ထွက်ခွာတာက အသင်းအတွက်ရော ကစားသမားအတွက်ပါ အကောင်းဆုံးဖြစ်နိုင်တယ်လို့ သုံးသပ် ထားကြတာပါ။

ရက်ရှ်ဖို့ဒ်ဟာ လက်ရှိအချိန်မှာ ဒဏ်ရာကနေ အမြန်ဆုံး ပြန်ကောင်းနိုင်ဖို့ လုပ်ဆောင်နေပြီး လာမယ့် ဇွန်လထဲ ယှဉ်ပြိုင်မယ့် အင်္ဂလန်အသင်းရဲ့ ပွဲတွေမှာ ပါဝင်နိုင်ဖို့ မျှော်လင့်နေပါတယ်။ 

အင်္ဂလန်အသင်းဟာ ဇွန်လထဲမှာ ၂၀၂၆ ကမ္ဘာ့ဖလားခြေစစ်ပွဲအဖြစ် အန်ဒိုရာအသင်း၊ ခြေစမ်းပွဲအဖြစ် ဆီနီဂေါ အသင်းနဲ့ ယှဉ်ပြိုင်သွားမှာ ဖြစ်ပါတယ်။

Source: Goal

CNI Sport News

၂၀၂၅ ခုနှစ်၊ မေလ ၁၆

ဘာစီလိုနာအသင်းဟာ မြို့ခံပြိုင်ဘက် အက်စ်ပန်ညိုအသင်းကို ၂ ဂိုး-ဂိုးမရှိနဲ့ အနိုင်ရခဲ့ပြီးနောက် လာလီဂါ ချန်ပီယံဆုကို ၂၈ ကြိမ်မြောက် ရရှိသွားခဲ့ပါတယ်။ 

ဒီပွဲမှာ ဘာစီလိုနာအသင်းအတွက် ဂိုးတွေကို ယာမဲလ်နဲ့ ဖာမင်လိုပက်ဇ်တို့က သွင်းယူခဲ့တာပါ။ 

ဘာစီလိုနာအသင်းဟာ ဒီနိုင်ပွဲကြောင့် ဒီရာသီ လာလီဂါပွဲစဉ်ကစားဖို့ ၂ ပွဲ ကျန်ရှိသေးချိန်မှာ အမှတ်ပေးဇယား အဆင့် ၂ နေရာက ရီးရယ်လ်အသင်းကို ရမှတ် ၇ မှတ်ဖြတ်ပြီး ချန်ပီယံအဖြစ် အောင်ပွဲခံနိုင်ခဲ့တာ ဖြစ်ပါတယ်။ 

ရီးရယ်လ်အသင်းဟာ လာလီဂါချန်ပီယံဖြစ်ခဲ့တဲ့ ဘာစီလိုနာအသင်းကို သူတို့ရဲ့ဆိုရှယ်မီဒီယာကနေ ဂုဏ်ပြုမှု ပြုလုပ်ခဲ့တာပါ။ 

ဘာစီလိုနာအသင်းဟာ ဒီရာသီမှာ ကိုပါဒယ်ရေးနဲ့ စပိန်စူပါဖလားတို့ကိုလည်း ရယူထားတာကြောင့် နည်းပြ ဟန်ဆီဖလစ်ဟာ သူ့ရဲ့ပထမဆုံးရာသီမှာ အသင်းကို ပြည်တွင်းဖလား ၃ ခုစလုံး ရယူပေးနိုင်ခဲ့တာဖြစ်ပါတယ်။ 

အောင်ပွဲခံနေကြတဲ့ ဘာစီလိုနာအသင်းသားတွေကို တွေ့ရစဉ်

ဘာစီလိုနာအသင်းဟာ စပိန်စူပါဖလားနဲ့ ကိုပါဒယ်ရေးဖလား ဗိုလ်လုပွဲတွေမှာ ရီးရယ်လ်အသင်းကို အနိုင်ရပြီး ချန်ပီယံဆုကို ရယူနိုင်ခဲ့ကာ ဒီရာသီ ရီးရယ်လ်အသင်းနဲ့ တွေ့ဆုံခဲ့တဲ့ ၄ ပွဲစလုံး အနိုင်ရယူနိုင်ခဲ့တာပါ။

ဘာစီလိုနာအသင်း နည်းပြဟန်ဆီဖလစ်က “ဘာစီလိုနာအသင်းမှာ ဆုဖလားတွေ ရယူနိုင်ရမှာဖြစ်ပြီး ၃ လုံး ရယူနိုင်ခဲ့တာက ကောင်းမွန်ခဲ့ပါတယ်။ စိတ်ဓာတ်ပိုင်း ကြံ့ခိုင်နေဖို့က အမြဲတမ်းအရေးကြီးပါတယ်။ ဇန်နဝါရီမှာ စူပါဖလား ရယူနိုင်ခဲ့တာက ကျနော်တို့ကို ယုံကြည်မှုတွေပေးခဲ့တာပါ။ ကစားသမားတွေ အမြင့်ဆုံးအဆင့် ရောက်လာတာကို ကြည့်ရတာကောင်းမွန်သလို အခြားသူတွေလည်း တိုးတက်မှုရှိလာတယ်”လို့ Movistar plus ကို ပြောခဲ့ပါတယ်။ 

ဘာစီလိုနာအသင်းဟာ ချန်ပီယံလိဂ်ပြိုင်ပွဲမှာ ဆီမီးဖိုင်နယ်အထိ ရောက်ရှိခဲ့ပြီး အင်တာမီလန်အသင်းကို အချိန် ပိုမှာ အရေးနိမ့်ခဲ့တာကြောင့် တစ်ရာသီအတွင်း ဆုဖလား ၄ လုံးရယူနိုင်မယ့်မျှော်လင့်ချက်ကို အဆုံးသတ်ခဲ့ရ တာပါ။ 

ဘာစီလိုနာအသင်းဟာ လာလီဂါ ချန်ပီယံအောင်ပွဲအတွက် အမိုးဖွင့်ဘတ်စ်ကားနဲ့ သောကြာနေ့မှာ မြို့တွင်း လှည့်ပတ် အောင်ပွဲခံမှာဖြစ်ပြီး တနင်္ဂနွေနေ့မှာ ကစားမယ့် ဗီလာရီးရယ်လ်အသင်းနဲ့ အိမ်ကွင်းပွဲစဉ်မှာ ဆုဖလားရယူသွားမှာ ဖြစ်ပါတယ်။ 

Source: bbc

CNI Sport News

၂၀၂၅ ခုနှစ်၊ မေလ ၁၅

စပါးအသင်းကွင်းလယ် တိုက်စစ်ကစားသမား ကူလူဆက်ဗ်စကီးဟာ ဒဏ်ရာကြောင့် ယူနိုက်တက်အသင်းနဲ့ ယှဉ်ပြိုင်မယ့် ယူရိုပါလိဂ် ဗိုလ်လုပွဲကို လွဲချော်သွားခဲ့ပြီ ဖြစ်ပါတယ်။

ကူလူဆက်ဗ်စကီးဟာ စပါးအသင်းက ပဲလေ့စ်အသင်းကို ၂ ဂိုး-ဂိုးမရှိနဲ့ အရေးနိမ့်ခဲ့တဲ့ ပရီးမီးယားလိဂ်ပွဲစဉ်ရဲ့ ပွဲချိန် ၁၉ မိနစ်မှာ ဒဏ်ရာရရှိသွားခဲ့တာကြောင့် လူစားလဲခံခဲ့ရတာပါ။

ကူလူဆက်ဗ်စကီးဟာ လက်ရှိအချိန်မှာ သူ့ရဲ့ညာဘက်ဒူးကို ခွဲစိတ်ကုသမှု ခံယူခဲ့ရပြီး ဒီရာသီ စပါးအသင်းရဲ့ လက်ကျန်ပွဲစဉ်တွေကို လွဲချော်သွားခဲ့ပါတယ်။ 

အသက် ၂၅ နှစ်အရွယ်ရှိ ကူလူဆက်ဗ်စကီးဟာ ဒီရာသီမှာ စပါးအသင်းအတွက် ပြိုင်ပွဲစုံပွဲပေါင်း ၅၀ ပါဝင် ကစားထားပြီး ၁၀ ဂိုးသွင်းယူကာ ဂိုးဖန်တီးမှု ၁၁ ကြိမ် ပြုလုပ်ထားတာပါ။ 

စပါးအသင်းဟာ ကူလူဆက်ဗ်စကီး မတိုင်မီက ကွင်းလယ်လူတွေဖြစ်တဲ့ မက်ဒီဆန်နဲ့ ဘာ့ဂ်ဗောလ်ကို ဒဏ်ရာတွေ ကြောင့် ရာသီကုန်အထိ အနားပေးခဲ့ရတာ ဖြစ်ပါတယ်။

စပါးအသင်းအတွက်တော့ ယူရိုပါလိဂ် ဗိုလ်လုပွဲမတိုင်မီ အဓိက ကစားသမားတွေကို ဆုံးရှုံးနေရတာကြောင့် ကြီးမားတဲ့ ထိုးနှက်ချက်ဖြစ်ခဲ့တာပါ။ 

ကူလူဆက်ဗ်စကီးကို တွေ့ရစဉ်

ယူနိုက်တက်အသင်းကလည်း နောက်ခံလူတွေဖြစ်တဲ့ ဒီလစ်နဲ့ ယိုရို ဒဏ်ရာတွေကြောင့် ယူရိုပါလိဂ်ဗိုလ်လုပွဲကို လွဲချော်မယ့်အပေါ် စိုးရိမ်မှုတွေရှိနေပါတယ်။ 

စပါးနဲ့ ယူနိုက်တက်အသင်းတို့ဟာ ဒီရာသီ ပရီးမီးယားလိဂ်ပြိုင်ပွဲမှာ ရလဒ်တွေ အလွန်ဆိုးရွားနေပြီး စပါးအသင်း က အမှတ်ပေးဇယားအဆင့် ၁၇၊ ယူနိုက်တက်အသင်းက အဆင့် ၁၆ နေရာမှာ ရပ်တည်နေတာပါ။ 

ဒါပေမယ့် နှစ်သင်းစလုံးဟာ ယူရိုပါလိဂ်ပြိုင်ပွဲမှာ ဗိုလ်စွဲရင် ချန်ပီယံလိဂ် ဝင်ခွင့်ရယူနိုင်မယ့် မျှော်လင့်ချက် အတွက် ဗိုလ်လုပွဲကို အပြည့်အဝ အာရုံစိုက်ပြီး ပြင်ဆင်မှုတွေ ပြုလုပ်နေပါတယ်။ 

ယူရိုပါလိဂ် ဗိုလ်လုပွဲ မတိုင်မီ လာမယ့် ပရီးမီးယားလိဂ် ပွဲစဉ်အဖြစ် စပါးအသင်းက အက်စတွန်ဗီလာ၊ ယူနိုက်တက်အသင်းက ချယ်လ်ဆီးအသင်းနဲ့ ယှဉ်ပြိုင်ရမှာဖြစ်ပါတယ်။ 

Source: bbc